|
|
 Re: ود الشلهمة (Re: Ahmed Yousif Abu Harira)
|
نواصل ، وهاكم العايلة دي بدون تعليق:
سحابك جَرّ بالقِبْلَة ......ووسامك زرّقْ
وساريتك تَكَلْ فوقها السحاب ما اتفرّقْ
مجاريك خَوّفَتْ ....حَابسْ الغَرِبْ ما شَرّقْ
وعَوَالِيكْ البِسِنْدُو عليها ...مَاهِنْ غَرّقْ
------------
| |
 
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: سحابك جَرّ بالقِبْلَة ......ووسامك زرّقْ
وساريتك تَكَلْ فوقها السحاب ما اتفرّقْ
مجاريك خَوّفَتْ ....حَابسْ الغَرِبْ ما شَرّقْ
وعَوَالِيكْ البِسِنْدُو عليها ...مَاهِنْ غَرّقْ
|
يا الله يا اب حريره واسمح لى ان استميح الاخ ود شيقوق وود المحرب والمتيم بلوحات البطانة البديعة شنتير ان ادلو بدلوى:
اولا سحاب القبلة مطرو لا يخيب ابدا بعد ان يكتسى سماء البطانة بالزراق
اما عن السارية التى تكل سحابها اظنها هى التى لا ينقطع مطرها "ساريتن تبقبق لا الصباح ما انفشت
وزول الشرق دا قولو اصبر شويه ما تغرب لانو حتى الامكنة العالية رحراحها رقبة اى يعنى تغرق من الرحراح .
ارجو ان اكون قد وفقت
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: سحابك جَرّ بالقِبْلَة ......ووسامك زرّقْ
وساريتك تَكَلْ فوقها السحاب ما اتفرّقْ |
ود النعيم يطول عمرك ما قصرت لكن خلى اخوك يقول ليك :
سحابك جرة بالقبلة بيقصد ام رهيد الجات منقلّة من قدام يقّلب فيها البرق اب فاتحة ( ابو وسيعة) ووسامك زرق بيقصد السحابة الباريها العفرت ومتقلقل قدامها .
وساريتك تكل - التكل بيقصد التكل حق الاكل والشراب ناس البندر بسموهو مطبخ والتكل ده عندنا وقت عمره يطول ودوكتو حقت اللقمة دوام نارها مولعة بمسك السكن ( السكن هو ثاني اكسيد الكربون المتردّم ) في عرشو ومرات - ودى مهمة جدا - التكل ذاتو بتكون فيهو حبيلات متدلدلة من الفلكاب والحبيلات ديل بتردم فيهن السكن اى سكن التكل ويبقى سقف التكل بى جوة اسواااااااااااااد اها ده وصف السارية الفوقها السحاب ما اتفرق .
ابشروا بالخير
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| Quote: شكرا ود شيقوق على الايعاز وبعدين انا عقبتك بى غادى كايس تار ود المحرب |
هلا هلا آآآآآآآآ البطاحين رزقكم كمل كلوووووووو وبقيتوا ناس بندر ساااااااااااى ضاربين النت وقاعدين .
| |
|
|
|
|
|
|
|
|
|
Re: ود الشلهمة (Re: الطيب شيقوق)
|
-------------
رَعَدْتِكْ كّوَعَتْ فوق الصبيب اتدلتْ
وساريتك مِزَرقّنه مي الغِبيشا الجَلَتْ
شقّاقِكْ قَبَضْ زَبَدُو وحفايرو اتملّتْ
وعربك تُوتَلَتْ فوق الضِهُورْ انسلّتْ
----------------
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: رَعَدْتِكْ كّوَعَتْ فوق الصبيب اتدلتْ
وساريتك مِزَرقّنه مي الغِبيشا الجَلَتْ
شقّاقِكْ قَبَضْ زَبَدُو وحفايرو اتملّتْ
وعربك تُوتَلَتْ فوق الضِهُورْ انسلّتْ
|
الاخ ابو حريره لا يسعنى الا ان اقول ليتنى كنت رساما لكى ارسم هذه اللوحة البديعة ببيوتها التى تراصت فى منظر بهيج.
واصل لله درك ونحن متابعين بشغف.
| |
|
|
|
|
|
|
|
|
|
Re: ود الشلهمة (Re: abuguta)
|
Quote: رَعَدْتِكْ كّوَعَتْ فوق الصبيب اتدلتْ
وساريتك مِزَرقّنه مي الغِبيشا الجَلَتْ
شقّاقِكْ قَبَضْ زَبَدُو وحفايرو اتملّتْ
وعربك تُوتَلَتْ فوق الضِهُورْ انسلّتْ |
إنت يا ود النعيم الرعده دي بتكوع كيفن؟ وكدي شوفها كوعت فوق شنو؟
السارية مزرقنة زي النيله وليست من النوع الإغيبش المجلي... يعني البِتْصُبْ طُقْطُقتين وتَتَنِبْ تقيف
......هاهاهاها....والله جِنِسْ حديس !!!
العرب ما رحلو ما بتشوف بويتاتن على الضهور ...شوف ذكاء الشاعر عليك الله يا علي...ما قال توتلو ساكت في اي بقعة من الأرض..لا ...بل وقعوا الضهور العوالي البسندوا عليهن (توتلو يعني سوو بويتاتهم في صف واحد ممتد) كيف لا والدنيا مطر ولو نزلوا المهاوي لجرفهم هذا السيل العرمرم...
هذا شعرٌ بديع وشاعره لم يترك شيء لمحض الصُدفة فقد كان يعني ما يقول..
حديث وحات ود دِرِيس (أو كما قالت سمية)
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
أب قوته
يا زول إنت بِتَحَتِلْ وتَقَلِعْ من وين ؟؟
وحات من أنزل القرءان وفرض الحِجْ
نوحي عليهو مِتل الفاقِــدْ البِتْعِجْ
يابدر التمـام وكتين سحابتو تَفِجْ
إن وين كُنْتَ باقي..مِخلي عيني تَلِجْ ؟
-------
تخريمه خارج إطار ود الشلهمة
| |
|
|
|
|
|
|
|
|
|
Re: ود الشلهمة (Re: Balla Musa)
|
إنها دعوة منى لأعضاء هذا المنبر النير أن يتابعوا قول هذا الشاعر الفحل فى الوصف والطبيعة ، وارجو من الاخ ابو حريره ان يبحر فى هذا البحر الزاخر ويسهب فى شرحه الشائق .
ودمتم.
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| |
|
|
|
|
|
|
|
|
|
Re: ود الشلهمة (Re: gessan)
|
قيسان عشا الضيفان حبابو
آآآزول أنعلك طيب وعربك كلهن ؟
حررم اشتقنالك
جوابي وصلك؟
مشاركتك دي يا قيسان مشاركة فاعلة وتاركه...
| Quote: تسجيل قديم لود الشلهمة..فلنأخذ منه نماذج بصوته..اتمنى ان يضيف للموضوع الكثير .. |
وماها إضافة وبس دي الموضوع كلو..
شكرا لك أيها النبيل وكان مانا عارفين مشغوليتك كنا بنقولك زيد...
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
احمد سلام عليك Quote: فيك نزل اب لسانا بي قبيح ما اتفلّتْ
مِتْجَادعين بعيد ...خافو الرزق يتخلّطْ |
فيك نزل
المخاطب هنا فرد ولكن على مااظن ودالشلهمه قاصد
كل من زل فى البطانه يعنى هنا يخاطب الجمع
ولك ان ترسم فى خيالك متجاعدين بعيد مى داير شرح
بين كل خشم بيت مسافه ديل اولاد فلان ودييييلك اولادفلان
| |
|
|
|
|
|
|
|
|
|
Re: ود الشلهمة (Re: أبو الحسين)
|
Quote: اتمنى ان يضيف للموضوع الكثير ..
|
الاخ قيسان
الله يديك الف عافيه ويبارك فى عمرك. اريد ان اؤكد لك انها اضافة حقيقية وبدون اى مجاملة. ولو عندك المزيد عليك الله اتحفنا لله درك .
الشكر الوف الوف
| |
|
|
|
|
|
|
|
|
|
Re: ود الشلهمة (Re: الطيب شيقوق)
|
| Quote: فوالله هذا القول لا يقل عما قاله ابو فراس الحمداني ولا عنترة بن شداد . |
واظنه ايضا يعنى:
أقلب طرفى فى السماء لعله ** يوافى طرفى طرفها حين تنظر
| |
|
|
|
|
|
|
|
|
|
Re: ود الشلهمة (Re: على احمد النعيم)
|
| Quote: أقلب طرفى فى السماء لعله ** يوافى طرفى طرفها حين تنظر |
اللرنب والعصا
احمد والله بلحيل اجتهدت كان اصيد شريط لى الشلهمه
لكن ما لميت فبه0
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
شيخ أحمد ابحريرة
بجيك صاد بس فى حاجة حايصه لى فى كلام ود شيقوق دا خلينى اللنأترا.
