كان بمقدور أعز الناس أن يصمد خمسة رمضانات.فهل يصمد زورق الألحان 30 يوم

رحم الله العبقري محمد وردي..واللي زي وردي كلمة فنان ما أظن توفيه حقه ..عن نفسي ما بعرف أقول لي وردي ده إلا عبقري وما قادر أوصف حالة وردي الغنائية دي إلا بي إنها عبقرية ..
المقام ما مقام مقارنة وإن كان ده السؤال الإتربينا عليهو ونحن صغاااار ووقتها ما كنا فاهمين السؤال بقدر ما كنا لافحين الإجابة .. يسألوك فنانك المفضل منو ؟
وكانت إجابتنا النموذجية الملفوحة ما بين وردي وود اللمين ومرة مرة الكابلي..
كبرنا وعرفنا من الصعب في الفن السوداني تحدد فنان بي عينو وغالباً ما تختار من كل بستان زهرة متجول ما بين كل أجيال الغناء السوداني حقيبة وحديث ..عالي وهابط..نسائي ورجالي..وإن كنت عن نفسي عندي مكانة خاصة بي الجمبة كده في ظل التجوول ده لي الولد الحلو متعه الله بي الصحة والعافية محمود عبد العزيز عبقري الصوت والاداء وإمتداد عبقرية وردي الصوتية ..المهم ما تقيفو هنا كتير دي جملة عرضية ..
كنت من المتابعين وبشغف لحلقات أعز الناس وفي قناعاتي إنو كل يوم وردي ح يدهشنا بي حاجة وقصة وفهم مختلف عن كللل البنسمعو من اي فنان يستضاف..بدءاً من الطفولة المتمردة ونهاية بي الشيخوخة المتمردة وما شاااااخ وردي والله وما شاخت روحه ..ياخ ربنا يرحمك يا عبقري..
أتحدى كل من كان يتابع أعز الناس وهو قاعد منتظر بداية الحلقة إنو ممكن يتبنأ بي العمل القصة الممكن يحكيها وردي!!! تسرح وتتمنى ..يا رب الليلة يغني أرحل..لالالا يا رب يحكي عن خاف من الله..لالالا ياخ أقابلك ..لأ الود..لأ الغنية دييك ياخ الغناها في الإذاعة مرة واحدة دييك..لالالالا في اغنية كده وردي بيغنيها بي العود لااا حووولااااا..لالا في واحدة سجلا في مصر عجيييبة ياخ..و و و و
فتجد نفسك محتار في كيف ستكفي تلتين حلقة لتحمل وتختزل هذا الإبداع المهووول اللي بيحتاج على أقل تقدير لي خمسة رمضانات لتحتويها وتبدا تفكر يا ريت لو كل رمضان خصصوهو لي مدرسة من مدارس وردي الغنائية ..رمضان ده في العاطفي..رمضان الجاي في الرطانة والنوبي..رمضان البعدو في الوطني ..و..و.. وبرررضو خمسة رمضانات ما تكفيك ..وده كللللو وإنت بتكون مطمممن إنو ممكن تستبعد بعض الأعمال اللي ممكن ما تصنفها من أعمال وردي العظيمة وتختها في خانة الهجيج والخفيف الراقص وتقول ياخ ده نأجلو وما نحسبو ..
في زورق الأحان كم انا مشفق على الباش كاتب ابو اللمين لأنه وبكل صراحة يفتقد للمخزون الغنائي اللي بيخليهو يصمد لي تلتين حلقة يقدم فيها الروائع والدرر وده البيخليني متأكد إنو أبو اللمين ومعد البرنامج ح يجتتروا كللل أعمال ابو اللمين مننن قفا نبك عيييك ولحدددي الليلة ..الوطني والغزلي ..الخفيف والتقيل..المرغوب والغير مرغوب..المركون والمستهلك ..المقبول والغير مقبول..
ابو اللمين متحدث صاحب صوت فخيم ..موسيقي من الطراز الفريد بل هو الأميز على الأطلاق ..مجوود من الدرجة الأولى..سمكرجي بي صورة عجيييبة تخليك تسمع الأغنية في الستينيات غير نفس الأغنية في السبعينات غير نفففس الأغنية في الألفينات..
عن نفسي بشوف إنو ابو اللمين بيفؤض سؤال مخيف ومحيير يحتاج للشجاعة في الإجابة فيما يتعلق بي فن الكم والكيف!!!! فطيلة العشرين أو التلتين سنة الفاتت ظل ود اللمين يدور في فلك لا يتعدى ال15 أغنية هن من السبع السمان في خارطة الفن السوداني وكل واحدة منهم تقول للتانية انتي شنو !!! لكن تظل هي فلك الخمسطاشر أغنية !!!!! عن نفسي لا يمر يوم لا أسمع فيه الباش كاتب وصدقوا أو لا تصدقوا مشبوك فلاش على التلفزيون لأعمال ود اللمين..وأسطوانة على مشغل أسطوانات شابك فيهو ود اللمين..وفلاش تاني على الرسيفر لأعمال لي ود اللمين وده كلللو عشان ما يجلي أييي إحتمال لما اقرر أسمع ود اللمين فبكل بساطة انا في كل يوم وتحت أي حالة لو ما سمعت سوف يأتي باسم الثغر يلووح بي الأماني ممكن يجيني شلل أطفال وأرتكاريا في الضمير..
بس وبكل أسف تظل في التلاااتة فلاشات وأسطوانات دي الموجود هو نفففس الأعمال !!!!
أشفقت على ود اللمين من كيفية تكملة هذه الحلقات وما أخفيكم سر لو قلت ليكم ممكن المرة دي التركيز ح يكون في قصص ود اللمين وحكاياته وونسته أكتر من الإهتمام بي أغانيه لأنو وبكل بساطة بعد عدد معين من الحلقات ح يتم غناء أغنيات غصباً عن ذوقنا العام سنقر ونبصم أنها من روائع الغناء السوداني فقط لأنو مغنيها وملحنها ود اللمين لكن لو جينا فككناها لوجدناها أغنية أكتر من عادية في كلماتها..
عن نفسي كنت أتمنى أن يتم تسجيل زورق الألحان في 15 حلقة وإفساح ال15 حلقة الأخرى لي فنان تاني لأنو ما اظن كل أغاني ود اللمين مربوطة بما يدعو للتوثيق والحكي وقد تكون اغاني عادية وإن كنا عملنا منها بطولات ..فأغاني من شاكلة خمسة سنين وأربعة سنين ويا معاين من الشباك وياحاسدين غرام اغاني لو تغنى بيها طه سليمان كان ممكن عااادي تلقى ليك صحفي داااقي فيها جرس !!!!
اعتقد إنو سلمى السيد تعاملت مع برنامج التوثيق للبرنامج ده بي فهم سؤالنا التقليدي الكانوا بيسألونا ليهو زمان فنانك المفضل منو وردي ولا ود اللمين؟؟؟ وعليه قررت بعدما إستضافت وردي إنو لازم يكون القادم هو ود اللمين .وبراهنكم من الليلة دي ولو ربنا مد في العمر والآجال التوثيق القادم ح يكون مع عبد الكريم الكابلي في سلسلة حلقات بي إسم " يا حلو "..
صراحة ولو إني فوق قلت النقة دي ما للمقارنة إلا إني بلقى روحي مجبووور اقول إنو ما يقدم في زورق الألحان اضعف بي كتييير من ما قدم في أعز الناس..ونسبة المشاهدة العالية لي أعز الناس ما أظن حاز عليها زورق الألحان ..غير إنو اللي بتوقع نفع زورق الألحان لينال نسبة مشاهدة معقولة هو ضعف المنتج في باقي القنوات في نفس التوقيت !!!


تخريمة :
حينما يبدو حبيبي فوق القلب يحبو..
حوله هالات نور بها الأضواء تخبو..
وأغاريد الأماني في حنايايا تشب..

مثل سريان الحقيقة في مشاعرنا العميقة..
مثل حلم الدهر يأتيك سريعا في دقيقة..
عندها أنسي كياني..

عهده بالحب أيام ستكثر وتطول..
ويح نفسي منك يابدري اذا حان الأفول..

الفاروق.. إزيك يا مان

أبو اللمين ووردي كلاهما يشكلان هرمي الغناء السوداني بلا جدال

وبينهم وبين بقية الفنانين بون شاسع جداً جداً جداً.. وجداً :)

لكن بما إنك جريت للمقارنة "واللي هي هدف هذا البوست كما هو واضح من العنوان".. فعليك الله في ذمتك خليني أسألك سؤال..

لو استمر وردي في الغناء لخمسمائة عام فهل كان في مقدوره أن يقدم عمل يوازي أو حتى فقط يقترب من "زاد الشجون" أو "بتتعلم من الأيام" أيقونتي الغناء السوداني إلى أن يرث الله الأرض ومن عليها، واللتان لو لم يقدم أبو اللمين غيرهما لكفتاه للجلوس على عرش الغناء السوداني للأبد..

الأخ/ عمر الفاروق

رمضان كريم وتصوم وتفطر على خير وكل عام وإنت بخير.

ياخ، ظلمت الرجلين يا رجل..

وزورق الألحان لم يتم الإعداد له بشكل جيد والمعد ومقدمة البرنامج لا يعرفون مفاتيح شخصية الرجل، إطلاقاً.

وأديك مفتاح واحد مثلاً:
رهان الرجل على/وفي آلة العود، ولو كنت المسئول، لن أستضيفه ومعه أوركسترا، تتم إستضافته بآلة العود فقط، ومحزن جداً منظر العود وهو متكول ومهمل بالجانب. ولو غنى في رمضان واحد (الحب والظروف) لما كفانا الشهر نقاشاً وتحليلا. وسوف أختم الشهر معتذارا للمشاهدين عن عدم تمكني من إستعراض كيمياء هذه الأغنية وأسرارها. وسوف أعدهم بمواصلة الحلقات في الشهر القادم مع محاولة الدخول في أغنية (عيوناتك) مثلاً، آملا في أن أستطيع إكمالها في رمضان الذي يلي رمضان القادم، وهكذا.

وعندك مثلاً مفتاح آخر وهي شهادة الموسيقار الكبير/ عمار الشريعي عن الرجل والتي قدمها في أربع حلقات من إذاعة (صوت العرب) وكان أن طلب عمار الشريعي في ذلك الوقت فقط أن يزور المنزل الذي يسكن فيه الرجل. ولك أن تتخيل ماذا كان يريد هذا من ذاك بمثل هذه الزيارة، وهذه أيضاً لها علاقة وقوية جداً بسر مفتاح آلة العود في شخصية الرجل وسر آخر لا يعلمه إلا الله وفيزياء شخصية عمار الشريعي، لأنه وببساطة عمار الشريعي (مع التقدير والإحترام) لا يستطيع أن يرى لا المنزل ولا ما يحتويه.

وجوانب أخرى كثيرة وشهادات عن أغنيات لحنها للآخرين وأغنيات غناها هو وأعجب بها من الآخرين وأسرار وأسرار. وطبعا دايما الكلفتة وصعوبة شخصية المستضاف أيضا لها الأثر الأكبر في نجاح وفشل مثل هذه برامج.

ولك تحياتي...

Quote: لو استمر وردي في الغناء لخمسمائة عام فهل كان في مقدوره أن يقدم عمل يوازي أو حتى فقط يقترب من "زاد الشجون" أو "بتتعلم من الأيام" أيقونتي الغناء السوداني إلى أن يرث الله الأرض ومن عليها، واللتان لو لم يقدم أبو اللمين غيرهما لكفتاه للجلوس على عرش الغناء السوداني للأبد..

يا راجل !!!!!!!!!!!!

الهادي يا وديع :

Quote: "زاد الشجون" أو "بتتعلم من الأيام" أيقونتي الغناء السوداني إلى أن يرث الله الأرض ومن عليها، واللتان لو لم يقدم أبو اللمين غيرهما لكفتاه للجلوس على عرش الغناء السوداني للأبد..

أها جنس الكلام بتاع لكفتاه ولربعته على عرش الغناء و و و ده الكلام المييت الأنا بقصدو برضو ضمن المقارنة..التربع على قمة هرم الناء السوداني شئ ضرب من المستحيل وأغنية أغنيتين فيهو ما بتأكلك عيش لأنو وبكل بساطة ح تلاقي في زي جغلومية فنان تاني عندهم من نفس معيار لكفتاه دي..ح تقول لو تغنى إبراهيم عوض بيهييجتني الذكرى لكفته ولو تغنى ابوداؤوو بي فينوس لكفته ولو تغنى عثمان حسين بي انا والنجم والمساء لكفته ولو تغنى ولو تغنى ولو تغنى لحددددي ما تلاقي روحك وصلت لي إنو لو اغنت هاجر كباشي بي البيجي بجي بجي لكفتها..
عشان كده لازم سقف التربع على هرمية الغناء السوداني ترتفع فيها المعايير وتدخل فيها حسابات تانية التجويد وحده فيها لا يكفي!!!
بالنسبة لي وردي والخمسمية سنة والأغاني فصدقني وح أقول ليك حاجى غريبة جداً جداً جداً ..بالنسبة لي انا عمر الفاروق لو تغنى وردي بي " أمير الحسن " وحدها لكفته .اها كيف ليك؟؟؟؟
تخيييل أمير الحسن البسيييطة دي انا بشوفا كفاية فما بالك بي بيييت الكلاوي..



تخريمة :
ياخ انا محححنتني بي الخمسمية سنة دي وبقبلا منك ..هيي لكن ساطور ده ذنبو شنو تخلعوا الخلعة دي :)

(وردي) و (محمد الامين) بلغة ناس الكورة ممكن اقول ليك هم زي :

(حامد بريمة) و (احمد ادم عافية) مابتقدر تقول (احمد ادم) ما قواني

لكن هل بلحق حامد بريمة ؟!

بعد كده كل زول يشوف حامد بريمة بتاعو منو ههههههههههه

ابو الزهور يا حبوب:

Quote: وزورق الألحان لم يتم الإعداد له بشكل جيد والمعد ومقدمة البرنامج لا يعرفون مفاتيح شخصية الرجل، إطلاقاً.

بالنسبة لي مفاتيح ابو اللمين فهي مفاتيح تم إستخدامها في مقامات وبرامج أخرى وبي تسجيلات باتت منتشرة عند المستمع السوداني وهنا انا بقصد مفتاح العزف على آلة العود..بالنسبة للمفتاح التاني فانا واحد من الناس ما بحب قصة غعتراف موسيقيين في نظري ولو ختينا الرحمن في قلبنا فهم أقل قامة من موسييقيينا..فعن نفسي انا شاييف إنو ود اللمين هو اللي مفروض يقرر يفتش عن الشريعي عشان يدرس إبداعه ويقيييمو فود اللمين قامة موسيقية ماف كلام ويحق له تقييم تجار الاخرين ..بعدين قصة إنو الشريعي يقول عايز يزور بيت الزول ده فأظنها بتكون دي واحدة من وهمات قصصنا حقت السودانيين لأنو يخييل لي ود اللمين قضى فترة ليست بالقصيرة في مصر يعني جاهو فييي حتتو وقصر ليهو المشوار بدل ما يكركرو السودان فهل سعى الشريعي للقاء وداللمين للتدارس والتفاكر حول موسيقية وفلتات ابو اللمين اللحنية ؟؟
قصص كتيييرة سمعناها عن صوت محمود عبد العزيز أثق تمام في رواياتها لكن برررضو ما بشوف ده مقياس لي إنو نتتكل عليهو في تقييم مبدعينا فنحن ليس بأقل منهم حتى ننتظر منهم الثناء..

Quote: قصة إنو الشريعي يقول عايز يزور بيت الزول ده فأظنها بتكون دي واحدة من وهمات قصصنا حقت السودانيين

الفاروق يا عمر:

والله على ما أقول شهيد والدنيا رمضان وأنا صائم لله ومنتظر جزاءه وشاهد على القصة . القصة دي حقيقية وما فيها أي وهمات يا رجل. الشريعي قدم حلقات عن محمد الأمين في برنامج كان يقدمه من الإذاعة المصرية وشهد فيه بأن محمد الأمين من أميز الموسيقيين العرب. وقد إستضاف الشريعي محمد الأمين (في فترات تواجده بمصر) في جلسة خاصة بمنزله وأبهره الأخير بنماذج كثيرة من الغناء العربي القديم والحديث وكيف أنه (محمد الأمين) كان قد إستفاد من كل ذلك وخرج بأسلوبه (السوداني) الخاص والمميز.

ودي حقائق يا صديقي وليست وهمات..

والله يا عمر
المقدمة يا عمر حقت الحلقة بتاعت ود اللمين

دندندن ترررالا لا ترالالالا لا
بالجتار
براها 30 حلقة

ابو الزهور :
الوهمة البقصدا ما تكذيب قصتك ... الوهمة البقصدا إنو ليي نحن بندعم رأينا بي ما قالوهو ناس من الخارج ممكن هم يكونوا أقل مننا إبداعاً ..يعني انا قصدت ليك إنو مفروض ود اللمين هو اللي يقييم ويدرس حالة الشرييعي وليس العكس .. افهمني يا حبوب في النقطة دي تحديييداً لأنو فعلا قاعدة توجعني ..

