أسد على .. ورقيص شديد

من نافلة القول, أن حكومتنا السنية أقالها الله والشعب .. هى أكثر الحكومات " جخا " على الاطلاق .. و" الجخ " هى مفردة عاميه سودانيه لا أجد لها مقابلا دقيقا عند الشعوب الاخرى الناطقه بالعربيه .. وللخليجيين مفردة " كشخه " .. غير أنها تشير للمبالغه فى التأنق ولا تتمدد ك " الجخ " فى ادعاءات البطولات الزائفه .. كما و أن مفردة " الهواش " المصريه و " النتاش " و " الفشار " لا يمكن لها أن تكون مقابلا ل " الجخاخ " السودانيه .. ونزيد نحن فيها بإضافة اللاحقه " جنس جخ "

فدحين يا أخوانا حكومتنا دى جخاخه جنس جخ

وأشد ما تكون حكومتنا السنية جخا عند انفرادها بالجماهير فى زقاق .. والعجب لو كان فرد " شيوعى " فى زقاق أمنجيه .. وتحضرنى هنا نكته تروى عن أحد ظرفاء أمدرمان عندما تم إعتقاله ببلاغ " ترفيهى " للمشاغله ليس الا ..
وقامو خلعو خلعه شديده ..

- يا حاج .. سمعنا انك شيوعى

فرد عليهم ..

- يا أبنائي .. أنا والله ممكن أكون أقرب ل " شاذ جنسيا " من شيوعى ..
هذا وقالها بالعاميه ..

وللجخ الجماهيري ابعادا أسطوريه فى اللقاءات الجماهيريه .. تشوف " الكاكى " وال " دبابير " واللاندكروزرات والكتاحه لمن عيونك تزغلل .. ويبدأ فاصل " الجخ " بطيئا ثم متسارعا رويدا رويدا .. وهو " جخ " متطلب جدا يعتمد أساسا على التفاعل المباشر مع الجماهير ..

- أها يا أخوانا سامعنى كويس ؟؟..
فيهمهم الجمهور ..
- سامعين

- بتعرفو امريكااا

- بنعرفها

- أها الامريكان ديل ذاتهم نحن خوفناهم .. وخوفناهم بكلمة لا اله الا الله .. وهسع نخوفهم زياده .. قولوا وراى .. لا اله الا الله

فينخرط الجميع فى اثارة خوف الامريكان وقبل الفاصل الغنائي الهجيج الراقص !!!

سلام

أها يا أميره وقبل طقوس بث الرعب فى قلوب الامريكان, يكون هناك فاصلا من الجخ التنموى الوطنى المستقل .. ويدور غالبا عن الوفره الغذائيه والنفره الزراعيه والاستراتيجيه الشامله لمكافحة الدرن والخطه العشريه لتوفير مائه وثلاثون الف فرصة عمل لابناء المنطقه ودور ديوان الزكاة فى ادخال خمسه الف اسره تحت مظلة الاسر المتعففه .. ثم يمتد الجخ مستفيضا حول السلام الذى تحقق ودور الحكومه فى استتباب الامن ..

هذا ولا تكتمل تلك المرحله من الجخ الا بسؤال مباشر للجماهير

- هسع يا أخوانا .. فى تنميه من غير سلام ؟

فترد الجماهير بلا ..

- فى تنميه من غير أمن ؟!

فترد بلا ..

يقرب يقول ليهم : ما تيييب

وبعد ايصال الجماهير تلك اللحظه الشعوريه المدغدغه باحلام ديوان الزكاة واستتباب الامن .. يبدأ فاصل من الجخ العضلى تجاه الاحزاب السياسيه وفاروق ابوعيسي .. وهنا تماما تتم ممارسة الجخ اللغوى المستمد من قاع الذاكره الاجتماعيه للجماهير .. وكان " أمريكيا " وكان " الاتحاد الاوروبي " فهما " تحت جزمة " الجخاخ الدولى .. وكان " الصادق " فليلحس كوعه وكان " ناس نقد " فقطع من خلاف .. وكان فاروق أبوعيسي فغض الطرف أنك من نمير فلا كعبا بلغت ولا كلاب ..

الذ مافى الموضوع انو وفجأة كده يجى صاروخ على شكل " كف " سريع جدا ..
يقوم الجخاخ ما يعرف هو ذاتو هو " كف " ولا " بونيه "!!
و جا من وين !!
والادهى والأمر انو ما يعرف انو هو رد عليهو ..ولا حاول يرد .. ولا ما رد نهائيا ..



_________________________

المدهش حقا انو يقرر وبناءا على المعطيات يعتقل ليهو كم معارض !!!