شيخ الطيب قال فى شرح ( ساريتك تكل فوقا السحاب ما اتفرق) الآتى:
| Quote: وساريتك تكل - التكل بيقصد التكل حق الاكل والشراب ناس البندر بسموهو مطبخ والتكل ده عندنا وقت عمره يطول ودوكتو حقت اللقمة دوام نارها مولعة بمسك السكن ( السكن هو ثاني اكسيد الكربون المتردّم ) في عرشو ومرات - ودى مهمة جدا - التكل ذاتو بتكون فيهو حبيلات متدلدلة من الفلكاب والحبيلات ديل بتردم فيهن السكن اى سكن التكل ويبقى سقف التكل بى جوة اسواااااااااااااد اها ده وصف السارية الفوقها السحاب ما اتفرق . |
والكلام دا قدر ما حاولتو يركب راسى تب لاجج وابى. ليييييش؟
أولا ود الشلهمة رضى الله عنه قال تكل بفتح التا والكاف ما بضمهما.. سمح الكلام؟
تانيا ناس ودالشلهمة ديل ناس نارن تقابة برة مابتضاريها حيطان تكل. وكمان الناس ديل ناس حنية وبرش وكسيدة وسرير وصريفة وحبال قد. شعبتين معلق فيهن مشلعيب وبخسة سمن وسعن روب وقرعة لبن وقربة موية زايد صحن دبكر كبير بينك وبين المواكلك فى الوجبة الكلام دايرلو مبلغ عشان ينقل الرسالة لزوم التسميع زى الماموم فى الصلاة. والنار لدايات فرقن حطب وان حكمت كوم بعر إبل ناشف.
ثالثا شاعر البطانة إن وصف البطانة بمفردات البندر او وصف شى فى البندر بمفردات البطانة بعتبر فيهو ضعف والناس ديل عندهم نقاد لصيصيين ولاذعين مابرحموا.
فيبقى ياود شيقوق تكل فوقا السحاب معناها آخر الشطرة ( ما اتفرق) يعنى اتردم فوقا, والسحاب لمن يتردم مطرو بتكون ماليها حد تروى الشقاق لمن تتوع وتكسر العوالى. والتكل كمان معناها استناد بعض فوق بعضه.
شيخ ود شيقوق الكلام دا كلو جابو لأنك نزلت مستوى ود الشلهمة لمستوى عنترة وابوفراس الحمدانى. واحد عب محندقنوا بى بنية والتانى امير مصاب بالقرانديوزتى وراكب فوق غيرو ومدلدل رجلينو.
لكن كدى أسمع نبرة صوت ودالشلهمة دا مابذكرك تواضع العارف اللامن تظهر كرامتو بضاريها وبعتبرا عورة؟ يازول ديل لله درهم الماسكين قرون السودان كلما يخور ويقع يسندوهو لافوق.
ياشيخ الطيب نحن حاسبنك من أهل التأويل دحين ابقى (تكلا)قوى مو مايل.
| |
|
|
|
|
|
|
|
|
|
Re: ود الشلهمة (Re: Balla Musa)
|
قَبَضْ القِبلي في كُوع الشمال برّاقِكْ
وقَشّطْ سدرو في عَامِر سحابو وسَاقِكْ
تِبُوبِكْ قَرّننْ السيل دَهَجْ شقاقِكْ
والضايق نُشُوقِكْ حَار عليهو فُرَاقِكْ
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
.
Quote: قَبَضْ القِبلي في كُوع الشمال برّاقِكْ
وقَشّطْ سدرو في عَامِر سحابو وسَاقِكْ
تِبُوبِكْ قَرّننْ السيل دَهَجْ شقاقِكْ
والضايق نُشُوقِكْ حَار عليهو فُرَاقِكْ
|
أحمد يوســف يا ود القبايل
السـر انكـشـف يا الخـيمة بي رقـراقـك
أنا جابني الدرب ما يقولوا من سـراقـك
الضـايق نُشُـوقِكْ و حـسـو فـيو عشـراقـك
أحـمـد يوســف البـخـتم عـلـي أوراقـك
.
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
| Quote: نِيلِكْ زاد وتَبَرِكْ يا المَرِيّا بِكَتِفْ |
هذا الوصف البديع يذكرنى الخصوبة التى تمتاز بها الجزر عندنا بعد ان يغذيها النيل باطنان من الطمى ثم ينحسر عنها، ومن بعد ذلك تزرع باللوبيا وهذا هو ما ذكرنى بتبر البطانة والذى كم تمنيت ان اراه. فكان يساق الجخس (وهو الثور) الشراد تجاه اللوبيا لانه لا يستطيع ان يجرى مما يمكن الطارد من الامساك به بكل سهولة بعد ان تعيق حركته نباتات اللوبيا المتماسكة.
فهل كلمة "المريا" يا ابو حريره معناها الارض الخصبة؟ ام هى اسم من اسماء البطانة؟؟
| |
|
|
|
|
|
|
|
|
|
Re: ود الشلهمة (Re: على احمد النعيم)
|
| Quote: نِيلِكْ زاد وتَبَرِكْ يا المَرِيّا بِكَتِفْ |
شوف عيني دي، في بطانةً تِحِت ما فوق وموطيّة تَبْ باللواري، فِرِد نَفَر ملالو لوري اللِّيل تَبَر في فَدْ عصرية والحال مو ياهو داك التَبَر البِكَتِّف.
دحين آبحريرة أبْ حريرة، الحِلّة، عِنْدَك فيها عَقَاب؟
| |
|
|
|
|
|
|
|
|
|
Re: ود الشلهمة (Re: Adil Al Badawi)
|
عادل البدوي
مرحبا بك وشكرا على المرور والإضافة الجميلة
| Quote: دحين آبحريرة أبْ حريرة، الحِلّة، عِنْدَك فيها عَقَاب؟ |
لدي في قرية أبحريرة بعض المعارف والأصدقاء لكن لا علاقة من ناحية الاسم
ودم طيبا
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
شيخ أحمد أبحريرة (ضنب العقرب القالب حوارو هشيمة)
تلحقنى وتنجدنى
يازول إنت مادام طايف فى كعبة جمال البطانة ومتكرف ريح الصبا.. دى براها تورث ولايتن نورا براقن قبلى .
ياود ابحريرة
قبة اخوك بلة ماتحتا فكى.. عليك امان الله ضلالى بتصيد الحروف وبعشقن بس.
واصل فى شغلك دا عشان النت يتبارك وخيرو يزيد.
| |
|
|
|
|
|
|
|
|
|
Re: ود الشلهمة (Re: Balla Musa)
|
على أحمد النعيم
كيفك يابحر
رقابة معرفتى مابتحمل قندولك المليان شكر دا.. والله ياشيخ على إنكسرت أو كادت.
ياعلى ياخوى نحنا الزمن خشانا فى سعن كرتوب ومخضنا مخض لئيم وحشر يدو فى السعن وشال الفرصة بكل دسامتها وجدعا بعيد وقال عليها مليئة بالكلسترول وخطيرة على القلب.. عليك أمان الله هذا اللئيم تركنا غباشة روب خالية من أى دسم معرفة تستطيع تسليك مثل هذه المعانى الجميلة.
على ياتساب العينة أنهر ساكت وخلينا نغرف من مطاميرك..
التقانت البينا وبينك كسرا وماتخلى لبقة مقفولة ومرحب بأى سريريق محبة من تالاك.
| |
|
|
|
|
|
|
|
|
|
Re: ود الشلهمة (Re: Balla Musa)
|
Quote: رقابة معرفتى مابتحمل قندولك المليان شكر دا.. والله ياشيخ على إنكسرت أو كادت.
ياعلى ياخوى نحنا الزمن خشانا فى سعن كرتوب ومخضنا مخض لئيم وحشر يدو فى السعن وشال الفرصة بكل دسامتها وجدعا بعيد وقال عليها مليئة بالكلسترول وخطيرة على القلب.. عليك أمان الله هذا اللئيم تركنا غباشة روب خالية من أى دسم معرفة تستطيع تسليك مثل هذه المعانى الجميلة.
على ياتساب العينة أنهر ساكت وخلينا نغرف من مطاميرك..
