الدفعة 45 كلية الشرطة .. فرش متاع , و كثير حب ..

مرحبا Guest
اخر زيارك لك: 03-19-2024, 04:01 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مكتبة عماد عبد الله (Emad Abdulla)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
06-26-2008, 04:44 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
الدفعة 45 كلية الشرطة .. فرش متاع , و كثير حب ..


    ( 1 )

    فتاح يا عليم .. رزاق يا كريم ..
    كنت في اللحظة التالية وجهاً لوجه و محمد حسب الرسول .
    اللواء شرطة / محمد حسب الرسول
    ........
    لأكثر من ربع قرنٍ ما رأيته , لم أستبن ملامحه و هو يتكيء على طرف الشاحنة الصغيرة .. قامة ربعة ممتلئة و جلباب , ملتفتٌ إلى الجانب الآخر من الطريق كان , و الدنيا صباحٌٌ رأيت فجره الوليد فقط قبل أقل من ساعتين , أسلمت بعدها جسدي المنهك للفراش . و ها يفاجأني أهل البيت بزائرٍ غريب أصر عليهم أن يوقظوني و إلا فعلها هو بنفسه و انتزعني من الفراش !!!

    و بعدين في هذا الصباح ؟!!
    إلتفت إليّ و أخذني بين ذراعيه شاتماً بعشرات الكلمات تتخللها ضحكته التي أحب , كنتُ نعساً .. لكن الصوت طرق اذني أليفاً ودوداً حميما .. محمد حسب الرسول ؟؟ ..
    ضحكنا .. ضحكنا كثيراً و نحن نتمايل واقفين ( متقالدين ) .
    رجلان ما التقيا منذ ميعة صباهما , فيلتقيا .. في منتصف العمر , و كأنما لم يعبرهما الزمان بكلكله و صروفه و حاله العجب .. يحتضان بعضهما و يسبان و يمارسان ذات الحميمية بذات النزق المجنون و ذات المشاعر التي التقيا عليها طالبين في كلية الشرطة الدفعة 45 , في عامٍ قديمٍ يعود لأوائل ثمانينات القرن الماضي .

    تحدثنا كثيراً .. تحدثنا في كل شيءٍ و عن أيما شيء , في ربع ساعةٍ من الزمان أهرقنا دم الذاكرة المعبأة بسنواتها سفيحاً و نحن متقابلين .
    عن الرفاق و التعلمجية و صف الضباط و الضباط و القادة .. الزملاء الذين ما يزالون " في الخدمة " و اولئك الذين أصبجوا مدنيين .. عن مَن قضى و توفاه الله و عمن مرض و عن و عن . أضحك من نونتين ما كانتا له , و شيب غزا شاربه و بعض صلعٍ و كريشةٍ صغيرة , و متانة في بنيته التي أذكرها نحيفة بالكاد يسترها قميص ( الطلبة ) و تستعيد صلابتها في البدلة البوشيرت و التيونك .. و حتى في لبس تلاتة . و ظل هو يسخر من شلاضيمي و حال الكرمشة الذي زحف عليّ .
    عرفت منه عن كل ( رفاق السلاح ) لدفعتنا .. طفق يتصل بكل من صادف رقم هاتفه مسجلاً عنده .. يا الله .. تحدثت من هاتفه مع صلاح ميرغني عبدالرحمن : أشقى أشقياء تلك الدفعة الغريبة المتميزة .. جاءني صوت صلاح فما أستأذنني و بادرني هجوماً في سخريته المميزة و أنتهي بـ : إنتو وين ؟؟ هسه جاييكم . فجاء ذات صلاح العاصفة .

    كنتُ و صلاح من طلبة السرية الثانية .. بينما محمد في السرية الاولى . صلاح كان يحتل الفراش العلوي .. في الأسفل منه كان محمود قاسم , بينما احتللتُ السرير الذي يجاورهم .. كامل العنبر كان مكوناً من مجموعة أسرة حديدية Double bed , شغرناها و لم نبلغ العشرينات من عمرنا حينها .. مراهقين جاؤا بنا بشعورنا الآفرو فجزوها لنا .. صلاح كان وسيماً و اكثرنا تحسراً على قفة الشعر التي ظل يختال بها علينا منذ المعاينات الاولى لنا و الكشوف الطبية .
    محمد حسب الرسول كان على النقيض , ضحوكاً كتوما .. يجيد الإستماع , بعينين صغيرتين كصقر .

    تذكرت فلتان لسان صلاح ميرغني حين تقدمنا للفحص الطبي , وقد كانت معنا بعض الزميلات المتقدمات للمعاينة الطبية .. أجملهن فاطمة .
    و يستدعي ذاك الكشف الطبي اللئيم الخضوع لبلاويٍ ما انزل الله بها من سلطان .. لينتهي أي كشفٍ منها بنقصان الدفعة و قصر القائمة المجتازة .. و كان ذلك منهكاً لأعصابنا .. فلم نكن نعلم بنتيجة الكشف إلا حين الكشف الذي يليه . و استمر هدر الأعصاب ذاك لأيامٍ طويلات .
    أحد تلك الفحوصات استدعى أن يقوم الطبيب بالكشف على أجهزة الجسد الحساسة و هو يضع يده حيث يجعل ( شعر جسمك يكلّب ) .. آمراً لك في صرامة : قُح !! .. فتقُح .. !!
    و كنا نستظل بأشجار المستشفى كلنا .. من دخل فكح , و من ينتظره ذاك الكشف الفاضح و الذي ما زلت لا أعرف لمْ هو . و كنا بألسنة طوال لاذعة و لاسعة .. مَن خرج من عند ذلك الطبيب سألناه في خبث المراهقين : قححوك ؟؟
    حتى جاء دور فاطمة السمحة .. فدخلت و انتظرنا . خرجت من عند الطبيب صامتة .. همس صلاح على إثرها : فاطنة قححوها .

    محمد حسب الرسول كان هادئا .. طلق الوجه .. لكنه يحتبس داخله جناً أحمر .. ولذلك قصصٌ و قصص ..
    ( فيا سعادة اللواء .. أحتفظ لكم ببعض الذكريات التي قتلتني ضحكاً مع أعمامنا التعلمجية و داخل قاعات المحاضرات و في الداخليات و ميادين التدريب , و لن أنبس ببنت شفة عنها إذا ما رشوت صمتي بمأدبة عشاء كاربة و جلسة عامرة غناءا و حكايا و ذكريات , و إلا .. فلساني بالتضامن مع العميد أحمد السيد مكاوي , و العميد كبوش , و العميد أحمد الباهي , و العميد إبراهيم عثمان .. كلهم على أهبة الإستعداد لدعمي بالتذكر .. أو , فليرجو هم ذاتهم الراجيهم ) .

    دفعة 45 كلية الشرطة ..
    إسترح .
    عشرة دقيقة صفا .. و سأعود .

    إنصررررررراف .


