ينتهي عقدي بنهاية شهر ابريل الماضي وكالعادة قام الموظف المسئول باللازم وزيادة وأحضر لي العقد للتوقيع عليه وكانت كل الشروط جميلة من راتب وترحيل وعلاج وسكن وإجازة ويبدو لي أن الموظف المخضرم قد نقل صيغة العقد من عقد مؤسسة أخرى أو وزارة أخرى لا أدري المهم أثناء قراءتي للشروط أجد الشرط التالي : يستحق المذكور إجازة وضع براتب كامل مدتها 45 يوما قال شنو كمان 00 بما في ذلك أيام العطل الرسمية الموظف كان في عجلة من أمره وقال لي : لاتأخرنا يازوووووول وقع بسرعة على العقد فقلت له : مهلاً : كدي النشوف إجازة الرضاعة مدتها كم ؟؟ شيء عجيب ناسنا في السودان يحيلوك للصالح العام بلا سبب وديل يودوك عنبر الدايات !!! قال وضع قال ؟؟
05-30-2004, 11:40 AM
نصار نصار
تاريخ التسجيل: 09-17-2002
مجموع المشاركات: 11660
نصار الموج كرماوي لكم التحية وجميل جداً ان نحظى بردودكم بعد الثوب الجديد للبورد والتهنئة لكم ولنا وللأخ بكري ولجميع البورداب طبعاً مفروض برضو تكون في إجازة وضع على قول الموظف يعني تمنح لزوج المراة التي تود الوضوع عشان على الأقل سي السيد دا ماتكون مهمته في حدود الخروف انا قلت خروف الحكاية بقت تووووووووور عديل كدا مفروض كل الدول العربية تسن وتشرع قوانين بمنح الأزواج عطلة لمدة 45 يوم اثناء وضوع زوجاتهم كتبت هذا الموضوع لأسخر من بروقراطية الإجراءات واعتقد ان هذا الموضوع يحتاج للكثير من النقاش
05-30-2004, 04:53 PM
المسافر المسافر
تاريخ التسجيل: 06-10-2002
مجموع المشاركات: 5061
فعلاً يامسافر برضو واحد من الزملاء قال نفس الكلام قال كان ممكن توقع وبعدين تطالب بالاجازة وقلت ليهو طيب موضوع التقرير قال دا بسيط جداً يعني انا لسه متردد اوقع وللا ما اوقع بحاول اشوف للحكاية مخرج
لوووووووووووووووووووووووول حروزه .. لووووووووووووووول نصار ولوووووووووووووووووووووووووووولين صديق الموج .. غايتو يا ابو حراز مافى زول قدر عليك الا نصار وصديق الموج .. ضحكت ضحكت لما وقعت .. استغفر الله العظيم .. بعدين مدام انت عقدك القديم انتهى والبورد جانا بى توبو الجديد والسلام رفرف فى البلد ..انت الجايبك لينا بى قميصك القديم وصورتك دى شنو ؟ اتقى الله فينا وجيب ليك صوره غير .. لكن ما تغير اسلوبك المميز ده .. الله يديك العافيه وجد مفتقدين قفشاتك يا فوااااااااكه كل البورد مش فاكهه واحده لا ..انت بستان من الفواكه والله .. الله يديم عليك الفرح والسعاده يا رب..
