|
|
 سيرة حنين ما: اغاني البن
|
في وجهة السيرة..يتدافع النبض:
يعتريك فضاء الغربة.. تعتر ليك دمعة.. او قل دمعتين.. تتلفت يمن شمال..تجبد فردة الذكرى/الحنين..عشان تستر اطرافك من زيف الجليد ..و القلب اسى الأطراف عتوا..
في دروب المدنية.زاخر الليل.. تخلق فضاك..غنيوة..اهزوجة..و تتعجب لحال الدهشة فيك.. وكتين يكون النغم معادل لبقاء الروح..والحلم الشفيف..تسهر..وكتين تسافر بيك اطياف الناس..عيون الناس..وشهيق المحنة الدفاق..و تختزل جواك معنى المكان.. كاقوى ما قال بيهو فيريليو (جمالية الإختفاء).زومن بعض تختفى.. تدسى من بهرج المدينة الزايف.. لمبات شارع واحد.ز تعادل رتاين القرى و الفرقان..و برضك طعم الضو مسيخ.. مسكون بالإشعاع و آفات اخر الزمن اللعينة..
على جدار الليل تتكي ..و تحنس شبق الكلمة .. لو كان تمرق خصوبة..و تلد ليك حرفين.. في مقام البهجة.. يكونا ليك عنوان.. لكن هو المبدأ يا سجيلي..الحنين ما بنكتب.. ما بنكتب..
في نواحي القلب.. تحضر صورة:
تهريك زوامل التعب العريجة..و تموت بي حال الشوق فيك.. الوجوه.. التياب (الوانهم الشترا زي ما قال انور كنج عن راقصين المردوم ذات يوم.. لكنو برضو دخلوا مرافي النبض فيه و عجبوهو بطريقة أو باخرى.. أو ستات الشاي لمن استحضرتهن هالة الكارب ..في وش مصطفى مدثر..لمن قال ليها .. كيف يعني الأستاذة فاطنة احمد ابراهيم تقعد تتفرغ لمبارات ستات الشاي.. فقالت ليهو كلام عن تيابهن اليمونية و الصفراء و الحرجلية..و الوان الوهج الدافق)..التياب.. هاجة في لونها البرزخي.. بتحكي عن سيرة الفرح ..و التعبير عن الذات..ليه ناسنا بحبوا الألوان الزاهية؟..و ليه هم دايما بيكسروا خاطر ايدولوجيا اللون و بيجهجوها في ذات نفسها؟
في فضاءتهم البعيدة.. برضك ليهم القدرة يخلقوا تصاوير تعبيرهم ..و حب الحياة ..و الجمال..
في حضرة البن:
تشرب نبضك رشفة رشفة..تتدشى..و تتحمدل..و تسأل الرب يديمها نعمة..و فجأة تعتريك حال الإنسان النادرة..نحن كده و انتو كيف؟.. بنغنى جماعة..بنزرع جماعة..بنحصد جماعة..وبنشرب البن جماعة..
عبقرية المكان.. بتخلق فرح الروح..من هنا كان التم تم..و من هنا كان سر الطبول..و كان معنى الإنسان..
حليل الحاجات بتمشى في بلد.. كل حاجة فيها بتمشى..و تتقبر في مقابر النسيان العامرة..
دايما بتتسفزك البدايات .. بنات الديم (بندر الخرتوم) بيغننا نفس الغنا الكانت بتغنيها عماتنا و خالاتنا..لكن هناك ببقى حق الناس التانين ..و تعبنا بيروح شمار في مرقة..لكن عزانا.. ان بنخلق الفرح لذاتنا..و مش مهم.. يفرحوا الناس الهناك ببواقي فرحنا..
عليك اللعنة يا زول هوي..و كتين تتذكر بدايات الحاجات..وتكون غنية اللخضر لوني زرعي ..جات من هنا..و بعد داك يجي زيدان ابراهيم..و يجي و يجي .ز لغاية منال الأزهري..
و تشيل شوقك المفضوح و تسأل.. سمعتوا اغاني البن؟.. يسكتوا الناس في الدارة..يقوم واحد يقول ليك.. دي كانت في بيوت احرار..!!..يا زول خاف الله سيدك..
