الثورة: صمت وكلمة وصوت كتبه د. الطاهر آدم الفكي

01:26 AM November, 13 2026

سودانيز اون لاين
د.الطاهر الفكى-UK
مكتبتى
رابط مختصر

يصمت…
ويقول ليك: أصمت هِسّ!
صمتك مسموع… وبس،
في كل نظرة وراها تحسّ،
تاخد نفسك وتقيس،
وتسمع… لحدّ ما تنعس،
والصوت مسجون في الحبس!

كلام لو اتقال يجرح،
ولو اتحكى يفضح،
ولو طلع من الروح يقرح،
وما بنفع لو داير تمسح
آثار اتنقشت في المسرح.

للصمت عيون … تلمح،
وسهام في الخفاء … ترمح،
وجوّاه حكايات … تشرح،
وأسرار ما بتتقال على الأرجح
لكن في جوف الساكت تجرح.

والحكمة إنّو الصمت
ما دليل للفتوى والبت،
الصمت رماد من فوق،
وجمر من تحت.

لا خايف ولا مرعوب من الخوف
لكنّ الكلمات في الحلق … صفوف،
مرصوصة صفوف في رفوف،
لا لاقية باب تخرج منّو،
ولا قادرة تفكّ الحروف.

مرات الصمت… كلام،
ونظرة تختصر …أعوام،
فيها الحرمان وفيها الآلام،
وسؤال واقف بين الشفتين:

هل الحاكم هو الراعي الهمام؟
أم الشعب هو سيّد الأحكام؟

تسأل الصمت عن الصمت،
فيردّ عليك… بسكوت،
وتقرأ في عيونه
حروف الكلمات،
يوم كانت كتكوت،
قبل ما تكبر وتفوت،
وتتحوّل من همسة
إلى صوت!

الكلمة حيرانه في الحبس،
حتى كبرت وشاخت،
وفاتها قطار العرس
وسافر بالأمس،
زي ستٍّ راجلها مات،
دايرة تتكلم وما تصدر أصوات
لكن الكلام والصوت أصرّوا بثبات
وقالوا ليها: معليش،
اقعدي في البيت!

والكلمة لمن تعاند،
ما بتتلمّ ولا بتتخم،
تشبه العصّارة،
تدور و تلف …
وتسحن في الرملة وتلمّ،
والناس واقفين… عاوزين
طحينة وزيت سمسم!

حاجة التومة… أم سُوميت،
قالت عندها قصيدة،
رصاصة تصحّي بيها الشعب،
وتسقي الطاغي… سم مميت،
لكن الكلمات وقفت في الحلق،
ومنتظرة التوقيت؛
لا عاوزة تطلع،
ولا قبلانة تبيت!

الكلمات زهجانة،
ومش قبلانة،
تخرج من حلقوم حجة التومة،
ولو حرف حرف…
بالعربي ولا رطانة!
وتضرب نار …
زي الجبخانة!

الصمت بنى ليهو بيوت في البركان،
والصوت لبس البوت وشايل بمبان،
والكلام دسّ الكلاشنكوف
جوّة الكبوت… وقاد العصيان
وغضب الأمة في وجه الطغيان،
ثورة على الظلم… كفاية زمان

ثوار وسط الثوار،
واقفين في الصف الاول …
ديدبان!
والغاشم ينشن ويشوت،
يضرب بالنار…ويقتل الأطفال،
وكبار السن … والنسوان،
لكن رغم الجبروت،
ما قادر يقتل صوت الإنسان!

أجراس الثورة لمن تدق،
الصمت يثور في الحلق،
والحروف تفكّ قيود الرِّقّ،
والكلمة رصاصة فى الحق،
تهدّ حصون القهر،
وتكسر أدوات الظلم
وخشب وعمود الشنق.

الصمت الغاضب
يخرج من فوهات العمق،
يهدر ويهزّ الأرض،
ويلمع زي البرق،
ويشعل نار الغضب العارم
من غرب لشرق.

والكلمات مهما انحبست
ما بتموت،
وصوت الحق مهما اتأخّر
ما بفوت،
والشعب مهما طال صبره
يوم ينتفض،
يزلزل الأرض تحت وفوق،
ويخرج العملاق الثائر
من جوّة التابوت!

ويهتف بصوتٍ ملء الساحات:
الثورة…
صمت وكلمة وصوت!

د. الطاهر آدم الفكي
لندن – ٥/١١/٢٠٢٦