التقانت البينا وبينك كسرا وماتخلى لبقة مقفولة ومرحب بأى سريريق محبة من تالاك. |
يا شيخ بله ياخى والله اسكرتنى حتى الثمالة دونما خمر، وصدقنى والله لقد شممت فيك ريحة اهلى وجدودى وريحة برم الطلح والجروف وريحة الطين . ويسعدنى جدا ان اتعرف عليك لانو كلامك هذا قد شاقنى جدا ، وآمل كما قلت انت، بل واصر ان تنكسر كل التقانت البيناتنا وانا والله اجيك زى العوتيب عنيف يجرى مش سراق لكى اغرف من معينك الذى لا ينضب . وكلامى هذا يا شيخ بله ليس زخرف كلمات لا والذى طاف الحجيج ببيته بل هو نوايا حب صادقة فى الله بعد ان قرات اول مداخلة لك فى بوست ود الشلهمة ومن يومها عرفت انو سيكون لى معك شأن . والان لو اطلعت على بوست "دلوا كابس العتبة وختا النشال" ستجدنى اننى قد اخترتك ضمن معيتى، فهلا؟
اطنان من الشكر والتقدير
| |
|
|
|
|
|
|
|
|
|
Re: ود الشلهمة (Re: على احمد النعيم)
|
سَحَاِبكْ جَرّ ....بالقِبْلَه وتَقِيلَه رَعّدْتِكْ
وافر ...ومن هوا الكشّاحَة مبروك خَتِكْ
البَرَدْ البِيتوَاقَعْ.........بِنّزِلو حَتِكْ
وبخيته علي الجَديّنْ يا المَرِيَه وحَدْتِكْ
--------------
مطرة راسية ومبروكة لا كشاحة تضر ولا شعفوفة تخرب...تسقي وتخدر ...لا تكتل ولا تودر...ورب العزة يجيب الصقط قدر الغطاء المتاح ...والمطرة البتحت البرد دي غالبا ما تكون نتاج دهاريب متعددة ومتكررة يعني السماء ملبدة بالغيوم على زعم ناس النشرة الجوية منذ فترة ودرجة الحرارة الفوق دي وصلت مرحلة أحالة حبات المطر إلى حبات من الثلج تكبر وتصغر حسب الحالة...تلج عديييل!!...
وان صحت رواية الراوي الذي قال أن ودالشلهمة نظم هذا المدح الجميل في الطبيعة الخلقها الله دي وهو طريح سرير المستشفى ، فالبيت الأخير يعزز ويعضد روايته..حين قال الشاعر مخاطبا البطانة "بخيته على الجدين يا المريه وحدتك"..يعني مبروك عليك استفراد الصيد والجديّن وخليناك لي صيدك ده ولي وحشك ولي طيرك وحياتك الفطرية وتبرك وحنتوتك وصفيراتك وجمالك الكائن فوق سطح الأرض وتحت ظل السماء...نحن لم يعد لنا نصيب في هذه المتعة التكيل العين ...وشاعرناالكريم بغران وليس حاسدا بالتاكيد...
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: رعدك سَكَّْ براقك سعيتو تَخَتِفْ
|
يا الله ...... كيف اهتدى هذا الشاعر الى هذه الحقيقة العلمية "رعدك سك براقك" وهى كيفية حدوث الرعد والبرق ، والمعروف علميا ان الرعد هو تفريغ كهربى بين سحابتين وهو يحدث اولا ثم يأتى البرق بعد ذلك ولكن لان الضوء اسرع من الصوت يحدث ماعناه الشاعر الذى خبرت عنه انه امى!! فسبحان من علم بالقلم علم الانسان ما لم يعلم.
| |
|
|
|
|
|
|
|
|
|
Re: ود الشلهمة (Re: Balla Musa)
|
أستاذي أحمد ..
لأقد أعجبت وإستفدت جداً من هذه الكتابة الدسمة الطيبة
عن أستاذنا وشيخنا ود الشلهمة ..
وتفتحت روحي على معاني ومعارج لم تكن في متناولي قبلاً .
فلك الشكر
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: وود شوراني عليه الرحمة بعد شعره ومجونه الظاهر في شعره ده كلوا لم يشاهد معاقرا للخمر أو منفردا بغانية...وكل المسادير التي سيرها نحو حسناواته المفترضات كانت محض خيال في غالبها الأعم.
حدثني والدي عليه رحمة الله بي قصة وآحد من جمال ودشوراني (نسيت أسم الجمل) ربما يكون (الضير أو الشراد) لا أذكر ، وقد أبدع ود شوراني في وصف الجمل ، دوماته وخريرها المتواصل وسرعة كفه وما بعرف (جاهن كفو زي مكن الخياطة يرص)وكلام من القبيل ده ، لدرجة جعلت والدي يعجب بذلك الجمل ويتمنى رؤيته...فقابل ود شوراني وسأله عن الجمل... عن نسبه ونسله وأصلو وفصلو وأمه من وين وابوه منو ولا اشتراه من وين؟ وإنت بتعرف قصة نسب الإبل دي عندها رواة وحداة ومختصين في تلك النواحي..
فضحك ود شوراني وقال له والله يا شيخ يوسف الجمل العجبك ده أكان شفتو بي قرشين ما تاخدو..
قال له: كيفن؟ بعد الوصف ده كلو؟؟!!
قال له أولا المُسدار ده انا ما مشيتو ولا جملي ده مشاهو...والجمل بطل المسدار ده كان جِمِيلْ وإجِيرِبْ بارطو الجَرَبْ ومربوط لو في شِايِه وبعالِجْ فيهو بالقُطران ...والمسدار نظمتو وانا فوق عنقريبي وقاعد لي في ضل عصُر قِدَام بيتي ..اعاين في الجِمِيل الاجِيرِبْ ده وأغني .. |
-----------------
ياخي دي نقطة مهمة جدا ..وبديعة ..ومحيّرة ..بلا شك ساضيفها لإعتقادي حول هؤلاء المبدعين ..
ود شوراني ..كل هذا الشعر ..وهو قاعد في ضل عصر ..قدام بيتو ..وعينو في الجمل الإجرب ؟؟ !!!!!!!!!!
كنتا بسمع وانا مستغرب جداً في تسجيل لود شعيت ..وهو يقيم حواراًته العجيبة مابين الجمل وترعة المشروع ..وكيف ان ريرة (البلد) جاءته تشتكي أهلها ..الذين هجروها ..كما انها تشتكي ما اسمته بـ"اهل اللواري" لانو صوت اللواري احماها النوم ..او حينما شبّه البطانة بالإسبتالية "المستشفى"..وكل ذلك من خلال الدوبيت ..
ياخي كونك تخلق مشاهد درامية بي كامل حواراتها- خيالاً- عن طريق الغناء الدوبيت ..مجيئاً وذهاباً في السفر ..أو تستنطق فيه البيئة من حولك .. دا إبداع ما بعدو إبداع ..
----------------
اب حريرة ..
ماني ناسيك ..والله ماني ناسيك ..وعند وعدي فيما يخص ود الشلهمة..بس هسع دخلتني إشارتك السمحة دي ..في حق إبداع ود شوراني ..
سلامي ..لك وللجميع
| |
|
|
|
|
|
|
|
|
|
Re: ود الشلهمة (Re: على احمد النعيم)
|
نُرْتِي ......ومن شنات الصيفه سِمْحَتّ حَالِكْ
وقِدّام الضَعِينه .........اتقاصرن جَبّالِكْ
نَدّاكْ قَاْرع السَرَبْ..لا النافله مَعَقُولْ مَالِكْ
وتَبَرِكْ فُوفّى نَايِرْ .......وقَنّبْ يِلعِبْ نَالِكْ
---------------
نداك منع السربه والسربة هي توجيه البهائم من البيوت إلى أماكن الرعي عند منتصف الليل تقريبا والندى زي ما قلنا هو حبيبات الماء التي تتجمع على أوراق النباتات وهو دليل روا وشبع من الموية وغالبا ما تكون تلك الليلة هواها كاتم....المهم نتيجة للندى الكتير ده العرب (قرعو) اي منعو البهائم من السرب حتى يتبخر الندى أو يقل شوية فكان ان تاخر إطلاقها حتى وقت النافلة...
المربوع الفوق ده كلو في مجال الوصف العمومي للأجواء والمنطقة بعدما ترادمت فوقها الامطار وارتوت أرضها وانمحت شقوقها ونبت فيها التبر والنال ...يعني وصف إجمالي لمآلات الحال بعد البسط السابق ذكره...شوف كيف حال التبر...فقد فرهد نايرا وتمدد و نشر زهرته البيضاء الجميلة ثم أنظر إلى النال يداعب النسيم وتلاعبه النفحات الصباحية فتسوقه ذات اليمين وذات الشمال.
