|
|
 Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
Quote: بس سؤال للعارفين
مش دي كانت بتدور( بالمنفله) |
اخونا أيمن ...
أفتكر .. المنفله للعربات الانقليزية .. في فتحه في الطمبور التحت الواصل بسير المروحه ( ياخ شرحها صعب ) .. وعربتك دي مرسيدس المانيه .. ما بستعملو ليها المنفله ..
والفتحه دي كانت موجود في السيارات الانجليزية ( الكونصول ، أب أربعة ، البكصول ، الموريس /موريس ماينر ، اللاندروبر ، ألخ ) وكانت المنفله من عدة العربية زي مفتاح العجل والعفريتة والمزيته وليها مكان مخصص في ضهريه العربية وفي اللاندروبر خلف مقعد السواق حيث لايوجد له ضهريه.
وكانت المنفله تستعمل في حاله عدم وجود ناس المروءه .. يعني لزه يا اخونا العربية دي بطاريته نزلت .. وفي استخدام سوداني بحت تستخدم بدل العكاز للدفاع عن النفس .. بالذات في الجزيرة وايام لقيط القطن لكثرة عمال اللقيط ومشاكلهم وهم سكرانيين.
| |
 
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
.
تاريخياً يمكن تمييز فترات سادت فيها أنواع معينة من العربات في السودان:
الحقبة الأولى: الهيمنة الغربية:
ما قبل منتصف الستينات الميلادية. طغت عليها السيارات الأوربية وبخاصة الإنجليزية مع بعض التواجد الخفيف للسيارات الأمريكية.
السيارات الإنجليزية تمثلت عادة بالموريس، الاوستن (ولكليهما ميني ماينور)، ثم الفورد بأنواعه المختلفة (كورتينا، أنجيليا، ...).
الأوربية الأخرى كانت ألمانية في مجملها وتمثلت بتواجد الفلكس، والأوبل (كاديت وريكورد)، والمرسيدس على شريحة أعلى.
أما الأمريكية فكانت تتواجد لدى الأثرياء والأقباط عادة (ناش، كاديلاك، شفروليه، دودج، بويك، ...).
.
الحقبة الثانية: الظهور الشرقي:
بقرب نهاية الستينات. توغل محدود لسيارات المعسكر الشرقي في الأسواق (موسكوفيتش، فولجا، سكودا) نتيجة لتوجه البلاد شرقاً لكنه لم يعمر كثيراً نسبة للمشاكل التي عانت منها تلك السيارات.
.
الحقبة الثالثة: الاجتياح الياباني:
بدأت مظاهره بتواجد محدود قرب نهاية الستينات لبعض السيارات الصغيرة (مازدا برلينا، برنسيسة، ...). كانت مادة للتندر بسبب صغر حجمها ـ خاصة المازدا كما سادت شكوك نوعية حول مدى قوتها واعتماديتها.
تسارع الأمر بعد وصول البرنسيسة واستعمالها في التاكسي في النصف الأول من السبعينات ثم عم بعد ذلك.
.
الحقبة الرابعة: الهجمة الكورية.
بدأت خجولاً كذلك ـ سيهان بيرد بنهاية السبعينات لتتبعها عربات هونداي ودايوو ـ ثم تسارعت وهيمنت الطرازات الكورية الآن على الشارع.
.
المتوقع فترة مقبلة ـ ربما خلال خمس أو عشر سنوات ـ تسيطر فيها السيارات الصينية والهندية حيث يبدو أن عامل السعر هو الذي يتحكم في السوق السوداني.
.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
يقول أبو شقرا، عن وكلاء السيارات: "...وبرز من الوكلاء الآخرين البارزين من الأرمن سفريان (فولكسواجن) وبرسميان (هيلمان وهمبر وصنبيم) ومن الشوام حجّار (بيجو وناش) وقطّان (فيات وبورغفارد وشاحنات بوسينغ) ومن اليونانيين كونتوميخالوس (جنرال موتورز ثم ستودييكر) وفيما بعد برزت عائلات حضرمية يمنيّة الأصل في السوق منها العشي (بي إم دبليو) والبربري (هيونداي). أما أشهر العائلات السودانية المحليّة التي لعبت دوراً مهماً في تجارة السيارات بجانب عائلة عثمان صالح فبينها آل أبو العلا (مرسيدس بنز) وآل حسّونة (نيسان).
لا أدري لم أغفل أبو شقرا (وقد اكتمل تأليف كتابه في أواخر 2006) وكلاء سودانيين مثل السهم الذهبي (مامون عبد المتعال) مع إنّهم يقومون، حسب موقعهم المُعلِن هنا، باستيراد تويوتا لأكثر من أربعين عاماً والروبي (وكلاء إيسوزو حتى أخذتها دانفوديو؟ مؤخّراً) وشركة دال للسيّارات (آل داؤود عبد اللطيف) وكلاء ميتسوبيشي و"ورثة"، في العام 2006، وكالة مرسيدس، والنفيدي (وكلاء بي إم دبليو؟ ونيسان؟) وغيرهم مثل الخبير للسيّارات (هوندا) والصفوة للسيّارات (فولوكسواجن) والعربية للسيّارات (كيا) والتجارية الوسطى (دايو...أو ما بقي من دايو) وما إليه من وكلاء السيّارات الهندية والصينية والماليزية...
يرجى ملاحظة هذا التداول الكثيف لوكالات السيّارات وإشارته لعدم استقرار الأعمال بالسودان إذ يجب، في تقديري طبعاً، أن يعني مجرّد أن تصبح وكيلاً لشركة صانعة للسيّارات استقراراً تاماً لأعمالك كما يجب أن يعني ذلك أن لا تتخلّى عن مثل هذا البزنس إلا للشديد القوي لكن من الواضح أن البزنس بالسودان يعاني من سلسلة متّصلة من أعراض هذا الشديد القوي.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
خال فاطنة ...
| Quote: بالمناسبة بعد يومين من تاريخ صورك الحلوة دي يا حلو .. كنت في المسلمية يوم 7/11 حضرت من أبوظبي لوفاة الوالد عليه رحمة الله وجعل الجنة مثواه. |
أولا لوالدك المغفرة والرحمة ولكم حسن العزاء
أنا كنت موجود بها ساعة حضورك .. المسلمية حاليا ليس بها من الأهل إلا خالي العلم المعلم أحمد علي بابكر علي نور وأولاده ومنزله مواجه لمنزل الحاجة ونسة بت عباس وإبنها إسمه الهادي ضابط في جمارك الخرطوم ..
جميع الأهل غادروها في فترات متنوعة ولكننا لا زلنا نحج للمسلمية في فترات متباعدة ..
منتظرك ..
