الريدة بعد الخمسين.. شقاوة قلب ولا مشروع دلقان راجل تحت التصفية؟ 😂

الريدة بعد الخمسين.. شقاوة قلب ولا مشروع دلقان راجل تحت التصفية؟ 😂


11-14-2026, 08:51 PM


  » http://sudaneseonline.com/cgi-bin/sdb/2bb.cgi?seq=msg&board=515&msg=1794689474&rn=0


Post: #1
Title: الريدة بعد الخمسين.. شقاوة قلب ولا مشروع دلقان راجل تحت التصفية؟ 😂
Author: زهير ابو الزهراء
Date: 11-14-2026, 08:51 PM

08:51 PM November, 14 2026

سودانيز اون لاين
زهير ابو الزهراء-السودان
مكتبتى
رابط مختصر




يا جماعة الخير، الريدة بعد الخمسين دي موضوع براهو، وعايزة ليها واحدة حكيمة كداعارفة الحاصل في دولخل بيوت الخرطوم وكمان زولة قادر تقرأ سوق العرس وفوضي الطلاق البقي بالهبل الايام دي ذاتا!
تخيل زول عدى الخمسين، شعر راسو دخل في مرحلة الالانبات الابيض الناصع البياض والركب بقت تعمل ليهو قلق الاحوال الطارئة قبل ما يقوم من الكرسي، والنظارة بقت من أهم أدوات الحياة اليومية لكل شيء من تلقزبون
لاكل إقامة دائمة في العيون بس بتنوم معنا .. وفجأة يكتشف إنو لسه عندو قلب بحب الجمال ، ولسه ممكن يحب، ولسه عندو استعداد يقول لواحدة- إنتِ أجمل حاجة حصلت لي في حياتي و انت عالم من رقة مدهشة جدا
المشكلة ما هنا.. المشكلة إنو المجتمع ما مستعد يستوعب الكارثة دي!
يا أخي إنت ما شفت عمرك؟ ما عندك ضغط وسكر وكولسترول؟ ما مفروض تكون قاعد في البيت، بتتفرج في الأخبار، وتراجع مواعيد الدواء، وتنتظر حفيد يجي يزورك يوم الجمعة؟ تقوم لينا تقول ريدة وشوق ومستقبل مشترك؟!
ياخي إنت داير تعيش لمتبن ولا داير تعمل موسم تاني من مسلسل -سنوات الضياع ؟!
زمان ونحن شباب كنا بنقول لبعض=والله ما بنتفارق، ولو الدنيا كلها وقفت ضدنا
كنا بنقسم قسم لو سمعوهو ناس السلفية الجهادية ذاتهم، كان أعلنوا علينا الجهاد
لكن الدنيا عندها رأي تاني. فرقتنا، ووزعتنا في دروبها، وكل زول مشى في سكة، وبقت الوعود القديمة زي صور التخرج من الجمعة الواحد يشوفها، يبتسم، ويقول سبحان الله، الزمن داك كنا عاملين فيها ناس مهمين شديد!
واليوم، بعد كل السنين دي، تقوم الذكريات من مرقدها، وتعمل ليك إشعار في القلب عندك رسالة جديدة من الماضي!
لكن يا حليل الرومانسية، زمان كان الحب محتاج وردة وخطاب وشوية مشاوير تحت ضوء القمر هسع الحب بقى عندو متطلبات فنية ومالية وإدارية عندك فيس بوك ولا تلفزيون ذكي ولا اسناب جات ولا ممكن تعمل لينا جلسة سريع في الزووم عشان ناس البيت يقول بتقرا ولا محاضرة
أول سؤال في حالة القبول ---الزول عندو شنو؟
عندو بيت؟ عندو دخل ثابت؟ عندو عربية؟ عندو معاش؟ عندو تأمين صحي؟ عندو مقدرتو يفتح بيت كيف ؟ ولا جايب معاهو قلبو ساكت وجاي؟!
القلب براهو ما بقضي غرض يا حبيبنا
القلب دا ما بدفع فاتورة الكهرباء، ولا بجيب الرغيف، ولا بشتري علاج الضغط!
والله مرات تحس إنك ما داخل على مشروع زواج، إنت داخل عطاء حكومي ، وناقصك بس شهادة خلو طرف من الضرائب، وشهادة خبرة في التعامل مع الحموات!
أما البنات، فالموضوع عندهن بقى حكاية تانية.
تلقى الواحدة صاحبتها قاعدة جنبها، عاملة فيها مستشارة أسرية وخبيرة في سوق العرسان، تقول ليها ==يا بت الناس، ألحقي نفسك، البورة حارة، والزمن ماشي و ما تكبري الموضوع ساكت - الراجل لو عندو بيت ودخل، والباقي مقدور عليهو، وافقي!
ترد عليها التانية -لكن يا أختي ما في ريدة؟
تقول ليها بكل برود - الريدة شنو؟ الريدة دي بتجي بعد القسط الأول
المكاجنة الكراهية الاولي !
😂😂
والله سوق العرسان دا محتاج دراسة نفسية واقتصادية لانو فيهو عرض وطلب، وتضخم، وكساد، ومضاربات، وفيهو زول سعره مرتفع شديد، وهو ذاتو ما عندو غير جلابية واحدة لابسها في كل المناسبات وقاعد عاطل كمان !
وفيهو دلقان مسكين، كل مؤهلاته إنو طيب وحنين، لكن لجنة التقييم الأسري شطبت اسمو من القائمة قبل ما يشوفوا ملفو الانساني العظيم
والأطرف من دا كلو، إنو بعض الأمهات بقن يديرن ملف الزواج كأنهن مجلس إدارة شركة مساهمة عامة والبت ما بتختار زول براها؛ لازم موافقة مجلس الإدارة، والجمعية العمومية، والخالة الكبيرة، والبت المتزوجة في الخليج، وأحياناً رأي الجارة البتعرف الناس من مشيتهم دي زوله رهيبة خبيرة من منازلهم !
أما أنا، فقاعد أتفرج في المسرحية دي كلها، وأقول في سري- يا جماعة إنتو مالكم؟ أنا زول رهيب، ولسه عندي مشاعر، ولسه ممكن أحب، ولسه شايف إنو العمر الباقي ما مفروض نقضيه في انتظار نشرة الأخبار وموعد الحبوب!
أنا ما طالب مستحيلات. لا داير قصر في باريس، ولا يخت في البحر المتوسط، ولا شهر عسل في جزر المالديف بالجد أنا داير زولة نضحك مع بعض، نتونس، نتونس كتير، نختلف من غير ما نعلن الحرب علي بعض ، ونشرب الشاي من غير ما نحتاج وسيط من الاسرتين لحل الخلاف حول كمية السكر!
لكن الطموح عندي ما وقف هنا.. المصيبة إني فوق حكاية الريدة دي كلها، عندي حلم تاني- داير أعيش بقية عمري في وطني، وسط ناسِي، في بلد لسه ما اتفقت مع نفسها، ولا عرفت تقفل ملف الحرب، ولا تحدد هي ماشّة وين!
يعني لا أنا اخترت الزمن المناسب للحب، ولا اخترت البلد المناسبة للاستقرار!
واحد داير يحب بعد الخمسين، وداير يستقر في وطن كل يوم يصحى على مفاجأة جديدة!
بالله دا زول طبيعي؟!
أحياناً بقول لنفسي- يا زهير، إنت ما محتاج عروس، إنت محتاج لهدوء عميق ، كم من الاحباب يرجعوا البلد ، ومبادرة حقيقة لمساندة الريدة بعد الخمسين ، وضمانات لاستمرار العلاقة الزي دي عشان الاولاد ما يقولوا لينا ليه بتعملوا نحن برضو ما لحم دم !
لكن برضو ما حأستسلم أعرفوا الكلام تزعلو مني وتقول خير
فالواحد مهما كبر، من حقو يحب، ومن حقو يحلم، ومن حقو يفتش عن ونسة حلوة ورفقة صادقة أن حقيقة عايزة زولتي اللي ما تزوجتها وهي زاتها عايزني لكين خجلان منكم
والحياة ما بتنتهي لما الشيب يظهر، ولا القلب بطلع معاش عشان البطاقة الشخصية قالت خمسين وفوق -ديل خلاص كم اشتروا لينا الكفن
بس عندي طلب صغير من لجان تقييم العرسان -بالله لو سمحتوا، قبل ما تسألوا الزول عندو شنو، أسألوه قلبو لسه شغال ولا فصلوه من الخدمة؟
ويا جماعة، لو لقيتوا دلقان عندو قلب وضمير وشوية خفة دم، ما تظلموه.. يمكن يكون آخر عرض ناجح في سوق العواطف السوداني!

