|
|
 أنضف الكمونية (للنساء فقط) ..
|
أحش الرجلة
أورق الخدرة
أقمع البامية
أفلفل الرز
أبرم الكفنة
أعوس الكسرة
أفرك السلج
أرمي القراصة
أصوط العصيدة
أكتل البصلة
أشر الشرموط
أدق الويكة
أقلي البن
ألقم الشاي
أمرر العجين
أقطع الخبيز
أفتح الفطير
أقرقر المحشي
أبوخ اللحمة (حقت المحشي)
أقدح التوم
أبل الآبري
أشد البليلة
كلام نسوان في التكل
خليت أي شي وقبّلت على المطبخ والكلمات التراثية
و المستعملة لغاية هسة
لاحظوا الأفعال المستخدمة فوق دي ..
الموضوع دا ما ساهل
يعني مثلاً ..
شنو البيخلي الآبري وهو ناشف إسمو آبري
وبعد يتبلا يبقى حلومر !
وشنو البيخلي الخدرة (الملوخية) مُشكة
وشنو البيخليها لايوقة
النسوان ديل جابوا الكلام دا من وين ؟؟
ملحوظة
الموضوع دا مهتم بالرصد اللفظي واللغوي أكتر من المهارات المطبخية
لكن مافي مانع لو كل واحدة أدتنا وصفة 
|
|
 
|
|
|
|
|
|
|
 Re: أنضف الكمونية (للنساء فقط) .. (Re: تيسير عووضة)
|
| Quote: الموضوع دا مهتم بالرصد اللفظي واللغوي |
تيسير ياصديقة...
الموضوع اكيد مهتم بالبنية التحتية اللى افرزت اللفظى واللغوى، تقسيم الادوار ياتيسير...{ حسع الكلام ده الجابو شنو... حالة صعبة}
الطبيخ
الغسيل
المكوة
الحنة
الدخان
الطهور
العرس
الولادة
التربية
مزازة العيال
تانى شنو...
يازولة سلامات كتيرة
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
Quote: Quote: Quote: تيسير
كلكاب العجين المر حق العصيدة
و دة براءة اختراعه للاغتراب و السفر يا حبيبة |
يا لنا ..
كلكاب دا ما ياهو الخمار الناشف ؟
ولا يكون اللخوخة |
تيسير الحبيبة بالله ما تلخبطي كاتيقوري مع كاتيقوري، الكلكاب دة دقيق الضُرة بيلخبتوهو بي حبة موية ويعملو منو عجينة تقيلة، اها يقومو يدردموهو كور صغيرة ينشفوها في الشمش، أها و يلموهو في أكياس قماش نضيفة و بعملو بيهو العصيدة، ياخي إنتي عارفاهو ما ياهو الخمار الناشف ياخي
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Rawia)
|
العجين شغلانته شغلانة
اعجن العجين
امدد العجين*
امرر العجن
وافطر العجين
واكوجن العجين
__________________
*
المديدة بتتعمل في حالتين للعجين الحالة الاولى لعواسة الابري الابيض والتانية اذا كان نوع الدقيق ماجيد وبيطلع كسرة ناشفة بيعملوا ليهو مديدة وهي تسوية جزء منه في النار وانتظاره الى ان يبرد لاضافته للبقية
*افطر العجين او جعله فطير هي عكس تمريره وبالمناسبة انا بعرف افطر العجين لكن امرره دي مهارات قاسيه علي
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Rawia)
|
يا راوية ..
Quote: المديدة بتتعمل في حالتين للعجين الحالة الاولى لعواسة الابري الابيض
والتانية اذا كان نوع الدقيق ماجيد وبيطلع كسرة ناشفة
بيعملوا ليهو مديدة وهي تسوية جزء منه في النار
وانتظاره الى ان يبرد لاضافته للبقية |
قررت تمديد عجينتي هنا 
Quote: افطر العجين او جعله فطير هي عكس تمريره وبالمناسبة انا بعرف افطر العجين
لكن امرره دي مهارات قاسيه علي |
فطير العجين دا ما في أسهل منو (تردمي الدقيق بس)
وبالنسبة للتمرير بكل بساطة ..
