|
|
 واخيرا تحقق الحلم الكبير، مهاجرو السودان يعودون للوطن ويرفعون راية النصر
|
استطاع عدد كبير من السودانيين المهاجرين والمغتربين ان يخططوا لحلم العودة للوطن الجريح،
كانوا يلتقون بمعدل يومى فى الانترنيت،
وفى يوم من الايام بدأوا حوارا حقيقيا حول الاغتراب والهجرة وعوائدها السيئة عليهم وعلى اسرهم وعلى الوطن،
قسموا انفسهم الى تخصصات
الطب، الهندسة، الزراعة، الرى، الهندسة المدنية، التخطيط، المشاريع العمرانية للبناء والتشييد، اقتصاد وتجارة، سياسة داخلية ، سياسة خارجية، الاجتماعيين نظموا انفسهم للعمل قصاد مشكلات المجتمع، المراة الطفل الاسرة،المثقفين الاعلاميين، وضعوا خطة قوية
اتصلوا بالمنظمات العالمية التى تساعد على انماء المشاريع، كتبوا دراسات الجدوى، وحملوا معهم اطفال المشاريه والخطط فى دفاترهم
اتفقوا مع السودانيين بالداخل على ترتيبات العودة،
اتفقوا على اليوم والساعة
وفى يوم الحلم الاكبر، ازدحمت المطارات بهم وبامتعتهم وباطفالهم زوى اللكنات الغريبة،
وازدحمت غرف الاستقبال بزويهم واصدقائهم المستقبلين.
كنت تستطيع يومها ان تفرق بين الملامح التى غرقت فى النعمة والرخاء وبين قاطن الوطن المهدود الملامح ومتعب القسمات، هده شظف العيش والسعى وراء الرزق، والآخر هده موت الحلم الزى يمارسه كل يوم وهو بعيد عن الوطن،
وكان يوما ...
اجهش الناس فيه بالبكاء، وعلت الزغاريد
والتقى جيل مريد مصادم بحث عن زاته ورسم مصيره بيده، بجيل كاد ان يفقد الامل فى الغد،
وبدات فى اليوم الثانى،
خطة الوعى الكبرى
وبناء سودان حر جميل ومعافى
باهله ودماء ابنائه
سودان الامجاد المنتحرة والسؤدد الضائع بدا يتنفس سماء الحرية من جديد.
ياربى دة كان حلم ولا علم؟
بالله مش فكرة حلوة؟
ماتجوا نعملها؟
مش ممكنة ونحن هنا؟
|
|
 
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
العزيزة تماضر
دا حلمنا طول عمرنا وطن يلمنا ويحقق حلمنا
الانجازات الكبيرة تبدأ بأحلام والأحلام تصبح أفكار والأفكار توضع موضع الدرس والمناقشة ودراسة الجدوى و... الخ
أرجو أن يصبح الحلم حقيقة فلنتنادى جميعاً بالداخل والخارج ونبدأ عملاً جاداً . رجائي أن يستجيب من بالداخل لنداءات وتطلعات وآمال من هم بالخارج .
