|
|
 مكانة " الطير " فى الاغنية السودانية
|
اغنيتنا جميلة و حلوة و معبرة
فيها تعابير رائعة و معانى متميزة
صحيح انها لم تلق حظها من الرواج الا فى نطاق ضيق فى محيطها الاقليمى و لكن صحيح ايضآ ان بها من المعانى و التعابير ما لا يوجد فى غيرها من اغنيات المنطقة و الاقليم المحيط بها
ما لفت نظرى هو الاستخدام المكثف للطير فى الاغانى السودانية بحيث لا يوجد ذلك فى اغنية اخرى فى العالم
و على سبيل المثال لا الحصر
يا طير يا طاير **
بالله يا طير قبل ما تسرع تمرعلى بيت قريب **
تلقى الحبيبة تشتغل منديل حرير لحبيب بعيد
( ارسال التحايا و بسرعة للحبيب الذى يعمل مناديل حرير مخصوص لحبيبه المتواجد فى المهجر )
بالله يا طير الخدارى .. قولى ليه وحيات حبنا **
وين رسايلك يا حليلها.. وين عيونك مننا ؟؟
( توصيل رسالة محددة للحبيب و هى رسالة استفهامية استنكارية لماذا قطع رسائله و لماذا لا يبين للمحبوب ؟؟ ... و الذى يحيرنى لماذا اختيار الشاعر للطائر الخدارى ؟؟ يعنى لماذا لم يكن هذا الطير هو الطير البيجى او الاحمر مثلآ ؟؟ ام ان ارتباط الطير الاخضر بالجنة له تأثير فى الاختيار ؟؟ )
ابنى عشك يا قمارى قشة ..قشة **
و علمينا كيف على الحب دارنا ينشأ
رغم العواصف برضو واقف .. و ما فيه رعشه
( و هذا تطور خطير فى علاقة الطير بالشعراء و الاغنية حيث وصل الامر لان يقوم الطير بتعليم الانسان كيفية بناء علاقة الحب على اسس متينة بحيث لا تتأثر بعوامل الزمان مهما تكالبت )
والله يا طير الرهو ماكت مصدق انى بلقاك يارهو **
اشكو ليك من جور زمانى و كيف رمانى
و شوف وراك الزمن كيفن بيسو ؟؟
( بث الشكوى من الزمان و جوره لطير الرهو ... و لا ادرى ما هى العلاقة بين جور الزمن و طير الرهو ؟؟ هل لطير الرهو تجربة مماثلة مع الزمن ؟؟ ام ان لترحاله المستمر و هجراته بين اصقاع الدنيا علاقة بالامر ؟؟ )
اما النوم ابى و جافانى و اصبح داجى ساهر **
وين حتى الطير رحل خلانى و ما طيّب لى خاطر
(هنا حتمية ان الطير يطيّب الخاطر .. و يبدو ان هذا هو دوره المنوط به ... فانتقل الطير هنا من ناقل لرسائل الغرام و الهيام الى مطيب و مجبر للخواطر )
البلوم فى فرعو غنى**
و طرّانا يا الحبان اهلنا
( ماهى علاقة اهل الشاعر بغناء الطير هنا ؟؟ اللهم الا ان يكون غناء البلوم حنين يذكر الشاعر بحنية اهله )
ملك الطيور ارقص وسط الرياض نشوان **
خلى الزهور تفتح مختلفة الالوان
( تشبيه المحبوب بالطاؤوس ملك الطيور )
والله نحنا مع الطيور المابتعرف ليها خرطة **
و لا فى ايدها جواز سفر
( استخدام الطير سياسيآ فى طلب اللجؤ و الهجرة )
طائر الهوى جناحه قد مال **
( و هنا اشارة صريحة لان الناقل الوحيد للهوى هو الطير
love air !!
