" وانادي عليك ملاذا في شتا الأيام وبردا في الحياة وسلام وفي شدة هجير وزحام
جزيرة حنينة بين نهرين حنان القاك عليك اتلم وهودج في صحاري الهم وعالي النخيل عليك اتلم وفي السكة اللي ما بتعود معاك لآخر المشوار نغني على وتر مشدود"
Mahgoub Sharief
Post: #5 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:10 PM Parent: #4
بقول ليها يا كوستاوي وبقول عنها
________________________________________ يوم جابوها الدنيا زغردت وغنت وبعيييييد هناك في الغابة صدحت طيور يوم جابوها اتلموا الناس البعرفوا الكلام السمح وقالوا....الله ياخ احنا بقينا في ورطة...وين نلقي كلام سمح نقولوا ليها.. ومن وسطهم طلع ناي ..والناي قال انا بقولوا ليكم الكلام السمح البليق بجيتها.. بس قولوا جابوها في شنو......؟؟؟؟
كبير الناس البقولوا كلام سمح قال... جابوها في (سبت) لونوا من البنفسج درجات عميقة السبت جاء شايلو (نسر) النسر مطيع ودود ما بشبه باقي النسور وطار فوووووق في السماء وغاب ولمن جاء نازل كان شاشة السبت بتحكي عن رحلتوا... وقرينا.!! مشي في البداية للقمر وشال من ضياءه حبة وحبتين في ليلة قمرية يقال اليها ليلة 14 وشرب (الزولة)من ضوء القمر.... عرج علي الشمس وشال حرارة القلب والضوء الساطع والوهج... مشي علي النجوم نجمة نجمة و من كل نجمة شال حزمة ضوء غشي عطارد..وزحل والمريخ.ونبتن والمشتري ومن كل واحدة شال من روحها وختة في السبت الشايلين فوقو الزولة... وجانا...علي الارض... وشال...
________________________________________
Post: #6 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:12 PM Parent: #5
قلنا السبت جانا علي الارض ومشي النيل وهبش منو وهج ومن رزازو شال غيمة والغيم هطل فوق الفيافي والوديان البعيدة وعانق الناس الغبش الطيبة زول زول زولة زولة...... شال من الشمال طنبور وحاكا في شيلتو القماري البقوقو
ومن الغرب شال مردوم ومن الرهيد شال زهرة النونو (واه انا من زهرة النونو)
Post: #7 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-18-2008, 08:26 PM Parent: #6
Quote: صوتك لازم يجي يا زولة هوووي,,,!!!
غايتو بعد الكلام الكتبتو ده اذا ماجات بيكون دمها تقيييييييييييييييييييييييييييييل دى مفروض تشتت طواااااااااااااااااالى ياكرومة
----
امانة ماوقع زول
Post: #8 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:33 PM Parent: #7
غايتو بعد الكلام الكتبتو ده اذا ماجات بيكون دمها تقيييييييييييييييييييييييييييييل دى مفروض تشتت طواااااااااااااااااالى ياكرومة .....................
مش كده يا اشراقة عليك النبي... ودي المناظر سااااكت والقصة دي لو ما رجعت بعد اربعة وعشرين ساعة تاني اخوك بجازف وبكتب كلامات حتي لو امش اشتريها من السوق ....
وده الصوت يا اشراقة شتت وشفتي النفس قام كيف مالك عاوزة تشتتيها هي كمان ونجيب ليكم جريمة ساااكت
ب
Post: #9 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-18-2008, 08:35 PM Parent: #8
وبما انى زعلانه منك اقوم حسع دى وبمزاج كدى احاكم ليك النص ده {اخلاقيا} واقوم ليك العجاجات والكمنجات والذى منو
-----
سجمى يا ود امى مالك؟
Post: #12 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:43 PM Parent: #9
دي اوراق قديمممممممممة يا اشراقة..