يكون عندك (خمّار) ناشف ولا لين وتزيدي عليهو دقيق وموية وتغطيهو في مكان دافئ
وتخليهو مسافة زمن ..
تجي تضوقيهو لو طلع (مر) زيادة تقومي تفطريهو تاني .. بس
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Amira Elsheikh)
|
أميرة العزيزة ..
عشان إنتو بس الحا تفهموني
منو غيرنا بيعمل اللست دي
وبيستخدم مفرداتا ؟
وبرضو ..
أحلب الغنم
أفور اللبن
أقنن اللبن (حق الشاي) ..
| Quote: لما تغلى كتيييييييييير فى النار بتبقى مشكة. |
أنا قصدي كلمة (مشكة) دي ذاتا جات كيف ؟
ودمتي يا حبيبة ..
| |
|
|
|
|
|
|
|
|
 أصرّ الغنماية (Re: تيسير عووضة)
|
Quote: أحلب الغنم
أفور اللبن
أقنن اللبن (حق الشاي) .. |
يا تيسير الحبوبة
في مصطلح أتحداكم تعرفوهو:
أصرّ الغنماية
وحسك عينك تستعيني بي صديق
| |
|
|
|
|
|
|
|
|
|
Re: أصرّ الغنماية (Re: lana mahdi)
|
Quote: في مصطلح أتحداكم تعرفوهو:
أصرّ الغنماية
|
تتحدى منو ياختى..
احتمال ناس تيسير واشراقة؟؟
انا بوريك الصرار كيف.؟؟
اولا الغنامية لمن تكون والدة ونكون ماعاوزين السخيلات بتاعنها يكملو اللبن كلو..
بنقوم نصرها..
اها نصرها كيف..؟؟
الخطوة الاولى.. نجيب البعر بتاعه( اوعى تسالونى بعر يعنى شنو)ولازم يكون لين شوية..
ونعجن البعر كويس .. ونجين شريط طويل ( طول 150 سنتمتر وعرض 5 سنتمتر تقريبا)
ونضع البعر اللين على الشريط ... اها وبعدين نلف بيهو شطر الغنامية..كدا بنضمن
انو السيخلات ما يرضوعها ... لمن نفك الشريط..
اها رايكم شنو..
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Ishraga Mustafa)
|
إشراقة صحبتي ..
| Quote: الموضوع اكيد مهتم بالبنية التحتية اللى افرزت اللفظى واللغوى، تقسيم الادوار ياتيسير...{ حسع الكلام ده الجابو شنو... حالة صعبة} |
دا الأنا قصدتو بالضبط ..
هسي لو سألتي أي راجل تلقيهو نص الكلمات دي ما عارف معناها
ولا وين بتتختا, لأنو ما بيستعملها أصلاً (حتى لو كان مهنتو طباخ)
يعني ممكن نقول إنها لغة (نسوية) حصرياً
بالإضافة لمسألة تقسيم الأدوار زي ما إتفضلتي
الأدوار البتقوم بيها المرأة تلقائياً بيتوجد ليها (المفردات ) الخاصة بيها
وما في داعي أمسك ليك اللستة بتاعتك دي وأرصد مفرداتا واحدة واحدة
وتسلمي يا حبيبة ..
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
هسي لو سألتي أي راجل تلقيهو نص الكلمات دي ما عارف معناها
معليش انا تلبت ساكت لكن انا بعرفو واحد اسمو(ابو)اصلو غير المطبخ والكش ما بعرف حاجة
انتى اسى ما بتعرف تتضفرى الكمونية ذيو.... بضفرة ذى شعيرات الحبشيات
| |
|
|
|
|
|
|
|
|
|
Re: أنضف الكمونية (للنساء فقط) .. (Re: مرتضى الصادق)
|
يا مرتضى الصادق ..
(أبو) دا حتى لو ما بيعرف غير المطبخ والكنش
برضو ما أظن بيستعمل نفس الكلمات دي وإلا تبقى مصيبة ..