و يشبه الناقل الوطنى سودان اير فى هذه الحالة )
و الشاهد ان الامثلة من ذلك كثيرة .. و لا ادرى علاقة الطير بكل هذه الاغانى ؟؟
و فى ظنى ان ذلك مرده الى
1- الحياة البدوية فى السودان و تأثر الشعراء بالبيئة و منها الطيور بانواعها المختلفة
2- الاعتقاد السائد ان الطيور مخلوقات رقيقة و مهيضة الجناح و لذلك فهى ادرى على فهم اللواعج و الشجون بين المحبين و بالتالى فهى الاقدر على توصيلها
3-حب الطيور لبعضها البعض يفوق بقية الحيوانات الاخرى
4- الالفة بين الانسان و الطيور ( قصة الطيور الحزينة فى كتاب المطالعة )
و الامر من بعد يحتاج الى بحث و استقصاء .. و لو كنت متفرغآ لما توانيت فى ان اختار هذا الموضوع عنوان لدرجة ماجستير او دكتوارة فى الادب الغنائى فى السودان
و الخلاصة العجيبة التى خلصت اليها بعد كل هذه المكانة للطير فى الاغنية السودانية ، ان الناس عندما تريد ان تسخر من احد او تشتمه تقول : ده طيره ساى
سبحان الله ؟ الطير المستخدم كناقل للهوى يصبح بين لحظة و اخرى مسبة
اها ده نقول عليه شنووووووووووووو ؟؟؟؟
|
|
 
|
|
|
|
|
|
|
 Re: مكانة " الطير " فى الاغنية السودانية (Re: KOSTA)
|
انا يا طير ... انا يا طير بشوفك
و محل ما تطير بشوفك
فرحان و بتغنى و حبيبك معاك
و حبيبى غاب عنى
( و هذه حسادة من الشاعر لانه حسد الطير المسكين فى وجود حبيبه بجانبه و هو حبيبو مغترب و ما لاقى حق الشيلة )
| |
|
|
|
|
|
|
|
|
|
Re: مكانة " الطير " فى الاغنية السودانية (Re: الجندرية)
|
يا طير الجنة طير بالاشواق ورك فى الحنة
************
هجرة عصافير الخريف
*******
البلوم فى فرعو غنى
***********
يا حمام يا زاجل
انا عندى ليك رسائل
**************
غنى يا قمرى غنى واسمعنى
********
حمامة الغصون صداحة فوق اغصانك
*************
والله يا كوستا سبقتنى بيوم ب كنت عايز انزل بوست باسم الطيور فى الاغانى السودانية
هسع ده ما موضوع دراسات عليا لناس الموصلى واهل الفن فى البورد
| |
|
|
|
|
|
|
|
|
|
Re: مكانة " الطير " فى الاغنية السودانية (Re: woroorrook)
|
WROOROOK
ودى للكدرو تحية
و تلقى زول ناير المحيا
و قول ليهو بحنية
يا حليل زمن الوصل الجميل
بعدين غناء الطيور فيه موسيقى و حنان منساب
يمكن عشان كده الناس بتميل ليها و تطلب منها الغناء
الجندرية
يا طير يا ماشى لاهلنا
احمل ليهم رسائلنا
قول ليهم على العهد ما زلنا
| |
|
|
|
|
|
|
|
|
|
Re: مكانة " الطير " فى الاغنية السودانية (Re: woroorrook)
|
WROOROOK
ودى للكدرو تحية
و تلقى زول ناير المحيا
و قول ليهو بحنية
يا حليل زمن الوصل الجميل
بعدين غناء الطيور فيه موسيقى و حنان منساب
يمكن عشان كده الناس بتميل ليها و تطلب منها الغناء
الجندرية
يا طير يا ماشى لاهلنا
احمل ليهم رسائلنا
قول ليهم على العهد ما زلنا
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
عادل امين
القلوب شواهد
و توارد الخواطر وارد
و ياسيدى اعتبر البوست بوستك
و الطيور طيورك
شكرآ على قائمة الطيور بالاغانى
هجرة عصافير الخريف فى موسم الشوق الحلو
هيج رحيلها مع الغمام احساس غلبنى اتحملو
هل هو احساس الحنين للعودة للوطن الدفء؟؟
هل هو احساس الحنين لمن نهوى ؟؟
هل ؟؟
و
هل ؟؟
استاذنا الموصلى
لك الشكر يارائع على المداخلة
بس سؤالى يا موصلى
هل ما زالت حفلاتنا تختتم ب يا حمامة مع السلامة ظللت جوك الغمامة ؟؟؟ و ما العلاقة ؟؟ هل لان الحمام يبدأ رحلة البحث عن رزقه عند انتهاء الحفلات فى الساعات الاولى للفجر ؟؟
و يا حمام الايك
اهديلو منى السلام
و قول لى الزمان فرقنا
و الكون بقالي ظلام
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
تحياتي كوستا
والله فعلا ملاحظاتك في مكانها ،اوالأمر فعلا حاجه لدراسة متأنية وفاحصة لسر الطير الكتير في غنانا ده ، وبالمناسبة نفس الشيء ملاحظ في الأغاني العربية بشكل عام ، بس احنا زودناها شوية .