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: ناذر محمد الخليفة)
|
ناذر العريس
Quote: أولا لوالدك المغفرة والرحمة ولكم حسن العزاء
أنا كنت موجود بها ساعة حضورك .. المسلمية حاليا ليس بها من الأهل إلا خالي العلم المعلم أحمد علي بابكر علي نور وأولاده ومنزله مواجه لمنزل الحاجة ونسة بت عباس وإبنها إسمه الهادي ضابط في جمارك الخرطوم ..
جميع الأهل غادروها في فترات متنوعة ولكننا لا زلنا نحج للمسلمية في فترات متباعدة ..
منتظرك .. |
خالك .. أستاذنا درسنا في الثانوي ( بلاغة حيث كان بليغ اللسان وحلو الكلام ) والآن ما شاء الله عليه صار خطيب جامع الحي الجنوبي .. أستاذنا أحمد علي بابكر ربنا يديو الصحة والعافية.. علم من أعلام مدينة المسلمية قابلته صباح الوفاة ( ربنا يرحمو والدي ويجعل الجنة مثواه ) ..
اها يا ناذر ما زرت البقدادي ؟ ضريحو مجاور لمنزل خالك ..
صاح مقابل لبيت آل الهادي عباس ( عادل الهادي و أخوه ضابط الجمارك اسمو حسن الهادي .. إي الهادي والدهم )
بالمناسبة أين خالك عبد القادر (قدورة) علي بابكر ؟ حيث لعبنا سوياً .. افتكر آخر مرة قابلته بالصدفة في 96/97 .. في الصحافة حيث يملك بقالة على الناصية ..
يا ناذر المسلمية عشقي ومرتع صباي ..
إن شاء الله سو افرد لها بوست مخصوص .. وحتستولى عليه طبعاً
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
يا عادل البدوي ..
Quote: مِنّو العوض وعليهو العوض وأهل العوض. ضلّلني ضُل الشعار البِقى لي زي شعار بويك، الله لا غزَّ فيهو بركة. لكن يا ناذر "الحلية" الفي مقدِّمة العربية مُشْ ياها جنّية البحر المادّة صَدُرَا لا قِدّام ورَاسَا لا وَرَا؟! أكان ياها، إياني شريك (شريك ياخوي مُشْ Shrek) الفايز.
|
أنا ممكن أجيب ليك صورة تانية مقربة .. لكن المسابقة شن فايدتا لو أديتك ليها في خشمك سااااااااهلة كدي ! 
| Quote: أكان ياها التِحِت دي يا ناذر خير وبركة |
يا ها زااتا يا عادل على ما أفتكر .. تلقاها في الدلالة مش ولا بد وسيدا يقول ليك داير فيها إتنين وعشرين مليون !! مع إنو العربية البولو موديل 99 ما بالسعر دا ! والغريبة في ناس بيشتروها ..
زي أهلنا العرب .. الواحد عندو بوكسي (أب زيق) موديل 81 لو أديتو بدلو بوكسي هايلوكس موديل 2004 إلا يقول ليك تديهو كمان فرق خمسة مليون !!
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: ناذر محمد الخليفة)
|
| Quote: أنا ممكن أجيب ليك صورة تانية مقربة .. لكن المسابقة شن فايدتا لو أديتك ليها في خشمك سااااااااهلة كدي ! |
| Quote: يا زول إنت أقنع خلاص .. بقيت تلخبط لخبطة شديدة |
يا ناذر بصراحة سلّيت روحنا، ريّحنا ياخ. لكين الحِلية القلت ليك عليها جنيّة بحر وما جنيّة بحر طلعت صاح...صاااااح؟ أنا مشيت قوقلت وقوقيت ويهوهت وهوهوت ذاتو ومافي فايدة تب. جنية البحر طلعت بقولو ليها Flying Lady وهي ليدي ما عندها قَشَّة مرّة ممكن تركب في أي عربية، حتى لو عربيّة كارو!
المهم يا زول، لقيت ليك بغادي في أسواق وأسوق خاصة بحِليات الكبّوت وحِليات الشَبك!! أهو الواحد استفاد، بَسْ البِفِكّنا من الشِبكة دي شنو؟! غايتو، نثبِّت (جزء من) حقّنا في الجايزة، الموت والحياة ما معروفات:
المهتمّين يمكنهم قوقلة: Hood Ornaments و Grill Ornaments
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
خال فاطمة ..
غايتو الظاهر البوست دا حا نتونس فيهو أنا وإنت بلا عربات بلا بطيخ مع معاوية
Quote: بالمناسبة أين خالك عبد القادر (قدورة) علي بابكر ؟ حيث لعبنا سوياً .. افتكر آخر مرة قابلته بالصدفة في 96/97 .. في الصحافة حيث يملك بقالة على الناصية ..
|
غايتو حا أمتعك الليلة بالذكريات ...
خالي عبد القادر فعلا كان عندو بقالة إسمها أم المعارك في الصحافة مربع سبعطاشر لكن خلاها بعد فترة وفتح ليهو مغلق للوازم البنا جمب السوق المحلي ..
طيب ...
هاك دي صورة للخالة عشة بت أحمد والدة الخال عبد القادر :
وأزيدك من الشعر بيت :
دي صورة صحبك قدورة بي زاااتو وصفااتو :
كدة كيف ؟!!!
قصرت معاك ؟
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: ناذر محمد الخليفة)
|
Quote: كدة كيف ؟!!!
قصرت معاك ؟ |
معقوووووووووول العريس بقصر ( غمزة ) يا بكري يا ابصلعة خت لينا اشكال نشاغل بيها ههههه.
الله يطول في عمر الحاجة عشه ويديها الصحة والعافية
وسلااااااااااااامي الكتير لخالك قدروة قول ليو أحمد عوض البلال شمبول بسلم عليك كتير ..
إن شاء الله اقابلك في عيد الأضحي المبارك ( بدون لحمة هههههه )
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
عادل البدوي :
| Quote: يا ناذر بصراحة سلّيت روحنا، ريّحنا ياخ. لكين الحِلية القلت ليك عليها جنيّة بحر وما جنيّة بحر طلعت صاح...صاااااح؟ |
ما في شيتاً ضاريك إلا تركيزك مع الحليات .. يا زول دي عربات قديمة وممكن زول يكون ما ناقش حاجة يورث ليو عربية ويفتح السحارة بتاعت حبوبتو المرحومة ويطلع منها حلية بتاعت جدو المرحوم الكان سايق هنتر موديل العشرينات ويقوم يلصقا في العربية الورثا من أبوهو وتكون كريسيدا موديل التمانينات والناس تكون ما ناقشة
بصراحة بي صراحة ..