حلم كل من بالخارج أن يعود إلى حضن الوطن الغالي ، ولكن الخوف من التجربة يحول دون ذلك خاصة وأن أمام أعيننا نماذج حية من الذين شمروا وعزموا وشدوا الرحال إلى ربوع الوطن ، ولكن للاسف عاد منهم ما يصل الى 90 بالمائة والعشرة بالمائة الأخرى يجاهدون لايجاد سبيل للخروج مرة أخرى
نسأل الله أن يحقق الاحلام
الفكرة جميلة ولتكن مشروعاً قومياً ، وعليك مسئولية إدارة هذا المشروع ونحن من خلفك
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
وما تخافوا تفقدوا دخولكم الهسه دى، لما تعيشوا فى وطنكم، عزتكم ما عندها تمن، ولو السودان كان فى يد مسئولين بحبوهو ودايرين خيرو، شنقلى طوباية تلقى لى دهباية، السودان دة كلو خير، نحن بس النصبر عليهو لما يقيف على كرعينو ، ولمن يكون احسن بلد فى التاريخ المعاصر بجهدنا، حنفتخر بيه اكتر من فخرنا بانجازنا البنعملو فى دول الاغتراب،
يللا المعانا منو؟
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
الغالية بت البلد الاصيلة
معاك مية بالمية ودة الحلم العايشين بيه
ولو ما حققناه التاريخ ما حيرحمنا
وان شاء الله قريب يتحقق حلمنا
وتعالوا نبدأ العمل من البورد
والحمد لله الكفاءات كلها متوفرة وكل مناطق السودان ممثلة تقريباوالفكرة نرسل رسائل اليكترونية للمنظمات المهتمة بشئون لسودان العالمية والمحلية ونقول ليهم نيابة عن
99%من الشعب السودانىاننا ملينا الحرب وعايزين السلام بدون شروط غازى صلاح الدين وأذا عايزين اتأكدوا يرسلوا لجنة تعمل استفتاء للشعب السودانى وتوفر التعب وتكاليف المفاوضات مع حكومة الجبهة لأنها لا تمثل الشعب السودانى
بس عايزين نعرف عناوين الجماعة الوسطاء ديل
يلا همتكم ياشباب
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
الاستاذة المبدعة تماضر
احبييك وانت تقبضين على جمر المحبة الحارق احيانا
خيال الفنان وروح الانسان فيك وقلب المحب للوطن الجميل ن جعلوك تحلمين هذا الحلم الجميل وهو حلم يداعب كل سوداني محب لوطنه ويود ان يراه اجمل وافضل واعلى مكانة . ويبقى لنا رغم كل مايجري ان نشرع باب الامل وان صعب تحققه ونرجو الله ان يحقق رجاءاتنا بسودان يلتقي فيه الكل ويعملون يدا واحدة تبني ما انهدم وانهار وهو كثير كثير.
واذ نحلم لا بد من اسئلة تتوارد الى الذهن :
1- هل يمكن ان يعود كل السودانيين المهاجرين الى وطنهم وفيهم من ارسى قلوع الرحيل واستوطن بكامل اسرته في مهاجر بعيدة؟
2- 2-هل تتحقق شروط عودةالسودانيين المهاجرين ام يعودوا قبل ان تتحقق هذه الشروط ، وتعلمين ان الوضع السياسي وما جره من اوضاع اقتصادية واجتماعية سيئة – قد دفع بالكثيرين للنزوح عن الوطن.
3- 3- هل يفضل بعضنا البقاء في هذه المهاجر التي توفر لهم شروطا معيشية افضل لهم ولأبنائهم؟
4- هل يمكن ان نتفق نحن السودانيين على شئ فننفذه دون خلافات؟
5- هل يمكن ان تتحقق عودة كهذه التي تحلمين بها وكيف ومتى؟
مرة اخرى احييك
وابق لنا دوما
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
اختنا تماضــــر
نحن ناس جدة ديل ناس السودان ما حاسبننا مغتربين لمن نمشي اجازة زينا وزي الجاي من العمرة او الحج
كدي اغشونا بيجاي عمرو وحجو وبنستفكم ونسفركم ترانا بنقعد لانو بعدكم برضو في ناس جايين
