يـومـيـات سـائـق ركـشـة
مدخل الركشة وسيلة من وسائل المواصلات الوافدة مثلها مثل باقي المركبات العامة والتي تجول شوارع السودان طولاً وعرضاً شرقاً وغرباً شمالاً وجنوباً, ورغم كثرة المركبات لم يطراء إي تنظيم في خطوط السير , لذلك تجد الإختناقات في كل ناصية صينية وحتي في وجود بوليس المرور وقد شاهدت كل هذه المناظر بأم عيني خلال إجازتي السابقة واخص منها محطة (7) الصحافات وكده بحكم إقامتي . منذ دخول الركشة للسودان غيرت كثيراً جداً في سلوك السودانيين وأصبحت مثل حبة البندول في متناول الجميع ( مع انو صاحبي عادل جبارة جاء قريب من السودان وقال لي والله البندول بقي ما متوفر ) وذلك لصغر حجمها وتستطيع التوغل في الشوارع الضيقة بكل يسر وسهولة , وقد أدمنت امهاتنا ركوبة الركشة لأنها تتماشي مع ظروفهن المعيشية ويستطعن ان يحملن فيها أكياسهن البلاستيكية البسيطة من متطلبات المعيشة ( خضار ولحمة وخلافه ) , كما إتخذ منها الشباب وسيلة لكسب لقمة العيش وذلك بعد تضاءل فرص العمل في القطاعين العام والخاص . أصبحنا وأصبح الملك لله هكذا أبداء يومي وأنا ذاهب لقيادة سيارتي الفاخرة ( عقواً ركشتي الفاخرة ) وحتي تكون ركشتي أكثر جاذبية أقوم بتنظيفها وتلميعها حتى تسر الناظرين قصدي الراكبين , عندي طالبة صغيرة في الصف الرابع الابتدائي عكفت علي توصيلها لمدرستها بأجر متفق عليه مع والدها وبعد ذلك أجوب الشوارع بحثاً عن الرزق , لا التزم كثيراً بخط السير المهم الحصول علي ركاب . وفي صباح يوم غائم جزئياً ذهبت لترحيل طالبتي الوحيدة وبعد أن اطمئنيت على دخولها المدرسة حصلت معي طرفة كانت هي السبب لسرد هذه القصة وفي شوارع امبدة تحديداً إستوقفتني إمراة في العقد الرابع من عمرها وقالت لي يا ولدي ماشة لي مشوار لأمبدة السبيل , اها يا وليدي بكم بتوصلني قلت ليها البقسمو الله يا حاجة ما بنختلف . ذهبنا مباشرة إلي أمبدة السبيل طلبت مني اوقف الركشة وبالفعل اوقفت الركشة وقالت لي اصبر شوية يا وليدي بدخل البيت ده وبجيك صادة , طبعاً إنتظرت وده معناهو مشوار ( ثمين ) والإيراد خلاص تمه تمه , مرق شافع من البيت صغير قلت ليهو يا ولد عليك الله اديني مويه اشرب ما قصر جاب لي الموية شربت , شويتين كده جات الحاجة وشايلة ليها كيس في يدها وقالت لي عليك الله وديني الفتيحاب , طبعاً أنا ما صدقت علي طول إتحركت وأقرب محطة بنزين كبيت فيها ( نص بنزين وزيت ) بـ 500 جنيه وعلي طول للفيتحاب , طبعاً بسوق داخل الشوارع خوفاً من القطع ( جماعة شرطة المرور وكده ) ونحنا داخل الفتيحاب طلبت مني ان اتوقف وبالفعل اوقفت الركشة كالمرة السابقة وقالت لي اصبر شوية يا وليدي بدخل البيت ده وبجيك صادة , وانا في داخلي بقول يا رب تكثر المشاوير المهم ما أتاخرت كتير وجاتني صادة اها يا وليدي عايزاك توديني العرضة الزرائب , برضو شاققت بـ المهندسين ومقابر حمد النيل خوفاً من القطع , وصلنا الزرائب نزلت ووقفت تجادل صاحب الزريبة حتى إشترت منو شاف وطلح ومقاشيش المهم مرقنا من الزريبة وطلبت مني اوديها سوق ام درمان ابو مرين وديتا السوق إشترت ليها ( حنه وبخور تيمان ) وبعد داك قالت لي وديني الثورة وأثناء ذهابنا للثورة أنقطع ( سلك جربوكس ) وما في طريقة إلا امشي ( المسالمة ) ورش النقادة في شارع الشنقيطي قرب مقابر اخوانا المسيحين , إشتريت السلك واخدت من بتاع الورشة زردية ومفتاح ( 6-7 ) صلحت السلك ومشينا للثورة وتاني طلبت مني اقيف ليها وبالفعل وقفت دخلت ليها بيت وطلعت منو بعد نصف ساعة تقريباً بتوقيتي انا , بس المرة دي غيرت الكيس بـ شنطة , قلت ليها اها علي وين العزم يا حاجة قالت لي وديني ( ابو روف ) مشينا ابو روف قلبي وجعني سألتها وين في ابوروف يا حاجة قالت لي البحر قلت خلاص اكيد عايزة تشتري ليها فخار , وصلنا البحر ( النيل ) طلبت مني انزلا وبالفعل اوقفت الركشة ونزلتها قالت لي هاك دخل لي الشنطة دي في الباخرة عشان الحق العمرة . طبعاً في اللحظة دي شوفت الدنيا دارت بي وإنصدمت صدمة عربية مجروس وقلت ليها يا حاجة عمرة شنو ؟؟ دي ابو روف قالت لي يا ولدي ده ما البحر خلاص ارح الباخرة !!! باخرة شنو يا امي وقدر ما حاولت معاها انو نحنا في ابوروف حلفت ستين يمين ما تنزل إلا في الباخرة وفي هذه اللحظات بقيت افكر في الإيراد وصاحب الركشة والمسألة جاطت في راسي جوطة شديد خلاص وفي النهاية فكرت انزلا عند ناس ( بسط الأمن الشامل ) وأديتهم الفيها النصيب وبقيت في الطريقة البتوصلني البيت عشان امشي انوم وأصحي يمكن أكون بحلم هسع عليكم الله اضحك ولا ابكي ( إهي إهي إهي ) ا

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]