أنا ابن حرب

06:04 PM April, 18 2026

سودانيز اون لاين
الطيب الشيخ-القاهرة ـ مصر
مكتبتى
رابط مختصر

أنا ابن خمر أو بنت حرب
عرض انتهك شرف أغتصب
أنا في الحصل ما لي ذنب
وأنا أمي بي تعبت تعب
كادت تموت عند الوضوع
والجرح غور و التهب

ما بيفيد بكاك مهما انتحب
ما غلطة كانت دون سبب
فعلاً مشين للدار خرب
لفتني في خرقة قماش
ورمتني زي الشئ الكعب

وأبوي واحد ابن كلب
حتى الكلاب يا أخ ليها قلب
ما تخاف تعال شوف العجب
في المهد بتكلم معاك
و اوريك ايه كان السبب

كل العباد ليهم نسب
أنا أمي إكس و أبوي واي
واي فاي و "يلا علينا جااااااي"
كم من مواقع طافحة بي قلة أدب
كل حاجة ترجع للأصل
والنهر ييذهب لي المصب

يا للأسف يا للعجب
أنا كان أخير لي الترب
نزوتكم الكانت قبيل
شوف انجبت زي العجب
قول لي بس مين يشتريك
أو يشتهيك بعد العطب

لو كنت راجل و ود حلال
أو أنتي بتعرفي الأدب
بت ناس وذات خلق ونسب
كان علموك قيمة السلع
جوه الكراتين و العلب
كان للعواقب كم حسب
تبت يداك بما أكتسب

ما كنت بكون طفل الخطئة
وأنا كان أكون عز الطلب
خدعوك بي حفنة قروش
واغروك بالمال والرتب
يا ربي من شر الغضب
وفعلاً مشين للعار جلب

غشوك بنات وأولاد حرام
قال ليك أبوك زولا كعب
واحد معقد دون سبب
يا حسرتك نلتي اللقب
وبقيتي زي سيد الجرب

ما كنتي تتمني الفرح يجيك
بالباب العديل خاطبك خطب
بي أهله لي ايدك طلب
فستان زفاف جدلة و دهب
عرضة عريس وسط الاهل
رقصة عروس زفة و طرب

تعبان أبوك عز الهجير
بالفأس يكسر في الحطب
و يا حليل اخوك الأغترب
علشانك أرتاد الصعب
كيف هان عليك هذا التعب
شرف أمك السهرت معاك
كيفن جزاها يكون كعب

نكستي رأس ذليتي ناس
ما حفظتي شيبة ولا شنب
سيرتك بقت علي كل لسان
لي كل من هب و دب

مشيتي في درب الضياع
و العار و سوء المنقلب
ما بيفيدك البكاء والنواح
من بعد ما الكتاب كتب
تباً لكِ تباً له تباً و تباً ثم تب