من الأرض جينا..و ليها بنرجع تاني.. معنى ارهق دهاقنة الفلسفة و اعياهم بالحجة.. لكن بناتنا هناك.. في عز دارة البن بييقعدن فوق الأرض..فندك.. فندكين.. مدق..مدقين..فنجال فنجالين..و شرشرق..و يبدأ الريتم المجنون..
يفترشن.. بروش الحنين..و دي براها سيرة تانية.. تحكي ليك.. كيفن لمن تصفو ذات الإنسان..و تقرر.. تكتب معنى الوجود فيها.. البروش.. هناك ليها تفانينها..و معانيها.. برش الصلاة..برش الرقاد..برش الحنة..و برش الجماعة ..شقة كبيرة ممتدة قدر خاطر فنان شاطح..
البيوت..والخضرة..و بواقى الخريف.. معالم مواسم الفرح الحميم..
يبقى قول حاجة.. اخيرة.. لمن تغني حكامات البن.. يظهر عامل السن..بتغيب الفتوات (لأنهن مشغولات بغنى المردوم و الكرنك و النقارة)..و تستعجب في ذاتك.. لفكرة دوركهايم عن مبدأ تقسيم العمل.. هنا الناس براها بتقسم الحاجات..و بتعرف حدود الإمكان..و تكتب سيرة الحياة بصدق غريب.. بالجد غريب..
كبر
|
|
 
|
|
|
|
|
| العنوان |
الكاتب |
Date |
| سيرة حنين ما: اغاني البن | Kabar | 12-24-07, 04:41 AM |
| Re: سيرة حنين ما: اغاني البن | Kabar | 12-24-07, 04:43 AM |
| Re: سيرة حنين ما: اغاني البن | ابراهيم عثمان آدم | 12-24-07, 04:47 AM |
| Re: سيرة حنين ما: اغاني البن | Kabar | 12-24-07, 04:57 AM |
| Re: سيرة حنين ما: اغاني البن | Kabar | 12-24-07, 04:59 AM |
| Re: سيرة حنين ما: اغاني البن | ابراهيم عثمان آدم | 12-26-07, 01:29 AM |
| Re: سيرة حنين ما: اغاني البن | Kabar | 12-24-07, 05:13 AM |
| Re: سيرة حنين ما: اغاني البن | Ishraga Mustafa | 12-24-07, 12:15 PM |
 Re: سيرة حنين ما: اغاني البن | Ishraga Mustafa | 12-25-07, 00:58 AM |
| Re: سيرة حنين ما: اغاني البن | AnwarKing | 12-25-07, 03:48 AM |
| Re: سيرة حنين ما: اغاني البن | الجندرية | 12-25-07, 10:14 AM |
| Re: سيرة حنين ما: اغاني البن | AnwarKing | 12-26-07, 02:05 AM |
| Re: سيرة حنين ما: اغاني البن | الجندرية | 12-26-07, 08:49 AM |
| Re: سيرة حنين ما: اغاني البن | Ishraga Mustafa | 12-26-07, 10:57 AM |
| Re: سيرة حنين ما: اغاني البن | Kabar | 12-26-07, 03:04 PM |
| Re: سيرة حنين ما: اغاني البن | Kabar | 12-26-07, 03:09 PM |
| Re: سيرة حنين ما: اغاني البن | Kabar | 12-26-07, 03:15 PM |
| Re: سيرة حنين ما: اغاني البن | Kabar | 12-26-07, 03:16 PM |
| Re: سيرة حنين ما: اغاني البن | Kabar | 12-26-07, 03:19 PM |
| Re: سيرة حنين ما: اغاني البن | ابراهيم عثمان آدم | 01-08-08, 08:23 AM |
| Re: سيرة حنين ما: اغاني البن | Tragie Mustafa | 12-26-07, 03:51 PM |
| Re: سيرة حنين ما: اغاني البن | Kabar | 12-27-07, 08:18 PM |
| Re: سيرة حنين ما: اغاني البن | AnwarKing | 12-28-07, 01:03 AM |
| Re: سيرة حنين ما: اغاني البن | الجندرية | 12-30-07, 11:15 AM |
| Re: سيرة حنين ما: اغاني البن | Kabar | 12-30-07, 09:19 PM |
| Re: سيرة حنين ما: اغاني البن | Kabar | 12-30-07, 09:22 PM |
|
| |
Kabar
فيس بوك
تويتر
انستقرام
يوتيوب
بنتيريست