|
|
 Re: لاح لي من صعيد برقاً كتم تعّالو (Re: الطيب شيقوق)
|
| Quote: هييييييييييييع ود المنسي خبرنا ات من وين يا زول ؟ الله يديك العافية |
الفاضل/ الطيب
سلام وعافية
بدوور تعرف انا من وين ولا أنا الان وين ؟؟؟
ولا شايت وين ؟
ولا جيتنا من وين ؟؟
والله يديك العافية ... هل هي دعاء لي بالعافية
ولا ( الله يديك العافية ... يعني ورينا عجاج كرعيك ؟؟ )
تحياتي واحترامي
خالد علي محجوب
| |
 
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
| Quote: افو افو يا ود المنسي حرم دى لا تشبهنا ولا بتشبهك - انت سيد الدار تمرح فيها زى ما يعجبك ونحن ضيوفك بس حبينا نعرفك من وين يمكن ود عمنا عدييييييييل يا ود المنسي |
الحبيب العزيز الطيب
عجبتني بالحيل .. أفو أفو ......
أنا يا سيدي من شندي وبالمناسبة ... المنسي هذه ليست من اسمي لصقها فيا بكري سيد الحوش والكثيرين ينادوني باسم ودالمنسي .. غايتو بحمد الله أن ابوي ليست له دراية بالكمبيوتر وألا كان بكون له كلام تاني معاي وبعد دا خايف من الشلقين يوصلوا الخبر
الاسم بالكامل خالد علي محجوب محمد ابراهيم محمد خير ودقردة
لك الشكر الجزيل الطيب الطيب شيقوق ... ماكان قصدي غير اني اجابد معاك الكلام وحمداً لله صبت مرامي ونلت الغاية
تحياتي واحترامي لك ولست الحوش بت الشيوخ
خالد محجوب
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: abubakr)
|
Quote:
ود بكار اما انك عجيب بندراوى قح فمن اين لك هذه البداوة ؟ مش البداوة وبس كمان العمق المعرفي في السايكلوبيديا الاجتماعية السودانية .
عميق معزتي |
ود شيقوق سري
إليك أطيب تحياتي،
يا زول هه.. أنا مولود في سدُر صنقر، واتربيت ما بين ود شمعون وود جودات ( دي مناطق افتكر ما بعرفها زول كويس إلا سمية بت الشيخ وشنتير الهارب) والطنضب (سروب بت نيلة)، وقضيت جزءأ من طفولتي المتأخرة في قرية إسمها عطينة (بكسر العين وفتح الطاء وسكون الياء) في مشروع الجنيد، وفي بعض انحاء الجزيرة ومنها قرية صغيرة اسمها المدينة في منطقة الحلاوين، وهي أهل جدتي من جهة والدي، القلت ليك عليها مسلمية حلاوية، وهي اللمتني فيك.
الظاهر أنك فهمت أني جيت لوادي سيدنا من مدرسة جبل أولياء الكانت نقلت لمدرسة المؤتمر بأم درمان. أنا جيت لوادي سيدنا من رفاعة الأميرية. وقبل الأميرية قريت في رفاعة الشرقية ذات الرأسين : تالتة ورابعة ألف لأولاد المدينة، وهم خارجيون، وتالتة ورابعة باء لأولاد القرى وهم داخليون.
تمتحن عشرة أو خمستعشر مدرسة صغرى (ثلاث سنوات فقط) يأخذوا منها فصل واحد فيه 40 تلميذ، ونقرأ تالتة ورابعة في رفاعة الشرقية ذات الرأسين، ثم نمتحن للوسطى.. الوسطى أيضا كانت تمتحن عشرة مدارس او خمستعشر، ويأخذوا منها فصل واحد، 40 تلميذ. ناس المدينة كانوا مغتاظين مننا شديد، لأنه بنضيق الفرص لأولادهم في المدرسة الأميرية. أحيانا رفاعة الشرقية تآخذ 24 أو تزيد من الفصل الواحد دا، والباقي مقسم على أولاد رفاعة والمدارس الأخرى - رفاعة كانت فيها تلاث مدارس أولية أخرى غير الشرقية.
وكانوا بسمونا القراريح من "القراح" لأنو أهلنا العرب ما بحبوا "القروحة" أبدا، بفتكروها هي ذاتها بتجيب المرض. وهذا يحدث أحيانا.. المهم، ناس رفاعة طبعا مهتمين بالتعليم من بدري، ولذلك أسس شيخ لطفي رحمه الله وزاده إحسانا مدرسة لطفي الأهلية، كان فيها ثلاثة أنهر، الأول معان من الحكومة وهذا يقبل فيه الطلبة الماحالفهم التوفيق في الدخول للأميرية، سواء من رفاعة أو من غيرها، وبدفعوا مصاريف طبعا وأولاد القرى والمدن التانية عندهم داخلية برضو.. والنهران الآخران لكل من يستطيع أن يدفع المصاريف الكاملة أو تتفضل عليه المدرسة بتخفيضها بعض الشيء.
بالمناسبة، في السنة الرابعة كانت داخليتنا هي نفس المبنى الذي فتح فيه الشيخ الجليل بابكر بدري أول مدرسة بنات أولية في أوائل القرن العشرين.. ثم رحل بعدها ليؤسس الأحفاد في أم درمان.
أولاد رفاعة كان دايما بقبلوهم في حنتوب، لكن دفعتنا أول دفعة من رفاعة يقبلوها في وادي سيدنا، في سنة 1967، حيث عاصرنا صاحبك الرطان.. ثم جات مايو وقفلت وادي سيدنا في 69 ونقلونا حنتوب..
أما الطنضب التي امتحنت منها الصغرى، فتبعد عن رفاعة حوالي 25 أو 30 كلم، بختك إنت الكانت قريتة البردانة تبعدمن الرهد عشرة كليومترات فقط.
مرة كنا في "خروج" إلى أهلنا في الخريف، وفي ليلة الخميس وصبحانة الجمعة نزلت مطرة شديدة، أوقفت العربات.. فعدنا إلى رفاعة كدارلي، من بعد الفطور، ووصلنا العصير مع التمام وقبل مغيب الشمس بشوية.