نحن هنا زي سواقين التاكسي يا المينا يا المطار وبالعكس وبعد ده كلو لازم تغمت
والا يمشو البلد اهلك يسعلو منك يقولو ما شفناهو ودي معناها ما غمت لينا
| |
|
|
|
|
|
|
|
|
|
re (Re: Tumadir)
|
تماضــــــــــــــر
واللـــــــــــه العظيم انا معاكم
معليش يا تماضر البوست ده ماشفتو الا هسة
وبعدين الفكرة عندى من قبل البوست عشان
تأااامنو بالجعلنة مع انى دنقلاوى خلاص عشان
تأمنو بالدنقلنة (غايتو انا كتبتها انتو اقروها ) بس
مايكون كلام سااااااكت
انا من بكرة ح ابدأ ارتب شنطتى قبال ما
يكون باللوترى
وانشاءالله يجى اليوم ده
| |
|
|
|
|
|
|
|
|
|
Re: re (Re: boco)
|
وأنا معاك يا تماضر نمشى لى سوداننا الربانا واكلنا خيرو وبقانا ناس لينا وزننا فى الدنيا لازم نرجع ليه ونشيلو فوق الأحداق برغم الكترابة والعلالة الضاربة والسجم والرماد لأن الرماد بيدور الينفضو والسجم بيدور البيزيلو ويخت محلو بوتاجاز بعشرة عيون
يلا ياخوانا أكربوا نصكم ويدكم معانا
ايد فى ايد تجدع بعيد
سوداننا بى خيرو بياكلنا وبياكل جيراننا وجيران جيرانا كمان
مالكم ما بتعرفو تزرعو الخدرة؟؟؟؟؟
مابتعرفوا تحفروا الواطة؟؟؟؟
ما بتعرفوا تدوروا الساقية وتحلبوا البقرة وحتى شفعنا لازم يعرفوا يحلبوا الغنماية لزوم التدريب للبن المعلب والمقنن والمفنن وشاى الضحى وجلسات الشاى بى اللبن فى أحلى صباح صباح البلد الجميل
ونضبح الحمل المدوعل وناكل حتى الكوارع والكرشة ومن غير كفيل
هيا يا شباب شمروا عن سواعد الجد وبلا قرنق بلا قرف بلا لمة
نحن ناس نقوم ونقعد على كيفنا
وسكينا حمرة موقدة ونار للضيفان لسه ما انطفت
أرحكم يا جماعة نقش دموع عشة الشايقية ونغير لى سهير منهج التعليم ونقش حوشنا الكبير ونمرق العناقريب فى القمرة ونتكلم بالموبايلات زى ما دايرين عشام يجيبوا لينا الكسرة من الملازمين بى رقشات خاصة لى فطور بكرة الصباح
يلا يا تماضر أرح تلقونى قدامكم
بس ما اتلفت وراى يقولوا لى الجماعة قالوا ليك جانا اللوترى سورى ما حا نقدر نجى هسع عشان لؤى فى الحضانة مع سيستر مارقريت
أوعكم تمقلبونى
| |
|
|
|
|
|
|
|
|
|
Re: re (Re: Tumadir)
|
الاخت تماضر
السلام عليكم عارفه يا تماضر لقد راودتنى نفس فكرتك وكتبتها فى بوست سابق ولكن ليس بهذا التخطيط الجميل ويا ريت نتفق ونرجع كلنا للبلد
وربنا يرد غربتنا
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
الاستاذة تماضر
عائدون ولو شط المزار, راجعون ولو بعدت الشقة,والله يا استاذة انا اشتهيت امشى وراء المشيعين للمقابر , اشتهيت يوم ساكت ارقد تحت ضوء النجوم واقعد أعد فيها لمن انوم, اشتهيت اسرح بغنم ابليس لانه هنا مافى فرصة تحك راسك,اشتهيت اتوضأ من الازرق العاتى واصلى فى قيفة البحر وأشرب من أزيار المشرع وياريت لو كان الموية ملانه طمى
انا معاك وابدا ماندمان
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: سمندلاوى)
|
أساتذتنا سمندلاوي و تماضر
صحيح الغربه سجم و رماد
الاستادردز عايزه قروش و عايزه قوه في اتخاذ و تنفيذ القرار
لكن كان مشينا هناك...
في ناس قاعدين و في يدهم كل أنواع القوه و إجهاض الأحلام الجميله و التفنن في تسبيب الأذى صفه ملازمه.