ده كلام ده يا سعادتك !!
الناس التحت جزمتك ديل يقعدو يستبيحوا بلدنا دى سااااى كده وعلى كيفن ؟!
وطااخ طااااخ واقعين يكفتو فوقنا ..
يا عمك الجخاخ .. وفى التبادى .. هم مرقو من تحت جزمتك كيف ؟!
ولا ديل ما هم ..
نان ديل منو !!!

يا عمك ..
أنا هسع كمواطن ..
الضربنى شنو بالتحديد؟!

يا عمّك المشكلة ليست في الجخاخ
المشكلة في الناس البصدّقوا الجخاخ وديل من أسباب أزمة البلد


ـــــ
كان عندنا واحد صاحبنا كضّاب كضب خليهو ساي الزول دة شدة ما كضّاب بفك الكضبة وهو ذاتو بنخلع معاها وياخد ليهو نطة
نحن في الأول وبحكم الصداقة والثقة كنّا بنصدقوا لكن لمّا نطاطو كترت بقينا نشتغل ليهو

التجاهل
التجاهل
التجاهل

يا صبري ..

والله انا خائف وزارة دفاعنا تصدر بيان مكتوب فيهو كلمه واااحده 3 مرات

التجاهل
التجاهل
التجاهل


هذا
ويعتقلوا كم شاب وشابه من " قرفنا " !!!
أو يلمو ليهم فى شيوعى مطرف ..

هيييييييع ..
لو كانوا رجال .. كانو يجونا بى تحت

قرقر حبس الدرب وربط الهوى والشرق
كدي ميزولنا الضرب ديل جنياتنا ما بتنغلب
انا ليهم بقول كلام دخلوها وصقيرها حام

_____

دحين ميزو لى عمكم الجخاخ ده يا جماعه ..
شايف سعد مدنى ميز ليهم زييين ..
باقى الضرب

يا عمّك تشكر على الطرب



ــــ
وياخي نفختني نفخة قرّبت أنط نطة واحدة ولي تل أبيب توووشك

سم أب درق البصقِع .. جدري القيعه البفقع


لا حولاااا
انعل أبو ما كدا ذاتو ..
والله ما مشتهلى الا صقريه اخوجل فوقها مع ود الباوقه ونفوت الرخم قاعدين ..

Quote: يقوم الجخاخ ما يعرف هو ذاتو هو " كف " ولا " بونيه "!! و جا من وين

شر البلية ما يضحك...................تسلم يا ود المشرف.

هييييع يا صبري
خوجل يا صقر ..


بطناً جابتك والله ما بتندم
با أسد الكُداد الفي خلاك رزم
يا رعد الخريف الفى سماك دمدم
بابك ما أنغفل نارك تجيب اللم
ما بتعرف تقول غير إستريح حرم

أبشر آ زول ..
أبشر بالخير

يا كونت ..
زمااان كان عندنا واحد فردتنا ..
- فى الحقيقه هو ما جخاخ ولكن الظروف ما ساعدتو فى القصه -
قاعدين فى حفله فى الحله والشباب مصلحين لود عينهم ..
شايفين ليك آى زول صغييير .. ونعاين فوق البنات ومردخين بأحلام البطوله والبرنجى ..
فى الفاصل جانا ليك واحد حنكوش ما بتعرفو ولد ولا بت ..

- شباب سلام عليكم
- وعليكم ..
- " فلان الفلانى معاكم

" صاحبنا " قام ليهو وتخن صوتو ..
- جدا
- جدا شنو .. انا بسأل من " فلان الفلانى
- ما قلت ليك جدا ..
- انت فلان الفلانى ..
خمش ليهو وشو وقالو ليهو
- لو ما انا اعتبرنى أنا ذاتو ..
- طيب لو سمحت عاوزك بره ..

الشباب فى اللحظه ديك كلو قام قومه واحده وتأبطنا شر الفى الراس والصحوبيه والحله والبنات ..
قام " فلان الفلانى " هاج ليك فينا

- ده شنو يا شباب .. عاوزين تقومى معاى لى حمام زى ده .. الكلام عيب يا أخوانا
- يا فلان ..
- يا أخوانا قلت ليكم الكلام ده عييييب ..
- يا فلان ..
- عيييييب يا ود المشرف .. الكلام ده عيب
وشبكنا عييييب عيييب يحدى ما قعدنا وطلع صاحبنا يطقطق الحمام سريع ويرجع نواصل الفاصل
فى السكه وقف وطلع ليهو سيجاره ولعها بمزاااج وختاها فى طرف خشمو و .. مضى

دقيقه ما تمت جانا ولد من اولاد الحله جاري ..

- يا هوى حصلو " فلان "

جرينا بره الخيمه لقينا " الحنكوش " تاكل " فلان " فى الحيطه وشابكو ليك " بنج وشلاليت وكراتيه مبالغ فيها

وفلان متكول فى الحيطه والدم سائل من اى حته تقريبا وشابك الحنكوش

" انت قايل بنجك دى حرقتنى !!!

