يا سلام عليك يا يوسف الموصلي .. دا الشغل ولا بلاش ..(10-10) ,,

Quote: شكرا ليك يا دكتور على ردك المحترم وحسن ظنك فينا ... لكن صدقيني علاقتي بالموسيقى زي علاقتك بي كأس العالم (العامل المشترك الوحيد المشاهدة والاستماع والاستمتاع) لا بعرف أعزف ولا بعرف لي عازف حريف ... يعني زول أضيني زي عمر شتارة دا بس حسن ظنك دا ياهو البثت لينا أنك إنسان ... أسي عليك الله البصبرك على عمر شتارة وشلاقة دا شنو ؟ غير إنسانيتك الزايدة على اللزوم ومعليش في التأخر على الرد ... إلا أني يا دوووبك انتبهت لي مداخلة الأستاذ/ناذر في أنو نقل شلاقتي دي لسعادتكم ... معليش استحمل مداخلتي الجايطة دي ... لأنها عبارة عن أشياء جايطة في صدري كل ما أبحت بها لشخص أتهمني بالجنون ... لأنهم بتهموني بتعرية السودان .. وزي ما عارفين أنو الحاجة الوحيدة الفاضلة لينا كسودانيين هي الموسيقى ... لا عندنا كورة ولا أي وسيلة ترفيهية تانية ... فقط الموسيقى ولو في زول اتهجم عليها يبقى الزول دا مجنون ليس إلا ... ونحمد الله ثم الكاهن ثم ناذر على توفير وسيلة مخاطبتكم .... اقتباس: وعليه ان يجيبني عن تسالته عمن تعريف لقيادة الاوركسترا قيادة الاوركسترا ما بعرف تعريفها أكتر من أنها لزوم ضبط الإيقاع ... لكن الشيء البعرفو إنو في شرط واحد لو ما أتحقق بسقط كل الشروط السابقة ... الشرط دا هو الجدية والتشدد في التعامل وقيادة الاوركسترا هي أصعب من القيادة العسكرية ... والقيادة العسكرية معروف عنها بالصرامة والشدّة في التعامل إذاً قائد الأوركسترا لازم يكون حازم وصارم أكتر من قائد الفرقة العسكرية ... وزي ما عارفين في العسكرية بتسقط كل العلاقات الإجتماعية وتبقى علاقة واحدة وهي أني جندي ودا القائد بتاعي عشان كدةلازم التزم بتوجيهاته وإلا أداني عقوبة قاسية جداً ... وعليه يبقى لازم تكون علاقة العازف مع قائد الأوركسترا جادة جداً جداً ... خصوصاً مسألة الصداقة والأقدمية ... لأنك ممكن تكون مع عازفين ويقوم مثلاً العازف فلان لأنه صاحبك يطلع برا الحذية ويقول عاوز يجدع ليه جدعتين كدة عشان يبهرك بي مقدراته الفنية ... وهو ما عمل كدة إلا عشان في سبب أتاح ليه الحرية دي والسبب دا هو أنك صاحبو أما بخصوص الأقدمية ودي أظن المشكلة البعاني منها حالياً الأستاذ/عادل مسلم في معزوفاته ... لأنه ما ممكن يكون صارم مع محمدية (لما ضربت ليك المثل هنا بي عادل مسلم موش لأنه قائد ... لا لأنه فنان بسعى لتقديم فن راقي ومعافى وسليم) عشان كدة لازم تسقط جميع العلاقات والأشياء الممكن تحد من حزم قائد الأوركسترا وزي ماقلت يا أستاذ وجود النزعة الشخصية لدى العازفين ناهيك عن أنتشاء العازف أثناء اللحن والممكن يخليهو يطلع برا الحذية ... ويجوط ويربك زي ما عاوز .. أها في الحتة دي باقي ليك لو ما كان قائد حازم وشديد في ردة فعله وحضوره الطاغي بجبروته حـ يتعمل كنترول للعازف وشخصيته ... قيادة الأوركسترا زي ألفة الفصل ... إذا كان الألفة زول طيبان وحبوب حـ تلقى الفصل جايط زي الموسيقى السودانية ... لكن إذا كان الألفة صارم وبكتب المهرجل عشان تتم معاقبته ... يبقى أكيد الفصل دا حـ يكون هاديء