السؤال فيهو خدعة شوية والعربية الجبتها أنا ما ظنيتا من الموديلات الجات السودان رغم إنو الإنجليز كانو بيعزوها جدا في البلد الكانو مستعمرنها محل إتصنعت وأنا مستغرب ليه ما جات السودان ؟!! ، والعربات دي لسع شغالة هناك بعد ما طلع الإنجليز من البلد وهي صناعة وطنية مية المية ولحدي الأن كبار المسئولين في الدولة بيسوقوها(موديل الستينات و السبعينات ) لأنها عربات قوية جدا بالإضافة لي فخامتا وتحملا ..
الحاجة الطريفة في العربات دي إنو جواها في مروحة سقف صغيرة على الجنب وبتشتغل مع السوتش وبتدور تهوي لي كل الفي العربية ..
أها ما تقول لي يا عادل لسع ما عرفتها بعد التسهيلات دي ؟
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: ناذر محمد الخليفة)
|
| Quote: أها ما تقول لي يا عادل لسع ما عرفتها بعد التسهيلات دي ؟ |
ياخ بالغت والله...هندوستان وموريس؟! وأوّل سيّارة تصنع بالهند؟! ليهو حق الهندي وكل الهنود، والكانو مستعمرينّهم، يزعلو من الموقع دا
تحجب الجايزة تودِّيها وين آآمحجوب بالجد، عبد المحمود بِستحق تلاتة أرباع الجايزة أولاً لأنّو باين إنّو أمباسدور بتاع عربات وتانياً لأنّو طراز أمباسدور، في الأصل، لعربات أمريكية (أكان ما أخاف الكِضِب الصورة القاضية ، الأمباسدور الحمراء، لعربيّة أمريكية) كما وإنّ طراز أمباسدور استخدمته "ناش" في سياراتها الفخمة...الربع الباقي (وقيل الخالي) لي أنا دا عشان قرّررررربت لمّا قُلت ليكَ "بويك" وإنت قعدت تقول لي ما بويك وبوريك وما بوريك!
آآآآآآهـ...تمرين رهيب!
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Abomihyar)
|
إنت يا محمد خليل البورد دا حكايتو شنو مع (سكَّر؟) السيليلوز! قبّال كِدا محسن خالد جاب ليهو واحدة هنا اسمها "بِت الحطّاب" وقّفت البورد دا علي قنقرة ضنبو...
المهم، خلّيني يا خِلِّي انتهز الفرصة دي عشان أقول إنّو الطبلون المطعّم بالخشب (؟؟!!) يُضفي على السيّارة بهاءً وفخامة من أعلى الدرجات...هذا وقد قُلت مرّة بهذا البورد أنّ الشغف بالسيّارات من الشغف بالخيل المسوّمة والإسباوسيز...أو كما قلت.
راجيك يا ناذر وأمانة آآلحلية ما ليك حوبة
| Quote: في الورش يقوم الميكانيكيون بعمليات تحويلية معقدة حيث يُمَـــــــط الشاسية ويُركب فيه الصندوق الحديدي، ثم تزال الأبواب وتندة السقف وتحل محلها التعريشة ذات الصندوق الخفيف. |
تصدّق يا عبد المحمود إنّو من ضمن أجندتي الليلة إنّي أسألك: إنت المسلّطين البِدُقّو صناديق اللواري ديل مِنو
أبو مهيار دا لو رجع بذاكرتو وراء شويّة يمكن يشبط ليكم في بطاح البدفورد الأحمر دا ويقول ليكم حرّم كان شغّال بص تبع مدرسة رفاعة الثانوية للبنات بس فكّوا مِنّو الصندوق وأدّوهو وش بوهية...إييييه حليل أيام كان المدارس عندها بصّات بدفورد هسّع أكان إحترت ليك في خط بنزين، جامعة...جامعة ما توفِّروا ليك.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
.
ياعادل قلت:
| Quote: عبد المحمود بِستحق تلاتة أرباع الجايزة أولاً لأنّو باين إنّو أمباسدور بتاع عربات وتانياً لأنّو طراز أمباسدور، في الأصل، لعربات أمريكية |
راضي بالنص إذا أقنعت ناذر!
.
طيب عن السيارات الكلاسيكية (سيارات ما قبل الحداثة كما ذكر أحد الأخوان) الشاهدناها زمان في السودان:
في النصف الأول من الخمسينات انتعش الاقتصاد العالمي بعد انتهاء الحرب العالمية الثانية وكذلك بسبب الإنفاق الهائل على إعادة بناء أوروبا التي دمرتها الحرب، وسباقي التسلح والفضاء بين القطبين الأمريكي والسوفيتي، وكذلك بسبب الحرب الكورية.
انتفع السودان من هذا الرواج بصورة مباشرة حيث ارتفع الطلب على الصادرات السودانية ـ القطن والمحاصيل الأخرى ـ وأَثـْرت طبقات معينة منها كبار المزارعين، وتجار المحاصيل، ووكلاء التصدير والاستيراد، ووكلاء الشركات الأجنبية (جُلهم من الأغاريق والأرمن)، أثرت ثراءً فاحشاً بمقاييس تلك الأيام.
تزايد طلب هذه الفئات على السلع الكمالية، وراجت ملح وطرائف عن الأثرياء الجدد الذين يقتنون الثلاجات دون أن يتوفر لديهم الكهرباء أو الوقود اللازم لتشغيلها وآخرون يستعملونها لتخزين الملابس والأحذية.
من بين السلع الكمالية التي اشتد الطلب عليها في تلك الفترة كانت السيارات.
كانت الصناعة الأوربية (البريطانية، الألمانية، الفرنسية، والايطالية) تعاني من آثار التدمير لفترة ما بعد الحرب ووجهت كل إنتاجها لأسواقها المحلية، كما أن صناعة السيارات اليابانية لم تكن قد فرضت وجودها بعد على المسرح العالمي فدخلت الصناعة الأمريكية بقوة لسد الطلب المتزايد وأقبلت الفئات الثرية حديثاً على شراء السيارات الأمريكية المنتجة في تلك الفترة.
من بين الطرازات التي ظهرت الفورد الشهير، والدودج، والبليموث، والشيفي، والكاديلاك، ... ذات التصاميم النمطية المحسنة قليلاً عن إرث تصاميم الثلاثينات والأربعينات الميلادية:
.
.
بيعت هذه السيارات لاحقاً بسبب تقادم موديلاتها وبعد طرح تصاميم جديدة تختلف جذرياً عن ما سبقها، وعملت كتاكسي في مختلف أنحاء القطر. وكان من المعتاد رؤية عربات التكسي السوداء في المدن المختلفة (مدني، بورتسودان، الأبيض، عطبرة، شندي، كوستي، بربر، مروى، دنقلا، ...) وهي مصطفة في الأسواق وأمام المستشفيات وفي محطات السكك الحديدية بانتظار الركاب:
.