ما في زول عندو كاميرا هنا ؟؟
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: وآخرين فى بوستك دا منهم ودحماد وبت طلحة وود المحرب وود شيقوق وود النعيم وقيسان.
أها ديل قال كبيرهم:
احسب في النجوم الطالعه والاتدلتْ
لامن عُقدَةْ الليل بي الشُعَاعْ انِحَلّتْ
فوالله هذا القول لا يقل عما قاله ابو فراس الحمداني ولا عنترة بن شداد .
وتناهو طبيقو وقال:
واظنه ايضا يعنى:
أقلب طرفى فى السماء لعله ** يوافى طرفى طرفها حين تنظر
وجا ود المحرب أمن على قولم (مكوتا) له.
|
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: أها ديل قال كبيرهم:
|
السلام عليكم ورحمة الله وبركاته
ياجماعة أنا غايبة لى زمن من المنبر عامة
وليس لدى إلمام بالحاصل ولكن فتحت هذه الصفحة الآن
وكبيرنا دا منو القال كدى ؟؟؟
الكبير الله!!!
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
تتكل فوق كيعانك ياشيقوق
دحين إت بتعرف ( تتكل فوق نعيجة أب شوك ؟ )
ماسمعك :ـ
سماك زرقتو زى الطاجن الممسوح
واتكل سحابك زى سطور اللوح
!؟
سيلك فى عوالى الأرض محر بشروط
واتكل سحابك ونيل زراقو ختوت
؟؟؟
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
الأخ الكريم بلة موسى
كنت على يقين من أن ود الشلهمة
بخور شطة بمرق الهام من جحرو
سعدنا بدرر حديثك المنثورة لمن
يفلح فى إلتقاطها...
والتواضع لاينم على قلة علم أو
عدم معرفة وإنما هو سياسة مجالس
فى حد ذاته ، كما علمنا الهادى
الأمين خير خلق الله أجمعين كيفية
التعامل مع كل مستوى حسب مايسعه
أما صلاح ود الشلهمة دا شيتا ما برفعولو الضو
الزول دا أنا عايشته بجيب الكلام للوالد الشيخ
الحسن .. عليهم رحمة الله .. وبقول ليهة أنا الكلام
دا جانى البارح معناهو شنو ؟
ومن أمثلته قوله:ـ
شاهد هناك موسى الكليم
ماد إيدو من غرف أورشليم
وهو لا يعلم ما أدراك ما أورشليم !!! فالرجل يوحى إليه بلا شك
ودمتم
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
الأخ أحمد يوسف
فعلا الفالح متل الصالح
كدى إت خليك فى الفلاح
الصلاح دا مافى داعى نتكابس فوقو كلنا
لقد صدقت نبوءتى بأن هذا البوست لن ينزل أبدا
لأنو ظهروا لينا ناس مؤمنين بالوحى والإلهام
وأنا كنت داسة درر ود الشلهمة فوق الشيخ عبد الباقى
لأنى أنتظر من لديهم ثقافة فهم عليا لسبر أغوارها
ولكن بلة شد هممنا بقوله :ـ أ، مثل ود الشلهمة لم يخلق...
وبالمنا سبة بيت ( عقدة الليل دا ) جرت فيه مساجلات بين
أساطين فطاحلة أمثال شيخ العرب الشيخ طلحة محمد طلحة
والشيخ طلحة ود الشيخ الصديق هذا العبقرى الفذ شقيق الناظر محمد صديق طلحة.
ودمتم
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
| Quote: الصلاح دا مافى داعى نتكابس فوقو كلنا |
سمح خليتو 
منتظرين مساجلات شيخ العرب وشيخ طلحة بخصوص الموضوع ده ..عليك الله ضروري يا سمية..
وشعر ود الشلهمة فوق الشيخ عبد الباقي...
والقصص والحكايات كلها بدون فرز...
وتلفون المهدي ود شيخ طلحة..
------
نسيت أرحب بك مرة اخرى ...عودا حميدا
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
شيخ أحمد ابحريرة
سلام تكعيب وتسميح وتسبيح
الرواية دى:
| Quote: قال له أولا المُسدار ده انا ما مشيتو ولا جملي ده مشاهو...والجمل بطل المسدار ده كان جِمِيلْ وإجِيرِبْ بارطو الجَرَبْ ومربوط لو في شِايِه وبعالِجْ فيهو بالقُطران ...والمسدار نظمتو وانا فوق عنقريبي وقاعد لي في ضل عصُر قِدَام بيتي ..اعاين في الجِمِيل الاجِيرِبْ ده وأغني .. |
تعرف الشغل دا كتير من الشعراء عندهم وقديما سئل أحد شعراء العرب وهو من الفحول وأعتقد أنه جرير :
من هو أشعر الشعراء?
فقاد السائل الى داره ليرى أمامه شيخ أشعث كث اللحية يرضع اللبن من ضرع معزة واللبن يسيل على لحيته وصدره.
فقال للسائل أتعرف من هذا?
قال من?
قال هذا أبى.. وقد كان يفاخر به شعرا.
وعندها قال له: أشعر الشعراء من يفاخر بمثل هذا.
نجى للولى ود شورانى وكلامو الفوق دا وتعال يابحريرة جيب كلام الولى ود الشلهمة القدامنا دا بتلقى الفرق فى مطابقة الصدق للصدق. يعنى صدق الشعر مع صدق الحدث يولد صدق الإحساس وتنقية النبع والمنبع.
حتى ود شورانى نفسو لو قعد وصف مأساة هذا الجمل وجربه لأتى بكلام ربما يستفاد منه فى علم البيطرة.
يعنى الزول البكون مامشى المسدار وماعندو الجمل الموصوف وماضاق حلاوة التنويخة عند ستات الصوالين الأدبية والغالبن يكون من بينهن المحبوبة المقصود بيها المسدار وماكرف طيبها وماخرم طبلة أضانو غنجها سيكون كتير من أوصافه حبيسة العنقريب وضل الضهر ومسورة بالتمنى المستحيل.
يعنى جملو فى نص المسدار مرة تجيك صورتو إيربص ومرة صاوخ كروز ومرة عربة لاندكروزر. وحتى لو جاتك صورة الجمل بتجيك دهمة جمل ماصع ومن فوق مخلوفتو زوال زول ماسك الزمام.
لكن عندما يكون الوصف حقيقى لحادثة حقيقية هنا بتشوف التفاصيل ويمكن هبشة خف الجمل فى الأرض تشوفا وتحسب عمقها بالملمتر وتشوف الرقاب الكسرو وتعدو ويلفحك الهوا وانت واقف من سرعة الجمل المر من تالاك.
وكلامى جربو فى كل شعراء البطانة وغيرم وجيب كلام واحد منهم فوق البطانة نوع الكلام البكتبو بعد ما الدعاش يفرهد الرئتين والبرق يتلاصف يضوى البصيرة. الكلام دا قارنو بكلام قالو نفس الشاعر معتمدا فقط على إبراز موهبتو فى رسم جمل ونجر مسدار وشوف الفرق.
تحياتى لبت ملوك البطانة ومواجبتك جايا بس دا سلام سنبهار.
| |
|
|
|
|
|
|
|
|
|
Re: ود الشلهمة (Re: Balla Musa)
|
نّاَرْ وشِك خَلاصْ واصبّح عريسك بَاشْ
وسيلك لمعاليك والمرَانِع كَاشْ
نَفَسِكْ من سَمٌومْ إتحلى جَابْ لي دُعَاشْ
وعَرَبِكْ لي جَفَافِنْ جَبَدو البرّاشْ
-----------
سموم بفتح السين وليس كسرها
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
يا بله العزيز
بئر بكري دي كانت قاطّه ونحن قمنا فوقها(قشت) عينا من النوم والبِرْوِي الزرزور كان ما فيها...هسع ياداب ساقت والناس حارسنها زهاميل زهاميل...