تعرف لما جوا يدخلوني الطنضب الصغرى - نحن كنا تاني دفعة فيها، حيث فتحت ضمن ما يسمى مدارس طلعت فريد في 1957- صحبني عمي الصديق الله يزيده رحمة لأنو أبوي كان غايب.. وناظر المدرسة كان زول صعب من أبحراز إسمه حمد النيل.. قال لعمي: لكن الولد دا أجنبي (!!!! لول) يعني موش من الطنضب أو القرى الواقعة في منطقة مدرسة الطنضدب!! طبعا بكون بلغه أنه الأسرة كانت في ود شمعون، حيث كنا مع جدي لأمي. عمي قال للناظر يا خي الولد أبوه أخوي شقيقي، مولود في الطنضدب وعاش أغلب حياته في الطنضب. وقبلني الناظر على مضض لأنه عمي كان هجاني (لكن بقول عليها محافظي).. وهي مهنة كانت لها شنة في ذلك الوقت..
أفكر في أن أكتب عن تلك الطفولة مثلما بدأت تكتب أنت عن طفولتك.. لأن النقلة الحضارية منها تساوي عدة قرون أو عشرات القرون.. من نمط حياة ظل مستمرا مئات السنين أو آلافها، منذ أن بدأت هجرة العرب إلى السودان واختلاطهم بالعنج (أو الفونج) في منطقة العاديك والسودان الأوسط عموما، إلى القرن الحادي والعشرين في أمريكا الشممالية..
وسيكون عنوان كتابتي "مذكرات الولد الأجنبي".. إن شاء الله..
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
| Quote: عمي قال للناظر يا خي الولد أبوه أخوي شقيقي، مولود في الطنضدب وعاش أغلب حياته في الطنضب. وقبلني الناظر على مضض لأنه عمي كان هجاني (لكن بقول عليها محافظي).. وهي مهنة كانت لها شنة في ذلك الوقت.. |
اخي ود بكار
لقد كنت مهتما جدا لعمل دراسة عن العوامل التى شجعت اولاد القرى الذهاب الى المدارس ووجدت اغلب الحالات اما ان يكون ابوك موظف - مش مهم على اى درجة - لانو بحكم وظيفه بيكون شاهد الناظر او الطبيب او المدير او المهندس وتكون اشواقه ان يكون ابنه او ابن اخيه هكذا .
فعمك الهجاني ده حتما هو السبب في صناعة ود بكار اليوم.
حاواصل معاك في الموضوع ده يا الحبيب
معزتي
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
يا ود شيقوق، ياخي الناس منتظرين سيرتك وذكرياتك إنت، ومفتوح ليها بوست خاص، ما تجرجرني معاك، قدام الناس التقال ديل.. إنت أغويتني بإثارة شجون قديمة، وحنين دائم إلى تلك البقاع والأيام.
رحم الله الشيخ بابكر بدري، هل قرأت مذكراته "حياتي"؟ لم أر رجلا أكثر صدقا وصراحة في مذكراته مثل الشيخ بابكر بدري، رحمه الله رحمة واسعة وأسبغ عليه نعمه الخالصة.. يذكرني بمذكرات جان جاك روسو وغيره من عظام رجال التاريخ الذين كتبوا سيرهم الذاتية بمنتهى الصدق والصراحة..
يلا يا بن العم، واصل
هات الجزء الثاني
مع ودي
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: b_bakkar)
|
| Quote: بمذكرات جان جاك روسو |
اشكرك اخي ود بكار على هذه اللفتة الجمية ولكن اين نحن ثقافيا واجتماعيا من دنيا جان جاك روسو، الفيلسوف الفرنسي،الذي كتب يقول «انا افعل شيئا لم يفعله شخص قبلي، ولن يقدر شخص على تقليده بعدي»، بسبب الجرأة والصراحة الشديدة التي كتب بها مذكراته وقوله كذلك (إن قلبي الحساس كان أس بلائي كله)
وجبرا لخاطركم واخي ابي بكر وجميع الاخوة المهتمين فسوف ابدا اليوم الفصل الثاني من حياتي -
عظيم مودتي
ود شيقوق
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
البرق لمع وكشف لنا عن مكنون الأفذاذ
إذن نحن موعودون بسيرة الخال بشير بجانب سيرة شيقوق
فما لنا ولجان جاك روسوو( كل ديكا فى بلده عوعاى )
نريد ثقافتنا خاصتنا نحن التى تمثل عمقنا الحضارى
ياله من إرث طارف وتليد ... بإنتظاركم ياسادة القوم .
البراق وقت الدجن
يمين وشمال يتواججن
شعلن نارى وأججن
زادن ولهى ولى شجن
شالن نومى وعلجن
جرحنى وماعالجن
الشيخ هاشم
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
الشيخة سمية، سلام
مررت على البوست اليوم، واطلعت على تعقيبك أعلاه لأول مرة. أردت أن أرد التحية وأرفع البوست.
إن شاء الله لما تسمح الظروف، من وقت إلى آخر، سأحكي عن حياة أهل القرى المطلة على البطانة من جهة العاديك. وقد أخذت مظاهر وقيم تلك الحياة، بحلوها ومرها، تختفي الآن وتندثر. ولكن لأبد أن نبذل مجهودا لتدوين ما بقي في ذاكرتنا وذاكرة أبائنا الذين ما زال بعضهم على قيد الحياة.
أسآل الله أن يعطينا العافية وصفاء الذهن والوقت.
سلامي الحار إلى شيخ الزبير والأبناء الميامين.
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: بشير الخير)
|
| Quote: أسآل الله أن يعطينا العافية وصفاء الذهن والوقت |
اللهم آمين
| Quote: إن شاء الله لما تسمح الظروف، من وقت إلى آخر، سأحكي عن حياة أهل القرى المطلة على البطانة من جهة العاديك |
نأمل ونرجو ذلك ونتمنى أن تسمح ظروفك فى القريب العاجل
| Quote: وقد أخذت مظاهر وقيم تلك الحياة، بحلوها ومرها، تختفي الآن وتندثر. ولكن لأبد أن نبذل مجهودا لتدوين ما بقي في ذاكرتنا وذاكرة أبائنا الذين ما زال بعضهم على قيد الحياة |
ولآجل هذا الفهم العميق أدعوك للتدوين منعا للإندثار
ألبسك الله العافية دثار وكساك الهيبة والوقار .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
أصولن حور ماهن هجن
وللأشواق هن هيجن
غسق الليل خدعنو جن
وهبلن نارى وفججن
بروق بسامن جانى جن
وصافى كلامن من لجن
زايدو حلاوه نفس عجن
شمايل أطيافن عرجن
سبانا دلالن زى شجن
ظبايا الليل هن بنرجن
نحاحى نفوسنا أدرجن
ومن كيد غيدو أكان نجن
رغم بلاهن ماهجن
ولا الفى الناس بتفرجن
منصور
أصل الظبا مابوالفن
طبعن أصيل ما أتكلفن
نهجن عديل ماحرفن
لقلوب عشاقن شغفن
بروق الليال العسعسن
من محياهن شالن سنن
غشغشنى ولى غافلن
وبالعسين أتجافلن
وفى تعليقى أتفنن
أنا فى الرجا لو ترحمن
سجعى المتل ساكن الفنن
لو الهدية يتقبلن
أهدى حياتى لكن فدن
شيلنها وما تشكرن
سمية الحسن طلحة
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
مٍراحتنا شرابهن يوت ما غبّن
شبعنات ..