يعني أبو دا بيقول أنا قاعد أقمع في بامية ؟
| Quote: انتى اسى ما بتعرف تتضفرى الكمونية ذيو.... بضفرة ذى شعيرات الحبشيات |
صحي رباطابي
| |
|
|
|
|
|
|
|
|
|
Re: أنضف الكمونية (للنساء فقط) .. (Re: lana mahdi)
|
Quote:
اسلق المكرونة..
اخلط الطماطم...
انضف الخدار..
اخم الفحم...
اجلى العدة..
اغسل الازيار.. |
وده كلو غير مدفوع الاجر، يعنى لو طالبت المرأة السودانية بان يكون عملها المنزلى مدفوع الاجر حاتكون مروقة عديل كدى... بس المشكلة تدق بيهو دهب، مالو مابرضو اسمو احفظ مالك..
تيسير، لنا، اميرة، راوية... بتاكلن كمونية؟
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Ishraga Mustafa)
|
Quote: وده كلو غير مدفوع الاجر، يعنى لو طالبت المرأة السودانية بان يكون
عملها المنزلى مدفوع الاجر حاتكون مروقة عديل كدى... بس المشكلة
تدق بيهو دهب، مالو مابرضو اسمو احفظ مالك.. |
إشراقة ودا كلو + الأوفرتايم وبدل طبيعة عمل برضو غير مدفوع الأجر
وبعد دا يقولوا ليك جنهن عدة وملايات
برضو جينا للبيت وطلباتو ..
| |
|
|
|
|
|
|
|
|
|
Re: طارق اتخارج من التكل دة (Re: Ishraga Mustafa)
|
Quote:
لنوية ياصديقتى...
العلاقة شنو بين التكل والكتل
بين ضفر المصران والمصران العصبى؟
مشتاقووووون يالنا |
شروقة مشتاقوووون بالاكتر و الله
العلاقة بين التكل و الكتل إنو الإتنين حتميين لا فكاك!
أما العلاقة بين ضفر المصران و المصران العصبي فهي (اللوّاية)
| |
|
|
|
|
|
|
|
|
|
Re: طارق اتخارج من التكل دة (Re: lana mahdi)
|
ماعندك عطرون؟
اعمليو بالحلبة ورسلى لى منو، عندى جنس لواية روح
تيسير يا تجى لملحاتك دى وكمونيتك القربت تحرق ولا بنواصل ونستنا، اصلى مشتاقة ليكن
انشاءالله فى ضل التكل
| |
|
|
|
|
|
|
|
|
|
Re: طارق اتخارج من التكل دة (Re: Ishraga Mustafa)
|
Quote: تيسير يا تجى لملحاتك دى وكمونيتك القربت تحرق ولا بنواصل ونستنا، اصلى مشتاقة ليكن
انشاءالله فى ضل التكل |
أها يا إشراقة ..
جبت الشرغرغ
والكانون
عشان نشرب لينا جبَنَة في ضل التكل دا ..
| |
|
|
|
|
|
|
|
|
|
Re: طارق اتخارج من التكل دة (Re: طارق جبريل)
|
Quote: Quote: Quote: الشكية لي الله
طارق اتخارج من التُكُل دة
خلينا (نقضي) خدمتنا سريع |
لنا كيفنك
نسوي شنو الغربة (هردتنا) زي اللحمة لم تخليها في البريستو فترة طويلة |
أنا طيبة يا بوي
عشان كدي قالو نجضو اللحمة في الصاج
هسة لو هني في حبوبة كانت قالت ليك يا وليدي شيل ليك حجر
| |
|
|
|
|
|
|
|
|
|
Re: طارق اتخارج من التكل دة (Re: lana mahdi)
|
| Quote: تيسير، لنا، اميرة، راوية... بتاكلن كمونية؟ |
بموووووووووووووووت عديل في الكمونية يا اشراقة(بحب لمتنا معاك في بوست ياشروق)
وجني وجن نضافة النسوان الزايدة ليها لما يقطعوها الطعم والنغم
لازم تبقى بي ريحة عصارة البطن والانزيمات كلها
____________________________-
زعلانة لاني رجعت من الاجازة قبل ما اكل كمونية بتاعت خروف كانت في فريزر امي لاسباب خارجة عن ارادتي
| |
|
|
|
|
|
|
|
|
|
Re: طارق اتخارج من التكل دة (Re: Rawia)
|
راوية البنحبها وبتحب الكمونية....
