.... في حضـرة أمـير شـعراء ( حلمنتيـش ) .....

05:55 AM July, 02 2017

سودانيز اون لاين
محمد فضل الله المكى-قطر
مكتبتى
رابط مختصر

.
(سيده لا) .... قصيدة أمير شعراء الحلمنتيشية الرائع ، الدكتور عمر محمود خالد .. القصيدة
ظهرت في جامعة الخرطوم عام 1971م .. إذا سمعتها اليوم يخالُ لك انها قيلت بالأمس ،
ذلك من فرط روعتها وحسن سبكها وشاعرية قائلها ومواكبتها لكل زمان .
.
ملهمة القصيدة لست في حاجة لوصفها ، فما ترك أمير الشعراء مجالاً لواصف .. فقط
يمكننا القول أنها جميلة ، لاعبة سلة ، شاطرة ولكنها أصيبت ب ( وعكة أكاديمية ) كما قال
الدكتور....
.
يا سيده لا ...فايتانا وييييين مستعجِله ؟
شرط امتحان ؟ ما إنتي كمَّلتي الحلا
لازم علوم ؟ ما بالسماحه مُؤهله
ما سمحة قاطعة مُكمله
ما ساحره نايره ومُذهِله
فايتانا وين مستعجِله

الجامعة صِبحت قاحِله
حِزنت لياليها وصباحاته وبتبكي أصايله
ما كنتي نّواره ونسيمه وبُلبُله
كنتي الضِّيا البِرشح سناهو يجمِّله
كنتي الندا الحاضِن زهوره يبلله
فايتانا وين مستعجله

فوتِّك منو العاد بِقبلا
كل القلوب تخضع تجيك مُتوسِّله
تتبع خُطاك .. ترقص معاك
تزرع دُروبِك وتشتِله
فايتانا وين مستعجِله

السلَّه تبكي مِولوِله
ما الليلة صِبحت أرمله
جفَّت دُروبه وبهجته
وبنت العناكِب مَدْخَـله
ما كان عشانِك يا ملاك
نِحن بنجيها وندخُله
كنا بنصفِّق للجمال
كنا بنصفِّق للحلا
لكن يمين حالفين وراك
لا نجيها يوم لا نوصله
حادِّين عليك يا مُذهِله
فايتانا وين مستعجِله

القمرا لمن طولت ، روحنا ليها بنسأله
والقمرا لمن اختفت ، روحنا ليها نسائله
قُلنالها ليه يعني الغياب
ساعة الظلام إيه طوّلا
قالت خلاص بي أرضكم ما لي صِله
أنا أصلو بشتاق للعيون البطبيعة مكحله
وانا لو عشان سيده بجي ، وبطوي الديار وأجمِّـله
فايتانا وين مستعجله

غلطات كتيره الكمبيوتر بعمله
يمكن نسى ويمكن سِهى وجاط النمر بي أكمله
ما قالوا بعرف كلُّ شي
ليه ماعِرِف سِت الحلا
لو كان عِرف كل النِّمر كان بدّلا
ولو كا عِرِف كان النتائج حوَّله
وعشان عيونِك يا قمر كان خَتَّ إسمك أولا
فايتانا وين مستعجله

مالو العميد .. مالو العنيد ؟
مالو لو رفت المصحح والمُعيد ؟
وخلا سِت الناس تعيد ؟
وشال من نِمرنا وكمَّلا
فايتانا وين مستعجله


الجامعة بعدك كوم رماد
لا تنفع آداب لا اقتصاد
لا طِب كمان لا صيدله
يا السيده لا
يا السمحه لا
فايتانا وين مستعجله

.
الشعر الحلمنتيشي هو نوع من الشعر فيه طابع الفكاهة ، ويعتبر الشاعر حسن شفيق المصري
أول من أطلق هذا الإسم ..ويبدو ان التسمية أُخِذت من ( حلا ) أ و ( حلاوة ) ... طيب منتيشي
دي تبقى جات من فييييين ؟
منتيش في العامية المصرية مأخوذه من ( نتش ) أي ( جذب ) ... والنتاش في العامية المصرية
هو الفشّار ... يعني الغير جاد .
وقد جاء في بعض التفاسير ان حلمنتيشي تعني الكذب اللذيذ ، ولكن في بعض الأحايين فإن
موضوع القصيدة قد يكون واقعياً وجاداً ولكن تمت معالجته بخفة روح وكِده ..
هذا النوع من الشعر يمكن ان نطلق عليه الشعر الكاريكاتوري ، او الكاريكاتير الشعري أو
شعر النكتة ، فهو يرسم الإبتسامة في وجه من لا إبتسامة له ...
.
................................................................
العمود متاح لكل من تملك في نفسها الكفاءة الحلمنتيشية أو الذي يملكها ...

.
القصيدة الحلمنتيشية الواردة أدناه ، لشاعر الحلمنتيشية المصري سيد حجاب ، وهي مستوحاة من قصيدة شوقي ( سلوا قلبي ) .
وأنا بدوري قد تصرفت في قصيدة ( سيد حجاب ) فلويت أعناق بعض أبياتها ..

سلوا قلبي وقولوا لي جوابا
لماذا حالنا أضحى هِبابا ؟
لقد زاد الفسادُ وسادَ فينا
فلا ينفع بوليسٌ أو نيابه
وشاع الجهلُ حتى أن بعضاً
من العلماءِ لم يفتح كِتابا
أضحى الشبابُ بلا عملٍ عطالى
فأدمنَ أو تطرَّف أوتغابى
أرى أحلامنا طارت سراباً
أرى جناتنا أضحت خرابا
وصرنا نعبدُ الدولار حتى
نقولُ لهُ ماما وبابا
وملياراتنا هربت دُبياً
فما استوردنا ما يقتل ذبابا
وتُشبِعُنا جرائدُنا نِفاقاً
دعها فقد تزيدُك إكتِئابا
زمانٌ يطحنُ الأكْفاءَ طحناً
ويحي اللصُ محترماً مُهابا
فكُن لِصاً إذاً أو عِش فقيراً
فهذ ( بوش ) أو ذاك الكبابا

.
إلى الأحبة المكسَّرين في الحلة و( عطية ) باني بيت وراكوبة في جيوبهم !
إلى المتابعين الضلله من غرِب لي شرِق !
إلى الذين تعلموا الحِلاقه في رسين اخوانهم !
إلى الذين اتعشوا بوش ( موية فول وموية جبنه ) بعد التمرين ، في دكان علي العربي !
إلى المغازلنجية ومكسرين التلج للغاشية والماشية !
.
أهدي حكايتي مع سوسن
.......................... الحيطة بالحيطة

أكيييييييييييد خَـطِّـك
عشان محفور شديد جُوايْ
مَكعوج وبرضو عاجِبني
قريب مني وبَعَـرْفو براي
وخَـطِّك عندي خط (رِقْعَـه)
لما أشـوفو كِـمِـل الـراي
يسافِر بالحرِف رسمِك
يعذبني ويزيد في أزاي
ولمــا يجينـي جوابِـك
لا بَعرِف هِنايْ لا هنايْ

لمن كُنتي تكتبي لي
جوابات حُب بدون عِنوان
ما عِنواني رُكُن بيتكُم
وضُل الحيطه أحلى مكان
مَسَجَّل جَمْ عمود النور
قريب من قِدرة الدُّكان
أسالْمَ الغاشي والماشي
واشيل وأقالِد الجيـران
مرَّه أساكِك الشُّفع
اخوك خمود بريدني كمان
يوم طليتي من الباب
نور الشارع اضّارى وعمل خجلان

لو الضُّل رحل برحل
أصاقْرَ الشارع التاني
أراقِب طلتِك يا غاليه
لو مريتي في ثواني
يسرِقني الوكِت مرات
وأتناســاهو ينسانـي
ولو سِبت المكان مرَّه
بسيب في الحيطه عنواني
في حوش العُمده كِتِل الزين
وأنا المكتول في جيراني

.
المصري عمر قطامِش أحد شعراء حلمنتيش البارزين
تحرَّش بواحدة مع سبق الإصرار وما بعد الترصُّد !
أما أنا فقد تحرشتُ بقصيدته مع سبق الإصرار والتصرُّف !
.
مرَّت بجواري حورية ... وبسرعة بَيَّتُ النيَّة
فأخذتُ أُهمهِمُ بِكلامٍ ... وغدوتُ أغوصُ بِعينيَّ
فمناطِقُ تبدو كهضابٍ ... ومناطِقُ أخرى مبنيَّة
تمشي تتهادى في دعةٍ ... حيرى بعيون دمشقية
فأمـاءت هيــا اتبعنـي ... وابتسمـت ليَّ بِحنيَّـة
دخلت فدخلتُ اتابعها ... بيتـاً بِطقـوسٍ رسميــة
ففتاةُ تلبسُ ما قـد لا ... يُذكـرُ كهوامِــشَ جنبيَّـة
وشيخٌ تِرحابٌ فضلني... بسجارةَ خضرا محشية
وعجوزٌ قالت تقصِدُني ... إدفـع تتمتـع يـا عنيـه
واقتربت تهمس في أُذني ...كم تبقى مُدَّة زمنية؟
فأجبـتُ الليلـةَ طيلتـها ...تدفعُني طاقـــةَ بشـريَّة
وأضافت أرِني محفظتك..معها إثبات الشخصية
أخرجتُ المبلغ من جيبي..ومن الطيات المطوية
موبايلي والساعة أيضاً ...أمـلاً في نيل الحُريـة
فاستلمت مني حاجاتي ... وانقلب الهذلُ لِجِديَّـة
صرخت أرِني عرض كِتافك..أوحالاً ألبِسكَ قضية
ثاروا وانتفضوا في لحظه.. والشيخُ غزتهُ حيوية
كسروا أنفي فسال دمــاً ... وتغيَّر وجهي كُلِّيـة
فنجوتُ بِجلدي حتى لا... أُكمِل أحداث اليومية
قابلني شيخٌ فحكيتُ ... تلك الصوره المأساوية
فأجاب لماذا يا ولدي ... هذي أعمــالٌ منهيــة
فقلتُ بلى و لكني ... أبحثُ عن نيــلِ الحريـة
واليومَ أراني قد تُبتُ ... وندِمتُ لما فات عليَّ
وتذكَّرتُ جهنَّمَ لمّـا ... يُرمى فيها المجرمُ حيّا

ود المكى
سلام وشوق كتير
مرة كده مشينا لى عزاء في الدوحة كان المتوفي واحد محامى استشاري مخضرم قديم في الدوحة صديق الوالد
ونحن نازلين من السيارة وقفت جنبنا برادو في الباركن نزلت منها مراة كبيرة في السن
بس ملامحة لما كانت شباب كانت جميلة
قام ابوى قال لى الوالدة بتعرفي دى منو وابتسم
قالت لى لا قال ليها دى القالوا فيها القصيدة بتاعت يا سيدة لا
بالله شفتى الزمن دا بعمل فينا شنو
فسالتوا قلت لي القصيدة بتقول شنو ضحك قال لى
سمعناها لما كنا بندرس في جامعة الخرطوم في الاركان سنة 1975
لما رجعنا البيت رسلها لى

شوف الناس زمان كانت جميلة كيف
قلوب نقية صادقة وحنينة
لاكيزان ولا اسلامين ولا امراض نفسية واحقاد

.
الغالية الدكتورة وضاحة
سعدت بإثرائك الموضوع ، بعدين قالوا سمح القول في خشم سيدو ...
د. عمر اعاد لي الشك القديم لمن ( لَكَن ) في حتة مالو العميد مالو ( العنيد )
فقد قال من قال كانت .. مالو العميد مالو ( البليد ) ... الدكتور عمر راقي ما بقول كده
لكن الجماعة القربوا يلحقوا سيده بيعملوها ههههه .
.
تااااااني كل سنة وإنتي طيبه

.
يااااا سلام على الزول الجميل دا
ويا سلام على البروف محمد احمد اسماعيل ، فإن كان دكتور عمر ( أمير ) شعراء
حلمنتيش ، فالبروف ( إمامهم ) .
.
وتاااااني تسلمي

أما عودة ( شيقا ) فهي ليست مثل ( عودة ديجانقو ) أو ( عودة الإبن الضال ) ولكن إختفاؤه
المتزامن مع اختفاء خالة سعادة اللواء عمر علي حسن قد أثار كثيراً من الشك والريبة لدى
مجموعة ( الشمار ) المتوطنة في المنبر .. وأصبح الموقف خصباً للتكهنات والتأويل .. فقد
صرح أحد خبثاء المنبر ( وهو بتاع شمارات مشهور ) لا داعي لذكر اسمه .. صرح بأن المدعو
شيقا قد تزوج من عشرينية ... إلا ان شيقا فاجأ الجميع بعودته وكأنه قد اشتم رائحة الشمار ولكن
مع العوده فحمدو في بطنه !
مصادرنا تقول بأن اغنية ( عاد الحبيب المنتظر ) ستنزل بعد قليل فترقبوها .
القصيدة الحلمنتيشية الجاية سبق ان رأت النور بمناسبة عودة شيقا من مخبئه الإختياري المريب ،
وقد أجريت عليها عدداً من عمليات التجميل لتناسب الموقف الماثل .

ياااااااا شيقا لا
أهلين ومرحب يا هلا
طولت لينا الغيبة ليه كِده يا ولا
ضارِب طناش ولّا الحكاية مُغازله
قُبـال نَخُش في مُساءلــه
حد زعَّلك ؟ مين زعلك؟
لو جاك شمار أدِّي الخلا
ياااااااا شيقا لا

ناساً كُتار ساءلين عليك فيهم غلا
وناسا كُتار عاتبين عليك فيهم حلا
وناساً ظُراف شمشاره جد قول الصلا
جابـو الخبـرقالـوا الكتيـر في المسـأله
بِتحِب كمـان .. وقالوا الصغيره مُدللـه
زي كـم سنـه ؟ باللهِ مين دي المُذهِلـه
أم العيـال ..انشـا الله خبـرك يوصلـه
وترجـاكَ تَبْ مُتْحَـزِّمـه
وحُجَجَكْ فَشنك ومُهلهله
وناس الشمار لابدين هناك
عايزيـن يشوفـوا البهدلــه
يلقوكَ زي لوري التُّراب
الجــاري فاقِـد فرملــه
يااااااا شيقا لا

عشان نسامحك وننبسِط ونتناسى سبب المُشكِله
وكُل النـواعِم يهدوا ليـك
باقات زهور شان تشتِلا
جيب لينا عنكوليب معاك ، بالمرَّه تتكـافى البـلا
زي حِزمتين حلوين كِده،أو حِزمه واحده مدنكله
نمدغ ونجـدع ونبتهِـج ، ونبـدا الطـرب من أولا
جلسـة رُباعيـات ونَـم ، والونسـه كاربـه مُطوَّلا
جيـب الدايـر تجيبو معاك ، وجيـب ليــنا الجـلا
يااااااا شيقا لا

يا جنرال التحية ليك و الكسكتة فوووووووووووووووووق

ياخ اخوك انتقل لمدينة صلالة اجمل مدينة في الخليج في موسم خريفها المشهور

تعال لينا زيارة ياخ و حياتك كبدة الابل و حليب الابل تسمع في طقطقة الكي بورد دا هسه

سلام اخى محمد فضل الله
العبد لله من مؤسسي هيئة حلمنتيش العليا في جامعة الخرطوم عام 1971
وعملت تسبيك لشعارات تقديم بعض شعراء حلمنتيش ومنهم الدكتور احمد الأمين (المتجهجه الأممى) وكان شعاره
أنا من تجهجه في النشاط بلا اختلاط
وأضاع وقتا في التكبكب والعياط
لما رأيتك خلطة مزبوطة قرب النشاط
من فرحتى قطعت من جزمى رباطي
ومشيت فرحانا وبوتى في أباطي
وكان شعار اخونا المتغوبش الخلوى (يوسف احمد آدم - الخبير الأممى)
أنا المتغوبش القمصانو شاش
انا الفلسان تملي وخالى كاش
انا الدرش العلم درشا دراش
أنا الطالب الدخل للجامعة داش
أما شعارى (الحيزبون الطرابيشي) فقد كان:
يا طالع السلالم
قف واجمع البرالم
فالحيزبون قادم
للخلط والتفاهم
تجدون معظم قصائدى في معهد الدراسات الإفريقية و الأسيوية مع قصائد بعض زملائي الحلمنتيشيين.
وقد نسيت معظمها مع تقدم العمر وزحف الزمن على ذاكرتنا حتى هرمنا ...

يااااااا سلام على صلالة عروس الجنوب ، لقد زرتها عام 2010 لو تذكر تركت لك
ديوان الرائع فضيلي جماع في الفندق في مسقط ، ولم نلتقي لارتباطات تتعلق بالزيارة
وفي صباح اليوم الثاني غادرت لصلالة ، فلم تكتمل سعادتي بلقائك ... لقد كانت زيارتي
لصلالة متوافقة مع مهرجان خريف صلالة في ذلك العام فما اروعها وما اروعه .

من عادتي عندما احل بأي بلد أو مدينه فإن فضولي يملي علي معرفة جوانب كثيرة حولها،
سألت السائق الذي لازمني لأسابيع ثلاثة وكان من أبناء صلالة عن القبائل التي تقطن
المنطقة ..قال لي : ان اكبر قبيلتين هما آل كثير وآل قَرَى .. فآل كثير أصولهم يمنية، وأما
آل قَرَى فأصولهم حبشية !!! والقبيلة التي تأتي بعدهم ( المَـهَرة ) وهي تتواجد في اليمن
وجنوب المملكة العربية السعودية ، والراجح أنهم امتداد أصيل لقبيلة ( الأمهرة ) الحبشية !
والقسم الموجود منهم جنوب المملكة لهم ( رُطانة ) بجانب لهجتهم السعودية .. ومعلوم ان
الأحباش كانوا يستعمرون اليمن حتى أجلاهم ( سيف بن ذي يزن ) .. بل وصل الأحباش
إلى الحجاز ، فأبرهة بأفياله حاول هدم الكعبة ( بسم الله الرحمن الرحيم .. ألَمْ تَر كيفَ فَعَل
رَبُّكَ بأصْحَابِ الفيل ).
والحديث ذو شجون

فهنيئاً لك بصلالة ، وهنيئاً لصلالة بِك

ول ابا محمد فضل الله..حبابك يا صديقي
كل سنة وانت طيب..
كتر خيرك على التحية التي كتبتها لي في بوست اخونا قريمان..ياخي لغاية الآن برجع بقراها مرتين (راتب عديييل)..