بجيك راجع بي مهلة
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: نّاَرْ وشِك خَلاصْ واصبّح عريسك بَاشْ
وسيلك لمعاليك والمرَانِع كَاشْ
نَفَسِكْ من سَمٌومْ إتحلى جَابْ لي دُعَاشْ
وعَرَبِكْ لي جَفَافِنْ جَبَدو البرّاشْ
|
آناس جننتونا عوووووووووووووك
يا اب حريره إن ما سقتنى معاك البطانة ووريتنى هذه المراتع شكيتك على ود حسونة.
| |
|
|
|
|
|
|
|
|
|
Re: ود الشلهمة (Re: على احمد النعيم)
|
| Quote: يا اب حريره إن ما سقتنى معاك البطانة ووريتنى هذه المراتع شكيتك على ود حسونة. |
ياود النعيم آخوى البطاحين ديل باتعين خلاس ومابنخاف من أى ولى
نعمن عندنا جبلا قوى ... ودحسونة يلحقنا ويفزعنا إلا بوريك البخوفو ليك درت ورشاش .
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
| Quote: شكيتك على ود حسونة |
| Quote: ودحسونة يلحقنا ويفزعنا إلا بوريك البخوفو ليك درت ورشاش |
لاك دري ولاك مري ...آآآ ود النعيم ..داير تسيلك فتنة؟
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: منتظرين مساجلات شيخ العرب وشيخ طلحة بخصوص الموضوع ده ..عليك الله ضروري يا سمية..
وشعر ود الشلهمة فوق الشيخ عبد الباقي...
والقصص والحكايات كلها بدون فرز...
وتلفون المهدي ود شيخ طلحة..
|
أحمد آآآخوى إت ما تجى نتعلم الغتاتة ... رأيك شنو ؟؟؟
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
| Quote: ودحسونة يلحقنا ويفزعنا إلا بوريك البخوفو ليك درت ورشاش . |
يابت طلحه هوى ارعى بالوتد انتى ما سمعتى سيد ام اضينة قال" النضيف منى يقيف"
لكن اظن انت عندكم "الجدع طوب القبر فى السهلة"
تحياتى
| |
|
|
|
|
|
|
|
|
|
Re: ود الشلهمة (Re: على احمد النعيم)
|
Quote: لكن اظن انت عندكم "الجدع طوب القبر فى السهلة"
|
والله البجدع الطوب والفوق جناحو بطير
قال ود الشلهمة
مااابلفونى من عهدك بفك وبغير
دحين فك درب الماصع المابعرف قيد ولاوتد
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
سمية بت الحسن ود طلحة
كيف حالك
هو ودابحريرة أكان بعرف الغتاتة يرسل لى شنتير ود الشلهمة مرة واحدة?
ولله لو شاورنى كان شنتير نخليهو يصاقر البوست دا 25 ساعة فى اليوم.
أها شنتير دا دحين شفتوه بعد أحمد رسل ليهو الحجاب?
| |
|
|
|
|
|
|
|
|
|
Re: ود الشلهمة (Re: Balla Musa)
|
| Quote: أها شنتير دا دحين شفتوه بعد أحمد رسل ليهو الحجاب? |
معلمة الله أحمد غلتان
أنا ياأحمد ماقت لك الغتاتة... ورميت لما رميت لكن سبق السيف العذل
أها شوفولكم حيلة تمرق شنتير عقب... أناأهلى الشناتير ديل بعرفم والله هدى شوفة.
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
اتَطّمْطَمْ سَمَاكِ ............وعَاتِمْ
وبرّاقِك مَعَ فَمْ السِحابة ....يِلاطِمْ
تُعُولو اتشبكّن نازلات هواهِنْ كَاتِمْ
ووديانك لفّض مَاهِنْ...سَمَاحِك خَاتِمْ
------
انتو عارفين ود الشلهمة عندو اختيار دقيق للكلمات التي تدل على المعاني القاصدها مباشرة...كدي شوفو السماء ده "اتطمطم" كيفن...يا ربي بطنو طامه يعني؟ بموجب انو الذي ياتي بعد هذا الطمام هو المطر؟؟...
وشوفوا معي فعايل البروق مع السحابه..ما ضربنها في نصها ولا في آخرها بل في فمها..لكن لم العجب أليس الفم ما يخرج مافي البطن بعد هذا الطمام؟؟..طبعا أكيد ملاطمة البرق دي ذاتها إياها سبب الطمام الذي سيجبر هذه السحابة السمينة على افراغ مافي جوفها..
نجي لي تصويرو للتعول..لاحظ انو ليس تعلا واحدا ولا اثنين بل مجموعة تعول...اتشبكن في بعضهن..حتى صرن تعلا واحدا.. ونازلات مع هواء كاتم لا كشاحة ولا شعفوفة...يعني من السحاب وإلى الأرض مباشرة......
خلو بالكن من التسلسل المنطقي في البيت ده...والوصف الدقيق..طمام بعد ملاطمه ..تبعتهما تعول مشبكات ونازلات على وديان أغرقتها السيول حتى فاض مافيها على مجاريها..
و"سماحك خاتم"...عمك ود الشلهمة ذاتو البيت ده عجبو ...فلم يجد خاتمة له غير ان يهيم هو نفسه ويذيب ذاته في هذا الجمال اللا منتهي..ليصبح جزء لا يتجزا منه...
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: هو ودابحريرة أكان بعرف الغتاتة يرسل لى شنتير ود الشلهمة مرة واحدة?
ولله لو شاورنى كان شنتير نخليهو يصاقر البوست دا 25 ساعة فى اليوم.
أها شنتير دا دحين شفتوه بعد أحمد رسل ليهو الحجاب? |
شيخ/بله
كيفنك؟
تعرف صاحبي علي ود النعيم ده زول نيل وجروف وشتول لكنه مهووس زينا كدي بي شعر البطانة والدوبيت وبه من الوجد الكثير وعنده معرفه كبيرة بالمعاني والصور وحسه مرهف وذوقه ومزاجه عالي في الدوبيت على الرغم من انو لا يوم الليلة دي ما شاف البطانة ...ينوح ساكت زي البرعي الكبير ...وانا خايفو ينشق بالغرام قُبال ما يصلها ...وبعدين متكيف بالحيل من حديسك وحديس شنتير ومحسن وودالمحرب وسمية وقيسان ونزار وشيقوق ..
أها لامن شاف شحدة شنتير دي قال لي الزول ده ما ترسلوا الكلام ده..بيختِر وما بجينا تاني...انا قلتلو عليك الله هسه سماحة شحدتو دي ما بستاهل يرسلو له معاها بكره؟؟ كدي لاحظ لي شحدة شنتير كيفنها:
| Quote: دحين أكان عندك الكلام ده مكتوب وجاهز .. عليك الله أنهرو لي في رسالة خسوسية عشان أجلِّدو حجاب وأدرعو في ضراعي وأعنابو ِكرِّيتة. |
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: أبشر بى غنايا ماتشوف أطرافو
كدى نجض كلام البطانة دا وبنعقبو بى كلامو فوق عمر أخوه . |
دي المحرية فيك يا سليلة الأمجاد...خاصة والغرض واحد.. وهو التوثيق لهذا العملاق..
بالمناسبة غناهو وغُناالفنجري فوق عمر اخوهن "فظيع" على قول البنيات..
متفقين تب ...
ننجض غُنا البطانة ونرجع فوق عمر
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote:
Quote: ودحسونة يلحقنا ويفزعنا إلا بوريك البخوفو ليك درت ورشاش .
يابت طلحه هوى ارعى بالوتد انتى ما سمعتى سيد ام اضينة قال" النضيف منى يقيف"
لكن اظن انت عندكم "الجدع طوب القبر فى السهلة"
|
نقـأيـبك يمحِّـنن مِحنـاً فِعالك إحـيِّــر
ومحبوب الكرام الفي البـِتحصل شـيِّـر
البـِطوي الأرض والفـوق جناحو بطيِّر
مابـلـفـّوني مـن عـهـدك بـفِـكـّو بغيِّـر
طه ود الشلهمة فوق الشيخ عبد الباقى جبل الحديد أب شام
الأمــر الصـعَـب دَرَج الفُحـول فكـّيـتـو
والقـايــل بــِقـُص دربــك كِتِـر غلـِّيتــو
القــَصَـــد إمتحــان جهلك خِجـِل ذلـِّيتو
شِـــل طعــم المِلـِح مِنّـو ومِسـِخ بلـِّيتو
المربوع دا ياود النعيم كل بيت فيهو ليهو قصة واقعة مثبتة.