عمرت هذه السيارات طويلاً وكنت تشاهد بعضها حتى فترات متأخرة من الستينات والنصف الأول من السبعينات ثم اندثرت.
.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
عادل بدوي ...
| Quote: (أكان ما أخاف الكِضِب الصورة القاضية ، الأمباسدور الحمراء، لعربيّة أمريكية) |
قطع شك دي ما عربية أمريكية ..
دي عربية هندية مية المية ومن ولاية KARNATAKA ودا بيظهر ليك في إختصار الحروف الأوائل للولاية في نمرة العربية :
وKARNATAKA بالمناسبة ولاية تقع جنوب الهند وعاصمتها BANGALORE ودي هي المدينة الانا عشت فيها حوالي سبعة سنوات طالب فيها ، وهي مدينة سياحية وكنيتها INDIAN GARDEN CITY وهي أخر مدينة طلع منها الإنجليز في الهند ولي هسي بيحنو ليها وبيزوروها للسياحة وللبكاء على الأطلال ..
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
خال فاطمة !!!
لا حوللاااااااااااااااااااااااااه !!!!!!!!
والله رجعتني لي ذكريات ما قبل الزواج ..!!
إيييييييييييه !!! أيام كانت لها إيقاع ...
زمن العزوبية والعود وحفلات الديم والدروشاب وناس بري والحلة الجديدة ..
زمن قفا نبك
هسي دا كلو بقى في تعداد الماضي والشجن الأليم ..
بس إنت ما تختار إلا تصورني وأنا وشي مكرفس كدة ؟
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: هشام المجمر)
|
| Quote: راضي بالنص إذا أقنعت ناذر! |
يا عبد المحمود ياخي كان تقول يا الله ولد أكان تجي بِتْ
انا التلاتة أرباع بتاعتك دي قلتها أخلِّص بيها رُبعي من ناس "حُجبت الجائزة" ديل، تجي تقول لي نُصْ وما نُصْ...هسّع أسوِّي شنو عليك الله!
للعم عبد الرحمن حاج عبيد الرحمة والمغفرة، يا أبو مهيار.
والله بحتَّ الانترنيت دا بحت عشان ألقى لي صورة ولو مقاربة للبص داك أعزّيك بيها ما لقيت.
أسأل الله أن يتقبّل عمّنا عبد الرحمن ووالد أخونا أبو فاطمة قبولاً حسناً والبركة فيكم آجماعة.
| Quote: قطع شك دي ما عربية أمريكية .. |
غايتو الحِلية الفي الشَبك (تاااااني؟!) شعار أميريكان موتورز كوربوريشن.
يا ناذر، أكان الشعار دا ركّبتو إنت قول لينا عشان نِنْطَم بدل ما نقعد نضيِّع زمننا في مسابقات العكلتة دي. ياخي أقلاّها أبْغَر من المجمّر دا
Quote: العربة هى فورد
بس ما كورتينا
زفير فور |
واحد...اتنين...تلاتة  غايتو جِنِس أريحية عليك يا هشام المجمّر، ما شُفْتَ ناذر دا نشّف ريقنا كيف!
يا جماعة ما فيكم زولاً يقدر يصغِّر صورة عربيّة خالد دي وألاّ يهديهو يصغِّرها...البوست دا حوَّص بينا فَدْ مرّة.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
والله أجمل بوست فعلا" في الفتره الاخيره
لكن نسيتو أهم عربات السودان:
1- المجروس عربية الجيش الشهيره أيام نميري وورونا جا من وين
2- حافلات النيسان اليورفان الشغاله حدي هسي حمولة 14 و 25 راكب
3- السوزوكي الياباني الظهر في نص التمانينات
4- ISUZU ودي ما عارفها مصنوعه وين
5- وعمنا القندران الفيات اشهر شاحنه في السودان
6- AUSTIN كان هو برضو كومر قبيح الشكل
7- KY KB عائلة الهينو بألوانهم المشهوره الأصفر والبرتقالي
8- اللادا تشبه الفيات كده وجابوها للدكاتره وعلي ما اظن روسيه الصنع
9- المازدا وبسموها السماسره المازدا الفاسده بالرغم من تصميمها الجميل واشهرها الموديل اليشبه الكريسيدا 78 الظهرت في صوره سابقه بلونها الازرق.
ولكم الشكر
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: معتصم محمد صالح)
|
| Quote: وتكرم عينك يا عادل |
مشكور يا خالد، وأبقى ما تنقطع بالجد يا جماعة، إنتو سيد البوست دا حِرْدو لينا وألاّ شنو!
| Quote: وخلال العقد الممتد منذ منتصف الخمسينات احتلت السيارة موقعاً محورياً كتعبير عن كل ما يحدث؛ ومَن مِن الذين عاصروا تلك الفترة لا يستحضر صور السيارات التي كان يقودها جيمس دين والآخرون من نجوم السينما، ثم السيارة الأشهر "الفورد لنكلن" المكشوفة في موكب جون كينيدي المهيب في زيارته الأخيرة لدالاس قبيل لحظات من اغتياله: |
كدا الشغف وألاّ بلاش يا عبد المحمود وليتك أسهبت، مشكوراً، حول وجود السيّارة بالثقافة الشعبية السودانية زمااااان وتعبيرها عن بعضٍ مما كان يحدث آنئذٍ.
| Quote: غايتو المرة دي الحليات ما خدعتك .. |
أحيلاً...اتحلّينا بالحلية! مشكول يا زول، بالجد تمرين رهيب ومفيد في نفس الوقت.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Adil Al Badawi)
|
| Quote: ISUZU ودي ما عارفها مصنوعه وين |
بادئ ذي بدء، يا محمد عبد اللطيف، فإنّ شركة إيسوزو هي رائدة صناعة السيّارات باليابان فقد صنعت أول شاحنة تصنع باليابان وذلك في العام 1910 (شفت كيف!).
كما تعتبر إيسوزو من أكبر وأفضل صانعي محرّكات الديزل بالعالم (فهي قد أنتجت حوالي عشرين مليون محرّك منذ بدأت انتاج هذه المحرّكات في العام 1936) وهي لا تنتج هذه المحرّكات للسيّارات التي تصنعها فحسب وإنّما لسيارات تصنعها كلٍّ من أوبيل، ساب، رينو، شيفروليه، جي إم سي بالاضافة إلى تويوتا التي اتفقت معها إيسوزو مؤخّراً لتزويدها بهذه المحركات لسياراتها التي تستهدف بها السوق الأوربي.
