|
|
 عليك يا دنيا السلام .... شــعر الشاعر عزمى احمد خليل _ واشنطن
|
عليك يا دنيا السلام
شعر/ عزمى احمد خليل
يا سلام على السلام لما يصبح جد سلام
وما مجرد بس كلام ولا صلح بعد الخصام
ويا سلام على السلام
السلام يوم يبقى شامل وبيهو الكــل ارتضى
وفى الحكم الكل يشارك وتبقى حـرية قضـــا
وكل شروط جايرة ومهينة بى ارادتو يرفضها
والتســـامح هو البيسود ويملا سـاحات الفضـا
نبقى نفتح صفحة بيضا واللى كان يصبح مضى
ويبقى ده ياهو السلام ويا سلام على السلام
الســـــلام للشعب كلو العانى ويلات الحرب
ما اتفاق كرسى ومصالح وما سلام فئة وحزب
وللا تهميش للتجـمع وللا تبخيس للغــرب
الســلام لى كل واحد للقــــريب والمغترب
والسلام يوم يبقى صفقة دابو عاد ما بس خرب
والسلام ما انقسام وما هو تثبيت للنظــام
ويا سلام على السلام
السـلام بالجـــد يكــــون لما يصبح قول وحق
ما سلام تشويش ومظهر او كلام بس فى الورق
السلام لى كل مناضل للظلم قاسى ومرق
والسلام لى كل مواطن اصلو لا خان لا سرق
والسلام حق للجميع ما سلام جبهة وقرنق
السلام ما غصن اخضر بيهو بيطير الحمام
ويا سلام على السلام
الســــلام عزة وكرامة وما سلام بترول وسلطة
بى قلب مفتوح وجامد وما سلام فار بيخشى قطة
السلام ده طريقو بين واصلو ما دايرلو خرطة
إلا بس الحسة حاصل هو حيلة وللا خطة
كل شريك ياخد نصيبو وفى دماغ الشعب خبطة
وديه يا ناس عاد كلام ويا سلام على السلام
السلام بى صورتو ديه حل هزيل وبالجد خيانه
حلفــا ترحل لى مريدى وتبقى واو ارض البطانة
والشرق رامينو غادى وفى السلام ما ليهو خانة
والجنوب وين باقى ناسو وقولو دارفور وين مكانه
مين يقول بس الحقيقة والله جد عالم جبانه
والمهم قصــــر الكلام سلطة بى اسم السلام
ويا سلام على السلام
السلام البيحكو عنو فيهو بس اسم السلام
فوقو يا ناس واصحو يللا وخلو بس كتر الكلام
ما اليخاصم هو النظام والبيصالح هو النظام
ينكتم صوت الحقيقة وليهو بس حق الكلام
وما مهم الشعب يقبل وللا ينعم بالسلام
المهم السلطة تبقى ويندفن راس النعام
عدوها يصبح هو الشريك وللثروة يحصل اقتسام
والرئاســــة والوزارة هم يا ناس الكلام
وعليك يا دنيا السلام ويا سلام على السلام
وعليك يا بلدى السلام وعليك يا وطنى السلام
ويا سلام على السلام
واشنطن فى: 28 اكتوبر 2003
|
|
 
|
|
|
|
Mannan
فيس بوك
تويتر
انستقرام
يوتيوب
بنتيريست