تشريق الليل .. إبنتي ماجدة

02:00 PM July, 09 2026

سودانيز اون لاين
عبدالماجد موسى-بريطانيا / لندن
مكتبتى
رابط مختصر

‏تشريق الليل .. إبنتي ماجدة

يا ماجدة صليتي الفَجُرْ؟
ورَسَمْتِي زي كل الطيور
صالَةْ هزيمه وإنتحار ؟
أو فُتِّي سالَمْتِي القمر
والذكريات الرايحه ديك
والإنكسر
يا ماجدة حَتّيتِي العنب؟
وحِفِظْتِي يوم ناداك شرار؟
صوت المرافىء
والنزوح فَجَّ القَبُر
وشَدَّ الدميعات الوَدَار
يا ماجدة شُفْتِي اليوما ديك !
أو يومنا داك؟
كيف كانت الأصوات خراب
ورَجْفَةْ الساعات فَجُر؟
يا ماجدة وين شنطة عُمَر
وكرَّاسات أميمه
وقلم تومِكْ صلاح؟
حتى الزمن
رافض علينا الفرصتين
سَدَّدْ رِماح
ديك ماجدة
شالت هَمْ كبير
ووجع مرير
كارِّينا كَرْ لي دولتين
لو نستفيد من كوم تراب
أو نستلف كاسات عذاب
ونعرف مغارات الصبر
بدل الحرب
أخت التفكك
والتشرذم
و القوانين الغياب
لو كان نفوسنا كمان تَرِفْ
تصبح حنونه
ومؤمنه
تغسل حبيبات العَرَق
النازله جوه الجوف سعير
ما كان دا حال سودانا
أو حالنا اليتيم
حال الغَرَق
والفُرْقَه
واللوم
والنُّفُور
جارتنا قايله النوم وِلِفْ
وخرفان بلدنا الناشِطين
وَرّوُنا إِنُّو
الشوف سَمَعْ
والجوع شَبَعْ
والنار حبيبه وتستحي
جارنا الخبيث لَمْلَمْ بواقي الأمنيات
شَرَّاها في باب الصَّرِيفْ
وبكت سعاد
لما شافت بين سطوح جيرانا
زغرودةْ ضياء
والضل خفيف
شُفَّع صغار غنُّوا النشيد
الكهربا المفجوعة جات
كايسين فَرَح
كايسين سبب للإنبهار
للضحكه
للونسه الزمان
حتى لو ضيفاً بعيد
ناسِنُّو في الزمن الهظار
وبأي تَمَنْ
مهما غِلا
ومهما تكاثرت المِحَنْ
اتفرجوا ...
شوفونا نحن وصلنا وين
والحَسْرَه
والأسف البديل
المويه حالفه طلاق كمان
القطرة تَحْرَمْ
للسبيل
وابن السبيل
يا حُبْ تعال
بس ما تجينا دَرِسْ عَصُرْ

عبدالماجد موسى/لندن

.

.