|
|
 الغلّوتيّات (الفوازير) السودانية
|
في أوائل التسعينات كنا نحتفل بعرسان، فأقمنا رحلة في إحدى المزارع بسلطنة عُمان. أتت إلي طفلة صغيرة، وكنت أقدم برنامجا في الرحلة، وقالت لي أنها تريد أن تشارك في البرنامج وعندها (فزّورة). قلت لها سأعطيها الفرصة، ولكن أولاً أريد منها أو من أحد الأطفال أن يعطيني الكلمة المقابلة السودانية لكلمة فزّورة. لم يستطع أي من الأطفال الإجابة. وكنت أريد كلمة (غلّوتية).
أحبائي .. لدينا في عاميتنا الكثير والكثير من الغلوتيات التي كنا نتبارى بقولها وحلّها ونحن صغار، هل تذكروا شيئاً منها؟ أريد مشاركتكم واجترار الغلوتيات التي قلناها في صغرنا حتى نتذكر هذا الفن الجميل الذي ذخرت به عاميتنا.
أمثلة للغلوتيات:-
دخل القش .. ما قال كش = الضُل
فتحتها فتحة كتاب .. لقيت فيها الأكل والشراب = البطيخة
و ....
جودوا بما عندكم
|
|
 
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخ / محمد أبو العزائم
صباحك خير
انت عاوزنا نكتب الغلوتية وبس ولا نكتب معاها الحل ؟
غايتو نحن عندنا ناس كلامهم كلو ألغاز
البقعد معاهم ويقصدوه بغتسوا حجرو ويخلوه يتلفت متل الديك الواقعلو من رحيل .
إليك بغض الغلوتيات :ـ
سمح الأتر =......
الضل الرهين ..........
كان شالوه رطن وكان خلوه أنبطن ........
طويل وما بلحق الكعكول ................
نترك الحل لمن ليس لديه مساهمة فليساهم فى الحل
شكرا للبوست الجميل جدا .
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الغلوتيه أو الحجوة هي من أكثر أدب الأطفال ثراء في عهود قد خلت ، فقد كانت مصدر ثقافة وتعليم دسمه للطفل ، وقد إنقرضت بإنقراض جيل الحبوبات المشلخات ذوات الشفاه المدقوقه وسير المفحضة.
الغلوتية تعتمد على إطلاق العنان للتفكير في الإجابة والتي عادة ما يكون سؤالها مبهماً يأتي في صورة سجع في كثير من الأحيان ليضفي المزيد من الإنتباه على المتلقي.
هي فيك وإن عرفتها بكريك ؟
حبوبتي من جنها شالت جدي في سنها ؟
حبوبتي في ديونا تأكل في مصرانا ؟
الضب قال في رقبة أبوك كككب؟
فيها فد سنينه وفيها فد عوينه وبسسسم الله علينا
=
طيراً طار من قنطار
حتت ريشو وقام عوار
بطنو السيح وضهرو النار
شدره فريده في رأسها حديده
الجن حراسها الموت في رأسها
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
Quote: سمح الأتر =......
الضل الرهين ..........
كان شالوه رطن وكان خلوه أنبطن ........
طويل وما بلحق الكعكول ................
نترك الحل لمن ليس لديه مساهمة فليساهم فى الحل
شكرا للبوست الجميل جدا |
ابو الريش..
سلامات
انا عرفت اتنين من غلوتيات سمية.. يعني نسبة نجاحي 50%
كان شالوه رطن و كان خلوه انبطن = الجنزير
طويل وما بلحق الكعكول= الدرب
اما حالك انت للاولي خاصتي فهو غير دقيق.. ليش؟ لان الذي كان شالوه ما بنشال وكان خلوه سكن الدهر، فهو الرماد (الهبود)
اديك من عندى:
بقر ابوي رقل رقل عقالهن واحد..........
قطع البحر بلا عضم ضهر..................
حبوبتي في ديوانا تاكل في مصرانا.......
عمي المقدم يجري ويتحزم................
دخل القش ما قال كش...................
جدي بطران في شق البيت حردان..........
حبوبتي تتجلع (تتدلع) في جلعا جاها العُصار هلعا............
ياخي الموضوع بقي يستهويني ما تشوف واحد يرعي البوست دا وتعمل ليهو جائزة..؟
وساعود لان الموضوع شيق...
| |
|
|
|
|
|
|
|
|
|
Re: الغلّوتيّات (الفوازير) السودانية (Re: حليمة محمد عبد الرحمن)
|
بوست جميل وبنشط الذاكرة تحياتى لك ابو الريش
Quote: بقر ابوي رقل رقل عقالهن واحد..........
قطع البحر بلا عضم ضهر..................
حبوبتي في ديوانا تاكل في مصرانا.......
عمي المقدم يجري ويتحزم................
دخل القش ما قال كش...................
جدي بطران في شق البيت حردان..........
حبوبتي تتجلع (تتدلع) في جلعا جاها العُصار هلعا............ |
يلا يا حليمة جهزى الجائزة انا عرفت لى كم واحدة كدة
الاولى اجابتها ( النجوم )
الثانية اجابتها ( الصوت )
الثالثة اجابتها ( الفانوس )
الرابعة اجابتها ( الكذاب ) تقريبا
الخامسة اجابتها ( الضل )
اها جدك وحبوبتك ديل ما عرفتهم ، ورينا ليهم
أحمد العمار
| |
|
|
|
|
|
|
|
|
|
Re: الغلّوتيّات (الفوازير) السودانية (Re: احمد العمار)
|
Quote: جدي بطران في شق البيت حردان..........
حبوبتي تتجلع (تتدلع) في جلعا جاها العُصار هلعا............ |
ود العمار.. والله تراك شاطر شديد وتربية حبوبات.. خلاص عشان شطارتك دي
المرة دي بقول الحل ..
بس المرة الجاية امسك لي والنقطع ليك..انا اصلي مفكرة استثمر فيهن..
الاولي خمارة العجين.. زمان الناس، حينما كان الرغيف معدوم او عزيز وغالي ..
كانت الوجبات الثلاثة كسرة.. فكان يؤكل عجين الليل في الفطور، ثم يخمر مرة اخري
ويوضع الكنتوش في الحر او بشق البيت عشان يخمر للعجين للوجبة التالية وهكذا..
وشبه الكنتوش المتواجد على طول في طرف البيت بالزول الحردان.
اما الثانية فهي التبيقة.. بتعرف المترار وطريقة عزل القطن؟ في الريف بعد
عزل البذرة عن القطن المراد غزله، يتم نظافة البقايا المتواجدة في الفطن
وكذلك (نفشه) بما يطلق عليه البمباد.. وهو فرع من لحا شعر (اللعوت) طوله
حوالي المتر او ثلاثة ارباعه، يوصل طرفاه بعد ثنيه بخيط رفيع ومتين ويكون
عادة في شكل نصف دايرة.. يستخدم هذا البمباد في نظافة القطن ونفشه قبل (تراه)،
وتتحرك تلك الكمية من القطن او ما يطلق عليه التبيقة لاقل نسيم هواء..
انشاء الله الكلام يكون وقع ليك..
مودتي
حليمة
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخت حليمة ..