05-31-2004, 07:36 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
سوما حتى فراشتك تحمل في أعماقها مجموعة من قصائدك الملونة ومجموعة من حروفك المخضبة بطين البلد وأنفاس السودان قال لووووووووووووووووووولين قال صديق الموج دا أحسن مننا وللا أحسن مننا طبعاً للأسف الشديد مما دخلت البورد دا اتصورت يمكن 50 صورة وكل واحدة تطلع أشنا من التانية يعني الواحد بعد ما عمل ليهو زبائن وجكس ماعاوز يفقدهم فجأة تصدقي عندي صورة في الابتدائي 00 غايتو لو ماشفت فيها اسمي نهائي ماكان صدقت انها صورتي مخاتة سايلة يمين وشمال ياكافي البلاء قلت لأمي عليك الله ما كان تنضفونا بس يوم الصورة دي وبعديها تاني انشاء الله ماتحممونا الا في العيد والأدهى أنني كنت البس جلابية ولا زرارة مافيها قال فاتح الزراير قال يعني الناس بتفتح زرايرها لمن تشاكل ونحن ماشاء الله على وضوء 24 ساعة 00 يعني على شكلة 24 ساعة
05-30-2004, 09:21 PM
ABUHUSSEIN ABUHUSSEIN
تاريخ التسجيل: 08-14-2002
مجموع المشاركات: 39330
حمزة سليمان كدي اول شيء نقوم من الولادة دي ونتم الأربعين والسنة الجاية السودان بيكون ازدهر بالسلام أهم شيء ارضي الفي الخرطوم دي مايقوم يدخلوها لينا في البرتوكولات زمان قالوا لينا المهاجرين لمن دخلوا المدينة قاموا الأنصار اتقاسموا معاهم كل شيء حتى العندو مرتين طلق واحدة وزوجها للمهاجر اها انشاء الله ياناس الخرطوم تقسموا معاكم للجماعة
05-31-2004, 07:41 AM
degna degna
تاريخ التسجيل: 06-04-2002
مجموع المشاركات: 2981
ابوحسين اول شيء صورة الشفع الصغار ديل ظريفة جداً كانت معاي واحد امس على المسنجر طبعاً برضو كان شعارها الأطفال ديل والمصيبة دي كلما أتكلم معاها في العرس تشب لي في حلقي قالت عاوزة تقعد ساااااااااااكت طبعاً جيران لينا الجماعة ديل وعندها أمها الله لا وراك ليها بتكرهني كراهية عدوك مرة قلت ليها انا عاوز بتك دي يا حاجة قالت لي : والله يا اب حراز بتي دي كان عرستك شطري الرضعتو بيها دا بقطعو وبرميه لأقرب كلب سعران !!! بالمناسبة قالوا الزول السعران كان عض ليهو كلب 00 الكلب بيسعر بالله عليك الله نسيبة زي دي مش حقو الواحد يمشي يسعر ويجي يعضيها !!! المسكينة بتها كل يوم بتلاقيني قال تقطعو قال !!!
05-31-2004, 12:25 PM
بدرالدين شنا بدرالدين شنا
تاريخ التسجيل: 07-30-2002
مجموع المشاركات: 3514
ابو حراز كفاك غربة قال وضع اب 45 يوما خالص البترول طلع في محافظة الحصاحيصا وقعت شركة باكستانية عقد للنقيب في المحافظة وأنت لغة الباكستانية كويسه تعال بشيغلوك مترجم انت بترول في انت مافي مشكل تعرف انا مشيت كاب الجداد اه صاقرير حفرولك فيها بئر كاب الجداد كمان بئر وحلة جنبها اسمها افطس والسديرة والفراجين وكمبو البان وووو اق من جنس الحلال دي
عندنا واحدة هنا سودانية صيدلية وزوجها مهندس ولكن هي موفقة بعد كم امتحان كدا في بلد الخواجات دي بقت حاجة تانية وربنا وفقها وزوجها تخصصه غير مرغوب فيه اها بقت هي تدخل 70% من دخل الاسرة
اها جينا للولادة بعد الاربعين الدكتورة قالت اصلوا ما ممكن تسيب طفلتهالمربية والبت حتفقد حنان وكدا وهي اصلها زولةحنينة ومثالية اها يعملوا شنو اذا وقفت هي معناه انه 70% من دخل الاسرة توقف وماذا هم فاعلون في التزاماتهم اقساط البيت الفخم والعربات دا غير التزاماتهم الاسرية وخاصة الرجل المعتمدين عليه اهله كليا وهو يقري ليه 5 من اسرته في الجامعات الخاصة دا غير موبايلاتهم ولبسهم....الخ
ما عندهم طريقة الا الراجل هو اللي ياخذ اجازة امومة اقصد ابوة
اها الخبر وصل لاهل الراجل وهم من اهل العوض اها شالوها وختوها في المسكينة بت الخرطوم الخلت ولدهم ياخد اجازة امومة
تحياتي وتقديري
06-01-2004, 06:14 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
دقنا حليل زمن العروس الكاربة وحليل زمن الرجال البيكسروا العناقريب بالله عنقريب زمان دا لو طلعت فيهو دبابة مابتجيب فيه خبر ماعارف الجماعة ديل كانوا بيكسروه كيف ؟؟؟ هسي والله جيل البناطلين دا بسكويت مايكسرها
بدر الدين شناة عليك الله نزل لينا صورتك نكسر بيها عين الشيطان عشان البورد بتاعنا دا مايسحروه قالوا الشيطان عاوز اقل شيء صورتين اها انا نزلت صورتي 00 كمل لينا الناقصة قال {DAY OFF} قال
{THE RAIN} تصدق معانا واحد مصري الراجل ادوه خطاب 00 لمن فتحو لقاه اعتذار عن عدم تجديد العقد فجأة الراجل قعد يبكي بأعلى صوت انا افتكرت طبعاً انه فتح الخطاب ولقى وفاة واحد من أولاده طبعاً طوالي عزيتو وحاولت اصبّر فيهو السعوديين يعجبوك طبعاً في المواساة دي مما سمعوني عزيت الراجل اها 00 احسن الله عزاكم 00 جبر الله كسركم 00 الله يرحمه ويحسن اليه المصري اخد بكيتو وقام قال لينا والله ماعنديش حد مات لكن عقدي ما اتقددليييييييش ؟؟ غايتو كان قدامي كباية موية كشحتها فيهو طوالي والله قربت أخنقو كان ما الجماعة مسكوني منو قال ما اتقددلييييييش قال !!!!