    (عدل بواسطة Emad Abdulla on 06-26-2008, 04:49 AM)

                  

06-26-2008, 04:53 AM

ALGARADABI
<aALGARADABI
تاريخ التسجيل: 12-30-2004
مجموع المشاركات: 5236

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    با عمدة
    ياحليلك
    دفعتك لواءات
    نحنا لسة ملازمين أوائل
    وياسر حسن عثمان ده لا شوفتو لا بعرفو
                  

06-26-2008, 05:01 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: ALGARADABI)


    Quote: ياحليلك
    دفعتك لواءات

    عمر يا لعين ..
    أنا زاتي إتهجمت .. !!!
    و بقيت في التخارجني من الرجال الكبار ديل ..
    المهم إني كنت أصغر الدفعة ( خلي واحد فيهم يجي يغالط ) .



    ....
    طالما براك جبت السيرة ..
    فإنت كنت " الألفة " علينا في الخرطوم الجديدة لثلاث سنوات متواصلة ..
    و قد نلت ذاك الشرف عن جدارة ..
    لكبر سنك و إحترامنا ليك .


                  

06-26-2008, 05:10 AM

حنين للبلد

تاريخ التسجيل: 06-04-2003
مجموع المشاركات: 4796

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    عمدة

    جينا ندي التحية العسكرية

    وللخلف در

    تصبح على خير
                  

06-26-2008, 05:22 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: حنين للبلد)


    حنين يا صديقتي ..

    يديكي العافية ..
    خليكي قريبة .
    إنصراف .


    .....
    التحية لصاحبي هناي ..
    و ليك شوقة أيها المتصفح .


                  

06-26-2008, 05:25 AM

حنين للبلد

تاريخ التسجيل: 06-04-2003
مجموع المشاركات: 4796

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    تمام



    يافندم
                  

06-26-2008, 05:28 AM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    يا سعادة اللواء
    باعتبار ماكان ح يكون
    لولا حركاتك التي اودت بك
    الى { الكلية}
    واودت بنا الى حكايات
    ومتع
    وفرش متاع
    يا بتاع

    وبتاع دي لانك
    هناك في البيت المسكون
    بالحلوين
    حاولت {تغطينا} بشملة قدها رباعي
    لكن {تغطيتك } كانت أقرب للإفتضاح
    يا { تأار *}

    عشان كده حاولتك بتلفون نهاري
    لقيتك مقفل السكك
    وكان المتصفح هناي اعصف الايمان

    غايتو
    بتابعك هنا عشان محتاج لمتعة خاصة
                  

06-26-2008, 05:41 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: أبو ساندرا)


    يا كبير ..
    سعادة الخير صباحك ..
    Quote: لولا حركاتك التي اودت بك
    ربك كريم علينا كان ..
    و البركة في ( وادي عبقر )

    شملة كنيز بتغطي - كان النفوس إتطايبت -
    و .. ( هزمنا الليل ) .


    ....
    يا باشا ..
    التلفون نقفلوه ..
    و الراس نصلحوه ..
    و الليل نجضموه ..
    و .. أريتو يشبه أبوه .

    ( فيصل عباس جاي الليلة .. فإنتظر واحد هاللو ) .


                  

06-26-2008, 06:56 AM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote: و .. أريتو يشبه أبوه .


    ما أظن

    فهمو كثر


    Quote: ( فيصل عباس جاي الليلة .. فإنتظر واحد هاللو ) .


    ورشيدة راجعة الدوحة بكرة الجمعة او السبت اللي بعديها
    شفت حكمة الله بالغة كيف
    ؟

    المهم ماتنسى الكتاب المطلوب

    Quote: كان النفوس إتطايبت


    ده الفضل
    عند أهل الفضل

    النفس الطيبة

    والروح القدس

    يا شنبو
    عارف اليوم في كم شيطان ومارد مرو على رأسي ده
    أحياء وأموات
    هاك وانت عد وأحسب
    وأعمل لصاحبك حساب

    كلهم جوني
    زرافات ووحدانا

    معلم نون
    طارق ساردينة
    صبري عيون
    اسطى موت
    قرصان
    احمد ناجي
    اسامة بحر ، وده جاني عدييييل ، بخشم الباب
    عثمان عيسى* ، ده تاوق ومشى
    مصطفى شوقار
    احمد خمارة *،، ده برضو ، تاوق ومشى ، حسيت بيهو بيندهني
    محجوب ودالحرام


    * الفاتحة على روحهم



    يا عماد
    أكتب عنهم
    في حكايات الديم الغميسة

    وسيبك من حسين ملس
                  

06-26-2008, 05:44 AM

حنين للبلد

تاريخ التسجيل: 06-04-2003
مجموع المشاركات: 4796

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote:
    حنين يا صديقتي ..

    يديكي العافية ..
    خليكي قريبة .
    إنصراف .


    .....
    التحية لصاحبي هناي ..
    و ليك شوقة أيها المتصفح .


    ياجنابو

    جهجهتنا

    انصراف

    ولا خليك قريبة

    ..........
                  

06-26-2008, 05:55 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: حنين للبلد)


    Quote: جهجهتنا
    يعني بقت عليّ أنا الحيطة القصيرة ؟!!
    ما هو أبصلعة مجهجه حناننكم زاتو ..
    و جارين واطي !!



    ....
    حنين ياخ ياسر و أبو الشوش ديل حاقدين ..
    أردميهم ثلاثاً قبل صياح الديك .


                  

06-26-2008, 06:03 AM

حنين للبلد

تاريخ التسجيل: 06-04-2003
مجموع المشاركات: 4796

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote: يعني بقت عليّ أنا الحيطة القصيرة ؟!!
    ما هو أبصلعة مجهجه حناننكم زاتو ..
    و جارين واطي !!



    ....
    حنين ياخ ياسر و أبو الشوش ديل حاقدين ..
    أردميهم ثلاثاً قبل صياح الديك .


    والله ديل كان ردمتهم مش ثلاثا لو ردمتهم طوب مابخلوا البسووا فيه ده...

    أبصلعة جهجهة الطب والطبيب...لمن انحنا..


    القال ليك منو جارين واطي؟؟؟؟؟؟؟

    دي اشاعات مقرضين

    تاني شيء الردم الثلاثي ده فترت منه.....سويتها قبل ده...مالك علينا تاني




    عاين

    انصراف

    ولى

    خليك قريبة

    حدد عشان شغلنا فضل ليهاربعة ساعات...
                  