هسع عمك الجخاخ ده ما بكون عارف ذاتو البنيه حرقتو ولا لا
-

منال سلامات ..

ليس ضحكا يا عزيزتى ..
ليس الامر كما يبدو عليه ولكن ..
الفكره فى فضح الغيبوبه الوطنيه التى نعيشها ..

شكرا يا منال ..

ود المشرف

كيفك ياخ?

والله يا المشرف خجلونا عديل كدة!
تاني الواحد لما يشوف ليه يهودي حقو يفك ليه الدرب, ويغض الطرف, و...

مرتين ولا بغم?!!!!

دا مشير ولا راعي غنم?
الراعي ذاتو لو هجم عليه الديب على الاقل بقول تك* بعصاته ياخ
عيب والله يا المشرف
خجلنا ليهم

---
*تك كلمة تقال لهش الغنم ولا تجدي فتيلا مع الذئب لانه لا يفهم عربي ربما! هههههههه

بدرالدين ..
هسع بى ياتو وش تزاحمهم فى الطريق ..
بررراحه ممكن وبالاشاره كده يسالوك ..
بورسودان بتعرفها!!؟
تقول ليهم أيوه ..
يجروك خمسين طوالى ..


كيفك يا بدرالدين ؟!

ذكرتني فيلم أحمد آدم بتاع القرموطي (معليش نحنا بنتبهدل)

اها يا المشرف هاك دي عاملاها حرم النور مخسوس لي تور الحوش أي البشير

أسد علي ساكت ؟ أسد علي خالص والله يا مشرف
لكن وين مع (الطيياير) البدون (طيارين) دي ؟

ــــ
الطييايير دي بتاعت سيدنا القذافيوكدة




وتحياتي يا رفيق المغصة

لا بنخاف الجوي ولا الآلي البطير للعنقودي بقذف و منه اللظى بطير

يا خضر يا صاحبك

أها مسألة الطييايير بدون طيار دى مسأله غايه فى الجخ ..
تحت تحت سمعت انو الطييايير كانت فى مهمه استطلاعيه فوق سماء سودانيزاونلاين لرصد بعض التحركات الاسفيريه المريبه.. كما ويوجد شك كبير أنها بطيار وليست بدونه, وترجح بعض المصادر أن الجخ تمخض عن طيار بدون طياره ذاتو

هيييع يا عفراء ..
عمك الجخاخ يشبكوه ليك تور الحوش وجاموس الخلاء يحدى ما يلحقو حمام الوادى يا راحل ..
وفى حضرة كبلو ما بقدل الورل ..



_____
دى حرم النور حرم النور ؟!

Quote: الفكره فى فضح الغيبوبه الوطنيه التى نعيشها ..

غيبوبة , وهمّة ,كذبة كبري
قلتُ لصديقي : كُنا نسمع شعارات (أمريكا , روسيا قد ذنا عذابها)
وعندما سافرت ألي (أوكرانيا )* وأميركا
عرفت بأن عذابنا نحن قد دنا

الإستخفاف بعقول البشر ,وتنويم الناس (دينياً) و(رسالياً) والحكومة في كذبها سادرة
نحتاج لكثيــــــــــر من الموضوعية والعقلانية في تناول الآمور
ولكن (ولاة الآمر)وفي ضلال مبين

كلما أسمع (رمز السيادة الوطنية) و (التراب الوطني)... أتحسر علي (حلفا , حلايب , الفشقة ) و جنوبنا الحبيب الذي (شرطوه) شرطا من
خارطة بلادنا التي كانت (مليوناً) .
أتحسر و ابكي حال أخوتنا السودانيون في اليابان وليبيا وقبلهم في ميدان مصطفي محمود و أشفق لحالنا
نحن المهاجرين في المطارات والمؤانئ.

تفلح أجهزة الدولة الآمنية في (سحل ) الناس وقطع (أوصالهم) ولكنها تفشل فشلاً خائباً في معرفة كيفية ضرب عمق بلادنا
تفشل في المعرفة , دعك عن الرد بالمثل وتتبع من تسبب في هذا الجرم الشنيع

يا لهفـــــــــي عليك يا بلدي..
وسلامات يا صاحب
وكل أبريل وأمنياتنا لبلدنا كل الخير.
_____
* اوكرانيا =روسيا .....هنا.

لكن أمانة ما اتلومت يا محمد الحسن ياخوي..

ظلمت جخومتنا قصدي حكومتنا ظلم الحسن و الحسين..

هسة هم ما قالوا بيحتفظو لنفسهم بحق الرد؟

أدوهم فرصة..حيردوا ياخ .. حيردوا.. أصبر شوف الرقصة الجاية

و احتمال كبير يصاحب الرقصة إعلان عن إنشاء مصنع جزم.. عشان نعفص مما نصنع!