مش برضو في غنية بتقول :
طيري يا عصفورة و ركي في النافورة....
وبعد داك كورة...و قدورة و ....وحاجات غربيه كده ماحافظاها
العارفها يتمها..
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
نصار
و الله يا نصار نكتة حنان النيل اضحكتنى حتى سالت دموعى
لك الشكر على المداخلة الظريفة
و ياحليل الراحو و خلو الريح تنوح فوق النخل
ياسيكو
للاسف لم استطع الاستماع للاغنية لاسباب فنية
و ان يكن ، فلك التحية عليها و اكيد حتكون حلوة و اتخيل انها تكون عن احد الطيور
روزة
انا ما بتذكر اغنية بالشكل ده
نحنا يا اختى اصغر منكم .. عشان كده ما حضرنا الاغانى دى
لكن مقبولة منك الاغنية
و ياريت تدينا من اغنيات العشرينيات عشان ما حضرناهن
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
لووووووووووووول@ نصار...
والله يا كوستا... مواضيعك قيّمة وجميلة ونوعية...
قبل فترة كنا وبعض الأصدقاء نناقش مكانة العيون فى الأغنية السودانية...
الأغنية السودانية ما خلّت حاجة والله...
لك الودّ يا رائع...
أنور
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
ابو الزفت
عفوآ يا سيدى للسهو غير المقصود
بس كدى اشرح لى : ليه القمرية تطير و ترك فوق الزنكى ؟؟
السبب شنو ؟؟؟
و بعدين الحبسنو لجنية ده منو ؟؟؟
و هل هى جنيّة ام جنيه سودانى زمن العز ؟؟؟
تحياتى
انور كنق
لك الشكر على الاطراء الذى لا نستحقه
بس انت اتجدعن كده و نزل موضوع عن العيون فى الاغنية السودانية
تشوف الناس دى كلها تجى كابة فوقك
و انا اولهم
و فى انتظار ذلك البوست
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
غنى القمرى على الغصون
ذكرنى الدر المصون
و بريد عصره الما مثله شئ
فقط غناء القمرى ذكّر الشاعر بالحبيب المصون
عالم متحيله .... هسع علاقة غناء القمرى بالحبيب المصون شنو ؟؟؟ يعنى ما كان ممكن الشاعر ده يتذكر حبيبه من غير ما تنوح هذه القمرية ؟؟؟
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
العزيز كوستا
لك التحية
لقد رايت استعادة هذا البوست لاصلاح خطا ورد به وهذه اول مرة اضطلع عليه
لقد اوردت
اما النوم ابا وجافاني واصبح داجي ساهر
حتى (الطير ) رحل خلاني ما طيب لي خاطر
والصحيح هو
حتى (الطيف)رحل خلاني...الخ
والقصيدة للشاعر محمد سعيد دفع الله واول من غناها وسجلها للاذاعة السودانية الفنان محمد كرم الله
ودمتم
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
جدو
سلامات
شكرآ جزيلآ على التصحيح
و فعلآ الاغنية : حتى الطيف
و ليس حتى الطير
و كنت ناوى اعمل التصحيح من بدرى ، لكن لمشغوليات عديدة لم اتمكن من ذلك
على العموم كتر خيرك
و لك تحياتى
مهندس الحليلة
لك الشكر على المداخلة اللطيفة
و ما تحرمنا ياهندسة من المتاوقة من آن لآخر لهذا البوست
و على فكرة كندا فيها بلوم و قمارى ؟؟؟؟
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
تصويب
نبهنى احد الاخوة الاعزاء ان اغنية
غنى القمرى على الغصون
ذكرنى الدر المصون
فريد عصره المامثله شئ
و ليس بريد عصره ... كما ذكرت سابقآ
لكم العذر على هذا السهو
و يبدو ان عامل السن قد بدأ مفعوله
و لصديقى العزيز الذى نبهنى لذلك التحايا
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
المطر
طال علينا فراكم و الله يا غائبين
قدر ما ننسى العلينا برضه مشتاقين
هذه الرائعة لعثمان مصطفى لحنها الهرم وردى
كلمات الاغنية قمة فى الروعة
و ما تناولته بخصوص الطيور التى تسأل عن الحبيب فى ضل المساء
فعلآ تنم عن ائتمانها و رقتها و مشاركتها للاحزان التى تنزل على المحبين
سؤالى يا المطر : لماذا هذه الكثافة فى استخدام الطير بانواعه المختلفة فى الاغنية السودانية بالذات ؟؟؟؟
كل الاغانى العربية او الافريقية لا تجد فيها هذه الكثافة
| |
|
|
|
|
|
|
|
|
 Re: مكانة " الطير " فى الاغنية السودانية (Re: KOSTA)
|
سلام يا جماعه كلكم ..
