"بشاشا" ...نوستالوجيا عجيبة يا بشه!!

07:39 AM June, 08 2026 سودانيز اون لاين
الشيخ سيد أحمد-
مكتبتى
رابط مختصر

(adsbygoogle = window.adsbygoogle || []).push({});
كتب "بشه"

Quote: نعم كانت هناك شجرة في شاطئ النيل جمب البيت لما اهبش فرع محدد في الشدرة دي، وقسما الفرع ده اغصانو كانت بتتحرك، نعم تنكمش!!ولما الم يدي كان برجع يتفرا!!الي اليوم ما بحثتا الظاهرة دي!!

لاول مرة يكتب "بشه" كلام تحس فيه بصدق غريب وحنين كبير.
رغم انو الواحد بقى "زي القرد الأعمش والنظارة" لكن ده ما بمنعنا انو نجي "نتاوق" مرة مرة على موقع "بكري أب صلعه"
شرحو: "بشه" بي الاقتباس ده ..هبش فينا حته "طريه" :)
ولاول مرة اقرا لي "بشه" كلام فيه مخاطبة لي شكل الحياة في الريف وطعمها وشكلها ...مبالغة يا بشه.
طبعآ التحية مرفقه طيه لكل أعضاء منبر من لا منبر له وتحيه خاصة لك يا "بشه" ثم "تبآ لك " لأنو فعلآ فتحت علينا سيل من ذكريات البادية وحياة الريف.
كسرة: البوست منطقة "تداعي" ولكن إذا في اي "كركبه ولا عنكبه" ف ممكن عادي يتحول لي منطقة عمليات زي ما بقول "جقود" ههههههه
التحية لي "جقود" القلم الذي ظل يكتب لما يفوق العشرون عامآ عن فكرة واحدة ولم يتأثر بأي "مشهيات" :)
شايف قبل مده "خواض" برضو جايي ناطي فينا "جوز" بي قصيدة لا تشبه ما كتبه من قبل...فالتحية له برضو.
"ودالاصيل" شوقنا بحر ياخي
اخر الكسرات: مع المحبة المعلومة

يا مراحب يالشيخ
نورت المكان (انت لمبة كبيرة على قول الهندي لكفيله في النكتة المشهورة)
كويس رجعتك بركات السوخوي بشاشا
لا تطول غيابك

حنين يا حنين
ياخي عساك بخير يا حبوب

المكان منور بي ناسو الحلوين ياخي.
طبعآ ناس "دينق" وبقية "الكراتين" زي مابقول صديقنا وود حلتنا الراحل "وهبه"
بيكونو مرتاحين من "المعط" .
اما يا حنين ف "بشه" برغم خرمجتو الظاهره للعيان فإنه بهذا التداعي يرجع الى كونه
ابن بادية وريف "معتق" .
لمن قريت كلامو ده رجعت لي "جنينة سيدي" و "تمر الهبوب" و"منقاية ستي نور"
هذه مصطلحات لمناطق وأحداث من صميم المنطقة ...وإن شاء الله نجترها في هذا البوست
إذا ساعدنا النظر وإنسترت معاي العيون ولم تزرف ماؤها بدون سبب كما العاده ههههه..

تسلم يا حنين وبوركت عزيزي

هلا وغلا حبيبنا الشيخ سيد احمد
وسعيد اليوم الجابك سودانيز..

الجلابي المتفرنج بشاشا بيقصد الخجيلانة او المستحية او المتدسية على إختلاف اسمها بجروف البحر على مد بصر نيلنا الكوشي العظيــم ..
بس عجبتني حكاية ما بحث الظاهرة دي..

اتمنى انه يبحث عنها فقد يجد ان سبب الظاهرة هو محاولة انغلاق الشجرة حول ذاتها الكوشية في وجه الغزاة والمستعربين
وطقس من طقوس البراءة من عار ملامسة جلد الجلابة .. هههههه

عوداً حميداً يا ول أبا الشيخ.

مشيت من المنبر وخليت لينا إلاً اللكرور وناس قريحتى راحت مثل حيدر الما زين ..


بريمة

مرحبا باخونا الشيخ
عودا حميدا

حيدر الزين يا حقنا
ياخي ليك وحشة يا حبيبنا

Quote: هلا وغلا حبيبنا الشيخ سيد احمد وسعيد اليوم الجابك سودانيز.. الجلابي المتفرنج بشاشا بيقصد الخجيلانة او المستحية او المتدسية على إختلاف اسمها بجروف البحر على مد بصر نيلنا الكوشي العظيــم .. بس عجبتني حكاية ما بحث الظاهرة دي..

بشاشا من الظواهر التي يجب دراستها بشئ "مافيهو اي عمق " :)
مرات بحس انو رايح ليهو الدرب ...لكن لو خت الرحمن في قلبو ف ح نقوم نقعد ليهو الشغل.
"بشه" لايدري أن معبده المقدس موجود عندنا وهو "جبل البركل العظيم" وانه في جوف ذلك الجبل
يقبع جثمان "آمون" الفالقنا بيهو و قاعد يحلف بيهو ...فإذا ما عمل "كما كنت" ف ح نعمل ليهو "فرش متاع" عشان نخليهو
قاعد "باطو والنجم" :)
وممكن في روايه اخرى نخليهو يعمل "خلف دور" .
لكن بعيدآ عن "خزعبلاتو" المتطرفة فإنه في هذا المقتبس الذي تصدر البوست فهو يطرق بمطرقة "هشه" على أماكن ومواضع
تشكل حياة الريف وشكل الحنين حتى لأوراق الشجر....ياخي انا نزلت ليهو "القزاز" إكرامآ لحياة الريف وإنسانها الجميل.

Quote: اتمنى انه يبحث عنها فقد يجد ان سبب الظاهرة هو محاولة انغلاق الشجرة حول ذاتها الكوشية في وجه الغزاة والمستعربين وطقس من طقوس البراءة من عار ملامسة جلد الجلابة .. هههههه

مبالغة يا حيدرنا ....مقتبس يمثل كمية وعي كبير جدآ بأصل الاشياء ...إن شاء الله "بشه" يفهم بس.

سلمت يا حبيبنا.

يرسمة يا رباب

عساك مليان عافية يا شيخ العرب

Quote: عوداً حميداً يا ول أبا الشيخ. مشيت من المنبر وخليت لينا إلاً اللكرور وناس قريحتى راحت مثل حيدر الما زين .. بريمة

بالغت يا بريمه هههههههههه...ياخي حيدر الزين ده فاكهة منبر "بكري اب صلعه"
لكن ريحتني ...لأنو معناها انو "حيدر" لاعب معاك ضاغط ...ودي اشارة لانو انك سترد
بخشونه لاتستدعي البطاقات لا صفراء ولا حمراء ههههههه.
سر من اسرار استمرار هذا الفضاء هو إستيعابه للرأي والرأي الآخر واذا في تجاوز مخل
ف " بكري" قاعد ومفنجل عيونو واللائحة جاهزة للتفعيل .

سعدت بمرورك الارباب "بريمه " وخليك قريب

هلا وغلا
ملك الميمات "عارف ناشد"

عساك بخير ياخي

Quote: مرحبا باخونا الشيخ عودا حميدا

كلما ادخل شايف "الآكشنات" مدورة هههههههه
ابداع يا عارف مافي زول طلع من الميمات العجيبة ...مفروض ترش لينا "بكري اب صلعه" بي واحدة مخصوص

سعدت بمرورك اخونا عارف
دم بخير

بديت البوست بأغنية "الجريف واللوبيا" لأنو فيها نوستالوجيا عجيبة ...مش كده؟ وبعدين "عاصم الطيب" اتفاعل باحساس عالي جدآ مع الاغنية.
ياخي لمن تسمع "الصادق الياس" مع ألحان "الجابري" بتحس إنو في دفقات حنين غريب ...مرات بتقرب تبكي لولا المتحلقون حولك ...لكن عادي لمن تكون لوحدك فممكن تسمح لي نفسك تنكسر ...مش عشان تحس بمرارة الإنكسار لكن عشان تمنح الكلمة قدرها الواجب واللازم من القدسية والإندياح ...بالمناسبة زمان كان في موضة كدة بتاعة "إندياح" يعني اي زول لابس جلابية مثقفاتي لازم يدخل ليك كلمة إندياح في اي جملة حتى أصبح مجتمع المثقفاتية "منداح" على غير هدى ....فبقي ما ينفع الناس من أهل الثقافة وهم قلة.... وذهب زبد أهل "المثقفاتية" وأنشأوا أمكنتهم الخاصة بهم ...وهي محمدة كبيرة ...لأنهم ودون أن يشعروا قاموا بتنقية شوائب الثقافة دون أن يدروا ...أماالبعض من الحرس القديم لأشعار الفطاحلة ناس "مصطفى سند" و "محمد سعد دياب" فظلوا يحنون ويشتاقون الى تلك العبارات المليئة بالحنين في ثيابها بالغة التلاصف والأناقة.

الصادق الياس قال:

عندي شوق لي نيلنا
والأهل والطيبة
الجريف و اللوبيا
و باقي ذكرى حبيبة
و قشة الصفصاف
القايمة عاملة زريبة
ضل مغطي القيف

انت قادر تتخيل اللوحة دي؟؟؟ ممكن ما ابالغ اذا قلت ليك انك ممكن تشتم ريحة "الكركي" وانت بتقرأ ....الكركي هو الطين المتشقق على ضفاف النيل وحين تلامسه المياه له رائحة متفردة.
الصادق الياس ممكن يكون شاعر تغنى له الكثيرين لكن عندو قدرة على نقلك مجبرآ ومستمتعآ في ذات الوقت الى تلك الربوع...قد تختلف الربوع مابين سواقي الترابلة في الشمال وسواقي الجزيرة لكنها كلها في مجملها دعوة للوقوف على الأطلال ليس بغرض الإحساس بالأسى بقدر ماهو إستصحاب شاعري انيق لتلك التفاصيل التي تشكل حياة القرى ومحاولة دمجها مع صخب المدائن حتى تتشكل صورة مغايرة لشكل الحياة ....الشعراء لديهم فلسفة غريبة في التصور لشكل الحياة لذلك هم يرسمون بفرشاة غير التي ندري ويستخدمون ألوان تصبغ الفكرة فتمنح العبارة سر التفرد والخلود.

يا سواقي بلدنا
وينو صوتك مالو
وينو قارع مويتك
غنى باسم حالو

تأمل هذه المناجاة العجيبة!!! هو يدري أن السواقي لاترد ولا تتحدث ولكن تكمن الفكرة في دورانها في إشارة واضحة لإستمرار الحياة ..صوت الساقية له إيقاع موسيقي غريب ....لكن من يدير الساقية يدوزن كل تلك الإيقاعات في أهازيج اشبه بترانيم الوقوف على حواف الصمت(كما قال الشاعر الصديق معز عمر بخيت) فتخرج تلك الهمهمات بلحن موسيقي يطرب للحد البعيد ليس لجمال الصوت وإنما في صدى الصوت ...فصدى الصوت في تلك الجروف يستقبل الصوت ويعيده إليك بغاية النقاء مع وجود إيقاع خرير مياه الساقية في الخلفية وصور حبلى بالألوان تتقاطع للعاملين في تلك الجروف مابين بياض "العراقي " وألوان ثياب النساء متعددة الألوان.
برغم هذه الصور العامرة بالتفاصيل وإجتهاد الصادق الياس في السرد والجابري في اللحن والأداء ... لكن تبقى حقيقة واحدة لا لبث فيها كانت دافع ومحرك للفكرة ...الحنين في أبهى الصور ...لمن اسمع "الجابري" بيغني الاغنية دي ...بتخيل صورة البنطون وهو يقطع تلك الأمتار مابين نوري وكريمة وصوت صافرة القطار وصورة المشرع واصوات المسافرين في رحلة الذهاب والعودة حين ينقلها النيل في واحدة من رسائله المتواصلة لإعلان وجوده بيننا رمزآ للتواصل والحياة.
ما بين حنين "الصادق الياس" و حنين "محمد ميرغني" وحنين "بشاشا" الى تلك الشجرة واوراقها التي تتفاعل معه كل ما لامسها... مساحة كبيرة تكفي لإستيعاب كل اشكال الحنين لتشكل في مجملها صورة هي الأجمل لوطن جميل إسمه السودان.

كسرة: يا "بشه" مالك علينا ياخي بتفتح في "النفاجات" المقفولة ...تبآ لك مع المحبة.

آ رطانة الليلن ليل...

لمن تقرأ شعر "حميد حسن سالم" تشعر كانه قاعد يتونس في" الدرب الوسطاني"...ربنا يذكر صديقي العزيز "عصام علي أبوديه" بالخير وهو بوردابي قديم ...تخيلوا أنو "عصام" سافر من الخرطوم الى الشمالية متكبدآ مشاق السفر قبل "سفلتة" طريق شريان الشمال وقد كان سفر لايخلو من مشقة وعنت عجيب ...وأعتقد أن "الطيب صالح" كان في رحلة عبر هذا الطريق لذلك كتب "أن هذه الأرض لا تنبت إلا الأنبياء " ..ما عارف "بشه" قرأ الحتة دي ولا فاتت عليهو كما هو في حاجات كتيرة فايته عليهو.
المهم ...سافر صديقنا "عصام ابوديه" كل هذه المسافة ليقابل "حميد" ويرى بأم عينيه "الدرب الوسطاني"...والدرب الوسطاني هو طريق يقسم المنازل من أول القرية إلى آخرها أو بمعنى آخر يتوسطها ليقسم تلك المنازل بين "فوق" و "تحت" ..ولكن إنسان المنطقة ينطقها (لافوق) وتعني نحو الجناين و (لا تحت) تعني نحو أو إتجاه النيل .

يعج الدرب الوسطاني" بحركة الناس حتى المساء ليتحول بعد العاشرة مساء بقليل إلى حلقات يتجمع فيها الناس .. كل مجموعة تتسامر فيما بينها ولاتخلو تلك التجمعات من قصص وطرائف وبعض من التثقيف ......لذلك وصف "حميد
للدرب الوسطاني هو وصف لحالة الحياة بكل نبضاتها التي يمثلها ... فبعض النبضات كانت مفرحة وبعضها محزن للغاية خصوصآ عندما تنصت إلى صوت "الصايح" ...والصايح هو صبي يمتطي "دحش" صغير وسريع جدآ يبدأ الإنطلاق من موقع الوفاة ويجوب المنطقة عبر الدرب الوسطاني معلنآ عن وفاة شخصآ ما ...ينادي ذلك الصبي نداءآ مموسقآ
الحي الله والدايم الله
فلان ...راح في حق الله
فيتجه الناس بعدها نحو المأتم ثم التوجه للمقابر
نرجع لي "حميد" لمن يقول:
آ رطانة الليلن ليل(مع التشديد على حرف الياء في كلمة الليل الثانية)
أ رطانة الليلن ليل
ما لاقاكن في ونساتكن
بين الشادي وبين كاساتكن
في صلواتكن...عن دعواتكن
أو دقساتكن عز خلواتكن
زول ...زول الله
إن محن ...آ بسأل

لكن ناس "العقد" زعلوني منهم
ليه؟؟
لأنهم غيروا أيقونه من أيقونات حميد وهي قصيدة "نورة" فغيروها الى أن تكون "نعمة"...وماهو العيب الذي جنته تلك الشخصيىة الهلامية والرمزية في القصيدة بإسم "نورة" حتى يتم تغيير إسمها.
العقد هو "عقد الجلاد"...الى الآن ماعارف سر تغيير الإسم وشخصيآ أرتبط وجدانيآ مع النسخة الأصلية والتي قام بادائها "محمد جبارة" بصوته الطفولي وقدرته العالية على العزف بآلة الطمبور.
لذلك "عقد الجلاد" تلاعبوا بموروث وأيقونه خالدة في خارطة غناء منحنى النيل وبالرعم من ذلك ..لا "حميد" ولا "محمد جبارة" إعترض على ذلك التغيير...شخصيآ غير متقبل لذلك التغيير لأنه أربك "ذاكرة " الإستماع عندي وأظن عند الكثيرين كذلك.

لمن قريت تداعي "بشاشا" وإرتباطه بالجذور في صور كتيرة أطلت على ذاكرتي ... بعضها في بحري مدينة الجمال وسر الهوى وبعضها في الشمال .أطلت صورة "الدرب الوسطاني" بكل تفاصيلها وأجاد "حميد" في الوصف وهو في غمرة بحثه عن "المفقود" من أهل الله يتفرس في وجوه شاغلي "الدرب الوسطاني " ..مقتبس صغير من "بشه" لكن فيهو قدر عالي جدآ من الصدق ...تكاد تشعر بأن بشاشا يبكي حنينآ إلى تلك الشجرة كرمزية لفترة من فترات عمره وبالتاكيد كان هناك العديد من الوجوه تتحلق حوله في بيئة ريفية تخلو من اي مظهر من مظاهر المدنيه ...وهي إشارة الى ان من كان حوله وهو يلامس تلك الاوراق كانوا من أهله وعشيرته بلاشك.
بالرغم من الصدق البائن في المقتبس لكن السؤال يا "بشه" هل أؤلئك الأهل ح يصلهم "راس السوط" أم أنهم معصومون من هجومك المتكرر نحو إنسان الشمال.
تبآ لك

الشيخ سيد احمد يامراحب،

انتا من نواحي اول قبلة، جبل البركل؟

ياسلام ياخي، اعصابي باظت!!

قالو الحجيج قطع،
طالب، نور البقع،
حماني القيد قطع!!

باذنه تعالي، ناوي اجح لي بيت امييين!!

دعواتكم، والعندهم رغبة يكلمونا!!

كنتا ارتعش، ولا ادري لماذا، وانا يافع، في اروع بواخر نيلنا لما اصل كريمة، الزرتها كتير جدا!!!

والدة جدي من نواحي المنطقة ديك، وكذلك والدة شاعرنا الكبير، عمي اسماعين حسن، الوالدة حد الزين، وانا من مواليد "جزيرة رع" اي الرحمن في دنقلا، اخر المعاقل وبوابة الفيضان، علي بعد اميال من جبل البركل المقدس لي حد الرجفي!!

لا ادري لو وصلت هناك حيحصل لي شنو، من الرعشة المتاكد حتخجني، خج، لما استعيد الذاكرة الجينية لارث اجدادي!!!

يا الهي!!

بشة يا مكنه
لعلكم بخير ياخي وبركه بالشوفه

Quote: الشيخ سيد احمد يامراحب، انتا من نواحي اول قبلة، جبل البركل؟ ياسلام ياخي، اعصابي باظت!! قالو الحجيج قطع، طالب، نور البقع، حماني القيد قطع!! باذنه تعالي، ناوي اجح لي بيت امييين!! دعواتكم، والعندهم رغبة يكلمونا!! كنتا ارتعش، ولا ادري لماذا، وانا يافع، في اروع بواخر نيلنا لما اصل كريمة، الزرتها كتير جدا!!! والدة جدي من نواحي المنطقة ديك، وكذلك والدة شاعرنا الكبير، عمي اسماعين حسن، الوالدة حد الزين، وانا من مواليد "جزيرة رع" اي الرحمن في دنقلا، اخر المعاقل وبوابة الفيضان، علي بعد اميال من جبل البركل المقدس لي حد الرجفي!! لا ادري لو وصلت هناك حيحصل لي شنو، من الرعشة المتاكد حتخجني، خج، لما استعيد الذاكرة الجينية لارث اجدادي!!! يا الهي!!

كيفن ما من هناك؟؟ أنا من هناك شديد كمان هههههههه

شجرتك المذكورة في الاقتباس الذي تصدر البوست ..ذكرتني شجرة "مانجو" في ديار الشايقية وارفة الظلال
يجري بقربها جدول مليان موية يستقي ماؤه من النيل ...مويه عكرانه تروي عضامك مش عطشك.
تخيل يا بشه ...الجدول ده ...انا بكون خاتي "العنقريب " من دون مرتبة وبكون خاتي "العشميق" في مجرى الجدول
وبجيب المنقه "المانجو" وبخلي المنقه تسبح في الجدول ...مع انها في اتجاه سريان الماء لكن مابتقدر تمشي بعيد
مع تيار الماء...لأنو "العشميق" عامل ليها حاجز ....طبعآ بعد فترة بسيطة بيكون درجة برودة المنقه مبالغة وكل هذه الاحداث
تحت ظل شجرة المانجو وارفة الظلال...طبعآ دي لوحه طبيعية مافيها اي رتوش او اضافات.

لمن قريت كلامك جاتني صورة القعده العجيبة دي الوصفتها ليك في التداعي ده...قلت ياخي "بشه" ده ريفي "معتق" ههههههه.

نحن من هناك يا بشه ..وجبل البركل يطل علينا بكل ذاك التاريخ المجيد ...

كريمة وجبل البركل بينهما مسافة خمس دقائق ...بالمناسبة "جقود" خريج مدرسة كريمة (ان شاء الله الدرب يجيبو البوست)
نحن يا بشه كنا ننتظر بواخركم بفارغ الصبر عشان "الملوحه" ههههههههههه.