...
حقصة ياخ ما تجي تشتغل معانا دكتور في السراي!

يا عمك ما تشوت لينا خطبة جماهيرية لهشام الجخ

وتكون جخ شديد

حبيب نوره يا حبيبو ..
لم يتم العثور على المذكور " هشام الجخ " ولكن تم التعرف على الآتى وفى السياق ..

سناء خالد ..

Quote: هسة هم ما قالوا بيحتفظو لنفسهم بحق الرد؟

حيحتفظو بيهو وين يا سناء
غايتو الا فى التلاجه لانو حسب مصادرنا المسأله دى fridge item
على أن يقدم ساخنا أو بارد مع اضافةالسكر حسب المزاج
وعلى انغام "ورونى العدو واقوفو فراجه" نسخة حرم النور الاخرى


______

هذا العنبر من تلك السرايا يا عزيزتى ..
هيييع وكع جديد ..

يا هواري ..
قريت كلامك وفى بالى حاجه واحده ..
هسع هم بقرو كلامك ده كيف وبي ياتو وش ..
او كيف سيقدروا هذه الحزن الوطنى النبيل ..
ولا أعنى من هم فى السلطه ولا أذنابها وحارقى البخور ولكن ..
أعنى اؤلئك الذين فى الغيبوبه ..
كل الحصل نقلوهم من الغيبوبه فى عنبر " ساحات الفدا "
للغيبوبه فى ساحات الرقيص ..


هيييع وكع جديد ..

القرموطى كان جخاخ جنس جخ برضو !!..
يا مرتضى ..
الفلم الكوميدى المدور من 89 فى السودان عاوز ليهو كوميديان من نوع خاص ..
أقترح محمد نعيم سعد
الجخ الليلنا ده بنفهمو نحن بس ..
وانا فوقكم بجر كلام ..
دخلوها وصقيرها حام ..
كع ..

عبدو تعاطيل السنة كلها بكلمنا عن براعتو في الكوره و ان هو كابتن فريق شنو ما عارف
و في اول مباراه جا قاشر هدوم كوره و كداره و شنكارات
و للصفاره بتاعة الحكم رابطها في رقبتو
و من قولة تيت قام عليهو شافع صغير ما فضل الا يدخل ليهو الكوره دي في ... (اضانو)


و من اليوم داك صاحبنا بقي اداري.


________________________________________
دي اخرة سياسة احمي نظامك و (.....) البلد




و الله الموضوع دا مؤلمني عديل كدا ... اشكرك يا ود المشرف علي البوست الجا في وقتو

ناصر يا عمك ..

عبدو تعاطيل بتاعكم ده زول عاقل جدا ياااخ ..
قلت لى بقى " إداري "
بلم الفنايل وحق التمرين والعراضات والشبك وبجيب الباسطه والبيبسي والى ما ذلك

عبدو تعاطيلنا نحن كان غندولى .. هو البشتري الفنايل والكور والشبك وكافة اللزومات ..
بس اصر على حتة إنو يعزل التمرين ويخت المنتخب فى المطاشى ..
بجى بى اللسته أول زول فى التمرين ويذيعها ..

ود ديوب قون ..
عبدو تعاطيل باك شمال ..
متوكل سيردباك
عبدو تعاطيل باك شمال ..
مطى استوبر
عبدو تعاطيل باك شمال ..
حقصه ديب ..
عبدو تعاطيل باك شمال ..

وهكذا ..
إنت قايل أنا كرهت الراسمال من وين

شعور سخيف
أنك تحس بأن وطنك شئ ضعيف
صوتك ضيعف
رايك ضعيف..
.انك تبيع قلبك وجسمك
وانك تبيع قلمك وأسمك
ما يجيبوش حق الرغيف

_
ده هشام الجخ يا مشرف
أتمني يكون الفيديو مع محتوي البوست

Quote: أسد على .. ورقيص شديد

كيف ما فارز بلنجة و لّ كف؟
فارز ياخ .. طيب مصنع الشفاء عرفا طيارة من طيياير امريكيا من نوع " مية ؤ إليـVـن "
او كما قال ذاتخبطة و لخبطة.

عرفا كيف!؟

دا بكان
مفروض يتعلق فوق تب

وشنو
قدر ما تشوفو
ما تمشي عليو
تكتل ملف وتعمل نائم
يمكن ترضى عن نفسك
وبلدك وأهلك


براحة علينا يا ود المشرف
والله ما باقي صفحة ننقلب عليها

أي شيء انمحق

بله ود أمحمد ودالفاضل ..
ومبدئيا كده هيييييع وكم كع و صقريه كاربه ..

لفت دهشتى الجخ التالى

Quote: وعلمت (smc) أن الدفاعات الجوية ردت على الطائرة بنيران كثيفة اضطرتها الهروب من الأجواء السودانية غير أنها لم تحدد هويتها لكنها أكدت أنها طائرة أجنبية.

