|
|
 الفرجونى. عاصم البنا .حسن شرف الدين.عباس تلودى.يعطرون سماء الخرطوم.كنت بينهم فى النادى الامريكى
|
بينما انا فى الرياض...اذ بى اتلقى اتصال لطيف من الاخوان عاصم البنا
والسر عبد العظيم..وهم ينقلوا لى جلسة استماع من النادى الامريكى بالخرطوم
واذا الحداة فى تلك الحضرة...ملك امراء التطريب الفرجونى والفنان عباس تلودى
والشاب الخلوق الفنان حسن شرف الدين وهذا فنان قادم بقوة من قرية الدويمات
من اعمال مدينة شندى...وواسطة العقد وبهار الجلسة صديقى وصديقكم عاصم البنا
وبدا التطريب الاستاذ احمد الفرجونى غنى رائعة عمر البنا ياحبيبى جفيت ويردفها
ببلغ الاقوال يا هلال رائعة ابوصلاح ثم يشدو الرائع حسن شرف الدين
بواحدة من درر عمر البنا الهلال هلا ثم يغنى عاصم البنا حبى القديم يا كنار
وعباس تلودى يترنم بـ حبيبى قوماك ننفرد...
نقلونى الى حيث هم وقد استرقت صحارى نجد السمع معى لانفاس
الخرطوم وسرت النشوة فى اطرافها دون راح....
ما اقسى ليل الغربة عندما تستاف ارج ونفس الوطن...
عاصم يحدثنى ...حديث القلب للقلب مشفقا على من الغربة
ما اصدقك عاصم ...هذه غربه اصابت النسيج الحى عابرة مساماتنا
واصبحنا نبكى من هبشة...مالى اراكم تنكأؤن جروحى وثوب الصبر
عندنا اضحى اوهى من خيوط العنكبوت....
وجروحنا تلتهب كلما انزاح الغبار الذى راكمته هذه الغربة
ولكنه لم يستطيع ان يوقف النزيف والاوار الداخلى وحنينا للوطن...
شيخى الفرجونى صديقى عاصم البنا وخليلى السر عبد العظيم
لكم الشكر اضعاف ما اسبقتم على ليلى من التطريب...
حاشية:ايضا فاجانى صوت الفنانه غادة حسن ..نعم هى لم تغنى ولكن
ما نستنى من صالح الدعوات...فقد وعدتنى بارسال شريط يتضمن
اغنية عبد الله سليمان العشوق فى التغزل بين المسارح
اوعدكم بانزال الاغانى حال استلامى للشريط...
لازم نعود عند الاصيل لازم نعود...اه يا زمان النزوح....
|
|
 
|
|
|
|
|
|
|
|
Re: الفرجونى. عاصم البنا .حسن شرف الدين.عباس تلودى.يعطرون سماء الخرطوم.كنت بينهم فى النادى الام (Re: هاشم أحمد خلف الله)
|
الحبيب ود الموج:
Quote: الخرطوم وسرت النشوة فى اطرافها دون راح....
ما اقسى ليل الغربة عندما تستاف ارج ونفس الوطن...
عاصم يحدثنى ...حديث القلب للقلب مشفقا على من الغربة
ما اصدقك عاصم ...هذه غربه اصابت النسيج الحى عابرة مساماتنا
واصبحنا نبكى من هبشة...مالى اراكم تنكأؤن جروحى وثوب الصبر
عندنا اضحى اوهى من خيوط العنكبوت....
|
يابختك بهذة الليله ويالها من ليله ليلة كنت في تيه وضجر بين هذة الزهور
أنت والنيل والقمر!!
بالله ماتنسانه من نسخه من الشريط بالله عليك.
؛؛؛؛؛؛؛؛؛؛أخوك ؛؛أبوقصي؛؛جده؛؛؛؛؛؛؛؛؛؛؛
| |
|
|
|
|
|
|
|
|
|
Re: الفرجونى. عاصم البنا .حسن شرف الدين.عباس تلودى.يعطرون سماء الخرطوم.كنت بينهم فى النادى الام (Re: صديق الموج)
|
Quote: أنت الصباح لابس الوشاح
وأنت الصباح شافك فرح
أستاذي القدير صديق الموج
يا بختك طربت كل هذا الطرب الجميل
آل البنا ديل الغناء ده ما حقكم
وكان لي عاصم البنا فهو شرفة خاصة في وجدان حالات الطرب لدي
غناي دي ما بتديه حقه
وأنا داقة صيواني هنا راجية التسجيل |
نهال الغاليه ....كيفك
والله ما قايل روحى بحيا وبلاقيكم
ياخى الناس المجانين ديل صوتهم ياتيك من البعيد
كشهقة الفجأة..يدوزن عصب السمع
الفيك لامن تتخيل روحك فراشة ما بنى ادم
وتحس بانك قفزت فى الهواء لمست قبة السماء
اوعادك مقدس اللهب........ يوم قلت لعمى ادريس البنا
غايتو انا خايفكم يا اولاد البنا يوم
تكتلو ليكم زول فى جلسة سمع فضحك الرجل بصوته الاجش الجميل
حتى كاد ان يقع من كرسيه....
ذلك يوم من ايام الرياض التى بلا رياض رقصت فيه بلا ساق
وحدقت بمليون وش..وش تالا المفازة..ووش يعاين البطانه ووش مقابل
فتيح والخوروالمزالق.. ..ووش بفاه يشبع
حيط امدرمان المخيطه بالزباله لثما..ووش يطالع بوابة عبد القيوم
ووش قبال توتى ام خضارا شال..وعييييييييييييييييييييك
وقد اندغمت فى كبسولة الفرح التى تخلقت يوم ذاك
وكدت اغرق اغرق...نهال خليك فى خيمة الفرح لامن يصلك التسجيل،،،
| |
|
|
|
|
|
|
|
|
|
Re: الفرجونى. عاصم البنا .حسن شرف الدين.عباس تلودى.يعطرون سماء الخرطوم.كنت بينهم فى النادى الام (Re: صديق الموج)
|
نسيت ان اشكر الاخ العزيز السر عبد العظيم فقد ظل جواله مفتوح طيلة
زمن الجلسة ،والتى امتدت زهاء الساعتين....
مازلت انتظر التسجيلات وليت الاخ عاصم يتداخل من الخرطوم لينقل لنا
التفاصيل من الداخل...
ايضا لابد من كلمة شكر تطال الاخت التى ظلت تمسك بالتلفون وهى
قريبة من المسرح..لتنقلنى الى حيث كانت...
مازال صدى تلك الجلسة يرن فى اذنى ويزهدنى فى هذه الغربه
الكريهة وهذه الديارالموحشة..اه يا زمان النزوح...
عاصم انا كلى انتظار فارجو ان يصلنا الشريط...
| |
|
|
|
|
|
|
| |
صديق الموج
هاشم أحمد خلف الله
مجدي عبدالرحيم فضل
Osman Musa
خالدة البدوي
نهال الطيب
Ishraga Haimoura
فيس بوك
تويتر
انستقرام
يوتيوب
بنتيريست