ودمتم
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
Quote: القــَصَـــد إمتحــان جهلك خِجـِل ذلـِّيتو
|
يلحقنا وينجدنا بسرو عند الله، وانا والله يابت طلحة احب كل من "تنى ركبتو فوق الصح" لانو يابت طلحة الناس ديل خدمو جد جد يعنى، ويستحقوا منا كل احترام. وانا من انصار هذا القول:
شيخا ماهو زى ديل كرشو باقيه كبيرة
شيخا يلفا للضايق جوا التنيرة
شيخا يحلحل العقد الغلب تفسيرا
حرم البكازيك سيرتو ماليها سيره
تحياتى بلاحدود
| |
|
|
|
|
|
|
|
|
|
Re: ود الشلهمة (Re: على احمد النعيم)
|
"| Quote: سماحك خاتم"...عمك ود الشلهمة ذاتو البيت ده عجبو ...فلم يجد خاتمة له غير ان يهيم هو نفسه ويذيب ذاته في هذا الجمال اللا منتهي..ليصبح جزء لا يتجزا منه... |
والله ياحمد كلام عجيب سمعنا بالزول يقول الكلام ويعجب الغير..لكن يقولو كلامو ويعجبو هو ..دا تزوق مبدع ل الهام جرى على لسانو...
لكن عجبنى تنزيلك للرباعيات بقيت تدينا ليها سلقة سلقة...يعنى حلقات مسلسل ود الشلهمة..
شنو ليك نبطحن طلال عفيفى...يقوم يشيل كمرتو ويبارى الوديان..وطلال بطحنتو مى دايرة كتير
بس وروه اثر خف قاعود ود الشلهمة..لانو اصلا متعود على متابعة وديان القمح فى المانيا..شفوفو ليه عجلة دبل..ومعاها مسجل مكسى بكيس تريفيرا...وبعد كم شهر سوف تسمع كركرت رعد ونمت هاوى فى عمل سينمائى...
تسلمو جميعا
| |
|
|
|
|
|
|
|
|
|
Re: ود الشلهمة (Re: abuguta)
|
| Quote: تعرف صاحبي علي ود النعيم ده زول نيل وجروف وشتول لكنه مهووس زينا كدي بي شعر البطانة والدوبيت وبه من الوجد الكثير وعنده معرفه كبيرة بالمعاني والصور وحسه مرهف وذوقه ومزاجه عالي في الدوبيت على الرغم من انو لا يوم الليلة دي ما شاف البطانة ...ينوح ساكت زي البرعي الكبير ...وانا خايفو ينشق بالغرام قُبال ما يصلها ...وبعدين متكيف بالحيل من حديسك وحديس شنتير ومحسن وودالمحرب وسمية وقيسان ونزار وشيقوق .. |
الغالى ابو حريره، الشكر بلا حدود على هذا الاطراء الذى لا استحقه، ولكن لقد صدقت حين قلت "وبه من الوجد الكثير" اى والله وجد لا يوصف.
| Quote: أها لامن شاف شحدة شنتير دي قال لي الزول ده ما ترسلوا الكلام ده..بيختِر وما بجينا تاني...انا قلتلو عليك الله هسه سماحة شحدتو دي ما بستاهل يرسلو له معاها بكره؟؟ |
وهذه رساله للاخ شنتير ان يطل علينا بعد ما لبس حجابو.
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: أب قوته قنبلة الوجد الموقوتة (استلاف وتحوير)
شكرا على متابعتك النابِهة والمزاج العالي جدا..
ات عارف يااحمد ابقوته ده انا مبسوط منو خلاص وبعاين
ليه بالطواله وانا والله سعيت سعى حثيث انى اجيب لى
شريط لهذا الشاعر الفذ.لكن وحات ابوك بلم فيه كان
الليله كان بكره .الليله عندنا شيوم لكن بكرخ بجمع فوقو تب.
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
شنو ليك نبطحن طلال عفيفى...يقوم يشيل كمرتو ويبارى الوديان
JJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJJ
أب قوتة
سيد البكرة المربوطة
ولا ناس الهوج البلقطوا القطن بالبكاسى ديل ماعندهم بكار وأمهار ؟
يازول مسكنا طرف فى طلال دا والله ممايكرف هواء البطانة دا تانى
مايمرق إلا بطحانى ...وأول الحوافز جدعتين فى الهواد من ود المحرب.
ودمتم
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
مع شانتير واحمد في شعر البطانة سرحنا
ود القرشى الطبيب بحزن الحقيبة جرحنا
مو مشغول بالمسكوت عنه في مسرحنا
هذا هو نصيبكم من باكورة إنتاج ةشيقوق الشعرى
يوجد النص الكامل ببوست ( فضيلى يشيد بكتاب الشمار المدقوق..... )
| |
|
|
|
|
|
|
|
|
|
Re: ود الشلهمة (Re: سمية الحسن طلحة)
|
قام قشِّك مَنّوَع ......ومِنطَرِدْ مِتْبَارِي
غَاثِكْ عَاتِم الليلِ ...الصبيبو سواري
مَعَلاكْ طينتو خضرا وسيل مهاويك جاري
وإتحلّنْ مَنَاظّرِكْ ....يالهَوَاكْ مِتْمَارِي
-------------
| |
|
|
|
|
|
|
|
|
|
Re: ود الشلهمة (Re: abuguta)
|
| Quote: وتفتحت روحي على معاني ومعارج لم تكن في متناولي قبلاً |
الأخ الكريم طلال عفيفي
تجدني سعيد جدا بمرورك الكريم على شيخنا ود الشلهمة وتشريفك إيانا بالزيارة ...
عرفت من الأخ أبقوته انك مسكون بالتصاوير مثل هذا الشيخ الفنان...وذاك هو السر في تفتح روحك على ما احتواها أدبه من معانٍ ومعارج...فالمتبتلون في سوح الفن على قلب رجل واحد من حيث الاحساس وإن اختلفت أدواتهم..
ومرحبتين حبابك
| |
|
|
|
|
|
|
|
|
|
Re: ود الشلهمة (Re: abuguta)
|
Quote: كدى رايكم فى الشرح دا شنو..
نبت الغش فيك...متنوع السيقان
وعماكِ ليلى ....غطى كل مكان
روابيك .قرير.. واتسرفت خيران
عيونى بتاعين ...يالهواك جنان |
أبقوته كيفنك؟
شكرا
جدا مقبولة ونعتبر شرحك ده simplified version لكلام عمك طه وبدون مقارنة..أنا كده بحميك...صاح؟
بس حاسب من بله موسى ما يرسل لك أم دلدوم عابر للأطلنطي
Quote: قام قشِّك مَنّوَع ......ومِنطَرِدْ مِتْبَارِي
غَاثِكْ عَاتِم الليلِ ...الصبيبو سواري
مَعَلاكْ طينتو خضرا وسيل مهاويك جاري
وإتحلّنْ مَنَاظّرِكْ ....يالهَوَاكْ مِتْمَارِي |
-------
كسعه:
إنت كنت مع ناس ود المحرب في هلولة الرياض دي ولا إنت غادي منهم؟
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
بَعَدْ دُورْ الجَفَافْ قَام عَفْرَتِكْ مِتْجَاِري
وسُحبِكْ نيلتو زرقاء وبرقو يِنفُضْ فَارِي
إنكَسّى بالخَدْارْ تّبْ وَشِكْ الكان عَارِي
وإنْعَقَدَنْ رَوَاينِك يا أم نَداياً تَارِي
-----------------
دايرين لنا زول شاطر يوصف لنا منظر العفرت قبل شروق الشمس..والعفرت لمن لا يعلمون ، وده تفسير من عندياتي لست متاكدا منه وبتراجع منو متى ما لقيت تفسير أحسن ، هو نوع من السحب المنخفضة وحركته سريعة ويظهر دائما بعد ليلة ماطرة شهدها مكان ما من أركان السماء الأربعة...
أنا بفتكر ود الشلهمة متخصص في البروق وهو أفضل من وصفها شعرا (بريقاتك بلاون في السحاب وسهارى ، ورعدك سك براقكك ، وبرقو ينفض فاري الخ..) وقد ورد ذكر البروق والرعود أكثر من مرة في لوحاته الشعرية..
تخيل كيف يصور مرحلة الجفاف ووجه الأرض العاري وكيف ان الخدار قد قام مقام الكسوة..
الرواين جمع ومفردتها روينة وحسبما اعرف ان الروينة هي مجموعة من الصيد والرواين معناتا مجموعات او مِرحات من الصيد وكلمة إنعقدن بمعنى أنهن انتظمن في مجموعات وجماعات وتوجهت جماعات الصيد "الرواين" صوب البطانة بعد ان اكتسى وجهها الكان عاري بالخدار والجمال والبهاء...