وهيييع تانى
المكنه فوقو بتكاكى
والمدفع تحتو بيخر
لا بيخاف ولا بيتر
قدام العينهم خدر

"هسع يقربو يعملوا فحص عيون ..
لو طلعت عسليه ياها القيامتك قامت"
__________
كع جديد

عزيزتى دوما ..
تحياتى ..

تأسرنى جدا أغنيات الحماسه ..
واستبطان معانيها يفضى حتما لتكريس الكثير من الاشياء الجميله ولكن ..
ديل كرهونا حتى فى حاجاتنا الكويسه يا دوما ..
وكأنهم يسقطون قبحهم الذاتى على كل ما تمر عليه ذواتهم القبيحه يا عزيزتى ..

تمعنى فى قول الشاعره واستصحبى ذلك الزمان اذ قالت فى المديح

" كاتال فى الخلا ..
وربا كريم فى البيت ""

وأسمعى الجاغريو ..

نحن صغيرنا عنده حياته ما هميه
وفى زمن الحروب الواحد يزن الميه
نحن أرواحنا يفدن ناس سعاد وصفيه
ونحن اللي وطنا وعودنا ديمه وفيه


وعمك الجخاخ تغتصب حرائر السودان فى بيوت أمنه الخاص ..
ويصرف على قواتو 80 % من قوت الناس لاعتقالهم ..

ده كلام ده يا زينب ؟!!

قيقا يا صاحبك ..
اللسد النتر تور الحوش جاموس الخلا قالو - تحت تحت - عارف وعامل فيها ما عارف ..
والصاروخ بين والطياره بينه .. وبينهما أمور متشابهات
ومنها مسأله " الشفاء " ..
والله أعلم ..

والله البوست ده يبكى عديل كده
انا لله وانا الية راجعون

سلام يادكتور ........متابع معاك بدقة واليك هذا المقال الجميل...............

Quote: e: "الحسوا" جناح الطائرات التي قذفت شوارع بورتسودان نجم الدين كرم الله - رئيس التحرير إلى حكومة الإنقاذ التي تتشدق علينا كل يوم وليلة في وسائل الإعلام المرئية والمسموعة بأننا إذا كنا رجالاً حقيقيين وننادي بإسقاط النظام، يجب علينا أن "نلحس كوعها"، أو أن نخرج إلى الشوارع لتسحقنا سحقاً. أذن أين أنتِ يا حكومة الإنقاذ من الفوضى التي تحدث في عقر داركِ والطائرات التي تُحلق بدون رقيب أو عتيد، والسودانيون يقتلون في الشوارع التي وعدتي بسحق معارضي النظام فيها؟ لماذا تسحق الطائرات الأجنبية المواطنين السودانيين في شوارع بورتسوان؟ ولماذا لا تعرف الحكومة حتى الآن الجهة التي شنت هذا الهجوم؟ أسئلة كثيرة وعديدة قد يسألها المواطن العادي الذي كثرت علية سياط "قدوقدو" وثقلت عليه وسئم كثيراً من التوعد بسحق أعداء الدولة والنظام وهم بطبيعة الحال من يخرجون إلى الشوارع للمطالبة بتخفيض سعر الخبز وليس هم الذين يحلقون بطائرات فوق سماء المدن السودانية لضرب السيارات والقوافل. إن حكومة الخرطوم قادرة فقط على التهديد والوعيد بضرب المعارضة وسحقها بينما هي عاجزة دائماً في حماية حتى العاصمة القومية التي استطاعت قوات عادية تحمل أسلحة خفيفة أن تدخل إلى قلب العاصمة وتقترب من القصر الجمهوري. وها هي اليوم الطائرات تحلق في سماء السودان، فهل سيكون النظام قادراً على "لحس" جناح واحد من تلك الطائرات ليعرف من أين أتت؟ أن ما حدث يوم أمس يجب أن تتبعه استقالة فورية لوزير الدفاع وقائد القوات الجوية السودانية وتشكيل لجنة عسكرية وأخرى مدنية للتحقيق في الحادث ومحاسبة جميع المقصرين في الأمر إلى جانب ذلك يجب على الدولة أن تراجع استراتيجياتها العسكرية وأنظمة المراقبة والحماية الجوية أذا كان لديها نظام أصلاً، وإلا عليها أن تترك هذا الشعب ليحمي نفسه. إن المهام الأساسية للدولة ليس فقط تشكيل كتائب عسكرية وفرق لسحق المعارضين والمطالبين بالحرية والبسطاء، وسن الضرائب والجبايات وإنما تامين سلامة المواطن والوطن الذي بات أمنه مهدداً في ظل الإنقاذ. وأخيراً .... لماذا لم يخرج علينا هؤلاء الذين يهددون بسحق المعارضة بالحديد والنار والمؤيدين لسياسات (قدوقدو)، والمتورطين في اغتصاب النساء المعارضات، لماذا لم يخرجوا بنفس الخطاب ويتوعدوا تلك الدول التي تسحق المواطنين؟، تلك الدول التي يعرفونها جيداً كمعرفتهم بمخابئي المعارضة وأماكن تواجدها حتى في الخارج كما يدعون. ولكن لم تقدروا .... ولن تقدروا أن "تلحسوا" حتى ظل جناح الطائرة التي تقتل مواطنيكم في الشوارع.

