|
|
|
 Re: كِرتِلّة عوض الله .. (Re: محمد الجزولي)
|
العماد عبد الله :
مرة بت عاملة لي حلوووة وكده ايام الجامعة ..
قلت انزلا ليها واااطة جيت وقفت ليها وعاينت ليها كدااااا وقلت ليها :
إنتي عاملة فيها حلوة ؟؟؟ ياخ انا لو لقيتك في كرتلة بقطع الأسد .. و هاهاهاهاها قعدت اضحك نظام حددتها معاها ..
والله يا الغالي ومااا طالبني حليفة لا فهمت لي الكرتلة شنو ولا فهمت لي الأسد منو ..
ورجعتي ادراجي اجر اذيال الهزيمة ..وهي لحدي اسة حلوة وانا يااااني لحقت عوض الله ده ..
| |
 
|
|
|
|
|
|
|
|
Re: كِرتِلّة عوض الله .. (Re: عمر الفاروق)
|
| Quote: ياخ انا لو لقيتك في كرتلة بقطع الأسد |
وااااااااااااااااااااك ..
أحييييييييييييي يا كراعي ...
.....
بالله عاينت ليك سُحتاً سُحتا ؟؟
تعال يا عمر بي جاي .
أبو كده زاتو ياخ .
| |
|
|
|
|
|
|
|
|
|
Re: كِرتِلّة عوض الله .. (Re: Emad Abdulla)
|
عندك المحن
خطرى لكن...
عندى قصة مع الكرتله ما بتتقال هنا...بتشيل الحال
و الحال حالو حال الظروف الزمانية و المكانية ممنوع من الصرف...!!
ياخى..
سلاااام كتير...و تلفونك دا حقو تعملو فى كرتله..
| |
|
|
|
|
|
|
|
|
|
Re: كِرتِلّة عوض الله .. (Re: Ishraga Haimoura)
|
ما بلقي عندك او عند عوض الله و بالعدم شوف عثمان النو صوره لى سكج بكج ?
بالله هو في كرتله اكتر من حياتنا دى ... العجيبه كل واحد عامل فيها قاطع أسد عمر الفاروق داك ... و في الآخر كلهم يطلع ليهم فار او يطلعو هم فارات ..
عشان تعرف ليه اسهل الزول يبقي سلفي - مش بمعناها الدينى و بس - لكن طالما الحاضر بيض مزوبر فلنعد للسلف الكرتلوى ...
يا صاحب ... انا قطعت الدامه ... تعرف طلع لى شنو ?
اقول ليك و لا ما محتاج لى فونقولوت و لفخك لفخك
| |
|
|
|
|
|
|
|
|
|
Re: كِرتِلّة عوض الله .. (Re: esam gabralla)
|
نسيت اقول ليك ... في كرتله سابقه قطعت المصباح المنير ... و فزت , خاتيهو فرحان قمر صاحب فوق راسي ... لما جات لحظة خروج الجان من جواهو .... ندمنى على فرحتى و سففنى التراب
الله لا كسب اى كرتله و لا غزا فيها بركه
....................
لووول .... الليله حتترصد هنا اى حاجه "قديمه و سمحه" .... لحدى اجدادنا القدماء ... بلد فقر و وهم و بيض فعلآ ...
و صدقت البنية:
هاو بيزار .. إت واظ فن .. أونستلي
| |
|
|
|
|
|
|
|
|
|
Re: كِرتِلّة عوض الله .. (Re: esam gabralla)
|
إنت يا عصام ما تقطع شي ..
حظك بيض .
أعمل كرتلة براك .. و أقطعها كلها .
.....
سلفي شنو يا صاحب .. هو في سلفي أكتر من العلينا ده ؟؟
كلو مُبَشّق .
أنا لو منك أقعد أتزحلق في التلج .. و بس .
تزحلقوا يا اولاد اللزينا .
| |
|
|
|
|
|
|
|
|
|
Re: كِرتِلّة عوض الله .. (Re: Ishraga Haimoura)
|
.........