Post: #2
Title: Re: الريدة بعد الخمسين.. شقاوة قلب ولا مشروع د�
Author: اسماعيل عبد الله محمد
Date: 11-15-2026, 07:01 AM
Parent: #1

الله المستعان يا ابا الزوز

Post: #3
Title: Re: الريدة بعد الخمسين.. شقاوة قلب ولا مشروع د�
Author: زهير ابو الزهراء
Date: 11-16-2026, 10:18 PM
Parent: #2



أخي وصديقي ابوالسباع
تحياتي أنا في الوطن الجريح امارس جنوني الي يقضي الله امرا كان مفعولا
ما الدنيا عايزة اللي ليك وعايزة كمان عمل الاخرة خليني نعمل عمل ناس الدنيا بالعاطفة الرائعة اخي
متعك ربي بالعافية

Post: #4
Title: Re: الريدة بعد الخمسين.. شقاوة قلب ولا مشروع د�
Author: اسماعيل عبد الله محمد
Date: 11-17-2026, 05:22 AM
Parent: #3

Quote: تحياتي أنا في الوطن الجريح امارس جنوني الي يقضي الله امرا كان مفعولا
ما الدنيا عايزة اللي ليك وعايزة كمان عمل الاخرة خليني نعمل عمل ناس الدنيا بالعاطفة الرائعة اخي


يا صديقي هذا النبض الخمسيني يصعب تعاطيه داخل السودان، تعالنا هنا شوف زملاء هذا النبض الناضج في قمة عطائهم.