وكتر خيرك على هذه الحلمنتيشيات الأنيقة..وهي ذاكرة ياااااخي..!

قبل سبع سنين..جاتنا قريبتي واحدة عروسة هنا..وبعد شوية دخلت في التغييرات البيولوجية اياها (بتاعة العافية على قول اهلك)..واتوحمت في قصيدة (يا سيدة لأ)..والكابتن راسو شطب..ويقول لي روحو:عمري ما سمعت غنية (يا سيدة لا)..احدهم قال ليهو: يمكن قاصدة غنية (ست البيت ) بتاعة مبارك حسن بركات..!
المهم الغلاط وصلنا..وحاولت من الذاكرة اكتب ما استطيع من يا سيدة لأ..وصاحبنا شالها وزعل لمن عرف انها قصيدة حلمنتيشية..لأنو الناس بتفتكر انو ناس حلمنتيش ديل ما جادين كلو كلو..!!

كنا يا صديقي..ايام المراهقة..كراسات ما تديك الدرب..اغاني..حلمنتيش..شعر راسو عدييل..صلاح جاهين ، الأبنودي ، احمد فؤاد نجم ، المستعرب الخلوي..المتجهجه الأمم ، البروفسير جاغوم ..الخ..

صديقنا يحي فضل الله العوض..كان عندهم مجموعة مسرحية اسمها (السديم)..ومشت تشتغل مسرح في الأقاليم..وفي كادقلي الثانوية كان عندهم قصيدة جابها لينا شقيقنا الأكبر..

بدايتها بتقول:
ابقى منك وتبقي مني
حبيبتي زعلانة اظنك..
يا اللذيذة يا الكلكي جنك..

قصيدة طويلة..والغريبة ممكن تلقى الناس بتنظر حولها..ووكت داك كانت النظرية انو الشغل ده استعدال لفكرة الحلمنتيش..!

كتر خيرك على هذه السياحة .. وياريت تواصل..

بس ما تخشوا لينا في حكاية (اريدك كيف)..!!!!

كبر

استاذنا سعادة السفير منان
والله إنها لسعادة ان نعلم بأن قامة مثلك ينتمي
لقبيلة الشعر الحلمنتيشي ، أولئك الذين يدخلون
السعادة في القلوب ، ويرسمون الإبتسامة على
الوجوه .
سعدت كثيراً كما يسعد غيري بمشاركتك ، وتذكيرنا
بهذه النخبة التي اسعدتنا في زمن جميل .

لك التقديركله

أخي الحبيب كبر
سعدت بوجودك والله في هذه المساحة ، فأينما يحل قلمك يجعل
للموضوع قيمة ، ويكسبه اهتماما.
بعدين قالوا لا تخاوي المجنون ، لا تخلي المجنون يخاويك ، لكن
بديها طلَّه :

ابقى منك وتبقي مني
حبيبتي زعلانة اظنك..
يا اللذيذة يا الكلكي جنك..
مهمـا قالـو وقالـو عنِّـك
أنا بريـدِك وكونـو إنِّــك
حالجه صامولتين أظِنِّك

يا كبر دي بتمشي ساي ، ما شُغُل مجانين .. بس خفت
صاحبه يعمل لينا فيها حقوق ملكية فكريه وكده .. احسن
نكُب الزوقه هههه.

لك الود كله كبر

ألى كل المضروبين شاكوش وزن كيلو فما فوق !
إلى المضروبين في الأنكل .. وعشان ما يسألني واحد حكاية الضرب في الأنكل دي كيف ؟
ففي الحالة دي بتكون المحروسة لاعبة على حبلين ، حبل محلي وحبل مغترب ، بعدين
المحروسة بترمي الصنارة للمحلي ( بِطُعم ) خفيف وكِده ... وأول ما تنزل
الخليجية المحلي يكون راح في خبر كان.... خفيفه وكِده .... في الأنكل بس .

.......................... شاكوش سوسن ( عيار 1500 جرام )
أنا وســوسن
محبه وريده رابطانا
حبايب وزي أهل واكتر
وكُلْ إخواني إخوانه
النفاج دوام مفتوح
قلوبنا سعيده نشوانه
إذا أُمِّي في يوم غابت
يسابِق أُمَّها حنانه
ومن يوم القلوب دَقَّت
عِرِفتها أحلى إنسانه
ربطنا أملنا ومصيرنا
وكُل الحِله عــارفانا

عبيط شُلتنا كان عبدو
ريالتو الصابَه ليها زمن
يوم من السفر طلَّ
خلاص اتغيرت سوسن
جايب شيلتو من جَدَّه
ولو شُفتَ الشِّنط تمحن
زول لا شِهاده لا خِبره
وفي المكانيكا زول أرعن
وأنا قضّيت سنيني عِلِم
عشان أتأهل اتمكَّن
واصبِح زول مهم بلحيل
وسوسن تبقى ليَّ وطن

وسوسن جاطت الحِلَّه
وكل الحله زعــلانه
قَسَم ما بتستحِق ريدتي
وظهرت كلها خيانه
ما دام عبدو العبيط عَجَبِك
هو شبهِك وإنتِ سجمانه
أنا الشاكوش عملني بطل
وإنتي الخاينه وجبانه

إلى جماعة الراية البيضا .. أولئك الذين يقعون تحت سيطرة زوجاتهم . رافعي
شعار ( زوجة واحدة تكفي ) .
إلى الحالمين بمثنى ، وإن كان مُش ولابُد فثلاث ورُباع .. إنه حلم واضح الحقيقة
فتحت سرير النوم ساطور وكيس زبالة ( إن كيدهُن عظيم ) .!

( دستور التعدُد )

أرى النسوانَ أزهاراً بحقلِ ... وما أحلى الحياة مع اثنتينِ
أقول الفل أم الياسمين أحلى .. سيختلِفُ العبيرَ بزهرتينِ
تزوج في حياتِكَ من عذارى.. وعِش متنعمــاً في جنتيـنِ
وإن أمست حياتُك في عناءٍ ..وأضحت زوجتاكَ كزئبتينِ
فثالِثــةٌ ولا تخْشى المنايـا ... سَتَفتِــكُ هــذه بـالزئبتيــنِ
وإن زاد البلاءُ وصِرتَ تشقى .. ونمت بِليلةٍ صِفر اليدينِ
فرابِعــةٌ ولا لـومٌ بهـذا ..... فلن تحيــا حياتـك مرتيـنِ

في ذات مرة من المرارير وفى يوم كالح من أيام المصادرات والتأميمات على عهد نميرى أقامت هيئة حلمنتيش العليا ليلة ضخمة في الميدان الشرقي لجامعة الخرطوم بعد أن ضاقت ساحة النشاط وميدان الباسكت بول على ليالى حلمنتيش قال الشاعر الحلمنتيشى جاغوم بن بلاع (الراحل محمد اسماعيل رحمه الله) في الحسناء النجمة ام ضنب وهو يبحلق في الحزام الذى تدلى خلفها:

لله درك يا بلومة
ضنب تكوم كومة كومة
أخشى عليه في كل قومة
وبخاف تصادره الحكومة

وقال الحيزبون الطرابيشي أطال الله عمره:
غدوتُ أسيرُ في سوق الخدار
وخلفى بائعُ الأكياس جاري
فمن قال: اشترى كيساً بقرشٍ
ومن ترك المجال لإختيارى
وقلت لبائعٍ: زح يا أخينا
لأني لاحقٌ بص البرارى
فكشر وجهه يبغى عراكاً
معى في السوق في نص النهار
فلما قلت: كم كيلو الطماطم
تبسم مازحاً ونسى شجارى
شريت طماطمى ومضيت أعدو
ولكنى وقعت على المجارى
هناك ابتلَّ سروالى ابتلالا
وصار ملوناً مثل الخمار
لعنت ابو المجالس قبل هذا
من الأوساخ والكوش الكبار
فللأوساخ في بلدى مراحٌ
تطن به الذباب كما القمارى
فقل للمجلس البلدى إنى
زهجت من النضافة والغيار...

وكاد أمن الدولة أن يقوموا باعتقال قبيلة حلمنتيش بتهمة التحريض
يتبع

تحياتي لصاحب البوست الجميل وضيوفه الكرام
اخترتا موضوع جميل وصفحه من صفحات الشعر المنسي لطلاب جامعاتنا العريقه انذاك وواضح ان الحلمنتيش يصف الاشياء والمواقف بدقه مستخدما العاميه السودانيه وايضا يتخلله بعض الفصحي ووضع كل ذلك في قالب حلو فكاهي ولايخلو من السخريه

ياريت لو احد يرفدنا بقصيدة
ام شداق
مطلعها
ريدتي ليكي يا ام شداق
تقلب اللوري في الدقداق
تفك كتاحه نص الليل
شقوق كرعيك تدخل ضب

شقوق كرعيك تدخل ضب

والتلقاهـو تقـول فيـه كَـب
قطيمه لئيمه هِظاره صعب
لا تتصابح لا تتعاشر لا تِتْحَب

ليا الصادِق دي شكلوته عديييييل كِده ..هههه
يبدو لي الشي منلوج ... زمان ليالي السمر في
المدارس لا تخلو من فن المنلوج .

كل الود صادق

الشكر و التحية لصاحب البوست و ضيوفه الكرام،

أعشق الشعر الحلمنتيشي و أحفظ الكثير الكثير منه،

نبدأ بي دي:


و أذكر نجوى إذ ما طال شوقي

و أصرخ قائلا ..
يا نجوى أحييييييييييييي

و أذكر نجوى
في زحمات بص ٍ
و أنا متشعلقاً
رافعا يدي

و أذكر نجوى
في صف الرغيف ِ
إذ ما الوقفة
هدت ركبتي

و أذكر نجوى إذ شاهدت لحما ً

و إني قد عشقت اللحمَ ني

جات الإمتحانات و رجفت
و من بحر الندامه غرفت

لعنت الريده و الرايدات
و قلت بلاش يقرو بنات
ماهن حاجة ما عارفات
غير الشاهي و الشربات

يا قانون زمانك فات
و جن يقرنك الحرمات
لو كان بقن عاقلات
يقعدن يعوسن الدوكات

شوف جنس الزمن شن جاب
و قالت بدرس الآداب
فوق للركبه شايله خطاب
ويمكن يسقطو القرقاب

الفي الهندسة مشاكلانا
شايله المسطره و فالقانا
في المطبخ طبيعي مكانا
شان تقعد تسوي غدانا

المطرود انا و محروم
و أصحابنا معاي بالكوم
خليناه للحروم
و بشتنن إقتصاد و علوم

الفي الطب مبشتن حاله
كيف تكشف على الرجاله
سته سنين قرايه بقاله
و العجب العرس في باله

عاين للصيدله الممكونه
في كيمان حريم مدفونه
أحسن واحده فيها سكونه
أما عن العقاب أعفونا

عاين الجات تهز في ضراعه
قالت دايره اقرأ زراعه
حرتت و تيربت بسراعه
سوت في بلدنا مجاعه

عاد يا خواني واقعه حكيه
في البت البقت بطريه
حلف التور طلاق بالميه
ما تكشف عليه بنيه

مفارق جاتني كم كيسوره
الله يخت عليكم بوره
لا تلقوا العرس بالكوره
بعد الطرده كيف الشوره

.
وإنت من زمان وينك يا عمار ، تُشكر ( مثنى ) على هذه
المشاركة الدسمة ، ولِسه منتظرين منك الكثير ، فالبوست
مفتوح لك على ( مصاريعه ) .

لك التقدير

.
الشاعر محمد عثمان بلال ( غشيت قبره سحائب الرحمة ) عندما كان يتأهب للعودة النهائية للوطن
بعد فترة اغتراب ، يحكي حال زوجته بعد أن نقل لها خبر عزمه على العودة للوطن .. ذلك
الخبر الصادم لقبيلة النساء المقتربات ... فبعد حياة الدعة الواحده ترجع للكتاحه والغَبَشه ، وهنا
تبدأ الجرسة والبهدله .
محمد عثمان بلال كتب قصيدة يجاري فيها قصيدة الأعشى ( ودِّع هريرة ان الركب مرتحِلُ ) يعكس
فيها تلك الجِرسة والبهدلة .

ودِّع كفيلُكَ قُل عثمان مُرتَحِلُ ... وهل تُطيقُ وداعاً أيها الرجُلُ
قد كنتُ أول موهومٍ بغربَتِهِ ... هذا الريال نذيرُ الموتِ والعِللُ
حرباء رقطاءَ مصقولٌ عوارِضثها.. تُغري الهبيلَ كما يغري الفتى الأملُ
تَمــرُّ أزمتها من بدءِ فترتها ... مر السحابِ لا ريثٌ ولا عَجِلُ
قالت سُميةُ لما جئتُ أخبرها ... ويلي عليكَ وويلي منك يا رجُلُ
تطبُز عيونك كالحمقى بلا سببٍ .. أعمى البصيرةَ لا مالٌ ولا طُلَلُ
أما ترانا بلا بيتٍ يُظللنا ... فكيف نرجع وا سجماهُ ما العملُ ؟
أنا لم أصدق إن الله خارجني .. من بيت أبيكَ ، تُرجِعَني لنقتتِلُ ؟
أليس لديكَ من أمرٍ تُحاوِلهُ ... أخشى يضيقُ علينا السهلُ والجبلُ
ماذا أقولُ لأمي حين تسألُني ... أين الغوايشُ والكِردانُ والدِّبلُ ؟
فهل أُجيبُ أكلناها أُعدِّدُها ... سمكٌ دِجاجٌ وغالي الجُبنُ والعسلُ
أمونه أختكَ ماك عارِف لماضتها ..سليطة لسانٍ كالكبريتِ يشتعِلُ
زارتنا هنا وقد شافت سعادتنا ... .. ولا نزالُ بما خمَّتهُ نشتكِلُ
راجِع قراركَ قبل الفقرُ يُدركنا .. وإن عزمتَ فذاكَ العارُ والخجلُ

مجموعة قصائد سمعتها عام 1977 و انا في الصف الرابع الإبتدائي و حفظتها من يومها و لا ادري من هو شاعرها:

1)

و أذكر ما ذكرت وصية أمي
تقول دايراك ان تصبح حريــفا

تزاحم في البكاسي اي زولا
رجالا ام نساءا كالقطيــفة

وفي البصات صادم
تجد مقعدا و أوعا للعجائز ان تقيــفا

و قم في الصباح الدقش بدري
و أحشر نفسك في إحدى الصفوفــا

فحتما في نهاية الصف تجد
خضارا ام إجارا أم رغيــــفا

فيا طاحونة الاحلام دوري
فقلبي صار بوكسي للغلابه

تشعلق فيه حب النساء
كما قرد تشعلق جوه غابـــه

وقل يا عباد الله أدعوا ربي
و دعوات المعذب مستجــــابه

فإجعل فؤادي باصـــا
و أفتح فيه للنسوان بـابــا





2)

يا أحبه
و يا عصيرا في كبابي
و يا قزاز ملين مربى

ما تقولوا كيف عامل
حالتي و الله صعبه

من يوم ما بقيت واحد موظف
قلبي للعربات حبه

كلما شاهدت تكسي
صفق القلب و شبا

و اظل الليل احلم
راكبا في التكس جنبا

و اقضي الصبح اشحد
يا عباد الله سحبه

إنني و الله حالف
لو مشيت يوما (أوربا)

لا أكل لا أشرب
لن أشتري للعلم كتبا

و أنوم في السهله بره
أنبطح في اي كنبه

عشان اوفر كل مالي

و أبقى صاحب عمله صعبه

و أشتري فرفور * مدنكل ........ *(بيجو 404)
خلفه اربط طرمبه

و اسوى البيجو تاكسي
و ارب العاصمـــة ربــا

و اعلق في التكسي يافطه
تلقى جنب اليافطه لمبه

هذا تكسي خيري
للعاوز فيه ركبه

هذا تاكسي خيري
عاملو وقف للأحبه

للعمرهم ما بيقولوا تآآآكسي
الخشمهم مقفول بضبـــه

الملاحم ديمه و يكه
البحلوا بشاي و كمبـــه

مستعد طرح القماير

و للكلاكلة الفيها قبه

و برضو لي زقلونه بمشي
مين عندو في زقلونه رغبه

ماني واعد اي واحد
ما بنوم في الشاطئ حبه

التنك مليان لي أضانو
و اللساتك الخمسه بمبه
EveryThing is well and Right

لا كاسره ياي و لا فاكه ركبه

إتهمهمت في الكلمة
و إترددت مليون مره

بخاف المحنه و الزره

لساني خفيف
وقلبي رهيف

أكان قالت لي
مساء الخير
يقرب يقيف
براي يوم داك
رميت نفسي
و سألت السمحه مخطوبه ؟

قالت لا و لكني ليه ؟؟

سمعت قولت ليه التقول بندق
و قلبي الماسكو بين إيدي
قنب يدق
حلقي نشف
و ريقي يطق
حسيت
كأني في حق

إتململت في القعده
و بدور أمرق

كان تاني قالت لي "سؤالك ليه"

راسي كبس
و كلامي الراصو
طار مني و عقلي إتربس
أتراهو الخوف ده ما بندس


قريت الحمدو خمسين مره
حتى قدرت أتنفس


و قولت ليه هي ساكت بس !

ختيت جزمي بالقلبه
و بديت البس

و عاد السمحه قالت قر

و انا السجمان
رغم الكولر الضارب
أحس بالحر
أدور أنجر
ذي غرقان طلع في البر

حاولت اقول باي باي
لقيت خشمي
بي كماشة ما بنفر



===============================================


و كمان :


تلفي يمين أجيك بشمال
تلفي شمال أجيك بيمين

تمري امام ، اجيك بالخلف
تمري خلف أجيك باك ورد

و ياني صعب
و ياني كعب
و ياني الما مفارقك تب
و ياني اللصقه ماسك كب

و ياني الحقنه بت الكلب

بسهر بعيد عنك مجافي الناس و متلوم

عشان ما ليكم اتودد

اقول اقدم علي داركم
أخاف من شوفتك اتردد

هلاويسا تشد قلبي

دي لا بتتحاش
و لا بتتلم
و لا بتتحد

أدق الباب
و أقيف جنبو
وقوف الضيف و اترصد

تجي فلانه
تفتحو لي

يقول ليك كررررررررررر

و راك الباب يقول ليك صرر

و طق إنسد
قول الليله يا بختي
أظن الليله يومي سعد
أشوف الاصلو ما بنشاف
أشوف القمره إتجلت
و إتجلت ، و إتجلت و إتجلت و إتجلت ......(20 مره)
و فات الحد

بهر عيني جمال الزول
زوق الزول
غلاوة الزول
حلاوة الزول
و دل الزول
و دلال الزول
و جمال الزول
و كمال الزول
و آآآآآآآآآآآآآآآآخ يا زول




أفكر أقوم ،
تقول لي :
لا لا
ما تمشي يا محمد
يعطر جوي ريحه الند
و زولك و قعد
و إسطورة ابو الدرداق
بقت جدد

أبحلق عينيا
زي زولا
غرق في عبادتو و إتهجد

أعض طرفي
و أقرأ الفاتحه في سري


أقول يا فلانه
أريت عين الحسود تنقد
أكان شافك
و بحلق فيك
و ما أتشهد

قرار العبوس الدنيا دار اللوم
زايله و خربانه
أم بناين كوم
يبكنو البنات
في جامعة الخرطوم
ما حضر اللكاشر
و ما شاف المدرج يوم
ما بين النشاط و الجنكشن
تلقهو يودع في بلوم
و يرجع معها بلوم

و زايله و خربانه
أم بناين كوم

في نص النشاط
ياهو سيد القعده
يحلل في المواقف
يفكك أجعص عقده
و إن شاف في النشاط
واحده زي الورده
تمسكو أم هلا هلا
تجيه حمى و وِرده

و زايله و خربانه
أم بناين كوم

غنو و شكرنو
الليله يا حلوات
أستاذ علم الخلط
ما بيفتش الواسطات
دفان الجنايز
و مكفن الميتات
الطب تبكي ليهو
الفاتحه في شمبات

و زايله و خربانه
أم بناين كوم

في الحفله قاعد
حولو البلوم كيمان
في الكوره عامل
شكله في الميدان
في السياسة
إشتراكي
بيأيد الأخوان
و إن قلت القرايه
دايما يقول زهجان

و زايله و خربانه
أم بناين كوم

ما إتلفت وقف
قال المراجع وين
ما كاتب سطر
ما حفظ حرفين
في بصات الرحل
أول الناطين
و إن جات سيرة السكر
تلقاه زي الطين

و زايله و خربانه
أم بناين كوم

يا سيدنا العميد
أديهو أخر chance
ما زولا مفرفش
بيحب الخلط و ال Dance
بس ذنبو إيه
أصلو البلوم عتراسو
من تبع البلوم
رافدنو مافي مناص

و زايله و خربانه
أم بناين كوم

الطيب علوم او شيخ البركس اشتهر بتحوير كلمات الاغانى / المدائح و تحويلها الى حلمنتيش من اشهرها قصيدة ( واجب الأوطان داعينا نداب ليل نهار نعمل ونبذل كل مساعينا الخ)
فصارت :واجب التربيت داعينا
نخلط فى النشاط سوسن و فى الجنكش كمان دينا
نركلس وكل يوم فى هجيجواخرتا تتعمل فينا *
او المدحة المشهورة ( قالوا الحجيج قطع لى نور البقع ألخ)
فصارت عندو :
قالوا البرلوم انخلع
فى الاكسام هول وقع
حماهو الاكسام منع


** دا الاتبقى فى الذاكرة من القصيدتين بعد سنين الاغتراب الطوال

في السياسة
إشتراكي
بيأيد الأخوان
............................................
يا ربي دا يكون صاحبنا المحامي الكان شيوعي بعدين
قلب بقى مايوي ، ثم سلخ جلودو كلها وصار إسلامي ؟

آهاااا يا عمار إنت كده استحقيت ( لقب ) ......
عندنا أمير شعراء حلمنتيش ، وإمام شعراء حلمنتيش ،
تجتمع الجمعية العمومية تشوف ليك لقب ....

كل الود عمار

** دا الاتبقى فى الذاكرة من القصيدتين بعد سنين الاغتراب الطوال
..................................................................................
ماااااا قصرت يا يا أبو اللمين
لا تحرمنا من طلاتك يا أمير

كل الموده

سيد الدار وضيوفه الكرام

سلااااااااام
بوست خفيف الظل حبيت أشارك فيه بنص حلمنتيشي خاص بعنوان ( في درب الريد ) :

في درب الريد
كم شاققت واتفولحت كم غنيت
كم مقلبت كم ضحكت كم بكيت
وكنت الفارس المنصور
أنا الشبّكت خط العرض وخط الطول
أنا الهباش أنا النهاش
أنا الختري
أصيد الهاوي شاقي الجو
واصيد الأرضي والبحري
أنوع في مطايب الصيد
أصيد البحبى والبجـري
مخازن فُل نكات بالكوم
مهذبة للعفيف وعديـل
مكهربة للبحومو الليل
شباب ورياش ورقة ولين
وخفة دم وقلة دين
دموع تمساح
تبكي الزينة والقاسين
غزال الجـن
دون ما يدري قلبو يحن
أرمّي حبالي في دربو وأقيف قدام
أمثل دور حميل مسكين
ويبدأ سـلام وراهو كلام
وكيف الحال وكيف عاملين
سلام يا أجمل الحلوين
سلام يا ناس ويا أناناس
صباح الورد والياسمين
وتسمع هااي
وتسمع كييف
وهمسة شوق وكسرة عين
وبعد شوية بيتكم ويـن
وبعد أيام
وييييين ليك مدة مشتاقين
ومشتاقين توصل شوشو للسكين
ويجي الشاكوش
يصنف شوشو في الارشيـف
وتبدأ القصة في التكرار
وكل عويل بدايتو هزار
يزين للفراش النار
وهاك ياصيد وجاك ياصيد

وفي ذات يوم نسايمو تهب
مكندش بي دعاش الرب
طريت الصيد
وشالني الشوق على سكة جِـدَيْ الريل
مدردح ماني راجي دليل
مسلح بي الخفيف وتقيل
مدى النيران يصيب النملة
ويتصاعد يصيد الفيل
وقولة تيت
جات الصيدة وجه جديد
عيونا تقول صباح العيد
بسيماتا ... تضوي الثورة والحلفايا
تدي الباقي لي باريس
وناس الكبكبة السبقوني رقدو القش
عيون زاغت ، رجول خارت
قلوب وقفت ، رؤوس طارت
مدحرجة في درب تاجوج
وكت ما بعومو شن وداهم يتشابو ويصارعو الموج
وجيتك يا صباح العيد
أنا الهباش أنا النهاش أنا الختري
ويادوب ما بديت بالبسمة قبل أقدم أوراقي
صباح الورد ما تميتا
سحبت إيدا .. صرت عينا .. لفتت جيدا .. قالت ... بِـسْ
تبسي كديسة يا تاجوج
عاملة عيونك الحلوات
أنا اب شنبات تقول لي بِـسْ
كما كُنتْ .. انسحاب تكتيكي لو ينفع
كحلت يمين لقيت شامتين
كحلت شمال لقيت وِسوِسْ
ومن يوم داك حردت الصيد
محل ما أقبِّـل أسمع ... بِـسْ


http://www.sudanpoem.net/members.php؟poem=341http://www.sudanpoem.net/members.php؟poem=341

سلامات الاخ ود المكي وضيوفك الكرام

شكراً علي البوست الظريف , قلنا ما نجي يدنا فاضية :)

للشاعر الدكتور محمد ود بادى (العكودابي)


يجيك الحول وحول بى زول والزول غول
ونحن ضهابة نحن تعابة لا نقدا ولا محصول
يا قشارة ما معقول يا فقاسة ما معقول عليك
عليك عرزينك المبهول تضربى الجملة بالميت قداحة فول
وعيشة تقول ضنيب ام سيسى عرض وطول
وجاز اللمبة فى غلبا وحق الفطرة للطلبة
ركوب التكسي بالقلبة
ولو ما الروح بقت سلبه نمص الصلصه من علبا
وكانت جاتنا فى الرقبة
دا كلو كوم والوليه ام العيلة كوم
الوليه الفنجريه حلاوة نبق الوليه الغجرية ودايره دق
البطن ديمه منفوخة طبق طبق يجبها الحول وحول بي زول
ومره تديها الهواده وترمى زى زولين زياده
الله اريتو الزول يزاول يا حكم صفر ده فاول
البطن بت اللذينة عايزة تعمير القبائل
واب شنب تعبان وعرقه يسيل جداول
يلحس الكوع رغم انفه وكان مزاول
وديمه يشبع فى البشاتن وديمه يشبع فى البهادل
شايله فوق الصفحه سوسو واحد الله
باليمين مقيوده سيسى مالو تانى
اب شنب شايل أمانى تلاتة بركه
وكل حركة معاها بركة فى البطن بنجوسها فرفر
والقطر بوراها صفر والله يستر
عينى باردة ومانى حاسد وربنا يتم المقاصد
والله ما شقالو حنكا ضيعو
والله ما سوالو طفلاً ماسقاهو ورضعوا
الا الرباية خشم بيوت والمعايش ماها توت
والمعذب اخير يموت
الوليد اكان مبرجل شن بسوى
زى كليب جربان يعوى يصبح والمصران مهوى
ويمسى والمصران مهوى لا يبهرج لا يضوى
الوليد كان يربى قوى عمله استرلينى سايره
يبقى صاروخ ارضى جوي
النجاح مو من كتير والبيطير من ارض جاعت كان اخير
والليلة جيتكم بى بشارة وقولوا خير
ربنا يخلى الخواجة عشان ما تقيف قدامو حاجة
إلا يرطن فيها حاجة
يا خلق يا عقل صبه تشربو الويسكى المعبا
وتلحسو الرز بالمربى
تبلعو عروق المحبة وتلدو كبه وراها كبه
عشان تقيف ماتاخدو حبه
حبة واحدة في جوف الولية
حبة واحدة مع العشية
والمصائب هى هى ...
لا بطوناً كالخيام ولا سمايه ولا كرامه
قد تقولون حراما .. لستُ مفتى ... ولماذا لستُ أفتى ؟!
شيخنا ود الشايقي خريج الخلاوى يكتب البخرة ويداوى
يعشق الماحى وطارته والمدائح وأبوكساوى
قافل اضانو من البلاوى إلا فى عرس وطلق
قد يجيب بعض الفتاوى ...
حالته ساتره ونص ُكم بيعه فى سوق السماسره
بيعه رابحه وبيعه خاسره
وهو حامد متشكر ليس ملحد منكر
يمشى ما بين السرارى ونساوينه الحوارى
لا تغيب عن قلبو ابداً
حاجة سعدة لجنة خردة حاربت فى المهدية
ثم آلت لجلافط وكراضم عن قريب ستزور الأبدية
وأحيلت للمعاش فاراحت واستراحت
ثم تأتى سعدية وهى رهن الخدمات
ومفاخر ومباخر وعيون فاهمات
تعرف الوقت المناسب لتحاسب وتحاسب.. ليس فى الدين حرج
آخر العنقود ليلى اصغر الزوجات ليلى
شيخنا ودالشايقى افلح اشترى ليلى مكعكع فتصلح
وتصبين وتنحنح وهو شيخ فى هجيع الليل يمدح
يا ليلى ليلك جن معشوقك أوه وانى
وتجيب المدح ليلى وتغرود غير هدنه
وتزيد الشيخ قرباً قاب قوسين أو ادنى
أنها دنيا المطالب بأسم ليلى من يطالب
ذات مره والممرات كثيره
شيخنا صلى الشيخ الصبح نافلة وبآيات قصيره
وتحوقل وتعوذ ودعا الله بأن لايتجوز
وتشهق وتمنطق وبراس السبحه طق طق
ومضى يتلو الكتاب ...
مر بالمال والبنون فتبسم وترنم
وبآيات الطلاق تجشم وتعثم
وإذا مالاقى مثنى وثلاث ورباع
وقف الشيخ طويلا مثل فحل الضباع
وبكى وهو يرخى من حبال وتريه
وجرى دمع الزراعة المطرية
وقال اين منى زوجة بكرا فتية
اين منى المحلبيه ؟ اين منى السرتيه ؟
فى نقاء كبحيرة طبرية
ودعا الله عروسه ...
وخرج يحشش بعبايه وزناد وكدوسه
خطفها خطفها
جاب ضحية هايله ومذهله
جزار وفالح فى تجارة القرصنة
خلف الكراع فوق الكراع وكدوسو زى المدخنه
بالكفتين زى الخشب حرق شباب السوسنا
وتفوت سنه وتمر سنه وشيخنا عجز وانتنى
بقى فى الحرد والطنطنه وهو ذاتو عجز وانتى
شيخنا يا شيخ السجم خلف زرازير السجم
واحدين اساميهم عرب واحدين اساميهم عجم
بدأ بمحمد ثم زوجات الرسول العشرة
وكل الذين تجمهروا فى البيعة تحت الشجرة
طلحه الخير والزبير ثم سعد وسعيد
ثم ستة مبايعين ، كمل اسماء الصحابة والتابعين واتباع التابعين
ثم عبد مايشاء من البنين
عبدالرحيم عبدالمعين
ثم تفنن في القوافي وتبحر في تراكيب المضافي
سيف الين وسعد الين
شمس الدين وقمر الدين وقمر صناعي الدين
وعاد لامتين
ثم سمى فى الختام
عبد مالك الملك ذوالجلال والإكرام
الراجل تقول مسحور وما بخليلو مرةً بور
وزرعتو ما بتقع واطه
بقت الطلبات بالدست حتو درج الخزنة حت
الوليه تنبح كان أصبحت وان كان مست
خرائط ولفايف ومحزق ومنمق أنها نكبة روما والمتمه
إن طعم العرس حلو ولذيذ وهو كاسات افراح ونبيذ
ثم تأتى انتفاخات القرنتى وبطاناً كالنتمتى
لا يقاوم بالدي أن تي
هي تصرخ حنى حنى ... وتتى تتى ....

قصيدة من ديوان الفلس للحيزبون الطرابيشي:

أسكُ الشغلَ كدارى
وجيبي فارغً عارى
وشمسك يا سما الخرطوم
كالكرباجِ كالنار
تجهجهنى .. تبهدلنى
وتربش كل أفكارى
...
شهاداتي وأوراقى
حشوت بها المظاريفا
ورحت بها هنا وهنا
فما جادت بتعريفة
فارجع خائبا للبيت
كالمهزوم مكسوفا
وألقى الأهل قد مطوا
من الزعل الشلاليفا
....
ألا يا امنا الخرطوم
يا اما بدائية
كرهت شوارع الإسفلت
استوبا وصينية
دخلت مكاتبا للشغل
أهلية وحكومية
فما رقت قلوبهمو
وما جادوا بماهية
....
سأصبر صبر أيوب
على الآلام والفلس
وأسعى للمكاتب لا
يثبط همتى نحسى
غدا أغدو سكرتيرا
وأسترخى على الكرسي
وأطلب ما ينعنشني
من الليمون والبيبسى
سكرتيرٌ له ظلٌ
يرود مواقف التكسي
غدى يا مرحباً بغدى
تعال فقد مضى أمسى
وداو الجرح في جيبي
وطمني على نفسى
لأني من مشاويرى
شبعتُ بضربة الشمس
وأصحابي تحاشوني
كرقم مهمل منسي
.....
القصيدة الجاية من ديوان الفلس ومطلعها:
سلوا جيبي غداة بلى ودابا
لعل مع القروش له حرابا

الأستاذ منان،تحية طيبو لك و لصاحب البوست و كل الزوار

Quote: سلام اخى محمد فضل اللهالعبد لله من مؤسسي هيئة حلمنتيش العليا في جامعة الخرطوم عام 1971وعملت تسبيك لشعارات تقديم بعض شعراء حلمنتيش ومنهم الدكتور احمد الأمين (المتجهجه الأممى)

سمعت الدكتور لأحمد الأمين (المتجهجه الأممي) قد ذكر في حلقة تلفزيونية قبل عدة سنوات، ذكر أن قيام هيئة حلمنتيش كان بعد أن إستضاف المنتدى الأدبي لجامعة الخرطوم في عام 1971 الأستاذ الشاعر النور إبراهيم (أمير كتيبة شعراء أمدرمان) في ندوة موضوعها شعر هجاء الأخوانيات. حيث كانت مجموعة من شعراء أمدرمان قد كونوا ما يعرف في أربعينيات القرن الماضي بكتيبة الشعراء و نصبوا النور إبراهيم أميرا له.

قال دكتور الأمين بعد نجاح هذه الندوة جاءتهم فكرة تكوين هيشة حلمنتيش الكبرى.

المرحوم الأستاذ النور إبراهيم هو جدي لأبي، لذلك أرغب إذا كان عندك أي معلومات عن تلك الندوة أن تتحفنا بها.و لك شكري و تقديري.

عماريس النور إبراهيم

الأخ ود المكي
شكرا على البوست الظريف ده
فقد فتّح العيون على جانب جميل من الحياة الطلابية و إبداع شبابي و طلابي عميق.‏
إبداع اخترق شعاعه خارج أسوار الجامعة ليتناقله الناس في دعشة وتجاوب..‏
‏ و هو نوع من الفكاهة الراقية التي تتفوق على فكاهة النكت القبائلية السمجة الذائعة الصيت هذه الأيام. ‏
يعني فرق كبير. ‏
و رغم أن هؤلاء الشعراء من مختلف التخصصات و لم يكونوا مقتصرين على كلية الآداب..
... إلا أنهم أظهروا ثقافة و ‏تمكّن من اللغة الفصحى و العامية و من أسلوب النظم الشعري الجيد و المبتكر.‏
التحية لهؤلاء الشعراء الأماجد و لسيرتهم العطرة.‏
و التحية لك و لجميع المتداخلين

نور الدين منان

الدعوة موجهة ليك كي تزورنا وتطل علينا في البوست :" اجمل إمرأة سودانية ، وتحدثنا فيه عن نجمة مشهورة في عهدكم في جامعة الخرطوم

، وهي النجمة ام ضنب، وقال فيها شعراء حلمنتيش ما لم يقله قيس بن الملوح في ليلاه ولا عنترة بن شداد في عبلاه..