المصدرلتكن ذكرى 6 أبريل حافزا للنضال- بيان من فروع الحزب الدي...طي الليبرالي بالخارج

قالو عبدالرحيم ماشي في الشارع مع نافع قابلهم نتنياهو, نتنياهو قطع ليك في عبدالرحيم كف و ده اردلب وقع في الواطه و ما قام, نافع يقول لى عبدالرحيم قوم عليهو ما تخليهو يحقر بيك اليهودى النجس, ارفع راس أمة محمد,انت ########,شرطت عينا , و عبدالرحيم يقول لى نافع انا راقد لى فوق راى انا راقد لى فوق راى انا راقد لى فوق راى, عبدالرحيم منبطح لغاية نتنياهو مشي , نافع سأل عبدالرحيم اها رايك الراقد فوقو شنو؟ عبدالرحيم : باقيلك أكان قمتا ما كان طبق لى!!!!!

لووووووووووووووول حلوه يا عصام
لوووووووووووووووول
يا ود المشرف يا اخي الجخ دا ماركه مسجله للعروبواسلاميين .
عينهم في الحل الاسهل والممكن عايزين يركبوا الصعب .
نسال الله لهم الثبات .

لمن تشحذ سيفك ياعباس؟
لوقت الشده
اشحذ سيفك ياعباس

اشحذ سيفك يا عباس و نحنا ديل انشالله نموت ذاتو

في تنديدكم حينا و في تهديدكم حينا
سحقتم أنف امريكا
فلم تغلق سفارتها ...
ولاة الأمر
هذا النصر يكيفيكم و يكفينا
تهانينا..تهانينا

احمد مطر برضو

عزيزتى دوما ..
تحياتى ..

تأسرنى جدا أغنيات الحماسه ..
واستبطان معانيها يفضى حتما لتكريس الكثير من الاشياء الجميله ولكن ..
ديل كرهونا حتى فى حاجاتنا الكويسه يا دوما ..
وكأنهم يسقطون قبحهم الذاتى على كل ما تمر عليه ذواتهم القبيحه يا عزيزتى ..

تمعنى فى قول الشاعره واستصحبى ذلك الزمان اذ قالت فى المديح

" كاتال فى الخلا ..
وربا كريم فى البيت ""

وأسمعى الجاغريو ..

نحن صغيرنا عنده حياته ما هميه
وفى زمن الحروب الواحد يزن الميه
نحن أرواحنا يفدن ناس سعاد وصفيه
ونحن اللي وطنا وعودنا ديمه وفيه


وعمك الجخاخ تغتصب حرائر السودان فى بيوت أمنه الخاص ..
ويصرف على قواتو 80 % من قوت الناس لاعتقالهم ..

ده كلام ده يا زينب ؟!!

حكصة يا رائع....

سلام ياصاحبي....أضحكتني وأبكيتني ياصديق....

صرنا في حال يحنن واللة....

بعد إذن الأخ shamashi سأتصرف في نكتتة القريبها من بتاعة ود جبر اللة ....

ملحوظة....حتة النقاط الحزفها shamashi الفي النكتة إتخيل لي زي بتاعة زولك الفوق القبضوهو ناس الأمن و إتهموة إنو شيوعي....إظنها برضو بالدارجي....

Quote: واحد مدعي كدا زي جماعتك ديل عامل فيها ملاكم ومكره ناس مدني عيشتم. اتقابل مع واحد من ولاية تانية في حلبة ملاكمة. من قولة تيت قشطوهو ليك واحد خطافية جاء داقي الدلجة. مشجعين مدني شابكنو قوم قوم أرفع راس الجزيرة وهو غالبو يقوم. وهو راقد قال ليهم يا ...... أنا راسي ما قادر أرفعو تقولوا لي أرفع راس الجزيرة؟

Quote: باقيلك أكان قمتا ما كان طبق لى!!!!!

لوووووول " يا عملات دوما "
منبطحلو فوق راى ياعصام !!؟..