وود الشلهمة لا يدع مناسبة وإلا يذكرنا فيها بالندى وتربة البطانة اللينة والرويانة ليثبت أن نباتاتها المتنوعة والعديدة موعودة بفترة حياة اطول يستطيع بفضلها ان يعيش الانسان والحيوان خريفا طويلا يمتد عمره أكثر من النبات الذي ينمو في غيرها وفي ذلك مدح خاص لا تخطئه العين لتربة البطانة الخصبة المرية..
| |
|
|
|
|
|
|
|
|
|
Re: ود الشلهمة (Re: Ahmed Yousif Abu Harira)
|
Quote: مَعَلاكْ طينتو خضرا وسيل مهاويك جاري
وإتحلّنْ مَنَاظّرِكْ ....يالهَوَاكْ مِتْمَارِي
|
والله يا احمد كانى الآن شايل نعلاتى فى ايدى ومتشمر وماشى فى الطين واسمع فى خرير الخور والرعدة فوق راسى تدودى وانظر الى تلك المناظر البهية بعد ان انكسى وجه المريا بالخدار.
زيدنا عليك الله من هذه التحف.
دمت.
| |
|
|
|
|
|
|
|
|
|
ود الشلهمة كما تناوله ذات مرة الاستاذ الطيب محمد الطيب .. (Re: Ahmed Yousif Abu Harira)
|
من تراثنا القومي / طه ودالشلهمة..شاعر الطبيعة ..
الطيب محمد الطيب
بإجماع الناس قاطبة، الشعراء الملهمون في البادية الشرقية أربعة ، أحمد ود عوض الكريم ،والصادق من الشكرية وود شوراني من المرغوماب وشاعرنا هذا طه ود الشلهمة من البطاحين بعد أن إلتقينا في المرة السابقة بود شوراني نعود فنلتقي اليوم بشاعرنا طه وإن كان هذا النوع من الرجال يعايشنا في هذا العصر بذواتهم إلا أن نفوسهم هي تلك النفوس البدوية السليمة الفطرة التي تضوع عفة وسماحة دونما رياء وتجمّل تنحى في مسلكها العاطفي منحى السلف.
وشاعرنا طه من قبيلة البطاحين ذات التاريخ الحافل بالبطولات ‘ درج في البادية جهة (أبرق) وابو "دليق" ومارس صناعة الشعر منذ صباه الباكر فبرز وسبق وطرق كل أبواب الشعر فأثرى وأبدع وتفوق في ضرب من النظم يتحاماه الكبار لوعورة مسلكه، ولا يتبتل في محرابه إلا الأفذاذ هو النظم في مرائي الطبيعة.
نلتقي معه في هذه القصيدة التي يخاطب فيها أرض البطانة التي يحبها ويحب الخريف فيها يصف بشائر غيث عميم قد شام على الافق بارقه:
مسك القبلة في كوع الشمال براقك
وقشط صدرو في عامر سحابو وساقك
تبوبك قرنن والسيل دهك شقاقك
الضايق نشوقك حا ر عليهو فراقك
لقد شمت برقك الذي لاح لي من جهة الشمال الشرقي وهذا التحديد يستفاد من عبارة الشاعر في دارج من المزن قد إعترض بالأفق لا يخلف غيثها الظن ، فهم قد عرفوا من طول تجاربهم أن البرق من هذه الجهة لايكون خلباً فهو دوماً يصدقهم ويأتيهم بالغيث العميم وقد لاح هذا الذي رأى الشاعر في دارج من المزن قد إعترض بالافق وهذا البرق قد جمع سحاباً متراكماً أثقله القطر فهو حاد بارع ملأ صدره من السحب الثقال فهو يزجيها فعل الحادي الذي يحث الركب وهذا يذّكر قول الشاعر الأندلسي الذي جعل الرعد بمثابة الحادي فهو يحدو السحب ويسوقها فهو يذكر من جملة أبيات:
راحت تذكر بالنسيم الراحا
وأطفاء تكثر بالجنوح جناحا
أخفى مسالكه فاوقدت
من برقها كي تهتدي مصباحا
"وكأن صوت الرعد خلف سحابها
حاد إذا ونت الركائب صاحا"
فوصل بين غدرانها المتقطعة وقد سالت الأودية وفاضت بالماء ولم يدع الغيث غوراً او وهداً إلا غمره حتى استوى عنده النجد والوهد فما أسعد الشاعر بذلك فقد سره هطول الغيث وذكّره الرحلات التي يقوم بها قومه في رحاب البادية الخصبة – والذي يجرب وما فيها من متعة للنفس والنظر يعز عليه فراق البطانة.
بعد دور الجفاف قام عفرتك مجاري
وسحبك نيلتو زرقه وبرقك يلفح فاري
اكتسب الخضار وجهك الكان عاري
وإنعقدن رواينك يم ندايا ..تاري
وقد شام الشاعر بعد أسبوع لم تجدهم فيه السماء وجفت فيه الارض ولم يبق من أثر آخر غيث سوى غدران متقطعة وقد ظهرت على الافق قذعات ثم ما لبثت أن تراكمت وصارت سحاباً جوناً يغريه البرق فرياً حينما يلوح متعرجاً ، وما أجمل الحمر الوحشية (روانيك) وقد سرحت على الأرض الخضراء تطلب المرعى الطيب في كنفك يا ذات الندى البليل.
قام قشك منوع ومطرد متباري
وقاسك عاتم الليل الصبيبو سواري
معلاك طينتو خدره وسيل مهاويك جاري
واتحلن مناظرك يامندايا، تاري
وها قد إكتسى أديمك ببساط من الخضرة (الكلأ) حينما أقبلت بالنبات الأرض مختلفاً ألوانه وهو نبت متصل من جراء غيث ذلك السحاب الجون (عاتم الليل) الذي يشبه قطع الليل من كثرة ما إحتمل من الماء ، فطينتك زرقاء يضرب لونها الى الخضرة (وهي اطيب الأرض ) اما سيلك فهم يجري في مدافعك جياشاً (مهاوي) هنا فصيحة وهو ما اطمأن من الأرض – ثم يطالعنا بصورة وهي صورة البطانة وقد لبست أرضها الحلية من نبات الأرض وتزيّنت به وقد هبت عليه الصبا غب القطار بليلة ندية معطرة بروح الماء والنبات تبعث النشوة في النفوس.
إسمحتي من لونا لبستي جديد
وتصبح كل يوم نايرة وحلاتا تزيد
تعالك نزل ساوى الضهور والليد
واجادع فريقك في نزلتو بعيد
اسمحتي قد اصبحت جميلة بما لبست من ألوان النبات وفي كل يوم تزداد حسناً عندما يزداد النبات نمواً وازدهاراً فيكسبك إشراقاً وحسناً (تعالك نزل) صبوبك الهتون الذي جادك في سخاء ففاضت به الوديان وجمع الماء من غزارته بين علو وسفل و(الضهور) هنا يعني بها ما ربا وارتفع من الارض والليد هي المجرى الرافد وهذا يذكّرنا بقول ابي هلال العسكري:
جمع الغيث بين سفل وعلو
ثم يتطرق الشاعر لنزول (الفريق) فيقول ان "الفريق" قد إنتثرت مخيماته وذلك لندرة المواطن الجافة فهي جد متفرقة في أنحاء الوادي.
نار وجهك خلاص واصبح عرسك باش
وسيلك بالمعالي بالمراتع كاش
نفسك من سماحتو تحلى جابلو دعاش
وعربك لي جفافن جبدو البراش
ثم يتدفق الشاعر في تصوراته فيقول لقد اشرق وجهك بالخضرة الناضرة عندما هش سماؤك في وجهك وجادك فعل الكرام عندما عندما يهشون لضيوفهم ويفيضون عليهم الجود والقرى وهكذا سماؤك قد رفدك بماء جزيل لا ينفك سيله يجري منحدراً وقد استوى عنده العالي والمنخفض من الأرض والشاعر لا ينفك شحين النفس بمرائي الطبيعة الساحرة فهو يعود مرة ثانية لوصف النسيم ، غب القطار، وقد هب رقيقاً عليلاً يضمخه أريج النبت وترقرقه رطوبة الماء وهاهم عربك بعد تلك الليلة المطيرة قد نشروا متاعهم (بروشهم) بغية تجفيفها من الماء وايادي الخريف على البطانة كثيرة جمة.
