Post: #1
Title: أسمع يا بشاشا وأنا جدكم جلدقون، البشوف "الرقصة" من فوق فرع الشجرة وبضحك على "الاعراج الجوه الحفرة
Author: زهير ابو الزهراء
Date: 07-05-2026, 11:30 PM
11:30 PM July, 05 2026 سودانيز اون لاين
زهير ابو الزهراء-السودان
مكتبتى
رابط مختصر
https://top4top.io/
أسمع يا بشاشا وأنا جدكم جلدقون، البشوف "الرقصة" من فوق فرع الشجرة وبضحك على "الاعراج الجوه الحفرة
يا ولدي، مالك بقيت زي العجوز المِتْهَوِس، قاعد لي في "حوش" الإنترنت، شايل عدسة مكبرة بتفتش في مسام جلد الناس، داير تعرف أصلهم وفصلهم؟ باقي ليك بس تفتح "مكتب أحوال مدنية" في "الواتساب"، وتدفع للناس "شهادات نقاء" بختم "جدك" المزعوم!
إنت فاكر السودان ده "بيت بكى"؟ كل يوم تنط لينا: "ده خادم، وده مستعرب، وده ود كوش الطاهر"، يا زول.. كوش ذاتها لو صحت، بتتبرأ منكم ومن "جوطتكم" دي! الناس في العالم بقت تفتش في "المريخ"، وإنت لسة بتفتش في "تاريخ جدو الكان برعى وين؟".
ياخي "جلدقون" بضحك عليكم!
جايبين لينا أوهام "نقاء عرقي" وعاوزين تبنوا بيها بلد؟ ده زي الزول البينفخ في "قربة مقدودة". يا "نبي الأنساب"، السودان ده "خلاط" رباني، خلطنا فيهو النوبي بالبجاوي، بالفوراوي بالعربي، لحدي ما طلع "السوداني" القح. وأي زول بيفتش في "الدم الصافي" ده، بكون ضيع عقله قبل ما يضيع أصله.
يا "بشاشا".. أنت وأشباهك في فضاء "النت"، بقيتوا زي "الجراد"، ما بتخلوا "وحدة" إلا أكلتوها، ولا "سيرة" إلا وسختوها بنعرة "سلالتكم البلاستيكية". إنت قايل السودان ده "عزبة" ورثتها من "جدك"؟ ولا معاك "صك غفران" عرقي بيميزك عن خلقه؟
يا أصحاب الأنساب "المضروبة"، كفاية كذب!
السودان ما بيبنو "أصحاب التيجان الورقية"، ولا دعاة "النقاء المغشوش". السودان بيبنو "الناس"، والناس ديل لا سألوك-- "أبوك منو؟"، ولا قالوا ليك: "أصلك شنو؟". السودان بيبنو العقول اللي اتجاوزت "لون الجبهة"، و"شكل الخشم"، وشافت إنو قيمة الزول بـ "رأسه" المليان، لا بـ "دمه" اللي بيفتخر بيهو وهو فارغ
خلاصة الكلام يا "سليل الأجداد الموهومين"
الناس في "النت" بتنبني أوطانها بالعلم، وأنتم بتنبنوا "مقابر" لأفكاركم الميتة. والله يا بشاشا، لو كان التاريخ ده "شجرة"، فأنت "النملة" البتاكل في عروقها، لا خليت ليها ظل، ولا خليت ليها ثمر
نصيحة من "جدقون":
أرقدوا عافية في "أوهامكم"، السودان الحقيقي "برة" شاشاتكم دي، بلد الناس بتقتسم فيهو "الهم"، ما "الدم".. وبتسقي فيهو الغريب "موية"، ما بتسأل عن "جدو"
ده الوطن البنعرفو.. وده الخيال اللي بتغرقوا فيهو، والفرق بيناتنا: أنتم بتفتشوا على "الأصل".. ونحن بنفتش على "الإنسان"
قول اخير يا واولادي وبناتي ما تضيعوا عمركم في اوهام اهل النسب الكوشي العظيم
الجد جالدقون #
.
|
Post: #2
Title: Re: أسمع يا بشاشا وأنا جدكم جلدقون، البشوف andquo
Author: Bashasha
Date: 07-06-2026, 01:27 AM
Parent: #1
تاملو عقلية هذا المخلوق!!
