Quote: حاجه تغيظ ..اشراقه تقول رومانسيه ومطره وراكوبه وبرسيم.. وأنا في كلامها ماشايفه غير البرسيم..ياربي الغلط فيني ولا فيكي ولا فينا كلنا ولا هو اساسا مافي غلط؟؟
نهارك خير يامنى
الخطأ غير مطلق وكذلك الصاح المطرة نفسها اللى كنت بحب نقراتها تحولت لطرقعات فى زمن الزول ماشايف فيهو غير انهار جفت من الفجيعة مرات بنحتاج لروح عبقرية تنزعك من كل السأم اللى نحنا فيهو وتخليك تشوفى الدنيا بلون تانى لون فرائحى وصادحه مزاميرو الروح العبقرية دى بتصحا فيك وتنفح فيك من ريح التوازن الرومانسية هى صنو للتوازن تتوازنى شوية وتدفرى حياتك فى اتجاه تصالحها مع بت ام روحها
Quote: الله يرحمها تلك الايام التي كنا نبكي فيها مع اقلام ابيض واسود.. وقصص احسان عب القدوس والرومانسي يوسف السباعي! وكان منظر عماد حمدي ومديحه يسري وهو بيموت بعد قصة حب من النوع الرومانسي يقطع القلب ويكمل دموعنا..منظر قاسي.. معقوله يعني بعد كل الصعوبات والأقدار القاسيه وتعيهم في المشاكل يقوم يموت؟؟! زي صاحبتك لما قالت لزوجها بحبك ولا حاحه زي دي..وقام قاليها بطلي مراهقه! قهرها في بوكانا
فى زمن المراهقة كان جنى اشوف افلام افلام عربية وهندية ماكان عندنا تلفزيون حتى الاسود بى ابيض داك نقوم نهاجر لاشلاك البوليس فى كوستى ونترص عيال كتااااااار فى برش يفرشوهو لينا ناس البيت بكل رضا ويعملوا لينا زلابية كان بيزعجنى صوت المضغ اثناء الفيلم خاصة لمن تلمع عيون نجلاء فتحى ولا لمن تغنى سعاد حسنى ومحمود ياسين كان حلم زولى الاخدر بس بشنب زى بتاع الصعايدة {من يومى محددة فتى احلامى مايكون سادة}
نحنس ابوى عشان يخلينا نمشى السينما وهى مرة مرتين فى السنة وفى الطريق نحكى انا ومعاوية اخوى عن الفيلم ونتغالط ومرة عملناها رجعنا الدور التانى واخدنا علقة مزبوطة طبعا نهايات الفليم الدرامية ديك كانت بتغيظينى يعنى خلاااااس لمن قربنا من الجنة يقولوا لينا لف دور هناااااك على طول وهناك دى يكون جهنم ام نارا غير تشقيك مابتعمل ليك حاجة الرومانسية دى مفيدة لمن يحكوا ليك انو {العرس ده زى برميل الزفت اللى نصو زفت والنص التانى عسل} ممكن فى البداية تلقى العسل او العكس اهو محاولة لترويض الروح ترض بالقاسمو ربنا المشكلة تقعدى عمرك كلو تنتظرى العسل - والعسل اللى فيهو شفاء للروح من عذاباتهاوعينك ليهو ياهوووو داك يقوم الزفت يزلقك فى سقط لقط وتتوهى
بعد كبرت وبيت اتفلسف قلت يابت كفاية على مديحة يسرى وعماد حمدى رحلة الحب اللى مشوها مابين الحياة والموت اهو كدى يامنى الحتة اللى فى النص دى اللى بنمشيها برضانا او من غير رضانا هى صدح الروح او عويلها الصدح الغير مطلق والعويل الغير مطلق برضو.. حصل ضحكتى وانتى بتبكى؟ حصل دمعتك فى عينك واكلتى لانك جعانة؟
المهم فى الامر لمن يملانا الاحساس بالرومانسية نحسها جوووووووة وعيون بتلمع فى ليلك وتمنحك الآمان وتنومى عاكفة يدينك على صدرك مليانة احساس انو مااشتهيته فى الدنيا {ملك} ايديك المهم لحظة تغمض العيون يكون ماليك الاحساس ده الصباح تصحى للواقع وتلقى يدينك مزهرات من ليلة أمس...اهو ده المجنون اللى بيمس روحك بالجمال ويصالحك مع روحك وتستمر الحياة...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة