اجمل عازفة نقارة/طبل/نقارة على وجه الأرض (تراث الجومعة)..
هذا النموذج يوضح استخدام الطبول/النقاقير /الدلوكة في تراث الجوامعة..
الجوامعة ناس كوسنيرفتيف للغاية ، ولكن هنا نموذج اتصور وبطوع اراداتهم..
زولة بتعزف دلوكة/ نقارة/طبل وبتغني في نفس الوكت..العبقرية هنا تتجلي بعض الملامح:
الشاهد انو عزف الطبول بيكون من شغل الرجال (نقارة / كرنق/كمبلا/نقارة زغاوة ، نقارة فور ، نقارة مساليت ، طبول النوبا في شرق السودان ، نقارة البقاندا في يوغندا، نوبة الصوفية في امسودان..الخ) وانو العازفين/الرجال بيكونوا واقفين (مافي نقارة من ديل زول بيعزفها وهو قاعد على ألأرض).. نموذج اختنا السمحة/الجميلة من دار اهلنا الجوامعة ، انها بتعزف النقارة/الدلوكة وهي جالسة على الأرض..!!
مدخل الريتم (محتوى العزف) في البداية ، ملامح من نحاس الجوامعة (حصل فيكم زول سمع نحاس الجوامعة؟)..ثم تشكيلات نغمية طروبة راقصة يصاحبها صوت المغنية الذي يشابه في طبقاته صوت امبلينا السنوسي..وعندي يفوق امبلينا السنوسي..! الزولة البتعزف الطبل/النقارة/ الدلوكة ، جابت حاجة غريبة للغاية ، فهي استخدمت طبل واحد فقط (دلوكة) واخرجت منو صوت ستة طبول على التوالي (اولها ريتم نحاس الجوامعة ، ثم نقارة ،ثم ريتم زار ، ثم باركشن ، ثم نوبة ، ثم تمتم..!!!)..شغل الطبول ده ياهو البيقوموا ناس سودان درمز يجيبو تسعة طبول/ريتم عشان يقوموا يجيبوا حاجة قريبة من الشغل الطبيعي ده..!
رسالتي هنا: لكل القنوات التلفزيونية السودانية ، ووزير الثقافة في امسودان ، فتشوا الزولة دي واعملوا ليها تسجيلات وقدموها في مهرجانات المزيكا العالمية..وانا شفت شغل مزيكا تراثي كتير لكن شغل الزولة دي ما لاقاني ، شغل متميز ومستعد اكتب ليكم التنظير ( بالعربي والإنجليز) ونجيب ناس تانية تكتبو بالفرنسية والأسبانية و العبرية ذاتو...!!
المغنية عزيزة ابراهيم (من الصحراء الغربية) بتجيب خمسة طبول مختلفة الأحجام والريتم عشان تقوم تقدم نموذج مقارب لطريقة شغل المغنية بتاعة دار الجوامعة دي..!!.فما بالكم من زولة بتستخدم طبل واحد (دلوكة) وبتجيب شغل ستة طبول ، في وكت واحد ، زي الترتيب..! في هذا النموذج ، هناك تناسق غريب للغاية بين ريتم الدلوكة و حركات اجساد الراقصين والراقصات ، واول ملمح التقطته الكاميرا ، راقص يهتز جسده وهو حاسر الرأس (على خلاف اخلاق اهالي امسودان ، التي يحرص فيها الرجل على الحفاظ على غطاء الرأس / سواءا كان عمامة أو طاقية..!!).. ثم اهتزاز اجساد الراقصات في تناغم غريب ومدهش ومنسق غاية التنسيق مع ريتم الدلوكة التي تعزفها امرأة وهي تجلس على الأرض..!!!!!!!!
الشباب وزير ثقافة امسودان الفيدرالي ، اخونا دكتور احمد عثمان بلال ، وهو في نفس الوكت الناطق الرسمي باسم الحيكومة الفيدرالية في امسودان ، ومادايرين منو نطق فيدرالي ، واخونا (مجرم الحرب ) احمد هارون ادم ، والي شمال كردفان ، عليكم الله يا شباب ادونا معاكم فرقة واتبنوا الزولة دي.. يا احمد هرون ، نفس المبادئ السال فيها فيها دم الملازم (قاسم )هي نفس المبادئ السال فيها دم مصعب مصطفى ، ادونا فرقة ياناس وشوفوا لينا صوتنا الطبيعي..!
واتمنى من الليجند السودانية ، امبلينا السنوسي ، تدعم معانا الحملة في ان تظهر اصوات مغنيات الدلوكة/الربة/ النقارة من دار اهلنا الجوامعة ..!!
اهلنا الجوامعة: نساء ورجال ، على مختلف تواجدهم في كوكب الأرض ، يا ريت تساعدونا بتفريغ النص/ الكلمات لهذه المغنية وغيرها من مغنيات الدلوكة..!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
فيس بوك
تويتر
انستقرام
يوتيوب
بنتيريست