كسرة: اول مرة احس انك تكتب بحنين جارف للريف وأهله....ف المايك معاك ومنتظر منك تداعي وانا بساعدك
بي المويه الباردة والترمس.

تحياتي

الشيخ سيداحمد، سعيد بي معرفتك!

لولا الحرب اللعينة العبثية دي، كان المني اقضي باقي العمر هناك!

مناي كان احوم المنطقة ديك شبر شبر، مابين القدار او مروي، او بعد داك مابين القولد او حلفا!!

حلفا او شندي عشتا بعضا من طفولتي فيهم، ولكن ما بين مروي والقدار، ما بعرف غير كريمة، او حتي كريمة معرفتي بيها كان حصريا بي مرسي البواخر ثم القطر، "قطر كريمة"!!

انا من جيل السفر بالبواخر حصريا!!

او لما ظهرت اللواري، كنتا بكجنا عما!

اطلاقا في كل الكون ده، دعكا من السودان او امريكا، مافي امتع من السفر بالبواخر في النيل الخالد!

كان المني، امتلك باخرة، واسكن فيها كبيت عديل كده، واقضي باقي العمر في المواقع الاثرية لي اجدادي، شبر، شبر، متفرغ للكتابة عن تاريخنا!!

كنتا حالف، من كالفورنيا ما اكتب سطر، ولكن الان مافي حل، للاسف، مافي عمر!!

خليك معاي نسرح في الذكريات، وتذكر احنا سكان الريف، من قمنا او جينا، كنا الساس، او كنا الراس!!

انا عايش يومي في ماضي الذكريات، وبالذات ايام الطفولة، اجمل ايام عمري!!

بشه يا بشه
سعيد جدآ بالتواصل معاك

Quote: لولا الحرب اللعينة العبثية دي، كان المني اقضي باقي العمر هناك! مناي كان احوم المنطقة ديك شبر شبر، مابين القدار او مروي، او بعد داك مابين القولد او حلفا!! حلفا او شندي عشتا بعضا من طفولتي فيهم، ولكن ما بين مروي والقدار، ما بعرف غير كريمة، او حتي كريمة معرفتي بيها كان حصريا بي مرسي البواخر ثم القطر، "قطر كريمة"!!

انا بدردق فيك عشان المقتبس الفوق ده.
لأنو شكلو جرابك مليان يا بشه ف منتظرين الاندياح.

ياخي المناطق دي فيها تاريخ السودان القديم...يعني لمن تمشي "نوري" و تقطع النيل وتمشي "الكرو" مرورآ ب "مروي" ح تشوف أطلال
اهل "كوش" القدماء وعظمة إنسان تلك الفترة...الأهرامات صغيرة إلى حد ما لكن بتوحي ليك انو الحضارة الفرعونية ابتدأت من هنا
لأن اصل الأشياء يبدأ صغيرآ ثم يكبر مع رسوخ الفكرة ومن ثم تطورها.
اللافت يا "بشه" أن إنسان المنطقة ورث مفهوم التعاون من أسلافه ناس "كوش" القدماء...عشان كده بتلقى حالة التكاتف سمة سائدة
في المجتمعات ...لذلك ومع التجاهل المستمر من المركز لمطلوبات تلك المناطق ...عزف أهل المنطقة عن الطلب والرجاء من المركز
فأنشأوا جمعياتهم المناطقية التعاونية لرفد مدخلات إنتاجهم في مشاريعهم الزراعية.

"قطر كريمة" ده عالم تاني ...أول مرة أسمع ب "الحلاج" و "ابن عربي" سمعته في "قطر كريمه" وأنا في بواكير الصبا في
إحدى رحلاتي المتكررة نحو الجذور ...ممكن تلقى ليك زول مزاجو رايق ويكون مثقف جدآ فيبدأ يحكي قصة وتلقى العربة
التي يجلس فيها يتحلق الناس حوله ....ينصتون بإهتمام لما يتفوه به...وقد تمر أكثر من محطة وهم مندمجون في الإستماع
وكأن على رؤوسهم الطير.
لكن إن كنت محظوظ ف تسافر مع "سيرة عرس" ...وإذا كنت محظوظ خالص يكونو نازلين في آخر محطة "كريمة"
لأنو طوال الرحلة يكون هناك إحتفال وغناء ورقص ...يفتح الممر للرقص فيرقص الكل ولا يقطع ذلك الرقص والطرب
إلا صوت "الكمساري" وهو يطلب "التصاريح" ...أظن أن أكثر شخص "مو مهضوم" :) هو "الكمساري" لأنه يقطع
ويوقف حالة الرقص والطرب الحاصلة.
وطبعآ لاننسى "المشاكل" هههههه...تبدأ الرحلة "بشكلة كبيرة" بين المتجاورات في العربة ...ثم يهدأ الجميع مع تحرك
القطار...وعندما يحين وقت الوجبة يزول ذلك العبوس من الوجوه وتبدأ العزومة من إحداهن وتقبل الأخرى وهكذا تنتهي المشكلة
ليبدأ بعدها حوار ثم تعارف ...الغريبه يا "بشه" لمن يجو يودعو بعض بعد وصولهم الى محطاتهم ...يا زول تشوف البكا
والنحيب هههههههه تقول الناس ديل اصلو ما حصل بينهم مشكلة.
قطر كريمة حالة خاصة تتعرف فيها على انسان المنطقة بدون رتوش...مش قالو زمان الزول اذا عايز تعرفو ف سافر معاهو.

للحديث بقية يا بشه

تحياتي

الشيخ سيد أحمد




سلاااااااام
الحبيب الفاضل ود الشيخ
سرقت الزمن
وجيتك جاري
أخبارك واحوالك
والحلة والأهل ؟؟؟؟
عارف ثقافتك عالية
النوستالجيا

Quote: النوستالجيا: من مرض إلى عاطفة تمزج كلمة "نوستالجيا" بين كلمتين يونانيتين هما "nostos" (نوستوس) التي تعني العودة إلى الوطن، و "algos" (ألغوس) التي تعني الألم. أول من استخدم المصطلح هو الطبيب السويسري يوهانيس هوفر في القرن السابع عشر الميلادي، بالتحديد في عام 1688، وأطلقه على حالة مرضية تصيب الجنود المرتزقة السويسريين الذين كانوا يحاربون في بلدان أوروبية أخرى مثل فرنسا وإسبانيا، خلال حروب أبرزها حرب الثلاثين عاماً (1618-1648) والحرب الفرنسية-الإسبانية 1635-1659). تقول المؤرخة البريطانية أغنيس أرنولد-فورتسر في كتابها "النوستالجيا: تاريخ عاطفة خطرة" (Nostalgia: History of a Dangerous Emotion) كان هؤلاء يعانون من اشتياق شديد، ونوع من الكآبة، ورغبة جارفة في العودة إلى شيء أو مكان مألوف". هذه النوستالجيا التي ظهرت في منطقة جبال الألب السويسرية ثم انتشرت عبر القارة الأوروبية كانت بمثابة "وباء عاطفي تزداد حدته في فصل الخريف عندما كان سقوط أوراق الأشجار يدفع هؤلاء الذين ينزعون إلى الحزن والكآبة إلى التفكير في مرور الزمن وحتمية فنائهم"، على حد قول أرنولد-فورستر. استمر التعامل مع النوستالجيا كمرض على مدى حوالي ثلاثة قرون. ومع بداية القرن العشرين، تزايد عدد الأطباء النفسيين المهتمين بإجراء دراسات على النوستالجيا، إذ حلوا محل الأطباء المختصين في الأمراض العضوية، وبالتدريج تحولت من خلال دراساتهم من مرض إلى عاطفة، ومن شيء مرتبط بالمكان والحنين إلى الوطن، إلى شعور مرتبط بالزمن والحنين إلى الماضي.