مثلا الولد ماشي يجيب رغيف ولا خضار و كشوهو وودوهو المعسكر القايمه منو طياره عشان يمشي تكاتل في حاجات ما من قناعاتو و لا قناعات أهله و لكن لتحقيق أهداف فئات محدده
تفتكروا إنو لو رجعنا
بيدونا فرصه نحكي أحلامنا و خططنا لتنفيذها؟
الله يجيب يوم الرجعه
آمين
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
الاخت /الاستاذة تماضر
لا شك ان حلم العودة للوطن ..يراود كل السودانيين في الخارج للعودة..وفي الداخل للاستقبال الحار.... لكن ما بين الاثنين ...ولتحقيق هذا الحلم ...هناك تساؤلات عدة...وبالإجابة عليها بالصدق..نكون اقتربنا من تحقيق ذلك الحلم..
* هل نحن ( ونحن هذه )اعني بها جيل العشرينات ..والثلاثينات المهاجرين أو المغتربين الذين عاشوا جل حياتهم خارج الوطن ... وتربوا وتعلموا علي ثقافات وقيم وعادات غير السودان ..ولم يكن السودان يعني لهم شئ ..غير الاسم فقط!!! هل هؤلاء عودتهم تكون الحلم الذي يتمنوا تحقيقه؟
* ماذا نتوقع من انسان .. بلا هوية ..وبلا انتماء ... ولا يحمل في مخيلته ..حتي بقايا ذكريات .. ان يفكر يوما ما في العودة للسودان.. ليساهم في تنمية الوطن... ودفع عجلة تقدمه.. ويتفاعل مع قضايا السودان.
انا بصراحة اشك في ذلك ...واظن ان كثير من الاخوة يتفقون معي ...
هنالك شئ مهم جدا .. يوجد فرق كبير بين العودة الطوعية ..والعودة القسرية... وكلنا نعلم ان كثير من دول العالم والتي بها مهاجرين واجانب ...بدأت في تنظيم نفسها ..من خلال الأحزاب والجمعيات الشعبية وغيرها ..في كيفية طرد الاجانب من أراضيها ..لاسباب مختلفة .سياسية،امنية،اقتصادية واحيانا عرقية... وفي هذه الحالة تكون عودة المهاجر او المغترب ..قسرية أو إجبارية ..يعني كراهة. وعندها يكون التفكير مرة اخري في كيفية الهجرة الي دولة اخري.. لأن قناعة العودة للوطن لم تأت بعد.
أما العودة الطوعية ...كثير من السودانيين جربوها ..خصوصا المتواجدين في دول الخليج..لكن سرعان ما عادوا للمهجر مرة أخرى وبأسباب اقوي هذه المرة..عدم التكيف مع طبيعة الحياة هناك ..تغير قيم وسلوكيات الناس ..وصعوبة التعامل معهم... لان إدمان الغربة نفسه ..ترك آثار سلبية كثيرة ..حالت دون الاندماج السريع مرة اخري ..في المجتمع الذي فارقوه ..منذ سنوات...... وهنا يكون دور الأحزاب او المنظمات او حتي الحكومات ...لصياغة برامج ..ودراسات علمية توجه نحو كيفية استيعاب العائدين ..واندماجهم ..وتفاعلهم مع المجتمع من كل النواحي.. بعد سنين الغياب الطويلة.
آخت / تماضر أرجو ان لا تكون نظرتي ..ضبابية ..لكن هذا هو الواقع ..وأنا معاكم يا جماعة ..بس دلونا علي الدرب..!!!.
وتحياتي
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
العزيزة تماضر
كل شباب الوطن المهاجرين
الشباب الجوه الحاره - الفطن الفرن
لكم التحية جميعا احبتي
حقيقي موضوع يستاهل التفكير فيه بل والتنفيذ كمان وانشاءالله قريب بيتحقق الحلم ويبقي واقع معاش قولوا آمييييين
عن نفسي الفكرة موجوده وقريب بتلقوني هناك انشاءالله
اما عن مسألة الاستاندرز والبنية التحتية وخلافه - فالأوطان تبني بسواعد بنيها وبنيها ديل ما القاعدين هناك بس نحن كمان معاهم - خصوصا مع وجود الخبرات المكتسبة للاخوه المهاجرين وكان قلنا بسم الله والله موش نبني بلد والله نبني قاره - يعني يا اخوانا نحن ليه نمشي علي الجاهز - ولا شنو؟؟
عموما اختي تماضر انا اعلنها - انا ابو الجهزان
وزي ما قال حميد
ايد ابوي علي ايد اخوي علي ايدي انا علي ايد وايد نجدع بعيد
وما تنسوا ..