06-26-2008, 07:15 AM

حيدر حسن ميرغني
<aحيدر حسن ميرغني
تاريخ التسجيل: 04-19-2005
مجموع المشاركات: 24559

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: حنين للبلد)

    عمدتنا

    اريتا عسكورية السرور حقتنا دي


    Quote: و يستدعي ذاك الكشف الطبي اللئيم الخضوع لبلاويٍ ما انزل الله بها من سلطان


    اخير نحنا

    حكى لي مصري عن الكشف عندهم ... (إنا لله .. على قولك)

    كشفهم برضو فيهو كحة .. تتسمع فى اقرب موقف المواصلات للقيادة

    وبطلعوها ليهم من حتة عجيبة

    ابوساندا تم الباقي
                  

06-26-2008, 07:15 AM

الشفيع عوض شوشتا

تاريخ التسجيل: 10-24-2006
مجموع المشاركات: 1655

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: حنين للبلد)

    العمدة
    صاحب الحكايات الحنينة


    (تمام يا افندم)



    وهتف
    (إنصراف)
                  

06-26-2008, 05:25 PM

rosemen osman
<arosemen osman
تاريخ التسجيل: 06-06-2008
مجموع المشاركات: 2916

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: الشفيع عوض شوشتا)

    Quote: رجلان ما التقيا منذ ميعة صباهما , فيلتقيا .. في منتصف العمر






    منتصف العمر
    وجه مبتسم بخبث
                  

06-26-2008, 08:40 AM

دينا خالد
<aدينا خالد
تاريخ التسجيل: 06-26-2006
مجموع المشاركات: 8736

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: حنين للبلد)

    وووووووووووووووووووووووووووو

    يا عمده 45 دى الحرب العالمية الاولى كان ما اخاف الكضب !!!

    وانت متصور تلقى بقية باقية من الدفعة دى هنا ؟

    حولااااااااااااا

    ديل لو فى اصبحوا فى عداد المتصفحين ،، وارباب المعاشات ،، والملتحفين الشمال

    عديمة الوالى اسمها ,,,,


    اخد راحتك واتجدع زوووووووووووول هنا فارزو ليك مافى !

    احكى احكى

    وامنع الفوضى !

                  

06-26-2008, 09:03 AM

محمد عثمان

تاريخ التسجيل: 11-10-2006
مجموع المشاركات: 6534

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote: دفعة 45 كلية الشرطة ..


    عماد..

    سلااام

    افهم يعنى دخلتو كلية الشرطة 1945
    ولا يعنى شنو..؟؟

    ايوا يا دوب وقع لى...

    بالمناسبة صلاح بتاع الزول بتاع الجمارك دفعتكم..؟؟














    ــــــــــــــــــــــــ
    والله البوست عجبنى
    قلت الندخل على صاحبى دا..
    ما فينى فليق حجار..سمح..!!
                  

06-26-2008, 09:13 AM

هجو الأقرع
<aهجو الأقرع
تاريخ التسجيل: 07-19-2006
مجموع المشاركات: 9056

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: محمد عثمان)

    الاخ الكريم عماد عبدالله كيفك والاسرة ، من المفروض ان اكون ضمن الدفعة 46 لكن الله سلم اكيد بتعرف اخونا وابن عمنا فضل التوم ابراهيم ، سبحان الله القرضابى كان معكم.
                  

06-26-2008, 10:54 AM

Mahathir
<aMahathir
تاريخ التسجيل: 03-09-2003
مجموع المشاركات: 622

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    الدفعه45 دى سنه كم? عمنا بخيت عيسى دفعتكم?
                  

06-26-2008, 11:18 AM

كمال علي الزين
<aكمال علي الزين
تاريخ التسجيل: 11-14-2006
مجموع المشاركات: 13386

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Mahathir)

    (*)

    ماشدني حديث (العسكر) , (للعسكر) ..

    لكنه حرفك (الباذخ) يا(صاحب) , ..

    ألم أقل لك أنني أجد طريقة لأقتفاء أثرك , ..

    والعلم بخبرك , ..

    أنت بخير ..!!


    محبتني ..
                  

06-26-2008, 11:11 AM

omer osman
<aomer osman
تاريخ التسجيل: 06-09-2007
مجموع المشاركات: 15218

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    سيادتو عماد

    التحية ليك ولدفعتك عبدالناصر الياس وحيدر حسن طه والمرحوم حبيب امباشي رحال وابراهيم عثمان

    وسعيد ابراهيم والخلوق المهذب اول الدفعة عمر المختار وجوزيف لادو واخرين لاتسعف الذاكراة بهم

    عمر محمد عثمان الدفعة 56 آخر دفعة في عهد الديمقراطية فبراير 1989م
                  

06-30-2008, 08:25 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: omer osman)


    عمر عثمان ..
    صباح الخير سعادتك ..

    شاكر مرورك و تحاياك للدفعة ..
    و خلينا معاك نغير من الصورة النمطية للبوليس البيقبض و يسجن و يضرب ..
    الوجه الآخر للشرطي الإنسان .

    مودتي و كثير الشكر .


                  

06-26-2008, 11:49 AM

Mohiedin Sir El Khatim

تاريخ التسجيل: 03-29-2008
مجموع المشاركات: 163

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
الدفعة 45 كلية الشرط ... فرش متاع (Re: Emad Abdulla)

    جنابو عماد ...

    ومن الدفعة 55 ليك ألف تحية ...

    Quote: و هو يضع يده حيث يجعل ( شعر جسمك يكلّب ) .. آمراً لك في صرامة : قُح !! .. فتقُح .. !!


    والله العظيم .. فى الكشف الطبى فى واحد كان مفروض يدخل المعاينة بعدى مباشرة .. لكن بعد ما حكيت ليهو إنو القصة فيها "قحة" ترك المعاينة وهرب قال أحسن يلحق الفرع...
                  

06-26-2008, 11:53 AM

اساسي
<aاساسي
تاريخ التسجيل: 07-20-2002
مجموع المشاركات: 16468

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرط ... فرش متاع (Re: Mohiedin Sir El Khatim)

    بالله انت من زمن بنادوا البوليس بي ((عباس))
                  

06-30-2008, 08:40 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرط ... فرش متاع (Re: اساسي)


    Quote: بالله انت من زمن بنادوا البوليس بي ((عباس))
    يا برعي ..
    الألفاظ كويسة برضو ..
    و لأ , ما كان إسمو عباس .. كان أبو إدريس ..
    و النقطة كانت خيمة .




    .....
    مواطن غريب ياخ !!!!


                  

06-26-2008, 12:10 PM

Abdelhafiez Hassan

تاريخ التسجيل: 02-10-2008
مجموع المشاركات: 356

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرط ... فرش متاع (Re: Mohiedin Sir El Khatim)

    جنابو عماد.....

    و من الدفعة 35 ليك ألف تحية....

    و ما شفناك فى بوست ( ضباط الشرطة المحالون للصالح العام)

    و الاً إنت ما منهم؟؟؟؟؟؟؟؟


                  

06-30-2008, 08:35 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرط ... فرش متاع (Re: Mohiedin Sir El Khatim)


    أخونا محي الدين ..
    التحيات .

    حكاية القحة دي لو كلمونا بيها قبل ما نتورط .. ما كان في زول قدم للشرطة .
    ياخي تقعد يومين متعقد ..

    شاكر ليك يا محي الدين ..
    و كتر خيرك على المرور الحلو .