وتحايا خاصة لى اخونا كوستا ولى البوست الشيق .. والله بالجد كلامات واغانى جميله وعبره ..لكن ما خليتو لينا معاكم عصيفير واحد نشارك بيه معاكم .زى ما قال نصار .واهو نصار لقى ليه نكته ظريفه من الحبيبه حنان .. يديها الف عافيه يا رب
لكن اسمحوا لى اشارك معاكم ببعض من الابيات الكتبتها اخيرا .وحتى الان لم تنزل فى اى موقع ..لكنها فيها العصافير
اسم القصيده شمس النهار
شمس النهار..
لو عارفه يا شمس النهار
طلت شعاعك من بدار ..
طوت الظلام كشفت ستار
خجلن فراشاتنا الكتار
طارن بعيد تركن ديار
حزن الورد جف الخدار
والزهيرات النضار
اتلفحن توب الوقار
حتى العصافير الصغار
ا تلملمن سربين وسار
*****
لو عارفة يا شمس النهار
كنتى بدلتى القرار
وكنتى اخرتى النهار
شلتى الصبر والانتظار
رغم الصبر كيفنو حار
حتىالبلوم من عشه طار
شايل الحنين فى كفو نار
خايف الضياع خايف الودار
لو عارفه يا شمس النهار ..
طلت شعاعك البدار..
طوت الظلام كشفت ستار..
اسماء صديق الطيب الجنيد
مسقط
والحقيقه يا انور انا عندى نفس الرغبه ننزل بوست بالعيون .. يلا زى ما قال ليك اخونا كوستا اسرع وان شاء الله نكون من اوائل المشاركين
التحيه لكم جميعا
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
الاخت الاديبة / اسماء
لك التحايا و انتى تشاركيننا هذا المتكأ و المنتدى حول الطير و مكانته فى الاغنية السودانية
و الشكر اجزله على قصيدتك الرائعة " شمس النهار " و التى يتشرف هذا البوست بان يكون له قصب السبق فى نشرها للمتلقى
و الملاحظ يا اسماء استخدامك للطير فى القصيدة مرتين
مرة كعصافير اتلملن سربين
و مرة كبلوم
حتىالبلوم من عشه طار
شايل الحنين فى كفو نار
انا ما عارف ليه البلوم بالذات و معاه القمرى دون الطيور الاخرى لهم هذه المكانة فى الاغانى و فى الشعر ؟؟؟
بمناسبة موضوع العيون فى الاغنية السودانية اتمنى ان تقومى انتى او الاخ انور كنق بانزاله لاهميته و لمكانة العيون فى الاغنية و فى الشعر عمومآ ..... هل نرى ذلك البوست قريبآ ؟؟؟
لك الشكر مجددآ اختى اسماء
و تحياتى لمسقط و للسيب على وجه التحديد ، حيث عملت بها لمدة عامين فى اواخر الثمانينات
و ما زلت اكن لتلك الديار حنينآ ماج فى صدرى
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
تسلم اخى كوستا يا ذوق ..واشكرك على الكلمات الجميله المعبره .. والاشاده بالقصيده ..
حقيقة عن سؤالك عن البلوم
فى راى انه البلوم صوته حنين ودافىء .. وحين تسمع اى بلوم يشدو ..سبحان الله تحس كانه ينشد او يخاطب من يخاطبه بموسيقى لحنه الحنين ..وكثيرا تسمع نبرات حزن فى اصوات البلوم
..