غايتو زمان اكلت جنس كمونية
وكترة ام فتيت
لمن بقيت احلم بالمصارين والفشفاش الاحمر
اها باين على عاوزة ابقى نباتية...
بحب الخضار ياراوية...
وكيف كانت الاجازة، انشاءالله تكونى اكلتى فسيخ، ملوحة واكلات تانية مشتهياها زى ملاح الويكاب ولا ملاح لبن...والشوق بحر ياراوية يالذيذة
| |
|
|
|
|
|
|
|
|
|
Re: طارق اتخارج من التكل دة (Re: Rawia)
|
Quote: تيسير صاحبة البوست انا حا انزل بوست اسمه كيف تغيير مسار بوست
او كيف (تفتل) بوست بالجنبة |
رواية ..
هسي لمتكن دي براها ما بالدنيا
ما يتفتل البوست
أشربي جبنتك دي خلى الكلام ..
| |
|
|
|
|
|
|
|
|
|
الف سلامة ياصديقتنا راوية (Re: Rawia)
|
| Quote: الاجازة ضاعت علي يا اشراقة لاني عملت فيها عملية بعيد عنك وعن السامعين وكانت في الريسبايروتري سيستم واتمنعت من الاكل زي خمسة يوم وبعد داك لازم نوع اكل محدد اسكتي بس |
تبرى يايمة من العمليات والامراض
والف حمدالله على السلامة
| |
|
|
|
|
|
|
|
|
|
Re: طارق اتخارج من التكل دة (Re: Rawia)
|
Quote: | Quote: Quote: تيسير، لنا، اميرة، راوية... بتاكلن كمونية؟ |
بموووووووووووووووت عديل في الكمونية يا اشراقة(بحب لمتنا معاك في بوست ياشروق)
وجني وجن نضافة النسوان الزايدة ليها لما يقطعوها الطعم والنغم
لازم تبقى بي ريحة عصارة البطن والانزيمات كلها
____________________________-
زعلانة لاني رجعت من الاجازة قبل ما اكل كمونية بتاعت خروف كانت في فريزر امي لاسباب خارجة عن ارادتي |
كدي يا يمة كدي
رباية الحبوبات ظهرت
دة الكلام يا راوية
| |
|
|
|
|
|
|
|
|
|
Re: أنضف الكمونية (للنساء فقط) .. (Re: lana mahdi)
|
الملحات....
غايتو يالنا الافقار التم لينا ده رحم الفقيرات من شوشوة الكوانين
سخينة وانتهى الامر...
كمونية دى بقى كلام الطبقة الوسطى الانتهت
الليلة عملتى ملاح شنو؟
* بعد الفصاحة دى كلها بحب المطبخ والطبيخ... لكن كمونية مامعانا فى زول ياكل مصارين؟
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Ishraga Mustafa)
|
Quote: الملحات....
غايتو يالنا الافقار التم لينا ده رحم الفقيرات من شوشوة الكوانين |
مش عليكي الله
Quote: سخينة وانتهى الامر...