.ويسعدنا تشريفك لنا بهناك..

مع وافر الاحترام

الابن عمار بس النور سلام
يا اخى جدك الشاعر الفكه الراحل النور إبراهيم كانوا يسمونه وقتذاك بأمير الكتيبة أى كتيبة شعراء الفكاهة فى السودان ولابد أن ورثته يملكون روائع شعره.. وكنت كغيرى اتوقع ان يكون شعره محفوظا ومنشورا ولكن للاسف يضيع عمل المبدعين فى بلادي اولا بسبب اهمال الوراث اولا ثم الأصدقاء والمعجبين.. يمكن تلقوا جزء عند استاذ والريح ( حساس محمدحساس )

الأستاذ منان،
الحمد لله لم تضيع أشعار جدي فقد نشر في حياته ديوانه بعنوان (الكتيبة) وقد أعدنا طباعته في دار النشر قبل عدة سنوات.
أرسل لي عنوانك في الخاص و سوف أرسل لك نسخة منه إن شاء الله.

كما أن لجدي أشعار كثيرة نشرت في الصحف في الأربعينيات و الخمسينات. وقد عرفت أنه يمكن الوصول لبعضها في دار الوثائق.

هل تذكرت الندوة التي أشار لها دكتور احمد الأمين و التي أستضافت جدي ثم ألهمتهم بعد ذلك لإنشاء هيئة حلمنتيش العليا.

نعود إلى الحلمنتيش:

المتجهجه الأممي يتغزل في بت سستر :


أنا العيان
حرارتي الضاربه في متين
و لا بنفع بخور تيمان
و لا بتنزل بي نوفلجين
رقدت سنين

سريري تعب
مركب في وريدي درب
جحر عيني
يدخل فارة أم سي سي
أجر نفسي بالسيسي
تقول مخنوق
مصنقع فوق
و كل ما يوم
بيشيلو الدم
يذيدوا الهم
يقولوا مقاسوا طالع كم
و طالع كم
و انا الساكت وغالبني
محل ما اشوقك أتكلم
و ما بسلم
و حاتي البلي و الشمبر
أكان قمت بفع في السلم
أتكسر
عشان تظهر
تمر بي سراير العنبر
و تأخد نبضي بت سستر

عيونا الذي عيونا براها
تطعن بالإبر مرضاها
و إبره ريكو في منديل
و ما بتتعب
تكركب في البلاط كركب
و قلبي يدق
يسوي رب .. رب
و نارو الليله تتعلب
ده عنبر كم ...
و شايل كم
و دكاترتو كم ... و فت سستر
حايمه براها في السنتر
تجهجه في خلايق الله
و أنا العيان
حرارتي المابيه تتدله
أدوش دوشه
أهضرب هضربه زولاً
رقد في برش
و خته رويسو في بنبـر
و لمن الناس تقول هستر
و تتغالط:
أظن هستر !
أظن دستر !
أظن باميه و أظن كستر
أظن شيزو ... و أظن أكتر
أدق الطار و أتحكر
أدوبي ... أشكر السستر
و أوصف في بنات آوى
كضب كان قالوا بداوى
و آخر المداوه الكي
و ما أظن ذاتو ينفع في

أتوه كل ما العيون ترمش
و كل ما السلسلة تكش كش
أزوق أضاره في الكلدور
أخضر لابسه بقت نور
و خاته الكاب على جنبه
و راشه الريحه فايحه زهور
تموت كرعي
و أقع و أزحف وراك طرطور
عشان أرتاح
عليك الله ....
تفجخي راسي بي ساطور

تبكي الزينة والقاسين
غزال الجـن
دون ما يدري قلبو يحن
أرمّي حبالي في دربو وأقيف قدام
أمثل دور حميل مسكين
ويبدأ سـلام وراهو كلام
وكيف الحال وكيف عاملين
سلام يا أجمل الحلوين
سلام يا ناس ويا أناناس
صباح الورد والياسمين

أولا تشكر يا سنجاوي على المعلقة الحلمنتيشية دي .. فيها كلام حلو
شديد زي الفوق دا .... دا كلام يدروخ عديل كِده ..
ما تغيب كتير سنجاوي ، وسلامي لناسسنجه عبدالله إن كنت أنا فهمت صاح

كامِل الوُد

سلام ناصر
ياخي ود بادي دا زول مختلف ..ما تقدر تلقى ليهو لقب
إلا دكتور الأصلا هو جدير بيها

وجاز اللمبة فى غلبا
وحق الفطرة للطلبة
ركوب التكسي بالقلبة
ولو ما الروح بقت سلبه
نمص الصلصه من علبا
وكانت جاتنا فى الرقبة

شوف الكلام دا منساب كيف !!
إنت وأستاذنا ود بادي ربنا يديكم العافية
وإنت غيب وتعال

احترامي

.
أها يا سعادة السفير بعد كِده حنناديك بإسمك بتاع جماعة حلمنتيش
في جامعة الخرطو( الحيزبون الطرابيشي )

غدا أغدو سكرتيرا
وأسترخى على الكرسي
وأطلب ما ينعنشني
من الليمون والبيبسى
سكرتيرٌ له ظلٌ
يرود مواقف التكسي

ناس الزمن الجميل ... الطموح سكرتير وكرسي وقزازة ببسي وتاكسي طرحة
نحن في انتظارك سعادة السفير

احترامي

.
ومعك اخي ابو عبدالله أحيي تلك الكوكبة الرائعة
فقد أثرى شعراء ذلك النظم الجميل أمسيات وليالي الجامعة ،
وتنوع بين الفكاهة والنقد والحب وغير ذلك مما له علاقة
بحياة الناس.
لك تحياتي استاذنا محمد عبدالله
مع كامل التقدير

يا عبدو عيب
(أيقونة شعر الحلمنتيش)


في الليلة ديك
القصة ذاتا بقت عليك
ياعبدو وادوك الشريط
يوم قلنا ليك انضم معاها وكلما
ابيت تسمع كلامنا بقيت لميض
قلتا احسن اكون تقيل
انا ما جميل
باكر بعد باكر بكهربا ليك بي نظرة قتيل
وبقيت تقيل لامن سقوك موية الغسيل
وقعدت يا زينة الرجال
كهربجي قال
يوم جيت تلفلف زي زمان
وتباري بقعور الشجر
كايس كراسي الخيزران
والبت تجي وتمشي وتلف و مرات تقيف
يا زول معاها ولد حريف
صاحبنا بالاحساس عرف
وسألت والناس كلموك
ملعون ابوك دنيا ام قدود
بقت.. البقت
وقعدت في شارع الظلط
تبكي وتجعر
والخدود اتورمت
ضهر القميص
كم القميص .. يد القميص
حتى الفنيلة اتشرطت
يا عبدو عيب
قوم يا خي صلي علي الحبيب
يا اخوانا لا انا داير اموت اقع البحر
انا بنتحر
يا عبدو عيب الدنيا حر والموية بتسخن عليك
تلات ساعات كاملة زولنا يسب ويكيل
ودموعو تتخرخر تسيل
دموعو سايلات بالكفوف
وشرايطو تلمع في الكتوف
بقى فيلسوف
في كلام عن الدنيا ام قدود
وعلاقة بين يوم السبت وعين الحسود
ومقارنات بين الجمال والجهل وسوء الاختيار
قال..شينة.... قال
قال شينة..... قلنا كلام صحيييح
وخطيبا.... زاتو ولد قبيح
وكمان سنيح
دا كلام صحيح
بس ياخ قوم
الواطة صبحت دارين ننوم
قام تاني جاب سيرة البحر.

.كوستاوي مشكور على هذه المشاركة الدسمة ... قالوا
ود عماري نمرة واحد ( فاشر أصلي ) بفضح الزول الما
متعود عليهو .
.
كتر من النوع ده
كامِل الوُد كوستاوي

وبمناسبة العودة النهائية للمغترب ، الشاعر ( المسحلِب الأشتري ) عامل شغل على
قصيدة المتنبي التي يعاتب فيها سيف الدولة ( يا أعدل الناسِ إلا في معاملتي ) ...

يا أظلم الناسِ دايماً في مُعاملتي
أنت الكفيلُ وأنت الخصمُ والحكمُ
أظُنــُّها نظــراتٍ منــكَ ظالِمــةٍ
أن تحسبَ الشحمَ في من شحمهُ ورمُ
أنا الذي نظرَ الدكتورُ في بدني
فظنــهُ هيكـلاً قد زانــهُ العــدمُ
فما انتفــاعُ أخي الدنيــا بِراتِبِهِ
إذا استوت عِندَهُ العِتّانُ والغنمُ
إذا رأيت أسنان الكفيلِ ظاهِرةً
فـلا تظُنَّـنَ أن الكفيــلَ يبتسِــمُ
إن جاءَ عُمالٌ وقد أبدوا تزمُرهم
فاعلــم بـأنَّ المُفنَّشــين هُــمُ
فاقْنَع بما قَسَمَ الرحمنُ من قِسَمٍ
وارجـع كريـماً لا يعتريكَ هَـمُ
أم العيالِ فلا تضعف لحُجتـها
بِجِلدِكَ أنجو لا يصيبنَكَ الهرمُ
ولا تحفل لِبوز الحُرمه إن مَدَّت
عِقدٌ وكِردانٌ فلا تنفـك َّ تبتسِـمُ
وارجع لوطنٍ كم تسمو مكانتهُ
فـوق الثريــا فـلا غَـمٌ ولا نـدَمُ
ولا تأسى لمنصِب كُنتَ شاغِلهُ
فالرِّزقُ مقسومٌ وكلاً عندهُ قِسَـمُ

.
رغم معاناة الناس عندما يندر الرغيف ، وتتمدد الصفوف أمام الأفران ، إلا أن
هنالك اشراقات تطل من بين هذه الصفوف 11
خلونا نشوف الشاعر الحلمنتيشي المتجرِّس الواتسابي عمل شنو ....

لاقيتا في صف الرغيف ..... بِتلالي ترقِش جوهره
مرات تزِح مرات تقيف ..... والبِّـت تنقِّــط سُــكرا
ظاهِر عليها أثر تعب ...... والصف أكيد هو الفتَّره
مشيت على صف الرجال.... وشمالي واقفه السُّكره
سبحان رب العالمين ....... أبـدع جمــاله ومنظــره
كل الجماعة نِسوالرغيف..أما العيون كادت تفارق محجره
الجوطه جد ما في الرغيف..طه زِح يا بلَّه ارجع لا ورا
خلينا ياخي نشوف معاك ... يا حـاج كفاهــا بِتسحره
لو مره تايه في الخدود .... رب الجمال هو الصوره
بالصدفة من غير ما أحِس .. ودواخلي فايره مُعكَّـره
عينيها وقعن في عيني ..... ما عيوني طشش منظره
ريقي اللئيم أبــا يتبلِــع ... فرمــل في حلقي وإفتـرى
العيش خلاص يادوب نِجِض .. قبالو قلبي أنا انهرى
خلقوها آيه من الجمال ... باقي البنـات سِـفُّـو الثـرى
حوريَّه في هيئة ملاك ...... من لـم يراهــا فلـم يَــرَ
قرَّبتَ منها شان اشوف ..عينيها نعسانه ونُعاسه مِفَتِّره
جاني النسيم شايل العِطِر.. من غير عِطِر هي مُعَطَّره
شالت رغيفه وغادرت ........والنــاس تعايـن لا ورا
من غير شعور انا قلت آه.. .. تاري الجمِِاعه مُكسَّره
لو الفرن من غير صفوف ... حالِف أسوي مظاهــرة
نعمل صفوف من غير رغيف ..وتقودنا أجمل ساحِره

والبت تجي وتمشي وتلف و مرات تقيف
يا زول معاها ولد حريف
صاحبنا بالاحساس عرف
وسألت والناس كلموك
ملعون ابوك دنيا ام قدود
بقت.. البقت
وقعدت في شارع الظلط
تبكي وتجعر
والخدود اتورمت
ضهر القميص
كم القميص .. يد القميص
حتى الفنيلة اتشرطت
..............................................
يعني يا أمير الواحد حتة مشاغلة بريئة تبهدِله بالصورة دي ؟
يعني غمزة عين خفيفة كِده تعتبر تحرُّش ؟
أريته علقة عدوك ههههه

أمير ماتطول الغيبه
كامِل المودة

ود المكي وضيوفه الظُرآف،
حياكُم الغمام .
في فترة من فترات المنبر رحل عن عالمنا بعض الزملاء لهم الرحمة
والمغفرة، وبعد أن إنقشعت سحابة الحُزن عاد المنبر للعكنيبة فأفترعت
بوست للذكرى علها تنفع أورد فيه الأخ صديق الموج مدآخلة غاية
في الظرآفة رددت عليها بقصيدة حلمنتيشيّة في إطار الإخوانيات،
أسمح لي ارفد بها هذا البوست الذي أعادنا للزمن الجميل، ولك وللجميع
مودتي .
ـــــــــــــــــــــــــــــــ
مدآخلة الموج :

Quote: شوف يازول انا المره الجايه بفرع ليكم الموت وبعدين بعد بكرى ينزل البوست بتاع الوفاة حا يجو ناس ود الصائم وهو يضحك يقول ليك وقد كان الفقيد ملء السمع والبصر وكان احسننا وكان دسم الاخلاق او دمث لايهم المهم بجو يشكرونى كتير كده وانا خايف اقوم اقول ليهم خلو الكذب يا ناس حمزاوى ودينق وشول اشوانق ووالعوض المسلمى ده ماانا وارجع تانى الى رقدتى الابديه. انتو مادام انا كده ماتقولوها لى وانا حى خلونى ادلع شويه واتغرغر ابقى مغرور يعنى. وبعدين الجكس يجى يقول ليك فايت مروح وين ما بدرى يامنقه شنو ياود الموج بالغت وقطعت قلبنا وكلمتنى هنايه السماعه وقعت من يدى لما ناس البيت اتخلعوا وقربوا يلحقو المرحوم. اها بصراحه الحاجه دى بترضى غرورى وانا ميت، رغم علمى بكذب البعض من الجنس اللطيف ناس طلعت بفستانى حق البيت الشارع وهى تكون اتمكيجت لايمانها من ما سمعت ببكاى ،وناس دايره اركب بص الكلاكله ركبت مواصلات سنار ولما رفعت راسى لقيت روحى فى ام بده السبيل ديل... لكن كترن منها،بتدى الحبكة بعد درامى وكان لقت ليها موسيقى تصويريه تبقى حاجه ما تخلص. وبعدين تجى قصص ناس الرياض تلقى الواحد خمسه شهور ماسمع صوتى يقول ليك تصدق امبارح كان بتكلم معاى وصوتو ماعجبنى سالته قال لى عادى كنت نايم وصاحى هسه والبقول ليك لاقيته فى سوق البطحاء وشايل ليه كيس قلت ليه دى الشيله يا ابو الموج قال لى قول كفن ياخى، تصدق لما خفت والبجى يقول ليك ليه زمن بهاتى بالسفر،والبقول ليك كلم امه من تلفونى ده والله كان بتكلم كان قال ليكم وودعه وداع مفارق وقال ليها اعفى منى.. ودالباوقه وغريبه يقول ليكم لكن مافاحت منه روائح مسك لكنه كان طيبا.لوووول وخدوم، واحدين ولا بعرفهم يقول ليك والله سفر لى اولادى وماكان فى حجز ولاشال منى قرش مع انه لو قال لى جيب الفين ريال لظروف البنت فى الجامعه كان دفعت ليه الله يرحمه ياخى،مع انو اكون شحدته حق علبة سجاير شحده وقال لى انت عارف الظروف والتذاكر غاليه وقسط الجامعه للبنت لميناه بى الله ويامين. اها وفى نوع كده خيالى يبداها ليك بى والله مازول حياة..ودالموج ابدا مازول حياة يا حليلو والله كان بضحكنا مع انو بكون قال لاصحابه وقتها الزول السغيل ده ما يحترم نفسه عامل نفسه دمه خفيف بالله دى مداخله يكتبها.. اها ديل ماعافى ليهم مفروض يكلمونى وانا حى كان اتثاقلت لان المؤمن مراة اخيه.. الرجاء الاخير يابكرى اخوى انا عافى ليك ماتسود المنبر يوم اموت املاه زهور وبوكيهات ورد وبالونات ملونه وكده.. احبكم مووووووووووووت،،،،

ــــــــــــــــــ
القصيدة :