بل إن إيسوزو تصنع محرّكات الديزل لأغراضٍ متعددة مثل النقل كالسيارات والشاحنات والقوارب والناقلات السوبر وللأغراض الزراعية والصناعية مثل المولّدات والفوركلفتات والتراكتورات والمعدّات الصناعية والزراعية ولأغراض العمران والتشييد مثل اللودرات والحفّارات وما إليه.
بقى سياراتها مصنوعة وين؟...ياهو دا السؤال الحا يدخّلنا في عولمة صناعة السيّارات ولك أن تعلم أن البكاسي من نوع إيسوزو ديماكس تنتجها إيسوزو اليابانية بمال جنرال موتورز الأمريكية بمصانع ميتسوبيشي اليابانية بدولة تايلاند !
وجود إيسوزو بعربات زمااااان بالسودان كان أكثره بمشروع الجزيرة لكنّني أتوقّع لمنتجاتها عودة قوية للسوق السوداني فأسعارها أفضل بالمقارنة مع الماركات اليابانية الأخرى هذا فضلاً عن أن شاحناتها الثقيلة (إذا كانت شاسيهات حمولة عشرين طن فما فوق، التي تصلح ليُركّب عليها قلاّبات، أو رؤوس تريلات) سوف تبدأ غزواً مكثّفاً لأسواق افريقيا والشرق الأوسط اعتباراً من العام 2008
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
| Quote: طراز التروبر SUV ذهبت به لبورتسودان بداية الثمانينات وكانت ثابتة وراسخة على الطريق |
بأنواع عدد أسمائها ستّة وبشركات صنعته عددها ست تنطلق من خمس دول، الإيسوزو تروبر قصّتو قصّة...!!
بدأ انتاج إيسوزو "تروبر" في العام 1981 وتعدّدت أسماؤه والشركات التي صنعته والدول التي تنطلق منها هذه الشركات فهو من إيسوزو (اليابان) إيسوزو "تروبر" وإيسوزو "بيق هورن" ومن هوندا (اليابان) هوندا "هورايزون" وهوندا "أكورا إس إل إكس" ، ومن شيفروليه (أمريكا) شيفروليه "تروبر" ومن أوبيل (ألمانيا) أوبيل "مونتيراري" ومن فوكسهول (بريطانيا) فوكسهول "مونتيراري" ومن هولدين (أستراليا) هولدين "جاكارو" وهولدين "مونتيراري"...لكنّ هذا الزخم لم يشفع لهذه السيّارة فقد أُوقف انتاج التروبر في العام 2002 ليخلفه أخويه غير الشقيقين (كون إنّهما ينتجان بأمريكا) إيسوزو "آكزيوم" الذي لم يعمّر بهذا العرش طويلاً إذ عزله (هو وأخيه الآخر إيسوزو "روديو") بضربة واحدة أخوهما الشقيق إيسوزو "أسندر" وكان ذلك في العام 2004
قصة هابيل وقابيل هذه في فئة الـSUV من إيسوزو ليست صدفة فقد سبقها تساقط انتاجها من سيارات الركّاب (السيدانات والحافلات) ويعزى ذلك تحديداً للنجاح الباهر الذي لاقته إيسوزو في قطاع السيارات التجارية لاسيّما ذات المحرِّكات التي تعمل على الديزل وأرجو أن أعود لاحقاً لأستعرض سيّارات هذا القطاع. أما الآن فإليكم بعض صور لبعض أنواع التروبر وخلفائه الراسخين والمنقرضين:
إيسوزو "تروبر" موديل 1988
هولدين "جاكارو" موديل 1989
إيسوزو "تروبر"، "بيق هورن"...الخ موديلات 1992 – 1997
إيسوزو "تروبر"، "بيق هورن"...الخ موديلات 1998 – 2002
إيسوزو "روديو" موديلات 1991 – 2004
إيسوزو "آكزيوم" موديلات 2002 – 2004
إيسوزو "أسندر" موديلات 2003 - 2007
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: هشام المجمر)
|
عشان حبيبتك نزيدك، يا هشام، من صورها. أها،
تاخد أوبيل كابيتان موديلات 1938- 1940؟
وألاّ موديلات 1951 - 1953؟
وألاّ موديلات 1954 - 1957؟
وألاّ موديلات 1958 - 1959؟
وألاّ موديلات 1959 - 1963؟
وألاّ موديلات 1964 - 1968؟
وألاّ موديلات 1969 - 1970؟
وألاّ؟...خلااااااس، شبع هو الكابيتان ذاتا وقفت سنة 1970
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: ناذر محمد الخليفة)
|
الـSUV وبعض اختصارات، في شأن السيّارات...
أوّل مرّة أعرف فيها معنى SUV كانت في العام 2003 وكُنتُ قد هممت بشراء إيسوزو تروبر فـ"دقشت" الانترنيت عشان ما أدقس وأتورّط ساكت...خمس سنوات منذ ذلك التاريخ وتورّطت فيما تورّطت فيه من لانسر وكورسيكا وكامري وأوبترا وباثفايندر وفي الطريق قادمٌ جديد... تريلبليزر وألاّ إكسبلورر وألاّ برادو ما معروف، حسب التساهيل وتسهيلات شركات التقسيط، وامكن كمان "سانتا في"...ليه لا فهو أكيد في، لاسيّما في قبايل الكريسماس دي، وأكان مافي...الله في.
المهم SUV، طال عمركم يا الما عارفينّها، هي اختصار لـSport Utility Vehicle وتشمل السيارات الرياضية والمتعدّدة الاستخدامات وليس هذا بتعريف جيّد لذا فهي تُحشر، بـ"اللغة الدارجة للماركات" (ودي كمان قصة براها) في كلمة واحدة هي جيب Jeep ومن ذلك قول "اعلان" طراز Jeep من كرايسلر: "ما جيب إلا الجيب" وتُجمع جمع فلوس صارخ ألا وهو "جيوب" وفي كلٍّ خير (وأحياناً شر) ومال كثير (وأحياناً قليل) والله المستعان.
أكيد حا أرجع عشان أ"جيب" ليكم شوية اختصارات تُعينكم في اللحاق بالمعرفة في مواصفات السيّارات...دا طبعاً أكان بِتَتلحق وهي، بصراحة، ما بتتلحق لأنو، أنا القدّامكم دا، قبّال ما يقودني مصطلح Parktronic (لأعرف وجود APS بجانب ABS بسوق مصطلحات السيّارت) لطَشني مصطلح TPMS الذي يختصِر Tire Pressure Monitor System والمعنى واضح، وأكان ما واضح حا نوضِّبو.