كا.....كرتلة..
كرتلة و توتو كورة...
عليك أمان الله...يا عمدة انت قديم ,قدم ثورة 24
بس عجبتني كرتلة مختومة ومبرشمة..
التقول عليها الشمع الاحمر.......
بس و الله يا حليل زمنها...
هسي الحكومة دي ما يختوها لينا في كرتلة...!
شكرا ليك و لي عوض الله
وكـــــــــــــــــــــــــــا كرتلة..
....
| |
|
|
|
|
|
|
|
|
|
Re: كِرتِلّة عوض الله .. (Re: Ishraga Haimoura)
|
عارف يا عماد عبد الله
ألذ حاجة كانت في الكرتلة المحاولات المستميتة من الجميع لمعرفة الصورة خلف الدائرة الظهرية ديك
تصور في بعض الجنسيات في جدة شغالين كرتلات بطريقتهم الخاصة جدا
نحن من زمن الصورة دي والآفرو (الخنفس)
| |
|
|
|
|
|
|
|
|
|
Re: كِرتِلّة عوض الله .. (Re: Ishraga Haimoura)
|
| Quote: هي الكرتلة دي شنو؟؟؟ |
أعضيك يعني وللا أعمل شنو أنا مثلاً ؟؟؟
الكرتلة دي زي قمار قمار كده كنا بنقسم بيها الحبيبات ..
الجايزة مثلاً تكون " ماجدة أم قدوم " .. تقوم تقول داير الجرادة و تقطع بي تعريفة و يكتب عوض قعونجة اسمك تحت صورة الجرادة ..
كل العالم التلاتين نلف عليهم .. كل زول يقطع و يكتب اسمو تحت الصورة الدايرا .. و الجايزة ماجدة أم قدوم ..
نظام انتخابات متقدم و مضمون و مبرشم .. أخير من هيئة مولانا أبيل الير دي .. و أنجض .
بعد نتم التلاتين " قاطع " يقوم عوض قعونجة ( اللي هو في محا رفع مولانا أبيل ) يقوم يحك الدورانية الظهرية البين الأسدين دي ..
تطلع الصورة الفايزة مثلاً بتاعت الجرادة الأنتي قطعتيها قبيل ..
طوالي تمشي تكبي الحبكانات لماجدة أم قدوم .. و غصبا عنها لازم تحبك وللا عوض قعونجة يدقها - كنا ناس حمشين زمان .. بندق الحبيبات العاصيات -
....
بيني وبينك .. أخير الجايزة تكون كورة ..
يا كمان علبة عسل أبوأسد لامي فيهو الضبان داك .
ماجدة دي كان قدومها كبير خلاص .. و يدها قوية ياخ .
لاكين طيبة .
| |
|
|
|
|
|
|
|
|
|
Re: كِرتِلّة عوض الله .. (Re: محمد عثمان)
|
| Quote: و الشفع و الشافعات الزملا و الزميلات |
ديل يا سيادتك بالكوم عندنا بي جاي ؟! اها الكرتلة خليها ياربي بعرفوا البستلة ؟؟؟؟ والا شافوا دكان اليماني خدمة 24 ساعة تدق
ليهو انصاص الليالي يفتح ليك بالشباك الصغير في زاوية الدكان ، والا شافوا الطحنية والجبنة ملفوفة بي ورق الجرائد والزيت بالرطل
من صندوق الخشب الجواه الصفائح ........ مرة راجعين من المدرسة لقينا اب قرشين (فريني) واقع بنتشاكل فيهو زي 3 ساعات لانو الشافوا
ما قال شريكي الله والرسول ......... في النهاية مشينا الدكان فكيناهو تعاريف .........
| |
|
|
|
|
|
|
|
|
|
Re: كِرتِلّة عوض الله .. (Re: محمد عثمان)
|
محمد عثمان يا صاحبنا ..
ياخ إتجدع .. دفق أي شي .
هو غير الغتغتة دي شي فنقلنا مافي ..
أديها موية يا برعي .
......
أبوحميد .. لفخت تلفوني بالحيطة - للمرة التالتة -
معليش .. يرجع الحال ( عاااااادي ) نقوم نشتري واحد تلفون و نديك واحد ألو .
| |
|
|
|
|
|
|
|
|
|
Re: كِرتِلّة عوض الله .. (Re: Yassir Tayfour)
|
حبيبنا عماد عبدالله
والله ذكرتنا زمن جميل
طبعا دي المقاس الصغير في واحده مقاس كبير فيها مية صورة تقريبا
في مرة من المرات اثناء اليوم الدراسي تلميذ يحمل صندوق بسكويت يقرع باب الصف الخامس شمال الاستاذ يقول ليهو عايز شنو التمليذ قال ليهو عايز فلان الفلاني قال ليهو لي شنو قال ليهو فاز معانا في الكرتلة
الاستاذ يقول ليهو تعال ارقد ويرقد الطالب ويجلد خمسة سيطان زي الترتيب وصدقني مافي واحد تضامن معاهو بالرغم من ان معظم الفصل كان مشارك في الكرتلة كاااااااااك
بعد الاستاذ انتهى من مراسم الجلد الولد نسى البسكويت قال ليهو تعال شيل عفنك لعبكم ده اعملوهو في الفسحة
تحياتي
زاتوووو
| |
|
|
|
|
|
|
|
|
|
Re: كِرتِلّة عوض الله .. (Re: mohmmed said ahmed)
|
عارف ياعماد يا اخوي
انا كنت بقول بلدنا دي بلد سيريالية ..!!
لكن بعد شوفي لي كرتلة عم عوض الله
الرجعتني زي عشرة سنين لي طفولتي الحلوة
وزمن الكرتلة
عرفت انو ناسنا ناس حنان
حافظوا على بلدنا ورحعوها لي زمن الكرتلة
وبفت بلدنا بلد كرنلة
تمشي في الشارع حتى ولو في نمرة اتنين
يلاقيك فار وديك معاهم بقرة
ماااكرتلة
ابوالجعران معاه فيل
وحكمة ربنا تلقى ناس راكبين الفيل زاتو
ما كرتلة
الشارع السواقة فيهو زي البلعب في بليي استيشن
تلقى كدامك دفار وركشا وكارو وزول مهود وغنماية بتتحكا في الصينية نص الشارع
ما كرتيلا
كرتلة عوض الله
| |
|
|
|
|
|
|
|
|
 Re: كِرتِلّة عوض الله .. (Re: محمد سنى دفع الله)
|
السنى دفع الله،،
كلامك حار و كلو شوق و حنين،
و كف على كف و ...
عجبى عليك يا بلد،
لكن أعذرنى ما قدرت افوت دى،،
Quote: الرجعتني زي عشرة سنين لي طفولتي الحلوة
وزمن الكرتلة |
طيب إحنا العشر سنوات حضرناها،
كرتلة الهنا دى ما شفناهاليه؟؟؟
و نرجع تانى من الاول،،،
غايتو يا عماد عبدالله،
غلبنى أسأل،
أنقذتنى إشراقة حيمورة كتر خيرها،
لكن بعد الشرح المستفيض دة،
إنتو الكرتلة دى ما بلعبوها بنات برضو؟؟؟؟
ياااااى سوفاج،،،،،،
إحتراماتى للكل،،،
| |
|
|
|
|
|
|
|
|
|
Re: كِرتِلّة عوض الله .. (Re: Hala Hassan)
|
يا عمدة
كتر خيرك رجعتنا لزمن جميل أو كنا نراه هكـــذا
ده بوست مجنون .. تدهشنى الكتابة بهذه الكيفية ..
ترجنى وتدلف بى الى عوالم حميمه وساحره ....