في الشقل اب شوك ما شبّن
الحُمل ولدّن وربّن
حلماتن تقلّن
جرّن فوق سياقنهن كبّن
اللبم في ضِرعاتّن جبّن
المغصة إن كان ضِرعاتّن خِربّن
القرعة آ وليد
السعن آبنية
شوفو النعمة السالت
فوق قيزان الرملة
ناس البندر
لبن الشاي بي العُملة
سمح الخمج الفوق اسيادّو
سمح العز المن أجدادّو
بالحيل آجني اي والله
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: خالد علي محجوب المنسي)
|
يا خالد ود المنسي
Quote: شبعنات ..
في الشقل اب شوك ما شبّن |
يا الله يا ود المنسي مالك مهيج ذكريات الطفولة
الشقل ده يا بت طلحة هو الشجر النامي في طرف الحلة وايام زمان اهلنا بيقولوا لينا امشوا جيبوا الجمل او الناقة من الشقلة وعادة الجمل بيكون مقيد قيدا مرخي شوية عشان يقدل براحة من شقلة لشقلة .
والشقل هو الشجر النامي على البلدات وعادة المزارع النجيض والحريّف بيقوم الايام دى (ايام الرشاشية) بيشيل مويتو في قربتو او جالونو المخيّش لترطيب الموية ويشيل فاسو عشان يمشى يشقل الشقل وتكون بلادو نظيفة للزراعة . والشقال النجيض ما بتلهم الشقلة بكرعيهو لانو مرات بيكون لابد تحتها الدبيب الوشاش . والمزارع البعز ام اولادو بيلقي الايام دى ضقال الطلح يشلخها ويملخها بفاسو ويجى شايلها عدلتين في دابتو .
ده كلو زمان يا ود المنسي الله يحفظك ويديك العافية
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
Quote: برق البارح السنًد سحابو مزيق
أتقاضيتو، واسرب غناي متهيج
اتلفحت بالواحات وقم مضيق
طريت الضحكو لي قلق الحزانى
بفيق "
يا سلام يا ود مبروك على هذه التحفة.
كنت اجتر ما تداخل به الاخوان فى هذا البوست فمررت على هذه الرائعة واحترت كيف مررت عليها دون ان اعلق.
يا بت طلحة وينك، وقريت تعليقك لكن مو قدر الحتة دى!! عليك الله عقبى عليها تانى.
شكرا اخى محمد. |
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: على احمد النعيم)
|
| Quote: يا الله يا ود المنسي مالك مهيج ذكريات الطفولة |
الحبيب الفاضل الطيب شيقوق
تحية طيبة
هي الذكريات هجدت ولو ثانية ما موقدة نار جمرها حي ملهلب يا ودشيقوق يا اخوي
طولنا خلاس أخبار شندي فوق ماجاتنا
طرينا الفرعو فارع ومابي لي وصلاتنا
في صدرك مدافع تحتو البرينات راطنا
دا الفقش كويلنا وفقع كفر عجلاتنا
مجهول قائلها بس من ناس شندي
ولك تحياتي ود شيقوق
خالد
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: خالد علي محجوب المنسي)
|
Quote: والغيمة تهتّف مطراً نَقّع
فُوق نُوار الطلح الفَقّع
ريحة البرُد إن جاتّك
عطرّن فَايت خُمر الفوق أردافها مجدُع
شفنا الوادي
بقشقش في دمعات الليل
والتعل الشايل بدا يتفقّع |
فوق نوار الطلح الفقع - دى البرمة مش يا ود المنسي ؟ الله يكرمك بعتيّد البرمة .
يا حليل دكتور محمد بادى يا ود المنسي كنت اعشق حلمنتيش ود بادى .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
ما لي اليوم؟
الساعة الآن الخامسة صباحا ولم أنم.
ياليل الصبّ متى غده؟؟
يا ليـل الصـب متى غده ؟ أقيـام السـاعة موعده؟
رقـد السمـار فأرقــه أسـف للبـين يـردده
فبكـاه النجـم ورق لـه ممـا يرعـاه ويرصـده
كلـف بغـزال ذى هيف خـوف الواشـين يشرده
نصـبت عينـاى له شركا فـى النـوم فعـز تصيده
وكـفى عجـبا أنى قنص للسـرب سـبانى أغـيده
صـنم للفتنة منتـصب أهـواه ولا أتـعـبـده
صـاح والخمـر جنى فمه سكـران اللحظ معربـده
ينضـو من مقـلته سيفا وكـأن نعاسـا يغمـده
فيريـق دم العشـاق بـه والويـل لمـن يتقـلده
كـلا لا ذنب لمـن قتلت عينـاه ولم تقتـل يـده
يا مـن جحدت عيناه دمى وعـلى خـديه تـورده
خـداك قد اعترفـا بدمى فعـلام جفونك تجحـده؟
إنى لأعيـذك مـن قتلـي وأظنـك لا تتـعمـده
بالله هـب المشتاق كـرى فلعـل خيالك يسـعده
مـا ضرك لو داويت ضنى صـب يدنيك وتبعـده؟
لم يبـق هـواك له رمقـا فليبـك عـليه عـوده
وغـدا يقضـي أو بعد غد هـل من نظـر يتزوده؟
يا أهـل الشوق لنا شـرق بالدمـع يفـيض مورده
يهـوى المشتاق لقاءكـمُ وصـروف الدهر تبعـده
ما أحـلى الوصـل وأعذبه لـولا ا لأيـام تنكــده
بالبـين وبالهجـران فيـا لفـؤادى كيف تجـلده ؟؟
الضرير القيرواني
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: b_bakkar)
|
Quote: فوق نوار الطلح الفقع - دى البرمة مش يا ود المنسي ؟ الله يكرمك بعتيّد البرمة .