                  

06-26-2008, 11:57 AM

كمال سالم
<aكمال سالم
تاريخ التسجيل: 02-13-2008
مجموع المشاركات: 4786

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)



    سعادة الجنرال صاحب الكلاش والريشه ,, تحياتى يافندم ,,


    أول حاجه ياسعادتك حكاية منتصف العمر دى أرخى منها شويه
    زول دفعتوا لواءات وبرضو تقول لى منتصف عمر !!
    اللواء ده طوالى بفكو عكس الهواء للمعاش يعنى محمد حسب الرسول
    ده بعد شويه وعلى قول أختنا ناهد بشير حنلقاه قاعد فى ضل
    شجرة البيت يملأ فى أزيار السبيل .
    أما سعادة اللواء فاطمه بتكون هسه رئيسة مجلس أمهات مدرسة ست
    أسماء وبتكون لهسه بتقحقح .
    عارف ياعماد الصيدلى لمن ينزل المعاش بفتح ليهو صيدليه والقاضى
    ببقى محامى والمهندس بفتح ليهو مكتب هندسى , ليه الضابط لمن
    ينزل المعاش مابفتح ليهو نقطه ؟ .

    يأخى والله مشتاقين ,,
                  

06-26-2008, 12:21 PM

حيدر حسن ميرغني
<aحيدر حسن ميرغني
تاريخ التسجيل: 04-19-2005
مجموع المشاركات: 24559

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: كمال سالم)

    Quote: يا عمده 45 دى الحرب العالمية الاولى كان ما اخاف الكضب !!!


    دينا

    عمدة ده ماجلك للدرجة دي

    اهديك وعماد مدراء عامي شرطتنا منذ تأسيسها حتى تاريخ اليوم وإنتي إختاري المدير زمن الدفعة 45


    ده اول مدير عام للشرطة





    وده اخر واحد




    الباقين هنا

    http://sudanpolice.gov.sd/modara.php
                  

07-02-2008, 12:31 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: حيدر حسن ميرغني)


    حيدر كيفك ياخ ..
    هو من ناحية جلك جلك ..
    لكن على خفيف .

    الدفعة 45 دخلت سنة 79 .. و إتخرجت 81 على عهد الفريق شرطة /عبدالله حسن سالم .
    شاكر لإيرادك اللنك .


    .....
    كتير مودة يا صاحب .


                  

06-26-2008, 01:57 PM

Yassir Tayfour
<aYassir Tayfour
تاريخ التسجيل: 08-18-2005
مجموع المشاركات: 10899

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: كمال سالم)

    عُمدة يا سعادتك!
    والقحاّح قبل ما يدخل إيدو، بلبس ليهو gloves ولا بهبش من فوق للهدوم!
    ___
    اللهم نسألك السُترة عند القُحاح..
                  

07-02-2008, 12:42 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Yassir Tayfour)


    إتعدل معانا في الكلام يا ياسر ..
    كل العسكريين المشنبين و الأسود الضواري مروا بمرحلة القحة ..
    و صموا خشمهم ..
    بقت علينا نحنا يعني ؟؟

    ثم ياخي في ذلك الزمن الغابر ما كان في قلوفز ..
    كل شي كان ( إسكتّوو ) .



    مودتي يا صاحبنا .


                  

06-26-2008, 02:25 PM

Kamal Mirghani

تاريخ التسجيل: 06-06-2008
مجموع المشاركات: 61

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    ووينك يا عمده يافنان * لسع مع ناس البيان.... طبعا انا ما من 45 ولكن عاصرتكم كثير والله الحق يقال كانت من اميز الدفعات والتلا مرة على كلية الشرطه
                  

07-02-2008, 01:11 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Kamal Mirghani)


    45 هي دفعة فعلاً مميزة يا كمال ..
    و ح أحكي ليك عنها كتير .

    شاكر مرورك الجميل .
    و تحيات كافة الدفعة .


                  

06-26-2008, 05:18 PM

بهاء بكري
<aبهاء بكري
تاريخ التسجيل: 08-26-2003
مجموع المشاركات: 3516

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    سلام ياعمدة
    ماتقول لي انت دفعة منتصر احمد ابراهيم وصلاح وراق وعلي نديم وباقي الجماعة
    غايتو كان ديل دفعتك ارخي قصة منتصف العمر دي
                  

06-26-2008, 07:56 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: بهاء بكري)


    مساءك حلو يا حيدر ..
    غايتو القحة عند المصريين ..

    نحنا قححونا كما يقحح الرجال ..
    و لا صمة الخشم .

    مودتي .

    .....

    شوشتا ..
    يمسيك بالخير يا صاحب ..
    مرورك حلو ..

    يطيبن أيامك .

    .....

    روزمين ..

    شكراً لمرورك ..
    و عشان خاطرك بدل منتصف العمر خليها خريفو .
    كده كيف ؟؟

    شكراً ليك .

    .....

    دينا خالد ..

    إتصلحي يا مواطنة ..
    الكلام ده بيدينك ..
    و نبقى بعدين في حاو تًر .

    أنا دفعتي لواءات ..
    البعرفو عنك قريبتك الأصغر منك رتبتها عميد .
    أقول ؟؟ ..

    تسلمي يا دندون .

    .....

    محمد عثمان ..
    Quote: افهم يعنى دخلتو كلية الشرطة 1945
    آآآآي ..
    و كان اليونيفورم وكتها شراب مخطط ..
    و عمة بي عزبة .
    .. و بس .

    يسعد مساك يا زول يا جميل .

    .....

    كيفك يا هجو ..

    Quote: من المفروض ان اكون ضمن الدفعة 46
    الله مرقك غايتو ..
    كنت هسه أتسنيرت عليك ..
    و أديتك تعليمات تقلبك مستنير ..

    شكراص على المرور يا هجو .
    تحياتي .

    ......

    يا Mahathir
    Quote: الدفعه45 دى سنه كم? عمنا بخيت عيسى دفعتكم?
    لا لا ..

    شكراً على المرور .

    ......

    كيمو يا صاحبي ..

    العسكر خشم بيوت ..
    أسوأهم الغاصبون الباطشون ..
    أما هؤلاء ..
    فصحاب يفيضون إنسانية .

    شكرا لكلماتك الكبيرات يا صاحبي

    مودتي .


                  

06-26-2008, 08:28 PM

Salah Abdulla

تاريخ التسجيل: 03-15-2006
مجموع المشاركات: 3169

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: بهاء بكري)

    عماد ياخ إزيّك

    شفت صاحبك أبوساندرا جاب ليك سيرة منو ؟( محمد معانا ما تغشانا). الجماعة الذين منهم من قضى نحبه (أغلبية ) والبقية الذين ينتظرون (قررررررربّوا) يلحقوا أخوانهم ، وطبعاً بركوتة أسقط اسمه سهواً من القائمة دي .
    شوف جنس ده :
    Quote: احمد خمارة *،، ده برضو ، تاوق ومشى ، حسيت بيهو بيندهني[/Blue

    خلاص صاحبك بركة جاتو هضربة ( الندهي ) فلان الله يرحمو جاني في المنام وقال داير موية ، وقال لي ارح معاي مشوار صغير ، الحق سريع أخد عفوهو قبلما يلحق الزينين.
    ............................
    يا أبوساندرا وبقية الديامة المواهيم ، بطلوا الحقرة بتاعنكم دي ، هسي حسين ملاسي ده مش فاتح ليهو بوست طول بي عرض عن الديم ( ووهمو ؟) واحد فيكم بالغلط ما (يهبب) ليهو ؟؟ والله دي حقرة منكم ، غايتو أنا لو في محل أبو طربوش ده بعتزل ( الكورة )
                  

07-02-2008, 01:36 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: بهاء بكري)


    بهاء بكري ..
    Quote: منتصر احمد ابراهيم وصلاح وراق وعلي نديم
    تصدق ديل بالذات أصحابي شديد ؟؟؟
    صلاح و منتصر تركوا الشرطة ..
    علي نديم لسه .. و هو الآن عميد و في دنقلا .