Quote: هو برآهو قال. ما قلت انا ما يجوني ناس العكننة ما يجوني ناس الفلسفة ما يجوني ناس الشفتنة انا أصلي حالتي مبشّتنة لا عندي مصدر، لا دليل هو برآهو قال زولاً سغيل ما تجوني تحموني المقيل انا زول نحيف ما فيني حيّل وما عندي حيّل للجهجهة ولكآك، وكآآآآآك ولغاغ وغآآآآآآآآغ والبهدلة... لو جيتو بس انا بستغيّل واحرد واشتت من هنا هو برآهو قال ما قلت انا قال ماهو حوض الموت، بيفرعوا لينا تب واوآت ينزّل بكري طرف البوست تشوفوهو العجب!!! يبداهو ود الصايم المطموس يقرقر ؤ منتشي ؤ يقعد يشكِر فيني ما يخليلي شي يا حليلو، كان اخلآقو دسمة وزول عديل امانا ما كان ود بلد راسي واصيل يردم يشيل فوق الدبَر يردم يشيل فوق الضهر يردم يشيل فوق الكتف يردم يشيل حاشاهو ما انهدالوا حيّل وحمزاوي يستلم الشُكُر حرّم صدق حاشاهو، ما كان زول فقُر وطول عمرو ما عرف الخنا ابكيهو يا بت الهنا الزول دا زولنا ؤ مِننا هو برآهو قال، ما قلت انا ما يجوني ناس العكننة وأخونا دينق عينيهو وِرمن بالبِكا قال الفقيد كان زول شِفِت ؤ مقدِدا ولمان تجوّط بيسدِدا وشول بهناك يبكي وينف وجنبوالمسلمي دار يسِف، والسفة بس باقيالوا شيّنة مع الأسف وآقف متوّز، ووشو منفوخ بالورم ورمان من الآم الفُرآق والقريفة ووجع الخَرم، ؤ مرحومنا قال: الناس دي ما كنت تشكِر من زماااان!!! خلاس إتلحسنا!!! وظهروا فاقدين الحنان ؟؟؟ والله غايتو جِنِس مِحن!!! يا الدنيا تب ماليك امآن فتناكِ يا دار العنا هو برآهو قال، ما قلت انا ما يجوني ناس الزهجنة والجِكسِ يكوّن في الهدوم ويوصِفن: يا حليلوصديق ابجِضوّم يا حليلو صديق ابكُضوم كان دِيّمة في المنبر يحوّم الليلة عآد كيفِن ننوم؟؟؟ يا حليلو شيال الهِموم الليلة ووووب قلبي انقطع ما قايلة جمل الشيل بقع!!! احيييييا مُصراني انفقع وناس سلمى بت الشيخ يجن متحزِمآت واميرة بِت الشيخ تكتِح في الرمآد وشغآلة تش: الليلة ووووووووووب ؤ بِت العجب جات طايرة شايلآها الهبوب، ؤ فادية بِت اليمني جآت ما مصدقة ؤ مِتجنِنة معقولة بس!!!؟؟؟ صدوقي يا ناس إتلحس؟؟! وين ناس حبيبا وناس سحس؟؟؟ احيييييييييي انا، يا ناس خلآس هجر الكنار زاهي الغصون سآب الغُنا؟! آآآآآآآآآآآآآآه يا انا... نار الهوى الوقادة والشوق والعنا حا يخلني اصبح مجننة آآآآآآآآآآآآآآآآآآآآآه يا انا !! سنة يا جنا هو برآهوقال ما قلت انا ما يجوني ناس الضهبنة هارون ديآب بالخُلعة وآقع كركرب!!! معقولة بس!!! الزول دا دقا لي قريب!!! ما عرفتو، صوتو اكان غريب؟ قُت ليهو: محتاج لي كشف؟ قال لي: من النوم صِحيّت ما حاجة تحتاج لطبيب، ؤ كوستاوي قال: لاقيتو في السوق الصباح شايلو كِيّس قُت ليهو، يا موج البحر، كِيّس الخدار؟ قال ليَ، يا زول قول كفن! بالله لمآن إتهجم! ؤ بِغِم كضم!!! طارق ولد جبرين، حزين يبكي ويوصِف: امانِي ما كان زول حنيّن وامانِي ما كان زول طرب، وزول دندنة! الليلِي عاد الزايلِي لفحتو مِننا!!! هو برآهو قال، ما قلت انا غريبة قال، الزول دا ريحتو فسيخ، فسيخ!!!؟ الباوقة قال، زول المعارضة. لا بُدَّ إنو يموت فطيس غريبة قال، لا كِنو كان زولاً عديل! الباوقة قال، يا اخ قول سغيل لو كان معانا، كان عِطرو هسا مِسِك يفوح والحُوّر عليو يطاقشن ؤ لجنّة الفردوس يروح. ابصلعة إتمحّن ؤ كضم قال المِرِق إنقصّا والبيت إنهدم، ؤ حمد لبد حصد الندم. ود المحرب يرثي قال: رحل اللكان شيال تقيّل البيتو كان مفتوح سبيل للدآجي عِز الهجعة ليّل ؤ للطاشي حار بيهو الدليل. ؤ مرحومنا قال: يا بكري، ختيني السوآد انا زول محنّة، وزول غُنى انا زول موسيقى ودندنة ود المدير، كاتلني مالك يا جنى؟؟؟!!! تتجازى شاحد ربنا انا جِدو في عِز الشباب وافراحي زي السوسنة. يا زول برآك جِبتَ الكلآم علي الحرآم ما قُلتو انا الزول دا هُو الجاب الكلآم والله يا ناس ما أنا... . . . ود المدير...

Re: صـديـق الـمـوج، قـال حـا يِـتـلـحِـس ... اشـعـار ود الـمـديـر مـع شـقـشـقـ�...زرآزيّـر ...Re: صـديـق الـمـوج، قـال حـا يِـتـلـحِـس ... اشـعـار ود الـمـديـر مـع شـقـشـقـ�...زرآزيّـر ...

حباب سيد الدار
وناس سنجة بسلللللللموا عليك

على أغنية ( ياريت ) لأستاذنا السر قدور والرائع كمال ترباس كتبت :

سألوني عـن حـبـي
أنـكـرت ما قـريــت
سألـونـي بـي ربـي
قلت الفسيخ بالزيت
بـالـزيـت .. بالزيــت
بـالـزيــت .. بالزيــت
* * *
حاولت ألقى فسيخ
واقـولـو يـا عـمـري
يا عـمـري
إنـت الحبيب للروح
لكني خايف أبــوح
يعفن وريحتو تفـوح
عشان كده إنطميت
كفايـة إنـي بكيـت
لما الفسيـخ قـام بي
زي التـقـول جـنـيـت
جنـيـت .. جـنـيـت
جنيـت .. جـنـيـت

تعبت آهـ آهـ آهـ آهـــ
تعبتاااا
تعبـت ألقـى فسيخ
ما سمعـو بيهو الناس
واحرك الأسنـان
بين الضنب والراس
جبت الليـمـون وبديت
أحلـب وأقـول يـاريـت
ياريـت .. ياريـت
ياريـت .. يـاريـت
لوكان فسيخي متاح
طعمو التقـول تفـاح
كان المريء يرتـاح
وأنا كنت بيهو رضيت
ياريـت .. ياريـت
ياريـت .. يـاريـت

هههههه
واللهِ يا ود المدير مداخلة ود الموج دي ذاته دايره ليها تصنيف حلمنتيشي ،
هي خرجت من سياق القصيدة لكنها اكثر امتاعا ، بس روحَه ونَـفَـسَـة حلمنتيشي.
بعدين ياخوي المعلقة بتاعتك دي ما ودتني المقابر وجابتني .... لقيت نفسي ببكي
وبتمَخَّت .. لمن زميل مهجوم كِده دخل علي المكتب قال لي ( الفاتحه على روحو )
في الوكت دا وصلت هنا :

ود المدير، كاتلني مالك يا جنى؟؟؟!!!
تتجازى شاحد ربنا
انا جِدو في عِز الشباب
وافراحي زي السوسنة.
يا زول برآك جِبتَ الكلآم
علي الحرآم ما قُلتو انا
الزول دا هُو الجاب الكلآم
والله يا ناس ما أنا...

حتى اتذكرت إنو ود الموج حي ..واختفى بعد مؤتمر المصالحه
هو وتراجي ... وتراجي شغاله ردَحي ساااااااي في الواتساب ،
الله يرُد غُربتُم..

ود المدير أمتعتنا والله .. ماتغيب كتير ياخ

.
لما الفسيـخ قـام بي
زي التـقـول جـنـيـت
................ أرقُد يافسيخ .. أنا جرابك

يا سنجاوي عرفتني كيف مُدمن فسيخ ؟
ماتنسانا من فسيخ سنجه
وشوق ومحبه لي أهل سنجة .. وكل المودة ليك

غيب وتعال

.
عمك عندو حاجتين عاملين ليهو وجع راس ! ديك متخصص في الشفع .. يوماتي
خامش ليهو شافع وعامل مشكلة مع الجيران ... الشي التاني عمك عنده تاكسي هلمان60
كل يوم يشاهد مجرور على المنطقة الصناعية .
عمك شاعر رباعيات ، وشعر الرباعيات والدوبيت لا يخلو من فكاهة وسخرية وصور
غاية في الجمال ... خلونا نشوف قال للديك شنو بعدين نمشي على الهلمان في المنطقة ..

مما قُمتَ فروج قُمتَ مكشوف حال
وعايـش عيشـة الهمباتـي والنشــال
أبوك أرقط مَنَسَّـل من جِداد كورال
حمراعيونك علاعلك مدلدلات وطوال

ريشك من مَكاتَلـةْ الديـوك مزعــوط
قلبك قوي ماك خايف الشَّكّل والموت
كبابي الشاهي بِتجيهِن تقـول اسـكوت*
مِكَسِّــر دستتين قُـبال تكـون كتكــوت

كم طرَّقتَلو السكين ونِجى من ورطه
وزاغ عند الكُّوش عارِفِن بالخرطه
شكلو قِيافه لون تاجو دهب البَّرته
قلبو مِقَتِّي عدم الهم وأكـل الكرتـه

مِتلك في الديوك ما لقينا مما عِشنا
عاقدين اجتماع لي ضبحتك ناقَشْنا
روعتَ الجهال عاتي وطبعك خشنه
لي يومين بجَهِّز في النظـام للكُشنه

وكِت المولى داير يقَصِّزِن أيامك
بِقيت بتشاكِل الناس البِّعَلُّو مقامك
خُفت علىْ عيون أولادي من أقدامك
صدر الليله يا التقيان قرار اعدامك

إتنين كيلو وزنَّك مِنَّهِن ماك أشــوا
وكل الشاهَدَك متمني فيك العَشْــوه
الصاج ليك مجهز وجِبنا رُز الحشوه
صدر قرار اعدامك وما بْتَحِلَّك رشوه

رتَّبنا القِعيده والجلسه قُبّــال تحمى
لابُد من النِّظام شان تِتْبَلعبو اللحمه
بِنقول يا كريم تكفينا شر الزحمــه
لا يجينا (فانوس) لا دفِع لا رحمه
.
الإسكوت نوع من (المدرعات)

وأدّى هيلمان 60 حقو كمان :

هِلمان سِتين لي مِتْلِي ماهو سِعايه
ما بِعشِّيك قَدُر ما تسوي ليهو دِعايه
كتير بيَّتني بين الكدرو والحلفايــه
يومي بروح بين البوبينه والكُبايه

يوم تلقاني بـي كِريـن الكوامِــر جــارُّو
ويوم في قوز رجب مِحلحِل حديدو وشارُّو
بدل ما يجيب لي يشيل مني قدر الصَّارُّو
يوم واحِد بَجُزرك وبعملِّي إتنين كارو

كم راكِب وقــع فيني سَب وشتيمــه
سنة ستين زمان كُنتَ صاحِب قيمه
اليوم احلف قسم اصبحت ما ليك شِيمه
تَحرَن وحيلك يبرُد كلما تشوف نيمه

تحياتي ود المكي ومستمتعين بالبوست الجميل..
..
أظني أخبرتك مرة عن حلمنتيشية سيد بشبش، وقلت لك سابحث عنها , ولم أتكلف كثير عناء فقد وجدتها في سودانيزأونلاين أنزلها من قبل الأخ مصطفى محمود..
وبعد الإذن أنسخها منه وأشارك بها معكم..
..

شعر: عصام السنوسي

سيد بشبش سيد بشبش
عامل حازم وسيفه بيرقش
أمره بيمشي وكفه بيطرش
وعينه الحارة في يوم ما بترمش

عند المكتب رسمي بيغضب
جوة البيت يرفس ويضرب
وسط أصحابه بيرقص ويلعب
راجل نكتة وصاحب مقلب
وآخر الليل يقابض ويهبش

سيد بشبش راجل دين وراجل دولة
وراجل خطوة وصاحب مطوة
وصاحب خولة وصاحب جولة
وبيني وبينكم سيد بشبش
راجل واعي وفاهم
فاهم فاهم
وعامل انه الواحد يعني
وغايتو وبرضه ولازم
بالمفتوح ده كلام سر
ما فيش واحد يمشي يسمع

سيد بشبش راجل دوغري
لكن في الليل هجيجه يولع
وزي ما تقول بحب المنقة
و الحاجات النايس ولظلظ
وقبل ما ندخل ونحكي القصة
لازم نعرف صورة بشبش

أصلع أسمر بادية عليه علامة النعمة
وعرجة خفيفة في حادث حركة
شكل سيادته عموما مدهش
ودايما شايل سبحة
تسبح وحدها دون تسبيح
أوتوماتيك
حكمة ربك وقسمة صحيح

سيد بشبش راجل
Urgent
Rich, intelligent
Smooth and elegant
But sometimes
And this is really
He appears slightly hesitant

وفي عصرية وكانت جمعة
سيد بشبش حكك دقنه وهذب شنبه
وشه بينضح نضرة ولمعة
طق عصايته وخت عبايته
وخبط الباب من خلفة برزعة
خلى البيت يتراجف كله
حاجة نفيسة بناتها ثلاثة
بالاولاد يكملوا سبعة

في المرسيدس أخذ القعدة
كدوسه البني تهبهب ناره
هز دماغه هز
يعني سيادته بحي في جاره
وعاد البنز قال يا ليل
وسط الشارع يلوي غباره

وأثناء ما سايق وسط السكة
كان بيدندن يعني بيمدح
دشكا دشكا دشكا أووو
دشكا دشكا دشكا

وأثناء ما سايق يغني ويمدح
وعينه الزايغة بتجمع وتطرح
هناك على زاوية لمح المنقة
سيد بشبش تمساح لو يلمح
قلبه ينطط جوه ضلوعه
يطق الروب يثكلب ويردح

لف ودور حول المنقة ودور ولف
رسم الزاوية وكشف المسرح
وبسمة أنيقة صناعة برة
بسمة ثعلب حنكة وخبرة
ما نتفاهم يا خلق الله

وعاد خلق الله ما فهامة وناس واعين
اشارة خفيفة وغمزة عين
عارفين الحال والأمر الواقع
كان الرد الفرح بشبش
وخلى سيادته يهدي يمين

مساء الخير آنسة مرمر
اسمك روعة اسمك سكر
أما سيادته سيد بشبش
رائع مدهش اسمك منعش
موسيقي ومطرب
بس خازوق الناس تتمقلب
وتمشي تقول لسيادتك شبشب
لا يا بت يا نكتة صنفك متعب

وهناك في شارع كم مش عارف
البيت الناصية أشجار وزخارف
عربات تتلاعب أنوار ورفارف
كانت ربة وهيصة تولول
ناس بتصفق وناس بتزغرد
وناس بتهلل
ناس بتنادي شيلي وختي
وناس بتغازل أموت يا أنتي
وناس مبسوطة غاسلة وكاوية
وناس ركاني بتعزف زاوية
وناس بتغني حني يا تتي

وسيد بشبش أمير الموقف وبطل الساعة
كان مشغول مع ناس مرمر
يصلوا جماعة
ولمن تم صلاته وسلم
قام يسلم بالأحضان
قال مشتاق وكاتلو الشوق في الحبان

وزي ما قلنا قبيل عن بشبش
راجل بهجة جد فنان
جدع العمة هناك وعصايته
ولحق جزمته والقفطان
وهاك يا دانص

ودارت حلقة عجاج وغبار
ناس بتسوي ردحي جد
وناس في الردحي رقيصها هزار
وناس انبطحت وناس اندرشت
ناس انكرشت عشان تنمد

وفجأة في لحظة حصلت كبسة
زي ما تقول البيت انهد
الجو اتلغم
فال اتسمم
وصل الكومر شكله يخوف
نزل امباشى معاه الأورطة
عملت سد وجاط الموقف

سيد بشبش ضرب اللخمة
ربط الساعة مكان الجزمة
لبس الجزمة فاكرها عمة
لف العمة محل الساعة
جذب قفطانه رمى الشماعة
فكر ينط من فوق للحيطة
تلب توف جوه البلاعة

جوه الكومر بالبوليس الناس شحنوها
البتباكى والبتوجع والبتعذر والبتشفع
الضحكات باهتة
وفي نص الكومر
كان متمحن سيد شبشب
ماسك سبحته
مرة يقحقح ومرة يسب
مشغول بأولاده وحاجة نفيسة
وناس المكتب
كيف القصة هناك بحكوها
وكل ما مرمر تبسم ليه
يسب للمنقة ويوم زرعوها

يا مية هلا وألف مرحب بالأخ العزيز أمين


وفجأة في لحظة حصلت كبسة
زي ما تقول البيت انهد
الجو اتلغم
فال اتسمم
وصل الكومر شكله يخوف
نزل امباشى معاه الأورطة
عملت سد وجاط الموقف

عصام دا كتب عرضحال مفصل عن حالة عاشها في مرحلة يطلق عليها بعض العارفين
( الجاهلية الأولى ) بس أنا ما عارف التانية بدت وانتهت ولا لسه ... على العموم
عصام دا ركب الكومر..