Quote: اما حالك انت للاولي خاصتي فهو غير دقيق.. ليش؟ لان الذي كان شالوه ما بنشال وكان خلوه سكن الدهر، فهو الرماد (الهبود)
|
ما قصدت إيراد حل للغلوتية الأولى، بس تركيب الغلوتيتين بيتشابه، وطبعاً حلها (الضُل) صحيح 100%
البوست ده حيطلع لينا حبوبات (أو تربية حبوبات)
مساهمتك قيمة .. خليك معانا
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
Quote: وكت جاب ليهو حبوبات هاكم دى
حبوبتى تية تية قمصاتا 100 |
والله انا سمعت الغلوتية دي بطريقة تانية.. وعشان كدا بحلها حسب طريقتى التي لن اتطرق اليها.. زين؟
لو حولنا حبوبتنا تية لجدنا تيه مع تعديل الفستان(غير المذكور) الى القمصان التى استحدثت، يصير المطلوب هو العنقريب.. خلو بالكم العنقريب المسيوج.
هاكم دي..
عتودي ود الحرام..............
ضبحتو الليلة وباكر قام......
بالمناسبة دا شغل جميل جدا البتعمل فيهو دا يا ابو الريش وممكن تطلع منو كتاب..جد
مودتي..
حليمة
| |
|
|
|
|
|
|
|
|
|
Re: الغلّوتيّات (الفوازير) السودانية (Re: حليمة محمد عبد الرحمن)
|
والله يا حليمة رفعتى لينا معنوياتنا شوية ، بالنسبة للحلين الما عرفتهم
وذكريتهم انتى وضحت والغريبة مرت على لكن العتب على الذاكرة .
وبما انك رفعت معنويات نقوم نحاول نحل غلوتيتك دى
Quote: عتودي ود الحرام..............
ضبحتو الليلة وباكر قام......
|
والله كان مخانتنى الذاكرة هى حشيش ( السعدة )
وعلى فكرة سبقتينى على الرد على جدى تية قن.... مية ( هى مزبوطة كدا )
ويا محمد ابوالعزائم شنو ياصاحبى انت برى ما غنية بالحاجات دى وبما انك
اكبر مننا مفروض تكون مجضم الحاجات دى ( مش انت من زمن القراية بالجلابية ولا شنو )
أحمد العمار
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
- جدادتى الرقيطة تجيب الخبر من تحت ال واطه = الجواب
- فشقت ( شتحت ) وما بالت = الراكوبة
Quote: حجر حجرجر .. حجارة؟ ................. لأ
رقبة طويلة.. نعامة؟ ................. لأ
تبيض وتفقس.. جدادة؟ ................. لأ
تعضي وترفس.. حمارة؟ ................. لأ |
الاجابة = ابوالقدح
وبجيك تانى
أحمد العمار
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الشكر الجزيل للباشمهندس أبو بكر لتحويل هذا البوست من أرشيف الربع الأول من العام.
الأخت رباب الكارب:
مرورك جميل .. ومساهمتك قيمة.
رغم إنو المعنى لا يختلف، إلاّ أني سمعت الغلوتية بتغيير كلمة واحدة في آخرها. إنتي قلتي:
| Quote: حبوبتى من هولا وجولا حتى الملوك عقلولا |
حبوبتى من هولا وجولا حتى الملوك رقصولها
زي ما قلت ما اختلفت كتير، لكن إذا وضعنا في الإعتبار إنو الحل هو (الخمر) يبقى الأقرب (رقصولها) .. والا رأيك شنو؟
واصلي معانا
لك الود
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخوة الأعزاء ...
الأخت حليمة .... وينك
Quote: ياخي الموضوع بقي يستهويني ما تشوف واحد يرعي البوست دا وتعمل ليهو جائزة..؟
وساعود لان الموضوع شيق... |
في انتظارك ..
لحدي ما نشوف مساهماتكم .. هاكم ديل:
قدر الفيل ... وصرتها صرة منديل
من فوق راكوبة .. ومن تحت راكوبة ... وسطهن صبي يقلب في الهوبة
لكم المودة
| |
|
|
|
|
|
|
|
|
|
Re: الغلّوتيّات (الفوازير) السودانية (Re: Rabab Elkarib)
|
Quote: العزيز ابو العزائم
بالظبط زى ما قلت الاجابة هى الخمر لكن غايتو نحن قالوها لينا كدة(عقلولا)
اى حكروا ليها
وبصراحة انا شايفاها انسب من رقصولا
ولا انت رايك شنو!!!
ولى عودة بالمزيد.... |
جاء في معجم لسان الطير أن الغلوتية جاءت بالروايتين معاً ويجوز أن تنتهي بعقلولا أى تحكراً وتأدباً أو رقصولا أى رقصوا لها إنتشاء وطربا حتى لو كان الصوت نشازاً واللحن منفراً عطفاً على نوع الخمر وقوة إسكارها. غير أن ما ورد في المتون بالصفحة الرابعة بعد الستون لمؤلفه أبو دليب الحيزبون أن المقصود هنا هي المريسة دون سواها من سائر المسكرات والخمائر
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخت رباب ..
((إتنين قالوا ليك راسك مافي ... أهبشو)) {طبعاً ده مثل مش غلوتية} ... وأنا هبشت راسي، لأنو في غيرك قال نفس الكلام، ويظهر إني سمعت غلط .. أو حفظت غلط.
عموماً واحدة من أغراض البوست التوثيق والتصحيح .... وشكراً للتصحيح.
خليك معانا .. لسة عندنا كتير .. وشاركينا.
في غلوتيات في البوست مافي زول حلاّها ... هل من متصدي؟ والا يحلوها أصحابها.
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الملاّ عمر
| Quote: جاء في معجم لسان الطير أن الغلوتية جاءت بالروايتين معاً ويجوز أن تنتهي بعقلولا أى تحكراً وتأدباً أو رقصولا أى رقصوا لها إنتشاء وطربا حتى لو كان الصوت نشازاً واللحن منفراً عطفاً على نوع الخمر وقوة إسكارها. غير أن ما ورد في المتون بالصفحة الرابعة بعد الستون لمؤلفه أبو دليب الحيزبون أن المقصود هنا هي المريسة دون سواها من سائر المسكرات والخمائر |
ياخي أنا بفتش على القاموس ده سما واطة ما لقيتو ... ورينا مكانو 
طبعاً الإجابة الصحيحة هي المريسة ... بس قلنا نثقفها شوية وعملناها (الخمر)
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
Quote: وعلى فكرة سبقتينى على الرد على جدى تية قن.... مية ( هى مزبوطة كدا )
|
ياجماعة لالا أنتو ياحليمة وعمار ما بترجو سيد الحق بتصححوا من راسكم ! ؟
حبوبتى تية تية قمصانا 100 دى البصلة... يعنى كيف العنقريب ؟ ما ممكن أصلو .
الضل الرهين : الأب
سمح الأتر : المطر
دى غلوتياتى ولمن تطبع الكتاب يا أبو العزائم تدينى نسبع من ريعه .
أما
عمى أب أكتاف بشق الليل مابخاف : الدلو .
كفاكم ولا أزيدكم ؟
| |
|
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخت سمية
| Quote: ياجماعة لالا أنتو ياحليمة وعمار ما بترجو سيد الحق بتصححوا من راسكم ! ؟ |
إنتظرناك تدافعي عن حقوقك .. وتصححي .. لكن يظهر إنشغلتي علينا. وبالتأكيد البصلة إجابة مقنعة أكتر من العنقريب.
| Quote: كفاكم ولا أزيدكم ؟ |
نحن أصلنا ما بنابا الزيادة.
