|
شــــفتــو غبـــا الكـديســة دي؟؟
|
كان من امنياتي ان يكون عندي مركوب جلد نمر منقرط....استجاب الله سبحانه وتعالى لامنيتي واشتريت المركوب من سوق المراكيب بالسوق الشعبي امدرمان...لبست المركوب وانا احس كاني لابس نمر بيحالو....كل ما القى لي لمة بنوت اقيف قدامن واقولهن والله اديكن شلوت حسي....وارفع كراعي.. وهن يكوركن ووب وووب علي سجمي....مركوبو شرط" وينتابني الغرور والفحر والاعتزاز....علا والله عندنا كديسة في البيت كرهتني المركوب دا.... كل مرة القاها شايلاهو وتمشي تلبد بو تحت عنقريب واشوفا حاضنة الفردتين حقات المركوب وترضع فيهن... شوف عيني...وبقيت لما اقلع منها المركوب والبسو المركوب يقعد يدشا من الشبع....الحقيقة الحكاية دي ضايقتني شديد.. وقلت يا انا يا الكديسة دي في البيت دا....بقيت اتابع تحركات الكديسة... واكتشفت الله يازاك يا عبدو جربوكس...عبدو جربوكس دا جارنا ومخخنجي... يلفها زيها وزي أي قرطاص تسالي.... اكتشفت انو عبدو لما يقعد يشرب البنقو كديستنا قاعد تجي تقيف جنبو وعبدو ينفخنفس سيجارة البنقو في نخرين كديستنا...وهي تجني ناطة بالحيطة واتاريها مسطولة...وتحكم معاها السلطة وتنشبك في مركوبي وقيالان وليداتا...شفتو غبا الكديسة دي؟؟....البلبسني وليداتا في كرعيني شنو؟...هن زاتن ما مقاسي....قلت انا بدل نقعد انا والكديسة نتصارع في المركوب انا اكون زول حضاري وافتح معاها باب الحوار..قلت لها" انتي عارفة يا بَرة .. فردات المركوب ديل كبرن خلاص وحقو تفطميهن.. وبعدين طوااااالي يا برة اختي المريكيبات ديل الشطر في خشومن وهن جعجعجعجغ يرضعن.. الشي ديل بيتفقعن..وانا زاتي فترت من كل مرة ارفع المركوب واضربو فوق ضهرو عشان يترع.. وانت زاتك انا شايفك صلاتي علي النبي بطنك كبيرة وعلي وشي ولادة.. دحين باقي اللبينة الفي خليها للوليدات الفوق الدرب ديل"...لكن للاسف نضمي كلو وقع البحر...وعشان هي حامل اتكلت علي اضان الحامل طرشا....وطنشتني وحلفت ما تهببو لي ولا تقول لي انت بتقول في شنو؟......اجتمعت مع الاسرة واقترحت ابعاد الكديسة في مرافعة قوية ختمتها بـــــ" لو نحن خلينا الكديسة معانا في البيت وعبدو جربوكس دا رحل ...اها نجيب لها بنقو من وين؟..نحن ما قادرين نجيب لها لحيمات كمان نبقى في بنقو؟"
|
|
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
ياسجيمان سلامات ياخوي كديستكم دي ماغبيانة ولكن اظنها سمعت بالفتوى الاخيرة بتاعت ارضاع زملاء العمل لمنع الخلوة دحين ياخوي هي شافت ليها شي منقرط جديد عليها افتكرتو واحد جديد قالت اخير ترضعوا عشان تقعد معاهو بي راحتا يعني كديستكم دي ماشة في السليم.
تحياتي
| |
|
|
|
|
|
|
Re: شــــفتــو غبـــا الكـديســة دي؟؟ (Re: مرتضى الصادق)
|
المر اخوي
الكديسة ام كريع اشتغلت شحادة....قاعدة تمشي صينية مكي ود عروسة..وتجي المغيريب جرابا مليان فيران.... اما الكديسة المسطولة بت المسطولة التانية.... بقت بعد ترضع المريكيب... تجيبو وتجي تخربشني.... اتاريها دايراني اشيلو والعبو ليها واضحكو...دايراني اكلكلو يا المر اخوي.... وانا خايف اكلكلو ويقوم يموت من الضحك... اها اجيب مركوب من وين بعد دا يموت؟...