قد يقول قائلٌ وما علاقة ذلك بـ"عربات زماااااان..." ونقول العلاقة هي أنّ بعض عربات زمااان كانت ما بِتقوم ذاتو وإن قامت "تقوم" لزّة وإن تعذّر ذلك فبالمنفلة فأصبحت بعض عربات الآن "تقوم" بما يسمى "البصمة" وبعضها كان بِختُّولو دقار وكلّها الآن تستخدم فرامل اليد وبعضها، لواري التهريب بالبطانة، ينطبق عليه قول الكريم "وبالنجم هم يهتدون" وبعضها الآن يهتدي لوجهته بالجي بي إس وإخواتها من أنظمة الـ"نافيقيشن" وبعضها كان ماشي وملصوق في قفاه عبارة "مكتّحة" تقرأ "على الوهّاب" لكنّ بعضها الآن يمشي على الكروز كونترول والدايناميك إستابيليتي كونترول والتراكشن كونترول...يمشي ويمشي ويمشي وأكان ما وِصِل، لسبب أو لآخر، فبرامج الرود سايد أسيستانس بالهَبَل...وجايين، أكان الله هوّن، لكلِّ ذلك ولغيره من مِحن "التريمبيل"
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
.
سرد شيق يا عادل لمسيرة "التروبر".
اعتقد أن مكانه لا زال شاغراً وسط شريحة سيارات الدفع الرباعي ذات الحجم المتوسط. والدرس المستخلص أنه إذا لم تتمكن من المجاراة في هذا السوق الذي تتحكم في المنافسة الشرسة (جز رؤوس) ستكون قد ارتضيت لنفسك بالهزيمة والإقصاء.
عموماً عربات الدفع الرباعي كانت تُقتنى سابقاً لأغراض عملية بحتة ـ السفر والتنقل في طرق السودان الوعرة وغير المعبدة ـ نسبة لقدرتها على التحمل وتتواجد بصورة محدودة وفردية كاستعمال داخل المدن. هذه الشريحة كان يسيطر عليها اللاندروفر بصورة شبه حصرية في الخمسينات مع تواجد محدود للجيب الأمريكي ثم أطلت اللاندكروزر الجبلية في الستينات وانتشرت الآن كعربة وجاهة خاصة بعد سيادة روح التمكين "للقوي الأمين"، وإجراءات تحفيز الاستثمار عبر الإعفاء من الجمارك؛ وجارى من يستطيع المجاراة في ذلك.
أذكر عبداللطيف الجميل رحمه الله يروي ذكرياته؛ قال انه بدأ ميكانيكياً بسيطاً يذهب لبورتسودان ليجلب ماكينات عربات الدفع الرباعي المُعَمرٌَة مع التركيز على ماكينات التويوتا اللاندكروزر، ثم نال وكالتها بعد ذلك وانطلق لتأسيس إمبراطوريته المترامية.
.
هنالك انتشار ملاحظ مؤخرا لعربات الدفع الرباعي في السودان ومنها "نيسان مورانو" المميزة الطراز. تنقَلت داخل واحدة يمتلكها صديق عزيز وحقيقة تجربة ممتعة ـ راحة وبَــرْاحــة وإطلالة من علٍ على الآخرين:
لكن كما يقال "العين بصيرة واليد قصيرة" (160 مليون من الوكيل ـ النفيدي)
.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
تعرف يا هشام، أستاذ بُر رحمه الله في بحري الثانوية كانت لديه اوبل ريكورد ببابين. استفسرت منه عن السبب فأجابني ساخراً بأنها العربة الوحيدة من نوعها في العالم ـ صنعت له خصيصاً وأقفلوا المصنع من بعد ذلك.
أما الكاديت فأذكر صديق كان يمتلكها في السبعينات وسببت له العديد من المشاكل فأضمر في نفسه شيئا. أخذها لمكان ناء طمعاً في التامين وشبك الأسلاك فاشتعلت النار. لم تكتمل المؤامرة إذ انشقت الأرض عن أعراب أهالوا عليها التراب وأخمدوا النار وأفشلوا الحيلة.
.
يا عادل:
| Quote: "وبالنجم هم يهتدون" |
أحد الخواجات روى أنه كان في رحلة في غرب كردفان وخيم في الصحراء. لم يستطع النوم طيلة الليل بسبب أصوات عربات وشاحنات ثقيلة تمر على مقربة منه. غير أنه كان لا يرى شيئاً في الظلام الدامس عندما يخرج من الخيمة ويعتلي سقف اللاندروفر. في الصباح استفسر عن الأمر من عربان في فريق قريب فأجابوه بأن هؤلاء مهربين يسوقون شاحناتهم بدون أضواء قادمين من وإلى ليبيا وتشاد ـ يعني عسكر قرب نقطة تلاقي طرق سريعة motorways للمهربين.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
| Quote: لكن كما يقال "العين بصيرة واليد قصيرة" (160 مليون من الوكيل ـ النفيدي) |
الجيوب دي يا عبد المحمود: نيسان مورانو (32.000 دولار)، فورد إدج (32.000 دولار) فولوكسواجن طوارق (38.000 دولار)، لكزس آر إكس تلاتمية وخمسين (39.000 دولار) جيوب صغيرة في حجمها لكين بالله عليك شوف جِنس القروش الممكن تكُبّها فيها دي...
أما الجيوب المِن حجم الجيوب الفوق دي وبِتِتْكبّ فيها قروش بأكتر من الدبُل، فحدِّث عنها ولا حرج: مرسيدس إم إل تلاتة وستين (86.000 دولار)، بورش كايين (94.000 دولار)...كأيّن من دولار يحكي عن دولار...كما "و كأين من دابة لا تحمل رزقها الله يرزقها و إياكم و هو السميع العليم"
| Quote: حدثت نقلة نوعية أخرى في نوعية العربات المشاهدة في الخرطوم وغيرها من المدن بحلول النصف الثاني من الستينات وحلت موديلات أمريكية جديدة مستطيلة الشكل وبعضها مكشوف مثل الشفروليه إمبالا والبونتياك والرامبلر بالسودان: |
والله دي مداخلة، يا عبد المحمود، ما عندنا شيء نقولو عليها إلا: الله يديك العافية والجيب المليان...وجيب جيبين، من اختيارك، من الجيوب الفوق دي.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
How are you doing guys
I am so sorry to be absent for that long time
I was moving to a new apartment and having a big snow storm now
with temp. -14 c but , working hard on seting up
.my internet cable to quntinue with you
I appreciate all you done and apologize again
I will be right back soon
Moawia
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
| Quote: I was moving to a new apartment and having a big snow storm now |
يا زول حمداً لله على السلامة وإن شاء الله الدار الجديدة، بي جليدا دا، مرحّبة بيك.
يا أبو فاطنة ياخي داير أقول ليك صغِّر صور الطوسان دا بَس خايفك تزعل تطسّني بيهو...ما شاء الله والله.