الدار الما داري انا مالي بيه..
ولنا عودة..
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: سمندلاوى)
|
تماضر الممتلئة حتى أخمص الروح بعشق الوطن
فكرة احبل بها كل ليلة وحلم مازال يملأ اوردة نزفى اليومى، بعد ست اعوام من الغياب الروحى رجعت السودان، بذات الحنين وذات الشد الكهربائى لشوارع تسكعنا بها وخطنا على نواصيها احذيتنا مائة مرة، طيلة وجودى فى فيينا لم اقطع صلتى بالسودان واحلامى تتصاعد تجاه احلام نساء جميلات، احلام بسيطة وطبيعية وحين قررت العودة، اه يا تماضر بذات الحنين الصارخ فيك سافرت، دموع ودهشة وشهقة وزفرة حب حارة لتراب السودان، عليك عواصف كل الفرح يا تماضر وانتى تقلبين فى مواجع ما برحت خياشيم احلامى العنيدة، هناك فى السودان، لا استطيع حقيقة التعبير الآن ولم استطيع أن اكتب زفراتى بحجم مأساة حنينى، فقط هذين النصين نزفتهم بعد معاناة ومخاض عسير، لك يا جميلة الروح وطيبة القلب هذين النصيين ولكل الحالمين بالعودة ولى عودة
ام واصل
هانذى أعترف
هانذى أعترف
بان وميض عمري شاخ
وأحلامي لا تنبض وقلبي أنهزم
فمنذ أن رحلت نذرتنى مدينتي
للحزن
للتعب
مدينة تحتضن في أرصفتها الأطفال المشردين
وبائعات الشاي
والفقراء
وتثقب قلبي ألف مرة
وتوصد أبوابها في وجهي أنا الغريبة
بذاكرة طفولتي أبعثر دفاتري القديمة
وأفتح صفحة الفجر
حين كان يعاشقنى في مسامات الحقيقة
هذا الفضاء كان ممتداً ومشرعاً لأبحر صوب عينيك ولا منتهى
غريبة أنا في هذا العالم
في غرفة طفولتي
في الشوارع التي تسكعنا وتظاهرنا بها
واحتضنتني بأحلامي وأحزاني
هدهدتنى طفلة وحفزتني صبية
في ذات الشوارع حسيت غربتي
وضياعي حين لم تعرفني مدينتي
وحين تاهت عنى ملامحها الأليفة
هانذى أعترف
غريبة أنا في هذا العالم
أعترف
بان وميض عمري شاخ
وأحلامي لا تنبض
وقلبي أنهزم
إشراقة مصطفى حامد
فيينا 25/5/2002
حنين
حين عدت لم أجد سوى ركام ذكريات
وأنقاض حكايات قديمة
أين أهلي
أين ديارى
وأين وجه مدينتي الساطع كالنبوة؟
لم يعرفوني
ولم اعرفني
وبقى حبل الوصل بيننا حنين لماضي لن يعود
يونيو 2002 فيينا
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
الاخت الرائعه تماضر ... يا اختي بالله دي فكرتي اقصد حلمتي بيها كيف وبعدين مش في مثل بيقول لا مستحتل تحت ... الخ لكن انا بفكر في تعبير واحد حاجه كده زي الحلم الخرافي ان صحه التعبير بس تعرفي والله يكون يوم المني لما كل الخبرات في مختلف المجالات تعود وتدفع في اتجاه واحد وابتداء من ساعة صفر واحده لنهضة الوطن ياررررررررربي تحقق الحلم الخرافي امين يارب العالمين ودمتي عزيزتي
| |
|
|
|
|
|
|
|
|
|
Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: سمندلاوى)
|