كل الوُد امين

شاعِرة الحلمنتيشية المجيدة ( سحر ) ننقل من صفحتها بأحد المنتديات :

..........صفحة في دفتر مذكرات بايره

يوماتي إيدينا بنرفع ..... والعازِب كُلو بيسمــع
ما أصلنا ناس محتاجة ..وليك يا خالِق نتضرَّع
شِعارنا عريس متواضِع ...والماسامِعنا اليسمع
نِحن البايرِكس في لهفه ..والعُمرِ بيجري يودِّع
نِحن كويسين يا جماعه ...للسُتره نفتِّش ونطمع
لو واحِد قالوا اتقدَّم .....نسرِع بنخاف ما يرجع

دي بلاش عربيه خصوصي..مالو الكداري دا هسَّع
وكمان ما حِنينه الركشه والإيد في الجيب ما بتوجَع
وبلاش من شبكه وشيله....... بي أبسط حاجه بِنقنع
ما شرطِ يجيب تلاجــه ....... دا كِفايه الزير البينقع
البيت ما شرطِ عماره .....دي مظاهِر ساكِت تخدع
أوضه وبرنده كِفايه ...........جمــال وأناقه وأروع
بِنحوِّلو جنه صغيره ...........أجمـل من فيلا وأمتع

ما دايرين كِبده وشيَّه ......بي طماطِم ودكوه بِنشبع
أحلامنا الكانت بدري .......مــا عـادت تـاني بِتنفـع
وشبابنا الكان عِشناهو ......مــا مُمكِن تاني بيرجـع
مطلبنا عريساً أغبش .......قميصـو وحيــد ومقَطَّـع
دايريـن الفيهو الفايــده..........للمطلــب دا بِنتطلَّــع
السُتـره أملنـا وزادنـا .........يا ربنا عَجِّل واجمــع
كُـل يوم تزداد آمالنـا .......ونشيل في إيدينا ونرفع

التحية والأشواق للصديق بروفيسور عبدالفتاح يوسف (الكباس بن العسعس) زميلنا في هيئة حلمنتيش العليا وأحد مؤسسيها وهو يقول:
قال الكباس بن العسعس وقد كان قادماً من منزل سقراط:

قال سقراطُ في جُموعِ حيارى:
(منطقُ الناسِ يُشبٍهُ المَنَفلّةْ
رحِم اللهُ كالكديسِ رجالاً
فلسفتهُمْ صارت لهم عُلعُلّة
يزرعون الصخورَ من غير ماءٍ
والأكاذيبَ صيَّروها أدِلّة)
قال ما قال والجموعُ حيارَي
وسؤالٌ في كلِّ خشْمٍ حَلَّ
(ما فهِمنا مما تحدَّثتَ حرفاً)
قالها شافعٌ بوسطِ الشُّلَّة
قال: (فافهم أوِ اتركِ الناسَ تفهمْ
ليس يفهمُ مرمايَ إلا القِلّة)
هرجٌ سادَ بعد صمت طويييلٍ
والعكاكيزُ في السماءِ أهلّة :

(ما فهِمنا مما تحدَّثتَ حرفاً)
قالها شافعٌ بوسطِ الشُّلَّة

ههههه
كلنا مافهمنا حاجة سعادتو منان .. دي ذكرتني حكاية الشافع
القال ( أنظروا ملكنا العريان )
التحية للبروف الكباس ابن العسس ، وكل المجموعة الجميلة
في هيئة حلمنتيش العليا الذين ادخلوا البهجة في ليالي جامعة
الخرطوم ، التي كانت تعج بالليالي السياسية ...فكانت كسراً
لذلك الروتين

والتحية والتقدير لك استاذنا منان ، ونعلم أن في ( جرابك ) الكثير
من الروائع التي حفلت بها فترتكم تلك الرائعة .. فلا تحرمنا منها

كل الإحترام

كان شهر مارس بعبعا لكل الطلاب حتى أسموه مارس شهر الكوارث وبالحلمنتيشي (شهر الكوارس)
وقال ألحيزبون في ذلك الشهر الملعون:
إكزامنيشن قد أتى
كرب دروسك يا فتى
شهر الكوارث مقبل
يا نوم تتركنى متى؟
يا نوم تتركن
يا نوم تترك
يا نوم تتر
يا نوم تت
يا نوم ت
يا نوم
يا ن
يا
ي...... شخير...خخخخخخخ
ونام الحيزبون وباقى من زمن الإمتحان سويعات.....
وصحا وفرك عينيه وقال:
الطالبات خطرن من قدامي
فجلبن موتى قبل وقت حمامى
يأسرن ذا اللب المنور عنوة
يا ويح قلبي من سهام سهام
خطرت تميس الخيزلى في رقة
رقصت لها قلبي وحول حزامي
يا ليتنى كنت الحقيبة مرة
لأرى بدائع خالقى الرسام
لأظل أشدو في البرالم ساعة
أنى رأيت حلالها وحرامى
لكننى لا أستطيع تحولا
حتى أصير حقيبة لمدام

وقال أحد جهابذة حلمنتيش المهذبين في ذلك الزمان وهيئة حلمنتيش العليا ترفع شعار مواجهة الرعب الأكاديمى والتجهم والعبوس الذي كاد أن يخنق الحياة العامة في السودان:

وأذكرها ومسواكي بفمي
الغلغ باسمها من غير صيبة
وأغدو للدراسة في صباحي
وفى رأسي تصاوير الحبيبة
بهم ضارب في أم رأسي
لأني كنت أسرح يا شبيبة
وأدخل والمحاضر قد تجلى
وأخرج كالحمار من الزريبة

نتابع

........................

تابع .......

قصيدة سيد بشبش للشاعر الراحل محمد احمد اسماعيل (بروفيسور جاغوم بن بلاع) وكان أحد أبرز مؤسسي هيئة حلمنتيش العليا وليس كما ذكر هنا الأخ الأمين عبدالرحمن عيسى بأنها لشاعر آخر اسمه عصام السنوسي... هذه سرقة أدبية خطيرة...

.
........... واحده بس

جلسا سوياً ذات ليلة مُقمِرة
غزلٌ وضَحِكٌ والحكايا مُدوره
قال الحبيب مُغازِلاً يا زوجتي
إني أراكِ فقيهةً متنوِّرة
غدت العنوسة في البلادِ كثيرةٌ
وقبيحةٌ وخطيرةٌ ومُدمِّرة
ولقد وجدت اليوم حلاً رائعاً
لو تسمحين حبيبتي أن أذكُره
قالت تفضَّل ياحياتي إنني
لِمشورتي ممنونةٌ ومُقدِّرة
فأنا لمشكلة العنوسة كارهة
محزونةٌ وكئيبةٌ ومُكدَّرة
قال الحبيبُ أيا ربيعة عُمرِنا
هذا كلامُ حكيمةٍ ما أكبره
لو أن كل رجالنا قد عددوا
لم يبقَّ من جنسِ النساءِ مُعمِّرة
فإذا قبِلتِ بأن أكون ضحيةً
وأكونُ للأجيالِ شمساً نيِّرة
فجميلُ فضلَكِ فيه أجرٌ طيبٌ
وجزاءُ من ترضى بذاك المغفِرة
ضحِكت وقالت يا رفيقي إنهُ
رأيٌ صوابٌ كيف لي أن أنكُره
عندي عروسٌ لقطةٌ ترجو لها
رجلاً ليسترها عزيزُ وتستُره
فإذا قبِلت بها سأخطبها غداً
قبل الفواتِ فإنني متأخره
هي لا تريدُ من النقودِ لمهرها
بعضٌ مُقدَّمُ ..لا تُريدُ مُؤخرا
فتنهَّد الزوجُ المغفلُ قائلاً
هذي صِفاتٌ رائعاتٌ خيِّرة
قالت عظيمٌ فالعروسُ قصيرةٌ
شمطاء عمشاءُ العيونِ مصغَّرة
وضعيفةٌ في السمعِ بل وكما لها
طقمٌ من الأسنانِ في لون الثرى
والأنفُ ..قال مقاطِعاً ويلي كفى
هذي عروسٌ قُربَ حافةَ مقبِرة
فتشاجر الزوجان حتى أصبحت
نارُ الشِجارِ معارِكاً مُتفجِّرة
واستيقظَ الجيرانُ فيهم خُلعةٌ
صوتُ المدام علا كلبوة كاسِرة
ورأوا الأثاث وقد تطاير في السَّما
صحناً ومِقلاةً كذلك طنجرة
كأساً وإبريقاً ومكنسةً .. كذا
سمِعوا استغاثة صارِخٍ مُتكسِّرة
قالوا أذاك هو اللئيمُ بحينا
قد صار رعديداً أكان مُزوَّرا؟
ذهب العريسُ إلى الدوامِ مبكِّراً
وكأنهُ شبحٌ ونازل عنتره
آثارُ معرِكةٍ تبينُ برأسِهِ
يدهُ إلى الكتف اليمينِ مُجبَّره
وبِعينِهِ اليُسرى ملامِح بُنْيَةٍ
كالهالةِ السودا وعينُ مُحَمِّره
وبِهِ رُضوضٌ في مفاصِلَ جِسمِهِ
فكأنما مرت بِهِ دبابةٌ ومُجنزرة
ومضى يقُصُّ على الرفاقِ بأنهُ
قد نازلَ الوحش الكبير وكسَّره
ضحكوا وقد عرِفوا حقيقةَ أمرِهِ
تباً فقد ظنَّ الحكايةَ مسخره
عاد الجريحُ لبيتِهِ مستسلماً
ومُعاهِداً أن لا يُعيد الثرثرة
قالت :
لإن في الحلمِ عُدتَ لِغيِّـكَ
فسأجعلنَّ لك الحياة مُكَدَّره
.
تحَسْبو لِعِب ..... آل تعدُّد آل

قصيدة سيد بشبش للشاعر الراحل محمد احمد اسماعيل (بروفيسور جاغوم بن بلاع) وكان أحد أبرز مؤسسي هيئة حلمنتيش العليا وليس كما ذكر هنا الأخ الأمين عبدالرحمن عيسى بأنها لشاعر آخر اسمه عصام السنوسي... هذه سرقة أدبية خطيرة...
____________________

الأخ منان لك التحية ، قصيدة سيد بشبش حقيقة نقلتها عن بوست سابق أنزله الأخ مصطفى محمود في سودانيزأولاين
http://sudaneseonline.com/board/140/msg/1185049194.html
وقد ذكر فيها أنها للشاعر عصام السنوسي فمعذرة إن كان مخطئا
..
( سيد بشبش ) ذكرتم أنتم أنها للراحل محمد أحمد إسماعيل (بروفسور جاغوم بن بلاع)، لكن لا أذكر أن جاغوم قد أنشدها بل أشتهر بروفسور جاغوم بقصيدة الإستيكة.. والتي أنشدها مؤخرا ( محمد الصراف ) في الفيديو في أعلى هذا البوست..
والتي تقول أبياتها..


تسمح؟؟
وكيف يا الحلوة ما بسمح
اصابعى العشرة تكتب ليك
وقلبى استيكة للغلط يمسح
يدوب بين اصبعين حلوين
يتوه وسط السطور يسرح
ولمن تنتهى الكلمات
يخش فى الشنطة فى منديل
ونمشى القهوة نتفسح
هناك عاشق يطيع سحرك
يجيب الفانتا شان امرك
تختى الشنطة فى حكرك
وقلبى الدايش وسط منديل
يسكلب ويقول يالليل
وجوه الشنطة يتمرجح

وترجعى تانى يا الحلوة
تلقينى راجيك هناك مصلوب
اشوف الناس طشاش فى طشاش
واقرا سطورى بالمقلوب
تقعدي
واعاين ليك تغمضي انتي
تعايني لي اغمض انا
اعاين ليك تغمضي انتي
تعايني لي اغمض انا

نعيد الكره من اول
اعاين ليك تغمضي انتي
تعايني لي افتح انا
تفري البسمه تضوي سنه

احك راسي وابلع ريق واتنحنح
واجر الكرسي لي قدام وارجعوا تاني وازحزح
واقول السمحه لو تسمح في كلمه
احسن نمشي في زاويه وركن ضلمه

تقول بسمح
تقوم السمحه تتلملم وتتبسم
وانا اتراجف ويتخمخم
وافرح وادق الجييك
واطق روري اب سووري
اعرج بالكرسي اوب سوري
ادقش الماشي اوب سوري
وجنب السلم اوب سوري

هناك في الزاويه نتقعد
ونستغفر ونشهد
ونشيل نفس ونتنهد

واقول ليكي
والله
وغايتو الزول
والحاصل وفي الواقع
وفي الحقيقه
اها ماقادر اقول ليكي

تقول هيادا وفيها شنو
معانا منو هقول يعني
وما تخجل وتتعقد

انا أتعقد؟؟
ازح جنبك ..ازيد الخلطة تسبيكة
واقول ليكى ..بى صوتا ندي ورائع
يفيض رقة ومزيكة

من فضلك... ونترجاك
ولو تسمحى..
ترجعى لى الاستيكة

>
واعاين ليك تغمضي انتي
تعايني لي اغمض انا
اعاين ليك تغمضي انتي
تعايني لي اغمض انا

نعيد الكره من اول
اعاين ليك تغمضي انتي
تعايني لي افتح انا
تفري البسمه تضوي سنه
.
يا سلاااااااااام ... ياخ البروف جاغوم بن بلاع دا لو قال إستيكتو دي وصمت لما
احتاج لغيرها لينال ريادة الشعر الحلمنتيشي ...
يعني .. أعاين ليهو واضحك واجري واجيهو راجع
ولا .. ياحسبو تعاين لي السكر قصبو تعاين لي
خيال واسع
.
غشيت قبره سحائب الرحمة

سلام اخى الأمين
شكرا على المتابعة. انا متأكد من أن القصيدة لبروفيسر جاغوم بن بلاع وقد قرأها أمامنا فى الميدان الشرقى عندما ضاقت القاعات وميدان الباسكت اضطررنا لنقل الليلة للميدان الشرقي الذى امتلأ عن آخره

.
كوستاوي يا جميل
اتحفتنا بدرر غاية في الإبداع .....
فالأمين ود العبيد عالج مشكلة البعوضة العايزة تنتقل من الكوش للفريون
بطريقة أكيد فيها خيال واسع ... الفكرة ذاته في منتهى الجمال.

أما ذلك الشاب الرائع صاحب القصيدة التي تنتقد سلوك ( بعض ) الشباب
فقد وضع المبضع على كثير من الجروح ..ولامس الكثير من المشاكل
الشبابية التي هي جزء لا يتجزأ من أمراض المجتمع ..
.
لك التقدير كوستاوي وتشكر على هذه الإختيارات

.نترحم على الفنان المبدع مصطفى سيد احمد غشيت قبره
سحائب الرحمة ... اللهم ارحمه واغفر له .
.
....................... اللَّحم التقيــل

بِقيـت أغـني عليــك .......غناوي الحلَّه باللحم التقيل
وعشان أجيب ليكِ اللحم .. بالدين من الجزار واشيل
ومعاهو في آخر الشهر .... تتلاشـى ماهيتي القِبيــل
سِبتيني لي حُضن الغلا .... وبِعتيني للجـزار عديــل

باصرت ليك كل القروش ... البـقدرعليـها وبصـرُفه
باصرت ما قادِر أسيبِك ... لا صِرفه غيرِك عارِفـه
قدُر جفاكِ لازمني الفلَس .... يبَّـس جيوبـي ونضَّفـه
لا مِنِّك ابتدت الصحون لابيكِ انتهت الصواني المُترفه

جيعان انا وصابِر عليك.... عمـري ما ضُقت اللَّحـم
لا كرشي في يوم اتملَت ... عايش دوام انا في وهـم
يوماتي عايش في حلم ... وباللحمه كم صحن اتردم
أنا خوفي يا آخر الشهرتصبح الماهية في حكم العدم
ونكون مع عطِيه الصديق ..راجعين للبوش والسجـم

.
.................. ونفتح للبوش والزبادي
التحية للفنان الكبير صلاح بن البادية متعه الله بالصحة والعافية
.
ما عِشِقتك لي غلاتك
إنت أغلى من العيون
أو هويتك لي حلاتك
إنت أجمل شي يكون
يا المعلَّق في الشناكل
إنت يا زينة البطــون
أم عيالي كاشفه حالي
عايزه لحمه وإنت غالي
إنت غالي وبل خيالي
ملمسك ناعِم حريري
هناكَ في العشوائي يومي
هناكَ ناس ضابحِنُّو كيري
.
أنا ما بقدر عليهو
ياخي شوفو جماعه غيري
ياكلو من العِجلِ الفخده
ومن مطايب الضانِ كِبده
الظــروف حنَّت عليهـم
الدنيـا صـارت بين إيديهُم
ونِحن لينا أبو الأفوالِ
واللحمِ ديمه علينا غالي
كم جِحِمنا وكم سِعِرنا
عليـكَ أبـداً مـا قِدِرنـا
.
كلما الماهية تعلى
إنت برضو كمان بِتغلى
كم موظف بيكَ هــايم
حِلمو بس يتغدى شيَّه
شطه حاره مراره نيَّه
نفسو مارقه كمان حزينه
إنهدَّ حيلو من السخينه
لو مرقنا على المزارِع
جد نقاوم وجد نصارِع
كل نفايات المصانع
وبكره نشبع في الكوارِع
ونفتح للبوش والزبادي

.
............. البرلومــة
......................سودان كوميدي

في أول يوم للجامعة
والجامعة جايطه ومزحومه
قابل برلومٌ برلومة
سُحِر البرلومُ بنظرتها
نسيَ المدرج نسِيَ هِمومة
وصار يُردِّدُ في ولهٍ

عِشِقتو من نظره هو قلبو خالي
كيف الطريقة البيها يتم وصالي

وبعد محاضرةٍ طالت
هِندٌ سألت سوسن قالت
وهنالك أبصارٌ جالت
وشجونٌ ودموعٌ سالت
سألت جارتها عن شيءٍ
فهبَّ سريعاً خلفهما
وبدت أسئلةٌ تتواتر
وأمورٌ شتى وخواطِر
هل أنتِ أساساً من مدني ؟
إني قابلتُكِ في مرَّة
لكن السهوَ تملكني
وقضى ساعاتٌ يسألها
ويُجيبُ أحاييناً أخرى
والفِكرةُ تتبعها فِكرة
ليغني من باب الحيرة

عِشقتو شادِن
عيونو ساحرة
وقوامو لادِن

اليومُ الأول قد عدّى
ليصير أسابيعاً عُدَّة
وحنينٌ ينمو ومودَّة
ما بين سُعادٍ وسُهادٍ
تتخللها بعضُ الذكرى
لا تخلو من بعض الحسرة
وسُعادٌ أخرى قد هامت
بالشابِّ الأسمرِ وترامت
في بحر الحُبِّ وقد عامت
وتفشى بينهما حبٌ للناسِ كما لهما
ليزيد الودُّ كمالهُما
لا كُلفة فيهِ وطقوس
ليكونا بين الناسِ شموس

في العامِ الثاني
أخبرها عن حال الأسرةِ والأخوان
فالوالدُ قد كان مديراً
والأسرةُ تسكن ام درمان
أملاكي فيلا في بحري
وقد أملك بوتيكاً أو دكان
مضى عامان
وسُعادٌ ساورها شكٌ في أن عثمان
قد يكذبُ في بعض الأحيان
لكنَّ الأحباب إذا فعلوا
فالقلب يعاندهُ التحنان

والعام الثالثُ قد مرَّ
ما بين حلاوتِهِ المُرَّة
وبصيصٌ من نور الذكرى
في آخر عامهما الرابع
ما بين عذابٍ ومدامِع
جاءتهُ يوماً ما تبكي !
فهبَّ إليها في قلقٍ
ماذا يجري هيا احكي
قالت والدمعةُ قد سالت
قد جاء خطيبٌ يخطبني
وأبي ما مانع في هذا
قُل لي يا حُبي ما أفعل ؟
والحبُّ هنا لا يتبدل
فرد عليها ببرودٍ
ما المشكلة في فقدِ رفيق ؟
لا شيء يسبب هذا الضيق
فعليكِ مجابهة الواقِع
وسألتُ الله لكِ التوفيق