    ......
    إنت يا بهاء مش دفعتك صديق الموج ؟
    أها صديق ده درس مع الفريق أول /إبراهيم احمد عبدالكريم الله يرحمو !!



                  

06-26-2008, 08:04 PM

انعام عبد الحفيظ
<aانعام عبد الحفيظ
تاريخ التسجيل: 12-07-2005
مجموع المشاركات: 8738

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote: الدفعة 45 كلية الشرطة


    لا حولاااااااااااااا 45 عديل كدا


    خلاص بطّل السهر الكتير كان كدا
                  

06-29-2008, 07:38 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: انعام عبد الحفيظ)
                  

06-30-2008, 08:10 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)


    إيميل من محمد حسب الرسول , سنرد على حكاية مصر و المغرب و الفرع هذه .. فهي الحجة الداحضة بأنه جاء إلينا ( راجل كبير بمكنة حلاقتو ) و نحن زغب الحواصل .. وكذلك حكاية أوائل الدفعة في كشوف القبول هو و العميد أحمد السيد ..!!!
    و يا سعادتك .. سنرد بيان بالعمل ..
    Quote: من شندى جئنا صبية صغار السن نقدم أوراقنا للجامعات , قدمنا للفرع و لجامعات مصر والمغرب , تم قبولي بتجارة الفرع , و بالقانون في جامعة محمدالخامس والزقازيق .
    فى تلك الأيام قتل خالنا الدكتور على أحمد أبراهيم فرح المبعوث للتحضير هناك على يد منافسه ( العراقى ) و ذلك في معركة التنافس على رئاسة اتحاد الطلبة العرب , و التى فاز بها . وكنت قد عقدت العزم على مرافقة توأم روحى وأخى الذى لم تلده أمى وفردتى " مزمل بخيت عثمان بخيت " للمغرب الا أن أمى الحبيبة " إتيمنت " ما يقرالها ولد بره السودان بعد حادثة أمريكا . فتوكلت على الحي الدائم ودخلت الفرع . ذهلت ياعمدة أيما ذهول وحصلت لى صدمة عنيفة .. البنات معانا فى فصلنا ؟ ( المدرج ) وفى كنبتنا ( البنش ) !!! وهن بنات نصاح ؟ ديل حور لو شافن الطيب شيقوق ماكان نزل التلاتة بنات فى البورد , وحبيتن كلهن ياعماد لكن من طرف واحد , وأغير عليهن وغالبنى أنضم معاهن , مرة مرة أتشجع وأرمى السلام همسآ عسى أن يقع فى عب إحداهن وترد عليّ . لكن ذلك لم يحدث , ياربى ده من شنو ؟ يكونوا زهجانين من قميصى الوحيد البغسلو كل يوم وأكويه ؟ وللا غبشة أولاد الاقاليم ظاهرة ؟ حمدت الله إنى مامشيت المغرب كان مت ..
    فى عز الحب داك إنتشلنى " عمر محى الدين أحمد التهامى " أو عمرالتهامى ( دفعة من أولى إبتدائي ) ذهبنا سويةً لقمندانية بحرى , شلنا أرانيك التقديم من الملازم " آمنة " بعد ماقاسوا طولنا طلبوا مننا أن نختمها بمدرستنا . تدحرجنا من هناك لموقف بصات شندى وبللورى على البلد . وصلناها ليلآ وشندى لها عبق وسحر وطعم لايعرفه إلا أهلها , وفجراً .. بعد الشاى على شندى الثانوية , ثم إلى اللوارى مرةً أخرى بعد أن ختم لنا أستاذنا المصرى " مصطفى سلمان " عليه رحمة الله ,,, حدد لنا إمتحان الدخول وكان بـقاعة الإمتحانات جامعة الخرطوم . طلعت النتيجة , كان الاول أحمد سيد خليل والتانى فاطنة السمحة والتالت أنا .
    جرى تقسيمنا لمجموعات وفقآ لنتيجة الامتحان , كل مجموعة تضم عشربن طالبآ .. وهكذا أوقعنى حظى الحسن مع فاطنة السمحة . وقد كنت خلفها مباشرة في الترتيب . وقضينا معآ أيام الكشف الطبى وتقاسمنا حبها أنا وأحمد سيد خليل نأتى سوية بدرى وحتى لانعطى الآخرين فرصة نداهمها قبلهم : ( صباح الخير يافاطنة , نعل أمبارح ماتعبتى فى المواصلات ؟ ) ونظل نحيط بها إلى أن ينتهى كشف ذاك اليوم ونترك الهمس والغمز واللمز لصلاح ميرغنى وعماد عبدالله وأشباههم . إلا أن تجربة القحة كانت عصيبة حيث أن من سبقنى إليها إثنان فقط : أحمد وفاطنة .. وتدثرا بالصمت فلم يبوحا لى بشى ولم أسألهما لغشامتى . نودى على بإسمى فدخلت كما الاسد ( السلام عليكم ) فجاءنى صوت أجشآ عميقآ مثل صوت حاكم سلمان ( أقفل الباب وراك ) فأيقنت أن في الحكاية إنّ , فكرت فى الهرب .. قلت : أفو والله أكان نشوف آخرتا . أجلسنى قبالته وبقى يشتغل بالسماعة وكانت تفوح من فمه تلك الرائحة التى تقلب البطن والتي كانت تنبعث من أفواه السودانيين قبل الافطار عادة , إلى أن دهمنى : ( أقلع بنطلونك والداخلي ) (أآآآآآ ؟... ) ( ماسمعت ؟؟ أقلع خلينا نخلص نشوف غيرك ) أنزلت بنطالي مسافة خمسة سنتمترات . : ( إنت الظاهر عليك بتلعب أقلع كلو كلو وللا أمرق ) قالها حاكم سلمان مع رزاز بالريحة إياها , فتضاءلت من هزبر إلى فأر وتصبب جسمى عرقآ - رغم برد نوفمبر - ورجفت وخفت وتمتمت ( الله ينعلك يا التهامى أنا كان مالى ومال كده ) فنزلت بهما أرضا – البنطال و توابعه - ( خت يديك هنا ودنقر ) والباقى إنت عارفو !!! يا عماد جنس قحة أدى ربك العجب !! وكمان عادوها لينا , وبينى وبينك غير حكاية الريحة .. فالزول كان شكلو مخيف , عزلوهو لينا دوناً عن دكاترة السودان . حمدت الله لامن قال لى ألبس وأمرق .. وخرج الفأر مطأطئ الرأس .
    لمحت أحمد يضحك ولم أجرؤ على النظر لفاطنة , فاتخذت مكانآ قصيآ حتى جاءنى " التهامى " قلت له كشف عادى بالسماعة بس . ( نان طولت مالك ؟ ) سألنى بخبث !!
    تحياتي .

