أحمد هارون : مصير أي جرقاس للجلابة

Quote: طبعآ يا تاج الدين أنا زي ما قلت ليك سابقآ انك وصلت في قناعتك لطريق مسدود اعلم اني لن استطيع فتحه .. ولكن دعني اكتب مهما كان فهناك من يقرأون ويميزون .. حرب الجنوب مافي زول قال انها بدت امبارح .. وما دايرة مغالطة لأنها من المعلوم بداهة .. ويبدو أنك لم تستوعب اجتراري لحرب الجنوب في هذا الحوار .. حرب الجنوب التي بدأت في الخمسينيات لم تكن بين الولاية الشمالية وجنوب السودان وانتو قاعدين تتفرجوا .. كنتوا مشتركين فيها كسودان شمالي والا لأ ؟؟ .. أنا خصصت الفترة منذ عام 89 فقط لتكبير الصورة الي تحاول جهدك أن تتعامي عنها .. ما تقول لي العسكري قال ليك وقال لي .. طيب أنا برضو بقول ليك واحد غرباوي زميل دراسة وكان قيادي كبير في الاتجاه الاسلامي ومن زرقة دارفور وليس عربها كان يمازح زميل آخر كان زعيم انصار السنة وقال ليهو نحن بنعتبر الجنوبيين عبيد !!! .. دايرك قدام هذا الجمهور تنفي لي نظرة الدارفوريين للجنوبيين كعبيد !!!.. الحكومات المتعاقبة حاربت تمردات الجنوب شأنها شأن أي حكومة في الدنيا تحارب أي حركة متمردة انفصالية .. وذلك يحدث في ارقي العائلات .. امريكا البتجرجرو فيها دي خاضت حرب وحدة لمن الله غفر ليها .. بريطانيا ما تزال تناتل في الايرلنديين .. الصرب طلعوا زيت البوسنة وهرسوهم هرس .. الروس شاوين الشيشان شية .. و.. أحسب الباقين براك .. إذن السودان الشمالي جميعه حارب تمرد الجنوب الانفصالي .. منذ عام 56 .. انا خصصت ليك عام 89 لأنك بكيت من حرب الـ4 سنوات في دارفور في حين نفس الاشخاص ـ لاحظ أنا قلت اشخاص ـ كانوا بيحرقوا في الجنوب بنفس السادية التي يشتكون منها الآن لمدة 14 سنة وليست 4 !! .. ان شاء الله كده الكلام وقع ليك !!.. قلت لي سلفاكير يتضامن مع حركات دارفور .. كلام جميل ... تفتكر يا تاج الدين نحن عاجبنا تشرد الاهل في المعسكرات؟؟ والله لو ظنيت كده يكون العدائية وسوء الظن وصل بك حدآ لا أمل بعده .. منو يااخي العاجبو التشريد والتقتيل وبكاء الاطفال في زمهرير الشتاءوحريق الصحراء؟؟ .. ياخي انت مفتكرني ضد هذا التمرد ليه؟؟ .. وتفتكرني اجادلكم بالصراحة كدة ليه ؟ لأني منذ اول اعلان للحرب عرفت انها ستؤول لهذا المصير وهذه المآسي والموت والخراب الصعب الاعمار .. ولأن نتائج الحرب اولآ انتشار الكراهية وتشريد الضعفاء بينما يجني ثمارها العسكر وتجار الحروب .. انظر ماذا حدث عند توقف الحرب في الجنوب .. استلم القادة امتيازاتهم ونسوا اهلهم وصار غاية امنيات بسطاء الجنوبيين ان يعودوا لحالتهم المعيشية التي كانوا عليها قبل الحرب .. يعني ياريت يعودوا ويعيشوا حياتهم الكانوا عايشينها قبل كم وعشرين سنة !!.. وهيهات .. فحتي تجار الحروب والدول والمنظات الغربية التي كانت تجتهد في دعمهم بالسلاح والمال لتسعير الحرب والوعود بالتعمير اختفوا بعد السلام وتبخرت وعود التعمير والرخاء فيماعدا تدريب المزيد من العسكريين الجنوبيين لتجهيزهم لحروب قادمة !!.. شفت كيف؟؟ .. قضية دارفور تسير في نفس الاتجاه .. انظر كيف تستغلون المشردين في المعسكرات حتي يضمن القادة امتيازاتهم ثم يفكوهم عكس الهوا.. ولكم في مناوي اسوة حسنة .. وبالمناسبة لماذا رفضت الفصائل المحاربة اتفاق ابوجا مع مناوي وانهاء الحرب وارجاع المساكين الي ديارهم .. ألم يكن من الاجدي دعمه وتقوية ظهره لمزيد من مكتسباتكم الجهوية بدلآ عن تركه وحده وتحطيم آماله ؟.. أيعقل أن تكون حجة تعويضات الاهالي هي السبب ؟؟ .. كيف كنتم تريدون ان تتم تعويضات كل فرد في المعسكرات بصورة فردية وإلا تستمر الحرب الي مالانهاية .؟!!. وكم تكون تلك التعويضات لكل فرد؟؟ ألف دولار ؟ 10 ألف ؟ 100 ألف؟؟ مليون؟؟ .. وبأي آلية وعلي أي اساس ؟بالطاقة؟ بالجنسية؟ بالجواز؟؟ !! ممكن تورونا خطتكم كانت شنو لصرف هذه التعويضات الذي منعت الفصائل من الانخراط في اتفاق ابوجا الذي كان يمكن أن يحقن الدماء؟؟ .. أم أن السبب هو أن مناوي ازاح عبدالواحد محمد نور من القيادة فرد عبدالواحد الصاع صاعين ؟؟ .. يعني منافسة قبلية كانت نتيجتها ما سمعنا به عن حرب الاهالي في المعسكرات ؟؟!! حرب الزغاوة والفور الكانت في المعسكرات ديك كان سببها تحريض الجلابة برضو؟؟ .. ياتاج الدين فرية ضرب العب بالعب دي ساتر في ذهنك يمنعك من رؤية الحقائق ويشحن بطاريات حقدك بلا مبرر .. ياخي زي ما قلت ليك حروب المراعي والقش وأكل البهائم لا دخل للشمالية به .. حروب الزغاوة والبديات والقمر والرزيقات والفور والمراحيل والدينكا وغيرهم وغيرهم دي حروب علي منابت القش ومسارات السحاب تسعرها نخوات الفروسية وتحريض الحكامات ..!! ولا دخل لأهل الشمال بها .. هذه حروب منذ التاريخ وازداد اوارها في السبعينات والثمانينات ولا نتحمل وزرها .. السبب الاساسي لحروب دارفور هو عدم الأمان السيكلوجي الذي تجلبه مجاري المياه الدائمة لأقوام مهنتها الرعي والزراعة وفي زمان تغيرت فيه المناخات وضرب الجفاف الصقيع .. انتم تحسدون الشماليين علي هبة ربانية ليس لهم يد فيها وهي النيل الذي يسبب لهم أمانآ وطمأنينة تجعلهم يرضون بالقليل ويحتملون التهميش لأقصي غاياته .. فهم في اسوأ الظروف لن يعدموا جرعة الماء .. وذلك عكس اهالي الغرب عمومآ الذين شعرة الحياة عندهم مربوطة بمصبات السحاب ومرايات السراب .. الحل الجذري يكمن في توفير المياة واستقرار الرعاة بحفر الآبار وتغيير نمط الحياة المهلك للانسان والدواب من رحلات الشتاء والصيف في هذا القرن الواحد وعشرين .. ليس الحل في المزيد من الحروب واجترار مرارات التاريخ وتقديم البسطاء كضحايا لجذب المخلص الاجنبي الذي أكيد ستكون خطته : أضرب العب بالعب !!..