عزالدين عباس الفحل
ابوظبي

سلام عليكم

وياسلام

بوست يرد الروح

فى قساوة الغربة ومرارة النزوح

شكراً على حلاوة الذكرى وجمال البوح

تحياتى

سلام ياحفيدة مهيرة، اميرتنا المروية، نورتي البوست.

كل ما امر بي اسمك اتذكر حبوبتي حرم، والدة جدي العزيز، او هي من نواحي مروي، نعم "شايقية" نعم Medjay كما في كتب التاريخ!

يا الشيخ سيد احمد:
مش عجيب جدا لوعايش في امريكا، في السودان الحفيد يكون اتربي علي يدي والدة جدو؟
والدة حبوبتو؟

هنا في امريكا عادي ممكن الشافع يجي الدنيا دي او مابكون ولا شاف، مجرد شوف حتي ابوهو!

ولهذا كنا معروفين كسودانيين في تاريخ البشرية ب:

الاطول عمرا!

عندي واحدة من حبوبات منطقتنا لما رحلت كان عمرها 135 سنة، تخيل هذا!

فوق لل 100 كان عادي جدا جد عندنا!
في امريكا متوسط عمر الفرد 76 سنة فقط!

ماحصل في طفولتي شفت زول او زولة سمين زينا او سمينة خالص، خالص!

ماحصل اطلاقا شفتا ولا فرد واحد، احد، بي "كرش" زينا!

عاصمة الكروش في الكون هي امريكا!!

ود الشيخ حبابك و مرحب بي عودتك
و التحية للامير الكوشي البعض مرات بجليها واقفة
تصدّق طلع ما بعرف الفرق بين الكدندار و ابو الدرداق
مالك علينا ياخ
شفت الاهرامات جنوب الجبل طوالي
التاني منهم من ناحية الجبل
و بي ابرة كروشيه امي
انبطحت وحفرت كمان تحت الهرم
و الابرة اشتغلت نحت
تذكار من جلال الدين عيسى
و نحت التاريخ كمان
كعادة ذاك الزمان و الكتابة على الحيطان
اذكروني فان الدكري ما عارف شنو كدة
اصلو قبل كده جربّت اعملا بالساسوى الكبار
ما لقيت غير تجريح اناملي
.... بمناسبة اناملي دي الله يسترني من مولاهم داك ويقولي انامل شنو با اب حوافر ,,,
ما علينا
من الهرم طلعت الدردقانية
اتدردقتكا كما يجب ان تكون الدردقة
ود الشيخ
علاقتك بي بركل الله المقدس شنو
وكمان شايل وراك البشة التبشة
جمعية حراس المعبد

هلا وغلا الحبيب "عزو"

Quote: سلاااااااام الحبيب الفاضل ود الشيخ سرقت الزمن وجيتك جاري أخبارك واحوالك والحلة والأهل ؟؟؟؟ عارف ثقافتك عالية النوستالجيا

تسلم على المرور يا "عزو"
أولاد الحلة مرة مرة بيدخلو معاي في صفحتي في الفيس
ناس "ميسرة الفحل" و "سامي جمعه" و "أسامه هكا" و "عماد عبدالله"
و "علي وقيع الله" و "بدرالدين اسحاق" و "الحاج حمد" يا زول ماشاء الله .. اذا مريت بالصفحة
تقول "بحري الشعبية " كلها قاعدة بي هنا هههههههه
شكرآ على وقتك يا "عزو" ومشكور على التعريف بأصل الكلمة \ باقي نحن ناس "قريعتي راحت" :)
محبتي

هلا وغلا ومليون مرحبا بي بتنا "حفيدة" حبوبتنا "مهيرة"

نورتي البوست يا بتنا

Quote: سلام عليكم وياسلام بوست يرد الروح فى قساوة الغربة ومرارة النزوح شكراً على حلاوة الذكرى وجمال البوح تحياتى

سلمتي يا بتنا ..نحن باقي ليك غير الذكريات بقى لينا شنو يا مهيرة
"بشاشا" هبش فينا حتة كبيرة ...ولأول مرة اشوفو يكتب بحنين زي ده.
أها ...لمن يكون في تداعي نحن نعجبك كمان هههههههه

بالله ما تبخلي علينا بالتداعي.
احتراماتي بتنا مهيرة

يا مراحب "بشه"

Quote: يا الشيخ سيد احمد: مش عجيب جدا لوعايش في امريكا، في السودان الحفيد يكون اتربي علي يدي والدة جدو؟ والدة حبوبتو؟

انا لله ياخي...
تعرف يا بشه انت كتبت سطر صغير لكن بيفتح 1000 نفاج.
زمان يا بشه نحن شفنا أسر لم يرزقها الله بالبنين ولا البنات...ويكون لديهم قريب أخ أو أخت
قد رزقه الله بعدد وافر من الذرية ..يقوم عشان يواسي "العقيم" يدفع بإبن أو إبنه له حتى يربي ذلك
الطفل....لايحمل ذلك الطفل سوى الإسم فقط من والديه...شفت الإنسانية دي كيف.

ده على المستوى الأسري...لكن خليني أحكي ليك قصة تانية.
عندنا صديقنا وهو "بوردابي" قديم ..بدون ذكر اسماء ..ولكن فلنقل ان اسمه "عصام" ...البيت المقابل بيت ناس "عصام"
داهم المرأة المخاض فذهبت والدة "عصام" معها للمستشفى ..وضعت المرأة "ولد" ولكنها توفيت
بعد الولادة مباشرة...عندما عادت والدة "عصام" من المستشفى كانت تحمل في يديها ذلك المولود
فنزلت من الإسعاف ودخلت به إلى منزلها مباشرة...لم تلتفت الى منزل جارتها التي فارقت الحياة
والأغرب أن والد المولولد لم يتحدث ولو بكلمة....كبر المولود وصار رجلا وأكمل دراسته
أين كان يقيم ؟؟
في منزل "عصام" ...تربى ذلك المولود في منزل جيرانه في حين أن منزل اسرته يفتح مباشرة
في بيت ناس "عصام" ...تخيل يا بشه انو ذلك المولود كلما كان عائدآ من السفر كان يدخل منزل
جيرانه اولآ ويضع اغراضه في خزانة ثيابه المخصصة له ويلقي التحايا على "جيرانه" الذين يقيم معهم ثم يذهب للتحايا على والده
واخوته.