لما ينتهى اليوم الاول والناس الجابهم النداء يصلونا كلهم نخت لستة واحدة ونحاول نتحاور معاهم على التصور، وبعد داك نشوف التخصصات الفيهم ونحرضهم على التخصصات البرة مننا،
ونحاول نشوف شكل الوطن من كل تخصص، حيكون كيف؟ بالعلم كدة، شكل الوطن المرتقب، ناس الكمبيوتر والانترنيت بوصلونا للهيئات والمنظمات البتساعدنا فى انشاء مشاريع، صحية تعليمية كبارى شوارع شركات منتجات زراعية ما تيسر، الطاقة الشمسية مثلا ممكن السودان كهربتو ما تقطع ولا يوم ومصانعو تشتغل تش، منظمات لرفع مستوى الاسر المعيشى والتعليم ومحو الامية ومنظمات غير ربحية تهتم بشئون الاسر الفقيرة وتدريب الامهات على الانتاج لرفع مستواهم،
المعمار ، مواد البناء المتوفرة فى السودان وانشاء المنازل دى مادة غزيرة والمعماريين ممكن يفتونا فيها،
منظمات صحية تهتم بتوفير الدواء للفقراء ورفع مستوى الوعى الصحى،
زراعة طاقة تخطيط مدنى قانون ثقافة، كل مجال نعين زول يبحث لينا ممكن نطورو كيف؟
صدقنى فى الف جهة عندها الرغبة تساعد وعندها موارد مالية وبشرية كفاية لو اتحرينا وكل واحدفى مجالو انا متأكدة فى مخرج للسودان، وبدون مهانة او استعمار او نحوه،
بس خليك معاى فى فوهة الخندق.... ونلم طاقة بشرية مؤمنة بالمبدأ وحنصل
ممكن لو لقينا مريدين كفاية يعزموا لينا احزابهم، ونكون جندنا طاقات سياسية مؤثرة للمشروع،
لو بقول فى كلام منطقى كلمنى،
| |
|
|
|
|
|
|
|
|
 Re: واخيرا تحقق الحلم الكبير، مهاجرو السودان يعودون للوطن ويرفعون راية ال (Re: Tumadir)
|
عمك تنقو والغربة
عمك تنقو في ساعة كربة
قال حرم طلقت الغربة
سلام يا كفيل سلام يا اقامة
اعيش في امدر مرفوع القامه
لا اجي حج ولا بجي عمرة
ومافي جواز اخير بالمرة
نزل السوق شايل اللستة
وللاصحاب وقع بالدسته
شال للعازة زي كم توب
وحسب الحسبة وقال الرووب
ربط الفيديو معاهو الدش
وقال حرمت اعيش في غش
دفع الجمرك كم مليون
وعمك وشو بقي كم لون
قال يا بلدنا حنينة زمان
اية الحاصل في السودان ؟؟
رهن البيت ونزل السوق
وقال حيتاجر في الطايووق
وناس حاج دقنو الماسكة القصة
قالت عمك داير حصة ....
اصلوا الملعب هنا محجوز
وعمك ابدا ما كان كوز
وبي نص حركة وبنك البركة
عمك لاص وضرب الربكة
وقال انا بس عاوز راس مالي
عشان بالمبلغ اربي عيالي
وعمك دار ما خلا بصيرة
وكان في اول صف تاشيرة
قال يا نفط وسلام يا سلام
تكون القصة كلام في كلام ؟؟؟؟؟؟؟؟؟؟
| |
|
|
|
|
|
|
| |
Tumadir
Mirghani Ali AlAmin
جمال السنوسي
manubia
Elmosley
سمندلاوى
Yassir7anna
مهيرة
قرشـــو
سجيمان
nazar hussien
garjah
boco
يازولyazoalيازول
ودالجزيرة
malik_aljack
7abib_alkul
mogn3 7oba
OMDRMAN
Ishraga Mustafa
willeim andrea
اسامة الخاتم
sharnobi
rummana
HAMZA SULIMAN
فيس بوك
تويتر
انستقرام
يوتيوب
بنتيريست