الكلمة الحلوة

حضر في فيلم اتنين زملاء في كلية بكولمبيا بحبوا بعض من بعيد،
كان آخر يوم ليهم بالكلية وبعدو بيوم كان الكريسماس،
هي مشت ودعته وتمنت له كريسماس سعيد، هو ما قدر يصارحها،
ظلت نادمة طيلة حياتها لأنها كانت تنوي أن تسأله أن يقولها،
وهو لم يسامح نفسه أبداً لأنه لم يقلها،

شعر بهم الحلنقي بكسلا؛
الكلمة الحلوة الفي قلبك
وحياتك ما تعاند قولا،
خلينا نصايح بيها العيد
نرحل لعوالم مجهولة

غناها وردي بمسرح الجزيرة بمدني سنة 71
كتبوها ناس البصات في رفارف اللساتك الخلفية،
في بتاع كارو من المكي عاجباهو بت جيرانم مدرسة كتبها ليها في رفارف عجلات الكارو الخلفية؛
الكلمة الحلوة اللي قلبك
وحياتك ما تعاند قولا
لاقاهو بتاع حركة غرمو قال ليهو أنت تستهين بوردي،
بتاع الكارو اشتكى الشرطي في محكمة العُمد بشندي فوق،
قال الشرطي أحتقر مشاعري،
العمدة محمد سعيد أمر بنفي العسكري من مدني لمدة سنة
أولاد الأشلاق قالوا لمرته طلقيهو،
طلقتو وعرست سيد الكارو
غنى ليهم في العرس عبد العزيز
توعدنا وتبخل بالصورة

لمان كان عمري ٢٧ سنة كنت شغال في حتّة فيها بنات حلوات كتار،
مرّة مناهل وكانت مكيسة سألتني إنت يا بكّة ما لك ما عندك علاقة خاصة مع واحدة؟
ما داير تعرس؟
قلت ليها والله، أنا هسّ وضعي المادي ما كويس، لكن أنا برضو هسّ في علاقاتي اليومية معاكن بقيت أعرفكن كويس،
وما عندي مشكلة هسّ مثلاً إنتي وتيسير وأميمة وعزوز كلكن لطيفات وجميلات ووناسات أي واحدة منكن أنا ممكن أعرسها،
مناهل دي لحدي ما فارقت مكان الشغل داك تاني ما اتكلمت معاي
الحقيقة أنا ما لحقت قلت ليها الحب لزول معين بالكثافة الشديدة ديك دا كضب ساي،
لكن هي برضو زعلت
وكنا اليوم داك بنتعشى وحردت التحلية الباسطة
أنا أكلت قطعتين

آه منو الحب لما يصيبك ويتغلغل جوّة الأعماق جوّة
برضو الحلنقي
لمان تطلع من داخليات ماشي الكلية بزقاق الحب وهو طريق ضيق على جنبتيه جنائن منقة كثيفة،
لمان تصل نهاية البساتين وتلف يسار ماشي كافتريا العمال، على النهاية مزروع فل وموريا وطول العام ريحتن طاقة،
لو أدمنت الريحة دي
وبقيت تشمها في النوم
دا يا هو الحب جوّة الأعماق جوّة

https://dcars.net
مناهل طفشت
تأكيد للصورة اعلاه