طبعآ القصة ممكن تمر عليها عادي ...لكن لو "روقت المنقه" ح تلقى انو السودان كان فيهو قيم جميلة جدآ
ميزتنا عن بقية الشعوب.

يا هلا ويا مراحب يا جلال

طبعآ يا جماعه اذا اتكلمنا انا و جلال بي لغة المنطقة ف ح تحتاجو لي مترجم هههه

يعني مثلا شوفو الحتة دي

Quote: اصلو قبل كده جربّت اعملا بالساسوى الكبار ما لقيت غير تجريح اناملي

الساسو او الساسويي
هو الزجاج المتكسر

غايتو يا جلال بالغت في السسوي دي ههههههههههه


انت عارف يا جلال انا اتخيل لي دي كانت ثقافة في عموم المنطقة
يعني عادي تمشي تنقش اسمك في احد الآثار المتبقية من "كوش"
انا شخصيآ اظنو كاتب في "عشرة طرابيل" طربول بعد طربول
وكمان الاسم بالكامل هههههههه.
الحكاية ومافيها انو الموضوع فيهو فخر وإعتزاز بالتاريخ ليس إلا.
طبعآ يا جماعه "الطربول" هو الهرم الصغير ...وهي منتشرة بكثرة في تلك الديار.

والله يا جلال علاقتي ب "جبل البركل العظيم" علاقة تاريخ اولآ ..وكان لدي اصدقاء من اهل
البركل "تحت" ...طال الزمن وتفرقت بنا السبل.
العلاقة الثانية عبارة عن تجربة الصعود والهبوط من ذلك الجبل العظيم...على القارئ ان يعرف
ان هناك جهة في جبل البركل العظيم وتحديدآ الجهة الشمالية يكسوها قدر كبير جدآ من الرمال
وهي شئ غريب فعلآ ...تخيل ان هناك جبل ومرتفع جدآ وتكون احدى واجهاته تكسوها الرمال...المهم
صعدت الجبل مع اؤلئك الاصدقاء ثم نزلت بالجهة التي تكسوها الرمال...عند النزول تكون مجبرآ على الركض او
الهرولة ...اللافت في الامر هو تلك الصرخة التي تصاحب النزول ...فكل من ينزل من قمة الجبل وهو يركض نحو الاسفل يطلق صرخة
كبيرة وتشعر ب راحة نفسية كبيرة جدآ....تصدق يا جلال لم اشعر بذلك الشعور ولو لمرة بعد ذلك.
ذلك الجبل فيه شئ غريب وآسر ...ان زرته مرة فانه يترك فيك اثرآ يلازمك طول العمر.

منتظرين تداعيك يا جلال

محبتي

يا جلال مرحب
اوعا تقول لي انتا "ودخرتوم" ناس الضهاري!
خرطوم دي ماها محلتي وانا قصدي ارجع حلتي!!
بالنسبة ل"الككندارا " أو نحنا صغار كنا بنسميها كده!

ياولد سيد احمد خلينا نبدا بالطنبور!
أنا مسكون حد الجنون بالطنبور!
عملتا طمبور برأي أو عمر 5 سنة فقط!
عشان كده الوزنة بتاعة طمبوري طلعت مختلفة من الوزنة العامة!!
يوم الأحد هو يوم الطمبور بالنسبة لي!
الجمعة مديح!
السبت من طرف!
صادف أو كان والد المبدع محمد كرم الله من أصدقاء الأسرة!
كان بجي لي حتتنا كتير !

حياك الله يا "بشه"
كويس انك فتحت خيط الغناء و الطنبور عشان "نتمغى" شويه خصوصآ وانو البورد كلو عن قتل السودانيين بعضهم بعضآ والغريب ان البعض ينظر لذلك بشئ من الفخر
ولكن الأغرب هو مايلوح في الافق عن تشظي قادم لوطن كامل جميل اسمه "أم سودان" كما كان يسميه الراحل "محمد النور كبر"..ورغم ظهور بوادر الانقسام وارهاصاته
الا ان مسلسل التفاخر بقتل بعضنا بعضآ يتسيد البورد ولا ادري بعد ان يكون الانقسام واقعآ فأين سيجد من يتفاخر بالقتل وطنآ لممارسة جريمته القبيحة والتفاخر بها.
تعرف يا "بشه" في تاريخ اهلنا في منحنى النيل هناك محاولة توثيق لغناء الطنبور في القرون الماضية..وبالرغم من ان المؤرخين نسبوا كثير فضل للفنان "عبدالرازق بنده"
في وضع شكل الغناء وعرضه المسرحي إلا أنني اعتقد ان الامر اقدم من ذلك بكثير وأظن ان غياب التوثيق للفترة التي سبقت "بنده" بسبب غياب مؤرخون للجانب الغنائي
وذلك بسبب تركيز المؤرخين على الطقوس التي لازمت شكل الحياة في "كوش" ومحاولة ابراز صورة الجندي المقاتل في معظم رسومات وتوثيقات تلك المرحلة عطفآ
على سيادة مبدأ القوة بغرض فرض السيطرة. لذلك تجد الاشارة في رسومات "كوش" للغناء والطرب ضعيفة مقارنه برسومات القوة والسيطرة والحروب التي سادت تلك الفترة.
لكن ذلك لا يمنع ان نشير اليه كأحد الفنانين الذين اسهموا في تشكيل اللوحة بألوانه الخاصة ..
بالرغم من أن العديد من الفنانين أتوا بألوانهم ورسموا على ذات اللوحة ,,,لذلك أغنية الطنبور تكيفت مع كل حدث ولم تخرج من الاطار الموضوع لها منذ القدم ..
فكل الاغاني تطرقت بشكل كبير للحنين والعودة للجذور هذا مع اشارات كبيرة للمحبوبة في اغاني الطنبور وخصوصآ منحنى النيل إلا أن العودة للجذور والحنين ظلت هي الفكرة الاساسية التي تقوم عليها القصيدة..
.شخصيآ لا ألوم شعراء منحنى النيل على ذلك الحنين الجارف...أذكر أننا في المرحلة الثانوية كنا نجلس على سور المدرسة وكان النظام "داخلي" يعني تجي يوم السبت وترجع يوم الخميس ..
.نجلس على ذلك السور القصير ونناظر من البعيد اللواري وهي تنقل البرتقال والقريب فروت نحو مدن السودان المختلفة...الموضوع وين بقى يا بشه؟؟؟
الموضوع في صوت "السفنجه" أو "اللوري البدفورد"...هذه اللواري تكون محملة بأوزان ثقيلة جدآ وهي تشق تلك الرمال فتسمع لها صوت اشبه بالأنين ..
وحين ينظر الينا السائق يطلق "البوري" و بوري السفنجه له صوت مميز خصوصآ إن كان السائق ماهرآ في التلاعب به...
تخيل يا بشه لا ابالغ ان قلت لك ان نصف المدرسة يخرج ويقف على ذلك السور القصير ويلوح الى السائق و "المساعدين" الذين يجلسون في المقدمة..
.الغريب يا بشه ان المسافة بين منازلنا وبين المدرسة لا تتجاوز الثلاثون كيلومتر فقط..لكننا مجبرون على البقاء لمدة اسبوع لان نظام المدرسة يفرض ذلك .
.مرور اللوري وتهافت الطلاب لرؤيته وهو يشق تلك الرمال هو الحنين بعينه للديار التي لاتبعد سوى ثلاثون كيلومتر من المدرسة..
.فاذا كان هذا هو حال الطلاب الذين يبعدون هذه الكيلومترات القليلة فما بالك بالشعراء الذين سافروا نحو المدن البعيدة ...لك ان تتخيل شكل وكم الحنين..
.انا شخصيآ "دقيت جرس" ورجعت الخرطوم هههههههه.لكنها فترة طلت عالقة بذهني وستظل ماحييت.
عشان كده يا بشه اغنية الطنبور في منحنى النيل عندها نكهة خاصة برغم وحدة الفكرة لكن تكمن الوصفة في تقبلها لعبارات تمنح المتلقي القدرة على التفصيل بما يتناسب واشواقه وحنينه.