يا حليل دكتور محمد بادى يا ود المنسي كنت اعشق حلمنتيش ود بادى |
بالحيل عتيد البرمة بكون ربيان وانقز من عنقريب لي عنقريب .. مو شبعان وتريان
وينّا مراتعْ الدرّت الباسط
دايمن ببكي عليهن
وين بنوت الحلّه البُكر
عصرن بدري بسوّن في شهاهيهن
وبعد الليل مايهوّد
ونحن نهوّد
عاد أُماتن ينادّن ليهن
نمشي علي القيزان نتقادم
أقيس الخطوة مع التاتاي ومشيهن
والله البعد الحاصل مانسانّا
وحاتكّن .. في قمراتنا بشوفو وشيهن
ألا النضم اب غُنّه
واللهج السكر وين بلقاهّو
بنات الريل الدوب يا ليهن
والخُوف آناس
كان أبقى الشوق الحاصل بينا
معشعش فيهن
مقنع سابل وين بلقاهّو
طرفاً زابل وين بلقاهّو
وعين بدنقر من واليهن
والوجنات الشعّن بقّن
ودالعين النايم زرقّن
مو زايغ رسيان وميقّن
زولن ان خدران ومحقّن
من الشوفة عروقو يطقّن
كان الدنيا بي صح تتخلّى
كنا بركنا معاهن في رملات الحلّه
ألا كمان بنشوفة مزلّه
شوف عليك الله ياودشيقوق جنس النضمي دا
Quote: نمشي علي القيزان نتقادم
أقيس الخطوة مع التاتاي ومشيهن |
البنيات مشيهن متاقل والخطوة زي خطوة الجاهل اليادوب بتاتاي ( تاتي )
Quote: زولن ان خدران ومحقّن
من الشوفة عروقو يطقّن |
العاشق الولهان بيهن ان بقى عيان متكوك تب وما بجر لا يد لا كراع الدب مركب لي .. ان بقى شافن وهو في وعكتو ديك تف تف تف عروقو يطقن وتعود العافي
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: خالد علي محجوب المنسي)
|
الأخوة الأعزاء :
خالد المنسى والطيب شيقوق وعلى أحمد النعيم
منصور المفتاح والأخوال بشير الخير وبشير بكار
يا أهـل الشوق لنا شـرق بالدمـع يفـيض مورده
ـــــــــــــ
يهـوى المشتاق لقاءكـمُ وصـروف الدهر تبعـده
ــــــــــــ
ما أحـلى الوصـل وأعذبه لـولا ا لأيـام تنكــده
ــــــــــــ
بالبـين وبالهجـران فيـا لفـؤادى كيف تجـلده ؟؟
؟؟؟؟؟؟؟؟؟؟؟؟
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
الاخت سمية
Quote: خبتنِك بروقاً يااالدغش ما أنفشّن
وفوقك قبـّل الضّحوى أب تعولن بشّن
السبب الخلا ريشات قلبى طارن رشّن
خبر المن صعيدتِن بالبطاين طشّن
ودالصقرى |
واصلي لينا في مسادير ود الصقري الانسان البدوي الرائع الذى لم نسمع عنه الا في اخر حلقة لبرنامج شوارد .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
لحّاح البروق قلع السحاب الماسي
عتم وصبَّ فوق بلد أم نفايل راسي
الليل كلو يرزم وبكرة قحّ نحاسي
قعد سيل المرانع والحدوب متواسي
ودالشريقاوى
يادارع عشانيق البروق وبرِفَّن
الليل جا وعِيَن النعايم نَفّن
على الداداتو شالن حجولو وقَفّن
ياالليل غادى ياروقاى جرايدك حَفّن
ود الصقري
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: لحّاح البروق قلع السحاب الماسي
عتم وصبَّ فوق بلد أم نفايل راسي
الليل كلو يرزم وبكرة قحّ نحاسي
قعد سيل المرانع والحدوب متواسي |
يا سلام يا بت طلحة
اهلنا انا بسمعهم دائما لما السحاب يكون هاجس من الضهرية لحدى يقابل المغربية بيقولوا السحاب ده بايت . وقلع السحاب الماسي في بيت ود الشرقاوى ده اعتقد يقصد بيها قلع السحاب البائت .
عتم وصب تعنى تراكم وتجمع وام نفايل اكيد محبوبة الشاعر وراسي بدون جونو
والليل كلو يرزم يعنى بيرعد وبكرة قح نحاسي تعنى بعد ما سرى بالليل واصل النهار كلو لحدى المغربية وعادة برق المغربية من جهة الغرب هو البرق النحاسي ومطرتو بسموها اهلنا نحاسية ودى من اكثر الامطار ماءا وصواعقا كفانا الله واياكم .
قعد سيل المرانع والحدوب متواسي - المرانع هى الاراضى المنخفضة والحدوب جمع حدبة وهى الاماكن العالية !!
ولعل الشاعر يقصد هنا ان الماء ساوت الاراضى العالية والمنخفضة .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
Quote: خبتنِك بروقاً يااالدغش ما أنفشّن
وفوقك قبـّل الضّحوى أب تعولن بشّن
السبب الخلا ريشات قلبى طارن رشّن
خبر المن صعيدتِن بالبطاين طشّن
ود الصقري
|
متل المِن رشاشِن بالبطانة اتهوّن
وقفن فوق علو ومن الأنيس اتحوّن
وا أسفاي من الـ كل يوم بتلوّن
شهدان موسى.. من فرّو المنازل ضوّن
لا أعرف شاعرها..
سلام يا بت طلحة
انتعشت بقراءة هذا البوست من أوله
وقد عكفت عليه منذ الصباح
أرجو أن تفسحوا لي بينكم
فحديثكم ذو شجون
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: Shinteer)
|
الأخ الطيب شيقوق
شرح وافي وخبرة بالبروق
وشكرا للمتابعة
الأديب أستاذنا/ عبدالله عقيد
بهاء حضورك يخفي برق الصعيد
بل كل أنواع البروق علي كل الأصعدة
عودا حميدا ،أسعدتنا إقامتك هنا منذ الصباح
ومثلك لايستأذن ليفسح له مجال
فقد مددنا البسط من أمد ننتظر للحظةإستقبالك
شنتير
لازلت أذكر أول تعليق لك على مربوع لودالشوبلى
كتبته أنا فى بوست للأخ عبدالله عقيد وكان تعليفك
علي : حلبولك بكارا ضير علي البلاس
بقولك : كلام فانتاستك ..
والغريب إننى أحس ببعض أبيات فى الدوبيت وأتمنى
أن أجد قارئا يشاركنى فيها نفس الإحساس ، وأهم بشرحها
ثم أتراجع لعلمى أن الشرح يفسدها ، وأقول لوصادفت من
يفهمهها هكذا أفضل من أن تصادف من يفهمها بعد الشرح .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
| Quote: حلبولك بكارا ضير علي البلاس |
يا أختنا سمية .. شن حالك؟
الاقتباس الفوق ده بالنسبة لي ما كلام. دي صورة راسها عديل شايفها قدامي. ولو ما الصور البتقيف لي قدام وشي دي وحاتك ما بجيب خبر لكلام "مشعور". و"البلاليس" دي عندي فيها مرادة قديمة، خسوساً وكت العتيم، رغم تآمرها البرئ مع مهاجرة أنصاص الليالي: أرْخْ (أرْخِي) النقْرَة نسمع طَنـّة البلاّس. أو كما قال شيخنا.