لما بشاشا يقول كلنا سودانيين، من دون اي تمييز، فهذا "نقاء عرقي"؟
جلابي للطيش، او بعد ده، ينمط واحد زي بشاشا ك"مهووس "نقاء عرقي"، شغل اسقاط للجواهو، فقط لانو بشاشا بقول لا لي عفن القبلية، لا لي كرور الجهوية، الي الجحيم وهم العروبة؟!!
بناءا عليه، العاملين "اولاد عرب" حصريا من الجلابة، من امثالو فهؤلاء مابتاعين "نقاء عرقي"!
مادخل بشاشا باختلاط ايا كان في حياتو الخاصة كفرد، ياهذا، تفضح في روحك، تطرش في الجواك، او تروح ماسحو في حيطة بشاشا القصيرة!!
سبب كل هذا لاحظو هو رفض بشاشا لي وهم العروبة في الخيط ده:
إنجاز أدبي سوداني رفيع-عملان يقتحمان القائمة القصيرة لجائزة "كتارا" للرواية ...لحظة فارقة إنجاز أدبي سوداني رفيع-عملان يقتحمان القائمة القصيرة لجائزة "كتارا" للرواية ...لحظة فارقة
|
Post: #3
Title: Re: أسمع يا بشاشا وأنا جدكم جلدقون، البشوف andq
Author: عزالدين عباس الفحل
Date: 07-06-2026, 03:16 AM
Parent: #2
أبو الزهور هلا
ضحكتني حتي النواجذ
فإنقلب بي الكرسي الدوار
،،،،،،،،،،،
عزالدين عباس الفحل
ابوظبي
|
Post: #4
Title: Re: أسمع يا بشاشا وأنا جدكم جلدقون، البشوف andq
Author: mohmmed said ahmed
Date: 07-06-2026, 11:22 AM
Parent: #3
بشاشا ابننقا تو
ما ممكن تفتح معارك مع 6 او 5 اشخاص في وقت واحد
وبلغة حرب الايام دي
دا تديهو بالجيم ثري
ودا بالقرانوف
ودا بالتلاتة وعشرين
ودا اربعين دليل
ودا بالراجمات
والاخير مسيرات عديل
اوسون كديكا هس
|
Post: #5
Title: Re: أسمع يا بشاشا وأنا جدكم جلدقون، البشوف andq
Author: زهير ابو الزهراء
Date: 07-06-2026, 11:52 PM
Parent: #4
استاذي محمد سيد احمد متعك ربي بالعافية
والله ومحبتي لاخي بشاشا عالية وهو بمقام الاخ ما تقلق اللي بيننا اكبر من سجال هوائي ساي
ولك كل الود والاحترام استاذي وحبي لاخي بشاشا ولا خلاف ذو قيمة بل هي مشاكسة عادي
زهير
|
Post: #6
Title: Re: أسمع يا بشاشا وأنا جدكم جلدقون، البشوف andq
Author: Bashasha
Date: 07-07-2026, 04:28 AM
Parent: #5
يازهير حاف كده:
ممكن تشرح للقارئ، الخلاك تخرج عن الطور، او تروح فاتح نار في بشاشا شنو، ماسح بيهو الارض، او بشاشا بتكلم عن مشاركة سودانيين في سباق "رواية عربية"، مش زهير؟
|
Post: #7
Title: Re: أسمع يا بشاشا وأنا جدكم جلدقون، البشوف andq
Author: Bashasha
Date: 07-07-2026, 04:52 AM
Parent: #6
او تاني يا زهير حاف كده:
خلينا نستفيد من ده، ونفيد القارئي:
من هم الكوشيين في فهك؟
لما بشاشا يقول كلنا سودانيين فهذا "نقاء عرقي" في فهمك؟
ولا مصر احنا عرب مثلا؟
العرب ديل منم في بلد العرب اسموه "بلاد السودان"؟
لما بشاشا يرفض وهم العروبة الولع بلدنا عبر القرون والي الثانية، فهذا "نقاء عرقي" في فهمك، ام مواهيم العروبة من امثالي هم المسكونيين بالنقاء العرقي، حد اشعال محارق الابادة للملايين فقط لانهم "زرقة" او مش "اولاد عرب" زينا احنا الجلابة؟
واضح للكل من دون ماتعي او تقصد بي زي كلامك ده، انتا ماشي في ذات السكة، تمد الجابتنا للجحيم ده حد جدع حتي اطفال رضع في اكياس قمامة في الشارع!
ده، حصل وين في الكون ده كلو، جدع اطفال سودانيين، رضع في اكياس بلاستيك في الشوارع كما اي تراش، لو في الخرطوم او القاهرة؟
|
|