هي وليمة..و لكنها ..De Facto..يا صديقي محسن خالد

Quote: _ ونحن من زمان سراويل روسينا اتشرطت ياهو بالقعاد في دلجة أمخاخ زي البوفّرها سودانيز دي. وصديقي كبّر يقول لي سمح الصبر، العندو حكمة ينزّلها للناس بكل طولة بال، يا كبّر يا أخوي ياتو ناس محتاجين حكمتك ياخي؟ في قطيع جُهّال هنا، زي العنبلوق ملاسي دا، قايل رحو عندو قرآن يبخّر بيهو السماء ذاتها، وبدل السماء تنزل ليهو قرآن، لا، هو ذاتو يدخّنها بقرآن طلحو واجّي أكتر من طلح السماء الأحمر. فالناس ضابحين هنا لعشاء أيتها حاجة خلقوها وألا ما خلقوها لسع. وأتفضّلوا يا ناس، أيوة.. دخّل إيدك يا فلان في قدح التشكيل، السياسة، العلوم، وهاك يا عزائم، يا هناية دخّلي إيدك في قدح الشعر، الرسول فوقك، أتفضلوا يا ناس دا بهنا سلطة موزيكا، أيوة، أتفضّلوا.. أتفضّلوا.. تحلية الرواية والقصص والسينما جاية. ما البورد بتاع بكري دا بقى (وليمة) فنون، ويات من عندو باسويرد بقى ياهو معزوم علي الفنون والمعارف الجمالية وغير الجمالية، والفلسفة ذاتها يا زول، تنقد الرهيفة يا أيها الفلاسفة المختبؤون حيث هو مكتوب (اكشط هنا scratch here) كما في الكرتلّة، وحينما تكشط على كرتلّة البورد مستخدماً الباسويرد بدلاً عن قطعة عُمْلة –فجأة كدا- تظهر لك رموز وأكواد هؤلاء الفلاسفة. أتفضّلوا، سقراط يأكل السم اللّسمموا.