والحمد الله نصي زينة وسيرة كمنجات وسراويل ذاااتو ما فيهو لمن يجي يرجفو لي فيه المرجفين
وعليك الله يا اشراقة بعد الخوة دي عاوزة تحاكمي نصي حليل الخوة وحليلك يا نصي الدايرين يحاكموك
Post: #18 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-18-2008, 09:00 PM Parent: #12
Post: #13 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:45 PM Parent: #10
حباب بكرينا يا كوستاوي
وبالله ما تجيب اسمها مع الناس البحاكمو النصوص ديل حسع اشراقة دي تقوم علينا حد الاركلوجيا
وبكرينا زينة كية للمابينا
Post: #17 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-18-2008, 08:54 PM Parent: #8
Quote: ودي المناظر سااااكت والقصة دي لو ما رجعت بعد اربعة وعشرين ساعة
قلت لىّّ اربعة وعشرين ساعة؟
يا اخوى ده حكم دكتاتورى الريدة دى احلى مافيها انها تكون غير مشروطة كمان جابت ليها تحديد زمن!!
ياخ نحنا مش اصحاب؟!! كلمنى حاول حس بىّ ورينا التكتيكات المارشية بتاعة ابو اربعة وعشرين جلدة ده- اقصد ساعة
ياخ دى ريدة بت لزينا فاتت ريدة زولة صاحبتى لزول غياااااااااااااااااااااااااااااظ زى زولتك دى تريد وتريد وتريد لمن زيت الفرامل كمل { معليش دى اللغة اللى فضلت لى فى الدنيا, فرامل ومارشات وعساكر وكدى - الله يحمينا من نوع ريدتك دى, برا وبعيد} المهم زولتنا دى قامت شتت بعد نصائح ذات قيمة وكدى وحسمت امرها بالعودة الطوعية الى قواعدها سالمة... عقبالك ياكريم
فكلمنى وانا بوريك عملت شنو قبل ما تشتت
24 ساعة قال لاّ بالله خلاص لبيك يافردة
Post: #19 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 09:00 PM Parent: #17
هلا يااشراقة و24 ساعة ايوه مافي دقيقة ناقصة والا وانها الحرب الكيكية الرابعة وكنت عاوز اوريك يا اشراقة لكن كوستاوي وعمدة ومن لف لفهم ديل خشمهم خفيف وبشيلو حسي لكن للضمان كده يا اشراقة الزولة بتشبه القمر البتاوق من سماء وعيونها سحابة صيف تجافي بلاد وتسقي بلاد ومثيلها في البنات مافيش كلو كلو كلو كلو ..... التكتيك واضح يا اشراقة اصهل اكتب البد اربعة ساعة انشاء اللاهو خبر يجي دقاااااااااااق وصوت يجي راجع باذن الله....هكذا يقول فكي قوبي شيخي
Post: #26 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-18-2008, 09:15 PM Parent: #19
Quote: اصهل اكتب البد اربعة ساعة انشاء اللاهو خبر يجي دقاااااااااااق وصوت يجي راجع باذن الله....هكذا يقول فكي قوبي شيخي
حليلو هو وين مايكون
غايتو اكتب كتابتك واشجى شجونك وابكى بكاك
وكان نتيجة الفكى دى نفعت بالله ورينى ليهو
ياخ انا ذاتى فى صوت كدى نفسى اسمعه {صوت وسط الالوف انا بعرفو- صوت مليون كمنجة بيعزفوا} بس تكلموا- الفكى- ده ماعندى ليهو التكتتح الاّ فى حالة اللوترى او المهدى المنتظر بتاع الايميلات ده- شفت كيف مواكبة العولمة يا ابكرينا
اها بتاعة الاربعة وعشرين ساعة دى لو جابت ضحايا كلمنا بالله وماتشتغل بالمقرضين
Post: #38 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 07:05 AM Parent: #26
Quote: اها بتاعة الاربعة وعشرين ساعة دى لو جابت ضحايا كلمنا بالله وماتشتغل بالمقرضين
الفكي راضي يا اشراقة بالشغل المجاني اصلو في الاصوات والكمنجات ما بشيل من زول قرش ولا تعريفة واحتمال يديك حق المواصلات...ويقلو ليك عاااافي منك يا ولدي كان جيت تفتشي صووووت
كده بالله وصفي لينا الصوت الوسط الف كمنجة ده اكيد بكون صوووت زولتي ده وانا يا اشراقة سمعتيهو في ذات مكانا ما وتشابه عليك الاصوات