الله يديك، ويدينا، خيرو ويكفيك، ويكفينا، شرّو.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
مشكور يا عبد المحمود على شحذ الأذهان
1. أول عربة بالسودان جلبها:
أ. غردون: اللهمّ إلا غردوناً غير الحاصرو (وكتلو ذاتو؟!) المهدي.
ب. ونجت: (امتدت فترته كحاكم عام من 1900 إلى 1916)، أها...ياهو دا زولنا؟!
ت. كتشنر: دحين الزول دا ما جاء السودان سنة 1898 قبّال ما يكون في عربات يعتمد عليها في أي مكان؟!
ث. لي ستاك: دحين الزول دا ما كتلوهو في القاهرة سنة 1924 وألاّ يا ربّي يكون دا زولنا؟!
2. أول عربة صالون دخلت السودان كانت من طراز:
أ. رولز رويس: قطِع شك رولز رويس، ساااي كدا حُبّاً في الرولز رويس
ب. كاديلاك
ت. فورد
ث. لا شئ من أعلاه
3. أول عربة صالون دخلت السودان كان مالكها:
أ. السيد عبدالرحمن المهدي: إجابة محذوفة بموجب السؤال الأوّل.
ب. السيد علي الميرغني: إجابة محذوفة فد مرّة.
ت. الحاكم العام: الإجابة الصحيحة
ث. السيد الشريف الهندي: إجابة محذوفة فد مرّة.
4. أقيمت إشارة المرور الأولى عند تقاطع:
أ. القصر مع الجامعة: الإجابة الأقرب (مجرّد تخمين)
ب. الجمهورية مع الجامعة
ت. القصر مع الجمهورية
ث. الجمهورية مع الحرية
5. أول "سودانية تقود عربة خاصةهي:
أ. "ست العربية"
ب. شقيقة الموسيقار الذي لحن رائعة الجابري "درب المحبة" : مجرّد تخمين أرجو أن يكون صحيحاً وإن كان ذلك كذلك فإسمها علوية الفاتح.
ت. د. خالدة زاهر
ث. كل ما تقدم صحيح
إيدك بقى يا عبد المحمود على التقدير المعنوي
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: عبدالمحمود محمد عبدالرحمن)
|
| Quote: يفتح الله ياخوي ... |
يستر الله...والله يستركم بس مع مسابقتي (مسابقة "زولنا"):
"زولنا" هو الأرستقراطي المجري النمساوي (1895 – 1951) الذي لمع اسمه في فيلم حصل على جائزة الأوسكار. قاد "زولنا" سيارته على ضفاف النيل من مصر إلى السودان لأول مرّة عام 1926 وعاد في العام التالي في رحلات استطلاع وصيد قصيرة.
كان "زولنا" قد أصبح بعد عام 1921 ممثلاً لشركة نمساوية لصناعة السيارات في مدينةٍ مجرية وكسائق فاز بالعديد من السباقات في تلك الحقبة. ثم في عام 1929، في مقدمة لرحلاته الاستكشافية الصحراوية، اخترق "زولنا" شرق افريقيا والسودان ومصر بشاحنتين وفي يونيو 1929 انطلق مع أحد الأمراء من وادي حلفا إلى واحة سليمة ثم واصل سيره على جزء غير مطروق من درب الأربعين لينتهي في واحة الخارجة بجنوب غرب مصر ثم بين يناير وأبريل 1935 أنجزت مجموعة بريطانية رحلة مثيرة غير مسبوقة مجتازة تقريباً كل الأجزاء الرئيسية من الصحراء الليبية والتقت بـ"زولنا" في مدينة الفاشر.
أسئلة "زولنا" الخمسة:
1. من هو "زولنا"؟
2. ما هو الفلم الذي حصل على جائزة الأوسكار ولمع به اسم "زولنا"؟
3. ما هو اسم شركة السيّارات النمساوية التي كان يمثّلها "زولنا"؟
4. ما هو نوع الشاحنتين التين اخترق بهما "زولنا" شرق افريقيا والسودان ومصر؟
5. من هو الأمير الذي انطلق معه "زولنا" من وادي حلفا إلى واحة سليمة؟
الجائزة: مسنجر مكنتو ستة سلندر، سعة 3.500 سي سي "بايت" نتعشّم (رغم أنف المثل القائل: الحاري ولا المتعشِّم) أن تقدّم للفائز من المؤسّس والرئيس التنفيذي لشركة سودان آي تي وذلك في بداية العام الجديد.
| Quote: درجتين فقط من 10 ـ إجابة واحدة بس الصاح ... |
نعمة من كريم...Thank you for your hostility, I hope to get a chance to retaliate
أو كما يُنسب لرئيسٍ افريقي أنّه قال شاكراً ملكةً بريطانية على حسن ضيافتها.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
.
شكراً الأخ أدروب؛ صورة خلابة ومعبرة للطراز الكلاسيكي للخنفساء،... الأروع في البوست حتى الآن بحكم التوافق مع البيئة المحيطة بها ـ الألوان، والطبيعة الصحراوية بمتطلباتها الصعبة والقدرة على التحمل، و"الزول" ومن ثم انتمائها المباشر لموضوع البوست .. وحقيقة الفلكس تتميز بالمتانة والصمود ولا أرى سبباً مقنعاً لإيقاف إنتاجها في الثمانينات وتحويله إلى خارج ألمانيا، ثم العودة لطراز يتميز سوقه بالمحدودية (شريحة الشباب من أصحاب الدخل المرتفع) بدلا عن الطراز الشعبي السابق:
تعبيراً عن المتانة أذكر مواجهة شهيرة جرت أمام كبري النيل الأبيض جهة أمدرمان بين فلكس خنفساء ولوري ضخم. تحطم اللوري و"طاح" منقلباً بينما صمدت الفلكس في موقعها (ديفيد وجوليات).
صورت الصحف الحادثة وكتبت عنها، وتركت شرطة المرور اللوري المقلوب لمدة طويلة كأمثولة وعبرة ليعتبر بها العابرون Adding insult to injury.
.
بعض السيارات الصغيرة الأخرى في الستينات كان منها المازدا:
كانت الأصغر على الإطلاق. اعتبرت فلتة من صغر حجمها وكانت تبدو كمزحة.
.
الفيات:
متناهية الصغر كذلك:
هذا الموديل يرتبط في ذهني بحادث بشع شنيع وقع في شارع المعونة بالخرطوم بحري قبل أربعين عاماً بالتمام والكمال ..