أربعة سنين عاشُم الحب
والليلة يوم إعدامه يا قلب

و آخر قصتنا هذي
ليس الحبُّ بعض حروفٍ أو كلمات
وليس نفاقاً أو همساتٍ أو بسمات
بل كيميا تتغلغل مابعدشِغاف القلب
وتسكنُ في أعماقِ بُطينيهِ يرعاها الرَّب
صِدقٌ.. تضحيةٌ .. إخلاصٌ هو ذاك الحُب

.
...... زمــان أحـلى !
.
أوضتين وبرنده خلفِ خلاف
وحوش واسِع في نُصو سرير
وحبْلِ غسيل مربوط في لستِك
بطيخة ونقّــاع تحت الزير
وأبوي الكان عامِل حيكومه
لا هـو موظـف لاهـو مديـر
كان حافِظ جزئين في القرآن
وكُلْ صلواتو بدون تـأخيـر
وكــان ياالله شــويه بيكتـب
ولمــا اتوظَّف عَمَلو غفيــر
إلا العِــز الشُّفنــا معــاهو
حتى اليوم ما شافو مدير
كــان شقيان بيلقِّط رِزقو
وقــانِع بالمقســوم وكتيــر
كان ماهيتو حقيقـه شِويـه
لكـن فيـها بركــه وخيــر
ساعة يرجع شايل كيســو
نجري ننطِّط زي عصافير
راجيه أبوهـا يرجـع عِشُّـو
ووصف الفرحه غلبني كتير
طبعاً جـاي وجايبَ الســوق
لا بِخلي طماطم لا جرجيــر
وعضمه مارقه وقادَّه الكيس
كيس أسمنت عريض وكبير
كــان النـاس قلوبــه نضيفه
لو جانا الضيف بالفرحه نطير
أبوي بي كرمو يحلِف يضبح
مِربِّــي غنــم وخيـرو كتيــر
وبُرجِ حمــام فـوق الحَمّــام
جِـداداً ســارِح مــالو نظير
وياما أحلى فطـور في الجمعه
سمك لو شُفتو كبيـر وصغير
يُمَّـــه تقلِّبــو في الصينيــه
دقيق وبُهار وعلى التحمــير
أصلو الجمعه دي كانت عيــد
وفيها ضيــوف بيجـونا كتيـر
كـان زمـان وجباتنــا تلاتــه
وشي في النُّص كِده للتصبير
بساطْــة الدنيا ويامــا حلاته
وفي كُل يــوم تلقى التغييـر
ما أظِن شُفتو جنينةَ النُزهـه
أسود وقُرود وأشكــال طير
وتلفزيـون مـن غيـر ألـوان
بابور جـاز وفانـوس تنويـر
قَدُر ما نحكي ما راح نَخْلص
وأصلو زمان دا زمان تدبير
ربنـا يرحـم كُـل موتــانـا
وكُـل عسير يبقالنــا يسيـر
أهو دا الزمن القالو جميــل
والأجمل ناسو معاهــا ضميــر
والأجمل ناسو معاهــا ضميــر
والأجمل ناسو معاهــا ضميــر

سلام سعادة ود المكي وضيوفه.

رغم عدم انتمائي للصرح العظيم جامعة الخرطوم، إلاّ أني كنت أتابع نشاطات هيئة حلمنتيش وأحفظ الكثير من قصائدهم .. لكن، فعل الزمن ما فعل بالذاكرة.

أذكر أن تقديم المتجهجه الأممي هو:

أنا المتجهجه الأممي
أنا الأسيدك أنا القلوي
وانا الفاعل خطيييير نووي

وقفت شوية في تصريف تعبير حلمنتيش ونسبه لشعراء مصريين أو لتعبير مصري.
لا أظن أن اللهجة المصرية تعرف تعبير (حلمنتيش) ... فالمصريين عُرفوا بالمنالوج ويمكن أخدناهو منهم وهناك عدد من (المنالوجيست) السودانيين يمكن منذ الخمسينات أو الستينات.

أما الشاعر ود بادي، قد لا يصح نسبه لشعراء حلمنتيش، رغم تناوله هذا الضرب في بعض قصائده، إلاّ أن معظم قصائده جادة رغم السخرية الفيها.

قصيدة شيخنا ود الشايقي من أروع قصائده، واسمح لي أن أورد المقطع الذي أتيت به وإيراد بيت سقط منها:

Quote: وجاز اللمبة فى غلبا وحق الفطرة للطلبة ركوب التكسي بالقلبة وحليل المنقة والعنبة ولو ما الروح بقت سلبه نمص الصلصه من علبا وكانت جاتنا فى الرقبة

مريس سريع على البوست، لكن بوست زي ده عايز مذاكرة.

.
ونحن في غاية السعادة لهذه الإطلالة من شيخنا وود شيخنا أبو العزائم .

نعم ... فقد عرفنا المنلوج باكِراً ، وأذكر ان اساتذتنا في المدرسة كانوا
يؤلفون المنلوجات التي تقدم في ليالي السمر ، وفي الغالب كانت تُقدم
بألحان الأغاني ... ( يا منادي ناس الحارة .. دايرين شيَّة ومرارة )
و ( في المدينة يوم الوليمة ... يلَّه نحضر ما يفوتنا يومه ) وهذه على
لحن في الضواحي وطرف المداين ... وغير ذلك الكثير .
.
الشكر مثنى ابو العزايم

.
أبوعزيزة هو ( موثِّق عقود النكاح ) في البلدة .. شغله الشاغل أن يجمع راسين في
الحلال .. أرسل له رجل من أهل البلدة رسالة يطلب من أبي عزيزة مساعدته في
اختيار زوجة .. وقد حدد مواصفاته للزوجة المبتغاه في رسالته ..

أبو عزيزة صاغ الرسالة شعرا ورد عليها :

بعث امرؤٌ لأبي عزيزة مرَّةً
برسالةٍ تضحَك وتَبكي حولها
فيها يقولُ أُريدُ منك حليلةً
سمراء معروفٌ لديكم أصلها
لها مالٌ وأملاكٌ تـكونُ ثريـةً
ليس الجمالُ ضرورةً في حالِها
كريمــةٌ ورحيمــةٌ بشــريكها
بعد الزواجِ أُحظى بدلالهــا
وتُطيعني دوماً وتهجُرُ أهلها
والمالُ يضحى في تصرُّفِ بعلها

فجاءَ ردُّ أبي عزيزة :

وافى كتابُك سيدي ونظرتُهُ
ومطالبٌ فيه كثيره قرأتُهــا
لوكنتُ أعرِفُ واحِده بِصفاتِها
طلَّقــتُ أمَّ عزيــزةٍ وأخذتُهــأ

وكل عـــــــــــام وأنتم بخير

.
................. بالهنــا والشِّــفا

ألا هُبي بِصحنكِ واصبِحينا........... ولا تُبقي فِراخـاً أو طحينـا
مُحمــرةً يتـوهُ الرُّ. فـها.............إذا ما السمنُ خالطت السخينه
وهتي ما استطعتِ من الصواني .....وشطّـاتٌ بِدكـوةَ أو طحينه
إذا حضر الطعامُ أمام عيني ...........فلا أفْرِز سُعادٌ من سكينـه
فهاتي اللحـمَ مشويٌ بِفحــمٍ...........فأطيبُ ما شُــوى لحمٌ سمينا
ولا تنسي المُحمر من حمامٍ .............فإني قد عهِدتُكِ تدخرينه
وهـاتي خُبزتيـنِ مُقمَّــراتٍ ...........فكم أحسنتِ إعداد الغعجينا
فما أدراكي إن نفدَ الطعــامُ ......... وأرسل البطنُ عواءً وأنينــا
وقفنا في المخابِزَ في صفوفٍ ........فلا خُبـزاً رأينـا أو طحينــا
فلا تسمع لِوالي جاء يكذِب ............ولا لوزير أكذبُ منهُ حينا
هيا فاردم طعامكَ لا تُبالي ........... وخـزِّن مونـةً تكفـي سِنينـا
ونَم واشخُر بِصوتٍ جِدُّ عالي ..... وكُن في الحامِدين الشاكِرينا

غايتو قصيدة الاستيكة دي روعة،،روعة،،روعة،،،
ورسمت في وجوهنا مش ابتسامة وبس ولكن ضحكات عالية..
ونتوقع نقراها مكتوبة، بعد سمعناها مقروءة..
ودمت بالف خير وصحة وعافية

واعاين ليك تغمضي انتي
تعايني لي اغمض انا
اعاين ليك تغمضي انتي
تعايني لي اغمض انا

نعيد الكره من اول
اعاين ليك تغمضي انتي
تعايني لي افتح انا
تفري البسمه تضوي سنه
.
الماجدة بسمــات
كل عام وأنت والأسرة الكريمة بألف خير
بتذكرني ( غمدت لبدت ) ... لعبه قديمة لعبناها
بس كنت منتظرو يقول ( تغمدي إنتي أغمد أنا )
هههههه
مع التقدير

سلام أستاذ ابوالريش
كلمة حلمنتيش ظهرت في مصر اولا ومن شعرائها المشهورين حسين شفيق ومن أشعاره
لزينب دكان بحارة منجد تلوح بهت أقفاص عيش مقدد
وقوفا بها صحبي علي هظارهم يقولون لا تقطع هظارك واقعد
رأت زوجها يدنو فغطت عيونها بشال طويل كالملاية أسود
هو الرجل الضرب الذى تعرفونه خشاش كجن العطفة الملبد
سيبدى لك العكاز ما كنت جاهلا ويأتيك بالعكاز من لم تهدد
ولا أذكر باقى القصيدة

أما بيرم التونسي الشاعر المشهور فقد كان هو الأخر من شعراء حلمنتيش قال قصيدته المشهورة في المجلس البلدى:

قد أوقعَ القلبَ في الأشجانِ والكَمَدِ :::: هوى حبيبٍ يُسَمّى المجلس البلدي

أمشي وأكتمُ أنفاسي مخافة أنْ :::: يعدّهـا عاملٌ للمجلسِ البلـدي

ما شَرَّدَ النومَ عن جفني القريحِ سوى :::: طيف الخيالِ خيال المجلسِ البلدي

إذا الرغيفُ أتى ، فالنصف آكُلُهُ :::: والنصفُ أتركُه للمجلس البلدي

وإنْ جلستُ فجَيْبِـي لستُ أتركُهُ:::: خوفَ اللصوصِ وخوفَ المجلسِ البلدي

وما كسوتُ عيالي في الشتاءِ ولا :::: في الصيفِ إلاَّ كسوتُ المجلسَ البلدي

كَــأنَّ أٌمّي بَلَّ اللهُ تُربتها :::: أوصَتْ فقالت : أخوك المجلس البلدي

أخشى الزواجَ إذا يوم الزفافِ أتى :::: أن يَنْبَرِي لعروسي المجلسُ البلدي

ورُبَّمَا وَهَبَ الرحمنُ لي ولداً :::: في بَطْنِهـا يَدَّعيه المجلس البلدي

وإنْ أقمتُ صلاتي قلتُ مُفتتحاً :::: اللهُ أكبرُ باسم المجلـس البلــدي

أستغفرُ الله حتى في الصلاةِ غَدَتْ :::: عِبادتي نصفُها للمجلـس البلـدي

يا بائعَ الفجلِ بالمِلِّيـمِ واحدةً :::: كم للعيالِ وكم للمجلسِ البلدي

.
التحية لك استاذنا منان ، عميد شعراء حلمنتيش ، لحضورك
الدائم بهذه الساحة ، بحكم علاقتك التاريخية بهذا الضرب
من الشعر منذ ظهوره بجامعة الخرطوم .

لك التقدير

.
............ آآآآآآآ ه يــا نــدى

آه يــا ندى
رِقه ولطافه وزوق بدا
نظرات عيونِك موت عديل
ريدِك يمين كاتِل قلوبنا وهارِده
أدينا بس جُرعة حنان
حُقنة أمل
وكبسوله من بسمات وحبَّة غروده

أنا يــا ندى
ما معاك حِكايتي معقَّده
سَـكَّنتَ صورتِك في الخيال وبهدهِده
وافكاري تايهه وشارِده
وأموري جايطه ملخبطه ومحتاجه جَد لمُسانده
بتعشّى يوماتي الصباح
وانسى الفطور وانسى الغدا
ما الكبكبه خلقوها لي أنا يا ندى

جكست لي كم بِت كِده
فيهم زبيده وشهرزاد
وما رُحتَ أبعد في المدى
حركات بريئه كِده وهِظار
غمزات ومرَّه مُعانده
وووو ظهــرت نــدا
آمنت بالخلق الخلايق وعدَّدا
دي حلاة شِنو ؟
ملِكة جمال بالجَّد عديل متفرِّده
أشيل نَـفَس .. وروحي تمرُق وأجبِده
كاتلاني نـا المكحوله طبعه
وخدوده خِلقه مورَّده
الداير يقول خلِّي اليقول
الجِّرسه فيكي بزوِّدا
برجِف عديـل أنا يا ندى
أمرِك مُطاع بس قولي لي
أردِم خِوير اب عنجه
أو أزرع شوارع المورده ؟

آآآآآه يـا ندى
أديني بس جُرعة أمل
وكبسوله من شوق وحنان
وباللهِ حبة غروده

........................ حدباي

.
............. أبو الزِّفــت !!

نفوت ألمــانيا والنمسا
وتبقى بلدنا حاجة تمام
قطر أنفاق للحاج يوسف
أمبــدة تفوت أمســتردام
نودِّي الدكوه لي لندن
ومنقة وموز كمان شمام
نصدِّر غــازنا لفرنســا
وعربات فارهة لي فيتنام
ونبني مشــافي للعالــم
ومرضى يجونا في امدرمان
نرسِّل للمجــر اغاثة
وبعدهــا ندعــم اليابــان
نرسِّل حميدتي لأوربــا
عشان الجيش هناك تعبان
نكون في العالــم الأول
تكوس لرضانـا إسرائيل
وإن دارت تداوِســنا
نردُمه عينه من سِجِّيل
وإن قالت بِغِم مــرَّه
نخُش القدس جوه عديل
نصلي الجمعة في الأقصى
ويعلـو هتافنــا بالتهليـل

عندنا كوره حاجــه تمام
شــيدنـا مُـدُن ريـاضيــه
ملاعِب راقية في الأحياء
وكم استــاد ، تقول ميــَّه
هبَّـلنا بالبرشا في الخرطوم
وشِلنــا كؤوس أفريقيــة
موسكو الكاس أكيد مضمون
يكون في حسابنا دا العاشِر
وكَسـَحنـا آخِــر أولمبيــاد
نقيم الجــاي في الفاشــر
..............................................
ملحوظة : شاعر القصيدة مصاب بملاريا خبيثة .. والحمة طلعت ليهو في راسه

وكبسولة من (بسمات) وحبة غرودة...
....دي اوسكار...
جئنا للتحية والسلام...يا من تزرع البسمة في وجوهنا...وتخرجنا من حالات الياس
وحالات النوستالجيا للوطن وللاتبراوي..
ودمت بالف خير وصحة وعافية

.
أكيييد أكيييد ( كبسولة ) من ( بسمات ) تشفي العليل

حيا الله الماجدة بت عطبرة ، عاصمة الحديد والنار والناس .
مشاركتك تمنحني القوة الدافعة للمواصلة على طريق الإبتسامة

لكِ التحية وموصولة لأهلنا العطبراوية .

كل الود بسمات

...... تصــانيف

الناس مصنَّفة بالقروش
ناس ناعمه حتى العود طري
وناساً تقول قايمين بروس
وناس للشقاوة وللجري
ناس في الخلا بيوتُن بروش
وناس فيلاّ حارِسه عسكري
ناس رايقة بِتدَّخِّن كدوس
أما الصعوط بَرى ناس برِي
ناس الأكِل بوفيه عديل
وناساً هراها الجوع هري
ناس الرَّفيق يوماتي بوش
وناساً بِتاكُل جمبري
ناس كايسة تنقيص الكروش
ناس ناصحة عايزين الجري

ناس في المرض ماكلين قَرَض
وناس للعلاج عاملين طقوس
ناس كايسه تغسِل وشَّها
وناس عامله حركات للرموش
ناس الشحم مالي الجضوم
وناس لو تقوم الراس يدوش
حلّالَه عاد دي الشبَّكه
ما الناس مصنفة بالقروش

.
بينما كان الأستاذ بشير استاذ اللغة العربية يراجع أوراق امتحان البلاغة تمهيدا
للشروع في عملية التصحيح ، فوجىء بورقة أحد الطلاب خالية من الإجابة ،
وقد استعاض عنها بقصيدة يقول فيها :
.
أبشيرُ قُل لي ما العمل ....واليأسُ قد غلبَ الأملْ
قيـلَ امتحـانُ بلاغــةٍ ...... فحسِبتهُ جــاء الأجــلْ
مرعوبُ من صوتِ المراقِبِ ..إن تنحنحَ أو سَعَلْ
يجولُ بين صفوفِنا ....ويصــولُ صــولاتِ البطلْ
فضلاً تمهَّــل ســيدي ...... مــا كلُّ مســالةٍ تُحــلْ
فمِن البلاغــةِ نـافِــعٌ ...... ومن البلاغــةِ مـا قتَــل
قد كنـتُ أبلَدَ طــالِبٍ ......... وأنـا وربِّـي لـم أزَلْ
فـإذا أتتـكَ إجــابتي ....... فيهـا سـؤالٍ دون حــلْ
دعها وصحِّح غيرها ..والصِّفرُ ضعهُ على عَجَلْ

.
دنيا وبِقت ما بتتلحِق
وعمرو الزمن ممحوق محِق
اليوم يمُر زي البرِق
وبين اللي فات والبُكره جايْ
مافيش فرِق
والناس على درب الرِّزِق
يوماتي جاريه بِتستبِق
قول الشَّــقا !!
ناصِب حبال المشنقه
فوق الرِّقاب نازِل خنِق
ياااا حليل زمان
بين المضوا وهسَّع فرِق
أيام زمان طالعين سوا
نازلين سوا
والجيب سوا
ومع الصِّحاب
ما كنا لحظه بنفترِق
مهما المشارِب تختلِف
ولو نختلِف أو نتفِق
مابينّا مويه بتندفِق
كان الزمن مليان دِفا
نخوه وشهامه بل وفا
إلفه وصِدِق
عايشين بما قلَّ وكفا
شاحد الكريم
يرجِّعنا للزمن القِبيل
للطيبه والناس الحُنان
عيشة التراحُم والأمان
قُبال يفوت فينا الأوان
ألزِمنا يا ربي الصبُر
يا الله يا رب الخلِق
تصبح أنامِلنا الشموع
لي غيرنا تضوي وتحترِق
.
..................... نورالهادي علي

أستاذنا محمد فضل الله المكى

أثار في نفسى كلامكم وخاصة ذكريات أخى وقريبى وصديقى سعادة السفير نور الدين منان
ذكريات إلى النفس حبيبة. فرأيت أن أشارككم بموضوع كنت قد كتبته قبل فترة في الفيس بوك.

