Post: #1
Title: العيد بدايات المسرات
Author: الطيب الشيخ
Date: 04-18-2026, 06:08 PM
06:08 PM April, 18 2026 سودانيز اون لاين
الطيب الشيخ-القاهرة ـ مصر
مكتبتى
رابط مختصر
العيد بدايات المسرات
الْنّدية مع الصباح
في بسمة نابعة من القلب
من زول يقابلك بانشراح
العيد بداية صفحة
خالية من الجراح
مكتوبة بي حبر الأمل
بحلم باكر يبدأ صاح
العيد جمال الفال غُنى الأطفال
في نشوة ممزوجة بمِزاح
حلوين بيلعبوا بي مرح
فرحة صغار لاقو المراح
العيد طعم تمرات مشتّتة
في الجوامع للصُفاح
زي كِسرة بي موية وملح
قُُراصة بي روب او مُلاح
من غير كلف زولا بيكرم بالمتاح
ناسا بتعزِم بي صدق
تشعُر معاهم بارتياح
العيد سلام وأمان
و اشراقات صلاح
أحضان حنان دافئة
بتضمك في الجناح
العيد عطور أفراح
تفوح منتشرة في كل البراح
زي الفراشات والزهور
الزاهية في شمس الصباح
تنقل عشق حب اللقاح
في مواسم اللهو المباح
ونسة وضحك من القلب
صدق وصراحة و اندياح
العيد وشاح للفرحة
والعفو والسماح
يكبح جماح صوت الحرب
والحقد و قعقعة السلاح
ويعم سلام ينشر في كل البطاح
سودان سليم يسع الجميع
من غير احن من غير جراح
لا للفتن (أرضاً سلاح)
يا شعبي هيا علي البناء
يا أخونا حي علي الفلاح
إيد واحدة ما بتحدث صدى
قوتنا في حزمة رماح
الطيب الشيخ
|
Post: #2
Title: Re: العيد بدايات المسرات
Author: walid taha
Date: 04-19-2026, 08:01 AM
Parent: #1
يا الله على العيد
وما ادراك ما العيد في وطني !
|
Post: #3
Title: Re: العيد بدايات المسرات
Author: ترهاقا
Date: 04-19-2026, 08:14 AM
Parent: #2
كلام عميق وجميل
|
|