تسلم اخى وسلامك يوصل ان شاء الله لى مسقط واهلها والسيب
والسيب منطقة جميله ولا تبعد كثيرا من منطقتنا الحاليه الخوير
التحيه لك وفرصة سعيده
بالنسبه لاغانى العيون لو لم ينزل الاخ انور البوست ..ان شاء الله سوف انزله فى خلال اليومين الجايه .. وكدى ندى فرصه لباقى عصافيرنا تشدو .قبل ما تجينا العيون بى سحرها وجمالها
ولكم التحيه
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
تسلم اخى كوستا يا ذوق ..واشكرك على الكلمات الجميله المعبره .. والاشاده بالقصيده ..
حقيقة عن سؤالك عن البلوم
فى راى انه البلوم صوته حنين ودافىء .. وحين تسمع اى بلوم يشدو ..سبحان الله تحس كانه ينشد او يخاطب من يخاطبه بموسيقى لحنه الحنين ..وكثيرا تسمع نبرات حزن فى اصوات البلوم
..
تسلم اخى وسلامك يوصل ان شاء الله لى مسقط واهلها والسيب
والسيب منطقة جميله ولا تبعد كثيرا من منطقتنا الحاليه الخوير
التحيه لك وفرصة سعيده
بالنسبه لاغانى العيون لو لم ينزل الاخ انور البوست ..ان شاء الله سوف انزله فى خلال اليومين الجايه .. وكدى ندى فرصه لباقى عصافيرنا تشدو .قبل ما تجينا العيون بى سحرها وجمالها
ولكم التحيه
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
شكرآ اختى اسماء
فعلآ البلوم له صوت رخيم و هو يشدو و بنبرات صوته الفخيم تحس بالحزن و بالدفء و بموسيقى منسابه تدخل للفؤاد من غير استئذان
فى انتظار بوست العيون
هل لك علاقة بالاخوة الفاتح الجنيد الذى كان يعمل فى صحار ؟؟
او لك علاقة بالاخ مصطفى الامين الجنيد الذى كان يعمل بالسيب ؟؟
ام انه تشابه فى الاسماء فقط
تحياتى لمسقط و الخوير و بوشر و حيل العوامر
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
الاخ كوستا
والله سبحان الله ويا لمحاسن الصدف..
انا حقيقة لم التقيك ولكن وصلت البيت زى ما بقولو
الفاتح كان بصلاله وليس صحار ..واعتقد عشان طول المده اعتقدتها صحار
الفاتح هو زوجى ..ومصطفى هو خالى
والاتنين بى خير والفاتح واسرته الصغيره ..نحن لول .. موجودين بالخوير.. ومصطفى ما زال موجود فى السيب
ولك الف تحيه
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
الاخت اسماء
فعلآ يا لمحاسن الصدف
الفاتح الجنيد صديق حميم جدآ و قديم لعمى المهندس الفاتح نورالدين
و الاخ مصطفى الجنيد صديق شخصى و كنا نسكن سويآ فى السيب فى 1986 و 1987
حيث كنت اعمل فى السيب كما ذكرت لك
و فى واقع الامر عندما كان الاخ الفاتح الجنيد بصلالة قمنا باستقبالك فى مطار السيب الدولى انا و عمى الفاتح و الاخ مصطفى و انا لا ازال اذكر ملامحك تلك برغم طول الزمن .... عمى الفاتح لا يزال و اسرته بالسلطنة و لا ادرى هل ما زال يقيم فى الخوير ام رحل ؟؟؟
اسأل عن صلاح داؤد بجامعة السلطان قابوس هل موجود ام تركها ؟؟؟
عمر و عبدالرحمن الرفيق و عبدالرحيم و محمد صديق هل ما زالوا بمعهد التدريب المهنى ام رجعوا ؟؟؟ الاستاذة زينب ابوشوك و زوجها صلاح لهم تحياتى
الاخ مصطفى الجنيد ماذا فعل الزمن به ؟؟ له تحيات خاصة و شوق كتير اها كمان ما تقول لى جمال الدين الماحى قريبك ؟؟؟ و الرجل كان زميل دراسة بالجامعة و هو اخ عزيز و اعتقد انه قد هاجر لامريكا حسب ما سمعت
وده كلو من الطير و مكانته ... و اصبحت له رسالة اخرى و هى المساعدة على التواصل بين الناس فى الغربة
و وصل ما انقطع من اخبارهم
لمزيد من التواصل عنوان بريدى الالكترونى
[email protected]
ديامى
يا ود الديم .. لك التحايا و الاشواق
شكرآ على التصويب
و فعلآ قد قمت بذلك و لك التقدير
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
ودالعم
افقى
واحد قلبه طار و فر : الخواض