Post: #53 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-19-2008, 07:01 PM Parent: #38
كدى فى الاول ورينا موضوع ال 24 ساعة ده.. جاب نتيجة بكاكك الكثير ده ولا لسه الجماعة سادين دى بطينة احلامك والتانية بعجينة حنانك
Quote: كده بالله وصفي لينا الصوت الوسط الف كمنجة ده اكيد بكون صوووت زولتي ده وانا يا اشراقة سمعتيهو في ذات مكانا ما وتشابه عليك الاصوات
هوووى ياكريم الصوت اللى انا قاصده صوت جبريلى من الدرجة الاولى فى الحنين هنا الحديث عن {الزول الاخدر} اللى بيغنى ليهو عمر احساس داك
كمان بعد الكمنجات و {الخزعبلات} البقت فيها لا ايدها لا كراعها عاوز تجيب لىّ الهوا.. كمان ياهو الفضل- صوت زولتك دى ماليهو علاقة بالصوت اللى بعنيهو
ده صوت واحد وماعندو شبه- الله خلقو كدى حرف واحد منو يظلل الروح بالآمان- شفت كيف؟
كدى اسمع واحدة من الاغنيات اللى بيهدهدنى بيها الليل لحدى ما انوم
------
ياخ الفكى بتاعكم ده واضح انو فكى بنى آدم
Post: #11 Title: Re: صوتك لازم يجي يا زولة هوووي,,,!!! Author: Emad Abdulla Date: 11-18-2008, 08:41 PM Parent: #7
عفيت منك أيها الزول أب عَوّه .. ده الكلام .
دي الريدة الغميسة البيقولوها .. جرسة مؤسسة و متعوب عليها . نشهد بهذا إنو ياخي بُكاك دِشِن و غبشان و مجيه و سمح بالحيل . زمنك ده كلو داسيهو مالك ؟
.... عَقّب .
Post: #15 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:51 PM Parent: #11
هلا عمدة وصحبك ابكر عندو فرمالات لو ما اتعصر حاااااااار ما بطلعها في البلد الاعوج الكلو محاكم نصوص ده...
يازول هووي بكي زي ده بحاكمونا وبجلدونا يا عمدة عشان كده يا ادم اقري وصمي جووووووه بطنك
جكس يا عماد لو خشي جوووه الراس موضوعو قاسي بالحيل وداير مباصرة جد
Post: #22 Title: Re: صوتك لازم يجي يا زولة هوووي,,,!!! Author: Ishraga Mustafa Date: 11-18-2008, 09:07 PM Parent: #15
Quote: جكس يا عماد لو خشي جوووه الراس موضوعو قاسي بالحيل وداير مباصرة جد
باين عليك مامواكب الموضة
جكس؟!! ياخ شوف ليك مصطلحات جديدة تناسب العولمة وكدى
فيس بوك والحاجات التانية اللى بتجى طايرة فى الايميلات دى- فلان الفلانى- عاوز يصادقك؟ زى اللوترى اللى بجينى فى اليوم تلاتة مرات- كسبتى دشليون حاجة كدى بس ياهو نوع رسالة المهدى المنتظر
ياخ خليك عملى الزمن مابتحمل- ده زمن السرعة و{الواقعية} المفرطة
شوف ياكريم انا نويت على بوستيك ده ومزاجى الليلة على غير العادة راااااااااااااااااايق
Post: #23 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 09:12 PM Parent: #22
اشراقة هووي ماشة وين نوم شنو العليك وصحبك عندو صوت رايح وقالب الدنيا وكدي بالله كبي لينا من الكمنجات بتاعك الرهيبة دي هنا شوية ممكن الاصوات تحن وقالوا الجنس للجنس رحمة باقي انا صوتي بحا فضروري دفرة واستعانة بصديق او صديق ايهما اقدر علي جلب الصوت الذهب مع الريح وانا شايف فيك شوفة خير وبكل احساسي (زي ما قالت ندي القلعة) شايفك ممكن تباصري معاي الصوت الابن لذينة ده ونجيبو قبل مهلة الاربعة وعشرين ساعة
Post: #14 Title: Re: صوتك لازم يجي يا زولة هوووي,,,!!! Author: محمد عثمان Date: 11-18-2008, 08:45 PM Parent: #1
يا عبد الكريم يا اخوى الليلة ما براك كلااام من جوه الجوه... و فعلا يا ليالى الرجاء عودى علنا...ان لاح الضياء يبدو ظلنا..
