دراسة علمية DNA : السودانيون يحملون جينات الفلاتة والهوسا والأوربيين والحبش (يعني ما في عرب)

Quote: دا بوست قوى خلاص ! بالجد دا اهم بوست إتفتح في المنبر العام حتى الان .. يعني بوضوح اهم من غزوة امدرمان ، و تحالف البشير - الصادق ، و بوست تاريخ الغنا قوة و موضوعية الدراسة و الافتراضات المتعلقة باصل السودانيين بتكمن في إنو : * منتصر ، بنطلق من داخل الدوائر العلمية بتاعت لوكا كافيللي سفورزا ، و دا زول بجد ضخم و خطير ، و مؤسس العلم الحديث الاسمو ( الآنثروجينتكس ) : دمج الانثروبولوجي مع علم الوراثة الحديث مع ال Computational Biology : برامج الكمبيوتر الخاصة بتحليل الجينوم ، و تفكيك كودات ال DNA .. و لازم نفرز الفرق بين الجينات و بين الجينوم ، لانو تحليل الجينوم هو البورينا شنو الفرق بين الجعليين و الدينكا ، و وين بتلاقو ، و هل الجعليين بلاقو العباس ام لا ؟ ودا شى ببساطة بقى ممكن و ساهل .. و لا يضير عدم توفر معلومات انثرو - جينية عن العرب البائدة ، و العاربة ، و المستعربة * دا جاب علم اسمو الفايلوجينتكس ( رسم شجرة الجينوم التاريخي ) للعنصر البشري المتقارب ، و الاجيال المشتركة في جد قديم واحد * منتصر برضو ترجم لسفورزا كتابو الهام : الانسان في الشتات و حقو اي زول مهتم بالموضوع دا يقراء هذه النسخة العربية * سفورزا بنطلق من حقيقة إنو (لوسي) هي الجد المشترك لكل البشر .. ودا كلام ببساطة شديدة ، صحيح تماما .. و بقى زي حقيقة إنو الموية بتتكون من ذرتين ادروجين و ذرة او كسجين * لوسى دي هي ( اوسترالوبوليكاس ) .. عاشت قبل 5 مليون سنة في وادي هور / اواش الاثيوبي ، لذلك القول بانو الانسان الحديث إتوجد في افريقيا و تحرك من افريقيا دا كلام صحيح ، و لوسي ( الام الميتوكوندريا ) هي المشروع الاول للخط الجيني التطوري اللي جاء منو ( الهومو آريكتس ) ودا الانسان الواقف ، ثم ( الهوموسابين ) الانسان الحديث بما في ذلك الشايقية و النوير و الانكا و ناس الهند و ناس النهر الاصفر و الغال و السلت و شارلمان * الموضوع كلوا إتسهل لمن كريغ و فتنر كسرو سر الجينوم و رسموا الخرطة الجينية في 2001 ، طبعا جينوم لوسي و فحص ال DNA بتاعا اتعمل من عظم عمرو 5 مليون سنة مع ملاحظة إنو رفات لوسي إتلقت في 1964 ، قبل ظهور و تطور هذه العلوم * إنسان كرمة ، بوصفو احد مصادر العنصر البشري للسودانين ، و ليس كلها ، جاء مباشرة ( او بصورة غير مباشرة من لوسي ) * مثيل لوسي اتلقي في مناطق اخرى ، لكن مش كتيرة في افريقيا .. .. الحلقة المفقودة هي : انسان كرمة و ما شابه انسان كرمة كيف واصل حِراكو الانثربولوجي في السودان ( علم إنسان السودان ، و شجرة ال DNA بتاع السودانين ) و دا برضو صار ممكن و نعود لبوست الزناتي الهام .. يا ريت يظل فوق