حاشية: راجعي تعليق الطيب شيقوق
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
| Quote: إنتظرناك تدافعي عن حقوقك .. وتصححي .. لكن يظهر إنشغلتي علينا |
أبو العزائم
أسماعيل دا قال سمية دى حوامة حوامة البوست قبل مايفتحوه بتدخل فيه !!!
قلت أحسن أتقل شوية... جيت لقيت حقوقى ضاعت ... حقى عليك يا اسماعيل
الطيب شيقوق
كلامك عديل وما أختلفنا كتير كله وارد
أصلا أب زيد الهلالى دا ود عمنا
والله عنده جنس حكاوى مع بريقع عجييبة
طيب بتعرفوا... حلو الشم ؟
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الاخت سمية و الاخ ابو العزائم
Quote: الأخت سمية
Quote: ياجماعة لالا أنتو ياحليمة وعمار ما بترجو سيد الحق بتصححوا من راسكم ! ؟
إنتظرناك تدافعي عن حقوقك .. وتصححي .. لكن يظهر إنشغلتي علينا. وبالتأكيد البصلة إجابة مقنعة أكتر من العنقريب.
|
ياسمية انتى قلتى حبوبتى تية تية قمصان مية = البصلة ( كلام صاح مية فى المية ) ، لكن انا بصراحة الغلوتية دى انا ما سمعتها قبل كدا .
السمعتها بتقول ( جدى تية قنانيطو مية ) = العنقريب (( آسف لتكملة اللفظ لكن عشان توضح الصورة )) وهذا البقصدو انا .
واذا حليمة برضو عندها تفسير غير دا ممكن تقوله .
مع خالص ودى
أحمد العمار
| |
|
|
|
|
|
|
|
|
|
Re: الغلّوتيّات (الفوازير) السودانية (Re: حليمة محمد عبد الرحمن)
|
والله أنا كنت بفتش على غلوتية العنقريب دى وراحت على...
وأنا سمعتها وكمان البصلة برضو سمعتها.. كل على حدة
لك جزيل الشكر
Quote: حلو الشم حسب ما حكوا لي زمان هو الطفل..
|
حليمة
أنا لن أعتمد هذه الإجابة العايمة
أى طفل . فهم كثر ...
عليك الله أتكلمى لينا بكلام الحبوبات
حلو الشم : الجنا
ومافى أحلى من جناك
لك كل الود .
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
يا حليمة حبوبة سمية قالي ليك الجنا
يعني ما تقولي الطفل والا الجاهل والا الشافع ..... لازم تحددي
طيب غلوتيات اليوم:
* عندي شجرة كبكبيق ... قطعت منها كوريق
* كلما تزيدا ... تمشي ناقصة
* مطمورة أبو زيد ... مليانة بيض
عايزين الحلول للغلوتيات دي والقديمة كمان يا جماعة. ود شيقوق وسمية عاملين فيعا عرّوب بدون فايدة؟
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
| Quote: ود شيقوق وسمية عاملين فيعا عرّوب بدون فايدة؟ |
يازول هوووى نحن نحتفظ بحقنا فى الملكية الفكرية
يعنى نطلق كلامنا لى ناس البندر ببلاش نحنا كلامنا
دا غاااالى... الناس يبحتو فى الأدب الشعبى دا سنين عشان يحضروا دراسات عليا
عشان خاطر العروب بحل ليك واحدة :ـ
مطمورة أب زيد ملانة بيض : النجوم فى السماء ( ناسك ديل بعرفوا المطمورة ؟ )
أطيب المنى
| |
|
|
|
|
|
|
|
|
|
Re: الغلّوتيّات (الفوازير) السودانية (Re: حليمة محمد عبد الرحمن)
|
بت طلحة الناس ديل احسن نستاجر فيهم ونوريهم حبة .
المطمورة يا اخوانا هى حفرة في الارض تتفاوت في احجامها وعادة يدفن فيها الذرة بعد الحصاد لتخزينة لاطول فترة ممكن . والزيكم انتو يا ابا العزائم بتستعجلوا تدفنوا العيش قبل المطمورة تضربها الشمس عشان كده عيشكم لما تحتاجوا تحفروا المطمورة تطلعوا منها العيش تلقوهو مصوفن وريحته ما بتتقابل .
طبعا قبل المطمورة كانت السويبة ودى انتم ما حاضرنها دى اهلنا ناس زمااااااان بشيدوها من الفلكاب بتاع السدر في شكل اصطوانة او برميل كبييييييييير وبعدين يمسحوها بالطين حتى لا يتشتت الذرة منها . تتميز السويبة عن المطمورة بما فيها من تهوية تمنع الذرة من التعفن .
والمطمورة عادة بغطوها بالبتاب ( البتاب قشرة العيش ) وبعد البوتاب يجي التراب .
زمان نحن بنشرك للطير في المطامير لانو بيجى يلقط الشتات بتاع العيش .
شيشك عليهم يا سمية
| |
|
|
|
|
|
|
|
|
|
Re: الغلّوتيّات (الفوازير) السودانية (Re: الطيب شيقوق)
|
ابو العزائم في مثل بيقول (ضل حيطة ولا ضل راجل)
قرأت الحكاية دى عن هذا المثل
بعد أن عدت إلى البلاد بعد قضاء شهر خارجها فى مهمة عمل دعتنى الضرورة إلى الذهاب لشراء بعض الاغراض (للأولاد) من سوق أم درمان وقد كان ذلك فى منتصف النهار حيث شمس الصيف تلقى بأشعتها الناريه على شوارع السوق المزدحمة بالبضائع والبشر وبعض (الحيوانات) .
فى خضم إنشغالى بعملية البحث والشراء لفتت إنتباهى عده ظواهر غريبة فبينما تكدس الناس وإزدحموا يستريحون من ضربة الشمس فى فى ظلال بعض (العمارات) والمحال التجارية كانت بعض (ظلال العمارات) والمحال الأخرى (فاضية تماماً) من جنس (إنسان) كما أن هنالك عدد من (مظلات القماش الضخمة) نصبت خارج السوق لا يتناسب عدد (الناس) الذين (يستظلون) تحتها مع عدد الناس الذين يقفون ينتظرون (المواصلات) بجانبها تحت حرارة الشمس هذا إلى جانب (ظاهرة غريبه) وهى وجود بعض (الناس) فى المحطه وهم يقفون تحت (اشعة الشمس) الحارقة إتنين إتنين ... إتنين إتنين
إذا عرف السبب :
ما إن عدت إلى المنزل حتى قمت بسؤال إبنى (ناجى) عن هذه الظواهر الغريبه التى رأيتها .. ضحك (ناجى) كثيراً وهو يقول لى :
- يا بوى إنت عشان سافرت اليومين الفاتو ديل وما عارف الحصل ؟
- والحصل شنو؟؟
- (الحكومة) طلعت قرار تبيع للناس (الضل) ؟
- هى (الحكومة) دى ما باعت أى حاجه بس فضلت على (الضل)
- والله يا بوى (الجماعة) قالو الشمس دى بتاعت (ربنا) وهم ناس (بتوع ربنا) وبالتالى (الشمس) البتعمل (الضل) لمن ينعكس على (الحاجات) دى (بتاعتهم) والضل البجى منها دا بالتالى بتاعهم !!
