Post: #1
Title: مْد البُعاد -- جزْر القُرُب
Author: أبوذر بابكر
Date: 01-17-2012, 02:45 PM
المد:
المد المارق
من زفرات الفِجه
وماشى سارِب فيك شهيقْ
موجوع مكتّف بالدُعا
ماخِد من سماك الجافيه لون
حزنه طامح زى وريدِك
كلما يوسع يضيقْ
يا صُبحِك فات
بى ليلو
سبعة ضحكات
بى ليلو
يا عُمرك طال
بى سنينو الرايحه
ما لاقيه الطريقْ
ويا فرَحك مات
بى ليلو
سبعة نجمات
بى ليلو
قمرا مِقسم روحه فى وش السهاد
يا حالك حال
مسجون فى ضلوع الغَبَشه
كاسيهو الرماد
يا حليلو جافاهو الرفيقْ
وأُماتك الدافقه الحنانْ
تِعبت تفتش فوق جزاير الريحْ
تعاين ليكا فى وعَر الدرب
تندَه تقالِد
فى رواكيب الزمانْ
تطيّب خاطر العمر الكسيحْ
ما عارفه ضُلك من رِهابك
حننت قلب المكانْ
ما فارزه جيتَك من غيابَك
اتارى المويه دسّاها الحريقْ
الجزر:
الموج سليل المويه
المويه يا دم البحر يجرى
جنب العيون الكايسه دمعاتا
جوه العروق الودّرت
فى عز شوقا نبضاتا
والواطا بت الكون
مرقد الناس المشت بدرى
الليل غنوة الخايفين
ساكت يعاين فى الودار
الموت عديل
احسن كتير من الفزعْ
مين البِوريك الدرب
مين البِخُت الجمره
فى مويه الوجعْ
ودربَك معلق فى الفضا
وفضاك مكتّف بالغبار
وقلب سفينتَك يشتهى
الجوه فى خاطر السواحل
وبره فى وش النهار
الموج سليل المويه
المويه يا سِت الرَوا
خشم الكلام سَكَنُه العطش
والريق يباس المِشتهى
وباقى النضم روح طفش
خُتّى القصائد فينا
ناولينا الدوا
وبين سلّوكة الملح
البِتيرِب من دمانا
حِليلا قَريَفة القُعاد
فوق الحكاوى الصّابه عِينه
وبين ريحة البن الرَمَانا
قايمة حيشان من وِلف
سهرانة نِيمات الوداد
بين ريحة الملح
السكن جوه القلب
طوَل دروبك بالبعاد
رشرش صَقِيعة الروح نَزِف
وريحة الشوق الحَمَانا
نفرِد جناحو
نشُرُو فى الضل السَمح
نعطنو فى النيل النِشِف
راقدة كيمان العباد
الجاوَرت نبع الأسى
الموية يا السقم القديم
الموية يا سِت الروا
سفن الغريب بايته القَوا
والشوق حلم نص النهار
فرزع غناويهو الهوا
|
Post: #2
Title: Re: مْد البُعاد -- جزْر القُرُب
Author: mohmed khalail
Date: 01-17-2012, 06:02 PM
Parent: #1
اباذر صديقي الجميل
سلامات يا زول يا فنان..
وينك وكيفنك؟
Quote: وأُماتك الدافقه الحنانْ
تِعبت تفتش فوق جزاير الريحْ
تعاين ليكا فى وعَر الدرب
تندَه تقالِد
فى رواكيب الزمانْ
تطيّب خاطر العمر الكسيحْ
ما عارفه ضُلك من رِهابك
حننت قلب المكانْ
ما فارزه جيتَك من غيابَك
اتارى المويه دسّاها الحريقْ
|
ده حكي سمح يا المطر سمح بالحيييييييل
دم بخير
|
Post: #4
Title: Re: مْد البُعاد -- جزْر القُرُب
Author: أبوذر بابكر
Date: 01-18-2012, 07:20 AM
Parent: #2
ازيك يا ابو خليل
تحية خضراء وسلام معطر ليك
حالك واحوالك
وان شاء الله انت شديد وطيب
تسمح ايامك وتسعد سنينك
قول آمين
|
Post: #3
Title: Re: مْد البُعاد -- جزْر القُرُب
Author: Adil Osman
Date: 01-17-2012, 06:27 PM
Parent: #1
| Quote: ما عارفه ضُلك من رِهابك |
لا حول ولا قوة الا بالشعر يا ابوذر بابكر
دي فيزياء عديل. انعكاس الشمس من ضل الكتلة
وانكسار الضوء في وهج الصحراء.
يا للنفس البشرية المعقدة. يا للغربة.
يا جنا
http://hashimsiddik.com/portal/index.php?opti...-20-04-08&Itemid=117
نشيجك نشيدك يا ابوذر.
|
Post: #6
Title: Re: مْد البُعاد -- جزْر القُرُب
Author: أبوذر بابكر
Date: 01-19-2012, 07:34 AM
Parent: #3
ازيك يا عادل
كيف الشتاء عندكم
أكيد لا شمس لا ضل حداكم
ونحن هنا الضل والرهاب الاتنين واقفين على خط استواء الطقس الكعب الما بتشكر
الصحراء صاره وشهاوالشمس مخاصمة الشجر
شكرا ياخ على هاشم البديع
وفى بعادنا عن ارض الحنان مرت قرون ضوئية
يا حليلنا
هاشم عيان وموجوع
ما عندنا ليه غير الدعاء المن جوه
ومعاه المحبة الشديدة
|
Post: #5
Title: Re: مْد البُعاد -- جزْر القُرُب
Author: أبوذر بابكر
Date: 01-18-2012, 03:02 PM
Parent: #1
|
|