.. أتي قس إيطالي يقودها ونزل في عجلة من أمره ليشتري شيئاً من "أجزخانة الملتقى" عند تقاطع شارع المعونة مع شارع كبري شمبات (شارع الزعيم الأزهري الآن). .. في عجلته تلك ترك القس محرك العربة دائراً ودخل للصيدلية. في غمضة عين وثب لص شاب إلى داخل الفيات وانطلق بها شمالاً لا يلوي على شيء. في غمرة انفعالاته التفت اللص للوراء لينظر ما حاق بالقسيس ولم ينتبه لانحراف العربة القزم نحو الشاحنة العملاقة القادمة سريعاً من الاتجاه المقابل ..
حدث الاصطدام الهائل وسويت الفيات الصغيرة بالاسفلت هرساً.
اعتبر البعض الأمر من كرامات القسيس.
.
الاوستن ميني:
أحد أشقائي امتلكها لفترة وكانت مشكلة في الخريف لأنها منخفضة "البودنق" ـ بلغة الميكانيكية. أيضا موديلاتها الحديثة (ميني كوبر) تستهدف شرائح شبابية ذات دخل مرتفع.
.
السيتروين الفرنسية:
منتشرة في أوروبا خاصة في أوساط الطلاب والشغيلة وصغار الموظفين .. لكنها كانت معدودة في السودان. صديقنا محمد الأمين التوم كان يمتلك إحداها بنهاية السبعينات؛ وما قصّـرت معاهو.
تَـوفِـر الحد الأدنى الأساسي Basic لصاحبها وزهيدة الثمن. النكتة المعروفة عنها: إذا شئت أن تضاعف من ثمنها عند البيع فقم بتعبئة خزانها بالوقود.
.
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: نها محسن أبورأس)
|
تحياتي لكم جميعا وأحب أن أضيف هنا معلومة غريبة سمعتها من المرحوم عبد الرحمن شداد أحد أعضاء مؤتمر الخريجين فقد ذكر أن أول عربة دخلت السودان بعد عربة الحاكم العام لم تكن تخص أيا من السيدين أو الشريف الهندي أو غيره بل كانت تخص سيدة سودانية اشتهرت بلقب "بت بيلة" وتنطق كلمة بيلة هكذا baylah وذكر أنها كانت "متعهدة توريد نساء للجيش الانجليزي" وأنها كانت من عائلة مرموقة جدا في السودان وأن الانجليز أرادوا اهانة أهلها بإعطائها مكانة خاصة. وأنها أول من بنى قصرا من السودانيين أذكر أنه وصف لنا موضعه تماما في الخرطوم ولكن للاسف نسيته بسبب طول المدة. وذكر لنا أنها أرادت أن تستقدم سواقا انجليزي لكن الانجليز منعوها من ذلك فاستجلبت سواق مصري!
وحكى لنا رحمه الله أن مشادة ضخمة نشبت وكاد أن يتم فيها فصله من مؤتمر الخريجين عقب انتهاء حملة مؤتمر الخريجين لبنا المدارس الأهلية لأنه اقترح أن يتم تسمية مدرسة أم درمان الثانوية للبنات مدرسة بت بيلة الثانوية للبنات لأنه أكد أن بت بيلة لم تكن أكبر مساهم في حملة المؤتمر تلك فحسب بل أنها كانت السبب الرئيسي لنجاحها لآنها كانت تتصدر المتبرعين وتتبرع بمبلغ ضخم فيعز على الرجال أن تفوتهم امرأة وليست امرأة فحسب بل امرأة ذات سمعة معينة في التبرع فيبادرون بالتبرع بمبالغ أعلى وتستمر المباراة بينها وبينهم وأنها في الأسواق الخيرية كانت تشتري المعروض بأعلى سعر ثم تتبرع به مرة أخرى للمؤتمر وأنها كانت تحضر محاطة بوصيفاتها وقد ارتدين كميات هائلة من الذهب.
هذه صفحة من تاريخ السودان السري الذي أخفاه بعض من عده شيئا مخجلا وآمل أن لا تكون كلماتي هذه المصدر الوحيد المكتوب عن هذه الشخصية العجيبة التي تستحق أن تكون بطلة لرواية وكم من صفحات وصفحات من تاريخ السودان تم اخفاءها وحرقها وشطبها لآنها لم تعجب أشخاصا بعينهم يريدون أن ترى الأجيال القادمة تاريخ السودان من منظورهم هم وتتكتم على جرائم اسلافهم أو ما يقدح فيهم!
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
الأحبة جميعا
Mahathir
ناذر محمد الخليفة
عبدالمحمود محمد عبدالرحمن
Abomihyar
عواطف ادريس اسماعيل
Adil Al Badawi
محمد المرتضى حامد
خال فاطمة
ابراهيم عدلان
Aymen Tabir
shammashi
Khalid Osman Jaafar
هشام المجمر
محمد عبداللطيف
معتصم محمد صالح
Adrob wad Elkhatib
بشير حسـن بشـير
شهاب الفاتح عثمان
نها محسن أبورأس
محمد عثمان الحاج
و الزوار الكرام
كل عام وأنتم بخير
والعيد مبروك عليكم كلكم
ها قد عدنا بعد فترة غياب قسرية وظروف جبرية
ممتن لكم أنا وأنتم تديرون البوست كأحسن و أجمل مما تخيلت و توقعت له
لذلك جلبته بعد الأرشفة لأحفظ مجهودكم المقدر والصور الجميلة.
طبعا بهرتني الصور و المعلومات وعدد الزوار
سأقرأ مداخلاتكم بمزاج وبجيكم راجع كلكم 1-1
ربي يديكم العافية كلكم
| |
|
|
|
|
|
|
|
|
|
Re: عربات زمااااااان في السودان ( توجد صور ) (Re: Moawia Mohammed)
|
بمناسبة العيد
بديكم واحد بوكس تايوتا هايلوكس ( برنسه ) موديل 81 ونكته وعيشة زياده.
قالوا مغترب رجع السودان بي ساوند سيستم النوع الحديث وغالي داك وطبعا لقي البلد بتنوم من الساعة 11 وحفلات مافي والساوندات أكتر من الرقشات , فقرر يبيعه ويشتري حافلة هايس , قام مشي الدلالة لقي ليك السماسرة البيقعدوا في الواطه ديك ويشختوا بالعصاية , فقال ليهم يا جماعة عندي ساوند وعايز أقايطه بي حافلة , نط واحد من السماسرة وقال ليهو نشوفوا أول حاجه أنت موقفو بي وين.
| |
|
|
|
|
|
|
| |
خال فاطمة
عبدالمحمود محمد عبدالرحمن
ناذر محمد الخليفة
.
Abomihyar
Khalid Osman Jaafar
هشام المجمر
معتصم محمد صالح
Moawia Mohammed
Adrob wad Elkhatib
بشير حسـن بشـير
شهاب الفاتح عثمان
نها محسن أبورأس
فيس بوك
تويتر
انستقرام
يوتيوب
بنتيريست