ود قاسم يوم شهري عديل كدا جايز تكون غلطة مطبعية خلت اليوم الشهري ما يبين
البت الزهرة في كل المواسم 00 تماضر والله بيني وبينك وضع العزابة دا وضع مؤلم جداً يعني غربة + عزابة عليكم الله دي يجمعوها كيييييييييف عليك الله وصيتك تكلمي لي يازول يازول 00 هشام دا كلو ما اقابله بس عنده سؤال واحد اها يا اب حراز الأولاد كيف ؟؟؟؟؟ غايتو أخوك دا راجل ظريف جداً عندما اراه فأنا ارى السودان يعني يسلم عليك ويعمتك لحدت نفسك ما ينقطع كدا السلام وللا بلالالالالالالالالاش قال قهوة حبشية قال يوسف الموصلي بالله أخبارو شنو دا زمان كان بيشارك في بوستاتي مما قلت ليهو عاوزك ترسل لي لأمريكا قام قطع الموية والنور والكهرباء بالمناسبة ياتماضر أمي زمان كان بتقول لي 00 هاك جيب لينا بصل ولحمة وزيت وبامية في إجازتي دي الوضع اتغير قامت قالت لي : جيب لينا معاك بصل ولحمة ورجلة وكهرباء !!!!! الكهرباء في الخرطوم بقوا يجيبوها في قفة الخدار !!!! قال حرزرز قال
المهندس تحياتي واشواقي لك ولبورداب الخرطوم يعني ناس رفيق عاوزين ينقبوا في الحصاحيصا عاد الله يسترنا من هز الراس الكتير طبعاً شايف مجموعة منهم بيعملوا في انشاء بنك السودان الجديد بالمقرن قلت لي مشيت كاب الجداد والسديرة والفراجين وكمبو البان طبعاً أكيد ماشفت عد الـ 0000 دي كنت قلت ليكم مشينا ليها لعرس من الفتيحاب اظن مشينا عشرة ساعات حتين وصلناها والعروس الله لا وراك ليها عاد بس عوارة عدووووووووك طبعاً نحن قلنا العريس الحيوان دا مادام قطع الخمسمائة كيلو دي أكيد العروس حاتكون في جمال ديانا ورشاقة نيكول كيدمان العشاء جابوه لينا صحن وااااااااااااااحد والكسرة تقول ضاربنها اورنيش ديل قالوا يوم يقشروا في الأكل بيقشروا بي ملاح القرع !!!! لو عايزني يا المهندس اعطس اليوم كلو بس دردق لي قرعة قدامي !!!!