وكلو فانتاستيك خالس خالس.
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: Shinteer)
|
نعم الحال يا أخونا شنتير
جانا إعصار غونو جاب الأودية دي شايلة العاول وأب جداول
نزلوبا أم عروض سافل ودى الحاسا
حلبولا البطن وكت السحر بلاساِ
دايما أهلنا يقولولك : بلس علينا وبلست علينا ..
كدى لايم لي الكلام دا كان بتلايم ( بلاس ، بلس وبوليس ).
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: نزلوبا أم عروض سافل ودى الحاسا
حلبولا البطن وكت السحر بلاساِ |
الكلام ده يلايموا ليه شنو؟ والله براه ملايم ملايمة ما حصلت. حَلَبولْها البِطِن وكت السَّحَر بلاّسا. شوفي الطنّة والبلاّس جن سوا كيف!. ما ذُكِر البلاّس إلا وذُكِرت الطنّة. وشيخنا فوق قال: أرخ النقرة نسمع طنة البلاّس.
أحد أصدقائي سألني ما معنى whistle blower بالعربي؟ قلت ليه إنو أقرب معنى ليها هو "البلاّس"، مع الفارق الوظيفي .. وكان مغالتني أسعل ود أب ناجمة. وفي النهاية وصلنا لترجمة يفهمها أبناء آدم الآخرين.
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: Shinteer)
|
| Quote: أحد أصدقائي سألني ما معنى whistle blower بالعربي؟ قلت ليه إنو أقرب معنى ليها هو "البلاّس"، مع الفارق الوظيفي .. وكان مغالتني أسعل ود أب ناجمة. وفي النهاية وصلنا لترجمة يفهمها أبناء آدم الآخرين. |
صدقت ياشنتير أخوي فى قولة ترجمة يفهمها أبناء آدم الآخرين
قال أحدهم مقربا المعنى لبنى آدم :
صبر كاتم غرامك وأم لهيب في حشاى
ليمك قاسي حارسك النوناي
حاتى وحاتك إت يالبقيت مناى
متل حالة البجدع وغالب الهداي
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
فوق حدبة ملوك سحباً مزرقن ختّا
سيل السارية جدول نار عشانا همتّا
والدُملُك نبت كسَى من عِريهو أتغتّا
مسعود إيدو فضَّت فى القِصيرة أسقتّا
شوف كلام الشريقاوى الأب ياودشيقوق
سيل سارية بطانه همد نار العشا..
مو متل غونو القطع الكهرباء وبشتّنا
لاناقة يحلبوها ولا يحزنون ..
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: فوق حدبة ملوك سحباً مزرقن ختّا
سيل السارية جدول نار عشانا همتّا
والدُملُك نبت كسَى من عِريهو أتغتّا
مسعود إيدو فضَّت فى القِصيرة أسقتّا |
Quote: عقيد البادية ركب البى الملاين كتّا
عَقَب الهورمة وديك النديوة قصدتّا
لقى حنتوت وتباً مويتو طير ماخبتّا
هدم وشال رحل قايدة قبيلتو قبضتا |
تحياتي لكم اجمعين
ود الشريقاوي الكبير شاعرا شاعر..
(المرابيع) ديل جماعة يلحقنلهن ستة ، سبعة او اكثر ومتواليات على نفس الوزن والقافية..
وقافيتهن المنتهية بـ(الادغام بقنة) علي قول ناس العربي الفصيح زادتهن جمال وبهاء..
يا سمية عليك الله تميهن
لا عند
(الراجيها ميراث من جدودها بختا)
وما اجمل صورة الحنتوت مع موية التب الما خبتها الطير دي
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
Quote:
بت طلحة معليش انا فهمت العلاقة بين السيل الهمد نار العشا والناقة البتحلب .
ارجو التوضيح لو امكن
|
ودشيقوق
إت كان ماسويت كدى وأتغابيت العرفة تبقى ماك من نفر منصور العجب
ليس الغبي بسيد في قومه ولكن سيد القوم من يتغابى
ماتمش لبعيد أنا بعنالك المعنى نحن فى البطانة السيل مابقطع راسنا ، بنحلب ونتعشى فى أمانة الله
هنا جية السيل تقطع الكهرباء وعليك أمان الله أتقول الدنيا فيها مجاعة ..
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: Ahmed Yousif Abu Harira)
|
Quote: وقافيتهن المنتهية بـ(الادغام بقنة) علي قول ناس العربي الفصيح زادتهن جمال وبهاء..
يا سمية عليك الله تميهن
لا عند
(الراجيها ميراث من جدودها بختا)
|
أحمد حبابك
أنا باقي بحولق فوق البيوت ديل مصبحة ومغربة خاتمة وعارقة ، وعلي إنجلاتك بديك الأبيات الذكرتهن ديل مادام جب طاريهن براك ، أهلنا الشكرية فى الفولة وود شمعون كلامن كلو بالغنة سمح بالحيل كان جاك خالى ودبكار بجيهو لينا تب ...
