Post: #1
Title: تحيّة من الفيسبوك لكبر هناك ولأميرة السيد أينما تكون
Author: أبوبكر عباس
Date: 07-25-2026, 03:39 PM
03:39 PM July, 25 2026 سودانيز اون لاين
أبوبكر عباس-الإمارات
مكتبتى
رابط مختصر
إلى صديقي المرحوم كبر هناك:
كنت قد كتبت قصة في سودانيزاونلاين اسمها ستاربكس كسرت فيني الجكس وعلقت لي أميرة بت آمنة قالت:
أبوبكر، عجبني شديد...ومتمنية لي عرسة زي دي..لانه قالوا عرسة الصدف هي البتنجح. وهي البتوثق في الخلد
رديت ليها؛
يا بركة ود كنان وسعدابي وابقناية تنوّل أميرة بت آمنة الفي مرادها وتصادف ليها ولد لطيف، حساس من مدني.
أها أخونا المرحوم كبر من كندا والذي كان يناديني بأبكر الطويل على رواية قمر، عجبتو القصًة وعجبو أكتر حواري مع أميرة بت آمنة وقام كتب كتابة أجمل من قصتي وجاتني لحظتها غيرة أدبية زادت محبتي لكبر
كتب كبر:
كااااااااااااااااااااااااااااااااااااااااااااااااااااااااااااااااااااااااااك...!
انتا قايل ما بعد بعد بعد بعد بعد الحداثة دي عرض لــ(حيدر قطامة) ولا شنو يعني؟..
الغريب يا ول ابا انا كنت قايل الرواي اسمو مجدي سفسفة..وانو الزولة الإتمنت العرسة العاملة زي صدفة البق بانق..هي صديقتنا بسمات بت عطبرة..!!
كتبت تمامة القصة ..لمن ضحى قامت قلبت بقت مسيحية ، وهي قايلة انا بقيت شيخ مسيحيين كبير في دار ترك.. وقطعت لي اسم دلع: ديفيد..
ثم عشاني، مخسوس قامت مشت الجبال..دار نوبه..ثم وصلت لماما اميركا..اها يوم هف ليها حق السودانيات العجيب داك..
قالت لي عازماك تشرب معاي بن في استاربكس..طبعا استاربكس عندي معاهو مشكلة كواحد من ادوات الأمبريالية..
اها هي في سقط لقط وانا في امطرقا عراض..وتفتقت عبقريتها ان كل واحد فينا يشوف اقرب استاربكس..ونشرب البن بالتلفون ..
هي اختارت طريقة الجلوس..قالت لي اقعد و قبل صباح وانا بقبل صباح..يعني نظام توازي وكده..الإتنين طلبنا البن في فناجيل صيني ..لونها ابيض..لأنو كبابي الكرتونة شكلها غير اليف..
وانا بتكلم معاها بالتلفون قلت ليها ما تدفقي الحتل..قالت اها وصلت الحتل اعمل شنو..قلت ليها حركيهو بصورة دايرية..
الساعة القامت فكت ليك الدهشة..قالت:سجمي ، ده مش انتا؟..قلت ليها ايوه ده انا..ياخي لا ما تهظر..صحي انت اللابس ليهو جاكت بني وبيريه اصفر؟..
قلت ليها.. ده انا يا ضحى الساعة العاطت ليك بطول حسها: الله اكبر..الله اكبر!!..
وانا اشيل واعيط:يا ضحا لأ..انتا في اميركا..الإ دي..!!..
وضحا تشيل وتعيط اندهاشا وازبهلالا: شكلك وسيم..ووب علي من الخدرة الدقاقة دي..الله اكبر..الله اكبر..الله اكبر!!
كل الخلق، القاعدة في استاربكس في نورث كارولينا،في العاصمة رالي وغرينسبورو، المدينة القاعدة فيها ضحا ، كل الخلق اتضايرت تحت الترابيز..
وبعد شوية البوليس جا تووشك داخل..اخر حاجة قالتها لي: العالم دي متخيلة فنجالي قنبلة قرنيت..وفرحتي لله مخطط لضرب الأمني الوطني الأميركي....
ثم اسمع ليك: طاخ..طراخ..طراخ..!!..والتلفون ، الخط فيهو لسه فاتح..!!
انا جدعت تلفوني وفنجالي..وبلغت البوليس بتاع مدينتنا في كندا انو تلفوني اتسرق من اول امبارح.. ومرقتها في مدينة تانية..!!!
كبر
——
والله الموت دا عوير، يعني كيف زي كبر دا يمشي حتى لو كان عدوك؟!
عوير خلاص
|
|