تيتا 00 اسمك فيهو حركة موسيقية طبعاً معلوماتي صفر في الموسيقى لكن البورد دا علمنا اشياء كثيرة والفضل لله ثم للقائمين عليه والمتخصصين اخبارك مقطوعة انشاء الله المانع خير افتقدناكم كثيراً لك تحياتي ومودتي
تسنيم ظريفة جداً قصة الأمومة هذه الظاهرة عندنا كثيرة جداً لدرجة انني كنت افكر ان انزل فيها بوست هنا رجال كثيرون مرافقون لزوجاتهم الزوجة تعمل وتكد طول اليوم وصاحبنا دا في البيت الغريبة الاحظ أن بعض الجنسيات الأخرى يعملون بينما بعض إخواننا السودانيين لايعملون اطلاقاً ويكتفون بإنجاز اعمال البيت قبل فترة ذهبت الى أحدهم ووجدته يقوم بكي الملابس وكنت على عجلة من امري ولابد ان يذهب معي لأحد الزملاء بكل بساطة قام قال : دقيقة بس أكوي الفستان دا
06-01-2004, 06:41 AM
EMU إيمو EMU إيمو
تاريخ التسجيل: 02-16-2002
مجموع المشاركات: 2923
ايموتصدق البلد دي فيها بدلات كتيرة جداً يعني في بدل ولادة وبدل علاج قبل ايام جارتنا صرفوا ليها بدل تصحيح عليك امان الله 20 الف ريال والراجل بتاع الأمومة أدوه ليك 500 ريال بس غايتو بصراحة كدا انا زول متخلف يعني لو اتزوجت واحدة بتعمل ما اقبل انها تصرف علي يعني كل واحد يكون كومه براهو لكن لامانع انها تشتري الأرض وتبني البيت وتوصل الكهرباء والتلفون انا حا أكون زول بامية مفروكة ساااااكت
06-01-2004, 07:18 AM
Hani Abuelgasim Hani Abuelgasim
تاريخ التسجيل: 10-26-2003
مجموع المشاركات: 1103
هاني الصغيروني انتو بطريقتكم دي بتطفشوا الجكس مننا يعني صورتنا معاكم ما بتاكل عيش تاني
عاوز تشتغل معانا تعال مرحب بيك قال المصري قال والله دا لسه يبكي والمشكلة سألت عنو قالوا عنده عمارتين وكل عمارة فيها اربع طوابق وثلاثة تاكسي في القاهرة يعني دا حتى لو يجلدوه برضو مش كفاية
غربة لك التحية نحن بنعمل في الدعايات في سبيل انو ناس امريكا واوربا يشوفوا البشتـنة دي ويقوم واحد منهم أو واحدة تحس ويرسلوا لينا عقد انشاء الله حتى راعي بتاع ضان مرة قالوا في تعاقدات لأسكتلندا عندي زميلي صيدلي راجل ظريف جداً ومجنني كل يوم باللوتري اها قلت ليهو قالوا في تعاقدات لآيزلندا واسكتلندا قام قال لي اها الشروط شنو قلت ليهو تكون بتعرف الضان والغنم كويس جميل ان تكون راعي في الدول الإسكندنافية طالما أن الجيب سيدخله اليورو
06-01-2004, 08:11 AM
Hani Abuelgasim Hani Abuelgasim
تاريخ التسجيل: 10-26-2003
مجموع المشاركات: 1103
المصريين ما نجيضين يا ابو حراز .. الواحد يطلع الخليج (يعمل-لو شأة أو عُمارة وعربية) والموضوع انتهى .. لكن ناسنا ديل الطاشرات و والعشرينات دي تلقاهم لسه الواطه ما اتبنت والعربية لادا موديل 66 من زمن (الدكاترة بي عرباتهم) ... حسي والله تشتري عربتك براك يقلعوها.. دا كان فضلت قروش تشتري بيها عربية ...
بالمناسبة السعيدة دي .. ناس سفارة الرياض عاملين عرض خاص (تخفيضات) إعفاء الضرائب لما يقارب 40 - 50 % خلال الأيام دي .. كان عندك شي أمشي حصل ... تلاقي الموظف تحت شجرة النيم الجنب الكانتين بتاع حاج طه ... أكتب اسمك بعد ما تدافر .. واستنى لحد العصر شان ينادوك .. تقابل الباشا وتحاول تحنكو شان تطلع بأكبر قيمة تخفيضات ... أسرع فالمدة محدودة (والله دي دايرة ليها بوست براها) لكن بوستك عامر
06-02-2004, 07:46 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