تسلم...
Post: #16 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 08:54 PM Parent: #14
هلا يا ابوحميد ومشتاقين والليلة قلنا نجدع يا محمد عثمان جدعة جدعتين كده ونجدع شوية
وياريت يا محمد عثمان لو سمعنا الطير المهاجر
والف تحية
Post: #28 Title: Re: صوتك لازم يجي يا زولة هوووي,,,!!! Author: محمد عثمان Date: 11-18-2008, 09:18 PM Parent: #16
Quote: وياريت يا محمد عثمان لو سمعنا الطير المهاجر
Post: #29 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 09:25 PM Parent: #28
هلا ابو حميد وبعد الطير المهاجر دي الصوت ده لو ما ظهر حرم ندخل اوباما في الموضوع ده ونخليهو يدخل موضوع الصوت الابا يجي ده في خطة الانقاذ الخمسية
Post: #21 Title: Re: صوتك لازم يجي يا زولة هوووي,,,!!! Author: انعام عبد الحفيظ Date: 11-18-2008, 09:07 PM Parent: #1
صوتك لازم يجي يا زولة هوووي,,,!!!
صوتها بس!!
غايتو جنس جرسة الليلة ياكيكي
Post: #25 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 09:14 PM Parent: #21
هلا يا انعام وايووه يا انعام صوتها بسسسسس صوت السرور يا انعام وصحي صوووتها مشي وين يا اخوانا
يا هندسة كيفنك كب الجلكسات دي خلي ابكر زاتو يآآآآآآآآمن
Post: #27 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 09:16 PM Parent: #24
هلا يا طارق والليلة ضرب مدفعية ابكرية تقيل وصوت ده لو ما جاء يا طارق حننزل الدوشمات طواااااااالي
Post: #30 Title: Re: صوتك لازم يجي يا زولة هوووي,,,!!! Author: حليمة محمد عبد الرحمن Date: 11-18-2008, 09:29 PM Parent: #27
Quote: صوتك لازم يجي يا زولة هوووي,,,!!!
النترة ما عندك يا عبد الكريم تاني انتر عديييل ........... يا زول ها.. انا السواي انا اللاواي انا النيل القام خلا الجزاير ساي انا النتلت ايدي من ناس هناي واقلعت عن الكيوف حتى الشاي صوتو جرسا فقع الالم جواي انا الصنقعت اعاين في الناس ساي انا الفارقت ناس هناية وهناي انا البكت معاي السما لما قالت واااااااااي ......... كفاك ولا ازيدك هاك الغزل الجاد..حق الرجال العيونها حمر.. واحد مزنوق في شوفة عنقان السدر الديمة بتذكرهن في السدس الاخير اترادي لي مطرهن عيل حلة ما ناطرهن مكتونات معلق في الترية(الثريا) خبرها ------ واحد تاني اظرط منو... احكام الشريعة خمسة ما بنختاهن وما بننكر كلامات المزرقن فاهن مغنتيس عقولنا المولى جعلو معاهن وان شالن زحل ، رادار الغرام بِبْراهن
Post: #31 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-18-2008, 09:42 PM Parent: #30
انا البكت معاي السما لما قالت واااااااااي
هلا يا حليمة وصعب ياخي صاحبنا البكت معاهو السماء لمن قالت وووواي ده
واحنا مساكين يا دوبك السماء بتنزل لينا مطيرة ورشاشة كده لمن تتعاطف معانا في لحظات البكاء والنحيب الفجائي...