- أها وبعدين؟
- وبعدين أى ضل ..ضل عربيتك .. ضل بيتك .. ضل عمارتك ده ضل (بتاع الحكومة) تستثمرو ذى ما عاوزه وأى زول تلقاهو (قاعد فيهو) تدفعو (رسوم ضل) لكن فى حاجه ؟
- اللى هى شنو؟
- لو (الزول) سيد (العماره) أو (البيت) أو (المحل) دفع للحكومة (ضريبه ضل) خلاص (الضل) بيكون بتاعو لو عاوز يأجرو أو يستثمرو أو لو عاوز يخليهو مجانى سااكت (وقف ساكت) للمسلمين
- أيواا عشان كده أنا فى السوق لقيت (عمارات) الناس قاعده تستريح فى ضلها و(عمارات) ما فيها جنس إنسان قاعد
- آآى يا بوى هسع (النسوان) ذاتم بقو يقولو (ضل حيطه ولا ضل راجل) عشان (ضل الحيطه) بقى يجيب قروش أكتر !!
- أها والناس الواقفين إتنين إتنين ديل شنو؟؟
- (يضحك) إنت ما عارف يابوى إنو (ضل الزول ذاتو) يا يدفع عليهو (ضريبه) ويكون حقو يأجرو أو يعمل فيهو العاوزو وإلا ببقى حق (الحكومة) وكان وقف فيهو أى زول تشيل منو رسوم ؟
- وهسع الزول لو عاوز يدفع رسوم (الضل) دى و(يترخص) يدفع كم ؟
- خمسين ألف غير رسوم (الفحص الآلى) عشان (الفحص الآلى) ده بيوضح إنو الزول صحتو بتتحمل الشغلانه دى ولا ما بتتحمل
- والشغل ده كلو .. ترخيص وفحص آلى وجمع رسوم والحاجات دى كلها البيقوم بيها منو؟؟
- إنت ما قالو ليك؟؟ دى شركه إسمها (يستظلون) – مواصلا- إنت يا بوى فاضى ولا عندك حاجه
- لا فاضى ..
- خلاص خلينى أحكى ليك (السيناريوهات) الحصلت بعد ما سافرت دى
نشالين الضلله :
وهم أؤلئك الأشخاص الذين يمتازون (ببسطة) وضخامة فى الجسم ثم ينتشرون حيث يقومون بإختيار أكثر الأماكن (سخونه) ومواجهه لأشعة الشمس اللاسعة فى منتصف الظهيرة حيث يغريك ضلهم (الواسع الممتد) بالوقوف عليه ثم ما أن تقف حتى يبرز لك (إثنين) من رجال (مباحث الظل) الذين كانا يختبئان خلف الشخص فيقف خلفك أحدهم حتى لا تنصرف وتغادر قبل (الدفع) ثم يقف الآخر موجهاً حديثه لنشال (الضل) :
- إنت بتوقف الناس فى ضلك أصلك (مرخص) ؟؟؟
- لا ما مرخص
- طيب لو إنت ما مرخص معناها ضلك ده ضل (حكومى)
- أيوه
- (ثم يلتفت لك) : إنتو (الحكومة) دى طوالى (ماكلين) حقها ؟؟
- (زميله الذى كان يقف خلفك) : يعنى عاوز تقعد وترطب فى ضل الحكومة (البااارد) ده (ملح ساااكت)
- (فى توسل) : يا جماعة والله أنا وقفت هنا صدفه سااكت
- ده علينا نحنا ؟؟ .. طيب ما كنت تمشى تقيف فى الشمس الحارة ديك (صدفه) ساكت ؟؟– ثم موجها حديثه لنشال الظل-
- الزول ده واقف فى ضلك أقصد (ضل الحكومة) ده من بتين ؟؟
- (يسرح كمن يتذكر) : واللله كان ساعه كان ساعتين
- ياااخى حرام عليك أنا و(قفت فيهو هسع) دقيقة ما أخدتها
- (كمن عثر على شئ) : شوف شوف بتقول وقفت فيهو هسع .. كده إنت إتقبضت (بالثابته) !!
- يا جماعه (ثابتت) شنو؟؟ أنا واقف فى (بنقو)
- بنقو .. كمنقه .. أدفع لينا بس رسوم الساعتين ديل
- يا جماعه والله ما ساعتين ديل دقيقتين فى زول بقعد فى الشمش الحارة دى ساعتين؟
- (يا زول) أدفع وما تخلينا نتخذ معاك إجراءآت !!
وتنهمك وأنت (مغبون) فى إدخال يدك فى جيبك لإخراج محفظتك لدفع (رسوم ضل ساعتين) لتكتشف أن الشخص الذى كان يقف خلفك وأنت تتحدث مع (نشال الضل) لم يكن إلا (نشال جيوب) !!
حاجه أمونه:
- يعنى هسع لزومو شنو نرجع السوق تانى فى الشمس الحارة دى عشان نرجع (الجزمه) بتاعتك دى ؟
- لكن يا أمى طلعت (ضيقه) وأنا ماشه بيها عرس ناس (نهله) الليله المساء
- ما تلبسى ليكى أى واحده تانيه .. بس إلا هى يعنى؟؟
- ألبس أى واحده كيف يا أمى؟ دى أنا إخترتها لون (الفستان)
فى ذلك النهار الحار والشمس تتوسط كبد السماء ركبت حاجه أمونه وبنتها (سعاد) ركشه إلى السوق حيث وقفتا أمام (طبلية) بائع الأحذيه وبينما كانت (حاجه أمونه) تشرح للبائع كيف أنهم قد وجدوا أن (الجزمه) ضيقه وإنهم عاوزين نفس اللون بس (مقاس أكبر) وقف أمامها أحد الأشخاص مخاطباً :
- إنتى يا حاجه (البت) الواقفه فى (ضلك) دى مأجره ليها ولا إنتى (عندك رخصة)
- (فى إستغراب) : مأجرة ليها شنو كمان؟
- لا يعنى ما فيها حاجه لو مأجرا ليها لأنو القانون بيسمح (للنسوان) يأجرو لى بعض
- يا ولدى قانون شنو ونسوان شنو؟؟ دى بتى أقيف فى ضلها تقيف فى ضلى دى ما شغلتكم
- يا حاجة شوفى بتك أمك أختك أبوك دى ما مشكلتنا .. إنتى لو (مرخصة ضل) وعندك ما يثبت تكونى إنتى حرة فى (ضلك) وما بنسألك إن شاء الله أى زول يقيف (يرطب) فيهو.. لكن كان ما (مرخصة ضل) الضل ده بيكون بتاعنا .. حقنا نحنا .. يعنى بالعربى كده (ضل الحكومة) مش لو وقفت فيهو (بتك) كان قعدتى إنتى ذاتك فيهو بندفعك (رسوم ضل) !!!
- (وهى تفتح محفظتها لتعطيه الرسوم) : شاحده ربى الكريم (تقعدو فيهو) الجمر الحار داك يوم القيامه أكان ما خليتو لينا صفحه نرقد عليها !!!
تستظلون :
بعد أن أصبح وجود (الظل) فى الأماكن ذات الشمس المحرقه حكراً بل (حصرياً) على شركة (تستظلون) قامت الشركة بإختيار (أسخن) المواقع وبخاصة أماكن التجمعات ومواقف المواصلات العامة لتنشر فيها أعداداً مهولة من (المظلات القماشية) الضخمة ليقف عليها (المستظلون) بعد دفع الرسوم المقررة علاوة على بيع الماء البااارد لهم .
- بالله شوف بالله .. (فلس) الزول الواقفه معاهو البت داك ليهو ساعتين موقفها فى الشمس الحارة دى بدل ما يدخل يقيف بيها فى واحده من (المظلات) دى!!