عمر يا عثمان :
اها يلا النقول ليك الكلام الواضح وبما إنك ضربت مثال واضح...
ماف أيييي مقارنة بين حامد بريمة واحمد ادم..بريمة ده أعظم حارس مرمى أنجبته الملاعب العالمية مش السودانية ..السودانية دي عايزين زي مليون سنة كده عشان نجيب زول زي بريمة ده ..وبقول ليك الكلام ده ليي عشان أوريك إنو في أمور ما محتاجة الناس تدخل فيها المقارنات لأنو الحاجات فيها محسومة لو مسكتها في العموم ودون تخصيص جزئية معينة عشان تقارن بيها.. يعني بريمة تسمكو كحارس مرمى متكامل لكن ما تجي تقول لي والله ياخ احمد ادم احسن من بريمة في الكرات العرضية :):)
وقع ليك بريمة حقي منو ؟ :)))

بكلام الشفع الزمان داك , انا محمد الامين دا ما بسمع فيهو ولا كلمة , لحدي قريب الجامعة , كنت بسمع وردي من باب المجاملة وكونه مافي لي طريقة مع الشعب السوداني اقول ما بسمع لوردي , بصراحة الوقت داك غناهو ما مقسم معاي , والحق لله محمود عبد العزيز كان مالي علينا اضنينا , انا سمعت محمود من تزعة وتمانين كدا شرايط جاية من كوستي الزمن داك وبعدها بداية التزعينات الشرايط بتاعة الحفلات من الابيض ,كان عندي ما لا يقل عن عرة خمسطاشر شريط وما كان معروف في الخرطوم زاتو زي الناس , دي تخريجة زي حقتك الفوق ديك , المهم بعد " نضجت غنائيا شوية " وسعت مواعيني شوية وبدا وردي يقسم معاي وكل مرة يدهشني بالاضافة للقصص بتاعة الوهمات السودانية الكنا بنسمعها عنه عملت توم وشمار شوية , وللامانة الفنية انا عثمان حسين للحظة دي ما قسم معاي ولا بفرز كلامو تصدق وخليك من احمد المصطفي بشوفو زي البغني بطريقة اناشيد المدرسة المهم نرجع لي موضوعنا عشان ما نجيب لي واحد من القراء ازمة منتصف الليل بتوقيت الساحل الشرقي , يوم الفارقة بين وردي وود اللمين زي مفارقة الكيزان بتاعة مذكرة العشرة كان يوم تكريم وردي بخمسينيته الفنية , الجبت منها جزء في الفديو المرفق ادناه عندما حسمت امري بانه وردي امبراطور الغناء السوداني بلا منازع وبيجي بعده محمد اللمين بس في كمين خانة فاضية بينهم
في اناء مراهقتي الموسيقية وانحيازي لود اللمين كان ان عملت بوست في بدايات البورد عن اجمل اغنية سودانية واجبرت الناس تسوط علي زاد الشجون والطير المهاجر , طبعا كنت متيقن انه زاد الشجون حتدمر ما سواها من الاغاني ولو استدعي الامر اني اخج ليها التصويت لخجيتو , لكن للاسف فازت الطير المهاجر بكل سهولة , الامر الرجعني اسمعها من جديد وافوزها لاحقا وهذا لا يغمط لثانية انه السي دي بتاع زاد الشجون بتاع لنضن داك مركب في الحتات القال عليها عمر الفاروغ دي كلها اللهم الا مع الرسيفر دي ما عرفت ليها

بالرغم من انه الاغنية حقت وردي الا شوفوا الراحة البغني بيها وردي في ذات الوقت الرهق البواجهو ود اللمين في نفس الاغنية والكلمات واللحن
زي الراحة الغني بيها ود اللمين اغنية مكتول هواك مع عبد القادر سالم العاني معاناة فائقة في ترديد اغنيته وبجواره ود اللمين

وليد يا حبوب:
القصة ما تفتيت وتمحيص..وزي ما قلت ليك لو بارينا قصة الحتىة دي مدرسة براها والحتة ديييك عايزة ليها حلقتين والأغنية ديييك عايزة ليها اسبوع فده ما حيكون معيار لأنو بي بساطة أي فنان في الدنيا دي عندو جملة موسيقية أو لحنية أو كلمة أو قصة أغنية ممكن لو قعدت تفتفتها تقول والله دي عايزة شهرين ..بل ممكن تمشي لي ابعد من كده وتقول والله المقطع ده اداهو بي طريقة عايزة سنة عشان تشرحا للناس..
يا وليد لو بي الفهم بتاع حتتي وحتتك وعزفتي وعزفتك محمود عبد العزيز ده عايز ليهو قرن كااامل عشان الناس تقدر تفهم صوتو ده جايي من وين وكييف وليي ..
انا بتكلم عن سباق مارثوني لي أغنيات مفروض تقدم طيلة 30 حلقة في شكل توثيقي ..
يلا بصراحة انا قصة إنو يعملوا من اغنية اربعة سنين مثلاً حلقة يتحكي عنها وعن تاريخا دي مااا واقعة لي..لكن افهم إنو فعلا ممكن تفرد لي زاد الشجون عشرين حلقة ..

المشكلة مافى ودالامين ووردى ...المشكلة فى العقلية بتاعت
تشجيع الكورة لما تجى تتشوبر فى الغناء ...ياولدى ماتخليك
مع ناس خليفة وبله جابر وحارسنا الجديد القصير وجنو يملص
الكوره دا .......مالك مال الغناء ياخ


عمر الفاروق اختشى ...

اساسي يا رايق..
رمضان كبير ياخ..
طبعاً أثق في ذائقتك الفنية وخصوصاً لما تتقاطع معاي وهذا فيما يخص الحووت والراحل نادر خضر..وأسة جابت ليها تقاطع غريب جداً فيما يتعق بي الراحل أحمد المصطفى فانا عندي نفففس الهو زاتو :) بس عصرت علينا شوووية بي قصة عثمان حسين دي :)
الراحل العبقري وردي واحدة من احاديث الخرافة الفنية ..الناس فايت عليها إنو ظهور وردي في حلقات أعز الناس كان بي صورة مختلفة عن ما تعود الناس عليهو في كل مناسبات ظهور وردي واللي نااادراً ما كان وردي يحكي فيها عن جملة موسيقية عن دخلة ايقاع او دخلة ساكس..عن كلمة وتغييرا وعن وعن وعن كل خبايا وردي...بينما معظم ما حكى ويحكي ود اللمين يتشابه للحد البعيد مع كمية حوارات أجريت معاهو قبل كده وكان ده هو طابع حديث ود اللمين بالتالي انا مابشوف إنو في إضافة تستدعي إكتشاف وإعادة إكتشاف الباش كاتب المبدع ود اللمين..

والله يا محمد لو في مشكلة واااحدة في الموضوع ده فهو أربجي !!!!!
ياخ أربجي؟؟ معقولة بس؟

سيد البوست

والضيوف

انا شخصيا عندي قناعة

انه اعنية وا أسفاي

براها

حتدخل وردي الجنة


خليكم من الباقي

عمر الفاروق ..

Quote: التوثيق القادم ح يكون مع عبد الكريم الكابلي في سلسلة حلقات بي إسم " يا حلو "..

من مصدر موثوق .. أتن التوثيق القادم والي عن نفسي أنتظره بفارق الصبر سيكون مع الفنان إبن البادية بي إسم (حسنك أمر) ..

عبد الكريم الكابلي كفاهو توثيق الجزلي ..

يا سنوسي نحن باقي ليك كان بارينا اغاني وردي دي بنقيف؟؟ واسفاي واحدة من مدارس وردي المتفردة ..

والله يا ابو النيز عايز الجد ولا الجمبو؟ صلاح ما سااااهل وغناهو متعة ..بس تعرف متعة حلقات صلاح بن البادية تزداد متعتها في حفلات الصالات وآل النيل ابوقرون يزينون الصالة والمخرج يتحيير يجيب ياتو تربيزة ويصوور منو ويخلي منو :)

15 حلقة !!

يا معروف كنت تعمل معروف وتجيبا بي تسجيل لندن كنت إعتمدتها ليك بي 40 حلقة ..
زاد الشجون اول عمل غنائي طويل احفظو بي حذافيرو آلة آلة وعزفة عزفة وقفة وقفة :)

اخ عمر

رمضان كريم


الرحيل المفاجئ والسريع للهرم وردى حرمنا من اعز الناس الجزء الثانى والجزء الثالث الخ


رحمه الله وأحسن اليه

Quote: المشكلة مافى ودالامين ووردى ...المشكلة فى العقلية بتاعت تشجيع الكورة ....

الأخ عمر
أتفق مع محمد ( من ناحية عامة بدون الإشارة لشخصك أو غيرك .. )
فالغناء ليس كالكرة والفنان غير لاعب الكورة. فالتعصب للأندية و الفرق - أخل بعملية التقييم و جعل متعة كرة القدم في الفوز و الانتصار و كسب النقاط و الكاسات علي حســــاب الإســتمتاع بإبداعات اللاعبين و ما يقدمونه من فن.

الإخوة المتداخلين
بالله عليكم أبعدونا عن هذه المقارنات التي ستجلب وراءها العصبيات و لا تفســـدوا علينا مزاجيتنا الســــــــــــودانية العالية في الإســتمتاع بإبداعات عباقرة الفن السوداني. فالغناء إبداع لا يخضع لمقاييس محددة متفق عليها بل علي الحالات المزاجية الفردية و الإستعداد النفسي - الظرفي- للمتلقي هي التي تتحكم في درجة تقبله إستمتاعه بما يتلقاه . قال العقاد (والشعر من نفس الرحمن مقتبس) و شكسبير - أعتقد - قال (الموسيقي غذاء للحب) و أي محاولة لتوحييد المعايير أو فرض تقييم شخص علي آخر... فاشلة

وردي و ود الأمين .... نعمة الله و هبة الســــــماء لأهل الســودان ..... فتمتعوا بما أنعم الله عليكم و كونوا له حامدين ..... يرحمكم الله
.

(يا وليد لو بي الفهم بتاع حتتي وحتتك وعزفتي وعزفتك محمود عبد العزيز ده عايز ليهو قرن كااامل عشان الناس تقدر تفهم صوتو ده جايي من وين وكييف وليي ..)

ظلمت الراجل يا عمر
لا اعتقد ان الفية كاملة تفي بالغرض


بالنسبة لحتتي وحتتك .. طبعا نحن ناس ساي اكيد حا ندخل معاكم في البوست ده بفهم الناس الساي ..
نحن نقول قولنا والبحللو وفاهمين الشغلانة يقولوا قولهم ..

رُبَّ اغنية تختها في الربلي يوما كاملا .. ورُبَّ شريط يتلطع في درج السيارة من يوم اهدائه لك و الى ان تبيعه معها

انا كده بفهم الغُنا او بحسو

الاخ عمر
( )
كيف الحال ،،، وان شاء الله رمضان ما تاعبك ،،، ما كتبته دليل تعب رمضانى ،،،
اخى ايعقل ان تصف الفنان وردى بالعبقرى و تكتب عنه هكذا ...
النقد الذى قدمته و كتبته عبارة عن مشاريع كتابية متنوعة مثال
1- الاعداد للبرنامج قناة الشروق مثالا
2- مقدمة البرنامج
3- حوارية الفنان محمد الامين و إسلوبه
4- مقارنة محمد وردى بمحمد الامين
5- عددية الاعمال الموسيقية لمحمد الامين لا نوعيتها
6- حوارية محمد وردى فى مناقشتة لاغنياته
7- انطباعية كاتب النقد الفنى عن العملاقين محمد وردى و محمد الامين
8- عدم المناقشة الفنية للاعمال الموسيقية الغنائية للفنانين
9- عدم التطرق للالحان الاوركسترالية وتفعيل الالات الموسيقية من خلالها وادخال المقدمات الموسيقية فى الاعمال الغنائية
ـــــــــــــ
ايعقل ان تكون كل هذه المواضيع فى موضع نقدى واحد ؟؟
ـــــــــــــ
لى عودة تحليلية لى لغتك الكتابية وإسلوبك النقدى

أبراهومة :
رحم الله العبقري وردي ..اعماله بيننا وأولادنا وأولاد أولادنا إن شاء الله كان ربنا شاء ح ينهلو من هذا النهر الخالد..


ابو الخلد :

Quote: الأخ عمر أتفق مع محمد ( من ناحية عامة بدون الإشارة لشخصك أو غيرك .. )

غايتو لو في شي واااحد لخبت مداخلتك دي فهو قصة بتفق مع محمد دي :) :)..
يا زول إنت بي صحك؟؟ محمد ده مع روحو ما بيتفق :)..طبعا محمد قصد بي قصة الكورة دي شيييتن تاني ..ود اربجي ده ما عندو قدر فكرك ده لمممن يكون مشى لي حتاتك دي..
في داخل كلامي يا خالد لو قريت ح تلقاني قلت إنو مزاجية المستمع السوداني خلتو من الصعب يقول ده فناني المفضل ونبهت لي إنو كلنا بنقطع من كل بستان زهرة ..انا لحدي اسة ما تطرقت لي مقارنة عمل بي عمل ولا صوت بي صوت ولا لحن بي لحن ولا كلمة بي كلمة ..انا غمكن قارنت المنظومة بي شكلها العام وتميز الفكرة الأولى لمن كانت مع وردي بينما كانت الفكرة التانية هي محاكاة وتكرار لي برنامج في قالبه مفروض يكون توثيقي أكتر من إنو برنامج لترديد وتسجيل كل أغنيات ود اللمين !! وهنا قصدت بي التوثيق تسجيل نوعية معينة من الأغاني وليس التوثيق بمعنى تسجيل كل ما يتغنى به الفنان والسلام..

يا وليد محمود ده وعشااان جنس كلامك بتاع ما بنقدر نديهو حقو ده عشان كده أصصصلي ما بقدر أجي جمبو ..تستمتع وانت في حضرتو وتربع يدينك تسمع الصوت البيخلع ده وتواصل إندهاشك باقي اليوم ..
بالنسبة لي الساي فبالله انت عارفني من خريجي مدرستك بتاعت الساي دي ..فخلي جماعتنا ديل في حاجاتم ونحن في حاجاتنا ..:)

حمزة يا سليمان ..

Quote: كيف الحال ،،، وان شاء الله رمضان ما تاعبك ،،، ما كتبته دليل تعب رمضانى ،،،

النصيييحة التعبني ما رمضان ..تعبتني مداخلتك الأولى ديييك ..:) ياخ انا لحدي أسة كنكوجي محتار..
كدي عليك الله يا حمزة جدجد كده وبعد مزاجك راق حبببة كده إنت كنت عايز تقول لي شنو؟
المهم ..

Quote: - الاعداد للبرنامج قناة الشروق مثالا 2- مقدمة البرنامج 3- حوارية الفنان محمد الامين و إسلوبه 4- مقارنة محمد وردى بمحمد الامين 5- عددية الاعمال الموسيقية لمحمد الامين لا نوعيتها 6- حوارية محمد وردى فى مناقشتة لاغنياته 7- انطباعية كاتب النقد الفنى عن العملاقين محمد وردى و محمد الامين 8- عدم المناقشة الفنية للاعمال الموسيقية الغنائية للفنانين 9- عدم التطرق للالحان الاوركسترالية وتفعيل الالات الموسيقية من خلالها وادخال المقدمات الموسيقية فى الاعمال الغنائية

قبل ما تبدا وانا برضو اعلق على اللستة حقتك دي عايز افهم النقطتين 9 و 8 هل انت بتقصد انا ما إتطرقت ليهم وإنهم مشروع كتابة نقدية ولا بتقصد إني كتبتهم في موضوعي في بداية البوست؟
غايتو للضمان كده لو طلعت قاصد بي عدم دي إني ما جبت سيرتهم تكون بالغت بوليغ شديد وتبقى ناقضت نفسك بي نفسك ففي البداية بتقول لي ما تخت كل البيض في سلة واحدة وتحت تقول لي مالك ما ختيت البيض ده مالك في السلة !!! ولو طلعت قاصد إني جبت سيرتهم فبتكون بهتني والله لأنو انا في بداية موضوعي اصلو ما جبت سيرة الألحان الأوركسترالية والمقدمات..
الأهم في الموضوع ده كلللو إني راجي كتابتك واللي اكيد ممكن تكون مفيدة جداً وتضيف للحوار ..وده ما كتل قلب أوووعك تتغش لالالا ده كلام زول عايز يتشوبر معاك ويحددا بي لغة العوام وانت بي كلام المثقفاتية ونوريكم فهمنا وتورونا فهمكم بس خلي في بالك إنو نحن العوام ديل ما ساهلين وعندنا إضنين ممكن تكون أنضف من إضنينكم ..

تخريمة :
شايفك في التسجيل الجايبو اساسي ده وااااقف شماعة :)..

الاخ عمر الفاروق

لولا زروق الالحان واعز الناس الميزان كان حيختل
ما بالشكل المطلق حسب الكتالوج السوداني في التعامل مع الاشياء ووضع الامور دايما في حافتها حتى في الفن والتذوق

ود اللمين بالنسبة لي باعتباري واحدة من جمهوره ، لما يغني دي مدرسة في حد ذاتها
يعني زورق الالحان ممكن تكون 30 يوم براها
غير حروف اسمك وسوف يأتي ومسيحية و..و..و وعدة من ابداعات أخر

في رأي انه سواء وردي او ود اللمين ما كان حيقدموا افضل مما قدموه ، يعني وصلوا لنهاية حدود ابداعهم العلينا بعد كدا نحافظ عليه بالاستماع الجيد له
الابداع مرات بيصل نقطة مش بيقيف عندها لكن بصبح صعب تقديم افضل منها تاني


فبتبقا برامج زي اعز الناس وزروق الالحان واحدة من نوافذ المحافظة على هذا الابداع بالذات للفنانين الكبار

Re: اليوم أنعي لكم عقد الجلاد ... تغمدها الله بواسع رحمته

ما عندي طريقة للوشوش الخُدر

غايتو متابعين

المقارنة صعبة شديد يا عمر
وردي يفوق ود اللمين في بعض الجوانب، وكذلك ود اللمين يفوق وردي في بعض الجوانب..
___
وردي وود الأمين هرمان يقفان جنباً لجنب..

يا مايا :

Quote: يعني زورق الالحان ممكن تكون 30 يوم براها غير حروف اسمك وسوف يأتي ومسيحية و..و..و وعدة من ابداعات أخر

أها شوفتي و و و و دي هي الأنا بقصدا في قصة برنامج زورق الألحان..و و و دي يا مايا عند ابو اللمين ما بتتم ال30 ابو اللمين صاح بيهتم بي الكيف لا بي الكم ودي ما نقطة خلاف ولا هي عيب أو منقصة من هرمية الأستاذ ابو اللمين ..انا ما قادر افهم قصة أي زول يجيب ليك اغنية ويقول ليك دي براها 10 حلقات ودي 30 ودي 50!!! هل بتقصدو تفكيكها الموسيقي؟؟ قوالبها اللحنية؟؟ كللماتا؟؟ طريقة الاداء؟؟ بتقصدو شنو بي بالضبط..؟ لأنو زي ما قلت ليك فيك الخاصية دي ما حصرية لا على وردي ولا على ود اللمين فكل فنان سوداني عندو عمل عملين تلاتة يحتاج فيها هذا العمل لي اكتر من 60 حلقة زاتو..
عارفة اللحظة بسمع في إعادة زورق الالحان للمرة التانية وود اللمين بيتغنى بي انتي مهما تغيبي عني ومعاهو عمر محمود خالد..أها شوفتي نوع اغاني عمر خالد دي انا تقييمي ليها انها ما اغاني توثيقية ..اغاني طابعا عادي..كلماتا عادية ..وحتتتى اداء ابو اللمين فيها بينزل الكييرف حقو من هرمية الاعمال الخالدة حقتو..

طيييفووورنا :

Quote: المقارنة صعبة شديد يا عمر وردي يفوق ود اللمين في بعض الجوانب، وكذلك ود اللمين يفوق وردي في بعض الجوانب.. ___

أها يا ياسر ان جيت للجد ومن وجهة نظري انا شايف إنو المقارنة ما صعبة ..نحن برانا المتهيبيين قصة المقارنة دي لأنو فعلا بنتعامل مع أهرامات ..وانا عن نفسي وزي ما وضحت فوق ما كنت عايز اتجرجر لي قصة المقارنات دي ..
لكن انا بشوف وردي يفوق ود اللمين في كثييير من الجوانب بينما يتفوق ود اللمين في بعض الجوانب ..

Quote: غايتو لو في شي واااحد لخبت مداخلتك دي فهو قصة بتفق مع محمد دي :) :).. يا زول إنت بي صحك؟؟ محمد ده مع روحو ما بيتفق :)..طبعا محمد قصد بي قصة الكورة دي شيييتن تاني ..ود اربجي ده ما عندو قدر فكرك ده لمممن يكون مشى لي حتاتك دي

ههههههههه ....والله دا كلامى ذاتو بذاتو ...قلت ليك انو
المنهج فى اساسو خاطىء ...لكن كلام القصير مابتسمع ...بعدين
انت اربجى دى تنطط سبع ترع عشان تصل عندها ومن ثم تبدا
مسيرتك للخرطوم ....