ورزين زي الموسيقى العالمية ... وأنا لما ضربت ليك المثل بي أبو اللمين موش لأنو قائد أوركسترا لا طبعاً ... بل لأن أبو اللمين أكتر فنان سوداني معروف عنو بالشدة والحزم البخلي العازفين يتهيبوه أثناء تأديتهم للعمل الفني وزي ما عارفين أنو الموسيقى هي فن مزج الأصوات والسكوت عبر فترة زمنية محددة ... يبقى الفيمتو ثانية هو البتطبق في أداء الموسيقى عشان كدة يا أستاذ أنتو عملتو النوتة الموسيقية وتواجد القائد ... يعني عامل الألتزام بالزمن في الموسيقى شرط أساسي في العمل الفني .. عشان كدة موسيقانا محلية بينما نحن في أعتقادنا أنو سبب عدم تقبل الموسيقى السودانية لأنها (سباعية السلم) ... في حين أنو بنجد موسيقى (أسانصيرية السلم) وبعد دا لقت قبول عالمي والعالم كله اتقبلها ... يبقى المشكلة ويييين ؟ طبعاً المشكلة في الأداء ... لأننا المشكلة دائماً ما في الفكرة أو في العمل ... ولكن المشكلة في أسلوب العرض ... فإذا كان أسلوب عرضك سيء يبقى مهما كانت جودة فكرتك أسلوب عرضك حـ يكون سيء ودا الخلى الموسيقى السودانية سيئة وماشة إلى الأسواء .... لدرجة إننا أسئنا للموسيقى وحصرناها على الأورغن وأفتكرنا الأورغن دا هو الموسيقى مشكلتنا نحن السودانيين جايطين في روحنا ... وفي موسيقانا لا يوجد الأسلوب الأمثل للتعامل معاها وفق شروطها ومتطلباتها من (قائد صارم ونوتة و إلتزام العازف) ... عشان كدة مافي لحدي الآن القائد الموسيقي الأمثل في السودان ... ومافي موسيقى محترمة ... كلها هرجلة منظمة ... ودي فرصة عشان أشيد وأبدي أعجابي بالفنان/عادل مسلم ... لأنه في نظري هو الفنان الوحيد - من المتواجدين في السودان – البسعى لأجل تقديم موسيقى محترمة ... اقتباس: - و أسفاي واخواتها وعزفها اعلي عازفي الكمان مستوي في العالم العربي تحت قيادتي - سوف ياتي لمحمد الامين من توزيعي وقيادتي للاوركسترا السودانية - الحزن النبيل بتوزيعي (أحسن العازفين العرب تحت قيادتي) - واحشني (أحسن العازفين السودانيين) ومن توزيعي سؤالي ليك يا أستاذ ... تفتكر النماذج الذكرتها دي نالت الإقبال المفروض تناله لولا عملية الترميم التقني ... بمعنى أنو لو ما دخلت فيها المعالجة التقنية ... كانت النماذج الذكرتها دي نالت أضعاف الأضعاف من ما نالته بعد المعالجة ... لكن المعالجة قتلت فيها روح الطبيعة ... لأنه المعالجة كانت ظاهرة جداً .. وفي آلة كانت طاغية على جميع الآلات وهي الأورغن ... سؤال أخير هل أغنية (على قدر الشوق) كانت فيها معالجة تقنية بنفس أسلوب المعالجات الحالية ... ؟؟؟ طبعاً لا ما أظن وظاهرة جداً ... لأنو في فرق شاسع بينهم ... يبقى أي نعم ممكن تكون في معالجة تقنية لكن المشكلة بتكتر ليها المحلبية يا أستاذ ... وبتخليها كتيرة وظاهرة ... زي عملية الأخراج في المسلسلات التركية حالياً ... تلاقاهم مركزين على العيون وعاملين كلوس أب للممثل دائماً عشان يظهروا تعابير الممثل ... لكن الكترة دي بتبيخ الحكاية ... وأي شيء لو فات حده بنقلب ضده المهم يا أستاذ بعد أخد انجمامتي دي ... وأجمع قلبي وكبدتي وكلوتي من أثر الخلعة الحاصلة بجيك راجع عشان أوضح ليك وجهة نظري أكتر