                  

06-30-2008, 10:29 AM

Abdelhafiez Hassan

تاريخ التسجيل: 02-10-2008
مجموع المشاركات: 356

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote: جنابو عماد.....

    و من الدفعة 35 ليك ألف تحية....

    و ما شفناك فى بوست ( ضباط الشرطة المحالون للصالح العام)

    و الاً إنت ما منهم؟؟؟؟؟؟؟؟



    قلنا نرحب و نحى ....ولكن ما عارف ليه ما رديتو تحيتنا؟؟؟

    ورد السلام فرض!!!!
                  

06-30-2008, 11:09 AM

tmbis
<atmbis
تاريخ التسجيل: 10-19-2002
مجموع المشاركات: 24862

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    يا كمندان ..
    القحـة ولا صّمت الخشم ..
    أخوك طلع من (القحة) دي .. بي كرامة البليلة ..
    لكن كنت ح اخد لي طلقة في نص راسي .. وربك ستر ما حلقو لي صلعة..
    دخلت الغرفة الأولى .. لقيت ليك نقيب .. ماسك نار من امس بالليل .. وريحتو تعمل قعدة .. وقرفان من اي حاجة .. تخيل اكتر حاجة عمله لي قال لي امشي المكتب التاني بي هناك .. بي نهرة بت لذينا .. حقارة الضباط عارفه طبعا..؟
    مشيت المكتب التاني .. والله لقيت ليك فوقو سماحة فاطنه .. بلاي واقفة زي المسطرة فيها سنون .. كملت بيهم سنون الغزال كلها ..
    دي تكون دخلت الكلية دي (سنون) بس ..
    ياخي الكاكي في الجكس (قحاح خلاص وجهجــاه) .. مسكتني (كتكوتة) عديل جـوه وقعدته ابحلق قلت الليلة إن شاء الله يودوني الدروة ويضربوني رصاص ..
    قالت لي وإنت ماشي وين والجابك شنو مع ديل ..؟
    قلت ليها انا بتاع (جلدة) .. بتاع كورة بس ..يعني قوم واقع ولف شمال وتعال يمين دي ما ادونا ليها لسه ..
    لكن من هنا بمشي اي مكان تقولي لي امشي .. بس كدي قولي لي امشي المكان الفلاني
    قالت لي عندك كسر في يدك أو رجلك قبل كدا ..؟
    قلت ليها لا .. لكن محمدني التكسر كان اديتيني فرصة .. ضحكت يا قرجي لمن (البورية) ميل ..
    وانا بحب (البورية) لما يميل
    بعد ما يميل إن شاء الله بعداك يضربوني رصاص
    وقعدته اهضـرب وقتئذ .. هضربته ليها هضربت أهالي في بيت اللعـب .. تعرف الوكت داك لو كان لقيته مطرفه بالملكي بره الحتة ديك .. والله كان اجازف ليك (كتيبة) زيها .. لكن ما بتدي حريف
    زرقنتني .. والله شدته لي شــدة عدوك .. حاولت (احننـه) اصلو ما قدرته
    حاولت احت منها الاتـو .. لقيت نفسي فارة جدا ..
    والله كوركت ليها لي واحد وكيل عريف .. متكيف ليك من شريطو دا .. كان ما زبلتو بي صندوق الضان الكان معاي .. والله اخوك كان لحدي الآن شغال (قيامات) .. ما كمان العسكرية تصرف ..
    المهم جازفت ليك ورقي ، وخارجت نفسي بعد دا لقيته كاتبه لي لائق طبيا .. وبدون (قحـة) طبعا
    هو انـا ادوني فرقه افتح خشمي .. حتين اقـح ..؟

    التحية لي الكمندانات المعاك ديل .. وفت لينا البواليص ديل بلاي .. دفعتكم دي زي ما قلت ليك والله الواحد كان متخيل نفسو فيها عديل كدا


    (عدل بواسطة tmbis on 06-30-2008, 11:16 AM)

                  

06-30-2008, 10:42 AM

أبو ساندرا
<aأبو ساندرا
تاريخ التسجيل: 02-26-2003
مجموع المشاركات: 15493

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    كتب الحبيب صلاح عبدالله :
    Quote: خلاص صاحبك بركة جاتو هضربة ( الندهي )
    فلان الله يرحمو جاني في المنام وقال داير موية ،
    وقال لي ارح معاي مشوار صغير ،

    الحق سريع أخد عفوهو قبلما يلحق الزينين.


    آآي والله
    مفروض الزول ده يفتش على عفو عام

    ياصلاح اليوم من دغش الرحمن كنت في بالي
    وقع في يدي شريط / تسجيل قديم لعثمان حسين
    نضيف ، فيه الكلمة النادرة
    وحاجات كده تشعل الروح بالحب
    تعال اسمعو

    ماهيتاب قطعت فيك
    بمناسبة مداخلتك في بوستنا عن الراحل العزيز
    عبارتك : { عثمان حسين مات يا عبدالرحمن }
    قالت كانت بليغة جدآ
                  

06-30-2008, 11:50 AM

esam gabralla

تاريخ التسجيل: 05-03-2003
مجموع المشاركات: 6116

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)
                  

07-01-2008, 12:41 PM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: esam gabralla)


    Quote: (عدل بواسطة esam gabralla on 30-06-2008, 03:32 م)
    يا صاحب ..
    ما فينا تعديل ..
    خلي الحاجات اللذيذة الكانت هنا ..
    بطل تحسحس يا سحس .



    .....
    و .. ما زلت أعلو فوهة الصديد ..
    وجع ممدود من هنا حتى هنووووووك ..


                  

07-01-2008, 01:52 PM

omer osman
<aomer osman
تاريخ التسجيل: 06-09-2007
مجموع المشاركات: 15218

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    سيادتو عماد

    شايف موضوع القحة ده اخد حيز مقدر من النقاش والتعليقات عشان كده عاوز اقول نحن في زمنا

    الطب اتطور بقي (بدون قحة)


                  

07-02-2008, 01:38 AM

Emad Abdulla
<aEmad Abdulla
تاريخ التسجيل: 09-18-2005
مجموع المشاركات: 6751

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: omer osman)


    بري / ناحية النيل - عام الرمادة .
    _________

    في البزة العسكرية .. جاءت
    و الدنيا في أوائل التمانينات ..
    معقوصةُ الشعر جاءتْ ..
    و حليبً بشرتها ينزُّ تحت كاب الشرطة الأسود , لها نجمةٌ وحيدة على كتفها .. و نجمات عمّدتها مارشالاً في دمي .
    الفجر في بُري أغبش , و النيل نائما مازال , و مازلنا وسنى .. و حليقي اللّحى .. و نظيفين تلمع أحذيتنا و قاشاتنا , منشاةٌ قمصاننا و أزرتنا لامعات و .. أورورا وحدها مشرقة .
    أورورا شرطية !!! ..
    ( ستراجون ينتظر .. و أهل كريت كذابون ) .