عمر الفاروق ازيك
بالمناسبه ود الامين غناااي جدا ومعظم الناس البسمعو وردي بدو ود الامين مساحه سماع
ووردي زاتو عارف انو ود الامين مبدع وغناي لكن في نفس الوكت عارف انو هو سيد الشئ زاتها,يعني علي قول اساسي عارف انو هو نمبر ون وبعد سبعه تمنيه خانات بجي عمك ود الامين
وردي ده غايتو بسمعو من 86 ومدخلي للسماع الغريبه كان الغنا الوطني عشان كده لما راهقنا وحبينا وهرمنا ما خليناه.
وردي نسيج وحده ولا يمكن بلا لا يصح مقارنته باي فنان سوداني اخر,مع كامل احترامي للاخرين من فناني بلادي.
الود ,جميله ومستحيله,ارحل,اسفاي ,الطير المهاجر,الحزن القديم,وغيرو وغيرو للناس البجو يقولو ليك ود الامين بتتعلم وزاد الشجون تكفيهو,اها وردي ده اكة جلة اكة مشكا تكفيهو,ما عارف كتبناها صاح ولا جغمسناها
________________________________________

من بوست افترعته في نعي الهرم الخالد وردي

اذكر جيدا في منتصف تمانينات القرن الماضي,وحين كانت الساحه الفنيه تذخر بالعمالقه ابوداؤد وعثمان حسين وحسن عطيه والشفيع,اتذكر ثورة ابريل وكنت حينها في الصف الخامس الابتدائي,شدني هذا الصوت الدهاليزي كما وصفه اسماعيل عبد المعين وهو يعبئ فيا تلك الروح الثوريه والتي مازالت مشتعله,فقد كان وقودها صوت وردي واناشيده اكتوبر الاخضر,ووطنا وبلا وانجلا وياشعبا لهبك ثورتك ويا شعبا تسامي,ملأت هذه الاغاني الروح واشعلت الوجدان قمحا ووعدا وتمني,وحين داعبنا الحب بعدها وجدنا سلوانا في الناس القيافه وخلاص كبرتي وليك تسعتاشر سنه ,وحين نحن للمحبوبه نحضن المسجل علي انغام اقابلك,وحين يعصرنا العشق بجبروته نيمم وجهنا واذاننا شطر جميله ومستحيله والود وارحل,وحين نخاصم المحبوبه نتفيأ ظلال بعد ايه واسفاي,وحين تبخل الحبيبه بالصوره نتنسم موسيقي توعدنا وتبخل بالصوره,وحين تفتر الاراده نشحذ الهمه بالمستحيل,وحين الحزن نجد عند وردي .الحزن القديم,وفي اسفارنا وبعدنا نقرب مسافات الغربه بالسفر عبر اجنحة الطير المهاجر..
وردي مذ ان تفتحت اعيننا علي الدنيا وتشكل وعينا الفني لم نجد غيرك مهذبا للوجدان ومشنفا للاذان بالحان وموسيقي لم ولن توجد,كنت عبقريا في اختيارك فلا عجب ان تغني للفيتوري وصلاح احمد ابراهيم ومحمد المكي ابراهيم ومحجوب شريف واسماعيل حسن والدوش والحلنقي وكل شعراء بلادي الجهابيذ.
كنت ملهما لنا وملجأنا حين الحزن والفرح وعند العشق وفي الفراق وحين الثوره,في كل حدث من اجداث حياتنا كنت حاضرا ومؤثرا بعبقريتك وتفردك,احبتك الاجيال جيلا بعد جيل وعشقتك الثقافات ,ليس فقط في الوطن ولكن عشقك الاحباش والارتريين وغنت معك الصومال ونيجريا وجيبوتي وكل افريقيا فتوجتك افريقيا امبراطورها الاول دون منازع. كنت شامخاً شموخ اسلافك الفراعنه وكبيرا كبر اهراماتهم وستظل فينا خالدا خلود النيل وجاريا في وجداننا كجريانه تماما.

يا عمر سلامات ورمضان كريم يا حبوب

اتفق مع ياسر فكلاهما مدرسة قائمة بذاتها وتقريبا كل منتوجهم الفني محفوظ في ذاكرة الشعب السوداني
القامتين ما بلعبو في حاجاتهم وبحترمو فنهم شديد عشان كدا ما بستعجلو يمرقو حلة الغناء بتاعتهم الا
بعد ان يتاكدا من نضوج الحلة وانها ستكون طيبة المذاق لجمهورهما العريض.... يعني شغلهم كلو نجيض بس
المفارقة بتكون وين في مثل هذه اللقاءات؟ بتكون في منو البعرف يعرض لوحاته الموسيقية دي وينفض عنها
غبار المخبوء الذي لا نعرفه نحن... يعني منو البعرف يحكي قصة اغنيتو صاح وكيف وبياتو طريقة اتعملت متين
وفي ياتو مناسبة والحضر ميلادها منو وليه اتعملت كدا والعجبني فيها كفنان شنو واخدت كم من الوقت عشان
تتلحن والظرف بتاع تلحينها كان كيف ووووووو... دي الحاجات الما عارفنها نحن جمهور المستمعين وبكون شغفين
لمعرفتها حتى تكتمل لينا صور كانت خافية عنا.... اها طريقة عرض الفنان للصور دي وذكاء مقدم البرنامج وكيفية
طرح الاسئلة ومقدرتة علي استخراج معلومات منهما دي البتخلق لينا نحن متعة المشاهدة لاننا بنكون بنشوف لينا في
حاجة ما شفناها قبل كدا. انا غايتو يا عمنا ان داير النجيضة بعت ليك برنامج اغاني واغاني دا منذ امد وبقيت
بس مقابل الناس الكبار ديل ناس وردي والباشكاتب وحوتة واغاني واغاني دي شعرت انو جد قد نضب معين عمنا السر قدور
وبقى ما عندو حاجة يضيفها والقصة بقى يتمها ضحكات ساي.... مررررررررة مرة بتاوق اشوف فضل ايوب وبتخارج.
المهم البوست جميل وكلامنا فيهو كتير ان لقينا فرقة مع العشرة الاواخر والضيقة الحاصلة فيها دي.

فاروق يا فاروق..
قصة ود اللمين غناي دي ما اظن عايزة اتنين تلاتة وزي ما انت قلت البيسمع وردي بيسمع ود اللمين وود اللمين عندو الاغنيات الهرم دي ما بننكرها لكن السؤال المهم اللي انا فعلا بفتش ليهو إجابة هل قصة ل كفته دي كافية لوضع فنان على قمة هرم الغناء السوداني؟؟
انا في رايي هرمية الغناء السوداني صعب جداً إنو الزول يصلها بمجرد عدد محدود من الأعمال وفي نفس الوقت برضو ما بيعتليها الفنان في إنتاج غزير لكن نصصصو كلام ساي..عليه الهرمية عايزة الحاجتين ديل يتوفروا في الفنان ودي انا ما شوفتها إلا في العبقري وردي..

يمة (الخير) بريدو :)

Quote: اتفق مع ياسر فكلاهما مدرسة قائمة بذاتها

أها إنت جبت لي جملة محييراني وما قادر برضو افهما مع إنو بنرددا طوااالي..
لييي مردسة قائمة بي ذاتها؟؟؟ هل ممكن نخليهم الإتنين في مدرسة واحدة ونقارن؟؟
إنت قلتها براااك فوق إنو الإتنين بيتبعوا نفس افسلوب في إختيار اغانيهم وهو عن طريق الترييث والتدقيق والتمحيص والنجاض..عارفك ممكن تقول لي انا بتكلم عن اختلاف مدارسهم اللحنية لكن انا بشوف انو كلللل فنانين السودان ايي زول عندو طريقة لحنية مختلفة وعليه وبي كده هل بنقدر نقول إنو كللل الفنانين مدارس مختلفة؟؟؟
انا عن نفسي ولما قلت يتفوق وردي في الكثييير بينما يتفوق ود اللمين في بعض قصدت بي بعض دي تحديييدا التجويد الموسيقي ليس إلا..
دي الحاجة الوحيييدة اللي لو وردي كان بيهتم بيها كان اصصصلا قصة مجرد المقارنات ح تكون ما واردة في ذهن اي مستمع سوداني..
صاااح كلنا عارفين كيفية إنضباطية وردي الموسيقية بل وتعنيفات وردي للعازفين اللي بتداول بين المجالس لكن ورغم عن كده بتحس إنو لما يشتغل وردي ويشتغل ود اللمين في حتة كده بتخلي الميزان يمييل في صالح ود اللمين من حيث ترتيب الشغل بدءا بي الإيقاع مرورا بي الكمنجات ختاماً بي توزيعات الفرص بين الالات ..
عن نفسي يا الخير بشوف إنو ود اللمين انتج كتييير من الأعمال في مجملها عادية سواء من خيث الكلمات أو من حيث اللحن ..بس ذكاء الباشكاتب في ترميم هكذا اغنيات جعلها من عيون الغناء السوداني في حين إنو لو الاغاني دي وبي نفس لحنها ده غناها اي زول تاني انا اجزم ليك ممكن تصنفها في باب الاغاني العادية الممكن وانت بتسمع في الشريط تجرررها وما تسمعا..
عارف يا الخير لو عايز تعقد مقارنة فييير كده وتديك النجيضة قوم جيب شرايط وردي وود اللمين في قمة نضوجهم الصوتي وعطاءهم الابداعي وخلينا نفترض كده إنو الكلام ده في منتصف السبعينات لحدي بداية التمنينات !!
يلا جيب الشرايط دي واسمع وشوف طريقة الاداء والكلمات والاغاني واللحن و و و كلللللو ..ح تكتشف البون بقا وااااسع بين ما كان يؤديها وردي وما كان يؤديه ابو اللمين ..
لكن ود اللمين بذكاء حاااد وخارق قدر ينفض اغانيهو دي من جديد ويعيد ترتيبا وصياغتها وتغليفها بي ورق سولفان ومن ثم لفها في ورق هدايا جميييل وتقديمها لي المتلقي السوداني بي صورة فععععلا جميلة ..
وردي الحتة دي ما فطن ليها او خلينا نقول ما اهتم بيها وقرر إنو اللي قدمو ده بصمة وكافية جداً لكل الأجيال تستوعبو وقد صدق فالدليل الأكبر إنو متتتتعة الإستماع لي وردي لما تسمع تسجيلاتو القديمة بينما قممة الاستمتاع بي ود اللمين كل ما تسمع ليهو تسجيلات جديدة ..
ياخ انا عندي تسجيل لي ود اللمين زماان بيغني فيهو الجريدة ..اظن كانت بتنتهي في دقيقتين ..ياخ ده كان لمن يجي لي حتة كنت عايز اقول دي بيكحا كشحة حولاااااا :)
كنت عايز اقول بحبك ..ترررررن قفلت الاغنية :)
لكن تعال شوفو بعد داك ساقا كيف وعذذذب الناس كيف لحدددي ما يقول بحبك دي..
كنت عايز اقوول....!!!
كنت عايز عاااااايز اقوووول ..اقووول..
يااا ياااايااا يااااااا..


تخريمة :
الخير اخوي نضمت فيك كتير مش؟ الحق السحور يا اخوي :)

عمر ازيك
زخيرة محمد الامين تكفي الى الابد

وانا برشح يغني لينا
في برنامج زورق الالحان
قصة ثورة
وشهر عشره حبابو عشره
والمجد للالاف تهدر (الانتفاضة)
والمتاريس من لحن الراحل د مكي سيد احمد
ووووووووووو الخ من هذه المعلقات الموسيقية الوطنيه

كييفنك يا موصلي..
وكلام حلو..وبما إنك إفترعت بعض اغاني الأكتوبريات فدي واحدة من الحاجات المريحة شديد في إنو تتعقد المقارنات بدون تحسس وخوف..
وحبابك عشرة :)

تمام ياعمر
أما قصة ثورة فهي
قمة فن الغناء الوطني على الاطلاق
أختها لاتوجد

Quote: تمام ياعمر أما قصة ثورة فهي قمة فن الغناء الوطني على الاطلاق أختها لاتوجد

بروووووف إت يا موصلي.....!!!

أثبت كلامك يا موصلي..

تخريمة :
خوفتك تقراها بروف إنت يا موصلي قلت الحقك ..:) :) :)

دوووبنا في اليوم ال21 ولخايف منو حصل!!!
يا معاين من الشباك ضمن أغنيات التوثيق...!!!
يا غالي ليك هوينا الشباك بيشهد لينا..كم مرة روحنا وجيينا..
وعايزين نزور والديك نخطب يا جميل إيدييك..

لما كتبت عنوان صمود زورق الألحان كنت تحديييدا بقصد الحتة دي وإنو مخزون ابو اللمين اللياقي الغنائي ضعييف ونفسو قصيير عشان كده كانت 15 حلقة كافية جداً لتوثيق رحلة ابو اللمين الفنية ..

اول شئ .... احمد ادم اعظم من حامد بريمة في حراسة المرمي
والدليل 17 هلال مريخ لم يهزم فيها المريخ الهلال واحمد ادم حارس للمرمي .

كنت انحاز لوردي دونما تردد في اي حديث حول وردي ومحمد الامين .. ولكن ..
عند مقارنة ما غناه الاثنان لاسحق الحلنقي :

وسط الدائرة .. الحنينة السكرة .. الصورة .. يا راجياني .. اعز الناس .. اقابلك

و

وعد النوار .. بتتعلم ..

ود الأمين أجمل لحنا واختيارا للنصوص في تقديري

والرحمة والمغفرة لفنان افريقيا الاول محمد وردي

لما يكون في كلام عن وردي ومحمد الأمين ما اظن في سبب يدخل صلاح بن البادية لأنو علي راي المرحوم زيدان ( دخل مادحا وسيخرج مادحا ) ... والمقام مقام موسيقي وابداع من موهوبين ما مقام محايات ...

تحياتي

1- زورق الالحان .
2- زاد الشجون .
3- حروف اسمك .
4- جديات العسين .
5- وعد النوار .
6- حلم الاماسي .
7- همس الشوق .
8- وحيات ابتسامتك .
9- الحب والظروف .
10 - عويناتك .
11- الجريدة .
12- طائر الاحلام .
13- طائشة الضفائر .
14- نرجسة .
15- اشتياق .
16- يا جميل يا رائع .
17- كلام للحلوة .
18- سوف يأتي .
19- بتتعلم .
20- غرار العبوس .
21- سابينا .
22- الملحمة .
23- اكتوبر 21 .
24- اكتوبر الممهور .
25- المتاريس .
26 - بتقول هواي تستبعدو .
27- غربة وشوق .
28- أسمر .
29- شهر عشرة .
30- إبل الرحيل .



ولو رمضان بقي 31 يوم ادينا خبر نضيف

تقول لي ما عندو رصيد ...

يا راجل انت صاحي ؟؟؟

اﻷمين يا حبوب..
هل تستحق التلتين أغنية الكتبتهم ديل إنهم يكونو درر الغناء السوداني؟؟ وهل كلها تستحق التوثيق؟يبدو إنك ما قريتني صاح..30 أغنية و30 حلقة ممكن تجيب حسين الصادق ولا عبد الله البعيو ويتموها ليك..
وداللمين ممكن تكتب ليهو ال30 أغنية لكن لمن تفلترهم بتفضل ال15 البقصدهم ليك..لكن تعال أكتب اللستة حقت وردي وبعد داك تعال فلتر.. وقتها بس ح تفهم قصدي بي القاب البعييييييد بين وردي وأقرب منافسيه إن وجد..

Quote: ثبت كلامك يا موصلي.. تخريمة : خوفتك تقراها بروف إنت يا موصلي قلت الحقك ..:) :) :)

هيع انت قايل الموصلي ما بروف
خليك على كده ونرجع للآثبات
وبجي السؤال
هل عندك اي واحده تعادلها من حيث اللحن والتوزيع؟؟؟
هات ماعندك

دا ما 30 اغنية يا استاذ

دي 30 لوحة فنية ..

وابداع موهوب ..

واي واحدة فيها دروس موسيقية عميقة وبناء لحني كبير ...

انت تظلم هذا الشخص كثيرا بحديثك عن انها مجرد اغنيات يمكن يحل محله فيها احمد الصادق ...

ياخي رمضان كلو ما بكمل حديث عن الملحمة بس ....

بي نفس منطقك شيل من وردي اغنيات محجوب شريف والدوش
+
اسفاي لاسماعيل حسن

وشوف باقي الالحان

ياها دربكة ورقيص

تاني شنو ؟؟؟

Quote: دا ما 30 اغنية يا استاذ دي 30 لوحة فنية .. وابداع موهوب .. واي واحدة فيها دروس موسيقية عميقة وبناء لحني كبير ... انت تظلم هذا الشخص كثيرا بحديثك عن انها مجرد اغنيات يمكن يحل محله فيها احمد الصادق ... ياخي رمضان كلو ما بكمل حديث عن الملحمة بس ....

لافض فوك
سوف يآتي براها عشرين رمضان

امين يا حبوب..
شوف خلينا نتفق اووول شي عشان ما تقوولني كلام ما قلتو او فهم ما وصلك ..في لستتك دي انا قلت ليك في أغنيات لا ترقى لي إنها تكون من هرميات الغناء السوداني.. ولو إني كنت عارف في نهاية المطاف ح تعزفو لي على وتر إنها جمل موسيقية تدرس وإنها مدارس مختلفة و و و ..
يعني يا نرجسة دي أغنية عادية جداً كلمات ولحن وتوزيع مزج فيها ابو اللمين مجموعة الحان وطرق توزيع في رأيي إنها كانت مكررة في فكرتها من أغنيات سابقة ..أسمر أغنية عادية مقارنة بي أغنيات كتيييرة وده الأنا قصدتو إنو اللستة دي ما كلها تقوى لي إنو نسميها عبقريات وقلت ليك بي طريقتك دي ممكن ناس كتااار كده ممكن يدخلو عمالقة الغناء السوداني من بوابات اغاني قد تكون ضعيفة الكلمات قوية الألحان..
النقطة التانية انا منطقي ما قلت فيهو أحذفو قصائد فضل الله وقصائد الحلنقي وبعد داك تعالوا شوفو ابو اللمين ح يبقى قاعد في السهلة مش؟؟؟
انا منطقي قلت فيهو نسرد اغاني وردي واغاني ود اللمين ونفلتر الكلمات والألحان بمعنى إنو مثلا ممكن تقول لي والله أغنية جربت هواهم قليبي انكوى أغنية عادية الناس القيافة اغنية عادية و و كده يعني..وبعد داك نصفي الاغاني اللي ترقى انها تكون هرميات وبعد داك نشوف ميزان منو البيرجح..
قصة اغنية تعدل تلتين واغنية تعدل رمضانين انا ح اقبلا منكملكن صدقوني انا مستعد ادخل معاكم التنافس بي إنو أييي عمل لي وردي ح اخليهو يعادل اغنية واااحدة بس وانتو جمعوا درر ابو اللمين بي معادلاتكم دي وبعد كده كفة وردي ممكن ترجح لأن مستودع وردي ومخزونه بيكفيهو ووردي ممكن ياكل من سنامه..