كمونية دى بقى كلام الطبقة الوسطى الانتهت |
عاد يا حبيبة الكمونية دي ما بتنتهي ولا بتنقرض خاصة لو محمرة
برغم إنو السخينة ريادة
| Quote: الليلة عملتى ملاح شنو؟ |
سلج بشمار أخدر
| Quote: * بعد الفصاحة دى كلها بحب المطبخ والطبيخ... لكن كمونية مامعانا فى زول ياكل مصارين؟ |
قولي في زول ما ياكل مصارين؟
يعني يا شروق انتي ما من ناس ام فتفت والمرارة و هلم جرا
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Rawia)
|
Quote: | Quote: Quote: سلج بشمار أخدر |
يعني يالنا الواحد يبكي ولا يتتدردق بالواطــةحسة
غايتو يالنا لو جيتك ومافركتي لي بشيل حالك
حتى لو مامواعيد اكل |
ياخي انتي بس كيف تجي و (أرمي) ليكي معاهو قراصة كاربة، وللا بالكسرة المُرّة أخير؟
| |
|
|
|
|
|
|
|
|
|
Re: أنضف الكمونية (للنساء فقط) .. (Re: الجندرية)
|
Quote: لكن عشان المانع شنو نرصد صيغ افعال ادوار الرجال السودانيين
اولها:
اسف السعوط
لوووووول
ادقق العيش
انضف السباليق
افتح المجاري
اردم الحوش
اكرب العنقريب
اليس البيت ( بالزبالة ) |
اقرأ الجريده
ناخد غمضة
العب كوشتينه
نقعد فى الشارع { نلعب ضمنة وربما مآرب اخرى}
سلامات واشواق كتييييرة يا امانى
| |
|
|
|
|
|
|
|
|
|
Re: أنضف الكمونية (للنساء فقط) .. (Re: lana mahdi)
|
Quote:
ادقق العيش
انضف السباليق
افتح المجاري
اردم الحوش
اكرب العنقريب
اليس البيت ( بالزبالة ) |
والله يا امانى بعرف نسوان كتار عملن الحاجات الفوق دى لكن كالعادة غير مرئية
انا القدامك دى يا ما كربت عناقريب وليست وجيرت وردمت الحوش واقول ليك سر علنى
كنت بمطر الصعود لجدى الله يرحمه
اها شن قولك
| |
|
|
|
|
|
|
|
|
|
Re: أنضف الكمونية (للنساء فقط) .. (Re: الجندرية)
|
يا سلااااام ..
شيخ الطريقة الجندرية شخصياً
والعارف بالنساء في شؤون الجندر ..
مراحب يا أماني
Quote: هسي يا تيسير لو سميتي بوستك دا ( انضف الضفرة )
كان اتملي ليك شنبات |
يختي هم مالم ومال نضافة الضُفرة والضَفرة (العبرة بالنهايات)
Quote: اكفي الدلكة
ادق الريحة
اغربل المحلب
احك كعبي |
أطعن القرنفل
أكسر الصندل
أخج الشّكت
أخت الحنة (ختة وتفالة)
أنشدر الحنة
وفي التكل ..
أروب اللبن
أطاعم المويات
أبس العجين (برضو للكعك)
| Quote: واكشح النقاط ( لانه ماعونو اتملى ) |
دي خطيرة ..
Quote: ادقق العيش
انضف السباليق
افتح المجاري
اردم الحوش
اكرب العنقريب
اليس البيت ( بالزبالة ) |
دي بقت حقت الرجال ؟
من متين ؟؟
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
العزيزة شروق
سلام واشواق كثيرة
طبعاً يا شروق في كثير من الادوار المعرفة بانها ادوار رجال تتضطر بعض النساء للقيام بها. والعكس ايضاً ممكن ، فكون العمل مصنف ضمن مهام النساء ، لايمنع بعض الرجال من ادائه لظروف شتى . ولكن في العموم هذا التقسيم محدد وواضح، و كما تعلمين يختلف باختلاف الثقافة والمكان والزمان .
انا برضو نضفت السباليق
ودققت العيش في الطاحونة وقريت الجريدة
وبرضو نضفت الكمونية
وبعرف رجال يملو العين
عاسو الكسرة ورمو اللقيمات وقطفو البلاعة
وطبخو ، وظبطو صينة السمك زي العجب
| |
|
|
|
|
|
|
|
|
|
Re: أنضف الكمونية (للنساء فقط) .. (Re: احمد العربي)
|
Quote: وامرقن لينا الصواني
الضيوف ديل وصلو
|
احمد ياعربى
جنكم اكل، ماعارفة الخلى الصوانى دى تطلع اول ليكم شنو
والفضلة للاطفال
وكان فى باقى كمونية { للحريم} العملنها
غايتو بنحتاج لاستراتيجيات تضمن للنساء الوفرة من الغذاء
مش هن البيحملن
وبيلدن
وبيرضعن
ياربى بيكون شكل الدنيا كيف لو انقلبت الاية
نقعد نحنا وناديكم رجال بطلوا نقة فى الكورة وجيبوا لينا الغداء
ازيك يا احمد
وكيف الالوان؟
| |
|
|
|
|
|
|
|
|
|
Re: أنضف الكمونية (للنساء فقط) .. (Re: احمد العربي)
|
Quote: احم احححححححححم
هو يا حريم هوي
اتضايرن
وامرقن لينا الصواني
الضيوف ديل وصلو
وبعدين يا تيسير معاك
اها اللقول ليك
الفُداره كيف |
أحمد العربي ..