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
أبو هريرة صحابي جليل أدونا ليهو زمان في المدرسة ودقوني عشان ضحكت في الحصة لي هسع متذكره لكين أم هريرة دي يطرشني عاد يا سجيمان ما سمعت بيها إلا من قصة هرتكم بالمناسبة في لجنة مصنفات حايمة الأيام دي وموضوعك ده على مقياس ريختر بيندرج تحت بند فيفا لا بوستا دو فارغا* والكلام أعلاه لعضو المنبر محمد البشري الخضر
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
ضحكتني النكته الحكاها لي الخروف المتصور معاي ده ، يعني لازم تعرف كل حاجة ، هو زاتو خروف الجن ده لو عاوزك تعرف ما كان وشوشني العبير وكلمني في أضاني كان حكاها ليك في ساوند سيستمز كمان. وشكل كديسك ده بقي كديس أبو كديس يام دكتور
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
سلام يادكتور
شايفك مسجل حضور فى مواقع تانية اظاهر الرضاعة فيها كتيرة ياصديقى احسن ليك نحن ,بوردنا دا بورد رجال,,ونسوان حديد دحين ياخوى شغلك البتسوى فيه دا غلط الزول بفوت دياره لناس جو من الخلا وبعدين ياخوى النت دا فيه مواقع حنكشة ما بتتناسب معاك واخيرا مسعول من الخير خلاص خليت السعودية اها المشروع شنو العملتو فى السودان,,,بس اختى لى ناس سوق المواشى ديل بفلسو بيك خالص ودى لك
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
كيف يا سي جي ... شايفك بتسأل و متحيــر؟
Quote: " لو نحن خلينا الكديسة معانا في البيت وعبدو جربوكس دا رحل ...اها نجيب لها بنقو من وين؟ |
ياااخ بسيطة ... عندك خيارين إما تقوووم تهدي الكديسة لي عبدو جربوكس
أو
تخلي عبدو جربوكس يقعد معاكم في الصالون البراني دااك بديلاً للمٌـــر
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
الاخ عادل كتر خيرك كاد خيالنا ان يضهب ولكن كديستك خلتنا نتخيل او اعادت الروح لخيالاتنا ..ما هي البقت ؟ بعدين انت ناس WWF ما عندهم خبر بكديستك البتسطل و جريمة سلخ النمر الحاصلة ؟
مودتي ابوبكر
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
سجيمان اخوي مسكاقمي الجابك بمركوب جلد نمر يجيب عقابك نان انت كنت منقطع عننا ليه يا اللخو مافي مشكلة انت تلبس وهي ترضع اما بخصوص النفخ والبنبقه في النخرين حبيبنا صديق الموج جاهز تخصص يلفها بكرتين تضرب بيها الحيطة ما تفرتق
| |
|
|
|
|
|
|
Re: شــــفتــو غبـــا الكـديســة دي؟؟ (Re: حمزاوي)
|
اخي حمزاوي
لقدوقفت كثيرا عند مداخلتك القيمة....وخصوصا عند الجبك بمركوب جلد نمر يجيب عقابك....نحن خايفن من النضم البرا جلد النمر نقوم نجيب سيرة جلود تانية نبقى في شبك...اما بخصوص اقتراحك ان البس وهي ترضع...فهو لعمري اقتراح حكيم يفتقر اليه فرقاء ابوجا.... سلعمل به ما دام مركوبي متواجدا بالبيت والهرة بت الهرة مسطولة...اما كرتين صديق الموج فانا جني وجن الزول المعرج......
تحياتي
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
مرحب ياسجيمان بالعودة...افتقدناك كتير فى هذأ البراح.
و الجاتك فى "كديستك" سامحتك....
الحمد لله...كديستك مابتسكر...والا كان "طردتك" من البيت.....
خليها فى "الرضع" وارضى بما قسمُ لهــا من "المركوب"... و الله أكون فى عونك وعون "مركوبك النمر" و الحمد لله ما طلع "مركوب فار".
صديق-الدوحة
| |
|
|
|
|
|
|
Re: شــــفتــو غبـــا الكـديســة دي؟؟ (Re: حبيب نورة)
|
Quote: كااااااااااااك كديسة اليابة دي انت يا أخوي قاعد تنوم في ياتو شفخانة!! باقي الكدسة اليومين ديل في حالة أنقراض من البيوت علي اليمين الحالة بقت صعبة لمن عدمت البيوت نفاخ النار |
حبيب نورة وحبيب الكل...مشتاقين عديل كدا
| |
|
|
|
|
|
|
Re: شــــفتــو غبـــا الكـديســة دي؟؟ (Re: سجيمان)
|
سلام .. واحترام ..أضحك الله سنك ...أها ..عشان الواحد لامن يكون زهجان يعرف يمشي لي وين ..لكن بالله واصل في مسلسل الكديسة دي ..عشان نفهم كمان في نفسية الكدايس ..وبيني وبينك ..لأنو فردتهالافي في حوشنا..كل ليلةبتحاوم بي جاي وعامل شمطة كبيرة خلاس ..وبعدين جرايمو كتيرة ..وهو ذاتو هارب من العدالة .." العكازية " عديل كدي يعني " وانتيد" بشدة ..والمكافأة ..خمسة آلاف ..فارة عشان كديستك تخلي المركوب ، وتشوف لها شغلة تانية ..يعني تبقي في المساككة .. المهم .. كديسنا الهربان .. أوصافو كالتالي :
Quote: كديس ومجرم كمان هو جارا خطير مخرب قاتل .. مسلسل مانياك .. يزعل عشان عشاه يبيع جناه عشان عشاه جاها غاير كديس وأجرب
|
يرجي لمن يتعرف عليه تسليمه إلى أقرب نقطة بوليس... شكرا على المتعة ..وعذرا على التطويل ... ولك الود والتقدير أكمله
| |
|
|
|
|
|
|
|