موصلينا :

Quote: هيع انت قايل الموصلي ما بروف خليك على كده ونرجع للآثبات

يلا انا ح أقول ليك كلام يا قول النكتة بتاعت عندي ليك خبرين الأول سمح والتاني كعب دييك..
الكلام ده يا موصلي انطباع اخدتو بعد متاباعت ولي مدة ليست بالقصيرة ومبنية على ملاحظاتي من خلال إقامتي في بمبر بكري هنا..
الإنطباع الممتاز الأخدتو عنك إنك موسيقار أكاديمي لا يشق له غبار وتأهيلك الأكاديمي واضح إنو على درجة عالية ومخزونك العلمي الموسيقي فيهو فكر متطور..
الإنطباع السيئ الأخدتو إنو أذنك الموسيقية وذوقك العام وحسك الفني مش ولا بد ولا يرقى لي مستوى فكرك الأكاديمي..
بالدارجي كده الموصلي على المستوى النظري أوول دفعتو ..الموصلي على المستوى العملي قاعد في الصف التاني أو التالت ..
عشان كده صدقني يا موصلي انا مقتنع إنك ممكن تكون برووف في الموسيقى ومقطططعا رسسسمي وده ما تريقة والله ده اقتناع..لكن بالمقابل شايف إنو ناس كتااار ذوويقة وعلى مستوى الشارع تفوقك في تقييمات الأعمال الموسيقية على مستوى الشارع ودون الخوض في تفصيلات وتعقيدات الأعمال الموسيقية ..وهنا بتكلم عن المتلقي وذوقه العام..
قالوا مرة اتعملت معاينات لتعيين مدراء تنفيذيين اظنو وفي النهاية صففت على إتنين ودخلوا المعاينة الأخيرة ..المعاينة كانت عبارة عن صندوق ملفوف بي ورق هدايا بي طريقة مرتبة ومربوط بي فيونكا وورق سولفان وجمبو سكين في صحن..طلبوا من الأول وقالوا ليهو في جوة الصندوق جوهرة عايزين نطلعا ..زولنا فك الفيونكا بي طريقة ظريفة ..ثم فتح السولفان بي طريقة حضارية ..سم الصندوق ..وبي طريقة راقية دخل يدو جوة الصندوق ومرق ليهم الجوهرة وسلما ليهم في يدهم..صفقوا ليهو ونادوا البعدو وقالوا ليهو نفس الشي بعد ما جابو صندوق مشاابه..
اها زولنا ده ولااا كضطب شال السكيينة و شيييطك نجيييطك شرط الصندوق ومرق الجوهرة اداها ليهم في ثانية ..:)
أنقر ما عينوهو هو !!!! :):):)
أها ده حال الموسيقى والمتلقي العام والدارس المتعمق ..إنتو ماخدينها اكاديميات لكن في زول تاني قد يكون عنقالي ساااي لكن الشغلانة واقعة ليهو ..
عارف يا موصلي انا كل ما اتذكر رهانك عن شروق ابو الناس بستغرب!!! وكل ما اتذكر رحلاتك للسودان ووعودك بي المفاجأت ثم العودة بخفي حنين اتعجب..بل كللل ما اتابع منتوجك ومخرجاتك في السنوات الأخيرة مقابل ما تكتب في النت اتحييير رسسسسمي!!!
يا موصلي هل تصدق إنو انا قاعد في المنبر ده لي 7 سنوات طيييلة هذه ال7 سنوات ما سمعت للموصلي أييي عمل غنائي لاقى رواج أو أضاف لي مسيرة الموصلي الفنان!!!!! أووعا تقول لي التوزيع وإعادة التوزيع ..انا بتكلم عن الموصلي الفنان ...ومعاك بسأل كل اعضاء سودانيز أون لاين طيييلة تواجدكم في المنبر ما هو منتج الموصلي الفنان من أغاني راسخ في ذهنكم كعمل جديد يضاف ؟؟؟؟
لكن بالمقابل كممم من لوحة نقدية علمية قريناها للموصلي ممكن تكون محاضرة تدرس!!!؟
اقول قولي هذا يا الموصلي وانا عارف انو ح يكون تقيل على قلبك في المقام الأول..ومن ثم في المقام التاني ح يفتح لي ابواب جهنم مع معظم الاعضاء والقراء لي سودانيز وسؤالهم المعهود هو إنننت منو عشان تقييم الموصلي !!؟؟
أما المقام التالت فمداخلة لي حمزة سليمان نصها ح أفهمو ونصها ما حا افهمو بس مضمونا ح يكون ده كلام زول من الشارع ما بيعرف عماد من إعتماد..

Quote: يلا انا ح أقول ليك كلام يا قول النكتة بتاعت عندي ليك خبرين الأول سمح والتاني كعب دييك.. الكلام ده يا موصلي انطباع اخدتو بعد متاباعت ولي مدة ليست بالقصيرة ومبنية على ملاحظاتي من خلال إقامتي في بمبر بكري هنا.

تعرف ياعمر مشكلتك انو بمجرد انو الزول يختلف معاك بتقبل عليهو
انا لا آحتاج الى اي شهاده ايجابيه منك
وانت هسع خرجت من الموضوع خالص نحن هسع في محمد الامين ووردي
وانا اساسا لا آقبل بالمقارنة بين عملاقين كل واحد منهما له طريق
وكونك تكلمت عن موسيقار في مستوى محمد الآمين بهذه الطريقه
فيمكنك آن تتحدث عن الموصلي وغير الموصلي
هل الموزع الموسيقي ليس بفنان في نظرك؟
عليك آن تفهم آن الفنان هو المبدع في اي مجال من مجالاته وليس المغني
يبدو آننا آخطآنا في الحوار معك
وده ما كلام زعل ولكنه آجابه عميقة لطريقة تفكيرك الساذجة موسيقيا وفي التعامل مع موسيقيين
مثل حمزه سليمان وشخصي قبلا الحوار معك هنا
كن بخير ياعمر

شوف يا موصلي وبييي بركة الشهر الكريم ده وتصدق ولا ما تصدق بس كلامي الكتبتو ليك ده ابدددا ما كان بناء على إختلاف في وجهات نظر ولا هو تصييد ولا هو تعكير لي أجواء وبالعكس بالنسبة لي موضوع البوست انا طمعان فيك أكتر لما قلت ليك قصة برووووف إت دي عشان تجي وتفلفل لي اعمال ود اللمين من ناحية علمية انا عمر المتلقي العادي ده بعييد منها وكنت متأكد من إني ح استفيد من كلامك من الناحية دي وح يضييف لي كتيير..
الشق التاني اللي إنت كنت شايفو بعيد من محور البوست وهو تقييمي السمعي ليك انا لما كتبتو كتبتو وانا على دراية من إنو من صميم البوست ولو ما كان كده فكان عادي جداً ممكن أكتبو ليك في أي بوست تاني لأننا ببساطة دي ما أول مرة نختلف مش؟ فكان عااادي مثلا في بوست محجوب شريف اكتبو ليك صاح؟؟؟ وبعدين رأيي ده يا موصلي ما كونتو بناء على مداخلاتك أسة ده رأي زي ما قلت ليك ليهو فترة معشعش جواي من خلال متابعاتي..وبالجد لقيت دي أنسسب فرصة وأنسب مكان عشان اقولوا ليك ..انت من حقك تشوف إنو ما من صميم البورد وانا من تقييمي قادر افهم إنو من صميم البورد..
قصة موسييقييتك إنت وحمزة وتواضعكم وتنازلكم عشان تجوا تتكلموا معاي ح اعتبروا كلام زعل انت مااا بتقصدو زي ما بيقول ابو اللمين وما حا اقيف عندها كتييير ..ومن هنا ولي قدام يا موصلي انا ما طالبك حوار وبالمرة كلم صحبك حمزة برضو ..انا بجي بكتب كلامي هنا وابدا ما قاعد يهمني منو يجي يرد ومنو يجي يعلق ..بقول فكرتي والبيجي يناقشني حبابو عشرة زي شهرة عشرة والما بيجي حبابو عشرتين ..البوست عندي لو وصل لي 1000 مداخلة وخمسين الف قراءة أو صفر مداخلة وخمسين قراءة عندي واااااحد طالما انا قلت الفي دواخلي وعبرت عن فكرتي ..

تخريمة :
ما عارفك عدلت شنو ومسحت شنو لكن تلاتة مرات كتيييرة يا موصلي..خصوصا وإنها في أوقات متباعدة ..

بالنسبة لي سؤالك عن الفنان فببساطة يا موصلي إنت عارف نحن بنتكلم بي لغة العامة و بنتونس وعليه لما نقول فنان بنكون قاصدين المغني ..لكن لو عايز تخصص فطبعا واكيييد دروب الفن والابداع كتيييرة والمللحن مبدع والموسيقي مبدع والشاعر مبدع والرسام مبدع والنحات مبدع ..
وانا في مداخلات سابقة في بوست سابق دللت ليكم على كلامي ده بي حمزة سليمان لما قلت ليكم خلونا نتفق انا من وجهة نظري شايف حمزة ده زول مبدع جددددا فيما يتعلق بي التلحين لكن انا بشوف انو ما فنان (بمعنى مغني) لأنو شايف صوتو ما خااالص كده ..

بالنسبة لي ود اللمين فانا ما اجحفت في حقو عشان ما تمشي من هنا وانت بتقولني كلام ما قلتو ..ما غلطت في حق ابو اللمين وما تطاولت عليهو وما اتعديت على حقو ..كل القلتو انو يظل وردي عبقرية غناء هذا الزمان والبون شاااسع ووااااسع بينو وبين ود اللمين ..وإنو ود اللمين عندو من درر وهرميات الأغنيات السودانية لكنها قليلة ..وإنو ابو اللمين ظل يدور في فلك الكيف وليس الكم فارتكز على أعمال تعد بي أصابع اليد ظل يشتغل فيها بي نظام التدوير والتغليف..
ابو اللمين تاج راسنا من فوق واتربينا على اغانيهو بس ده ما بيمنع نقول راينا ونقارن..

Quote: شوف يا موصلي وبييي بركة الشهر الكريم ده وتصدق ولا ما تصدق بس كلامي الكتبتو ليك ده ابدددا ما كان بناء على إختلاف في وجهات نظر ولا هو تصييد ولا هو تعكير لي أجواء وبالعكس بالنسبة لي موضوع البوست انا طمعان فيك أكتر لما قلت ليك قصة برووووف إت دي عشان تجي وتفلفل لي اعمال ود اللمين من ناحية علمية انا عمر المتلقي العادي ده بعييد منها وكنت متأكد من إني ح استفيد من كلامك من الناحية دي وح يضييف لي كتيير.. الشق التاني اللي إنت كنت شايفو بعيد من محور البوست وهو تقييمي السمعي ليك انا لما كتبتو كتبتو وانا على دراية من إنو من صميم البوست ولو ما كان كده فكان عادي جداً ممكن أكتبو ليك في أي بوست تاني لأننا ببساطة دي ما أول مرة نختلف مش؟ فكان عااادي مثلا في بوست محجوب شريف اكتبو ليك صاح؟؟؟ وبعدين رأيي ده يا موصلي ما كونتو بناء على مداخلاتك أسة ده رأي زي ما قلت ليك ليهو فترة معشعش جواي من خلال متابعاتي..وبالجد لقيت دي أنسسب فرصة وأنسب مكان عشان اقولوا ليك ..انت من حقك تشوف إنو ما من صميم البورد وانا من تقييمي قادر افهم إنو من صميم البورد.. قصة موسييقييتك إنت وحمزة وتواضعكم وتنازلكم عشان تجوا تتكلموا معاي ح اعتبروا كلام زعل انت مااا بتقصدو زي ما بيقول ابو اللمين وما حا اقيف عندها كتييير ..ومن هنا ولي قدام يا موصلي انا ما طالبك حوار وبالمرة كلم صحبك حمزة برضو ..انا بجي بكتب كلامي هنا وابدا ما قاعد يهمني منو يجي يرد ومنو يجي يعلق ..بقول فكرتي والبيجي يناقشني حبابو عشرة زي شهرة عشرة والما بيجي حبابو عشرتين ..البوست عندي لو وصل لي 1000 مداخلة وخمسين الف قراءة أو صفر مداخلة وخمسين قراءة عندي واااااحد طالما انا قلت الفي دواخلي وعبرت عن فكرتي .. تخريمة : ما عارفك عدلت شنو ومسحت شنو لكن تلاتة مرات كتيييرة يا موصلي..خصوصا وإنها في أوقات متباعدة ..

ياعمر كلامك كان بره ولم يكن من صميم البوست ولا يعبر عن ذكاء حواري
تخيل انو انت قلت لي المريخ آحسن من الهلال
وجيت قلت ليك لا الهلال آحسن
وقمت رديت علي وقلت لي انت مابتعرف الكوره
بينما آنا مدرب محترف وانت مشجع
هل سيكون هنالك آي فرصه لتبادل الحوار معك
-----------------
ثم انني في بوست اخر شرحت لك ان الفنان ليس المغني فقط
قالملحن هو مبدع فنان
والشاعر مبدع فنان
والموزع مبدع فنان
والمؤلف الموسيقي مبدع فنان
----
تجي تقول لي ماتقول لي التوزيع هل هذا كلام لمن يعرف تذوق الموسيقى؟؟؟؟
ياسيدي امشي لي قوقل واكتب التوزيع الموسيقي عشان تعرف آنه آصعب وآشق آنواع الابداع الموسيقي على الاطلاق
لذا فان الذين يعرفونه في بلادنا آقل من لبن الطير
------------
عمر اقرآ ماتكتبه جيدا
آنا لم آمسح ولكنني آضفت آشياء
في مرات ليست متباعدة زمنيا ولم تتعدى الساعة

الاخ الموصلي تحياتي

لماذا نظرت للجزء الفارغ من كوب عمر النقدي لك؟ عمر ايضا لم يغمطك حقك في وجهة نطره وتحدث عن ما يراه
ايجابي في حقك بذات القدر الذي تحدث فيما يراه سلبي.... كنت اتمنى ان توسع صدرك للنقد بصورة افضل يا صديقي
اما القامة محمد الامين والقامة وردي فليسا بكبرين علي النقد الكلنا بنعترف انو نقد عنقالة ولكن هذا ابسط حق
يمكننا ان نتعاطي فيه.... يعني انا الزول العنقالي دا شايف نفسي سمييييييييع وممكن اكون بروف في السمع ودا تقييمي
لنفسي وحق من حقوق نفسي علي اني اقيم نفسي بالطريقة الانا بحبها.... اها انا الزول العنقالي دا ممكن براحة كدا
اقول اني ما بحب وردي مثلا... مش يا موصلي من حقي ما اريدو.... اها بنفس المستوي العنقالي دا ممكن انتقد
وردي سلبا واقول انو مثلا زول بمطمط الكلام وبصرخ وووووو.... دا اطلاااااااقا ما بيعني انو وردي بمطمط الكلام وللا بصرخ
في الغنا.... دى بي بساطة ممكن تكون وجهة نظري كمستمع عنقالي..... اها انت ليه يا موصلي ما تتعامل مع عمر دا كمستمع
عنقالي كان عجبك كلامو خير وبركة وكان ما عجبك كلامو يا اما تنزل لمستوى عنقلتو دي وتجي تقنعو انك عكس ما رماك به يا كمان
ترمي طوبتو وتصرف ليهو واحد اقنورد او تديهو ختم تجاهل في صنقورو دا لامن يآمن.... لكن كونك تتهمه بالسذاجة السماعية لمجرد
انو ادلى بدلو هو من حقه ان يدلى به فيما يخصك انت كفنان او فيما يخص اي فنان مسك مايك او قدم اي عمل فني آخر فدي جد يا موصلي
ما اجابة حلوة وما احترافية من زول فنان زيك.

Quote: وده ما كلام زعل ولكنه آجابه عميقة لطريقة تفكيرك الساذجة موسيقيا وفي التعامل مع موسيقيين مثل حمزه سليمان وشخصي قبلا الحوار معك هنا

والله ما ظنيتها بتعجب زول يا موصولي .... عموما يا صديقي رمضان كريم وان شاء الله النفوس تتطايب وما يحصل ما يمكن ان يكدر
عليك ولا علي عمر وعلي اي زول صفو ايمانيات هذا الشهر الفضيل وهو في اواخره وزي ما بقولو وصولو لمرحلة دخول العظم... تحياتي
واحترامي. والعفو والعافية.

Quote: الاخ الموصلي تحياتي لماذا نظرت للجزء الفارغ من كوب عمر النقدي لك؟ عمر ايضا لم يغمطك حقك في وجهة نطره وتحدث عن ما يراه ايجابي في حقك بذات القدر الذي تحدث فيما يراه سلبي.... كنت اتمنى ان توسع صدرك للنقد بصورة افضل يا صديقي اما القامة محمد الامين والقامة وردي فليسا بكبرين علي النقد الكلنا بنعترف انو نقد عنقالة ولكن هذا ابسط حق يمكننا ان نتعاطي فيه.... يعني انا الزول العنقالي دا شايف نفسي سمييييييييع وممكن اكون بروف في السمع ودا تقييمي لنفسي وحق من حقوق نفسي علي اني اقيم نفسي بالطريقة الانا بحبها.... اها انا الزول العنقالي دا ممكن براحة كدا اقول اني ما بحب وردي مثلا... مش يا موصلي من حقي ما اريدو.... اها بنفس المستوي العنقالي دا ممكن انتقد وردي سلبا واقول انو مثلا زول بمطمط الكلام وبصرخ وووووو.... دا اطلاااااااقا ما بيعني انو وردي بمطمط الكلام وللا بصرخ في الغنا.... دى بي بساطة ممكن تكون وجهة نظري كمستمع عنقالي..... اها انت ليه يا موصلي ما تتعامل مع عمر دا كمستمع عنقالي كان عجبك كلامو خير وبركة وكان ما عجبك كلامو يا اما تنزل لمستوى عنقلتو دي وتجي تقنعو انك عكس ما رماك به يا كمان ترمي طوبتو وتصرف ليهو واحد اقنورد او تديهو ختم تجاهل في صنقورو دا لامن يآمن.... لكن كونك تتهمه بالسذاجة السماعية لمجرد انو ادلى بدلو هو من حقه ان يدلى به فيما يخصك انت كفنان او فيما يخص اي فنان مسك مايك او قدم اي عمل فني آخر فدي جد يا موصلي ما اجابة حلوة وما احترافية من زول فنان زيك. Quote: وده ما كلام زعل ولكنه آجابه عميقة لطريقة تفكيرك الساذجة موسيقيا وفي التعامل مع موسيقيين مثل حمزه سليمان وشخصي قبلا الحوار معك هنا والله ما ظنيتها بتعجب زول يا موصولي .... عموما يا صديقي رمضان كريم وان شاء الله النفوس تتطايب وما يحصل ما يمكن ان يكدر عليك ولا علي عمر وعلي اي زول صفو ايمانيات هذا الشهر الفضيل وهو في اواخره وزي ما بقولو وصولو لمرحلة دخول العظم... تحياتي واحترامي. والعفو والعافية.

