طبعا مفوضية التوطين شغاله تستشير اي زول ماعدا المتأثرين! والسبب للقضية ديه سبق وان قالوا مفوض التوطين نفسه في ندوه عامه وقال ما معناه انه ( المتاثرين ناس طير ومتخلفين وهو ماعايز يقفز بيهم من القرن الحجري للقرن الواحد وعشرين)... ديه هي الطريقه البتعاملوا بيها معانا. طبعا وزير السد كان قال كما تعلم إنه حا يغرقنا زي الفئران والان مفوض التوطين اتضح انه ( ما بضيع وقته مع الدهماء) لانه هو فاهم انه نحن طير ورجرجه ودهماء وكده..... خاصة وانت عارف ياشيخنا الراجل دكتور وكده وما عنده وكت للحرابيط الزينا العايشين في قرون ما قبل اكتشاف النار!!
طبعا انا سبق و طرحت سؤال محدد وهو: علي الحكومه ان تحدد هل هي عايزه تبني خزان او عايزه تهجرنا خارج ارضنا؟ وساعدناهم وقلنا ازا البلد في حوجه لخزان، مشاريع الخزانات ديه عندها شروط ودراسات معروفه لاي زول بعمل في المجال ديه، وظللنا لمدة 13 سنه نطالب بالدراسات ولم نجد لها اثر!( وطبعا الجماعه زي ما اتضح كانوا فاهمين انه نحن ما فينا ولا واحد بفك الحرف) ومشروعات الخزانات - دون كل المشروعات - من المشروعات التي لا يمكن اقامتها بدون دراسات علميه دقيقه ومفصله جدا لسبب بسيط وهو تاثيرها الخطير علي البيئه وعلي المجتمعات بجانب التغييرات التي تتسبب فيها وانتشار الامراض المصاحبه للمياه الخ... بالرغم من علمنا بقسوة ما سيقع علي اهلنا من تهجير وتفكك للمجتمع ، قلنا وتفاديا للنزاع، نحن قررنا ان نعيد بناء حياتنا من جديد ( اعادة توطين) داخل ارضنا في حالة قيام الخزان! هذا هو كل ما نطالب به....!! لكن السيد المفوض لانه فاهم انه نحن طير ورجرجه لذلك هو مكلف نفسه تعبان مشرف علينا نحن ( القصر) وعشان كده قرر انه يودينا الصحراء مره واحده.... هيئة جامعة الخرطوم الاستشاريه طبعا نحن قررنا نفتح فيها بلاغ ونعرف الدراسه ديه القام بكتابتها منو! لانه الفساد العلمي اخطر من اي فساد اخر، ونحن طبعا لا نقبل ان يزج باسم الجامعه في هذه القضيه دون ان يذكر من قام بهذه ( الدراسه) اسمه. ( الشينه منكوره) مش كده... طبعا ياشيخنا مافيش قوه في الارض عندها حق تتطلع اي شخص من ارضه بدون سبب. طبعا هم كانوا عاملين الخزان سبه عشان يقلعوا راضنا، ولكن نحن اثيتنا ليهم انه ارضنا كــبــيــره ممكن تشيل الخزان وتشيلنا.... بالـــراحـــه.... الراجل الحكايه ديه ما عاجباه لانه ( هم) عايزين الارض فاضيه من السكان!! وفي حالة بقاءنا في ارضنا ( الشغلانيه) بتكون ( خستكت) ... لانه الظاهر إنه الاتفاق كما يقول عادل إمام ( سلمني نضيف اسلمك نضيف)...
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Asskouri
فيس بوك
تويتر
انستقرام
يوتيوب
بنتيريست