والناس القلتيهم ديل بكائيين بالحيل يا حليمة اليتو حالهم حال الوليدات كلهم
Post: #32 Title: Re: صوتك لازم يجي يا زولة هوووي,,,!!! Author: دينا خالد Date: 11-18-2008, 10:04 PM Parent: #27
Post: #34 Title: Re: صوتك لازم يجي يا زولة هوووي,,,!!! Author: عامر تيتاوى Date: 11-18-2008, 11:45 PM Parent: #33
الطير المهاجر جا وهى لسه ماجات ياكيكى
Post: #37 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 06:17 AM Parent: #34
Quote: الطير المهاجر جا وهى لسه ماجات ياكيكى
ده الخايفين منو ذااااتو يا تيتاوي الطير المهاجر جاء وبناديها بتاعة الدوش جات وبعد شوية القصة شكلها حتجيب ليها(الحزن النبيل) والاربعةوعشرين ساعة قطعت نص الطريق...
ياخي دي كوجنة اوباما ما يحلها
Post: #36 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 06:15 AM Parent: #33
Post: #35 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 06:13 AM Parent: #32
Quote: كريمووو !
يعنى بس نانسى دى تجى تغنى فى الدوحة
كلامكم كللللو يبقى عن الاصوات ؟؟
هلا يا دينا وذكرتيني حكاية الفنان الاعرج الجاء من الخرطوم وغني في احدي مدن السودان بعد الحلفة الجمهور كلو طلع بعرج
_________________________ حفلة نانسي انا ما حضرتها يا دينا وياريت لو مشيت كنتا علي الاقل ممكن القي الصوت المشي وووووووين ده في اغنية لمحتك الشايل بدرالدين حسها دي
Post: #39 Title: Re: صوتك لازم يجي يا زولة هوووي,,,!!! Author: خالد عبد الله محمود Date: 11-19-2008, 07:31 AM Parent: #1
كيكي
Quote: صوتك لازم يجي يا زولة هوووي,,,!!!
* يعني الكلام ده صحيح ؟؟؟ * قالو كنت سمسار أصوات أيام إنتخابات الجامعة ... * و كنت متخصص في جلب أصوات البرلومات الدايشات ... * الكلام ده حسب رواية الوغد خالي خليل ....
* دي كانت بي كم كرت يا كيكي ؟؟
Post: #40 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 08:01 AM Parent: #39
Quote: يعني الكلام ده صحيح ؟؟؟ * قالو كنت سمسار أصوات أيام إنتخابات الجامعة ... * و كنت متخصص في جلب أصوات البرلومات الدايشات ... * الكلام ده حسب رواية الوغد خالي خليل ....
* دي كانت بي كم كرت يا كيكي ؟؟
هلا ياابو الخلد وخالك خلي ده اخير ليك اختا سكتو.. تقعد تباريهو وتسمع كلامو ياكا لاحق الهلال ويطير منك الدوري..ذاااتو.. وبرلومات وين يا خالد مع الكيزان العاملين لينا سافوتة ديل يا كافي البلا عاملين شعبة بتاعة كيزان وجيهييييييييين اسمها(شعبو تجنيد البرلومات والبرلوميين) اخر شياكة ومنجهة وزوق واركلوجيا كيزانية سمبرية ولكن بعد ده لو القصة سخنت تلقا الكوز الوجيهة شايل سيخة وعينووو حمر خلاص ومستعد يكاسر البرلومة الكانت قبل شوية بكب ليها في الحنان والحنية لو راسها ماجاء وانضمت لسفينة ربط قيم السماء بالارض...