فاقدين ودالنعيم ياأحمد نعلو طيب .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
الاخت سمية سلامات والله البوست ده من اجمل البوستات واتمنى الا يتأرشف
يا اصيلة ذى بوستك ده الواحد الا يجى شايل سوطو ويلم فى الشباب ديل
جلد جلد جد ما لعب حتى تكتمل نشوة هذا الكلام الجميل
والله لو طلعنا سيطانا الا يحجزونا ب شبال شبالين
انا طبعا ما بحفظ كويس لكين حافظ لى كلام من حبوباتى الله يرحمن سمح خلاااص من كلام اهلنا الزيادية وما اظنها تامه
اخوى الفى ظنى
كن قالو جريت عليك بنغنى
الدوسة ام رمم بكريها ما بتنى
ناقة العبيدية حرم صلوحا
وسايقها جبريه
الدوسة ام رمم بت حوايليه
ملحوظة
الدوسة: الدواس اى الحرب
ام رمم: كثيرة الرمم اى الجثث
بت حوايليه: اى من حول لحول سنة لسنة
تحياتى
محمد
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: محمد المختار الزيادى)
|
Quote: اخوى الفى ظنى
كن قالو جريت عليك بنغنى
الدوسة ام رمم بكريها ما بتنى
ناقة العبيدية حرم صلوحا
وسايقها جبريه
الدوسة ام رمم بت حوايليه |
مرحب بأهلنا الزيادية
كلامكم حلو وطاعم بالحيل
البوست دا عمره طويل كل بوستاتى أتأرشفت رغم إنى بقدم طلب برقعها إلاهو ظل مفتوحا
ليستقبلكم ويفخر بإطرائكم ، جيب سيطانك وتعال وزدنا من شعركم
شكرا لكلماتك التأنقة بعامينا
شكرا لمرورك البهى
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
| Quote: ليستقبلكم ويفخر بإطرائكم ، جيب سيطانك وتعال وزدنا من شعركم |
والله يا بت الحسن الواحد فينا ما حافظ شى الا يلقط ليو حاجه سمحه كده ويحفظها
زى الكتبتهل فوق دى الحاجة بتكرر فيها مرات كتير عشان كده حفظتها واظنها ناقصة كتييير
تحياتى
محمد
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: عقيد البادية ركب البى الملاين كتّا
عَقَب الهورمة وديك النديوة قصدتّا
لقى حنتوت وتباً مويتو طير ماخبتّا
هدم وشال رحل قايدة قبيلتو قبضتا
عبد الله عقيد إليك لوحة عقيد البادية من الشريقاوى |
لك التحيات يا بت شيوخ البطانة
هذا ما قاله الشريقاوي عن عقيد البادية..
أما عقيد الحضر فقد فعل قبل أشهر ما فعله زميله..
عقيدا شد فوق ضهر الكوريللا وختَّ
مسك درب الحجيج عاقِب زوالو اتغتّ
قال للغُربة (تُب) خلّاها وايدو نفضتّا
لمّ قبيلتو مرتاااح والعِوينة غمتّا
ود عقيد
أمنية:
يارب ما يجي ود شنتير يقول "فنتاستك"؟
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: خالد علي محجوب المنسي)
|
Quote: سمية حبابك ألف
إتْ يا قلبي كان بتروق وكان بتجْن
بروق القبلي سوّن في البطاطين فن
ضرب عقاد دون وحش الشويق اردن
قالو عقيدا قمريها ودباسها يغن
أحمد الفرجوني |
خالد المنسي حبابك آلاف
طبع الكريم مابتجينا إيدك فاضية
إت ياقلبي ياالدايما ملان بالحن
بروق القبلى خلنك تنوح وتطن
جمال فر البتاتى وجوز حجولو يرن
من العتمة ديسو ومن لمعتك سن
سمية الحسن طلحة
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: إتْ يا قلبي كان بتروق وكان بتجْن
بروق القبلي سوّن في البطاطين فن
ضرب عقاد دون وحش الشويق اردن
قالو عقيدا قمريها ودباسها يغن
أحمد الفرجوني |
إت يا قلبي كان بتروق وكان بتوِز
برق القبلي شق عاتما سحابو ينِز
ضرب الصي معيزا في مشيهو يرز
وقالو عقيدا يا ابو حميد شبيه الوِز
ود عقيد
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: عبد الله عقيد)
|
ودعقيد
لينا بى فالك ياخوى علقة من علقاتك ... ياالمشيت بالبر ودخلت الكر
كورلتك دى متل لاب توب طه الضرير كما تخيله الشاعر ( شعر المسادير فى زمن مفردات العولمه )
شديتو ال “Pentium” وأصبح يِبرطِمْ جَائِطْ
وال“Internet” دَقَـشْ قَلَّبْـتُـو”Site Site”
على أم رُوبَاً حـلال مـا طَوَّلَنُّـو وَسَائِـطْ
وعطشان الغرام ما بْيَرْوَنُّو “Two K-bite”
إيمايـلـك وصــل زوَّد عـلـي الـهَــمّْ
والفِكِر انْشَغَلْ ال “RAM”عليك وال “ROM”
يالصُـلاح جميـع أنـا والحبـيـب نِتـلَـمّْ
ويا سَاكْنَ الضَرِيحْ سِيدِي الحَسَنْ “Dot com”
الجمع شمل ود عقيد يجمع شملنا ويلقى الكاب هاملنا يقود العوق عاطلنا ويسبق الكونكورد خاملنا .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: خالد علي محجوب المنسي)
|
| Quote: دي صورة راسها عديل شايفها قدامي. ولو ما الصور البتقيف لي قدام وشي دي وحاتك ما بجيب خبر لكلام "مشعور". |
أخوناشنتير ودالحسن
أكرف الصورة الخاتية وخم دى :
الراجيها ميراث من جدودتّا بختّا
فوق ضهر الأحو ندلن جروس عُطفتّا
ختَّ فريكّا فى بطانة أب على البرّتّا
حلبولها الدقاق لبن اللقوح أم شطّا
شربت دربسوط رَقّق ضميرها خرتّا
مبسوطة وسخية النعمة مابتجحدتّا
جاليها العفا وبوخة الشقيقة الستّا
بى المتعة وتمام الريد حليلها بسطّا
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: نحن فى البطانة السيل مابقطع راسنا ، بنحلب ونتعشى فى أمانة الله
هنا جية السيل تقطع الكهرباء وعليك أمان الله أتقول الدنيا فيها مجاعة .. |
يطول عمرك بت الصالحين عدلت راسي طااااااااب
ذكرتيني اها انا زمان بتذكر وقت السيل يتقالس وحجار بطارية ابوى تنزل كنت بتحزم وبشيل القرعة والمحويب وبفتح الباب وبنتظر البرق يشلع وقبل يطفئ بكون وصلت زريبة البقرات . بنتنظر شوية لحدى برق الصعيد يشلع تاني عشان افرز البقرة الما مرضعة وامشى ليك عليها بالمحويب ( يا الرطاني اكان متابع معانا هو الحبل البربطوا بيهو البقرة في كرعيها الوراء وقت الحليب ).
بعد احلب باخد ليك صنفة شوية جنب البقرة بنتظر البرق يشلع عشان افرز الدرب لعن باب البيت . اها القى ليك امي الفالحة طلعت ليك الحطب اليابس من تحت العنقريب وولعت نارها وختت فيها الحلة البتخلي القنانة تكتل .
هيييييييييييييع معاها دقت كراع وطاقية في الهامة وتكية رقبة من البدنة.