هلا اخي الخير
ماقاله عمر هو خروج بين عن الموضوع
فالموضوع هو محمد الامين ووردي
ولانني حاصرته في ركن ضيق وقلت له ان ياتي لي
بعمل وطني آعلى مقاما من قصة ثورة
عجز
ففضل آن يغير مجرى الكلام الى الموصلي
آصلا لا يوجد فنان متفق عليه آو مجمع عليه
فحب الناس مذاهب
فهناك من يحبون حنان بلوبولو آكثر من وردي ومحمد الآمين ولا حجر عليهم
كان يمكن لعمر آن يفتح بوست منفصل عن الموصلي ويقل كل السالب والموجب عنه
وقد فعلها غيره وانت شخصيا كنت من المساهمين فيه
وقد كان مفيدا للغايه
وليس بيني وعمر زعل شخصي فهو صديق عزيز
وكل عام وانتما بخير

الذات المتضاربة مع ذاتها لا تعرف من هى فكيف ستعرف غيرها ؟
المشكلة فى النقد الفاروقى تصدرة المكتمل لى ارائه و لشخصيتة المنقلقة فى ثوابتها المعرفية الضئيلة
لكنها اصبحت تتواجد و تنمو و تتواصل من خلال تمثيلها لحكاية وجودة الاسفيرى ....
عليك فحص تجلياتك النقدية فى سرد نقدى تحاول ان تسال فيه نفسك من انت ؟
و فى حال تأكدت من هويتك النقدية لابد من ان تسمى نفسك و تعرفها بأنك ليس رقم نقدى نسبة لاصطدامك بحضارة ولا مكان للتخلف الفكرى الذى لم يواكب التجديد
و الذى يبقى الناقد فى تصورة ما بين الحياة و الفكرة هو سمووه من خيالاته الشخصية لواقع حال الفكرة و مناقشتها لا ان تدخل تجلياتك النقدية الخيال العلمى الفاروقى و تقديمه فى تكنلوجيا معلوماتك و تحكى عن ذاتك لتحصل على ما وصلت اليه بعد تدمير دماغ اصابته الذاتية
اسألك اخى الفاروق عمر من الذى امر حسن عطية اميرا للعود ؟ اما هم نفس النقاد امثالك ....
أيعقل ان يناقش وردى كما نوقش سرور و كرومة ؟
الى متى ستظل هذه العقلية السطحية ؟ ايعقل بعد كل هذا ؟ التصور لعقد الجلاد بوجود شخص ما و نظرة فرد لا يرى ابعد من بصرة
والله لو انزلنا مساهمتنا على سطح كوكب لقال الناقد من امثالك لا يمكن ان تحتفل الكواكب بالقمر
الفكر النقدى عندك يااخى عمر ليس ناضجا ومن خلال تعابيرك وإسلوبك وتراصى كلماتك وصياغتها تدلل على عدم مؤهلاتك الثقافية
وأن النقد بكل تنوعه عندك ما يزال اقل نضجا و أكثر بدائية وهذا لا يعطيك الحق فى ان تجد حيزا لاسقاطك النقدى الذى لا يؤهلك على خوض مجازفة نقدية فنية
ــــــــــــــــــــــــ
لما حاورتك لم اكن اقصد ما كتبته عنى لانه لا يهمنى طالما دة رأى مستمع حولى
ولم اكن اقصد ان اثبت لك بانك الرقم النقدى الذى يجب منازلته و مقارعته بالحجة و المنطق
يظهر ان حوارنا معك كان حوار الطرشان
ولا فائدة من التواصل معك
لكن يجب ان يعلم قارئى سودانيز اون لاين الذى عهدناه من قبل ان قصدنا فى الحوار معك كان اثراء لروح النقد البناء لا الهدام.
وقبل انضمامك له كان حواريا وكان هادفا وكان يلفت الانتباه لكل ماهو مفيد
ـــــــــــــــــــــــــــ
اخى عمر
اعتبر دى اخر مداخلة بينى و بينك فى مناقشة المواضيع الفنية لانى لم اجد فيك الثقافة الكافية لحوارى ولم اجد فيك الذائقة الفنية العالية التى يجب ان تحترم

Quote: اعتبر دى اخر مداخلة بينى و بينك فى مناقشة المواضيع الفنية لانى لم اجد فيك الثقافة الكافية لحوارى ولم اجد فيك الذائقة الفنية العالية التى يجب ان تحترم

DONE..

بس يا حمزة خلي في بالك حاجة صغييرة كده عشان تكون عارف..
انا ما الزول البيحرد في سودانيز أون لاين دي..وعليه ما بشتغل بي قصة كونو زول قال لي ما بتداخل معاك تاني اقوم ارفع يدي منو لو جات السيرة أو إحتجت اقارنو أو اجيب سيرتو ..فعشان ما بعدين تقول انا ساكيك ومستغل قصة قلت ما بتجي تاني دي فبقيت اكتب عنك سمح؟
انا ماشي في حاجاتي وانت خليك في حاجاتك..حلوين حلوين؟؟
ما تجاوب ده ما سؤال للإجابة عشان الدنيا رمضان وانت قلت دي اخر مداخلة ..غايتو للضمان كده كانت واحدة من ايات سيدنا زكريا أن لا يكلم الناس ثلاثة أيام فكلمهم بالإشارة ..أها أسة ان اما طالب منك غير تهز راسك بي إشارة كده تقول فيها أيوة حلوين حليون ..

يا موصلي:

Quote: ثم انني في بوست اخر شرحت لك ان الفنان ليس المغني فقط قالملحن هو مبدع فنان والشاعر مبدع فنان والموزع مبدع فنان والمؤلف الموسيقي مبدع فنان

يا موصلي ياخ والله وبدووون ما تشرح لي انا عارف مش؟ ووريتك إنو دي من البديهيات ..صاح ممكن ما اكون عارف الفروقات بي عمق علمي زييك لكن دي من أبجديات الإبداع والفنون..
انا أبدددا ما مختلف معاك في النقطة دي..

Quote: تجي تقول لي ماتقول لي التوزيع هل هذا كلام لمن يعرف تذوق الموسيقى؟؟؟؟ ياسيدي امشي لي قوقل واكتب التوزيع الموسيقي عشان تعرف آنه آصعب وآشق آنواع الابداع الموسيقي على الاطلاق لذا فان الذين يعرفونه في بلادنا آقل من لبن الطير

أولاً نتفق انا ما قلت ليك إنت زول ما مبدع صاح؟؟؟
وما قلت التوزيع الموسيقي ما إبداع مش؟؟
فالله يرضى عليك يا موصلي ما تقولني كلام ما قلتو ..
لما قلت ليك ما تقول لي توزيع موسيقي لأنك وبكل بساطة يا موصلي في معظم مداخلاتك هنا طارح نفسك الموصلي المغني أكتر من إنك الموصلي الموزع الموسيقي ..بل بالعكس انا البقيت أحس إنك متضاير ومددسي من كونك موزع موسيقي ومكنكش أكتر في قصة مغني دي ..وده انا لاقي ليك فيهو العذر لأنو يا موصلي بي عقليتنا السودانية دي لو قعدت وخشيت في توب الموزع الموسيقي ممكن تقعد مليون سنة زول يكون بيعرفك ماف وإن كنت الجندي المجهول..لكن مجرد الظهور عبر بوابة الغناء فهو طريق سهل للنجومية وده حق مشروع بالمناسبة ..
انا يا موصلي إنتقدت ذائقتك السمعية من خلال البشوفو منك هنا ومن خلال إشاداتك بي تجارب معينة ومن خلال دعمك لي تجارب أقل ما توصف بيهو إنها أعمال ضعيييفة وواضحة جداً جداً وده ما كلامي ده كلام ناس كتااار قييمو الاعمال دي ..

Quote: لما قلت ليك ما تقول لي توزيع موسيقي لأنك وبكل بساطة يا موصلي في معظم مداخلاتك هنا طارح نفسك الموصلي المغني أكتر من إنك الموصلي الموزع الموسيقي ..بل بالعكس انا البقيت أحس إنك متضاير ومددسي من كونك موزع موسيقي ومكنكش أكتر في قصة مغني دي ..وده انا لاقي ليك فيهو العذر لأنو يا موصلي بي عقليتنا السودانية دي لو قعدت وخشيت في توب الموزع الموسيقي ممكن تقعد مليون سنة زول يكون بيعرفك ماف وإن كنت الجندي المجهول..لكن مجرد الظهور عبر بوابة الغناء فهو طريق سهل للنجومية وده حق مشروع بالمناسبة .. انا يا موصلي إنتقدت ذائقتك السمعية من خلال البشوفو منك هنا ومن خلال إشاداتك بي تجارب معينة ومن خلال دعمك لي تجارب أقل ما توصف بيهو إنها أعمال ضعيييفة وواضحة جداً جداً وده ما كلامي ده كلام ناس كتااار قييمو الاعمال دي ..

كدي خلينا نرجع لي رهانك الخاسر
بعد آن تركته هاربا للموصلي
هات
عمل موسيقي وطني آرفع مقاما وفنا ولحنا وتوزيعا
من قصة ثورة لمحمد الامين وبرر ماتقوله
--------
لانني عندما ذكرته لك قعدت تقول لي بروف و(بروف)
قصة ثوره يتميز بنتوع الالحان وجزالة التوزيع وقمة الاداء
والنص المعبر وهو لذلك خالد خلود النيل
وهنا يتفوق محمد الآمين على الجميع

تعرف يا يا الخير يا العوض..انا المضاييقني في القصة دي كلها أسة شنو ؟
مضايقني إني أبداً ما تطاولت على العملاق أبو اللمين في البوست ده ..وما تطرقت ليهو بي أييي شي سلبي أو أييي إساءة بل ولااا حتى قييمت اعمالو بي صورة دقيقة ..كل القلتو إنو ابو اللمين ما عندو زخيرة غنائية كافية ..قلت إنو عندو هرميات لكن للأسف شوية ما كتيرة مقارنة بما يملكه العبقري وردي..
قلت إنو يا معاين من الشباك وأسمر ويا حاسدين غرام اغاني عادية ..ولا ترقى لي إنو يتم التوثيق ليها..
تاني ما قلت أيييييي شي ..وكدي خلي موصلي يقراني هنا مليون مرة ويجيب حتة واااحدة تطاولت على الفنا ابو اللمين أو سلبتو حقو !!!

نجي لي قصة مهمة تانية بدت تظهر في شخصية الموصلي ودي بالجد مزعجة ..الموصلي يحتفي أيييما إحتفاء بي أييي زوول بيجي يطبطب ليهو بي كلمات ثناء ويقرب يطير بيهو السماء فوووق لكن لمجرد إنك تقول ليهو رأيك السلبي فيهو ولو كان الرأي ده في حدود الأدب بلاحظ ليهو بينفعل وبيديك كلام انا بعتبرو كلام تحت الحزام ..عن نفسي بتجاوزو للموصلي في المرحلة دي بافتراض إنو كلام إنفعالي ووقتها كتبو لأنو ما قرا بين السطور واتعامل مع الموضوع بي شخصنة إضافة لي تراكمات معبأ بيها من زمان وإنطباعات فبيقوم يترجما في لحظة زعلو دي..
انا كلامي البقول فيهو للموصلي ده كلللو كلام مثبت ما جايبو من فراغ وهو ممكن يجي براااحة يثبت لي العكس ..
انا ما طلبت كتييير مش؟ انا طلبت من الموصلي الفنان المغني يجيب لي اعمالو الفنية في خلال ال 7سنوات الفاتت دي وتعتبر اعمال غنائية مسموعة لي جمهور الموصلي المغني !!!
انا طالب من الموصلي خلال ال 7 سنوات دي يديني تجربة من تجاربو الفنية في إكتشاف نجوم وإعادة هيكلتهم ومن ثم الصعود بيهم لي القمة أو أقلاه تقديمهم للمستمع السوداني كأكتشاف للموصلي!!!
ياخ حتتتتى في التوزيع الموسيقي ده انا عايز الموصلي في ال 7 سنوات يديني الأعمال الي وزعها ولاقت رواج منقطع النظير ووصلت لي المتلقي السوداني على إنها واحدة من إنتاجيات الموصلي..
انا قلت وبقول إنو الموصلي طيلة فترة 7 سنوات هي عمري الإسفيري يكتب ويكتب ويكتب..يوعد ويوعد ويوعد..يعلن ويعلن ويعلن ..يبر ويبشر ويبشر..والمحصلة وبي كل أسف ببببيق زييرو ..وده ما زعل يا موصلي دي حقيييقة انا عايزك تثبت لي عكسها بي الأرقام ..بس يا موصلي وعشان تكون فيير وتكون جبت الانا قاصدو انا ما عايز إنتاجية والسلام ..يعني ما تجي تديني لستة بي اعمال نفذتها وهي في النهاية ما وصلت للمتلقي السوداني ولاقت رواج ..انا ما عايز تجي تديني لستة اعمل وافكار نفذت وفي النهاية عرفوها سبعة انفار ومعاهم رواد المنتديات من الاصدقاء ..انا عايز اعمل توازي بوستات الموصلي عن أعمال غنائية لحنية توزيعية ح ترسخ في أذن المتلقي السوداني..
غالي والطلب رخيص مش؟
ما عايز اكتر من كده وبعد داك نحكككم كووول قراء سودانيز أون لاين ونشوف منو الفينا كلامو صاح وانا رااااضي بعد داك بي الحكم ..
وح أرضى بي إني زول ساذج بعد داك..
لكن من هنا لحدددي ما يحصل الكلام ده انا ح اكون مقتنع إني ما زول ساذج واضاني وفهمي الموسيقي كمتلقي أحسن وأنضف من الموصلي..

Quote: ولانني حاصرته في ركن ضيق وقلت له ان ياتي لي بعمل وطني آعلى مقاما من قصة ثورة عجز

معقولة تكون فهمتها كده يا موصلي؟؟؟؟
طييب تعال وبي نفففس منطقك ده انا أقول ليك بل إنت العجزت لأنو بي كل بساااطة انا طلبت منك تو بروووف إت وإنت ما اثبتها لي !!!
يا موصلي انا الأغاني الوطنية دي إيه رأيك بشوف أغنية انا سوداني انا دي واحدة من أعظم اغنيات الوطن ..أغنيات الثورات الداخلية دي انا ما بشوف انها اغنيات وطنية من أساسو..

لك التحية أخي عمر ...

Quote: دوووبنا في اليوم ال21 ولخايف منو حصل!!! يا معاين من الشباك ضمن أغنيات التوثيق...!!! يا غالي ليك هوينا الشباك بيشهد لينا..كم مرة روحنا وجيينا.. وعايزين نزور والديك نخطب يا جميل إيدييك.. لما كتبت عنوان صمود زورق الألحان كنت تحديييدا بقصد الحتة دي وإنو مخزون ابو اللمين اللياقي الغنائي ضعييف ونفسو قصيير عشان كده كانت 15 حلقة كافية جداً لتوثيق رحلة ابو اللمين الفنية ..

ولاحظ لي حتة خايف منو دي لأنو الضمير بيرجع ليك إنت يا عمر .. وليس لجمهور المستمعين ... فما تراه أنت عملاً ركيكاً هذا لا يعني أنه عند الآخرين كذلك ...

مثال عن رأيي أنا في مقارنة بين عملين لود الأمين ووردي ...

يا معاين من الشباك لود الأمين والقمر بوبا لوردي .. وكلا الأغنيتين تمّ بثّهما في برنامج أعزّ الناس ...

رأيي أنا دي خت تحتها خطين:-

كلمات قمر بوبا أجمل من كلمات يا معاين من الشباك

ولكن ....

يا معاين من الشباك لحنها أجمل من قمر بوبا

فيا عزيزي سهل أن نحكم بانطباعنا الشخصي ولكن لا يحق لنا أن نفرضه على الآخرين ...

شايف صورتي الرمزية مُش لي وردي .. لكنني أحب الاستماع لمحمد الأمين أكثر من وردي ...

رأيك شنو ؟!


إضافة:
ثم يا حبيب رأيك شنو في أغنية الناس القيافة والتي تمّ بثّها في الحلقة 21 من برنامج أعزّ الناس مع وردي ...




ـــــــــــ
سبب التعديل: شباب = شباك

طه يا صبري:

Quote: ثم يا حبيب رأيك شنو في أغنية الناس القيافة والتي تمّ بثّها في الحلقة 21 من برنامج أعزّ الناس مع وردي ...

رأيي إنك ما قريتني كويس..لأنو انا قلت في أغاني لي وردي برضو ممكن تتحسب من الأغاني الساي وقلت إنو الناس القيافة منهم ومعاها كم أغنية تاني من شاكلة جربت هواهم قليبي إنكوى ..
وقلت برضو إني بحب ود اللمين شديد.. وقلت إني حافظ أغنياتو عن ظهر قلب وبسمعو في كل زمان ومكان ويومي,,
كلامك القلتو في مداخلتك ده يا صبري ما هو إلا إعادة لي كلامي ..
الفرق الممكن اقولوا ليك هو حاجة واحدة ..
يستطيع وردي أن يحذف الناس القيافة والقمر بوبا وجربت هواهم وحتتتى ممكن يحذف نور العين ورغما عن كده ممكن يسجل أعز الناس في خمسة رمضانات فهل يستطيع ابو اللمين بعد أن يفلتر أغانيه إنو يقدر يكمل ال 30 حلقة ؟؟؟
ده بكل بساطة كان سؤالي وكويس إنك رجعتني لي نقطة البداية ..

انا وجبيبي او يا حاسدين غرامنا
اول شئ دي اول لحن لي محمد الامين
واول اغنية اتسجلت ليهو
يعني بداية الطريق

وردي ما بدا بي شغلو .. لحن ليهو الخليل .. ولما بدا يلحن بدا بي يا سلام منك بايقاع نوبي
يعني اعتمد علي خلفيتو الحضارية ودي صدفة كان ممكن تنتج اي واحد نوبي لانو الخلفية واحدة
اضافة الي الليلة يا سمراء ..

محمد الامين الفنان الوحيد الذي لم يقلد ولم يبدأ بداية تقليدية وبدأ بانتاجه ودي الموهية الحقة ودي يتجاوز فيها حتي عثمان حسين ناهيك عن وردي

الاخ/ عمر الفاروق
السلا م عليكم و رحمة الله و بركاته
هنالك مجموعة بالفيس بوك لها راي مغاير بخصوص المقارنة بين الهرمين. رايي ان يراعى رايهم في النقاش، ادناه مقتطفات مما ورد هناك:


‎Ihab Mohammed‎
يا جماعة موضوع مهم جدا .....
1/ عايزين واحد يكون عندو عضوية فى سودانيز اون لاين
2/ هناك بوست فيه معلومات مغلوطة و فيه تجاوز فى حق الاستاذ و اغلب المتداخلين ماخدين صف فنان تانى برغم حترامنا ليه و لكن لا يوجد شخص واحد يدافع عن الاستاذ بفهم و منطق و يديه جزء من حقه .. الموضوع مهم يا شباب و عايزين نكون اكثر فعالية و نكون اكثر حيوية و قدرة فى التوعية بالاستاذ و التعريف بمكانته .
أعجبني · · متابعة المنشور · أمس في الساعة 01:42 مساءً‏
Omer Salim Bob‏ و أشخاص اْخرون عدد 4‏ معجبون.

Musaab Alsawi ????
أمس في الساعة 02:10 مساءً‏ · أعجبني

Ihab Mohammed مالك يا مصعب ؟
أمس في الساعة 02:16 مساءً‏ · أعجبني

Musaab Alsawi بسال عن الكلام المكتوب شنو؟
أمس في الساعة 02:18 مساءً‏ · أعجبني

Musaab Alsawi ادينا اللنك
أمس في الساعة 02:22 مساءً‏ · أعجبني · 1
11

أستاذ الموصلي زنقك يا عمر وختاك في حتة ضيقة جداً فيما يتعلق بحديثه عن "الملحمة" /أو قصة ثورة..

وطبعاً انت سيد العارفين إنو رأي شخص كالأستاذ يوسف الموصلي قد يكون معتداً به، ويشكل قيمة لدي القارئ والمتابع أكثر من كل الآراء التي قيلت في هذا البوست بحكم الاحترافية والتخصص بالطبع..

فلم تجد حلاً إلا بالخروج من الموضوع ومحاولة النيل من الموصلي نفسه..

