سوق النصابين كتبه د الطاهر الفكى

01:13 PM October, 11 2026

سودانيز اون لاين
د.الطاهر الفكى-UK
مكتبتى
رابط مختصر

سوق النصابين

النجّار والبنّاء … متشاكسين
كل واحد فيهم …يعاير التانى
و عامل مسكين
الإثنين أخدوا التوكيل
ليبنوا للشعب قصراً من دورين
في سوق النصابين

البناء متلطّخ بالطين
والطين بالموية عجين
والنجار يدق المسمار باليدين
يخرّط بشمال وينشر بيمين
يودي ويجيب … يلفّ دورين
زي الماشي … في خطّين
في سوق النصابين

البنّاء يعلي في الحيط … بالملى
والنجّار ينشر في الأخشاب … تملى
والخشبة تلعن المسمار … لما يجلى
والحيطة واقفة زى الكاهن لما يصلى

البنّاء يلملم ويكسر … في الطوب
والطين في هدومو …سوالو جيوب
والنجّار … ظاهر عليه متعلم يادوب
والنشارة فوق وشو … بانية حبوب

البناء يقول: يعلم الله شغلي تمام
لكن الحيطة براها قامت مايله
و النجار يتحدى العوام في القايلة
و يقول:التشطيبات تاخد أعوام

الجدار ناقص ألفين طوبة
الحراميه خطواتهم محسوبة
والحسابات كلها لعبة ومضروبة
والشغلة من اساسها بقت مقلوبة

البنّاء طلب يدوه حسابو
و النجّار زعلان وكسّر أبوابه
قالوا ليهو: الصابر يلقى ثوابو
دي مسائل فنيّة والله جابو

النجار يعدل الحيطة بالمنشار
و البناء يثبّت الطين بالمسمار
عشان يفتحوا باب في السقف للزوار
و يعملوا شباك في الحائط للجار

الشعب المقهور محتار
لا قصر قايم ، لا جدار
وكلٌّ موظف لاحق المشوار
في سوق النصابين

جاهم من البلدية مسؤول التفتيش
شاف الحيط و قال: أبدا ما بتعيش
عاين للسقف وقال: ما بنفع زى الريش
و الأبواب ما تفتح الا نستدعى الجيش

مين المسؤول … يا ناس
كلّ واحد يتهم التاني و دواس
والبلد خسرانة أموالاً ما تنقاس
والمبنى طلع كالوسم على الكراس
في سوق النصابين

اسمعوا منى … آخر الأخبار
البنّاء اترقى … لكاتم اسرار
والنجّار أتعين … مستشار
ومدير المكتب … سمسار
في سوق النصابين

بدل المشروع … المنهار
بنوا صالة رقص وخيمة زار
والأرض اتسجّلت رسميًّا بقرار
كاول مشروع ناجح في الدار
وأعجوبة من مهندس الإعمار
في سوق النصابين

كل موظف في المشروع أدوه وسام
والتقرير بجدارة … أقرّه النائب العام
والبنّاء والنجّار … نالوا أعظم اكرام
والشعب يدفع في الفاتورة لألف عام
للنصابين …

د/الطاهر الفكى
لندن: ١٠/١٠/٢٠٢٦