راسى
محل سكن الخواض : فتاشه
استاذنا / حمزة سليمان
لك التحية و الشكر يا مبدع
و غالبآ ما تقوم الاخت سوما بتكحيل العيون فى الاغنيه السودانية
بسأل عن اخبار مبدعنا الاخ الماحى سليمان
له تحياتى الغاليه
و لك تحياتى
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
مهندسنا كول
تسلم يا هندسة
و شكرآ على الثناء و المدح
بس لو سمحت عايز لى تلاجة كولدير
من محلاتكم فى شارع الحرية
و حأعمل ليكم دعاية رهيبة على الانترنت بمصاحبة احدى اغنيات الطير الخالدة
اها
انا قصرت معاك يا هندسة ؟؟؟
تحياتى
| |
|
|
|
|
|
|
|
|
|
Re: واحد قلبو محروق علي السودان (Re: KOSTA)
|
الاخ كوستا
لك عاطر تحياتي وعميق احترامي
من هنا وجائي انا حا اشتغل علي مكانة الطير في شعر الحقيبة بقدر ما القي وقت
وابدا بي سيد عبد العزيز
عندو قصيدة طويلة وصل من خلالها رسالة اجتماعية بالغة الحساسية
ووصلها عن طريق القمري
يا غصون الروض الامالك
النسيم الجاك من شمالك
والا صوت القمري الحنين
قمرية قالت للتانية مالك...ما انتي لسة في عز جمالك
ولسة حملك في ضهور جمالك...ونائمة فوق الخدر الامين
قاتليها اقسم يا اختي خايفة...من زماني وما فيه شايفة
الا قلت اخير ابقي عايفة...عوني شرفي ونعم المعين
قاتليها شوفي الزهرة ف.. نداها زابلة عابسة اصفرت يداها
هل هي كانت كدا في بداها
وكيف مصيرها ان طالو السنين
اسمحيلي يا اختي ذاهبة...سوي خدرك دير وابقي راهبة
طال ما انها عاداتنا راهبة...ومين يفكر في موتها مين
قطعن كلامن شافن بلابل...مروا دخلوا الروض المقابل
غنوا قالوا حليل بنت بابل....فيها لينا الشفا والانين
قالوا جمعا كان لينا نية...في الزواج والعيشة الهنية
قبل ما بينا تحل المنية...الا شفنا الشوف اليقين
عادات بتهدم امتن بنية...وخربت بيوت كانت غنية
طلبات لرضوة ام البنية....وتاني طلبات قول لي وين
الف حاجة بحجات قوية
عايزة حزمة ورزمة وشوية
ولسه جاهل الحياة انت وين
واحدة تانية
سوداننا العاجبنا رسمو
في نفوسنا مقدارو يسمو
والطيور غنت باسمو
واسمك يا بلادي
هتفتبو الجنود
وغنتبو السوادي
وفي غني القمري علي الغصون وهي وردت في هذا البوست الا ان تكملتها برضو فيها طير
معاطفه دلال يتمايلون وعوم الوز تقليد مشيه
فريد عصرو الما متلو شي
انا ما معيون
اغني عليها وابدي فنون
افوق الساجعة حنان وجنون
مسوا نوركم
ما جنيت في هواك وما علي جناح
اشتكيت للقمري ولم يعيرني جناح
مسوا نوركم وشوفوا المن جبينا صباح
والصباح ان لاح لا فائدة في المصباح
يجلي النظر يا صاحي
ليك السلام ما غني شادي او رطان
ليك السلام ما حن مفارق الاوطان
انة المجروح
للحب لهيب في الجوف..زي الزناد مقدوح
منو الجبابرة تلين..لصوت بلابل الدوح
وتصاحب النسمات تفضل معاها تروح
بين نغمة الاشواق ومحاسن الممدوح
مداعب الغصن الرطيب
في الروض غني العندليب
ورددوا غناه الطيور
ترتيل اناشيد الحبور
وفتيانها يوم عيد الصليب
ولسة سيد ما كمل
واظن يا كوستا بعد ده ممكن تحول البوست الي دراسة
ولو تفرغت قليلا لاعنت بمئات النصوص المتطيرة
ابويارا
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
الاخ محمد
شكرآ لك على الاعتذار اللطيف
هذا يدل على اصل و نقاء معدنك
و لا يهمك كل ما تلقى نفسك زعلان و عايز تنفّس زعلك ده فى زول بس تعال عندى و كل العايز تفش زعلك منه ارميه على قفاى انا و ما عندك مشكلة باذن الله .. فنحن اخوان و لازم نتحمل بعض
و شكرآ مرة اخرى على المشاركة فى موضوع الطيور برائعة سماعين ودحسن
و لك تحياتى
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
الاخ نزار حسين
تحياتى
