تسجيل صوتي يوضح تعرضي لمحاولة إحتيال صباح اليوم ..!!
فجأة وانا في الشغل جاني تلفون رديت سمعت صوت بري جدا ويكثر من كلمة (ماشاء الله) . والأحاديث الدينية والأيات القرآنية .. صوت يكاد يعيط من الإيمان والإفعام فيه (يعني صوت مفعم من الأيمان) في الاول أفتكرت روحي فزت في جائزة من أي مسابقة دينية من المسابقات المنتشرة في الاذاعات هنا(طبعا دي من عاشر المستحيلات) .. لكن بعد شوية سمعت الراجل بيقول إنو شاف رقم تلفوني في المنام قرب الفجر ..! وشاف صورتي وعرف أنا زول صالح وبقيم الليل وشافني في لباس ابيض من قمة رأسي حتى أخمص قدمي وشاف شعري أسود غزير مهذب يفوح منه رائحة طيب .. وقام طوالي قرا لي أيات من صورة المدثر وقال هو شافني اطير في سماء زرقاء والبسمة تظهر في محياي وكمان رأني إلى جوار النبي (ص) ..!! في الحتة دي تحديدا أصابني خوف شديد وطوالي قفلت التلفون وكبيت عرق شديد .. جاني إحساس إنو يوم شكري جا وإني ميت ميت لا محالة وأنو الضرب لي دا ملك الموت بي ذات نفسو ..! إتشهدت واستغفرت واحصيت ذنوبي فما استطعت حصرها ..! بحثت عن حسناتي فما استحضرتها ..! توترت وطلعت من المكتب على الشارع شربت لي كباية ليمون سرعة سرعة عسى أن أكملها قبل أن يداهمني عذرائيل ورجعت المكتب وكل المعاي لاحظو توتري .. وكان قدامي فاتورة مفروض اشوف حساباتا لكن ما اشتغلت بيها وجلست على الكرسي شاخصاً ماحصاً ماحطا بصري للسماء وكاني أرجو منها الغوث والمدد .. نبهني من معي بالإنتهاء من الفاتورة نظرت اليهم بكل جذع وتذكرت مقولة الهندي (موت في .. فايدة مافي) ..! بعد شوية كدة الجماعة أتلموا فيني شفقوا بالجد .. سألوني عن الحاصل .. طلبت منهم العفو والعافية وأن يستوصوا خيرا بأهلي .. جمبي ود عمي قال لي يا زول الموت من الحياة ما معروف ؟ قلت ليهو واللللللله بقى معرووووف وخلاااص مدتي إنتهت وهسي ملك الموت بيكون وصل أبو حمامة ..! شرحت ليهم الحاصل .. ما صدقوا .. قلت ليهم يعني إلا أموت قدامكم حتين تعرفوا الله واحد ؟! ود عمي شال الموبايل عاين لي أخر رقم : قال لي يا زول دا متصل ليك من شريحة سوداني ؟ قلت ليهو : يعني إنت عارف إنو عزرائيل شايل شريحة زين ولا شنو ؟! أمكن دا رقموا التاني ؟! الجملاعة طمنوني وأقنعوني اتصل بالزول دا تاني اشوفوا داير شنو ؟! أنا متوتر ومتلعثم لكن رضيت واتصلت بالزول بعد ما ختيت الموبايل في حالة تسجيل ودا السجلو (لاحظوا للتوتر في صوتي): غايتو الذاكرة كانت مليانة والتسجيل قطع لكن الزول دا في النهاية قال أنو متأكد إني زول صالح وولي من اولياء الله الصالحين (ياخي تخخ) .. وطلب مني أحول ليو رصيد بقيمة 50 جنيه للمساهة في علاج أحد المرضى وإطعام بعض الايتام ..!! ود عمي استلم التلفون وطلب عنوان المريض وعنوان الايتام وهو حا يجيهم لحدي عندهم في الابيض .. الزول اتزاوغ وقال داير يتكلم مع صاحب التلفون وانا عيوني جاحظة وبشير لي قريبي دا ما يديني التلفون وأنا سامع كلام داك بـ يتهم ود عمي إنو بيشكك في رؤيا شافني فيها ؟ وود عمي بياشر لي يديني التلفون وأنا عرقي جاري واتكرفست في كرسيني عشان ما أشيل التلفون الكان بيطلع منو (صوت الموت) بالنسبة لي ،لحدي ما داك زهج وقفل التلفون بعد كمية من السباب والاساءات ..! حتين بعد داك أرتحت .. وشربت كباية ليمون تانية ..!!

[رد على الموضوع] صفحة 1 „‰ 1: << 1 >>

احدث عناوين سودانيز اون لاين الان

اراء حرة و مقالات	Latest Posts in English Forum
Articles and Views	اخر المواضيع فى المنبر العام
News and Press Releases	اخبار و بيانات

الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة

About Us
Contact Us
About Sudanese Online

اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين

News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums

If you're looking to submit News,Video,a Press Release or or Article please feel free to send it to [email protected]