    طابور العميد .. و السيت من كل أسبوع ..
    اصطفت الطوابير , كأن مرور جوزفين تستعرض حرسها الإمبراطوري ..
    و نابليون في دمي يغزو و يفتح ..
    بارجتان صدرها .. و حمامتان تهمان - في آن -
    همسوا أنها نقادية .. مزدوجة الجنسية ( و الأنجلو ساكسون ما خرج عرقهم من السودان ) .
    أورورا خريجة حديثة , بدلة العسكرية ( البوشيرت ) عليها ولا أزهى .. ولا أزهى .
    نظرتُ , فبسرتُ , فبصرتُ .. فاعتورني إعياءٌ و " ساحت ركبي " ..
    و البنت أورورا ممتشقة أمامي على منصة العميد مع بقية الضباط , و نسمات باردات واهيات في أواخر أبريل " تهبش " صلعتي و أذناي العاريتان .. و الكاب الشرطي على رأسي يضيف ثقلا على ثقل دمي المجنزر دبابة , يزحف موجها فوهاته إليها .. أورورا .
    عند الثامنة صاح صائح : إنصراف .
    إنصرفنا لينصرف إلى أورورا .. كُلي .
    مررت عليها في طريقي إلى الداخليات
    طالبٌ عسكري الخطو , و هي كما شجرة عيد الميلاد في صقيع أجدادها هناك شمال الجزر البريطانية .. تلتمع و تبرق , محملة بالوعود الصابئات و الأماني . و أنا نوئى إستوائي و ماطر , و فاصلي المداري كما وتر " أم كيكي " , يشتد فيرخو كلما مسه قوس أورورا .
    - أين يا سحابي هطولك إن لم يكن حديقة الأقحوان هذي ؟ ( عشقها الأرض للخصب .. وعي ) -
    محفوفة بالضباط العظام أورورا , متهدلي الأشداق هم .. ملتفون حولها فعل النحل بالزهرة .. يسيل لعابهم عليها و هم سائلون ..
    لا عزاء لغيماتي .. تمنعها أرصفة الطريق و الأسفلت و الأعين من أن تغرز شهوتها الشبقى للسقيا في رحم التربة البتول .

    ( الغيم ربض فوق الفريق ..
    شافو الشتل ..
    شابى و فرح ) .

    إلتفت يمينا مؤديا التحية العسكرية كما يجب ..
    للنجوم على أكتافها أحيي .. و للشمس على وجهها .
    ثم .. غمزتها " زي الما قاصد " .
    أيقنت أن ما بي لا يخرج عن اثنين : .. يا عُتَه .. يا صبابة !!
    قفزت النونات إلى الحديقة في خديها من غمزتي المتهورة .. فبسمت ..
    و شيعتني ببصرٍ كالحديد , جردني من ورطتي العسكرية ..
    أصاب رميها , و غشاني ما غشى ..
    هل أتاك حديث الغاشية ؟؟
    صرتُ أتمارض ما استطعتُ سبيلا بطول أيام الأسبوع حتى يجيء السبت .. الذي لا يجيء " بأخوي و أخوك " ..
    و يجيء فأرتدُ صحيحاً معافىً .. و أفلت عفاريت ظمأي لتقف مؤدية لأورورا التحيات العسكريات , هناك على منصة العميد .
    الفجر في بُري أغبش , و النيل نائما مازال , و مازالت وسنى أورورا عندي .. و حليق اللّحية كنت .. و نظيفا و ..
    أورورا وحدها مشرقة .. و عارية إلا من أدريناليني المشتعل .

    أورورا شرطية !!! ..
    ( ستراجون لا ينتظر .. و أهل كريت صادقون ) ..
    و انتظرت أسبوعاً في السجن " الكركون " ..
    عقابا لغمزة .. ( ما كنت قاصدها ) !!!..
    يا قاسية يا غجرية ..
    فُصِلتُ بعدها بزمان ..
    فصلتُ من شغفٍ بها أجرب - ربما - و علات و بلاوي ليس لها شافٍ إلاها .. أورورا .
    و غابت ...
    واعدة بعيادة دمي حين تشاء .. لتكبل بلازماه و صفائحه .
    منتظرٌ أورورا .. أنا .

    .....
    يا أمان الخائفين ..

    __________
    أورورا .. سأعد لك ما استطعت

                  

07-02-2008, 08:17 AM

داليا حافظ
<aداليا حافظ
تاريخ التسجيل: 06-06-2008
مجموع المشاركات: 5055

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    سعادتك


    أسعد صباحك ....وتتعاد عليك كل الذكريات بالخير والسعادة .



    خالص ودي




                  

07-02-2008, 02:16 AM

فارس موسى
<aفارس موسى
تاريخ التسجيل: 12-01-2004
مجموع المشاركات: 1357

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    Quote: حولااااااااااااا
                  

07-02-2008, 08:03 AM

فيصل عثمان الحسن

تاريخ التسجيل: 01-08-2005
مجموع المشاركات: 4528

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: فارس موسى)

    Quote: بري / ناحية النيل - عام الرمادة .
    _________

    في البزة العسكرية .. جاءت
    و الدنيا في أوائل التمانينات ..
    معقوصةُ الشعر جاءتْ ..
    و حليبً بشرتها ينزُّ تحت كاب الشرطة الأسود , لها نجمةٌ وحيدة على كتفها .. و نجمات عمّدتها مارشالاً في دمي .
    الفجر في بُري أغبش , و النيل نائما مازال , و مازلنا وسنى .. و حليقي اللّحى .. و نظيفين تلمع أحذيتنا و قاشاتنا , منشاةٌ قمصاننا و أزرتنا لامعات و .. أورورا وحدها مشرقة .
    أورورا شرطية !!! ..
    ( ستراجون ينتظر .. و أهل كريت كذابون ) .

    طابور العميد .. و السيت من كل أسبوع ..
    اصطفت الطوابير , كأن مرور جوزفين تستعرض حرسها الإمبراطوري ..
    و نابليون في دمي يغزو و يفتح ..
    بارجتان صدرها .. و حمامتان تهمان - في آن -
    همسوا أنها نقادية .. مزدوجة الجنسية ( و الأنجلو ساكسون ما خرج عرقهم من السودان ) .
    أورورا خريجة حديثة , بدلة العسكرية ( البوشيرت ) عليها ولا أزهى .. ولا أزهى .
    نظرتُ , فبسرتُ , فبصرتُ .. فاعتورني إعياءٌ و " ساحت ركبي " ..
    و البنت أورورا ممتشقة أمامي على منصة العميد مع بقية الضباط , و نسمات باردات واهيات في أواخر أبريل " تهبش " صلعتي و أذناي العاريتان .. و الكاب الشرطي على رأسي يضيف ثقلا على ثقل دمي المجنزر دبابة , يزحف موجها فوهاته إليها .. أورورا .
    عند الثامنة صاح صائح : إنصراف .
    إنصرفنا لينصرف إلى أورورا .. كُلي .
    مررت عليها في طريقي إلى الداخليات
    طالبٌ عسكري الخطو , و هي كما شجرة عيد الميلاد في صقيع أجدادها هناك شمال الجزر البريطانية .. تلتمع و تبرق , محملة بالوعود الصابئات و الأماني . و أنا نوئى إستوائي و ماطر , و فاصلي المداري كما وتر " أم كيكي " , يشتد فيرخو كلما مسه قوس أورورا .
    - أين يا سحابي هطولك إن لم يكن حديقة الأقحوان هذي ؟ ( عشقها الأرض للخصب .. وعي ) -
    محفوفة بالضباط العظام أورورا , متهدلي الأشداق هم .. ملتفون حولها فعل النحل بالزهرة .. يسيل لعابهم عليها و هم سائلون ..
    لا عزاء لغيماتي .. تمنعها أرصفة الطريق و الأسفلت و الأعين من أن تغرز شهوتها الشبقى للسقيا في رحم التربة البتول .