ويا ريت يا خالد لو كان القصة فيها كايا وبكرت وارد الصعيد وشرط يكون من صحبي ابو كرنك بائع الكايا الشهير كان الصوت ده الليلة بقي في امر ضيق.... وكنا سمعنا حلو... (او كما يقول صديقي مانو)
Post: #41 Title: Re: صوتك لازم يجي يا زولة هوووي,,,!!! Author: ibrahim kojan Date: 11-19-2008, 10:35 AM Parent: #40
عاضه معاي الايام دي يا كيكي.....
(رأيتها تتدثر بالقهوه ...
حادثتها
ملاني صوتها
وصمتها
ولون القمر ينبثق من وجهها
رأيت صوتها فامنت بالله
رايته ...
صوتها .. ما زال يداعب دقائق حياتي
وتعدلني وقوفا وقياما ...
تمنيت ان اغمض عيناي واتلفح بها حتي تصاعدي
الي سمائها
قبل سمائه
والله المستعان)
____________جنس جرسه يا كيكي الايام دي .. ربنا يشفينا
Post: #42 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 10:54 AM Parent: #41
Quote: عاضه معاي الايام دي يا كيكي.....
دي العضة ابو بلاش وانشاء الله يعضيك المشترك (قول امين)
ياخ لو كل العضات يا كوجان بجيب كلام سمح زي بتاعك ده تاني صوت بروح مافي ...وكل الاصوات تاتي في قطار السادسة
Post: #43 Title: Re: صوتك لازم يجي يا زولة هوووي,,,!!! Author: Ishraga Haimoura Date: 11-19-2008, 11:26 AM Parent: #1
كيكي .... البكا بحرروه أسيادو... شد حيلك أبوي
يا صوتها
آه يا صوتها .. لما سرى لما ... مثل الحريرِ نعومةً ونداوةً .. وتكسُّرا مثل الصباحِ طلاقةً .. ورشاقةً وتبختُرا .. وتدفقت كلماتها .. عطراً ندياً عنبرا وهما حنينا حالما وشذاً يضوع تخضّرا يا صوتها لما ... لما سرى لما يا صوتها ... يا روعةً .. لحناً سماوياً سرى ماذا الكنارُ مُغرّدا والنايُ ناح تحسرا والعندليبُ اذا حكى لحناً تفجّر ابحرا ماذا يكونُ وصوتها صوت السماءِ من الثرى
نسأل الله لكم الثبات ويكفيكم شر الجرسة وشماتة ناس خليل ومن لف لفهم نصيحة: شوف فكي سبحة انقطعت يمكن يلقى ليك دبارة
Post: #44 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 11:36 AM Parent: #43
Quote: نسأل الله لكم الثبات ويكفيكم شر الجرسة وشماتة ناس خليل ومن لف لفهم نصيحة: شوف فكي سبحة انقطعت يمكن يلقى ليك دبارة
لاميرة الشيخ مقولة شهيرة هي الليييييلة ووووب ووووب لاني نسيت في ضخم البحث عن هذا الصوت العجيب المشي وين ماعارف نسيت صحبي فكي سبحة انقطعت...من دربي ده علي الفكي سسسسسسسسيدا علي قولة الهنود في الخليج باقي فكي قوبي طلع اشاعة وشغلوا ما نضيف... وشعارنا فكي سبحة قطعت او بلاش
تحايا يا اشراقة ومشتاقين والله
Post: #45 Title: Re: صوتك لازم يجي يا زولة هوووي,,,!!! Author: Ishraga Haimoura Date: 11-19-2008, 11:39 AM Parent: #1
سلام لأميرة الشيخ وخليها تجي تحرر معاك الفراش دا
Post: #46 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 11:52 AM Parent: #45
الاغنية دي رهيبة يااشراقة ياخي
وسوداننا دي اهلو بكائيييين من زماااان والاصوات دي اتاريها عاملة كركبة من زمن بعيد
خليل يوتيوب لو سخا ممكن يركبها لينا هنا ده ونشوف حكاية الاصوات التي طارت مع الريح...وركت وين الله يعلم