انى لك شاكر على تفضلك باثراء هذه الساحة بروائع الحقيبة المعتقة و طيورها الزاهية
و ارجو ان لا تتوقف ابدآ عن الغوص فى هذا المنهل العذب
اها
هاك دى من عبيد عبدالرحمن
باهى الدلال موفور
محجور الخدور
ما هو الخليع وسفور
زاد فى نفورو نفور
وأصبح قلبى فى ايدو
اليمين عصفور
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
أسمعنى نشيدك
ورينى كمان فى الفن تجديدك
يا حمام الدوح
أسالنى أفيدك
عن حالى البى وأحسبنى شهيدك
ولهى ما بفيدك
أبقالى رسول أو خذنى فى أيدك
أترك تهديدك
أسمعنى درر وواظب ترديدك
وين القى نديدك
يا جالى الهم زيد شجوى وأزيدك
عقب تغريدك
يا ساجع الدوح خلينى أريدك
وأًل ليه بريدك
وألأبس روحى يا حمام فى وريدك
لا تخش هجيرك
سافر يا حمام مولاك يجيرك
سارع فى سيرك
لو لى جناح أنا كنت وزيرك
رحماك فى صعيدك
أندب حظى وأدنى لى بعيدك
يوم عيدى وعيدك
يوم الأيام لديارى تعيدك
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
كوستا الحبيب
موضوع شيق للغاية
بس الآستاذ الموصلي سبقني في أغنية طيري يا قمرية
لكن أنا حأقولها كلها
طيري يا قمرية
وركي فوق الزنكي
واتصنتي القضية
الزول الفوق السجن
مسجون بلا جنية
طيارة جات من شندي
فيها ضابطين
والتالت الأفندي
أدونا جردل مويه
نسقي النيم الغربي
******
وتذكرني هذه الأغنية بروعة وحلاوة صوت أخونا الشاعر الفنان الأديب الرياضي اللواء م. ابوقرون عبدالله ابوقرون وهو يصدح بها أيام كان السودان بلداً معافى .
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
في رونق
الصبح البديع
قوم يا حمام يا حمام
اسمعني الحان الربيع
قوم يا حمام حي الغمام
انا لي فيك شوق واهتمام
اسمعني من شدوك صدى
أهو ده الربيع ناضر بدا
ومن الرياض .. يدا
وشاها بي قطر الندا
في رونقا الصبح البديع
صحت الورود في كل روض
وتبسم الزهر الربيع البديع
اهي الطبيعة الكون تحلى بمنظرا
للعالمين سفرك بأحلى مناظرا
من روضى تغني لناظره
أطيارا عائدة "عاشقة" زائره
هي والنسيم
هي والنسيم في مناظرا ترسل حقائق وجوهرة
هي نزهة بل
هي آية من صنع البديع الوديع
قوم ياحمام أنا أنا
حي الغمام أنا
اسمعنى
أسمعني عن تصويرو كيف
هو اية في الجنس اللطيف
وبالأختصار
هو حسن صار فوق الجميع
فوق الجميع
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
امكن لانو الحمام كان زمان شغال بوسطجى ... يطير الحمام الزاجل ويقطع المسافات ويجى بالاخبار .... تعرف أمى الله يديها العافية كلما ترك حمامة فى راكوبتها قلبها يطير من الفرح وتقول أها الليلة أكيد جايينى جواب من المسافرين ... وبعد مالجوابات انقطعت وبقت تلفونات بقت تقول أكيد الاولاد الليلة حيضربو تلفون وتقعد طول اليوم جنب التلفون ما تزح ... ومن هنا امكن اتربط معرفة أخبار الغايب بالطير ... ولانو الطيور ما بتعرف ليها خرطة وجواز سفرها مأشر والاوكى مدقوق يبقى الطيور فى رحلاتها امكن تكون صادفت الحبيب وعرفت اخبارو .... حياة البدو المتنقلة وبعدها الاغتراب امكن يكون زاد من ورود الطير فى غنانا ... يعنى يا كوستا دايرنا نقول شنو, بالله يا ايميل طير تلقى الحبيبة بتشتغل منديل حرير
تسلم يا كوستا على مواضيعك الشيقة
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
امدر
لك تحياتى
دائمآ ما تخجلينا بجمائلك بجلب المواضيع للصفحة الاولى
يوم شكرك ان شاءالله ما يجئ
امتنانى
نورا
تحليل جيد مافى شك لعلاقة الطير بالاغنية السودانية
بس و حياتك اضحكتينى
يعنى يا كوستا دايرنا نقول شنو, بالله يا ايميل طير تلقى الحبيبةLOOOOOOL @ بتشتغل منديل حرير
لك الشكر
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
لك التحية اخي الفاضل ..