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
إتْ يا قلبي كان بتروق وكان بتجْن
بروق القبلي سوّن في البطاطين فن
ضرب عقاد دون وحش الشويق اردن
قالو عقيدا قمريها ودباسها يغن
أحمد الفرجوني
إت ياقلبي الديمة مليان حن
بروق القبلى خلنك تنوح وتطن
متل فر البتاتى و جوز حجولو يرن
سواد العتمة ديسو وبياض لمعتك سن
سمية الحسن طلحة
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: إت يا قلبي كان بتروق وكان بتوِز
برق القبلي شق عاتما سحابو ينِز
ضرب الصي معيزا في مشيهو يرز
وقالو عقيدا يا ابو حميد شبيه الوِز
ود عقيد |
إت ياقلبي كان بتروق وكان بتفِز
برق القبلى شالع وحس رعيِدو يِرز
فرق المنو جرحاتك تملي تنِز
قالوا عقيدو ود مهلة ومكارم وعِز
سمية الحسن طلحة
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: تلاتة سنين نجيع شقاوة فتْ مشوار
بعد من الأهل جُملة ونواحي الدار
تلقى قفانا ياالصديق سحابّن طار
وردع العالي سيلو جفا وجاب لو خدار
أحمد الفرجوني
|
تلاتة سنين فى غربة وفراقا حار
وشوقا للأهل فرشنا جمر النار
طول الغربة ياخالد بقا لنا ودار
هم وضياع عمر ماسينا فيه عمار
سمية الحسن طلحة
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
قومّوا خلّوا الضيق في الجنايّن
شوفّوا عز الصيد في العسايّن
يلّه نقنّص نمرح نعلين
النهار من حر الكماين
كلبي يا جمجموم اصلّو خاين
شوفو كيف يبرا الملايّن
هبا شالّه وكشح المُراح
والله وكأني أرى الكليب جمجوم في هبته وجب كلب في صيدو وفرزع بقية المراح
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
Quote: اها القى ليك امي الفالحة طلعت ليك الحطب اليابس من تحت العنقريب وولعت نارها وختت فيها الحلة البتخلي القنانة تكتل .
|
أمى لي ضيفانا بتمرق المدسوس
نص الليل بكركب طاجنا وبتعوس
الطيب شيقوق الله يطراك بالخير طريتنا كلام يوسف ودالبنا
فعلا المرة الفالحة بتعمل ٌحتياطى المخزون خوفا من خراب المطر والحطب المناوى اللين بعاسر فى التولع زى ماقال ود الشلهمة
عربك عاسرا اللون من تولع نارا
قرعك لي عشاهم بالفريق أتبارى
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: تلاتة سنين نجيع شقاوة فتْ مشوار
بعد من الأهل جُملة ونواحي الدار
تلقى قفانا ياالصديق سحابّن طار
وردع العالي سيلو جفا وجاب لو خدار
أحمد الفرجوني |
تلاتة سنين معاهِن ستّة.. يبقن كم؟
قضيناهن غصِب غُربة ومراير وهم
تلقا قفانا يا أحمد سحابو انجَم
وهدم العالي سيلو وخمّ رغوتو خم
ود عقيد
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: خالد علي محجوب المنسي)
|
بت طلحة
Quote: أمى لي ضيفانا بتمرق المدسوس
نص الليل بكركب طاجنا وبتعوس
الطيب شيقوق الله يطراك بالخير طريتنا كلام يوسف ودالبنا
فعلا المرة الفالحة بتعمل ٌحتياطى المخزون خوفا من خراب المطر والحطب المناوى اللين بعاسر فى التولع زى ماقال ود الشلهمة
عربك عاسرا اللون من تولع نارا
قرعك لي عشاهم بالفريق أتبارى |
الله يكفيك شر العين
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: على احمد النعيم)
|
شكرا اخوتى الكرام :
خالد علي محجوب المنسى
الطيب شيقوق
عبدالله عقيد
أحمد يوسف أبوحريرة
د. أبوبكر يوسف إبراهيم
أحمد علي النعيم
عليو النعام الليلة صار طربان
وخبتنو البروق كرباج مع السيطان
نطرنو الدُغُس دُرّر مع العِنقان
رتعن فيهو لوب تبرة وسحى وريحان
الوادي أب زِميِّم الليلة صار مبسوط
شالتلو أم رِويق ومنو أبت ماتفوت
تحلب لا الضحى سوّت صبيبن فوت
فتق قنبارو شرّا وأتنابت الحنتوت
بروق المندرة حمن الغميد مايجينى
طرّني وطريت الحبهن شاويني
علي ستات اللكيك الحبهن باليني
عجِّل بيا ياقمري الفروع وديني
ود الصقري
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: الوادي أب زِميِّم الليلة صار مبسوط
شالتلو أم رِويق ومنو أبت ماتفوت
تحلب لا الضحى سوّت صبيبن فوت
فتق قنبارو شرّا وأتنابت الحنتوت |
والله يا اخوانا نحن محتاجون لاستاذ في علم البلاغة عشان يكشف لينا عن الابداع البياني في هذه الابيات او شعر الدوبيت كله الذى نجده يحتوى على جميع علوم البلاغة - نجد فيهو التشبيه باروع صوره لا سيما تشبيه التمثيل الذى تكون الصورة فيه منتزعة من متعد والتشبيه الضمنى والجناس والطباق والسجع وهلم جرا .
فلو كان علماؤنا اللغويون يدركون الكنز البياني في دوبيت البادية لما كانوا في حاجة لادب المتنبئي وبشار بن برد وغيرهم من الشعراء ليستلهموا من اشعارهم النمازج البليغة .
تصوروا ود الصقري هذا البدوى الموهوب قال شنو
الوادى اب زميم الليلة صار مبسوط
شالتلو ام رويق ومنو ابت ما تفوت
تحلب للضحي وهنا شبهة ود الصقري ام رويق او السحابة حال صبيبها بالبقرة الحلوب
جميل يا بت طلحة نتابع هذا الابداع
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
اختي الشقيقة سمية واخي الشقيق ود شيقوق وخالد المنسي وعبدالله عقيد وابو حريرة
واخي ابوبكر يوسف وكل من خط حرف في هذا البوست , اهديكم جميعاً محبتي واشواقي
وبعتذر لعدم المشاركة والمتابعة ومعليش مشاغلي كتيرة والله وكان نفسي ابيت معاكم
ولكن ما احلي المقيل عند ناس هواهم عليل وكلامهم جميل وعشرتهم بالسنين , حبيت
بس اسجل حضور ومتابعة , وتحياتي للاخ منصور معليش سقط إسمه سهواٍ .