رائع ... انت
| |
|
|
|
|
|
|
|
|
|
Re: كِرتِلّة عوض الله .. (Re: عزام حسن فرح)
|
هوووى يا جلاكين
ما تغشو الناس ديل ساكت ... اى نعم زمن كان اسهل من الان , لكن القبح و الغيلان الحايمة دى جات من القمر ? ما ياها ولدتا البلد الكرتله دى ..
اى جيل في اى بلد بيكون شايف حياتو كانت احسن و ألذ حياة ... خاصة مقارنة مع الاجيال اللاحقه ليهو , يعنى ياسر طيفور ده لو مسك اى عجوز امريكى حيقول ليهو " زمننا ياخ كان الهامبرقر بنشيلو بالشاحنة , و (.........) زيك كده ما كان بيقدر يسألنى ... الدنيا باظت يا مان"
و حيجي زمن تانى يدور فيهو حوار كالتالى:
- ياخى ده ما بيعرف البلاى ستيشن , قال ما سمع بيها زاتو, ده ما مشي متاحف و لا شنو ?
- بلاى ستيشن ? ياخ ده قال انو كان في حاجه اسمها ويندوز و مايكروسوفت زاتهم ما سمع بيهم .... من أين اتى هؤلاء ياخ ...
سيناريو تانى ... اقرب للتحقق و بدون كرتله:
- تتخيل يا مايكل انو سامى ما عارف انو هز قراند قراند با كان راجل مشهور اسمو المك تايقر ...
-يا سام ده ما عارف حتى انو اصلو سودانى ... قال ما سمع انو كانت في دوله "عظيمة" اسمها السودان , لما جبت الخريطه و وريتو انو العشرين دولة ديل كانو اسمهم السودان ... اوووه إت هيرتس وين آى ثنك اباوت أور قريت انكسترز .... شييت
- تعرف انحنا مشتركين في القراند قراند با ماك تايقر , لكن اكبر واحد في جدودك اسمو منو يا مايك
- هز نيم واظ العباس .... هى واظ أ قريت مان توووو
- خلاص انسي يا فرده .... سي يو ليتر في الصنداى برايرز
- انا ما حا أجي ... جايينا ناس حبوبتى نعمل قراصه و يعلمونا نيو قيم من إرثناالسودانى العظيم ... اسمو الكرتله
- أوكى باى
- باى
و كل ده لا يعنى انى ما اتكيفت لمنظر الكرتله و صورة الدبايب ديل و نخجات عوض الله و رجفة نخرتو و زغبيرة عماد
| |
|
|
|
|
|
|
|
|
|
Re: كِرتِلّة عوض الله .. (Re: Hala Hassan)
|
ياهالة
الفريني
هو عملة معدنية اصغر من القرش في حجمه ومضاعف له في قيمته لونه فضي والقرش لونه نحاسي
ويسمى ابو قرشين لاحتوائه في قيمته لى قرشان
يكنى كل من صغر حجمه بالفريني
في الابتدائي كان المصورف اليومي لي واخي مبلغ خمسة قروش ( شلن ) اي واحد فريني ومعاهو تعريفة
كان ساندوتش الفول بي قرشين ( طارة كاملة ) يعني عيشة مدورة كاملة ونصها بي قرش والتعريفة للتحلية
اذا حبينا نفرط في التحلية ناخد نص ساندوتش فول او نتشارك نعمل فتة اي واحد نصيبو قرش والقرش ونص نستمتع بيهم في الحلاوة ودقة القونقليز او الداندرمة او اي نوع من الحلويات العديدة
يوم يكون عندنا ماتش في الدورة المدرسية كنا بنفطر بي صينية زي بتاعة الاساتذة ومادراك ماصينية الاساتذة كانت تحتوي على الاصناف الاتية يوميا