اعجبني البوست ..وأسراب الطيور تحلق فيه بكل الحبور ..
مشاركتي ..بأغنية اتمني ان تتعرف العزيزة بيان علي المغني ..فهي تذاع بصورة دائمة في إذاعة عطبرة..وهي من الأغاني القديمة وموزعة توزيع جميل ..من ايام مصطفى كامل عازف آلة القانون المصري ..المنتدب بإذاعة امدرمان آنذاك
ياطيور البان غني لي غني
انثري الألحان وانشدي فني
ياطيور البان آه لو تدري
كيف يكون الحب والهوي العزري
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
انا بنت النيل
تحياتى
شكرآ للمساهمة بهذه الاغنية ذات الكلمات الجميلة
و اتمنى ان نتعرف على المغنى
ملاحظتى هى ذكر" طيور البان" فى هذه الاغنية و لا ادرى هل هى نوع من الطيور ام انها صفة للطيور التى تلازم شجر البان؟؟؟؟
ثم الا تتفقى معى ان نسب هذه الطيور الى البان يعطيها بعدآ ثالثآ لارتباط البان بجمال القوام فى الاغنية السودانية ؟؟؟؟
لك تحياتى مرة اخرى
| |
|
|
|
|
|
|
|
|
|
Re: مكانة " الطير " فى الاغنية السودانية (Re: KOSTA)
|
بسم الله الرحمن الرحيم
أخي الشفيف كوستا
سلااااااااااااااااام
والله مضوع راقي وحلو شديد فالطيور دائماً تجد لها أعشاشاً وأوكاراً في أغانينا
بمناسبة طيري يا قمرية وركي فوق الزنكي أذكر أنني أصطحبت معي صديقي محمود تاور ليغني في قريتنا التي ترقد في الجزيرة الخضراء وبدأ يغني في هذه الأغنية والظاهر عندي خالي غالبو النوم فرسل واحد عشان يناديني ليهو في سريرو وعندما ذهبت قال قول لي فنانك دا ألغنية بتاعة القمرية كان داير تغنيها أمش غنيها في المدرسة ديك نحنا ما عندنا زنكي هنا
لكم التحيات الناضرات
| |
|
|
|
|
|
|
|
|
|
Re: مكانة " الطير " فى الاغنية السودانية (Re: انا بنت النيل)
|
يا حمايم زيدي نوح
روحي في ريدكم دار تروح
يا صاحي وين قمري رحل
قام دون وداع ساب الأهل
في سفرة لا زاد لاعدل
كان هادي من قومت الجهل
في روقة لا نقة وزعل
في روعة زوزة على النخل
وتحته المدين نقط عسل
تعالوا نغني
لما نغني النخلة تشيل تتفدع
ولما نغني القمري الهاجر برجع
نحن في العش صرنا ايتام كالزرازير
فاقدة حن أماتها مين بيعلم الطير
يا صحاب قمري حليلو من زمان فارق خميلو
البكركر رعده ديمه سماهو عكير
السمح مرعاهو لي غنم الهواوير
البليب والقمري جملة أصناف من الطير
| |
|
|
|
|
|
|
| |
KOSTA
woroorrook
الجندرية
adil amin
Elmosley
نصار
أبوالزفت
yasiko
AnwarKing
جدو
elhilayla
THE RAIN
HAMZA SULIMAN
nazar hussien
Fadil
بدرالدين شنا
ابو جهينة
ABU QUSAI
فيس بوك
تويتر
انستقرام
يوتيوب
بنتيريست