زمااان يا صاحبك
عمك الجخاخ الكبير موش قال الا فوق جثتو حتين يتمشى اصحاب القبعات الزرق فوق ارض السودان الطاهره ..
قررريب ده زى الشفت فيديو لواحد ذى قبعه زرقاء قابضنو مع بت من بناتنا ..
بناتنا يا عصام !!!
بناتنا !!
ولا بنات المشروع الحضاري يا بلد

سهام المجمر ..
نبكى ولا تأتى مواعيد البكاء ..
تجرى دموع العين والجماهير التونسيه تهتف
" الشعب التونسى ميمتش "
" الشعب التونسى ميمتش "
وللمصريين تأريخ بطولتهم الراهن .. وميدان تحريرهم
ولليبيين السلاح ولليمنيين الياسمين ..
ونحن يسرقو فينا صباح مساء
يعتقلونا صباح مساء
يغتصبوا بناتنا صباح مساء ..
يدقو المسامير فوق رؤوسنا ..
يعدموا من شاؤوا وشاء الطاغوت ..
يقسمو البلد ..
ويسوقوها للجحيم و .. يرقصوا

الما ببكى شنو يا سهام !!

ابراهيم النعمه يا صاحب ..
أقرأ النص ده كويس ..
تاج السر " الطين فى احتماله الاخير "

ماذا سوى سخف يغوص مع العظام, يفتت الأشياء في أقصى مكامنها ليبتدأ الحوار
فالنيل يجري كي يكرس معنى أن نبقى على قيد الحياة
و الأرض تقبع في الحياد و تمحي- أنثى- مهتكة البكارة
و العسكر المأجور يلفح كالهجير وجوهنا, و يقتلع الأماني من جذور القلب , يطمس بالدماء ملامح الآتي
و نحن نبتاع السياسة في المقاهي البائسة

سور هو التعب الذي أرخى ملامحه بكل براءة عند المغيب
سور هو التأريخ
عند بداية لم نتفق حولها بعد
و لم نبتعد من جورها بعد
و لم نقترب منها- لنعرف ما بها- بعد
سور يطوق رغبة أن نعري عقلنا للشمس
أو للبحر
أو للمسألة
سور هو الوعي المزيف حين ينتج مهرجان المهزلة
سور و سور نلتقي
على بوابة السجن الكبير
على بوابة السجن الصغير
على بوابة السجن البغيض و ننتهي من شارع أخصى ملامحه و غاب
افتحوا بوابة السجن العظيم و أدخلونا
هذى الشوارع ناقشت كل المشاكل, دون ما أدنى محاولة لإنتاج الخصوبة
هذى الشوارع عاقره
و فحولة الماضي تنامت في المسامع
و الأغاني
و الأقاصيص القصيرة ليس إلا
كان التلاقح خارج الإيقاع, و خارج مهبل الأنثى
فجئنا كاذبين
و ملتحين
و خافضين ذيولها للجند

كانت تواريخ الرعاة تكرس لاكتمال المهزلة
جاءوا من الزمن البعيد..
يؤكدون غيابنا عن مسرح الأحداث, عن رؤيا لأبعد من فروج نسائنا
كانوا يمطون الحديث من التواريخ القديمة نحو حاضرنا
و كانوا يبدءون القول بسم الله
وبسم الله كانوا يأخذون حصادنا لجيوبهم
و بسم الله كانوا ينتهون إلي المقاصل و المذابح, يسفكون دماءنا
و بسم الله كانوا يتركون الله , و ينتمون إلي قريش- باحثين عن الإمامة
إن الإمامة من قريش..
هكذا فكوا الطلاسم حينما درسوا تواريخ الديانة
و بسم الله كنا نستقيم إلي الصلاة وراءهم
و بسم الله صاروا يملكون الأرض و الأطفال و الأموال,
صاروا يملكون نساءنا و نساءهم و عويلنا في الليل أو عند إصدار الأوامر أن يسافر طالب نحو الجنوووووووب
كان الجنوب مضخة الموت الوحيدة
كانوا يضخون الدماء ليشتروا خبزا و فاكهة لحراس البطانة
و كانوا يحلبون شيا هنا و نهود موتانا ليكتمل الحفاظ على القرار المستقل!
و كنا نفتح الأسواق في وجه الصباح
المشمئز من الفضيحة
دون ما خجل, وكنا نسمع المذياع و النعي الأليم و جنة الأطفال و الأخبار في أقصى حدود الانتباه
تفوووووووووووووووووو

كذب هو التأريخ
حين يصعد بالشعوب إلي حواف الاشتعال, ثم لا نجد الحريق
كذب هو التصفيق في ذكرى بطولات الشعوب الزائفة
أكتوبر لم يكن ممهورا بدم
كان ممهورا بصعلكة المثقف و ارتطام الوعي بالإسفلت
و كان ممهورا بجهل الشعب, و امتداد الخصي من أقصى حدود الروح- إلي أقصى حدود البرلمان
و كان ممهورا بفوج من فضائح شيعت بكل سهولة في الليل
الليل ذاكرة الشعوب الخائبة
الليل حقل للتجارب و العساكر و الشراب
الليل و الوجع المرير تلازما فينا فصرنا هكذا
هكذا كنا نصفق للعساكر و العمامات الأنيقة
هكذا كنا نموت على صدر التواريخ البذيئة
هكذا كنا نموت...
الموت أللا يدرك المقتول معنى أن يموت
أو أن تموت على يديه قضية كبرى