هاني المصريين لديهم خطط ونحن لالالالالالالا يعني الواحد بيجي باهداف محددة لكن نحن وضعنا الإجتماعي يحكم على هذه الخطط بالإعدام يعني مرة يقولوا ليك دي حملت واتوحمت على خروف لازم ترسلوا ليها والريييييييييييحة دي أكتر حاجة بترفع ضغطي أظن مفتكرنها مرمية سااااااكت في الشارع الواحدة يعرسوها ترسل ليها ريحة العرس بعد 20 يوم تحمل بعد 7 شهور بس يجيك الشافع مارق وبكامل قواه العقلية ونجييييييييييييض اها تاني ترسل ليهم الريحة وواحد عاوز يبني وأخوك زعلان ونسيبتك ماجات الحج وهـ ل م ج ر ا
06-02-2004, 11:29 AM
almulaomar almulaomar
تاريخ التسجيل: 07-08-2002
مجموع المشاركات: 6485
الأخ أب حراز يقول أهل العوض لي حدهم إن بليت يا فصيح لا تصيح وأجد أنك تترك الصياح برغم العرف – بضم العين –والعلال أو العلعلتين الحمراويتين ، وتكاكي زيك وزي أى جدادة بينها وبين مواعيد وضع البيض لحظات. ومن هنا أناشد جميع اعضاء المنبر الحر وزواره أن يتفضلوا مشكورين بالإسهام في المشروع الخيري لعرس أب حراز من ست النفر أو غيرها حتى يصبح صاحبنا نفرين ويكتب في أى موضوع غير مواضيع الزواج والأعراس ، فالراجل يا ناس أصبح عرسه مشكلة عويصه وأخشى ما أخشاه أن تتحول لمستحيل على شاكلة الغول والعنقاء وكرة القدم في البلاد وعرس أبو الدردوق من أم الدردوقة حتى. ونكون بهذه الطريقة مؤهلين لتنظيم كأس العالم في لعبة شليل لو أب حراز عملها وعرس وأخشي على كلمة عرس هذه أن تتحول إلى عرش بصوت المطرب الكبير الأستاذ الكابلي وهو يردد غير خالد ما ليك تنين ، وبهذا يتحول أب حراز من مغترب في جبال السروات إلى هزبر بوبا السيل أم لم يبوبي ، أو كلمة قلع بذات التشديد فيها وحدة النظرة لعبد الله عبد القادر البعيو وهو يردد يا سلام يا سلام الوزين بي صديرو عالم وقلع. والوضع أخي أب حراز أصبح خطير ، ويلا عرس ست النفر ويا دار ما دخلك شر لأنو بعد عمرك المديد هذا يكون باقي ليك الباقي لي بدر الدين أخوي. فالعمر يمضي وست النفر تبقي شأنها شأن أى تبغ فيرجيني أو كوبي فاخر. ويا أب حراز يا أخوي اجازة الوضع ساهله الكلام على آلام الوضع ممثلة في إلتزاماتك تجاه حكومة السودان وأهل قريتك أجمعين من ست النفر لغاية أب تالوله إضافة إلى حرارة نص نهارنا وكتاحتنا ، وكان بتتحمل جنس البهدلة دي يا مرطب حبابك لكين كان الزمن غير ملامحك شوف ليك بلد تانيه لإجازة وضعك لأنو وضعك عندنا حا يكون لا يحتمل من ناحيتك طبعاً يا غربه.
06-05-2004, 06:25 AM
ابوحراز ابوحراز
تاريخ التسجيل: 06-27-2002
مجموع المشاركات: 5515
الملا الظريف يبدو أن موضوع زواجي سيتم قريباً ولكن يبدو أنه مرتبط بزواج ابوالجعافر مع نبيلة عبيد أو أن تحرز دولة مكاو كاس العالم والحياة اصبحت متقلبة كل شيء فيها ممكن لماذا لايتزوج ابوحراز ومحمد عطية استطاع ان يكون سوبر استار وهو لايصلح حتى لأن يكون حتى صفار بيض وهو لايحمل اي من المؤهلات الصوتية والجمالية اشياء تحدث في هذا العالم وتثير اشمئزازي لكن 00 يبدو انه مع العولمة كل شيء ممكن صدقني لم افهم اي شيء من حديثي هذا واريد من الآخرين أن لايفهموا
09-09-2004, 04:54 AM
almulaomar almulaomar
تاريخ التسجيل: 07-08-2002
مجموع المشاركات: 6485
أخي أب حراز وأنا أتصفح قعر البورد شأني قرأتي المتواضعة لجميع المقالات أبدأها دائما من النهاية أو ما يعرف بـ jump to conclusions سواء أكان جمبي هذا بزنانه أو بغيرها فهو الجمب الذي يريحني كما تعلم ، المهم في الأمر شاءت محاسن الصدف ن يتحقق جزء من حلمك وتفوز اليونان بكأس أوروربا وتهزم فرق لها باع طويل في الكورة وبقى الشطر الثاني من الحلم وهو زواجك من ست النفر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
ابوحراز
نصار
صديق الموج
المسافر
ABUHUSSEIN
HAMZA SULIMAN
degna
بدرالدين شنا
THE RAIN
ودقاسم
Tumadir
almohndis
EMU إيمو
Hani Abuelgasim
فيس بوك
تويتر
انستقرام
يوتيوب
بنتيريست