- يكون ياخى (مفلس) وما عندو قروش
- طيب لزوم (الجكيس) فى الشمس الحارة مع (الفلس) شنو؟؟
- هم ديل كويسين عليك الله شوف الراجل ( أب صلعه) ونضارة الماسك (الجريده) داك .. العرق نازل منو ذى المويه كيفن؟؟ مستخسر فى (روحو) ألف جنيه يدخل بيها جوه (تستظلون) !!
حكاية عبدالسميع :
عبد السميع يسكن (أمبده بالردمية) ويعمل (باشكاتب) بإحدى الوزارات عاد إلى المنزل من العمل فى نهار ذلك
اليوم القائظ الحر ليجد أن طفلته تعانى من (النزلات الحايمة اليومين ديل)
- (البت) من الصباح (تطرش) وجسما مولع نار وحلقها مسدود
- أها ونعمل شنو يعنى؟؟
- كيفن نعمل شنو يلاكا نوديها هسع (المستشفى) عاين ليها بقت كيفن
دون أن يستريح (عبدالسميع) دقبقه واحده ويآخد نفسو أخذ طفلته ومعه زوجته وخرجا إلى محطة المواصلات التى خلت تماماً من الحافلات المتجهه إلى ( أم درمان) حيث المستشفى العام وذلك بسبب تهرب السائقين من العمل فى ذاك الجو المشمس الحار.
بينما كانت زوجه عبدالسميع تقف على (ظل) زوجها إتقاء الشمس وهى تضع طفلتها على كتفها إقترب منها أحد رجال (مباحث الظل) :
- بالله لو سمحتو بطاقاتكم
- (عبدالسميع فى إستغراب وزهج ) : الله ؟؟ وعاوز بيها شنو؟؟
- كيف عاوز بيها شنو؟؟ - فى صرامه- إنتو بتبقو لى بعض؟
- (عبد السميع فى لماضة ) : ودى تخصك فى شنو؟؟
- (فى حزم وجديه) : إتكلم عدل وجاوبنى ( يخرج له كارنيه مباحث ظل)
- طيب ما تقول كده من زمان ... دى زوجتى
- وهل لديكا ما يثبت ذلك؟؟ إنت مش عارف ممنوع تأجير ضل الراجل لى (مرا) إلا يكون (محرم) ؟
- أيوه لديا (مشيراً إلى الطفله) : الشافعه الشايلاها دى
- أقول ليك ما يثبت تقول ليا (شافعه) يعنى (مكتوب) فيها (تاريخ إصدار) وإلا ( إنتهاء صلاحية)؟؟
- يعنى إنت عاوز شنو هسع ؟؟
- قسيمه طبعاً
- (وهو يكفكف فى أكمام القميص والشرر ينطلق من عينيه) : يازول البت عيانه والفلس مطلع عينا والشمس حارة وجايين من الشغل هسع ما إسترحنا دقيقه و...
- (خائفاً) : المره دى أنا ح أسيبك عشان (الطفلة العيانه) المعاكم دى – بعد أن إبتعد – لكن تانى أعمل حسابك والله ألقاك موقف ليكا مرا فى (ضلك) إلا أوقفك بين يدى (الرحمن) .. !!
ضل متحرك :
- يا خى والله أنا منتظر ليا تاكسى والشمس دى ضاربانا فى نص راسنا .. أها تأجر ليا ضلك ده نص ساعه بى كم ؟؟
- بى تلاته ألف
- تلاته ألف كتيره ..ليه إنت مرخص؟؟
- (يلف ويعطيه ظهره) : طبعا مرخص إنت ما شايف (الرخصه المدورة) دى ؟؟
- طيب خلاص وكت مرخص نديك ألفين ونص
- عليك الله هسع دى شمس ألفين ونص والله ألفين ونصك دى (مويه) بارده ما تروينا – مواصلاً – بعدين عليك الله هسع شوف (الضل بتاعى) ده واسع ووهيط كيفن عليك الله ما ذى ضل عمارة ؟
- خلاص يا زول تلاته تلاته
وقف عابدين) فى (ضل الراجل) وأخرج (جريده) أخذ يقرأ فيها بعد أن قام بمسح (نضارة القراية) بكفة قميصه فى ذات الوقت الذى أشتدت فيه أشعة الشمس عل صاحبنا فبدأ فى تكسير الوقت بالغناء حيث أخذ يغنى ويتمايل يساراً ويمينا الشئ الذى جعل عابدين يجد نفسه تارة فى (الشمس) واخرى فى (الضل) :
- شوف يا زول والله أنا ما بقدر على (القميز) بتاعك ده .. أنا مأجرك (ضل ثابت) ما (ضل متحرك) عشان تقعد تتجارى ليا بى جاى وبى جاى
- يعنى شنو؟؟ ما نغنى ونكسر زمن فى الشمس الحارة دى؟؟ - متهكماً- طبعا يا أبوها إنت قاعد فى ضلى الكبير ده ومرطب وما عارف الشمس الحارة دى مديانا فى (صنقورنا) كيف؟؟
- ياخى لا (صنقورك) لا ما (صنقورك) – وهو يطبق الجريده ويبتعد- أنا ما ضلك ده ؟ ما عايزو
- (يتبعه ويمسك به من ياقه قميصه) : تعال .. تعال ماشى وين قاعد فى (ضلى) ربع ساعه وعاوز تمشى كده ساااكت؟
- يا زول ربع ساعة شنو؟؟ والله بى (قميزك) وحركتك الكتيرة دى ما أكون قعدت فى (الضل) دقيقتين
- يعنى شنو ما ح تدفع إيجار (الضل) ده؟
- (وهو يلتفت إلى الجمهور الذى بدأ يلتف حولهما) : يا جماعه بس معقول الزول يدفع ليهو إيجار (ضل) ما قعد فيهو ؟؟
بدأ صاحبنا متشنجا وهو يمسك بتلابيب (عابدين) وهنا فج أحدهم أفراد الجمهور الذى شكل حلقة حولهما :
- (وهو يخرج الكارنيه ويكشفه لهما) : معاكم (مباحث الضلله) – ثم موجها سؤاله لعابدين :
- إنت الزول ده كان مأجر ليك (الضل) بتاعو مش كده؟؟
- أيوه صاح وكمان سألتو قلت ليهو (مرخص) قال ليا أيوه وورانى (الرخصة المدورة) الملصقه فى (ضهرو) دى
- (رجل المباحث ينظر فى ظهر صاحبنا وينهره قائلاً) : تأجر فى (ضلك) وكمان معلق ليك رخصه (مفوته)
- (يحاول التملص) : ضل شنو الأنا مأجرو ؟؟ أنا واقف فى وقفتى دى الزول ده جاء وقف فى (ضلى) قمت
أبيت أقول ليهو زح .. قلت شنو يعنى برضو؟؟ (فضل ظل) وربنا ح يدينا عليهو شويت حسنات
ضل راجل :
- هسع يا راجل بدل ما اليوم كلو (تترقد) من سرير لى سرير قاعد لا شغله لا مشغله (طويل وعريض) كده أكان مشيت موقف المواصلات فى الشمس الحارة دى أجرت (ضلك) ده ما كان جبتا لينا (قرش قرشين)
- إنتى وليه مجنونة ؟؟ أأجرو كيف وأنا ما (مرخص) عاوزةه ناس (مباحث الضل) يكشونى؟ هسع كان كشونى ألقى ليهم قروش (غرامه) من وين؟؟
- هو ترخيص الضل ده كمان بى قروش ما كلها خمسين ألف فى السنة؟؟
- وخمسين دى يجيبوها ليهم من وين؟؟
- طيب وكت إنت عارف ما عندك خمسين الترخيص ما تمشى تشتغل فى شكت (الضل الجماعى) دى العملا جارنا (عباس) راجل (التومه) دى
- وإشتغل معاهم شنو؟؟
- (فى سخرية) : يعنى ح تشتغل (جراح) ما ح تشتغل (ضل راجل)
- كيف يعنى؟
- ناس (ود أب دقن) ديل أدوهم (إمتياز) يعملو شركه سموها شركة( الضل الجماعى) قاعدين يشغلو فيها الناس
(الطوال وعراض) ذيك كده وكل عشرة عشرين نفر يطلعوهم يمشوا يقيفو مع بعض ذى (حيطة الكورة) عشان يعملو (ضل جماعى) يأجروهو (للعوائل) والناس الفى مجموعات فى حتات السخانه (الما فيها ضل) !!