ما تستعجل بيجيك صوتها .... تريان ومعتق نديان ومليان طراوة وطلاوة يسمعك النغمات الما قدر ناي يعزفها ويعرفك على الألوان المافي عين شافتها ويسوقك من يدك.... ويدخل بيك المدن المستحيلة ويحلق بيك في السماء الشايل لونو من عيونها تزور معاها النجوم نجمة نجمة وترتاح معاها في ضل القمرة المغسلة بالضو وتخت راسك في حجرها .... وتسمع غنا الملائكة ويصحيك عبيرها الملا الدنيا وفتح أكمام الزهور في كل الأرض وتلقاها حقيقة .... ما خيال وتبكي من الفرح .... ودموعك تخالط النيل ويفرح الطين ويغزل فرحو سجادة خضرا لصلاة العشق
Post: #50 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 04:00 PM Parent: #48
شكرا ياعماد علي اللحن ومزيدا من الالحان تعني بالتاكيد عودة الصوت
Post: #49 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-19-2008, 03:48 PM Parent: #47
يا اشراقة حبابك بالحيل وريت الاصوات تجي وتطل وكل الافراح والدهشة تهل والكلام الفوووق بتاعك ده لو اتحقق الامور بتكون مية مية وتبقي النترة بتاعتنا ما مشت في الهواء الطلق
وقولي معانا يارب
Post: #51 Title: Re: صوتك لازم يجي يا زولة هوووي,,,!!! Author: هند محمد Date: 11-19-2008, 04:41 PM Parent: #1
Quote: اكيد اكلتوا المسافات والفيافي الرامية روحها في سكة شوقي ليك..!! ما بصدق لو تقولي شالوا هدير المكن الوعدتك بركوبها عشان اجيك..
ده كلام عميق و حنين بشكل سلامات أخى عبد الكريم التحية لصوتها الطلع من جواك هذا الجمال التحايا
المزارعين في مشروع الجزيرة عندهم حاجة اسمها (الصرفة) وهي اموال تدفع للمزارعين
بعد الحصاد وفي ذلك اليوم كل القري بتاكل (موز)
واحدة هاجرت للسعودية وكسرت ركبة هناك
الجماعة قالو ليها راجعة وللا ما راجعة
قالت ليهم بري يا يمة (ارجع الجزيرة عشان اكل الموز من الصرفة للصرفة)
فدحين خلينا هنا ياخ
Post: #55 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-20-2008, 08:59 AM Parent: #52
Quote: قالت ليهم بري يا يمة (ارجع الجزيرة عشان اكل الموز من الصرفة للصرفة)
فدحين خلينا هنا ياخ
ياخي خلي ايش دعوي نقول ليك صوت واركلوجيا وتقول لي موز يوم الصرف.. يا راااااجل
Post: #54 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-20-2008, 06:45 AM Parent: #51
Quote: ده كلام عميق و حنين بشكل سلامات أخى عبد الكريم التحية لصوتها الطلع من جواك هذا الجمال التحايا
التحية وشكرا علي مرورك الراقي اختي هند
Post: #56 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-20-2008, 09:09 AM Parent: #54
Quote: كمان بعد الكمنجات و {الخزعبلات} البقت فيها لا ايدها لا كراعها عاوز تجيب لىّ الهوا.. كمان ياهو الفضل- صوت زولتك دى ماليهو علاقة بالصوت اللى بعنيهو
هلا يا اشراقة وبالله اكتبي لينا تحت عشان نلقي مداخلتك مش تخلينا نسافر القضارف ونجيبها من هناك وانا القاها منك ولا من الصوت الطار طيرة العريش من العويش ولا العويش من العريش ما عارف.. وصوت جبريلا بتاعك ده اكيد بكون ياهو صوووتي ذاااااتو بس لمن جاء علي داركم عمل فيها جندري وتخت صوتو عشان تعمل ليك لخمة فكينا بسلم عليك وقال ليك رسلي البياض دولارات من فيننا