فول - طعمية - سمك - كبدة - جبنة - بيض - طحنية - مربى
عند دخولي المتوسط كان فطور الاساتذة عبارة عن صحن فول مضافا اليه علبة ساردين عشان كده في المتوسط الكورة بتاعتي فكت
تحياتي
زاتوووو
| |
|
|
|
|
|
|
|
|
|
Re: كِرتِلّة عوض الله .. (Re: ALZOLZATOO)
|
يا زااتووو،
شكرا على الشرح الضافى،
و لو إنو فى حاجات كدة من باب المعجزات ، و لو إنو مصدقاك طبعا،،
Quote: يوم يكون عندنا ماتش في الدورة المدرسية كنا بنفطر بي صينية زي بتاعة الاساتذة ومادراك ماصينية الاساتذة كانت تحتوي على الاصناف الاتية يوميا
فول - طعمية - سمك - كبدة - جبنة - بيض - طحنية - مربى |
و فى رأيى الحكاية دى ممكن تنفع تحل مشكلة المترجم المزعلة مامان بهناك،
و ليه حق طبعا،، و إستبدال السؤال بـ:
ما الشبه بين صينية الاستاذ (فى السودان ) زمان و بين الديناصور،
الإجابة:
الإثنين إنقرضا،،،
يعنى داك كان استاذ،
و ديل حسه اساتذة برضو؟؟؟
بالجد الله يكون فى عونهم،،،
طيب شلن و قرش و تعريفة ديل أنا فوتهم،
لكن متأكدة الجماعة فى المكتب مع عماد ما ح يقدروا يفوتوها،،،،
| |
|
|
|
|
|
|
|
|
|
Re: كِرتِلّة عوض الله .. (Re: Emad Abdulla)
|
دى ام تلاتين يا عماد
بتكون فة اول الإجازة
انا شخصيا كنت شغال "ركيب"
ركيب نمرات
مجالى كان "دق الدركسونات"
دركسونات العربات اللساتكا من السفنجات القديمة والصندوق يا جالون شل ولا كمان كان بقت صغيرة شويه، علبتين "جيتانا" بكفن
ومعاه مهنة هامشية تانى، على جنب كده يعنى
اللى هى بيع "خنزير النبل" وخسوسن "الخنزير اللحمر" عشان كنت بجيبه من الخرطوم
ببراى سيد الكرتلة والجماعة بشاورونى وانا استشارى كبير، زى ما بتخيل ليهم
يا زول اكطع "الكفر" اصلو ما بجلى
لا لا اخير لى القزازة
ما عارفا بتاعة شنو
لكين غالبا بتكون "فابريقة النيل الأزرق"
ولا اقول ليك
اكطع "الفرار" طوالى قاعد يضرب
قلت ليك ام تلاتين دى اول الإجازة
وبعد كم كرتاة الجماعة بستثمرو فى الكرتلة "أم ميه"
شكلها زى "الفوجة"
بتعرف الفوجة يا عمدة ؟
الكلام ده طول ياخ
| |
|
|
|
|
|
|
|
|
|
Re: كِرتِلّة عوض الله .. (Re: أبوذر بابكر)
|
شخطك بختك
بخت الطوخي
و البسكويتا يقسموها الى اربع
و كل ربع يلف في ورقة صغيرة
وفي كل عاشر بسكويتا صغيرة
يكتب عليها بالداخل بسكويت كوكو
او حلاوة ترتار او اي حاجة
فتكسب الحاجة المكتوبة
ودا كلو يباع في الطبلية
| |
|
|
|
|
|
|
| |
Emad Abdulla
محمد الجزولي
عمر الفاروق
Ishraga Haimoura
هواري نمر
جعفر محي الدين
omer osman
Yassir Tayfour
ALZOLZATOO
mohmmed said ahmed
محمد سنى دفع الله
salah awad allah
عزام حسن فرح
عمران حسن صالح
أميرة فاروق عبد العال
محمد عبد الماجد الصايم
أبوذر بابكر
فيصل محمد خليل
فيس بوك
تويتر
انستقرام
يوتيوب
بنتيريست