- يعنى هسع (ود أب دقن) رأسمالو شنو فى الشركه دى؟؟
- إنت عوير؟؟ هو (أبان دقون) ديل عاوزين ليهم (رأسمال) ما كلو قايم من (مافيش) !! ومن (دقنو) وفتتلو – مواصلة- عليك أمان الله عشان شركة (الضل) دى سايق ليهو عربيه (إستثمار) آخر موديل!!
يخاف من ضلو :
ما أن جلس (عثمان) على مكتبه فى (المصلحه) فى صباح ذلك اليوم حتى أخذ يردد (معقوله بس) معقوله بس ... معقوله بس .. الشئ الذى جعل زميله (مصطفى) يسأله فى إستغراب :
- شنو مما جيت شابكنا معقوله يس .. معقوله بس ؟؟ هو شنو الما معقول؟؟
- (يفتح يديه علامة الإستغراب) : معقوله بس ؟؟
- يا (عثمان) ياخى إستهدى بالله وورينا الحاصل
- والله البلد دى وصلت مرحله خطيره خلاص؟
- كيف؟؟
- إتصور ياخى الواحد بقى يخاف من ضلو ؟
- ما فاهم
- يا خى دى عاوزه ليها فهم ..تكون واقف فى أمانت الله و(ضلك قدامك) بس كان جا زول (بالغلط) وقف فيهو سااكت يجووك ناس (مباحث الضل) وهاك يا أسئله .. إنت الزول ده بتعرفو؟؟ إنت مأجر ليهو؟ عندك (رخصة) ؟؟
- وهسع الواحد لو ما إتكلم معاهم وقال ليهم أعملو العاوزين تعملوهو
- إنت بتلعب يا زول؟؟ دى مبااااحث تعرف شنو مباحث ؟؟ والله يودوك (النيابه) بتاعت شركة (يستظلون) تانى تفتش (للبظلك) ما تلقاهو !!
- هو الشركات عندها (نيابات) براها
- يا بوى البلد دى بقت أى حاجه فيها فيها حاجه براها ما شايفا بقت ذى (السلطه) كيف؟؟
- والله كلامك صاح يومداك لقينا لينا واحد لابس (مبرقع) إتغالطنا يكون شغال فى ياتو (حته) القال ليك يكون فى (المظلات) والقال ليك يكون فى (المدفعية) والقال ليك يكون (سجون) والقال ليك يكون (إستخبارات) والقال ليك شنو ما بعرف وفى الأخير طلع (طالب) فى الثانوى العالى !!!
- والله فعلاً الواحد بقى يخاف من (ضلو) !!
العريس مالو؟
بثينه تجلس فى (البرنده) أمام (المطبخ) تورق فى (خدرا) وعلى السرير المقابل لها تجلس إبنتها (صفاء) :
- يا بتى العريس مالو ؟؟ والله ضلو ولا ضل (حيطه) عليكى أمان الله يقعدو فيهو (نفرين)
- لكن يا يمه دى شغلانه دى؟؟
- مالا شغلانة السرور .. – تلتفت إلى إبنتها – هو إنتى قايلاهو واقف على ( إيجار ضلو) بس؟
- يعنى نان قاعد يعمل شنو؟؟
- لا لا ده ود (كسيب) وطور نفسو .. أولن بالتبادى رابط ليهو فى ضهرو (بنبرين) للزباين وتانى حاجه مالى ليك جيوبو (مروت شحن) وسجائر و..
- (فى ضيق) وشنو كمان يمه؟؟
- وشايل ليهو حفاظت مويه بااارده – مواصله – والله وبالله قالو ليكى البدخلو فى اليوم (هايس) ما بدخلو !!
- يا أمى ما عايزاهو ما عايزاهو مش كان (هايس) كان (حافله روزا) ما دايراهو
- مالو هو الشغل يا بتى حرام؟؟
- يا أمى ما حرام لكن هسع قولى عاوزين نسافر بره فى (الباسبورت) بتاعو فى حتت (المهنه) يكتبو شنو؟
- ما يكتبو اليكتبوهو إن شاء الله يكتبو (مستثمر) !!
أكل عيش :
بينما كان حاج (سليمان) يحمل (خرطوش) المويه خارجاً من منزله ليقوم برش (ضل ابيت) فى صباح ذلك اليوم إستوقفته (زوجته) قائله :
- اليوم كلو يا راجل شايل خرطوشك فى الشمس الحارة دى وترشرش .. وبعدين (المويه دى ذاااتا ما بى قروش إنت ما شايف (جمرة المويه) الركبوها دى؟؟
- ما إحتمال (إيجار الضل) يغطى !!
- يغطى شنو؟؟ من زباينك ؟؟ هسع كان فى لزوم (ترخص) ضل بيتك ده وتخسر ليكا قروش فى الفاضى؟
- ما قلنا نأجروا كان نزيد (ميه) المعاش دى شويه؟
- أها الزبائن وينهم .. كل يوم من صباحت الله بالخير خاتى كرسيك بره فى الشمس الحاره دى وقاعد ؟
- ده كلو من جارنا (مختار) ده ؟؟
- مالو كمان مختار عمل ليكا شنو؟
- إتصورى شافنى قاعد أأجر (الساعه) بى (ألفين) قام عمل (الساعه) بى ألف .. ومش كده كمان عمل معاها خدمات
- خدمات ذى شنو يعنى؟
- جاب ليهو (كراسى) و(بنابر) ومويه بارده وكمان قام (طول) حيطت البيت عشان (الضل) يكون (ماهل)
- وإنت مالك ما تعمل ذيو ؟
- أعمل ذيو من وين أنا عندى قروش؟ ده عندو (ولدو) مغترب قاعد يرسل ليهو
- أقول ليك (خت) المسجل بتاعك ده وشغل ليك (أغانى) كان الزبائن يخلوهو يجوك
- حليلك يا حاجه – يكلم نفسو- (قالت أيه أغانى) !!
- شنو مالو ما فكره كويسه؟
- يا حاجه أغانى شنو ؟؟ (مختار) ده جاب ليهم (دش) ربطو ليهم فى (الضل) !!!