هكذا درج الأوائل في ابتداء صراعهم ضد الفشل
كانوا يخافون الحقيقة مثلما يمشون خلف جنائز الموتى
و يرتبكون إذ دخل الشيوخ أو الصغار مجالس خمرهم
و يرتبكون إذ لاقوا فتاة واثقة
كان الخوف يسكن في تجاعيد المنازل
و المآذن
و المبايض – أصل فاكهة الوجود المبتذل
كانوا يدسون التشوه في مشيمات النساء- ليعبروا بجدودهم نحو البعيد, و يضمنون
تناسخ الأشياء طبق ما عرفوا من التأريخ في أزمانه الأولى
لذلك يعتريك عساكر في زحمة السلطة.
لا تندهش
لا تندهش أبدا
و دبر ما بعقلك من حضور واضح لتفصم ما بوعيك من دوائر للتناسخ و انتبه,إن التناسخ
يحفظ الأشياء في مضمونها- أن لم يقلل شأنها في الناتج التالي
تتلو عليك منابر الخذلان عري الشارع المندس تحت ملاءة التسليم بالفوضى, و تخبرك الأزقة
عن حوار خافت النبرات عن موتى بموت في الحنين إلي الشجر
فالأشجار أول من تطلع للضياء و للقمر
و الأشجار وعي بالبر وق و بالمطر
و الأشجار ثورة من أراد الريح أن تأتي كما يهوى,
ليحمل عن كتوف البيت أتربة المراحل
و المراحل
ثم نرحل- خافتين
كما الأزقة في المساء
طفح تنامي مثلما تنمو الطحالب في امتداد الرغو, تعكر صفو رغبتنا تجاه الشمس و الأضواء,
مائيين كنا في ابتداء حوارنا حول الهوية؟ أم تواطأنا مع صحراء غربتنا , لتأكيد التغاضي عن قصاص بائت من رعاة قادمين مع الجمال إلي الجنوب
و طفح لولبي يرتضيه الواقع المجذوم-حتما- في انفصام الذات عن وعي الجسد
و طفح تنامي في الخفاء و أنتج الوعي الذي رفع العلم
علم هو الاسم الذي يجد انتماءه في الطريق إلي العقول
و عقولنا ذهبت مع النيل العظيم إلي الشمال ولم تعد,مكثت تؤسس برلمانا للخيول و تمنح للذكور الحق أن تطأ الإناث متى أرادت,رجعت إلينا الخيل تخفض من فروج نسائنا بعضا و ترفع راية سوداء بسم الدين للسلطة.
خذ من دمائي ملء ما وسعت يداك, و لا تحدثني عن بطولات لهذا الشعب ثانية

أمجد يا صاحبك ..
لى صديق مصري أمضيت معه قرابة الساعه فى محاولة ايجاد توصيف دارجى فى اللهجه المصريه للجخاخ ..
كل ما يقول كلمه .. اقعد افلفلها معاهو تطلع ما ظبط ..
فى النهايه قام قالى أوصف ليهو المعنى بدقه .. أى معنى الجخاخ
قمت سردت كل صفات " عمك الجخاخ " بدون ذكر أسماء
قام ضحك مسافه وقال لى ..
" روح يا عم هلكتنى .. البشير بتاعكو ده احنا عارفنو " بق " كبيييير "
والبق هو الفم وتشير للنباح
والله أعلم ..

هيثم يا صديقى ..
كيفك وكيف كيفك فى ها الزمن الغريب وعجيب ..

قلت لى ما قادر يرفع راسو والجماعه شابكنو ارفع راس الجزيره
هسع يا هيثم عمك الجخاخ ده مش مفروض يعمل ليهو أى حركه كده ..
انشاء الله طياره بدون طيار تضرب ليها كم سمكه قرب السواحل السودانيه وتجى راجعه
اللذيذه يا عمك لو رجعت بى طيار .. حتفاجئ ليك الجماعه, مش كده !!
المهم اى حركه تدخل ولو فى باب " الكحه " .. أهو برضك أحسن من صمة خشم الجماعه
مسألة انهم يبلعوها نااااشف كده ما بتجى ..
وريسنا ما نوريغا ..
ريسنا السيف البقطع ..
هييييع وتلاته كع..

تحياتى وأحزن ما شئت ولا تخفف عليك ..
هذا الوطن جدير بالحزن عليه ..