اها إنشاء الله لقيتو لي العذر والصفح .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: هاشم أحمد خلف الله)
|
الاخ هاشم خلف الله
| Quote: اها إنشاء الله لقيتو لي العذر والصفح . |
كفاية طلتك دى براها علينا بالدنيا وعذرك انا عارفه بيكون بس الكرفته الحلوة اللابسه دى لانها اصلا ما جاية مع البوست ده ولا بتتواقع معاهو لكن جايباك شهامة ساااااااى كتر خيرك آ ود عز الرجال.
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
Quote: عجِّل بيا ياقمري الفروع وديني
|
صورة من البطانة بعث بها عبدالله ودالشريقاوي من علي البعد :
الصيف راح ونسام البروق هبالك
رف القبلي بي عاتم البذور رشالك
مكائيل كيّلِك وأصبح نباتك سالك
علي فقر الهويمل شربتت رحالك
فرقان النفوسن للفسِل ما تدنّت
فوقكن هيطل الضحوي وسماهو أتقنّت
النوق المتل سُحب العشا اللتبنّت
عمتوبن حِدوباً قفرهن ماتنّت
مطرك صب ونيّل في مهاويك لوبك
ضعاينك سولَلن من الوحل بحدوبك
ياأم نفساً طري وطب الملاريا هبوبك
كبارنا أرجونا لامِن فاتوا يتلهوبك
.. ليت لي ياعزة جناح يحاكي الطير ...
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
| Quote: ياأم نفساً طري وطب الملاريا هبوبك |
انت عارفة يا بت طلحة ده هو السر البخلي العربان تنشق كلها في الخريف للبطانة لا ضبان ولا باعوض ولا حشرات ولانو هبوب البطانة بتكون طاردة لهذه الحشرات .
والله كلام يا ود الصقري
سمية ود الصقري ده رفاعي ودندراوي مننا عديل ما تمشى تتعلكت فيهو زي الفرجونى .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
سمية ود الصقري ده رفاعي ودندراوي مننا عديل ما تمشى تتعلكت فيهو زي الفرجونى
يازول قول بسم الله
والله أنا مش أتعكلت وبس .. كمان أجيب ليك رعاة حقوق الملكية الفكرية
أصلا دا ماكلام ودالصقري .. دا كلام ودالشريقاوي الشكري .. أخوالي براااي
ركز شوية المرة دى سامحناك لكن ماكل مرة تسلم الجرة .
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
Quote: أصلا دا ماكلام ودالصقري .. دا كلام ودالشريقاوي الشكري .. أخوالي براااي
ركز شوية المرة دى سامحناك لكن ماكل مرة تسلم الجرة . |
دى دقسة يا بت طلحة كلامك صاح - ولكن يبقى الراي عندى هو ان ود الصقري مو هولكم طااااااااااب
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
فعلا ياشيقوق ودالصقري منكم لكن باري منكم أو متيري منكم، لأنه جاء علي جهتنا، حيث وصف طريق رحلته للحبيبة مرورا ببنية أبشام
إنشاء الله بجيب ليك مسدارو فوق روغاي أو( روغال ) الذى حمله لدار المحبوبة، ومنه قوله :
يادارع عشانيق البروق وبرِفَّن
الليل جا وعِيَن النعايم نَفّن
على الداداتو شالن حجولو وقَفّن
ياالليل غادى ياروقاى جرايدك حَفّن
ود الصقري
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
من قدَحِي البريقات مايقي سقـّد وحسّـا
وقيام أخبار دور رحيلكم عندي مي مندسّا
مامعاي حاجة من غير العضام والجثة
بى قلبــي المعاكم ياحبيـبي اتوصّــــا
طه ودالشلهمة
تشبيه بليغ لقدحي البروق بالقداحة أي الزناد الذي تقدح منه النار..
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: الطيب شيقوق)
|
طير شنو ياشيقوق !
الزول وكت يصيد يصيد ليهو طيرة ؟
قالوا : كان سرقت أسرق جمل وكان عشقت أعشق قمر
وبعدين الناس البصيدو الطير ديل حاسدنو لأنو بقدر يمشي وين ما يدور...
البّراق يفرفر في الضلام فجّاج
الدمّاع قرين والمنام لجلاج
من الجرحو في جوف البدن وجّاج
ياطير السعد أفزعني ليك محتاج
سمية الحسن طلحة
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سمية الحسن طلحة)
|
الله يرحم صديقى الزين الطيب محمد الطيب
فتح فينى نار الغنا المتل دا
غنايا يشد الحيل سمح بلحيل
قبل كم يوم كنت بسمع فى الاذاعة برنامج اسمه المسادير
وسدرت ما همانى شى
قال واحد قصيدة طويلة
لكن ضحكت فى القول
جات اليشبه صديرا كراسى المحكمة
دحين ياسمية اختى دى شن نفرا البنية دى
عجبتنى الفكرة حقتكن دى وكمان ان بقيتى سويتيها كتاب
بلحيل تكونى حفظتى للتاريخ من الخراب
نعمنو ناس الحيكومة جنس كلامكن دا
ما بتسويلو لا بيت لا كتاب
اقعدوا عافية من جم
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: سلمى الشيخ سلامة)
|
سلمي كيفنك...
والله زمني دا كلو متمنية لي بنية تجي تجادعني بجنس الكلام دا..
Quote: جات اليشبه صديرا كراسى المحكمة
دحين ياسمية اختى دى شن نفرا البنية دى
|
دي نفرا من ستات الحشا البالي يابت أمي
والضد يظهر حسنه الضد)
كلامك حلو ومسجوع
و فكرة كتاب مجموع
يلم التاريخ من النجوع
في رجاك أطري الرجوع
| |
|
|
|
|
|
|
|
|
|
Re: لاح لي من صعيد برقاً كتم تعّالو (Re: abubakr)
|
شيقوق عندك أمثال عجيبة بالحيل
كدي أشرح لينا معني الشيح هنا !؟
غايتو نحنا الشيح البنعرفو غير
أبوبكر كيف الحال
سهراجنا برضو جايز يكون غير
السهراجة هى الدفوية بأشعة الشمس
ويشبه عليها الحمي في العضام جوة
والسراج هو الضو المنبعث من نار توقد من زيت في الغالب
زي اللمبة أم مصران دلالة على خيط القطن المفتول زي المصران ومعطون في الزيت
| |
|
|
|
|
|
|
| |
خالد علي محجوب المنسي
الطيب شيقوق
munswor almophtah
على احمد النعيم
عبد الله عقيد
Shinteer
Ahmed Yousif Abu Harira
محمد المختار الزيادى
هاشم أحمد خلف الله
سلمى الشيخ سلامة
abubakr
فيس بوك
تويتر
انستقرام
يوتيوب
بنتيريست