ما في ولا صينية بتجي مارقة من هنا لو ما وريتنا الفدارة دي شنو ..
عشان ما عرفتا كلامنا ما دايرنا نعرف كلامكم ؟؟
القائد العام لفصيل التمرد / تيسير عووضة
| |
|
|
|
|
|
|
|
|
|
Re: أنضف الكمونية (للنساء فقط) .. (Re: عزيز عيسى)
|
سلام يا الفي التكل
ماشايف فيكم واحدة جابت طريق الكول واللا المرس أو الويكاب وأم شعوفة
بس نطلع شوية بره المطبخ وعايز أسأل من مصدر كلمات نسائية مثل
الكركار ، اللخوخة ، الكنقار ، طبعا الأخيرة بتجي معاها تبعاتها
أرش الزريعة
أصفي البقنية
أصفي الشربوت
أصفي العسلية
أصفي المريسة بأنواعها، بغو ، كوشيب ، نبيت ، ورد ... الخ وليه دايما بصنعوها النسوان ويشربوها الرجال أقصد في بعض المناطق التي لا تعتبر فيها المريسة غذاء رئيسي ..
تخريمة :
ما شفت واحدة فيكم جابت طريق القرع أكلتي المحببة لما تعجنو بالكسرة والشطة ..
ودمتن بخير وعافية
أبو قصي
| |
|
|
|
|
|
|
|
|
|
Re: أنضف الكمونية (للنساء فقط) .. (Re: ABU QUSAI)
|
أبو قصي ..
Quote: ماشايف فيكم واحدة جابت طريق الكول
واللا المرس أو الويكاب وأم شعوفة |
غايتوالويكاب دا الجندرية قبل كدا عملت ليهو بوست كامل ..
أما الباقي بحول الميكرفون لخالة دومة بتجيّه الحاجات دي كويس ..
والكسرة المعجنة بالقرع لذيذة
وزي ما بيقولوا (كب الموية خلي الدنقلاوي يقوم)
وسببها إنو في حالة الكسرة بالرجلة ولا القرع
في ناس بيزيدوا ليها موية عشان (تترخي) شوية وكمان
عشان كميتها تزيد الدنقلاوي بإعتبارو زول ذواقة وإبن كار 
بيعتبر إنو دا بيخرب الحكاية خالص وممكن عادي يخلي الأكلة ويقوم
أحسن مما ياكلها مسيخة عشان كدا بيقولوا المقولة دي ..
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
أخواتنا .. في التكل ...سلامات ..
الحاجات الفوق دي كللللللللها عارفينها ..وحافظينها .. وبتعملوها ..
وبعد ده .. تذاكروا .. وتزاحمونا .. وتتفوقوا علينا .. في الشغل والقراية ؟؟؟؟؟؟؟؟؟؟؟
حاجة غريبة.....
| |
|
|
|
|
|
|
|
|
|
Re: أنضف الكمونية (للنساء فقط) .. (Re: Hatim Yousif)
|
حاتم يوسف ..
Quote: الحاجات الفوق دي كللللللللها عارفينها ..وحافظينها .. وبتعملوها ..
وبعد ده .. تذاكروا .. وتزاحمونا .. وتتفوقوا علينا .. في الشغل والقراية ؟؟؟؟؟؟؟؟؟؟؟ |
الحاجات الفوق دي كلللللللللها دا المطبخ بس المساحتو إتنين في إتنين ..
لسه ما ما إتكلمنا عن أي شي تاني ..