وجهك نادى تبرك ربا ومتقيل
وضعنك لف بي جابر المهاوي مميل
برقك لاوا في الزيف الوشامو منيل
وفش غبينتو فيك سحبك المتحيل
صور حسنة تتجلى في طبيعتها الساحرة فالنبات ينمو بألوانه المختلفة يلذ الناظرين ويذكر هنا نوعاً من النبات يسمونه "التبر" له نور أبيض وأظنه ما يعرف عند شعراء العرب الأقدمين "بالثغام" والشاعر يقول قد ضاء وجهها بالتبر المنور الذي اشرق وازداد نموه وتشابكت أفنانه ثم ياتي الشاعر بصورة اخرى يؤكد بها أن المطر كان غزيراً (لفه جابر المهاوي) الظعن عندما عندما اراد الرحيل دار يبحث عن الموضع الجاف في طريق سيره متجانفاً عن الوحل والماء الذي غمر الارض من صوب تلك السحايب التي لمع فيها البرق متعرجاً يطوي معصراتها رغم ذلك الزيق ( قوس قزح ) والذي في أعتقادهم يمنع المطر وقد لاح أصيلاً على الافق "فش غبينتو" جادك الغيث المدرار في حرارة كأنه موتور كظم غيظه فتفجر ينفث ما إمتلأ به صدره حتى نفّس عن نفسه كذلك غيثك كان ينوء بحمل الماء الغزير فعندما إنبجس منه نفّس عن نفسه.
رحلو الليلة من دار الدمر وانقلو
حازمة ضعينتن متبعه ما بنفلو
سقد مايقي روقت الغمده ما بطلو
قلبي مع الجراسة البندلن قام كلو
ثم يلتفت الشاعر في هذه الابيات ويذكر الظعن وقد رحلوا مع مطلع الخريف من الدمر وهو المكان الذي يقضون فيه فترة الصيف رحلوا في ظعينة دفعة واحدة.
وقلبه قد خفق لهذه الركب وهنا يخلص الشاعر من حديث الطبيعة الى حديث القلوب وربما تكون وراء كل هذا الوصف عاطفة الهيام هذه التي حركها قرب الرحيل ففي الركب محبوب توجس فراقه قد حال بين العين والغمض وقد جارى خفقان قلبه الأجراس التي تدق حول الهودج دقاً متوالياً يهيج لوعته فكأنما نعق بها غراب البين اللعين فالشاعر تتنازعه عاطفتان عاطفة الفرح بقدوم الخريف وعاطفة اللوعة بالرحيل.
مبسوط البطانة إتنعمت قدام
شابع قشها وقاسا المزرقن وقام
اخلوا الدكة لا مخبر ولا حوام
ولي فيهن صديق روحاً ملاني غرام
يخاطب الشاعر البطانة لقد نعمت أيتها الارض التي جادها السحاب الجون ثم انجلى غيثه عن عشب نضير يضمن للسوائم الشبع والري وهاهم أهل المحبوبة قد ارتحلوا وخلفوا رسومهم خاوية تملأ النفس وحشة فلا أحد يخبر عنهم أو يدل عليهم وهذه وقفة على الأطلال تماماً كما كان يفعل أسلافه من الشعراء الجاهليين.
يبكون الديار والآثار والشاعر يقول ان له في هذا الركب الراحل حبيباً هو روحه وقد تبل قلبه بالحب وزحمه بالغرام والصبابة.
مبسوطه البطانة وقاسته النقاعة
دور خبر الرحيل اتباشروبو جماعة
قاصداك أريل الفوده البضوى شاعه
احمت عيني تغمد عقربه اللطاعه
لا ينفك شاعرنا يذكر بهجته الكبرى التي لازمته من اول القصيدة ببشائر الخريف يفيض السرور الذي ملأ اقطار نفسه فقد جادها غيث عميم ينقع الغله ويروي الارض ثم يعود ليصف البشرى بطلائع الخريف فهو حدث عظيم تتباشر به الجماعات ومن بين هذه الجماعات جماعة محبوبته.
وسير اليك ظبى "الفدفد" الذي يتضوأ حسناً وجمالاً فلكم اريق الليل اعاني ضنى
الوجد والهيام وقد حال ما اعاني بين الطرف والمنام كأني "لديغ" ملسوع لا يهدأ له ليل فلذع
الشوق إليها يحول بين المنام وعيني ثم نعود مرة أخرى مع الشاعر وما أكثر هنا العود.
الارض والجبال بقين خدر في الشوف
أخلوا الدكة قصدوها البطامنو الخوف
عشوهن لبن تبر غزير الدوف
بضارا من كشح صقت الندايا أم فوف
ويسترسل الشاعر قائلاً ان الارض والجبال صارت خضراء معشبه وركب المحبوبة قد أخلى "الدكة" مكان إقامتهم وقصد أولئك الرجال الغطاريف الذين يدخلون برد الطمانينة في النفوس فهم سادة القوم وثراتهم وحماة العشير. وعندما حل الظعن قدموا للحسان اللبن المحض في وجبة العشاء فما أهناءه من عشاء لأولئك الحسان اللاتي اتسقت اجسامهن فهن ممتلآت الجسم. وهنا يظهر لنا الذوق العربي الاصيل الذي يسود الشعر الجاهلي فمن ذلك قول الاعشى:
صفر الوشاح وملؤ الدرع بهكنة
اذا تقوم يكاد الخصر ينخذل
وكقول عمر بن كلثوم يصف إمتلاء جسم محبوبته:
ومأكمة يضيق الباب عنها
وكشحاً قد جننت به جنونا
وسارتي بلنط او رخام
يرن خشاش حليهما رنينا
المأكمة راس الورك. تريك وركاً يضيق الباب عنها لعظمها وامتلائها باللحم. البلنط. العاج. والسارية الاسطوانه. ومعنى قول الشاعر تريك ساقين كاسطوانتين من عاج او رخام بياضاً وضخامة. فالذوق العربي يفضل المرأة الممتلئة.
فهن أي الحسان يدفئن ضجيعهن من البرد الشديد. " صقت الندايا ام فوف" وهذا يذكرنا بقول الأعشى :
نعم الضجيع غاداة الدجن يصرعها
للذة المرء لا جاف ولا تفل
وإن اختلفت نوايا شاعر البطانة. الدجن إلباس الغيم السماء......*
سمحت ومن شنات الصيفة نارت حالك
وفي صدر الضعينة إتنابطا جبالك
نداك قارع السرب للنافلة معقول مالك
وتبرك فوفا وقنب يلعب نالك
وقد خلعت لبوس الصيف الجاف ولبستي النور والنضرة واشرق وجهك حين بدت للركب جبالك العالية.
وقد ازدانت الارض بذلك الزهر الابيض الفاقع الذي يسمى تبر فهو على الارض أفواف فيها بهجة للناظرين ......*
اطمطم سماك وعاتم
وبراقك مع فم السحابة بلاطم
اشبكن تعولك نازلات هواهن كاتم
وديانك لفض سيلن سماحن خاتم
ثم يختتم قصيدته مخاطباً للبطانة فيقول أن سماءك قد تلبّد واربد واسودت جوانبه بسحاب جون وبرقك يلمع في اطراف هذا الغمام ثم ازداد تراكم سحابك وقد سكن الجو واشتدت وطأة الحر وهي ظاهرة تسبق هطول المطر غالباً.
ثم يقول لها وما اجمل وديانك وقد امتلأت بالماء الثر فهي وبما تفيض به من ماء غاية في الجمال.
-------------------------
** هناك جزء من الموضوع مفقود - بكل اسف - خاصة وأن المرجع وهو عدد قديم لمجلة الخرطوم يعود تاريخها الى فترة الستينات.
كما ارجو أن اكون قد نقلت كتابة استاذ الطيب كما هي بالمجلة ..خاصة وأن كتابة الدوبيت وهو لغة دارجة في بعض الأحيان يعجز تشكيل الحروف من توصيل نطقه الصحيح ..ولكن عشمي أن يكون الملف الصوتي المرفق في الصفحة الأولى للبوست تكفي للوقوف على لغة الدوبيت خاصة عند ود الشلهمة.
أما هنا فيبدو لي ان الاشارة المهمةهي كيفية تناول الاستاذ الراحل الطيب محمد الطيب بالشرح لفنون الدوبيت كلون من ألوان "التراث القومي"..بعين الباحث البصير العارف الملم ..
ألف رحمة ونور على استاذنا الطيب ..والف رحمة ونور على شاعر البطانة طه ود الشلهمة..
مع تحياتي للجميع ..
| |
|
|
|
|
|
|
|
| |
Ahmed Yousif Abu Harira
على احمد النعيم
الطيب شيقوق
abuguta
Balla Musa
gessan
خالد المحرب
أبو الحسين
الطيب بشير
طلال عفيفي
طارق جبريل
فيس بوك
تويتر
انستقرام
يوتيوب
بنتيريست