جاييك بي مهله.

وقت البدء:
1:10


ده نموذج ل غناء الطنبور ..المؤدي هو "عبدالرازق بنده"
لاحظ للايقاع ....ما ممكن تقول عليهو ايقاع "الدليب" لكنه اقرب الى ذلك.

هنا يا بشه بتلقى ايقاع "الدليب " واضح جدآ.
لكن لو لاحظت صوت الطنبور في الخلفية وحتى صوت الطنبور مع "بنده" كان فيهو صحن الأوتار كبير
عشان كده الصوت تشعر وكأن فيه صدى.


طبعآ هذه الاغنية تحديدآ من عيون اغاني منحنى النيل ...مع التحيات الطيبات للاخ البوردابي الشاعر "ابا ذر"

من المعروف انو الراحل "النعام آدم" كان يجيد العزف على ىلة الطنبور ل حد بعيد.

شخصيآ أعتقد ان ود جبارة "محمد جبارة" كان اكثر سرعة في حركة "الريشة" لذلك
تشعر بصوت الانغام مترابط جدآ.

قبل ما أجيب ليك محمد جبارة ...ح أعرج ليك على الراحل "محمد كرم الله" لأنو رقم يصعب تجاوزه
في خارطة غناء منحنى النيل.
وبرضو ح اعرج ليك على ابن ارقي الجميلة ..الراحل "صديق أحمد" وهو ايقونه خالده في اذن المستمع
في كل السودان...تصدق يا بشه انو رئيس رابطة معجبي الفنان "صديق أحمد" كان من جنوب السودان
و ده بيأكد ليك أن حروف وكلمات منحنى النيل تجاوزت المناطقية وتعمقت في اعماق القومية بشكل كبير.


كدي اسمع هنا :

طبعا الاغنية مقصود بها ديار الدناقلة والتي ظلت بواخرها تحمل حسان منحنى النيل ثم
تأتينا بالملوحة هههههههههه

طبعا يا بشه
عندي وضع خاص لشاعر منحنى النيل الكبير "النجيفي"
استاذنا الجليل الراحل "عبدالله محمد خير"
رجل بسيط في مهنته لكن عبقري في "الرص" كتابة الشعر.
بعد فضل الله تعالى ثم مجهودات "عبدالله محمد خير" ماكان لطريق شريان الشمال
ان يتم تنفيذه ...تخيل كل تلك الفيافي والرمال والصحاري القاحلة كنا نعبرها في ليالي
وأيامآ كثيرة ...تتخللها الكثير من المعاناة وانت تشاهد "يرمو في الصاجات" ..ياخي تلتلة
عجيبة ...واظن أن "الطيب صالح" كان في طريقه من أم درمان الى "كرمكول" حين كتب:
"هذه الارض لا تنبت الا الانبياء"

وهي كناية عن صبر اهل تلك البقاع.

النموذج ده فيهو تجلي غريب و قدر عالي جدآ من النبل في القدرة على توصيف الوداع
مع امنيات الشاعر "عبدالله محمد خير" للمحبوبة بدوام الهناء والسعادة.
صديق احمد وضع لحن رائع وبديع جدآ.

اسمع يا بشه

اليوم الاحد، يوم الطمبور بالنسبة لي.
اموت في غنا الطمبور..
جايييك..

Quote: لاحظ للايقاع ....ما ممكن تقول عليهو ايقاع "الدليب" لكنه اقرب الى ذلك.

يا ود الشيخ
الايقاع ده اسمو ايقاع الفردة و هو اشتقاق اساسي من ايقاع الدليب
من اشهر اغنيات هذا الايقاع اغنية الليل و الليل يا ناس الليل و الليل للقامة الراحل عبدالرحمن بلاصطو فيها يقول
لقيت الناس حزيىة و جوها
و قلت تحية ما ردّوها
حاصلي مصيبة بس دسّوها
تومتي الليلة وين ودّوها
و لانو لي زمن بفتش عليه و ما لاقيها اسمح لي باضافة رابط بوست للاستاذ الزميل عماد احمد موثّقا فيه الاستاذ عبد الرحمن بلاص
http://sudaneseonline.com/board/499/msg/1518898729.html

و في سنة 2012 كتب الاستاذ صلاح هاشم السعيد بوسته الفيخم عن
اغاني الشايقية في القرن التاسع عشر وبدايات القرن الماضي ساهم فيه
فطالجة من كتّاب المنبر اذكر منهم الاساتذة
منير
الراجل كبّر
الغوض الطيّب
و طه جعفر
أغاني الشايقية في القرن التاسع عشر وبداية القرن الماضي أغاني الشايقية في القرن التاسع عشر وبداية القرن الماضي

يا مراحب جلال
كويس انك عرفت القارئ بمسمى الإيقاع ...لقيتك خطير يا جله...لكن بامانه انا ما من ناس الغناء القديم دااااااك.
عندنا قريبآ لينا ...زول سميع للطنبور واضانو نضيفه خالص للسمع ...لامن يقولولو دقيقه النسمعك الغنية دي ...يرد عليهم:
غنيتكم دي قبل البحر ولا بعد البحر هههههههههه
البحر مقصود بيهو فيضان 88 ....طبعآ قبل الفيضان كان غناء الطنبور يتسيد الساحة "صديق احمد" و "محمد جبارة" و "عثمان اليمني" دون ان ننسى اعتزال "محمد كرم الله" لفترة طويلة و اغاني "النعام آدم" و تراثيات "عبدالرحمن بلاص"...هذه الاصوات كانت تسيطر على الساحة وشكل فيها شعراء من شاكلة "حسن الدابي" و "عبدالله محمد خير" و "السر عثمان الطيب" حجر الزاوية في تلك الفترة.
لكن يا جلال في ملاحظه مهمة برضو في الجانب ده...اذا قمنا بمقارنه سريعة لنموذج الأداء بين "صديق أحمد" و "محمد جبارة" نجد أن إنتاج "صديق أحمد" كان غزيرآ بالمقارنه مع ود جبارة وتعامل مع عدد من الملحينين ..هذا مع إعتماده على "الكورس" في تكملة اللوحة ...بالمقابل نجد أن "محمد جبارة" كان قليل الانتاج ولكن أداؤه يعتمد بصورة اساسية على قدرته الهائلة في العزف.
لمن نرجع لي الغناء قبل البحر نجد أن الفكرة الاساسية للاغنية ظلت لفترة طويلة تسيطر على الجو العام ....لكن بعد البحر "الفيضان" ظلت الاغنية بكائية للحد البعيد وظهر شباب جدد من شاكلة "عبدالمنعم فارس" و "طارق العوض" وظهر بصورة بارزه "يعقوب تاج السر" و "ودالمسيعيد" هؤلاء الشباب غيروا شكل الغناء بصورة واضحة وثبتوا البكائيات في الغناء وحين اقول البكائيات فهي الاشعار المتعلقة بالحنين الممزوج بقدر عالي من الحسرة على المنطقة وكانت الفكرة تمثل البحث في الآثار التي طمسها النيل في فيضانه سنة 1988.
طبعآ زي ماك شايف جاءت العديد من الاصوات لكنها لم ترقى لمستوى تلك الاساطير "راي شخصي" ...لكن يظل "محمد النصري" هو الصوت الوحيد الذي صمد وبقي في الذاكرة وذلك لتعامله مع مدارس شعرية ولحنية متعددة.

شكرآ على الرابط ..فعلا بوست فخيم

اسمع يا جلال ...
شوف "محمد جبارة" وقدرته العالية جدآ على العزف..والغريبة بدون ايقاع مصاحب
غايتو يا جلال انا عندي قناعة راسخة انو "ود جبارة" امهر من عزف على هذه الآلة.
جبت ليكم نموذج من ايقونات غناء الشايقية.

اسمعوا:

ياسلام رجعتنا لي بعضا من احلي الذكريات.
محمد جبارة كان من اصدقاء الاسرة في امتداد الدرجة الثالثة..

زمن.... وقف شوية.... واهدي لي لحظات هنية...

كدي شوف الحنين ده كيف:

ان عطش يسقيهو نيلك
واكلو من ثمرات نخيلك

مافي ابلغ من الوصف ده ...مش كده يا "وداد" :)

يا بشه ..شنو عامل رايح ومخليني اشيل وأعتل وانقل براي كده.
يا زول "انداح" بالله ...البوست مفتوح على شرف اندياحك.

جلال يا حبه ما تعمل ميت ...انت عودك راكب في البوست ده...انبرش ساي بالله.

كسرة: طارق العوض قعد الغنية في علبا واداها اداء عالي جدآ.

اسمع البكا ده:

احيانآ تفرض أغنية معينة وقعها على الذاكرة...الإقتحام ده بيكون من غير مقدمات وخالي من التمهيد ..لمن تقعد تتأمل في كلمات الأغنية بتلقاها بتجسد شكل الحياة في الريف ويمكن يوصف بشكل دقيق جدآ الموسم المصاحب لحركة الحياة في الأرياف.
في الشمال كان موسم "حش التمر" أو "حصاد البلح\ بلغة البندر" يمثل عودة الطيور المهاجرة لأخذ نصيبهم من المحصول والتصرف فيه ..في تلك الفترة من الموسم تنشط الأندية والطرقات وحتى ضفاف النيل تشهد إزدحامآ بالناس ...وجوه تكون قد غابت لفترة قاربت العام من المنطقة لتعود...وفي عودتها تحيي تلك الروابط فيما بينها ...حتى ملاعب الكرة والكرة الطائرة تشهد نشاط كبير دون أن ننسى إزدياد "الزيجات" في تلك الفترة ...فالكل يعيش فترة من "البحبوحة" من خلال بيع جزء من المحصول.
من الحاجات العالقة بالذاكرة و حالة الأفراح "الاعراس" ...كان عندنا رجل كبير في العمر...دائمآ مايتصدر المشهد في تقديم الفنانين ..يتحدث هذا الرجل بكلام كتير ...كلام كبار كبار او ما يسمى في لغة المنطقة
"دراب دراب" هههههه...ولديه عبارة دائمآ مصاحبة لذلك الحفل وهي :
(مازال الليل طفلآ يحبو) ...شخصيآ مستغرب من ذلك الليل الذي ظل يحبو لعديد السنوات ولم يقوى على الوقوف والمشي.
ارجع ليكم لأغنية فيها تصوير لشكل الحياة بصورة لافتة وهي تصف إنحسار النيل في مساره الطبيعي بعد الفيضان ..تغنى بها "صديق أحمد" وهي أغنية الجزيرة ...يقول في مطلع القصيدة:
الجزيرة بقت مخاضة
وتاني خت الطين زيادة
الجرف سبروقو ملح
والبحر فات منو روح
داك يسلك وداك ينقح
وداك بالشرقية ينبح
جاي شايل القش متمسح
مرة يغطس ومرة يطفح

الترجمة :
الجزيرة بقت مخاضة: اي انه يمكنك العبور نحو الجزيرة مشيآ دون الخوف من الغرق.
الجرف سبروقو ملح : يزرع السبروق واللوبيا والترمس على ضفاف الجروف لانها نباتات لديها القدرة على حبس الماء في جذورها لفترة طويلة دون الحوجه للري بصورة دورية.
جاي شايل القش متمسح: التمساحية هي طريقة لربط البرسيم بصورة معينة تمكنك من وضعها والجلوس عليها على ظهر الدابة.
السبروق عبارة عن نبته خضراء أشبه بشجرة "الطماطم" لايبلغ طولها مدى بعيد...لكن لدى أغصانها القدرة على إنبات الأوراق كلما قطعت تلك الأوراق
تكمن الوصفة في خلطها مع "بامية" طازجة بعد غسلهما معآ ...لكن خلوني اوصف ليكم الحتة دي لأنها مهمة في اكمال شكل الحياة:
بعد أن يتم الخلط والصبر عليه قليلآ وهو على النار ثم تبدأ مرحلة "المفراكة" ...لتتوجه الطاهية نحو الصاج ...تتأكد من وضع الصاج على والتأكد من انه مستقر على "اللدايات" ...تشعل النيران من "جريد النخل الجاف"..ثم مسحة من "البزديق" وتوضع اول "قراصة" خمسة بوصة على الصاج...وتتوالى القراريص لتبدأ مرحلة "التمليح " ..فتسمع احداهن تنادي :
يا ولد امشي ليمونة ناس فلان جيب ليك ليمون من الشجرة....تذهب مسرعآ لتأتي ب ليمون ...يوضع على البصل والذي يشكل عنصر هام بجانب صحن القراصة....كل هذه المنتجات "فريش" من الجروف التي كتب عنها "النجيفي" عبدالله محمد خير...شخصيآ أفتقد شكل تلك الحياة بصورة كبيرة ...ففيها قدرعالي من البساطة وتمتاز تلك الأطعمة بطعم ونكهة في غاية الروعة ...تقول لي "بوراك" و "الشربيني" ولا "ماكدونالد" ...لقمتين من الوجبة دي ممكن تخليك تنطط زي كورة التنس.
انا قلت ليكم ياخي السودان مافي اجمل منو.