والله ياالهادي يا اخوي ماف اييي زنقة الموضوع بسييط جدا انا طلبت مثال والموصلي قالوا وطلب مني مثال ..انا قلت ليهو في رأيي أغنية انا سوداني انا افضل ما قيل في الوطنية ..اغاني الثورات دي انا ما شايف إنها وطنية ..
يعني أسة ممكن نقول أغنية هبت ثورة الإنقاذ أغنية وطنية ؟؟
بالنسبة لينا وإن كان ده ما موضوعنا لكن اسة طلبت من الموصلي يجي يشرح لينا بعد كده جماليات العمل الإختارو ويورينا معطياتو ..ده الحصل بكل بساطة فما عارف زنقي وزنقك دخلها شنو؟

Quote: الموصلي كتب: هيع انت قايل الموصلي ما بروف خليك على كده ونرجع للآثبات وبجي السؤال هل عندك اي واحده تعادلها من حيث اللحن والتوزيع؟؟؟ هات ماعندك

عمر الفاروق يا حبيب ... ياخي أنا شايف إنك إنت شايت في وادي غير وادي الأستاذ الموصلي

Quote: عمر الفاروق كتب: والله ياالهادي يا اخوي ماف اييي زنقة الموضوع بسييط جدا انا طلبت مثال والموصلي قالوا وطلب مني مثال ..انا قلت ليهو في رأيي أغنية انا سوداني انا افضل ما قيل في الوطنية ..اغاني الثورات دي انا ما شايف إنها وطنية ..

فيا عُمر .. فرق بين القيل (ككلمات) وبين اللحن والتوزيع ...

فهل يرى عُمر الفاروق أنّ أغنية أنا سوداني أفضل لحناً وتوزيعاً من قصة ثورة (الملحمة) ؟!

الإجابة على هذا السؤال ربما تُعيد النقاش إلى مساره الصحيح بينك وبين الأستاذ الموصلي ...


حتة اللحن والتوزيع دي يا عُمر عايزة تخصص عشان تحكم بيها
أمّا إذا كان حديثك عن اللحن والتوزيع عبارة عن رأي مستمع لافي ساي زيّنا كدة فبرضو حأحترم رأيك .. لكن في نفس الوقت مضطر آخذ برأي الموصلي كنجيضة وكدة ...

خلاص ياصبري طال ما عمر اختار أنا سوداني أعدكم
بعمل مقارنة بينها وقصة ثورة وبطريقة تحليلية علمية لادخل للمزاج فيها
بس يدينا الموافقة
ولو عمر قرر يغير رايه ويختار عمل آخر ليس لدينا مانع
بنعمل المقارنة أيضا
أدونا النجيضة وفي نهاية عطلة الاسبوع نعلق ليك النوت الموسيقية
والموية تكضب الغطاس
تحياتي لكما

الاخ الامين عباس

رمضان كريم

Quote: محمد الامين الفنان الوحيد الذي لم يقلد ولم يبدأ بداية تقليدية وبدأ بانتاجه ودي الموهية الحقة ودي يتجاوز فيها حتي عثمان حسين ناهيك عن وردي

معليش خلينى اقول ليك والكلام ده قالوا محمد الامين بنفسه انو اول حفلة تغنى بها فى حياتو لمن غنى فى زواج قريبو بمدنى تغنى باغنية لو بهمسة لمحمد وردى واغنية آخرى اعتقد بانها التسعة عشر سنة.

Quote: ‎Ihab Mohammed‎ يا جماعة موضوع مهم جدا ..... 1/ عايزين واحد يكون عندو عضوية فى سودانيز اون لاين 2/ هناك بوست فيه معلومات مغلوطة و فيه تجاوز فى حق الاستاذ و اغلب المتداخلين ماخدين صف فنان تانى برغم حترامنا ليه و لكن لا يوجد شخص واحد يدافع عن الاستاذ بفهم و منطق و يديه جزء من حقه .. الموضوع مهم يا شباب و عايزين نكون اكثر فعالية و نكون اكثر حيوية و قدرة فى التوعية بالاستاذ و التعريف بمكانته .

تمّ الانضمام إلى المجموعة وهي باسم "عشّاق الموسيقار محمد الأمين"
وإن شاء الله سأحاول نقل ما يُفيد مسار هذا البوست ...

مجموعة عشّاق الموسيقار محمد الأمين هنا

صفحة عشّاق الموسيقار محمد الأمين هنا

يا صبري ..يبدو إنك إنت العايز تشوت في إتجاه الموصلي..
مادام القصة لحن وتوزيع ف إيه لزووم إنها تكون وطنية ؟؟؟

Quote: يا صبري ..يبدو إنك إنت العايز تشوت في إتجاه الموصلي.. مادام القصة لحن وتوزيع ف إيه لزووم إنها تكون وطنية ؟؟؟

يا عمر الفاروق .. عليك الله ما تشتّت الكورة بي حتة وطنية دي ...
ياخي اعتبرها أغنية وبس .. بغض النظر عن هوية الكلمات شايتة وين ...

أستاذ الموصلي تحدّث عن اللحن والتوزيع الموسيقي ...


ــــــــــــــ
حتة وطنية دي حتقودنا لهوية الكلمات

والله يا صبري حييرتني معاك..
يعني ما أرد ليك ولا الفهم شنو؟؟ نكورك ليكم ما تجو نجيكم تكوركو؟؟
انا بس وريتك انك عامل حريف وعايز تزرزرني وما أسهل المخارجة من زرزراتك ..لاحظ كل مداخلاتك وح تفهم انا قاصد ليك شنو ..ياخ انت ما كلفت نفسك تقرا مداخلاتي ولما تقرا بتفتش لي حتت التناقض أو يا قولك التغريد خارج السرب وانا كل البعملوا قاعد أرد ليك بضاعتك لا أكتر ولا أقل تقوم تجي تقول لي بشتت الكورة؟؟؟
أسة شوف في اخر مداخلة كييف ناقضت روحك بي روحك وقررت إنو فعلا ما فارقة أي لحن وتوزيع والسلام في حين إنو في المداخلة القبلها اصريت تزرزرني بي إنو المقصود عمل وطني!!!
لو أي لحن والسلام فهاك الـــــود من طرف الدولاب..لحنا وتوزيعا وكلاماً..

جزء من الـــــــــــــود..
وزمان كنا بنشيل الــــــــــود ..وندي الــــــــــــود

بالمناسبة يا موصلي حاجة مهمة عايزك تفهما وإمكن انا وضحتها ليك قبل كده ..شرحك العلمي محل كل تقدير وإحترام وأكيد ح يضيف لي كتييير وانا زول لا بفهم في نوتة ولا بفرز الدو من الري اللهم بشوف لي خطوط زي كراس الإنجليزي وسلالم طالع نازل ..
انا تحكيمي تحكيم مستمع عادي راس مالو أضانو ..ح اتفق معاك إنو ممكن يكون في علمية تقيييلة جداً في تحليلاتك وحاجات بتفهموها إنتو أهل الموسيقى لكن زي ما قلت ليك ده فهم بتاع تخصص تقني بحت ما بيخدم الفكرة الانا بتكلم عنها اللهم إلا في سبيل المعرفة والتثقيف ..كما وإنو مرات كتيييرة في تحليلات تشبه للحد البعييد حد تفسيرات وشرح اعمال للشعراء في حقيقة الأمر بيكون الشاعر أبدا ما قاصد الشروحات اللي بيجو بعدو النقاد والمحللين يشرحوها..بيكون هو قالوا ككلام عاااادي وما قاصد فيهو أييي شي لكن النقاد يلولوووهو ويلفووهو ويطلعوهو إنو هنا قصد كده وفي الحتة دي سووا كده وو و ...
ده ما تمهيد لي إنو اغاني ابو اللمين نوتتها غير الح تجيبو أو ما بتكون بي الفهم ده لكن ده توضيح لي إنو مقياسك العايز تحكم بيهو غير مقياسي الانا محتكم ليهو وبفهمو ..

براعي في البوست دا من نزل بس ما لقيت فرقه اكتب لانو كلام حيكون كتييييير
و صراحة المقارنة صعبه شديد بينهم الاتنين بس صراحة اكتر إي واحد فيهم
كُجنكة براهو و ما تقدر تقول دا اقله من داك ابداً.
و صراحة اشده شديد وردي و ابو الأمين ديل عدنهم اسلوب و سلوك فارق من كل
الفنانين الكلام دا ممكن نعرفه من زي ناس ساطور و ازهري و الموصلي ، يعني
الاتنين ليه تحديداً هم بقوا حجر الرحى لينا هسي في قاشنا دا؟

يا عمر الفاروق و الله ظهرتها عااااااملة يوم بتكتل ليك فنان بجنس سواتك دي!!

لحدي ما اجي صاد بس لو الموصلي حلل بالنوته حامد بريمة من عافية بظهر هههههه
ولا شنو يابرووووف ؟!

Quote: يا عمر الفاروق و الله ظهرتها عااااااملة يوم بتكتل ليك فنان بجنس سواتك دي!! لحدي ما اجي صاد بس لو الموصلي حلل بالنوته حامد بريمة من عافية بظهر هههههه ولا شنو يابرووووف ؟!

والله عمر مايكتل الا ناس قريعتي راحت
لكن ناس الكنجنكه وابو جاكومه ديل ما بقدر عليهم
هسع شوفو عمر يصدق عليه قول سمير غانم
(تجيلها كده تجيبها كده هي كده!!!!!!)
يعني واحد اكاديمي زيي يقوم عمر يطلب مني دليل على
آن قصة ثوره آحسن عمل وطني سوداني على الاطلاق
يقول لي جيب البروف (يقصد الاثبات)
اقوم آقول ليهو انها الاحسن لحنا وتوزيعا واداءا
كلام على قدر فهمه حسب تعبيروا يقوم يلف ويدور
آقوم آقول ليهو خلاص آنا حآعمل ليك مقارنة تحليليه
اكاديميه بالنوته الموسيقيه بين انا سوداني التي اختارها وقصة ثورة التي اخترتها
يقوم يزوغ تاني ويقول لي انا ماعارف شنو كده
والله عمر الفاروق ده
حامد بريمه مايحوشو ههههههههه
في النهايه نقول ان محمد الامين في هذا العمل الوطني تفوق على نفسه
وعلى كل السابقين والمجاييلين له بل والقادمين بعده
كلام عديل كده بلا لف ولا دوران
Straightforward

Quote: عُمر الفاروق كتب: أسة شوف في اخر مداخلة كييف ناقضت روحك بي روحك وقررت إنو فعلا ما فارقة أي لحن وتوزيع والسلام في حين إنو في المداخلة القبلها اصريت تزرزرني بي إنو المقصود عمل وطني!!!

في أيّ مُداخلة قُلت لك أنّ المقصود عمل وطني ؟!
مع العلم أنني شاركت في هذا البوست بأربعة مُداخلات ...

أتحدّاك أن تأتي بمداخلة تقول بأنني قُلت أن المقصود عمل وطني ؟


ــــــــــ
لو غلبك قول الروووووووب

شكرا يا ابراهيم عبد الحليم

انا تأسفت مع نفسي كثيرا لمراسلتك وردك هو السبب

لست دقيقا بالمرة في كل ما ذكرت

محمد الامين الي الان يتغني بلو بهمسة ونور العين ويمكن ان يكون غناهما قبل الاذاعة لكن هذا لا يعني بالطبع التقليد

فمثلا ارتباط وردي بابراهيم عوض لا يمكن مقارنته بترديد محمد الامين لاغنية لو بهمسة

محمد الامين لم يبدأ حياته مقلدا بالمعني المتعارف وأول ما تغني لحن بنفسه اغنية انا وحبيبي

وردي بدأ بالحان غيره وعندما بدأ التلحين لنفسه ركن الي الايقاع النوبي في اغنية يا سلام منك الا ان اشتد عوده ...

فلماذا يعيب صاحب البوست أغنية مثل انا وحبيبي ؟؟؟

بمناسبة الاغاني الطويلة ... ود الأمين في تقديري يتجاوز وردي دونما تعسف .. عمقا ولحنا وتوزيع سليم للذوق والترداد

بمناسبة المفردات والاختيار صحيح ما ذكرته عن اضافة الهرم وردي لمفردات متل بلدي يا حبوب

ولكن لناخذ الحلنقي مثلا كشاعر تعامل معه كل من محمد الامين ووردي كما ذكرت في مداخلة سابقة

شوف وردي اختار شنو من الحلنقي ولحن كيف ... وشوف ود الامين اختار شنو ولحن كيف ...

محمد الامين اختار ولحن بتتعلم ... ووردي اختار ولحن الحنينة السكرة مع احترامنا لعصافير الخريف

شاعرا آخر مثل المرحوم ابو امنة حامد

وردي اختار منو بنحب من بلدنا ولحنا دليب بصورة قسرية.. واختار تاني قالوا بتحبو قلت ليهم مالو ؟؟ ههه

ابو الامين غنا ليهو رجع البلد ...

اختيارات والحان ود الامين اجمل واعمق

مع كامل التقدير

بالنسبة للحلنقي يا الأمين عباس ...

Quote: ومن أعمال أبو الأمين الشهيرة ، لا ننسي تلك الأغنية التي فازت بالمرتبة الأولي في مسابقة الإذاعة السودانية بإستفتاء المستمعين في عام 1979م وهي ( بتتعلم من الأيام) وقد إستخدم فيها أبو الأمين أيضاً آلة العود إستخداماً فيه مهارة فائقة في المقطع الأخير من الأغنية000وقد كانت تحتوي علي مفردات فيها الكثير من أسلوب الملامة الرقيق المصدر

بالمناسبة لحن الود والموسيقي المصطنعة فيه من اسخف الالحان

اتحدي سوداني يكون قادر يردد لزمة موسيقية للغلوتية دي ...

لحن فقد فيهو وردي اهم شئ عندو وهو حساسيتو العالية وفهمو لمزاج الشعب السوداني ...

مشكور يا صبري ...

ود الأمين دا معجزة يصعب الاحاطة بكنهها في زمن قريب

والله يا صبري كان اقول الروب ما بعرفو !!! مع إنو والله عرضك مغري والروب دي ممكن تفكني منك..
بس عموما وعشان اوريك انو ربما إنك بتقرا بي إضنينك فأهو انا لمن اخدت بي رأيك واتعاملت بي اللحن والتوزيع جبت ليك عمل وأهو إنت أصرييت ترجع ترد تاني على قصة الوطنية والما وطنية ..
بالمناسبة الموصلي زول حرييف جداً وبرضو انا بقر ليهو بي إنو ما بينضم ساي فما تفتكر إنو لمن قال وطنية دي قالا إعتباطاً زي ما فهمتها إنت..ده المووصلي وانا بعرفو يا صبري ..وأسسسة راجع كل مداخلات الموصلي شوفو كيف مصر ومحدد مع كل كلمة إنو بيضيف وطنية دي..الموصلي عااارف روحو بيقول في شنو وفاااهم إنو لي إختار قصة وطنية دي وانا والله فاهمو ومحترم شديييد ذكاءه في الحتة دي ..بالجججد الموصلي حريييف ولاعبا صاح وصدقني يا صبري إنت الضارب برة التختة ..

يا موصلي انا لمن قلت سوداني حقيييقة ما قصدت ليك لحناً وتوزيعاً دي عشان تدخل في مقارنة لحنية توزيعية ..انا قصدت ألفت ليك إنتباهك بي إنو كلمة وطنية في ما اخترته لي ود اللمين انا عندي فيهو رأي فهكذا اعمال انا ما شايفة وطنية شايفا ثورية ..فقلت ليك انا الاغاني الوطنية عندي شايف إنو أغنية انا سوداني انا هي نموذج لي عمل وطني ما بقارنو بي الملحمة ولااا بي بلا وإنجلا ..
لأنو ببساااطة كده ممكن أعتبر أغنية هببت ثورة الإنقاذ بتاعت ترباس عمل وطني بي المقياس ده..انا ما حبيت استرسل وقتها عشان ما تقول لي نططت بي الموضوع زي ما متعودين مع كل مداخلة لي..
أهو انا أسة جبت مثال لي لحن وتوزيع كمثال لي أغنية الود بعد ما استمعت لي قدس الله سره صبري ..

بالمناسبة يا إبراهيم عبد الحليم مداخلتك كانت كويسة فكونو جاتك مراسلات بي تحت تستجديك إنو في حاجات حساسة ولا يصح قولها انا بعتبر دي عقد ليس إلا..كلامك كان كلام بعيد عن التجريح وانا عن نفسي استوعبتو ... بس بعد حذفتو بالجد فقدت فهمي ليك وعن نفسي اتضايقت من طريقة تفكيرك بعدها لأنو جاني إحساس مغايير..

الأمين أخوي::

Quote: بالمناسبة لحن الود والموسيقي المصطنعة فيه من اسخف الالحان

وهو شننن التوزيع بلا الصناعة ...؟

الأمين أخوي:

Quote: وردي ما بدا بي شغلو .. لحن ليهو الخليل .. ولما بدا يلحن بدا بي يا سلام منك بايقاع نوبي يعني اعتمد علي خلفيتو الحضارية ودي صدفة كان ممكن تنتج اي واحد نوبي لانو الخلفية واحدة اضافة الي الليلة يا سمراء .. محمد الامين الفنان الوحيد الذي لم يقلد ولم يبدأ بداية تقليدية وبدأ بانتاجه ودي الموهية الحقة ودي يتجاوز فيها حتي عثمان حسين ناهيك عن وردي

Quote: محمد الامين لم يبدأ حياته مقلدا بالمعني المتعارف وأول ما تغني لحن بنفسه اغنية انا وحبيبي

عشان ما أبني كلامي على باطل جاوبني على السؤال ده بي صورة مباشرة وبعد داك بكتب مداخلتي..
هل أول أغنية تغنى بيها أبو اللمين في حياتو سواء في المسارح أو في الحفلات أو في أي محفل في بداية ظهوره كفنان هي أغنية انا وحبيبي؟؟
لأنو قصة لم يقلد ولم يبدأ بداية تقليدية دي واجعاني شوييية كده وعايز أشوف ليها حل نهائي..

دي قائمة بي أعمال العبقري وردي منقولة من موقع سودانيز ليهم التحية ..فلترو على كيفكم ونققو العايزينو وشيلو الما عايزينو واحذفو المكرر إن وجد والما حقو برضو إن وجد وبعد داك نجي نتفاهم بعد ما نصفي القائمة دي وقائمة ابو اللمين وممكن بعد داك نجي نمسكهم وااحدة واااحدة وزي ما بيقولوا السعوديين يااا ليييل ما اطووولك ..

Quote: احبك احبك انا مجنونك ارحل اسأل قلبك استنيني اسعد الايام اقابلك اكتوبر الاخضر الحبيب العائد الحبيب قلبه طيب الحزن القديم الحنين يا فؤادي الحنينة السكرة الريلة السنبلاية الصورة الطير المهاجر القمر بوبا الليلة يا سمرا المرسال المستحيل الناس القيافة الهوى الاول الوصية الود اماسي الغربة امنقار امين شو امير الحسن انا افريقي اول غرام بالسلامة بعد ايه بلد رايح بناديها بنحب من بلدنا بين الريد و الهوى بيني و بينك و الايام توبة جمال الدنيا جميلة و مستحيلة جيلي انا حبك حبك شاغلني حبيب القلب حبيبي جنني حبيناك من قلوبنا حرمت الحب و الريدة حنية " تسجيل قديم " حنية "لو بكايا" خاف من الله دوري يا ايام ذات الشامة زي البانة سلاف الغنا سلام على السودان سليم الذوق سؤال سوات العاصفة شعبك يا بلادي شن بتقولوا شوفوني انا مخطوبة صباحك نور صدفة صوارده شو عذبني علي سليم غلطة فراشة تدور قبل الوداع قسم بمحيك البدري قطر الندى كده اسأل كرولية نجولية كفاية يا حبيبي كمشكا لم يكن لو بالصد لو بايدي لو بهمسة لو بهمسة " وردي + محمد الامين " ليه نسيت ايامنا ما بنساك ما تخجلي مافي داعي مرحبا يا شوق من غير ميعاد نختلف او نتفق نور العين هجرة عصافير الخريف وا اسفاي والله مشتاقين وردة صبية وسط الدايرة يا اعز الناس يا بلدي يا حبوب يا سلام منك يا طير يا طاير يا ناسينا يا نسمة يقظة شعب يلا تعال يلا

زدي برضو قائمة لي الأستاذ ابو اللمين من سودانيز وبرضو ممكن تكون ناقصة وينطبق عليها ما كتب عن قائمة العبقري وردي..برضو فلتروها وخلونا نصفي الأغاني بتاعتا وبعد داك نسف ونقارن ..