Post: #57 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-20-2008, 09:09 AM Parent: #54
Quote: كمان بعد الكمنجات و {الخزعبلات} البقت فيها لا ايدها لا كراعها عاوز تجيب لىّ الهوا.. كمان ياهو الفضل- صوت زولتك دى ماليهو علاقة بالصوت اللى بعنيهو
هلا يا اشراقة وبالله اكتبي لينا تحت عشان نلقي مداخلتك مش تخلينا نسافر القضارف ونجيبها من هناك وانا القاها منك ولا من الصوت الطار طيرة العريش من العويش ولا العويش من العريش ما عارف.. وصوت جبريلا بتاعك ده اكيد بكون ياهو صوووتي ذاااااتو بس لمن جاء علي داركم عمل فيها جندري وتخت صوتو عشان تعمل ليك لخمة فكينا بسلم عليك وقال ليك رسلي البياض دولارات من فيننا
Post: #58 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-27-2008, 12:03 PM Parent: #57
ههههه لقيتك شديد و لضيد علي قول اهلنا في السودان يا كريمو
إشراقه اوعك بعد شويه بقول ليك ولله قروش دا ما كفي عشاء حيران رسلي تاني
Post: #60 Title: Re: صوتك لازم يجي يا زولة هوووي,,,!!! Author: بدر الدين الأمير Date: 11-27-2008, 03:21 PM Parent: #59
الكلام لمدنى النخلى والغنا لمصطفانا أدينى إحساس بالامل في كل خطوة شوق تطول وادى الخطاوى الراجعة ليك في سكتك عشم الوصول ما الدنيا كلها انتظار ولإرتحال قدر الفصول الموجة تحلم بالضفاف والغيمة تحلم بالهطول راحل معاى ضى الامانى وذكرى للايام هناك ولحظات بتزخر بالمعانى وكيف انسى تذكارات هواك نتحمل الغربة ونعانى ونصبر عشان نكسب رضاك ونغنى لو زاد الحنين ياريتو كان سفرا معاك
تنهدات: كيكى ماكنت قايلك ممكون قدر كده
Post: #64 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-28-2008, 03:45 PM Parent: #60
Quote: ما الدنيا كلها انتظار ولإرتحال قدر الفصول الموجة تحلم بالضفاف والغيمة تحلم بالهطول
هلا يا البدر ويوم بتكتل ليك زول بسيرة مصطفي والكلامات السمحة ددددددددي... بالله تاني مرة ما تجدعها لينا هنا يقوم صوتنا الرائح ده يرك ويقهي في كلامك السمح ده ويخلي خشمنا ملح ملح
اخوك صنديد يا بدر وما تشيل هم
Post: #63 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-28-2008, 03:40 PM Parent: #59
Quote: إشراقه اوعك بعد شويه بقول ليك ولله قروش دا ما كفي عشاء حيران رسلي تاني
هلا يا نووون النووون ايش دعوي ها التحريش كدي الفكي حيزعل منك عاوزة تقطعي اكل عيشو...سمح اصبري لي يا نووون
ونورتي الاصوات والله ولو في بلدكم البعيدة ديك لقيتي صوتي مطرف ومامعروف مشي وين اديني خبر سررررررريع
Post: #61 Title: Re: صوتك لازم يجي يا زولة هوووي,,,!!! Author: Tariq Mohamed Osman Date: 11-27-2008, 04:08 PM Parent: #1
Post: #65 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-28-2008, 03:47 PM Parent: #61
Quote: وما تندفع وكان ما جات ما تنفعل
هلا يا طارق وسلام الف وماتشيل هم يا طارق اخوك صنديد وبس قاعد يحقن البوست بالمفردات التي تعبر عن قصة الصوت العجيب الطفش طفشة الدريش من العويش ده وتحياتي
Post: #66 Title: Re: صوتك لازم يجي يا زولة هوووي,,,!!! Author: عبدالكريم الامين احمد Date: 11-28-2008, 03:50 PM Parent: #65