"ســــلامات"... وذكــــريات لــها صـــدى
**********************
حينما جئنا إلى جامعة الخرطوم كانت هناك مجلة حائطية هزلية ولكنها مليئة بالإبداع الفنى
والأدبى والثقافى وكان الطلبة والطالبات ينتظرونها بكل النهم والترقب عند بداية كل أسبوع
إسمها "ســـلامات". وتعاقب على تحريرها ورسمها وإصدارها مجموعة من خيرة مثقفى
تلك الأيام. وفى ظنى أن بداياتها كانت على يد البروفيسور محمد عبدالله الريح (حساس محمد
حساس) وتعاقب على إعدادها البروفيسور المهندس صابرأبو عمر عليه رحمة الله
والبروفيسور محمد بشير حامد والبروفيسور طه أمير والدكتور عثمان عبدالمجيد (عصمصم)
والمصمم عمر الشامى مصمم شعار السودان إيرويايز والإقتصادى الوليد نصر الحاج على،
الذى أعتقد أنه كان آخر من تولى إصدارها. وقد إعتمدت المجلة على الكاركتير الهادف وفى
ظنى أنها كانت منطلق الشعر الحلمنتيشى فى السودان، وكثير من التعابير الساخرة والمسميات
العميقة التى سادت طوال الستينات والسبعينات.

وقد كنت أسهم بعدد من القصائد الحلمنتيشية وبعض الرسومات الكاريكتورية الفطيرة.
لذلك حينما أصدرنا فى دار جامعة الخرطوم للنشر، حيث عملت كمدير للقسم التجارى،
كتاب المربى الجليل ضرار صالح ضرار "هل كان عنترة سودانيا؟" جلست يوما أتأمل
فى كيف يمكن أن يكون عنترة لو كان حقا سودانيا، وكيف كانت ستكون هيئته وكيف
كان يمكن أن يكون مقاله؟ فكانت رسمة مع نص شعرى معالج وضعتها فى منتصف
الكتاب ولم أرها منذ شهر سبتمبر عام 1976

وبالأمس وأنا أرتب فى مكتبتى وقع فى يدى على أحد تلك الأرفف، مع مجموعة من
قصاصات القصائد والمقالات التى نشر بعضها ولم ينشر جلها، ذلك الكتاب "هل كان
عنترة سودانيا". وبين صفحات ذلك الكتاب نص تحليلى للكتاب درجت على نشر
مثيلاته عن كثير من الكتب التى كنا نصدرها، كجزء من حملات الترويج للكتب
ولفت الأنظار إليها. فضحكت وأنا أتأمل فطارة فكرتى ورسمتى بالرغم من عمق
المقال ورصانة طرحه. فقررت أن أشرك الأصدقاء فى هذه الذكرى التى مر عليها،
من مفارقات القدر، أربعون عاما بالتمام والكمال:



" />">

سأحاول تذكر بعض القصائد بإذن الله إن كانت الذاكرة تسعفنى.

.
السر عثمان الطيب .. شاعر ( يا يُمه رسلي لي عفوكِ )
بمناسية جر الساعة .. صحيفة الوطن 29 سبتمبر
.
جُروها جرَّاها البلا
وأرموها في أبعد خلا
قرضتنا بالجوع والغلا
وجابت مع الفشل ... الجلا

جُروها ( جَر)
كُرُّوها (كر)
قولولا ( جَر)
أو قولو ( كَر )
أوحتى ( عَر )

تقديمه كان غاية الضرر
ما فيها خير قط للبشر
ما فيها غير فوضى وكدر
سواها واحِد وقام نكر
يا ربي كم مليون هبَر؟

جُروها جرّاها الوجع
كانت دي بِدعه من البِدع
تقديمه لا فاد لا نفع
لا شال تمُرنا وإنفدع
لا بيها قام نِجِض القرع

جُروها بي جرَّة قلم
كان القلم بيزيل بلَم
جُروها جراها السجم
جابت لنا الهوى والوهم
خلتنا جَهَله تقول غنم
إحساسنا بالزمن انعدم

جُروها جرّاها المغس
الشعب ضاع مُخُّو اتلحس
بالساعة صار مهووس هوس
لخبط مواعيدو ودقس
فجراوي في الحافلة اندفس

جُروها جرّاها العمى
من غير كلام ومفاهمه
فِنُّوها في سابِع سما
وخلوها فيهو معسَّمه
الدنيا ليل ومضلِّمه
الناس تقوم متخمخِمه

جُروها سيبوا الجرجره
سيبوا العناد والفشخره
ستين دقيقه ولا ورا
كانت بهادِل ومسخره
كل المواعيد دردره
حتى البكور متأخِّره

جُروها جرّاها الرماد
فِنوها في آخِر وِهاد
كانت سبب مِحن البلاد
جات بالتصحُر والجراد
فِد ساعه عذبت العِباد
نوم الديوك سهر الجداد

جُروها ما دايرين لَغط
كُروها مردود الغلط
بالواطَه أو فوق الظلط
أدوها بالجزمه وشبط
كُشوها تب في سقط لقط
غرينِتش فقط مليون فقط
بغ بِن عديل وبدون شطط

ودُّوها خط الطول صِفر
إن شا الله تحرد وتنتحِر
وشان تاني ما تحلِف تصِر
تبقالنا خازوقاً بِكِر

جُروها بي أضخم وِنِش
بين الجنازير تنبرِش
لازِم تفتفِت وتندرِش
لازِم تعيِّط وتنكرِش
بعد العزا ورفع البِرِش
لا فاتحه لا بِندفع قِرش

.
استاذي العزيز عبدالرحمن ابراهيم

أينما تطل يزداد الموضوع ألقاً بك
سعدت أيما سعادة بذكرياتك في ( الجميلة ومستحيلة ) كما يحلو
لأبنائها تسميتها .. فبينها وبينهم عشق حقيقي وأنت منهم ..
الله الله على اصحاب المقامات السامية الذين ذكرتهم ... أسماء
لها إيقاع .. ولكلٍ بصمته التي ما زالت تذكر .... أسأل الله
الرحمة والمغفرة لمن مضوا .... والصحة والعافية والستر للذين
يواصلون العطاء وأنت منهم .
استاذي عبدالرحمن
مشاركتك في هذا الموضوع الترويحي أثرته وجعلت له قيمة
وننتظر المزيد

.
.......... بِت هندســـة
..............أبوبكر محمد الحاج

أنا راسي جاط
ما بين هواك والدبرسة
ألَّفتَ عِشرين ألفِ بيت
سبعين قصيدة مُؤسسة
شان أقدر ألفِت إنتِباهه
ومرَّه أقدر أحسِّسه

يا حِلوه يا زينتة البنات
يا نجمة الليل والمَسا
أنا رغمِ أشكال الشتات
حاضِن عواطفِك وحارِسه
أنا في هواكِ بقيت فتات
ودخلت عشرين مدرسة
جنيت مع كلمات هواك
بي قلبي كان بتنفَّسه
يابِت يا إنتِ يا هندسة

أكان شفتي يا ... هندسه
خطواتي دايماً بالغلط
وأموري ديمه معكَّسة
يوم داك مساهر في الهدوم
وكويته شَت شان ألْبَسه
لقيته الصباح دي هدوم اخوي
وهدومي قاااااعده مكرفسه

كان للهدوم ما مشكله
بشوف لي دلاقين ألْبَسه
لكِن هواك أعملو إيه؟
دشدش عُضامي وهَرَّسه
داير لِي فرصة أكون قريب
طبلة هواكِ أفلِّسه
علشان تشوفي هواكِ كيف
بهدل عواطفي ودعفسه
كلماتي ليك اتشتت
ما زي زمان متهندِسه
حتى الشِّعِر الكان زمان
كلماتو حلوه مملَّسه
هسَّه اتلحس وبِقى كيف كِده
ما كُلُّ كلمه مُهندَسه

وانتي السبب في كل دا
يا أحلى أسباب الأسى
أناياخ بريدِك ..اعمل ايه ؟
وريني يابت هندسه
أمشي وأكورِك في الظلط
يااااااناس بريد بِت هندسه؟

كم مرَّه قلت أقول كلام
أقعد معاها واحدِّثه
لكني ما بقدر عديل
انضُم معاها أونِّسه
خليك من اشرح ليكي شي
وغرامي بيك والدبرسه

يا... يا... ياهندسه
داير اقول حِتة كلام
أصلو السكوت فيه وسوسه
أنا يا ملاك أنا بعشِقِك
وما اظِن بلاك أرجا المسا
دايرِك تكوني حبيبة لي
وانا أبقى ليكي حبيب قسا
أكسيك هواي
وتلبسيني نعيم هواكْ أجمل كِسا

يااااا ربي كُل عاشِق نبيل
تديهو زي بِت هندسة
وترعاها من عين الحسود
ومن توب جمالك لَبِّسه
ويا ربي تحفظه لي براي
يااااا ربي تحفظه تحرِسه

.
......العذابـــــــه .........
......................محمد النفيعي

أقوله نصيحه ليك يا بابا
أحذر جيــرة العذابــــه
أهل الضُّمنه والكشتينـه
ديل أصلاً طِباعهم شينه

إن وقَعْت معاهم ما بتنحلَّ
سوده الوقعه وقْعَتْ بلَّه
والزايرين يحِلهم الله
ديل شمشاره جوَّه الحِلَّه
نُص الليـل يشِدُّو الحَلَّـه

لاهو مركب لاهو باخره
ما بعرفو السراير الفاخره
بالنهار الأُمه دي شاخره
دكاكين الحِله تكورِك ساخره
أصلو الدين صِبِح دين آخره

ملايه مكرفسه ما مفروشه
جوه الأوضه تلقى الكوشه
والحشرات مرابطه جيوشه
العاقِل فيهم دايش دوشه
إن دخلت جِداده يحوشه
وسِت البيت عامله هوشه
الجماعــه أكلوا قروشــه

أستاذ محمد فضل الله المكي
لكم التحية ،،،وجدت هذه القصيدة ، ويبدو أنها للدكتور الأمين حسن العبد .
فقع الحر السمايم وابو الفرار حايم
وانا في السوق حايم اتمشى وسط زنكات الخدار
اشتري ربطة شمار وللكوسة افتش
انفض الجيب اكشكش اشتري كوم طماطم
وابو الفرار حايم
فوق راسي قرب دكان اليماني قدرة بوخها الملوي اذاني وشواني
ابتغي بعض رغيف لصغار في متاهات الجريف
ان هذا العيش ذووزن خفيف ومحرق ومفلطح وملولو ومشقق وبرادة الفحم المدقق
وردوم شطة داهمتني الف عطسة
وشمتنى اليمانى وازح بعيدا وادردق فى ثوانى
انعل اليوم ا لرماني وكسانى بالغبار والسمايم وابو الفرار الحايم
عند بصات الصحافه ليس فى الممشى مسافه
قاشر لابس قيافه مكوه اخر نضافه
فاذا الكمسارى بى كل جلافه وبزيت الفرامل لا يجامل طبع فى كتفى شرافه
يالها منه سخافه كل يوم جوه بصات الصحافه فوق سيخ البص نايم
وابو الفرار حايم
عند منعطف الطريق ترمس او كبكبيه موية برد أوتسالي وصغار مثل حبات التسالي
وجرادل وصفايح وسحالي
وحبال وخيوط وزراير وصعوط وسجاير
وتراب وعلالة وفنايل ودلالة ورقيص
وزحيح ووحيح و مولوص ومديح
وغبار الفجة قايم وابو الفرار حايم
عند باب الاسبتالية دنيا زايلة
ورجال وعويل وصراخ وانين
ادخلي انت براكي دية ماتدخل معاكي
ابعد انت ارجع لاتكابس
وسباتة وملابس وصحانة وترامس وحوادث عند ابواب الحوادث
وتراب وسمايم
وابو الفرار حايم
ابو الفرار واقف في الصواني والمواقف ومع العربات جاري
عند ابواب الكباري والقنادر والمواتر والتكاسي واللواري والكوارو 9خ
وحصينها المتفرجخة وحديدة متخلخة كتبت عليها 9خ
ان الكواري مرخصة تمشي على وجه الزلط
وابو الفرار قد وقع انزلط
عند حيطان الجوامع والايادي ليس فيها من اصابع
ينفر الفرار من هذي الفظايع
ثم لا يهوي الى النافوخ واقع
مثلما كان يلابع
عند شاطئ النيل بي قرب الفنادق
كل ما الجو بجبره صار حارق
جاء جيش من عراة متسابق
ليت لو تمساح توتي جاء مارق
وتبرع صار وطني المشاعر صار يبلع
وأراح الناس من هذي المناظر
إن هذا مستحيل ان يدفعوا وبموتهم ثمنا قليل
ليس للفرار حيلة اذ يدخل الظل الظليل عدا ان يستقيل

ود المكي وضيوفه الأكارم
أول ما وقع علي أذنييّ قصيدة كان يلقيها أبن عمنا بابكر النور الرضي
في الحفلات ولم نكن نعرف أنها من عيون حلمنتيش
ربما من تأليف المتشعلق بن المنبرش أرجو تصويبي
منك أو من أستاذنا السفير منان

توو لييت


آه
آه علي قلبي و علي املا حملتو دهور
قطعت بحور
سواد الليل علي ليلين
صبرت كتير و راجي النور
يا قطعة البلور
يا رنة الطنبور
يا سستر بنات الحور
يا صاحبة مسز شنتور
ويا قصبة جروف اهلي
عليك إسم الله يا حاكم علي ما تجور
-----
شفتك يوم عجبتيني
قلت اقول أنا الفي أولي داير اخطب
ده ما معقول !!
بقيت ساكت و فرحان بيكي
احدث زول و أدس من زول
دا عادا حبا أصيل و عريق
لف و دار عليهو الحول
لكن صحيح الدنيا ما بتصفي و تروق للزول
لو ربطوا المعاك محلول
أتقدم و اتراجع و اتردد
لمن حصل محصول
إتمحن وقف
فكر مشلول قليبي المكيل بالملح مكيول

--------

يا لينة يا شتلة فريع البان
يا املا بنيتو عليك و عشت زمان
أفكر فيهو لمن بان
بقيت للحسرة و الآهات
يا درة دامر المجذوب
يا زينة الطالبات و يا امل السنين الفات
ويا طفلي الرضيع المات
إتحسرت اتبهدلت ما خليت
ودمع العين نزل
وكت قات لي oh too late !!
ضيعني الدكتور عشا البايتات
وعاد خطبوكي لزولا عريض و كبير
وعلمو كتير و لابس ليهو نظارات
عربيتو تسوي حي وا ليل
وحافظ الكيميا في راسو
و حاكي أشنابو نص رباط
و عاد شغال و حالتو كويسة باني البيت
رضيتو بيهو طوالي
و ما قولتيلو oh too late !!

------

بعد الحصل قات لي : يا مولانا ادعو لينا معاك
يجازيك الله يا فلانة !
زماني و فات و دايراني اجيب أبريقي و أتوضا
و أفرش الفروة و اتمسكن و أصنقر ليكي للدعوات ؟
زمان ما كنت بدعوليك و افكر فيك
لكن الليلة بدعو عليك
بركة البغدادي ود جابر و كية فيكي يا فلانة
أبوك لا يرضي لا يخاطر
ومما تجيبي شوط الخطبة في خشمك
يعاين ليك و يحمر فيك يتكربن
يشيل كرباجو يتكرب
ومسكك من طريف التوب
طرفو الطويل نازل حدا العرقوب
و أمك عاد تقول حي ووب
و تتعارض
سجمنا الليلة يا أبو فلانة !!
يقول ليها يا فلانة
كان عارضتيني طلقانة
تقولو لا لا خليتك براك زعلان
و تقعد تج و يجرك كر علي الديوان
وتصرخي جآك بلا خجلة التقول شيطان
لامن يسمعوا الجيران ينطوا الحوش يدقوا الباب
ويطانش تقول طرشان
يكسروا الباب يدخلوا عليه
يقول ليهم : حلفت يمين البصلني قريب هدي السكين !
يزحوا بعيد يختوا الخمسة في الإتنين
وتسمع جيت و تسمع واي و يا با كفاي عليك الله !
وتسمع جو و تسمع حي و حي حي حي و حي حي ووب !
وتسمع جيت و تسمع واي و يا با كفاي
وتسمع جو و تسمع حي و حي حي ووب !
وتسمع جيت و تسمع واي
وتسمع جو و تسمع حي
وتسمع جيت وتسمع جو ديميعاتك يصبن جو
و أمك برة تنبح هو!!
وقت ينقطع سوطو و تفتري تب
يملص ليكي مركوبو
يقول فيك كب
يمسكك طب
و يكفتك طاخ
ويكنكش فيك
يخنقك خنقة بت الكلب
___
الحليلة

.
العزيز ولياب ........ سلام مربع

التقدير لك على هذه المشاركة ( الشبعانة ) جداً ، وطبعا دكتور الأمين
زول خياله واسع ، دي كم قصيدة كِده في قصيدة واحده .. فيها عدة
صور ونماذج بشرية ..
.
ولياب مشكور مثنى وثلاث

.
الحليلة يا صديق

ود عمك بابكر واحد من أساطين الشعر الحلمنتيشي .... بعدين دي معلقة
عديييييل كِده .... وطبعاً ريحت كل واحد ( خبتوه ) شاكوش في نص راسو
قبل كِده ... وياما في المنبر مشوكشين كتاااااار ..

الحليلة غيب وتعال ....لك الوُد كُله .