الفاتح يوسف جبرا
| |
|
|
|
|
|
|
|
|
|
Re: الغلّوتيّات (الفوازير) السودانية (Re: حليمة محمد عبد الرحمن)
|
كل الحلوين الجملوا ليلي ونهاري
ياروعتكم وانتوا بتحفظوا للأجيال تراثه
أحبكم دنيا واخره
ولو قابلتكم يوم القيامة
بسألكم من غلوتية تفتح لينا باب الجنة
***
الغلوتيات لعبة تعلمنا معنى الحياة
وتملكنا التجارب فاللعبةبدافعها الغريزية
يجب ان تستغل في تعليم الإنسان وهذا ما فعلوه حبوباتنا
وجدودنا القدماء
إن أي محاولة لتربية النشء، غير قائمة على أساس دافع فطري فعال من دوافع النمو الثقافي
في الإنسان تعتبر بلا شك محاولة عقيمة ,,
شوفتو الكلام الجامد ده في الغولتيات حقتكم دي ..
لكنكم نسيتوا حاجة مهمة**** الغولتيات الحروفية
غلوتية يعني الوقوع في الغلط،،والغلوطية الحروفية صعبة وممتعة ومحرك اساسي لتصحيح النطق السليم
طبقي طبق طبقكم إقدر طبقكم إطبق طبقنا زي ما طبقنا طبق طبقكم ..
وهي من اسهل الغلوتيات الحروفية..
نصعبه شوية،،
كبير القرده جاب قدرو خاتاه قدام قدور القردة إقدرن القردة إشيلن قودرهن اختوهم قدام قدركبير القردة الخت قدرو قدام قدورهن ..
ويلا نغلط ونتعلم
ولكم محبتي ومودتي
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد سنى دفع الله)
|
اها يا ابا العزائم طول بالك اقرأ الغلوتية دى وقول رايك فيها سرييييييييييييييع .
واحد معاشاتي كان ماري في طريقه من البيت للدكان . وفي الطرق وجد ليهو وليد بيقرأ سااااااااااى . قال ليهو يا ولدى تعبان كده مالك؟ الولد قالو انا يا عمو ممتحن الشهادة .
عمك صنف وقال للولد خير يا ولدى ربنا يوفقك لكن بعد تمتحن احد امرين اما دخلت الجامعة او جبت ليك شهادة سااااااااااى . لو دخلت الجامعة حقك راح اما لو جبت شهادة ساااااااااى احد امرين . اما اشتغلت في الخدمة المدنية او في الجيش . لو عملت في الخدمة المدنية حقك راح اما لو عملت في الجيش احد امرين . اما شغلوك في سلاح المدرعات او سلاح الطيران . اكان شغلوك في سلاح المدرعات حقك راح اما لو اشتغلت في سلاح الطيران احد امرين . اما مت في السماء فووووق او مت في الارض . اكان مت في الارض حقك راح اما لو مت في السماء احد امرين . اما تحلوت ثاني اكسيد الكربون او نيتروجين . لو تحولت نيتروجين حقك راح اما لو تحولت ثاني اكسيد الكربون احد امرين . اما صنعوك كرتون او صنعوك كلينكس لو صنعوك كرتون حقك راح اما لو صنعوك كلينكس احد امرين . اما استعملنك النسواى او الرجال . اكان استعملوك الرجال حقك راح ام لو استعملنك النسوان احد امرييييييييييييييييييييييين ..............
يلا الراجل يتم السالفة دى يا اخوانا
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
محمد السني الفنان الحلو
مشاركتك بتدي البوست نكهة تانية ....
هسي نحن بنقول في غلوتيات جُمل مركبة .. جيت فرتقتها لينا تاني كبيوتر ما يجمعها.
كنت عايز أتحداك في الكلام الكتبتو ... لكن كلامك ده ما بينفع بالكي بورد .... عشان كدة تقوم تقول لينا واحدة بسيييييطة .. وتخليك أمين مع نفسك عشان ما حنسمعك ...
يالا قول (توب نفيسة نشف) خمسة مرات .....
سمعتك قلت (نفش) 
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخوات والأخوة الأعزاء
في عملية حصر سريعة، الغلوتيات التي ظلت بدون حل هي:-
* هي فيك وإن عرفتها بكريك.
* حبوبتي من جنها شالت جدي في سنها.
* طيراً طار من قنطار
حتت ريشو وقام عوار
بطنو السيح وضهرو النار
شدره فريده في رأسها حديده
الجن حراسها الموت في رأسها
* طاسه وطمنطاسه
في البحر غتاسه
بطنا لولي
وضهرا نحاسا
* أزرق كوميت متل السوميت
رب القدرة خلقو في الخدره
* شهاوي تفلق وتداوي.
* تدي الحلة وصا والنقارة عصا.
* أحمر حيمور متل التيمور - جيت أخمو نقدتني أمو
* عينى فيها دخلت واديها.
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
Quote: ألأحت سمية.حلك كان ما أخاف الكضب.3 أرادح ...أللداية والحلة 3حجارة تكون تحت الحلة
أنا الجموعى هييييييييييييييييييييييييييييييييييييييييييييييييع |
كمل جميلك ياالجموعى
البداية صحيحة 100%
البيض الرادح : عضام اللحم فى الملاح
أم تلنقو : الكمشة
أم كريشة : الطباخة التى تضوف الطعام كل شوية
الأخ أبو العزائم
كيفنكم
* هي فيك وإن عرفتها بكريك : إيدك
* شهاوي تفلق وتداوي.
* تدي الحلة وصا والنقارة عصا.
هذه أمثال وليست غلوتيات , تضرب لمن يقول لك شىء ويقول لغيرك ضده تماما.
يؤذيك ويداويك ، وتدى الحلة وصا أى توصيهم بالتسامح وتروح من هناك تدى النقارة عصا
أى تقرع طبول الحرب .
* عينى فيها دخلت واديها : القملة .
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأخت سمية
مشاركاتك معانا دايماً قيمة
Quote: * هي فيك وإن عرفتها بكريك : إيدك
* شهاوي تفلق وتداوي.
* تدي الحلة وصا والنقارة عصا.
هذه أمثال وليست غلوتيات , تضرب لمن يقول لك شىء ويقول لغيرك ضده تماما.
يؤذيك ويداويك ، وتدى الحلة وصا أى توصيهم بالتسامح وتروح من هناك تدى النقارة عصا
أى تقرع طبول الحرب .
|
تنبيهك في محله .. وعلى أي حال الملاحظة محولة للأخت عواطف.
