(17)التحية لأخونا الفنان علي ابراهيم علي (علي الرهيد)..في هذا الفيديو.. ملامح كتير بتحتاج اضاءات..و كنا ننوي الحديث عنها بالتفصيل..ولكن لظروفنا الخاصة..الحاجات مشت في اتجاه خلافا لما كن نود..عموما.. اجمل حاجة فطن ليها اخونا الفنان علي الرهيد..وهو تنفيذ هذا العمل..وفيهو حاجات كتيرة بتكون الناس سمعت عنها سمع او ربما الناس تكون ما سمعت بيها نهائي..الرقصة المصاحبة ، في ثقافة المسيرية اسمها (رقصة ام قدرة) ، وزي ما ذكرنا زمان أن ثقافات البقارة ، خصوصا في حكاية الغنا والرقيص.. الحاجات بتكون مقسمة.. أي زول/ة بيلقى المساحة الممكن يعبر فيها عن ذاتو.. الغناء والرقص تحديدا في تلك الثقافات هي مساحات للتعبير عن الذات.. تعبير ما فيهو رقابة (قبلية أو بعدية..!!)..فهناك رقصات خاصة بالأطفال ..وهناك رقصات خاصة بالشباب..و هناك رقصات خاصة بالناس المتقدمة شوية في السن..و الرقصة في فيديو الفنان علي الرهيد المرفق هنا ..هي رقصة الشياب.. أي الناس المتقددمة في السن شوية..!و ياريت اهلنا في رهيد البردي يحدثونا عن الرقصة دي..النص الغنائي.. هو النص المقابل لنص اغنية وجدت حظها من الشهرة في المشهد الثقافي في امسودان ..وهي غنية (الجنزير التقيل)..وفي مرة تانية نفرغ النص من الفيديو بغرض المقابلة..!من تفاصيل الفيديوكليب بتاع اخونا علي الرهيد..زمان ول ابا بريمة كان متكيف من بت ابا شادن محمد حسين لمن مشت الخلا ورقصت النقارة مع الناس هناك..وهنا التفصيلة الجميلة.. في اول الفيديو ..الفنان علي الرهيد امتطى صهوة الجواد..وبرم الطاقية..ولف العمة..ودي حاجات الناس ما بتشتغل بيها كتير ..لكن لمن يتفرجوا فيها ناس من خارج محيط امسودان ..بيسألوا عنها كتير وبيكونوا متشوقين يعرفوا عنها حتة بحتة..!ايضا هناك.. الحربة الجلكاية..وده السلاح بتاع ناس المهدية..والغريبة حتى الآن موجود في كثير من مجتمعات البقارة ..طبعا ظهور الكلاش والمدافع اياها سحب البساط عن تلك الآلة بعض الشئ..في الفيديو.. بنلاحظ الفنان على الرهيد بيفرد الشال ويهزوا..و الناس البتتفرج كتير في رقصة النقارة بتلاحظ انو الحركة دي بيعملنها البنات.. يعني الواحدة بتربط العمة/التوب حول خصرها وبتهز الجدائل المنفردة..هنا بيحصل العكس ان الرجل هو من يفعل ذلك..ليه؟..الملاحظة الأخيرة..ان هذه الرقصة تعتمد على حركة العنق كثيرا..طبعا الزراف يتميز بعنق مستقيم لا يقبل التأرجح..لكن الريتم يشبه حركة الزراف في مجملها..لكن الغزال..حينما يركض.. يتحرك جسمه ، ويتحرك عنقه بصورة متناسقة مع حركة الجسم العامة..و يمكن التمييز من قبل المراقب الدقيق..!حركة العنق في هذه الرقصة ، هي فكرة (حنجور الصيد) التي وردت في فيديو كليب سابق ارفقناهو في هذا الخيط..ودمتم..كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة