كورة أوانطة

06:16 PM December, 24 2025

سودانيز اون لاين
طلحة عبدالله-
مكتبتى
رابط مختصر

الجزائريون كانوا متخوفين من الحكم الغابوني بيير غيزلان وقبل كدا قدموا
شكوى ضده للكاف في بطولة أمم أفريقيا الأخيرة بعد أن أشرف على تقنية
الفيديو في مباراتهم مع انغولا وقالوا أنه حرم الجزائر من ركلتي جزاء ولم
يستدع حكم الساحة للمعاينة
الحكم دا اليوم أدار مباراة الجزائر والسودان وعكس بعض الحالات لصالح الجزائر
لكن ما حالات مؤثرة ويمكن أن تكون نتيجة سوء تقدير عادي يحدث من أي حكم
وفي النهاية اتغلب المنتخب السوداني بالثلاثة مع الرأفة.
يعنى متوقعين شنو من منتخب لعيبتو يلعبون بعقلية الدافوري ولا يفرقون بين مباراة
في الرابطة ومباراة في منافسات قارية ينقب فيها الحكام عن الأخطاء من تحت المجهر
عشان يكسبوا بونص وتقدير عند لجنة التحكيم .
في مباراة الروابط والحواري لو لاعب حاورك مرة ففي المرة التانية عادي تركبو شلوت
والحكم يعديها واحتمال يتكيف منك ودي الحاجة العملها الود صلاح عادل اليوم وتسببت
في طرده، ونفس ما فعله محمد أرنق وتسبب في طرده في مباراة البحرين بكأس العرب واللى
انتهت بخسارة المنتخب بالثلاثة برضو ( ما عارف والله ارتباط طرد لاعب والهزيمة بالتلاتة شنو ؟؟
ليي مثلا ما تكون أربعة وخمسة ) المهم دي عقلية لاعبي منتخب قال عايز ينافس على الالقاب
وبرضو ما عارف كيف.
منتخب لعيبتو يتمردوا على التدريبات في المران الرئيس قبل المباراة بسبب الحوافز، وادارتو من
رئيس الاتحاد لغاية الجهاز الاداري همهم كلو ركوب الطيارة والسفر والتقاط الصور التذكارية. واعلامو
عبارة عن مشجعين ومورجغين الواحد تلقى عمرو ما لمس الكورة ويتكلم ليك كأنو زاجالو
( ياخي حتى النسوان بنظرن الواحدة تلقاها ما تفرق بين المخالفة الحرة والغير مباشرة وتجي
تملأ الأسافير هرجلة وازعاج ) ..
لكل ذلك وغيرو أنا مستغرب كيف كان الجزائريين متخوفين من الحكم وهم بلعبوا مع منتخب زي دا ؟
ياخ لو الحكم سوداني وحسب كل أوت قون للسودان وكل مخالفة ضربة جزاء برضو
ح يتغلب ح يتغلب وبالتلاتة .
كورة أوانطة زيها وزي السياسة وبقية القطاعات التانية في البلد المنكوبة دي.

Quote: كورة أوانطة زيها وزي السياسة وبقية القطاعات التانية في البلد المنكوبة دي

ده القلتو ليك زمان لكن ما بتسمع الكلام .. تباريهم بودوك الكوشة
خليك في مريخك المحلي احسن ليك
تاني ما تغالط ..
_
كان غلبوا .. حاكم بورتسودان كان رقعهم بنصف مليون تاني زي رقعة كأس العرب بعد غلبوا اهل أليسا

مساء الزفت حيدروف
يا خوي أنا بطلت اشجع كورة سودانية من سنة 90 بعد ما فات
جيل الرجال كمال عبد الغنى وجمال أبوعنجة وعاطف القوز وسكسك وعيسى صباح الخير الخ الخ
وفي فريق الرشاشات ناس طارق وتنقا وكندورة وصبحي وطاشين الخ الخ
الجيل البعدهم ديل كلهم أنا بلعب أحسن منهم .. أشجعهم كيف ؟؟حححح

التشجيع الهنا دا مكاواة ساي للرشاشات الملاعين الهنا خخخخخخ

Quote: كان غلبوا .. حاكم بورتسودان كان رقعهم بنصف مليون تاني زي رقعة كأس العرب بعد غلبوا اهل أليسا

هي نص المليون الأولى أدوها ليهم يعنى ؟؟
ومال قال ليك اتمردوا على التمرين الأخير قبل المباراة لشنو اتا قايل ؟؟

سلام طلحة

الهزيمة كانت متوقعة
لعيبة ما عندهم دوري ومافي تنافس
يتنقلو من بلد لبلد
لم يستلمو مستحقاتهم واهلهم في السودان عايشين في ظروف الحرب
لا حظ كل اللعيبة من القدامي وذلك بسبب توقف المنافسة داخل السودان وعدم اكتشاف مواهب جديدة
معاك في عيوب مزمنة في الكرة السودانية وهي عدم الاتزان.. والطرد باسبا ب انفعالات ومخالفات ساذجة
الحل المؤقت الممكن
هو البحث عن مواهب سودانية خارج البلد في دول الخليج او في اوروبا

مدير مدرسة كان ساخرا، له الرحمة والمغفرة،
أول ما عرف فريق مدرستنا طار من التمهيدي قال "بركه الطارو، خسارة قروش ساي"

مساء الفل
يا محمد سيد أحمد
يعني لما كان عندهم دوري والأمور طيبة ومستقرة في البلد
عملوا شنو ؟؟؟
ما ياهو نفس الدافوري والفنجطة ومحاولة الاستعراض بتاع
الحلة عايز يحاور بالبيضة واللا يجدع الكورة بهناك ويسبق
المنافس وفي النهاية يقلعوها منو ويشلت القلعا منو ويدوهو كرت أحمر
بس
ياخوي الكورة دي طول ما فيها ما يسمى باعلام الهلال والمريخ
والمشجعين والسماسرة البكتبوا في الجرايد وفي السوشال ميديا
ديل وقسم بالله ما تقوم ليها قائمة ليوم الدين
قلت ليك حتى النسوان الواحدة ما فاهمة يعنى شنو انذار شفهي
وبطاقة صفراء ينظرن ويهلفطن ويورجغن في الكورة
بلد منكوبة من ساسا لى راسا

يا قصي ياخ على الأقل ديك قروش مدرسة
شوية لكن دي ميزانية بلد عديل على حساب
الغلابة والنازحين والما قادرين يأكلوا وجبة
واحدة والما قادرين يتعالجوا والما قادرين يدخلوا أولادم المدارس
عشان القروش تمشى للأولاد المتلاعبين ديل
كل واحد ركب ليهو باروكة في فاخورتو زي الديك
ولبس ليهو بنطلون جينز وقفل اضنينو بسماعة الموبايل
ويا دنيا ما فيك إلا أنا والنتيجة مساخر وفضائح وكمان سوء أخلاق
غايتو اعتقد أنو ما في حاجة جايبة الكفوة للبلد دي إلا
كورة الدراويش ديل
لو بيدي نجيبم نوديهم مناطق الحرب والشدة والانتاج
يطقوا صمغ واللا يلقطوا قطن
يخموهم كلهم في دفار متلاعبين على اداريين
على مسؤوليين بداية من رئيس اتحاد الكورة والعاملين فيها
صحفيين ديل يودوهم هناك
بلاش كلام فارغ ومنتشة خخخخخخ