|
Re: معتقلون نحن داخل خصوصيتنا (Re: ودقاسم)
|
الاخ ود قاسم، لك التحية، و اسمح لي ازج بمشاركة ساهمت بيها قبل كدا في مكان ما . قصة الهوية دي حتستمر كتير لاننا ببساطة عايزين نحدد هويتنا..و هي دي المشكلة..ناس قالوا عربيةاسلامية, وناس قالوا افريقية, وناس قالوا عربية افريقية, و في النهاية كلهم عايزين يحددوا ..لكن كدي نمسك الموضوع من الاول..نحن قاصدين شنو بالهوية؟ هل هي حاجة مسبقة و نهائية قاعدة في مكان ما و نحن عايزين نكتشفها و نشبها؟ هل هي بوهية بلون معين , ولا مربع مساحته بتساوي الطول في العرض؟ نحن البنخلق المفاهيم دي بعدين نقعد نقدس فيها..ولمن ننزل مفهوم الهوية المعلق فوق دا للارض و للحياة العايشنها دي حنكتشف انه ما في هوية صافية ولا في ثقافة خالصة بمعزل عن باقي الثقافات ولا في جنس بشري نقي و انا ما بشبه اخوي ود امي و ابوي مية في المية..العرب اتاثروا بالفرس واليونانيين و الافارقة ,والعكس صحيح ..والمسلمين لو فتشنا بنلقاهم اتاثروا بالمسيحيين واليهود و البوذيين و العكس صحيح ..والشرق فيه من الغرب والشمال والجنوب, وهكذا.. وهويتي هي مزيج من دا كله وعبارة عن توليفة معقدة من تجاربي زايد تجارب الاخرين في حالة تفاعل و تشكل دايم و مستمر ... والاخر الانا خلقت منه عدو و غريب هو جزء من تكويني وانا جزء منه..منو الاخر بالنسبة لي هسة , السوداني الاستلم السلطة بالقوة و شردني ولا الخواجة الاحتضني؟ منو الاخر بالنسبة لجنوبي هرب من الحرب للشمال؟جيش الحركة الاتسبب بشكل او باخر في هروبه ولا الشمالي الشغله و اداه فرصة يتعلم؟منو الاخر بالنسبة للمراة السودانية ؟,الرجل السوداني ولا المراة الاوروبية؟ منو الاخر بالنسبة للفلسطيني؟ السعودي ولا الفرنسي المشى رام الله وعمل درع بشري عشان يحمي عرفات؟ مالو لو فكرنا في مفهوم الهوية بلغة التنوع ولاختلاف و التفاعل و تعدد الاصوات والوجوه ..مالو لو فكرنا في المشاكل البتهدد البشرية كلها زي الفقر والعنف وتغيير المناخ..الخ..وما في مشكلة لو نختلف لانه دا شي طبيعي و انا لمن اختلف معاك بعيد اكتشاف نفسي, لانه انا عارف انه الزول الانا بختلف معاه فيه شي مني وانا فيني شي منه.. واصلا مافي اختلاف تام ولا في اتفاق تام, المهم ننفتح على ذواتنا ونكتشفها وننقدا , وعلى الاخرين ونتحاور..المهم الفعل المستمر على تفكيك القديم والموجود وتجاوزه للجديد, والجديد زاتو طبعا ما نهائي انما هو فعل مستمر ومتجدد.. هويتنا في رايي هي كانت و حتظل للابد في حالة تشكل مستمر و ما عندها سقف حتصله و بعدين تقيف. وما في زول ضيعنا غير اصحاب الحلول النهائية و النظريات المسبقة. و لك الشكر و التقدير.
|
|
|
|
|
|
|
العنوان |
الكاتب |
Date |
معتقلون نحن داخل خصوصيتنا | ودقاسم | 03-13-04, 03:13 PM |
Re: معتقلون نحن داخل خصوصيتنا | SUKA | 03-13-04, 07:37 PM |
Re: معتقلون نحن داخل خصوصيتنا | ودقاسم | 03-14-04, 07:58 AM |
Re: معتقلون نحن داخل خصوصيتنا | JAD | 03-14-04, 10:15 AM |
Re: معتقلون نحن داخل خصوصيتنا | ودقاسم | 03-14-04, 11:05 AM |
Re: معتقلون نحن داخل خصوصيتنا | maia | 03-14-04, 12:25 PM |
Re: معتقلون نحن داخل خصوصيتنا | ودقاسم | 03-14-04, 01:07 PM |
Re: معتقلون نحن داخل خصوصيتنا | JAD | 03-14-04, 12:42 PM |
Re: معتقلون نحن داخل خصوصيتنا | ودقاسم | 03-14-04, 02:25 PM |
Re: معتقلون نحن داخل خصوصيتنا | حمزاوي | 03-14-04, 12:50 PM |
Re: معتقلون نحن داخل خصوصيتنا | ودقاسم | 03-14-04, 06:28 PM |
|
|
|