بوست لقراء سودانيز أون لاين

Quote: سلام اولا شكرا لاتاحة نافذة للمشاركة اما بعد سودانيزاونلاين منبر جد كبير و بناسو تقريبا هو ملاز للكثيرين مثلي في تتبع اخبار السودان وتقلبات الاحوال يجمع عينة تقريبا تمثل السودان بصورة اقرب للمثالية فيهو البتعامل بالقلم بصورة محترفة جدا يجبرك تتابع كاتبتو وتحترمو وفيهو البخليك تضحك وتستغرب وفيهو البخليك تتحسر وتندم انك قريت كتابتو و فيهو المناضلين الحقيقين وفيهو مدعي النضال فيهو الكيزان عديل وفيهو المتكوزنين وفيهو ناس قريعتي راحت صديق الموج شخصية ظريفة جدا بحسن توظيف الدعابة والتلميح الذكي بصورة مكتوبة بشكل جيد جداً دائما ما يجعلني اضحك مرات بصوت عالي يديهو العافية الرجل بحاول كثير انو يخلق البهجة حتي يديك احساس انومرات ما جادي. بريمه بتجنب اقرأ بوستاتو (فقع مرارة وذكام في المصران) ود الصايم شخصية دبلوماسية جداً جداً له طريقة جميلة في دردقة اللعب من بعيد فقط . دينق رجل قلبو علي السودان الكبير بطريقتو وان لم تعجب البعض ودالباوقة (زول ساااااكت ) صلاح جادات بتاع جاكات .صلالح غريبة ببساطة انسان غريب. محمد سليمان له قوة تحمل كبيرة في خوض الصراع متعدد الاضلاع دائماً ما يصتطدم بقوة مع الكثيرين الذين لا يتفقون واسلوبه في طرح ارائه وكثيرين والله الواحد بستمتع للخالص بكتاباتهم ومداخلاتهم اما بكري ابوبكر كبيرهم الذي علمهم السحر بتاع ناسات رسلت ليهو ما يقارب الالف طلب اشتراك والله في الاخير بس داير منو فقط رد برفض الطلب حتي دا ما قبل يكتبو حيرنا والله بقصة تزكية ولا توصية دي. لو الشغلة دي ممتمسك فيها لدواعي لامن وسيكورتي المنبر المنبر ملئ حد الطفح بالكيزان ومنسوبي الاجهزة الامنية ولا لو الشغلة اختيار نوعي للحفاظ علي صفوية المنبر فالمنبر له حظه من النوعية التي بوضوح لكل قارئ وعضو تقدح بقصة منبر صفوي دي دا ما تقليل لشأن احد لكن التسمية السليمة هو منبر للسودانين بكل اطيافهم و تبايناتهم واختلافاتهم نحن الذين نعيش خارج البلاد هو قبلتنا للتواصل مع اشيائنا حاجاتنا طريقتنا الخاصة في ممارسة سودانيتنا هذا ما نحنو اليه ونجده بصورة ما في منابر الاسافير اما اذا صاحب الحوش الراجل خايف التهكير فبرضو المنبر ما سلم من عدم حصولنا علي العضوية فيه المهم تشكر يا امير باتاحتك لنا فرصة الكتابة الجانبية عموما نتمني انو المنبر دائما لقدام والشباب ينتجو المعارف فنحن نتعلم ونتالم وانشاء الله سودانا يتطور ويتقدم و شعبنا ينعم بالخير والرخاء فالناس تعبت تعبت وبعاينو لقدام انو الشغلة دي خلاص دايرين حاجة تانية ابو امنة