طيب ما تكملي معانا بقية الغلوتيات ... عشان نشوف غيرهم:
* عندي شجرة كبكبيق ... قطعت منها كوريق
* عمي قصير وبصير
* عمي قصير وملان قمصان
* عيشي شريته .. قمت الصباح ما لقيته
* سيفي سليته .. تاني ما بدخل بيته
* عندي شدرة كبكبيق ..... قطعت منها كوريق
* مركبي تمشي الشرق والغرب .... وإن هبشتها قشة تنقلب
* حبوبتي أم برتيتشات ... مشت السوق وما جات
| |
|
|
|
|
|
|
|
|
|
Re: الغلّوتيّات (الفوازير) السودانية (Re: سمية الحسن طلحة)
|
| Quote: ديل غلوتيات هاملات ماعندهن اهل أحسن نشوف غيرهم |
لكن يا بت الحسن ما اتلومتي معاي .... الغلوتيات الهاملات ديل حقني أنا زاتي:-
* عمي قصير وبصير ----------- (المخرز)
* عمي قصير وملان قمصان ------ (عيش الريف)
* عيشي شريته .. قمت الصباح ما لقيته (النجوم)
* سيفي سليته .. تاني ما بدخل بيته (اللبن)
* مركبي تمشي الشرق والغرب .... وإن هبشتها قشة تنقلب (العين)
* حبوبتي أم برتيتشات ... مشت السوق وما جات (القروش)
بدل ما تقولي هاملات ... قولي بس غلبنّك .. يعني كتيرة ود البندر يغلب (ناس مرقنبو قرنبو)؟
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
| Quote: بدل ما تقولي هاملات ... قولي بس غلبنّك .. يعني كتيرة ود البندر يغلب (ناس مرقنبو قرنبو)؟ |
والله يا أبو العزايم حبوبتى الحجتنى بى الغلوتيات ديل ماتت من زمااان
وأنا كانن محرقات روحى لأنى عارفاهن وما قادرة أتذكرن
لكن غلب شنو !! عمرك شفت ود بندر غلب بدوية ؟
كدى هاك الغلب الأمه بت عم أبوه دا
دى غلوتيات بالدوبيت المرة دى
ولآنى عارفة بغلبكم بديكم الحل طوالى
ويكون للفائدة والتسلية :ــ
هذا اللغز أرسله الحاردلو لود الرضى
فكروا فيه قبل أن تقرأوا حل ود الرضى له
اللغز :ـ
سيسب وأنقلد فى ليالى الصيف
لا موج لا مطر لا شتا لا زيف
زولو واحد حريف ولطيف
الملايد العشرة حراته بعمل كيف
الحاردلو
حل اللغز
شعرك بعرفه لكن معاه غتاتة
وشعر البنات ما بوصفو بى حراته
السيسب وأنقلد ديس المبروعة عن أماته
والملايد العشرة أصابع المشاطه
ود الرضى
| |
|
|
|
|
|
|
|
|
|
Re: الغلّوتيّات (الفوازير) السودانية (Re: almulaomar)
|
الاخ محمد أبو العزائم
لا أدرى إن كنت أخ الصديق القديم ماضى أبو العزائم
أم إسم على إسم.
عموما تحياتى لك وكل المتغالتين.
أولا احل لى غلوتيتين تلاتة بعدين اتغالت معاكم بى غلوتياتى.
Quote:
* هي فيك وإن عرفتها بكريك.
|
مع تذكير الضمائر ( هو فيك وكان عرفتو بكريك) يقصد بها عندنا الاسم
Quote:
* حبوبتي من جنها شالت جدي في سنها.
|
الشعبة التى ترتكز عليها الراكوبة
Quote:
* طاسه وطمنطاسه
في البحر غتاسه
بطنا لولي
وضهرا نحاسا
|
القرنتية
وهاكم من عندى
1) وردن عجايز وسدرن فتوات
2) حميرة مدردمة تصر العين وتلوى العنقرة
3)هدلك هدلك فى السما معلق الما بنقره أمه تتطلق وابوه يتفلق
4)جاى من هبكة شايل موية فى شبكة, لقيت الحجر بيقح ضربته لامن مرق المخ
5) عمى طويل قلقاتو فى حلقو
6) بطيختى بطيخة الريف ما بيحلها إلا النبى الشريف.
7) شعيبة شايلة كعيبة وكعيبة شايلة رقيبة ورقيبة شايلة كلفت وكلفت ماشى ويتلفت
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
الأستاذ الكريم أبو العزائم
تحية طيبة مباركة
أعوفك ولا أركبك وهما إختاران لا ثالث لهما عندما يفشل الواحد في حل اللغز على كل حال عفتكم (عفوت عنكم)
طيراً طار من قنطار
حتت ريشو وقام عوار
بطنو السيح وضهرو النار
شدره فريده في رأسها حديده
الجن حراسها الموت في رأسها
==
البندقيةمش المدينة الجميلة آلة القتل والدمار
| |
|
|
|
|
|
|
|
|
|
Re: الغلّوتيّات (الفوازير) السودانية (Re: محمد أبوالعزائم أبوالريش)
|
Quote: )جاى من هبكة شايل موية فى شبكة, لقيت الحجر بيقح ضربته لامن مرق المخ
|
دا الكضب ياجماعة
شوفو النجم كيف بتكجم : البليلة لما تكون فوق النار
... وقريبة شايلة كلفت يمش ويتلفت .... : السيقان شايلات البطن شايل الراس .
ِ
( والله يا أبو العزائم عندى كرتونة آبرى أبيض بت البندر دى مرقتو لى من مزاجى )
اللى مايعرف الصقر يشويه ، الله يهديهن غايتو .
| |
|
|
|
|
|
|
|
|
|
Re: الغلّوتيّات (الفوازير) السودانية (Re: سمية الحسن طلحة)
|
فتاة قالت لسوداني ياأسود بنوع من السخريه فأنظروا بما جاوبها
قالت لي يا أسود - رجعت للوراء
حنطي لونهاااا وبشرتي سمراء
مغرورة شكلها تحب الطاعة والولاء
السواد هو الوطن في القارة السمراء
سوادي هبة خالقي وأحس بارضاء
لوني شرف لي وللكعبة كساء
للرجــال مميز للشوارب واللحاء
سوادي في العيون زينة وبدونه عمياء
لوني شهامة ورجولة ما به ما يساء
سوادي خيام بادية لعروبة كرماء
تعلمين لوني للمرأة ستر وجمال وغطاء
سوادي على كل راس أمنية النساء
وإن كان شعرك أبيض تشترين لوني بسخاء
وبعدما تضعينه تعودين شباباً للوراء
تقولين أســـود ؟؟؟
تقولين أســـود ؟؟؟
وكل من يزور الكعبة يقبل لوني بانحناء
السواد هو صندوق سر لرحلات الفضاء
السواد هو بترول مبدل صحاريك لواحة خضراء
لولا السواد ما سطح نجم ولا ظهر بدر في السماء
السواد هو لون بلال المؤذن لخير الأنبياء
لولا السواد لا سكون ولا سكينة بل تعب وابتلاء
تقولين أســـود ؟؟؟
تقولين لي أسود
والسواد فيه التهجد والقيام والسجود والرجاء
فيه الركوع والخشوع والتضرع لاستجابة الدعاء
فيه ذهاب نبينا من مكة للأقصى ليلة الإسراء
لو ضاع السواد منا علينا أن نستغفر ونجهش بالبكاء
عــــزيزتي
تأملي الزرع والضرع وسر حياتنا في سحابة سوداء
اسمعيني والله أنتي مريضة بداء الكبرياء
أنصتي لنصيحتي يا مرا و لوصفة الدواء
عليك بحبة مباركة من لوني مع جرعة من ماء
أنا لست مازحاً وستنعمين والله بالصحة والشفاء
سامحيني يا مغرورة لكل حرف جاء وكلمة هجاء
وكل ما ذكرت هو حلم في غفوة ليل أسود أو مساء
لا أسود ولا أبيض بيننا في شرعنا سواء
كلنا من خلق الله الواحد نعود لآدم وأمنا حواء
هذا بس عشان قالتلوه ياأسود كيف لو قالتلوه يافوشي والا ياتركوازي
أنشاء الله أنها تعجبكم
مع حبي تحياتي
| |
|
|
|
|
|
|
|
| |
محمد أبوالعزائم أبوالريش
almulaomar
حليمة محمد عبد الرحمن
Rabab Elkarib
عواطف ادريس اسماعيل
ismeil abbas
الطيب شيقوق
محمد سنى دفع الله
salma subhi
فيس بوك
تويتر
انستقرام
يوتيوب
بنتيريست