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
| Quote: الاجازة ضاعت علي يا اشراقة لاني عملت فيها عملية بعيد عنك وعن السامعين وكانت في الريسبايروتري سيستم واتمنعت من الاكل زي خمسة يوم وبعد داك لازم نوع اكل محدد اسكتي بس |
راوية سلامتك يا بت أمي ويمرض عدوك
الصديقات تيسير وإشراقة الجندرية مشتاقيييييييييييييييين
أشقق البطيخة
أسك الحرامي
أدخل العناقريب
الِم الفرشات
أكيِّس المخدات
تحياتي
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
أحش الرجلة
أورق الخدرة
أقمع البامية
أفلفل الرز
أبرم الكفنة
أعوس الكسرة
أفرك السلج
أرمي القراصة
أصوط العصيدة
أكتل البصلة
أشر الشرموط
أدق الويكة
أقلي البن
ألقم الشاي
أمرر العجين
أقطع الخبيز
أفتح الفطير
أقرقر المحشي
أبوخ اللحمة (حقت المحشي)
أقدح التوم
أبل الآبري
أشد البليلة
ووووب علي وووووووب علي نحن بنعمل ده كلو؟
الغريبة ما دخلنا كتاب قينس للأرقام القياسية ... في الشقاوة طبعاً..
راوية انا بموت في الكومنية المحمرة ..
لكن بي شرط ما اكون نضفتها
تيسير تسلمي على البوست اللذيذ ده
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
اصحى من الدقش
اوصل الاولاد المدرسة
اسوق العربية
امشي الشغل
اتعب في الشغل وعيني تطلع
ادفع الفواتير
ارجع الاولاد من المدرسة
امشي السوبر ماركت
امشي السوق
اجيب الغاز
اجيب العيش
امشي اجامل للمناسبات
امشي الصلوات
امشي المقابر
اشيل الاكياس
امرض
افتر
اشقى واكبر
وانت تزددن وزنا وجمالا وصغرا
| |
|
|
|
|
|
|
|
|
|
Re: أنضف الكمونية (للنساء فقط) .. (Re: الطاهر عثمان)
|
Quote: اصحى من الدقش
اوصل الاولاد المدرسة
اسوق العربية
امشي الشغل
اتعب في الشغل وعيني تطلع
ادفع الفواتير
ارجع الاولاد من المدرسة
امشي السوبر ماركت
امشي السوق
اجيب الغاز
اجيب العيش
امشي اجامل للمناسبات
امشي الصلوات
امشي المقابر
اشيل الاكياس
امرض
افتر
اشقى واكبر
وانت تزددن وزنا وجمالا وصغرا |
ده كلو مشتركين فيهو، بس كيف تكون الصغره والجمال مع الورم المردوم فى القلب البيتراءى ليكم { شحم ودهون}
فضل لينا بس نحفر المقابر ونمشى الدافنة
| |
|
|
|
|
|
|
|
|
|
Re: أنضف الكمونية (للنساء فقط) .. (Re: الطاهر عثمان)
|
الطاهر عثمان ..
Quote: اصحى من الدقش
اوصل الاولاد المدرسة
اسوق العربية
امشي الشغل
اتعب في الشغل وعيني تطلع
ادفع الفواتير
ارجع الاولاد من المدرسة
امشي السوبر ماركت
امشي السوق
اجيب الغاز
اجيب العيش
امشي اجامل للمناسبات
امشي الصلوات
امشي المقابر
اشيل الاكياس
امرض
افتر
اشقى واكبر |
بعد دا كلوا ما بتتوبوا و تقولوا دايرين نعرس تاني ..
| Quote: وانت تزددن وزنا وجمالا وصغرا |
بي وين عليك الله مع مقابلة النيران والسكاكين دي ؟
والدايرة أقولوا قالتو إشراقة ..
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
ماشاء الله عليكم
عينى بارده
ربنا يهنيكم بى بيوتكم و اخوانكم و ازواجكم
لقيتكم بنات حاره و كرم و ضيفان
ابشرو بالخير
هووى يا شباب ما تخوفو البنات ديل بالشربوت و البقنيه امشو اقطعو بالشرق جيبوها من هناك هن بدنكم الجرادل
مودتى و تقديرى
| |
|
|
|
|
|
|
|
|
|
Re: أنضف الكمونية (للنساء فقط) .. (Re: تيسير عووضة)
|
Quote: إسمها أعصج اللحمة
ما قلنا ليكم خلو لينا الكلام دا ..