    ( الغيم ربض فوق الفريق ..
    شافو الشتل ..
    شابى و فرح ) .

    إلتفت يمينا مؤديا التحية العسكرية كما يجب ..
    للنجوم على أكتافها أحيي .. و للشمس على وجهها .
    ثم .. غمزتها " زي الما قاصد " .
    أيقنت أن ما بي لا يخرج عن اثنين : .. يا عُتَه .. يا صبابة !!
    قفزت النونات إلى الحديقة في خديها من غمزتي المتهورة .. فبسمت ..
    و شيعتني ببصرٍ كالحديد , جردني من ورطتي العسكرية ..
    أصاب رميها , و غشاني ما غشى ..
    هل أتاك حديث الغاشية ؟؟
    صرتُ أتمارض ما استطعتُ سبيلا بطول أيام الأسبوع حتى يجيء السبت .. الذي لا يجيء " بأخوي و أخوك " ..
    و يجيء فأرتدُ صحيحاً معافىً .. و أفلت عفاريت ظمأي لتقف مؤدية لأورورا التحيات العسكريات , هناك على منصة العميد .
    الفجر في بُري أغبش , و النيل نائما مازال , و مازالت وسنى أورورا عندي .. و حليق اللّحية كنت .. و نظيفا و ..
    أورورا وحدها مشرقة .. و عارية إلا من أدريناليني المشتعل .

    أورورا شرطية !!! ..
    ( ستراجون لا ينتظر .. و أهل كريت صادقون ) ..
    و انتظرت أسبوعاً في السجن " الكركون " ..
    عقابا لغمزة .. ( ما كنت قاصدها ) !!!..
    يا قاسية يا غجرية ..
    فُصِلتُ بعدها بزمان ..
    فصلتُ من شغفٍ بها أجرب - ربما - و علات و بلاوي ليس لها شافٍ إلاها .. أورورا .
    و غابت ...
    واعدة بعيادة دمي حين تشاء .. لتكبل بلازماه و صفائحه .
    منتظرٌ أورورا .. أنا .

    .....
    يا أمان الخائفين ..

    __________
    أورورا


    حولا ساكت يا فارس , شفت البوليس دا متجلى كيف
    الجن الفقيرو معلم بدر .
                  

07-02-2008, 01:17 PM

ibrahim kojan
<aibrahim kojan
تاريخ التسجيل: 03-29-2007
مجموع المشاركات: 1457

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: فيصل عثمان الحسن)

    وإلتقينا ولم أشد لها ماستطعت من قوه ..
    يتطاول الليل علي حباله السود ولا يستطيع مدها إنتظارا وما أدركت حباله, عمق ما عرفت أورورا, ولم تدارك إحمرار الخجل بها فتوارت خلف إبتسامتها التي تغطيها بإبتسامة أخري أقل خبرة بفعل من غمز لها بعين من لا يخشي سقوط نياشينه من علي أكتافه اليافعه, فقط أعلن عن وحش يندس بين مرارة الكتابه وجمالها .. قال أورورا الغجريه ,, ذات اللمعه التي أعدتها متعه للناظرين وصغار الضباط ومشاريعهم التي لا تنتهي .. اورورا ملعونه بتداخل الافريقي في ثنايا مخاضها الذي لا ينتهي ولزوجة الابيض الجليدي ..(تعطينا كل خريف ميلاد حب جديد وشديد كسارق الكحل من أعين الحسناوات) .. وأورورا قال: تعالي منها الحسن فأفرغته كلاما لا يعرف التحور إلا في مقلاة مقلتيها, فصعقت ما تبقي من صاحبي ,,, ارورا قال.. هكذا كان إسمها ..

    ولها ما لها من أندفاعات الدم الحار في عروق الجن ودماغه..
    أورورا..

    ( سألتك أن ترتديني

    خريفا

    لأذبل فيك وننمو معا

    سألتك ات أكون وألا تكوني

    سألتك أن ترتديني

    نهرا

    لأفقد ذاكرتي في الخريف

    ونمشي معا.)

    أرورا قال إسمها (تركها تتصاعد داخله فما تصاعدت.. فقط سكنته )

    مداخله أخري :

    كيف تحاول خمس حواس مقابلة معجزه

    وعيناك معجزتان ؟؟

    _______________

    أورورا لها من لعنات تنوء عنهاأطراف سماء الكتابه....................

    ( القحه دي شنو خلاف انو قحه وبعدين الراجل بيرجل اكتر لامن يقححو مش بيبقي عسكري....؟؟؟؟؟؟؟؟؟؟؟؟؟)

    (عدل بواسطة ibrahim kojan on 07-02-2008, 01:20 PM)

                  

07-03-2008, 03:48 AM

Ali Sirelkhatim
<aAli Sirelkhatim
تاريخ التسجيل: 06-17-2008
مجموع المشاركات: 4000

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: فيصل عثمان الحسن)

    ياالاهى ياالاهى ياالاهى
    يا فيصل عثمان يا راجل يا ظريف وين انت
                  

07-03-2008, 03:38 AM

Ali Sirelkhatim
<aAli Sirelkhatim
تاريخ التسجيل: 06-17-2008
مجموع المشاركات: 4000

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: الدفعة 45 كلية الشرطة .. فرش متاع , و كثير حب .. (Re: Emad Abdulla)

    السلام عليكم ورحمة الله وبركاته
    بسال من الاخ صلاح الحاج برلة وين جنابو ده ؟
                  

07-03-2008, 09:26 AM

Mohiedin Sir El Khatim

تاريخ التسجيل: 03-29-2008
مجموع المشاركات: 163

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
الدفعة 45 كلية الشرط ... فرش متاع (Re: Emad Abdulla)

    يا عمر ..

    Quote: سيادتو عماد

    شايف موضوع القحة ده اخد حيز مقدر من النقاش والتعليقات عشان كده عاوز اقول نحن في زمنا

    الطب اتطور بقي (بدون قحة)


    بالله عليك يا شفت ... قحت طلال على مرجان سمعناها فى كاتنقا
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de