Quote: اربعة سنين اسمر "البوم ودمدني" اشتياق الجريدة الحب والظروف الملحمة -قديم اكتوبر ارضنا مروية اكتوبر الممهور اكتوبر واحد وعشرين اكتوبر واحد وعشرين-مختلف المتاريس المجد للثوار السودان الوطن الواحد الموعد انا سلمتو قلبي بدور القلعة بعد الشر عليك بعد الشر عليك "البوم ودمدني" بنتعلم من الايام زاد الشجون جانا الخبر شايلو النسيم جاني طيفو طايف " مختلف " جديات العسين حروف اسمك حلم الاماسي خمسة سنين "مختلف" سابينا سوف ياتي شهر عشرة عصينا طائر الاحلام عابر طريق... قديم" عيال ابوجويلي-تسجيل قديم عويناتك..توزيع جديد غرار العبوس غربة وشوق" فجر الغنا المامؤل قكلام زعل كلام للحلوة لما شفتك ما اجملك مراكب الشوق مساجينك من شوفتو طولنا مهر الدم نرجسة همس الشوق ودمدني " البوم ودمدني" وحياة ابتسامتك وعد النوار يا جميل يا رائع يا حاسدين غرامنا-قديم ياريتد يا معاين من الشباك يا ناعم العود يا نور العين

Quote: وهو شننن التوزيع بلا الصناعة ...؟

اها ده البجنن بوبي ذاتو ياعمر /// شيخ عمر ارعى بي قيدك هههههههه
ولكن الود اغنيه غايه في الروعه يالآمين مافي كلام في رآيي

Quote: يا موصلي انا لمن قلت سوداني حقيييقة ما قصدت ليك لحناً وتوزيعاً دي عشان تدخل في مقارنة لحنية توزيعية ..انا قصدت ألفت ليك إنتباهك بي إنو كلمة وطنية في ما اخترته لي ود اللمين انا عندي فيهو رأي فهكذا اعمال انا ما شايفة وطنية شايفا ثورية ..فقلت ليك انا الاغاني الوطنية عندي شايف إنو أغنية انا سوداني انا هي نموذج لي عمل وطني ما بقارنو بي الملحمة ولااا بي بلا وإنجلا ..

وهل هنالك ما هو اعمق علاقة بالوطن من الثوره؟؟؟
عندما يصاب شعب من الشعوب بمثل هذا الداء الذي آصابنا من حكم جائر على
الشعب فلا علاج الا الثوره
وليست هنالك آغنيه ثورية وطنية تعادل قصة ثورة وتطولها مقاما
مع احترامي للكثير للجميل من الآغنيات الوطنية الرائعة
آما قياساتكم الكمية والرقمية فهي
ليس اثبات للجودة الابداعيه
وردي فنان عظيم آنا عاشق لاغنياته
وارى مرحبا ياشوق من آعظم الاغنيات في تاريخ السودان
كما آن وحيده عبد الدافع مرت الايام
من شعر مبارك المغربي والحان عربي الصلحي
شقيق الاستاذ التشكلي الصلحي
عجز الكثير من الفنانين بكم آغنياتهم الكثيرة في آن يآتوا بواحدة في مستواها
اذن دعك من حكاية الكم وركز في الكيف

تاااني يا موصلي بعييد ليك كلامي وبقول ليك افهمني وما تقولني كلام ما قلتو ..
انا ما بتكلم عن أغنيات وردي اكتر من أغاني ود اللمين والسلام..انا قلت نفلتر ونطلع الاغاني من الطرفين اللي ممكن ما نحسبها أغنيات من العيار الثقيل ونطلع لستتين في بادئ الأمر ..ولو طلع ما جووده العبقري وردي مثلاً 70 أغنية من أصل مئة أغنية بينما ما جوده ابو اللمين عشرين أغنية من بين خمسين أغنية فدي برااها علامة فارقة لازم نقييف عندها..انا ما بقصد أقول هاااكم شوفو وردي عامل مئة أغنية بينما ابو اللمين عامل خمسين بس ..نوووو..انا بقول من أصل مئة جوود وردي سبعين وده رقم ما ساهل مقابل كم وعشرين أغنية مثلاً وده بيدي علامة فااارقة في صالح العبقري وردي..
بعد ما نخلص للنتيجة دي بعد داك ممكن نجي نمسك السبعين أو الخمسين بتاعت وردي مع التلتين أو العشرين بتاعت ابو اللمين وبرضو نقارنهم ..ويين المشكلة ؟

الأمين أخووي:

Quote: وردي بدأ بالحان غيره وعندما بدأ التلحين لنفسه ركن الي الايقاع النوبي في اغنية يا سلام منك الا ان اشتد عوده ...

الكلام ده إنت متأكد منو ولا درّاب ساي والسلام؟؟؟؟
كدي أدينا مصدر معلومتك في قصة إنو وردي بدأ التلحين بي يا سلام منك !!!!!!!
ومبدئياً كده انا بقول ليك حسب علمي والله أعلم إنو وردي بدأ بي أغنية أول غرام يا أجمل هدية في بداية مسيرته التلحينية ..

عمر الفاروق

اولا : ليه اعتبرت انو المراسلة تخص البوست دا

ثانيا : ليه افترضت انها استجداء .

ثالثا : لعلمك الرسالة قبل ما تكتب موضوعك دا وكانت عبارة عن سؤال للاخ ابراهيم

السؤال كان بخصوص مداخلة ليهو في بوست حقو عن زورق الالحان

ورد السؤال بنصف اجابة .. وانا ما عجبتني

فهمت ... يعني لا استجداء ولا بي تحت تحت ولا غيرو

بالمناسبة وردي دا زاتو بعد درابك الرميتو دا ما عندك بيهو اي علاقة

وبالضرورة ما عندك علاقة بو دالامين والبوست دا انت ما قدرو زي ما قال حمزة وانت متشعبط ساي

دحين يا اخوي العفو في العافية

وما في داعي لي كلام زيادة


التعديل لاضافة كلمة ( زيادة ) الاخيرة ززز سقطت سهوا

بعد قلت ليك العفو في العافية

لقيت مداخلتك الفوق دي بخصوص بداية وردي اللحنية بي اغنية يا سلام منك

انت ياخي تهضرب من الصباح ما عارف انو وردي بدا الحانو بي يا سلام منك ؟؟؟؟

لا وكمان داير ليك مصدر ؟؟؟

ياخي دا كلام حكاهو وردي بعضمة لسانو وفي اكتر من حتة

واول غرام يا حلو جات بعد يا سلام منك

يا سلام منك غناها وردي بعد يا طير يا طائر والليلة يا سمراء واول لحن خاص بيهو

فعلا ما ليك علاقة بوردي ومتشعلق ساكت

ضيعنا معاك زمن ساي

قايلين القبة تحتا فكي ... طلعت ما عارف وردي زاتو بدا الحانو كيف

والله رمضان دخل اللحم الحي والكورة بقت مشتتة شديد يعني هسي الواحد ممكن يروح
برااااااحة في البوست دا في ماهو مطلوب من الموصلي اثباتة وما هو مطلوب من عمر اثباته
وان كان فكرة اثبات عمل معين انو اقوى من التاني دي زاتا ما واقعة لي كويس... لانو
ما ممكن اثبت عمليا وعلميا انو في عمل معين معين اقيم وارفع شأوا وقدرا من عمل آخر
لانو ببساطة كدا انا لو ما هبشتني مثلا الملحمة وهزتني ودخلتني من جوووووة تاني مافي
جنس بشر بقدر يخليها تهبشني وتهزني وتدخلني من جوة.... القصة كلها بتعتمد علي ذائقة
المتلقي كان عجبو العمل خلاص وكان ما عجبو ستفشل في كل المحاولات وان كانت علمية في
اخضاع ذائقة وجدانه ان يعجب بها.. المشكلة الاساسية في تحليلات اي عمل موسيقى من ناحية
علمية بكون صعب لينا نحن كمستمعين عنقالة اننا نفهمو يعني انا ما حا اقدر افهم نص
التون من التون الكامل شنو... لكن ممكن افهم انو الحتة دي في الغنية انضربت فيها مزيكة
مريحة ومنسجمة مع كلمات الاغنية وانو الفنان عمل فيها طلعات خطيرة جدا ريحتني انا كمستمع
في حناني .... دا فهمنا نحن العناقلة اها يا زوار البوست فهمكم انتو شنو؟... انا في الختام
بتمنى اننا كلنا نخت الكورة واطا ونخلي البوست دا مفيد لينا كلنا من غير اي تشنجات للراي
والراي الاخر.... ودمتم ودام الود بين الناس.

معليش يا عمر ولك العتبى حتى ترضى سامحنى لمن قلب البوست للصفحة الثاتية افتكرت ان المداخلة ما فى زول حيشتغل بيها فشلتها برة مع الابقاء فقط على تصحيح المعلومة انو محمد الامين غنى فى بداية مسيرتو الفنية باغنيات وردى لو بهمسة و افتكر نور العين او التسعة عشر سنة وكذلك العيون النوركن بجهرها. هل قلد ام لم يقلد دى مابعرفها ولكن بداء باغنيات الاخرين.
انا وخليل ببوست زورق الالحان بهناك ختينا كمية اغنيات لمحمد الامين مغنيا لعثمان حسين والشفيع وحتى عبد الحليم حافظ.

أبواللمين - مابين زورق الالحان وقناة الشروق - ذكريات واغنيات نادرة

وردى قال كثيرا انو متأثر بابراهيم عوض وغنى ليهو . هل قلده ام لا لا علم لى. ولكنه فى بدايتو كما محمد الامين غنى للاخرين. كم من الفترة غنى وردى او محمد الامين اغانى غيرهم قبل ما يغنوا غناهم والله ما عارف.
الحقيقة انهم الاثنين غنو للاخرين.


بحكم قرابتى لاسرة حصاد التقيت الاستاذ محمد الامين مرارا. . عندما دارت الايام واقام معنا محمد الامين بالمانيا عام ١٩٩٤ عرفت الرجل عن قرب احببته اكثر لتواضعه وتدينه وقفشاته بل وبكائه الكثير.والله يا عمر كنا بنشترى ليهو كرتونة مناديل كل يوم ليمسح دموعه. لذلك كذلك ياعمر اعرف حب وتقدير الاستاذ محمد الامين لمحمد وردى. وهو الخلانا نحب وردى وزيادة.
هذا واحد

ولكن يا عمر وهذا رأى الشخصى فقط ان الراحل محمد وردى فلتة زمنية لا يمكن ان تتكرر وخايف انو وفاة وردى السريعة المفاجئة ستكون حرمتنا من كنوز شوفت كيف كنووووز اندفنت مع وردى.

يااخ وردى قضية ومصادمة يوم انقلاب هاشم العطا ارتد وردى عن مايو وعكس كلمات اغنيتو لا حارسنا ولا فارسنا والانقلاب لم ينجح بعد . دى ما بعملها زول فى الدنيا .الانقلاب بعداك فشل وتم اعتقال وردى سنة كاملة.
لمنننن سقط نميرى غنى ليهو وردى بقى اغنية بلى وانجلى فى منتهى التحدى والسفور ما مختشى من زول.

المواضيع التى تناولها وردى فى اغنياته متنوعة وعميقة بل شجاعة وجريئة وسباقة جد مثال اصبح الصبح اتغنت فى الستينيات وفهموها الناس فى انتفاضة ابريل 1985.

شعراء وردى مش غير عاديين ديل مفصلييين وشاذين عدييييل. اسماعيل حسن والحلنقى وابوقطاطى والدوش الخ

كدى شوف حنبنيهوا البنحلم بيهو يوماتى كلمات بتقفز بيك للامام و لا جيل العطاء ولا حدق العيون

وردى ده مش شلال واحد ده شلالات من الالحان


سافر يا وردى بالسسلالالامة



ووو كم جميل ونحن فى حضرة هرمين من اساطين الغناء السودانى حقيقة


التمنيات لك ولزوار البوست

حقيقة مدى حب وتقدير محمد الامين لمحمد وردى


الفنان محمد الامين في الحفل الاخير قبل وفاة الفرعون

الأمين اخووي:
ما محتاج أحلف ليك مش؟ بس أبداً ما قصدتك في مداخلة المسنجر الداخلي وراجعت مداخلتك ولقيتك بتشير لي مراسلاتك مع إبراهيم ..كتبت كلامي ده بناء على اللي بشوفوا وبيمر بي كتيير من خلال طلب تعديل وحذف مداخلات ..أاه يا اخوي في الحتة دي لو أصابك رشاش فعفو وعافية انا كلو ولا الفهم المغلوط والبناء عليهو ..
عن نفسي حسيت إنو إبراهيم شال المداخلة لأنو نحن كسودانيين مرات بنكتب حاجات بي طيب خاطر وما في بالنا ما يرمي اخرون ويعقدوك مما كتبت ..أها في جزء من الكلام إبراهيم كتبو وانا حسيت ناس ممكن تقراهو غلط بحكم حساسيتنا وقالوا ليهو شيلو..الناس ديل منو انا أبدا ما جا في مخييلتي زول معيين..

النقطة التانية الأهم فيما يتعلق بأغنية أول غرام ..إعتذار إذا ما كنت أول عمل قام بي تلحينه وردي وإمكن اكون خلطت ما بين أول عمل كتبه وردي وأول عمل لحنه وردي..عن نفسي سمعت وردي كتيير في حوارته بيجيب سيرة أول غرام وبيحكي عنها عن إنها اول كتاباته وربطتها بي إنها أول الحانه ..فدي وجب فيها الاعتذار والتوضيح..

بالنسبة لي عدم جييتك فزي ما إنت جيت براك وماف زول غصبك زي ما تمشي براك وماف زول بيغصبك..الكتابة هنا ما بي قروش وما بيدوك فيها راتب ولا كمان بيقيموا فيك الحد لو ما كتبت..تمشي طوالي يا زول وتستمتع بي باقي العشرة الأواخر ديل..وبرررضو متى ما قررت تجي وهففت ليك أي حاجة تجي طوااالي ماف زول بيجبرك على شي..

الخير يا عوض:
أبصم على كلامك بي العشرين ..
وماني زايد فيهو شي..

Quote: الخير يا عوض: أبصم على كلامك بي العشرين .. وماني زايد فيهو شي..

عمر عندك فيسبوك

لو عندك ضيفني ياخ

Quote: عمر الفاروق كتب:بس عموما وعشان اوريك انو ربما إنك بتقرا بي إضنينك فأهو انا لمن اخدت بي رأيك واتعاملت بي اللحن والتوزيع جبت ليك عمل وأهو إنت أصرييت ترجع ترد تاني على قصة الوطنية والما وطنية ..

ببساطة لأنّك قولتني كلام أنا ما قلتو ...

Quote: عمر الفاروق كتب: بس عموما وعشان اوريك انو ربما إنك بتقرا بي إضنينك فأهو انا لمن اخدت بي رأيك واتعاملت بي اللحن والتوزيع جبت ليك عمل وأهو إنت أصرييت ترجع ترد تاني على قصة الوطنية والما وطنية ..

يعني عايز رأيي فيهو أنا .. ولاّ الموصلي ؟
لو عايز رأيي أنا .. بقول ليك ما عجبني !!!

Quote: عمر الفاروق كتب: بالمناسبة الموصلي زول حرييف جداً وبرضو انا بقر ليهو بي إنو ما بينضم ساي فما تفتكر إنو لمن قال وطنية دي قالا إعتباطاً زي ما فهمتها إنت..ده المووصلي وانا بعرفو يا صبري ..وأسسسة راجع كل مداخلات الموصلي شوفو كيف مصر ومحدد مع كل كلمة إنو بيضيف وطنية دي..الموصلي عااارف روحو بيقول في شنو وفاااهم إنو لي إختار قصة وطنية دي وانا والله فاهمو ومحترم شديييد ذكاءه في الحتة دي ..بالجججد الموصلي حريييف ولاعبا صاح وصدقني يا صبري إنت الضارب برة التختة ..

يا عُمر .. لقد ساءني هروبك من سؤال الموصلي باللف والدوران على كلمة "وطنية" .. وقد كتبت له الآتي:-

Quote: عمر الفاروق كتب: يا موصلي انا الأغاني الوطنية دي إيه رأيك بشوف أغنية انا سوداني انا دي واحدة من أعظم اغنيات الوطن ..أغنيات الثورات الداخلية دي انا ما بشوف انها اغنيات وطنية من أساسو..

ولو سمح لي الموصلي حتى يُرضي عُمر أن يقوم بتغيير كلمة وطنية في سؤاله إلى ثورية أو أغنية ثورات بس عشان نخلص من الحدوتة واللف والزوغان دة !!!

Quote: الخير يا عوض: أبصم على كلامك بي العشرين .. وماني زايد فيهو شي..

عمر يبصم على آمر نهى عنه الخير
هاك حينما ضربنا له مثل بقصة ثورة

Quote: تمام ياعمر أما قصة ثورة فهي قمة فن الغناء الوطني على الاطلاق أختها لاتوجد ------------------------------- بروووووف إت يا موصلي.....!!!

وحينه اردفت الكلام قائلا

Quote: خليك على كده ونرجع للآثبات وبجي السؤال هل عندك اي واحده تعادلها من حيث اللحن والتوزيع؟؟؟ هات ماعندك

وهاك حينما ذكر انا سوداني


وهاك حينما ذكر هبت ثورة الانقاذ
آخيرا
يالخير يمكن التفريق بي عملين بواسطة متخصص في التحليل الموسيقي
بدون العواطف المزاجيه
رد فقال

Quote: يا موصلي انا الأغاني الوطنية دي إيه رأيك بشوف أغنية انا سوداني انا دي واحدة من أعظم اغنيات الوطن ..أغنيات الثورات الداخلية دي انا ما بشوف انها اغنيات وطنية من أساسو..

ثم اتى بسيرة هبت ثورة الانقاذ وقال قبلها الاتي في تناقض واضح

Quote: بالنسبة لينا وإن كان ده ما موضوعنا لكن اسة طلبت من الموصلي يجي يشرح لينا بعد كده جماليات العمل الإختارو ويورينا معطياتو ..ده الحصل بكل بساطة فما عارف زنقي وزنقك دخلها شنو؟

اما ان كان الموضوع آحب ولا آحب فهذا يلغي كل هذا البوست
شهادتك في عمر مجروحه يالخير


وده الدليل من كلام عمر عن ذائقتي الموسيقية مع ملاحظة آن صاحب هذه الذائقة التي يشير اليها عمر
هو محلل السيمفونيه رقم 103 لهايدن اللي هي من حيث البناء الموسيقي والهارمونيه تاكل الغنا البتتكلمو عنو ده كلو زل ما عملت عصاة موسى لثعابين سحر{ الفرعون

Quote: انا يا موصلي إنتقدت ذائقتك السمعية من خلال البشوفو منك هنا ومن خلال إشاداتك بي تجارب معينة ومن خلال دعمك لي تجارب أقل ما توصف بيهو إنها أعمال ضعيييفة وواضحة جداً جداً وده ما كلامي ده كلام ناس كتااار قييمو الاعمال دي ..