بعدين من الأريق دي باين عليك شايقي أصلي
صحي إنت الدخلك التُكل دا شنو ؟
|
دخلتني الجوعة يا تيسير
انا شغال من الصباح لا تمراية لا فكت ريق
- احش البرسيم
- اقفز التمر
- ألُخ العجين
- اخيط اللِبدي
ازيدك كلام شوايقة ولا كفاكي
| |
|
|
|
|
|
|
|
|
|
Re: ياتيسير استلمت ليك نضيف المصارين (Re: طارق جبريل)
|
مافى طريقة ينضفوا بيها المصارين دى غير الطريقة المتعبة دى؟
آآآآآخ من مصارين البلد اللى اتهرت
بتمشى ووين انتى خليتى لى كمونيتك واعبائك الكتيرة دى
بالجد بوست شيق، مرح ومبكى وبيحتاج اعمال الحفر بس النفضى بروقه
يالله تعال استلمى الوردية بتاعتك دى
| |
|
|
|
|
|
|
|
|
|
Re: ياتيسير استلمت ليك نضيف المصارين (Re: Ishraga Mustafa)
|
Quote: مافى طريقة ينضفوا بيها المصارين دى غير الطريقة المتعبة دى؟
آآآآآخ من مصارين البلد اللى اتهرت
بتمشى ووين انتى خليتى لى كمونيتك واعبائك الكتيرة دى
بالجد بوست شيق، مرح ومبكى وبيحتاج اعمال الحفر بس النفضى بروقه
يالله تعال استلمى الوردية بتاعتك دى |
شروقة بت أمي ..
عارفة سايبة وراي ضهر جامد عشان كدي مشيت بي قلب قوي
لكن جيت ..
بعدين إنتي عارفة الكمونية بتمسكا مرة واحدة وأنا مسكتك ليها
مصارين الكمونية هينة بتنضف
الكلام مصارين البلد دي البنضفا شنو يا ختي ؟؟
| |
|
|
|
|
|
|
|
|
|
Re: أنضف الكمونية (للنساء فقط) .. (Re: طارق جبريل)
|
طارق جبريل ..
Quote: دخلتني الجوعة يا تيسير
انا شغال من الصباح لا تمراية لا فكت ريق |
يا بنوت واحدة فيكن التجيبلها كم طرقاية فطير معاها روب لي أخوكن ود جبريل دا ..
Quote: - احش البرسيم
- اقفز التمر
- ألُخ العجين
- اخيط اللِبدي |
دا حق الشوايقة
النوريك حق الدناقلة ..
ألقح التمر
أسد اللبقة
أدير الزريبة
| |
|
|
|
|
|
|
|
|
|
Re: أنضف الكمونية (للنساء فقط) .. (Re: lana mahdi)
|
| Quote: ده كلو مشتركين فيهو، |
دا كيف:
أقلع العِرْكِش
أقلع القَشْ، وقيل البودة (عندما يتعذّر الحش عندما تتعذَّر الصّبْنَة)
أقلع المطمورة
أقلع السُّلْطَة
أقلع عينَك عينَك
وبرضو التحيّة ليكَن كلّكَن فقد قالت قائلة: "يوم الحِنّة هو يوم النبيح (مع الشُفّع) العالمي" وبالتالي يمكن إضافة: أكَتْكِت من البَرِد وأنا محنّنة وحِسّي ينقَرِش من النبيح مع الشُفّع وبعد دا كُلّو أريتا تجيب مريسة تام زينو...
| |
|
|
|
|
|
|
| |
تيسير عووضة
Ishraga Mustafa
lana mahdi
Rawia
طارق جبريل
essam&amal
سلمى على محجوب
الجندرية
khaleel
عزيز عيسى
احمد العربي
ABU QUSAI
Hatim Yousif
بدرالدين شنا
امل احمد عمر
Adil Osman
الطاهر عثمان
salma subhi
فيس بوك
تويتر
انستقرام
يوتيوب
بنتيريست