عموما انا عايز يالخير اجهز كوتات لكلامك انت ذاتك في هذا البوست
مع تحياتي لكما

يا موصلي..
تحياتي..
انا ما عارف إمكن إحساسي من خلال البكتبو ما قاعد يصلك ..قصة التكويت دي انا ما عندي معاها اعتراض ومانع ..وصدقني انا ما متناقض ولا متهرب كما يبدو من إيرادك لي ما أكتب..
انا لمن قلت ليك أغنية انا سوداني أغنية عظيمة لاحظ ما جبت ليك إنها أعظم لحن وتوزيع مش؟ انا فعلاً كان غرضي الفت إنتباهك لي إنو انا ما شايف قصة ثورة ممكن نطلق عليها أغنية وطنية ..وبعد داك ومباشرة لمن طلبت مني أي عمل لحناً وتوزيعاً كتبت ليك طوالي إنو انا بخت قصادها أغنية الود ..وبي كده أعتقد إني ما قاعد أتهرب منك مش؟ وفي نفس الوقت إتحليت من صبري اللي لحدي أسة بيتلايق فيني ليي ما عارف !!1 يا صبري خلاص وللمرة الجغلومية قلنا ليك حددنا الود ..ومن هنا ولي قدام اتعامل معاها على إنها المعتمدة عندي سمح؟
بالنسبة للتنويت وقصة بروووف إت دي يا موصلي انا اصصصلو ما باباااها منك لأنو زي ما قلت ليك لو ما افادتني فأكيد ما حتضرني ووالله وده كلام جادي ليك تصدقو ولا لأ انا متأكد إنو المعلومات الح تكتبا ح تضييف لي بعد جديد لكن صدقني ده ما بيمنع إنو اتفق مع الخير في إنو قصة العلمية في الحاجات ممكن تقنع الزول بي عمل!!
انا اصلاً ما طرحت في يوم من الايام إني دارس للموسيقى أو بفهم في خباياها العلمية ..انا طارح روحي مستمع ممتاااز وليس جيد ..واضاني دي بثق فيها ومقتنع بي إنو في الغنا ده سلاح السمع أهم من سلاح العلم !!! والأضان هي جواز مرور أو فشل أي فنان ..
أسة يا موصلي وعشان أرجع ليك الأمور لي نصابها وعشان ما تقولوا بنعوس الأبري بي الحلو مر.. ألخص ليك حاجاتي تاني..
1- فلترة اعمال وردي وود اللمين والوصول لي قائمة يمكن أن نسميها إهرامات غناء كل فنان حسب ذوق المتلقي من معجبي الفنانين ..ودي خلينا نقول معيارهاما اتفق عليه الغلبية عشان ممكن بكل بساطة مرات أغنية تكون عاجبة فرد واحد وممكن يقول لأ انا في رأيي دي أغنية عظيمة (الناس القيافة ويا حاسدين غرام مثال..)
2- عن نفسي وضعت ليك أغنية الـــود كتلحين وتوزيع لي تحليلا مقابل قصة ثورة (ودي عشان نتفك من صبري ونثبت ليهو إنو الموصلي ما كان قصدو الكلام الكان فاهمو صبري)..
3- العلمية في الموسيقى مقابل أذن المستمع الغلبة دوماً بتكون للأذن الموسيقية أكتر من النوتة ..الشغل العلمي قد يضيف لي المتخصص لكن للمتلقي العادي قد ما يتفهم ..وردي في رأيي ومع إنو ممكن بي علمية يشرح كل جمله الموسيقية إلا أنه وبي بساااطة خاطب أذن المستمع العادي بي ألحان في خارجها ممكن تشوفا بسيطة وفي علميتها برضو ممكن تلقاها معقدة ..
ود اللمين جنح لتجويد وترميم أعماله في السنوات الأخيرة بعكس ما كان في بداياته الفنية وانا هنا طالبت بي تسجيلات ابو اللمين القديمة وتسجيلات وردي القديمة للمقارنة ..

تحياتي تاني..

Quote: ولو سمح لي الموصلي حتى يُرضي عُمر أن يقوم بتغيير كلمة وطنية في سؤاله إلى ثورية أو أغنية ثورات

يعني أرجع أشيل الـــود يا صبري؟؟؟
لأنها ما ثورية وانا كتبتها بناء على معلوماتك اللي بتقول المهم اللحن والتوزيع ..

Quote: يعني أرجع أشيل الـــود يا صبري؟؟؟ لأنها ما ثورية وانا كتبتها بناء على معلوماتك اللي بتقول المهم اللحن والتوزيع ..

أيوة أرجع شيلها .. وأبني مثالك على الحاجة الفي رأسك إنت يا عُمر على حسب وصفك لأغنية قصة ثورة "الملحمة" ...


المطلوب: مثال لعمل أجمل من قصة ثورة من حيث اللحن والتوزيع على حسب تصنيف عُمر الفاروق لأغنية قصة ثورة سواءً كانت وطنية أو غير وطنية أو ثورية أو أيّ حاجة ياخ

Quote: المطلوب: مثال لعمل أجمل من قصة ثورة من حيث اللحن والتوزيع على حسب تصنيف عُمر الفاروق لأغنية قصة ثورة سواءً كانت وطنية أو غير وطنية أو ثورية أو أيّ حاجة ياخ

أو غير وطنية

طالما قلت كده فخلاص انا باقي على الـــود..

Quote: أو غير وطنية طالما قلت كده فخلاص انا باقي على الـــود..

إذاً أغنية الملحمة لدى عُمر الفاروق هي أغنية غير وطنية ...
فهل هي أغنية عاطفية ؟
أم لها وصف آخر لديه ؟



ـــــــ
عرفت إنها غير وطنية فهل هي عاطفية أم ثورية أم ماذا ؟

Quote: 2- عن نفسي وضعت ليك أغنية الـــود كتلحين وتوزيع لي تحليلا مقابل قصة ثورة (ودي عشان نتفك من صبري ونثبت ليهو إنو الموصلي ما كان قصدو الكلام الكان فاهمو صبري).. 3- العلمية في الموسيقى مقابل أذن المستمع الغلبة دوماً بتكون للأذن الموسيقية أكتر من النوتة ..الشغل العلمي قد يضيف لي المتخصص لكن للمتلقي العادي قد ما يتفهم ..وردي في رأيي ومع إنو ممكن بي علمية يشرح كل جمله الموسيقية إلا أنه وبي بساااطة خاطب أذن المستمع العادي بي ألحان في خارجها ممكن تشوفا بسيطة وفي علميتها برضو ممكن تلقاها معقدة .. ود اللمين جنح لتجويد وترميم أعماله في السنوات الأخيرة بعكس ما كان في بداياته الفنية وانا هنا طالبت بي تسجيلات ابو اللمين القديمة وتسجيلات وردي القديمة للمقارنة .. تحياتي تاني..

لما قلنا ليك ياعمر لا تدخل المزاج الشخصي اللهو مزاجك ومزاجي انت مصر
تسمي نفسك بآبو السماع
لذا تاني نقول ليك آمشي و قوقل (كليات التربية الموسيقية في العالم )
الموسيقى وسماعها تربية يتم تعليمهاحينما يكون البت في الاعمال الموسيقية الغنائية
هسع لو سآلناك آن تبحث عن نغمة تعادل مصطلح
Imitation
محاكاه في الاغنيه السودانية دربك بروح
ناهيك عن ان سآلناك هل هذه المحاكاة
حركه عكسيه
آم متوازيه
آم تقهقريه
آم تقهقريه عسكيه
آم تقهقريه متوازيه
آها فهمت حاجه؟؟؟؟؟؟
دي كلها من سمات التآليف البارع وربما اكاديميون كثر لايعرفون عن ذلك شيئا
---------------------------
لذا فعندما تآتي الى موضوع المزاج لاتضع نفسك بآنك السامع الخارق
لآن للسمع الجيد ضوابط
وعندما تتهم واحد مثلي بآنني ايدت آعمال ضعيفه لا ترمي بالكلام جزافا
شنو يعني عمل ضعيف وليه؟؟؟
مم يتكون العمل؟؟؟؟
بالمناسبه آنا بحترم ذائقتك الفطريه وبختلف معها آحيانا
وآحيانا ممكن آقبل بان يكون مزاجك السمعي عالي
بس دعك من القول الجزافي بآنك آقدر على التقييم الموسيقي
من شخص تلقى ذلك في ثلاث جامعات اثنين منهما ليستا بسودانيات حتى
لكن كيفما كان الحال فان الحوار معك يستمر لفائدة القراء
وهذا البوست مفيد جدا
آخيرا وما العيب في آن يجنح محمد الامين لتجويد آغنياته
كان آحري بك آن تشيد بذلك
وهل تعلم بان استاذنا وردي يعتمد تماما على الموسيقيين
في تحسين وتجويد آغنياته
وهذا قطعا يحسب له وليس عليه
تحياتي

Quote: فهل هي أغنية عاطفية ؟

نعـــــم..

Quote: نعـــــم..

Quote: عمر الفاروق كتب: يا موصلي انا الأغاني الوطنية دي إيه رأيك بشوف أغنية انا سوداني انا دي واحدة من أعظم اغنيات الوطن ..أغنيات الثورات الداخلية دي انا ما بشوف انها اغنيات وطنية من أساسو..

قد تكون عاطفية بالثورة بالنص أو الشنقيطي أو الوادي ...




ـــــــ
أقول ليك حاجة خلّيها بالكلاكلة اللّفة ياخ

قطعا ياصبري قصة ثوره آغنية وطنيه
ولكنها مشحونة بالعاطفة الجياشة تجاه الوطن الحبيب
وهي تقف على القمة في هذا المجال بلا منازع
ولكن تتلوها آغنيات كثيرة رائعه
للخليل ولوردي وعثمان حسين
وكابلي وغيرهم من مبدعينا

صبري عندي ليك سؤال خارج الموضوع:
عندك حزام فيهو فاروزة ذهبية ؟

Quote: صبري عندي ليك سؤال خارج الموضوع: عندك حزام فيهو فاروزة ذهبية ؟

لا يا عُمر .. وما أظن بفهم في الفن أكثر منك ...

ولكن زوغانك شين ياخ

ممكن تعتذر لي لأني منتظر إجابتك على الموصلي ...
أمّا اعتذارك للموصلي دي حاجة خاصة بيك إنت ...


ـــــــ
فهلا اعتذرت لي عن امتناعك أو رفضك للإجابة على سؤال الموصلي ...

Quote: قطعا ياصبري قصة ثوره آغنية وطنيه ولكنها مشحونة بالعاطفة الجياشة تجاه الوطن الحبيب وهي تقف على القمة في هذا المجال بلا منازع ولكن تتلوها آغنيات كثيرة رائعه للخليل ولوردي وعثمان حسين وكابلي وغيرهم من مبدعينا

ولكن الزول دة حيّرني عديل .. وفي الآخر طلبت منّو إنو يوصفها بالطريقة الشايفها هو ...

السؤال في الأصل عن اللحن والتوزيع .. تشتيت الكورة جا بي حتة وطنية وأغنية ثورات ...
فلتكن يا أستاذ أغنية ثورات .. ونشوف نهايتو شنو ؟


دمت بود ،،،

عمر سلام شديد

انا من قريت العنوان عرفت ان البوست مآله او نهايته الحتمية
مقارنة بين العملاقين وردي ووداللمين
ولكن حصل ان جرجرتو الموسيقار العملاق الموصلي في المقارنة (وهات ما عندك )

تخيل انا ىمن معجبي وردي وود اللمين في آن واحد
عندما استمع لوردي تاني حاجات وداللمين بتبقى لي مسيخة
والعكس كذلك


كنت احد اعضاء لجنة تكريم وردي في الرياض في تسعينات القرن الماضي
عندما احتاج لدعم علاجه بعد ان ضن عليه حكومة اللنقاز في ذلك الوقت
ولكي ندعم الاحتفالات باحد الفنانين الكبار وخاصة والناس في الرياض
فنان كبير الساحات الخضراء مجتمعة لن تسع
فاتصلنا بوردي في امريكا كي يتوسط لينا ويكلم وداللمين او ابو عركي
فاعتقد ان الكلام وصل وداللمين فقد طلب ان يصطحب معه كامل الاوركسترا
الا ان السلطات السعودية سمحت لشخصي (موسيقاريين) فقط مع وداللمين
فباءت محاولاتنا لكاملا الاوركسترا فاتصلنا مرة احرى بوردي
فقال كنت عارف ان وداللمين ما بفرط في الفرقة الكاملة لانه بيحترم فنه
وما ممكن واحد زي وداللمين يغني بموسيقيين من الشارع...
وايضا باءت محاولات بالفشل باستجلاب ابو عركي لنفس السبب

في نفس يوم الحفلة اتصلنا بوردي ليحيي الجماهير تحدث كثيرا عبر الاثير
وقبل ان يقفل المذيع السماعة استعجل في تقديم الفنان البعيو فبدأ الغناء بصوته
الجهوري وكان الخط لازال مفتوحا مع وردي.
الا انه في اتصال آخر بعد الحفل انتو يا ناس الرياض ما لقيتو غير البعيو
فقلنا له ان البعيو احد المشاركين وليس الفنان الاساسي....
شقت كيف!!!!!!!!!

Quote: تخيل انا ىمن معجبي وردي وود اللمين في آن واحد

اتفق معك يازمراوي
فاحدهما هو النيل الازرق والاخر هو الابيض
وفي النهاية هما نهر النيل
---------------
تحياتي

Quote: 2- عن نفسي وضعت ليك أغنية الـــود كتلحين وتوزيع لي تحليلا مقابل قصة ثورة (ودي عشان نتفك من صبري ونثبت ليهو إنو الموصلي ما كان قصدو الكلام الكان فاهمو صبري)..

طيب ياعمر شنو سمات التوزيع الذي قام به المؤلف اندريه رايدر الموجوده في الود
---
وشنو سمات التوزيع الذي قام به الموسيقار موسي محمد ابراهيم
صاحب ماضي الذكريات وغيرها
في قصة ثوره
بعدين نجيك للكلام الجد

يا صبري يا اخوي كدي فتش مننا منننا يا قول السعوديين بتلقى ليك حزام بي فاروزة لأنو نضميك ده نضمي زول عندو حزام بي فاروزة وساعة دهبية ..
دي المرة الطفشطاشر اقول ليك انا بقيت على الــــود ..إنت مالك ما عايز تقبلا إجابة؟ ما عاجباك؟ دي تكون مشكلتك برضو..

يا موصلي :

Quote: طيب ياعمر شنو سمات التوزيع الذي قام به المؤلف اندريه رايدر الموجوده في الود --- وشنو سمات التوزيع الذي قام به الموسيقار موسي محمد ابراهيم صاحب ماضي الذكريات وغيرها في قصة ثوره بعدين نجيك للكلام الجد

يعني يا موصلي كل ما أجاوب ليك سؤال أو أحقق ليك طلب ح تديني سؤال؟
هات ما عندك وخليني انا ..
طلبت مني أديك عمل يوازي أو يفوق وانا إخترت عمل الـــود ..ومتوقع منك بعد ده تشرح ..وانا بجيب كراسي وقلمي وبربع يديني واسمع واستفيد ..
اقتنعت وفهمت الدرس أكون شاكر ومقدر..بقيت على فهمي ليك أجر المحاولة ..لكن قصة تسوقني سواقة زي دي اسمح لي اقول ليك اعفيني..

النصيييحة اللحظة مستمتع بي حلقة مراكب الشوق مع عركي وابو اللمين ...والباشكاتب مزاجو راااايق..

زمراوي يا راقي... بجيك بي رواق إن شاء الله

تصدق وتامن بالله يا موصلي انا عندي احساس انو عمر دا ما اظن بعرفني اصلا وما اظن اصلا
اننا اتداخلنا مع بعض في البورد دا الا في البوست دا وعمر يا موصلي لو بعرفني ربما يكون بعرفني فقط
من كتاباتي السنوية في موضوع اللوتري ودا تقريبا الشي الوحيد الملتزم بيهو انا هنا
في هذا المنبر يعني بالواااااضح كدا يا موصلي نحن ما صحبان وان كان انا بتمنى وبتشرف
بمعرفة عمر .... فكييييييف يعني تقول شهادتي في عمر مجروحة مافي اييييي شي بخليها مجروحة
يا موصلي صدقني انا بكتب ما يمليه علي ضميري وما ارى فيه الصدق دون محاباة لكائن كان
ودايرك يا موصلي تتاكد من شي والله والله انا ما عندي معاك اي عداء شخصي ولا بستقصدك ولاااا
تخت في بالك حاجة زي دي. واكرر اعتذاري ان سببت لك مداخلتي السابقة او ستسبب لك مداخلاتي
اللاحقةاي اذى.... صدقني لا اقصد الا ما اكتب.

Quote: تصدق وتامن بالله يا موصلي انا عندي احساس انو عمر دا ما اظن بعرفني اصلا وما اظن اصلا اننا اتداخلنا مع بعض في البورد دا الا في البوست دا وعمر يا موصلي لو بعرفني ربما يكون بعرفني فقط من كتاباتي السنوية في موضوع اللوتري ودا تقريبا الشي الوحيد الملتزم بيهو انا هنا في هذا المنبر يعني بالواااااضح كدا يا موصلي نحن ما صحبان وان كان انا بتمنى وبتشرف بمعرفة عمر .... فكييييييف يعني تقول شهادتي في عمر مجروحة مافي اييييي شي بخليها مجروحة يا موصلي صدقني انا بكتب ما يمليه علي ضميري وما ارى فيه الصدق دون محاباة لكائن كان ودايرك يا موصلي تتاكد من شي والله والله انا ما عندي معاك اي عداء شخصي ولا بستقصدك ولاااا تخت في بالك حاجة زي دي. واكرر اعتذاري ان سببت لك مداخلتي السابقة او ستسبب لك مداخلاتي اللاحقةاي اذى.... صدقني لا اقصد الا ما اكتب.

الخير الحبيب
كدي قول بسم الله
والله العظيم آنا مستمتع غاية الاستمتاع بكلامك
I'm Just having fun with you
ياخي والله مافي آي حاجه في نفسي
هسع اعتذارك ده عقدني وحيخليني آبطل خفه الدم
ياخي انا صاحبك وصاحب عمر آها آخلي مناوشتكم في هذا البوست الممتع ولا استمر
محبتي وكل سنه وآنت طيب

تكفيكـ طائر الأحلام
كررها كل يوم وستجد أهل السمع مقنطرين أضنينم
سلمى سيد دي مفروض تعتزل خلاص
بس تعيد وتكرر طائر الأحلام دي وتختها في السي في حقتة كجزء من حلقة
يكفيها أنها أستمعت إليها لوحدها
.....
إنَا لله

Quote: حلقة اليوم ٢٦ رمضان والضيف هو فضل الله محمد مرة آخرى. اعتقد ان اغنية اليوم هى عنوان البرنامج زورق الالحان لعدة اسباب الشهر الكريم ماشى للنهاية والناس سيكون اهتمامها بالعيد ومستلزماته هى الاغنية الكبيرة والقوية المتبقية الباقيات واعتقد ستقدم فى الايام المتبقية هى نرجسة - صلاح حاج سعيد كلام للحلوة - هاشم صديق همس الشوق - هاشم صديق برضو ممكن انا سلمتو قلبى

مداخلتى اليوم ببوست زورق الالحان

تحياتى