أم درمان عاصمة الرياضة بقلم بابكر سلك

01:47 PM January, 05 2018

سودانيز اون لاين
مقالات سودانيزاونلاين-phoenix Arizona USA
مكتبتى
رابط مختصر

> ونحن نحتفل بذكرى استقلالنا
> وبمراجعة دفاترنا
> اكتشفنا أننا رياضياً صفر

> والرياضة لا تعني بأي حال كرة القدم وحدها
> اجترينا الذكريات
> والذكرى بتنفع المؤمن
> أين نحن من نحن زمان رياضياً؟
> نمسكها واااحدة واحدة
> أين كرة السلة السودانية
> أين إخوان وليام أندرية والإعيسر وغيرهم؟
> أيام كان منتخبنا لكرة السلة يرهب الأفارقة والعرب؟
> أين نحن مننا في التنس الأرضي وأولاد طلعت فريد يتسلموا رآستها من جيل سبقهم
> فهل وجدوا جيلاً بعدهم يسلمونها له؟
> أين سباحتنا من أيام كيجاب وممدوح وسارة جاد الله؟
> هل نضب المعين؟
> أين الملاكمة
> دي بالذات حتى في منافسات العالم العسكرية كانت موجودة
> أين كرة اليد؟
> أين تنس الطاولة؟
> وهل ألعاب قوتنا دي ألعاب قوى في قامة ناس خليفة عمر والكشيف؟
> أين رفع الأثقال؟
> لحقت رفع المعاناة؟
> أين مناشط ألعاب الدفاع عن النفس؟
> كاراتية
> جودو
> تاكندو؟
> وأخيراً
> أين مي؟
> يااااا مي
> احتفلت محافظة أم درمان بتدشين مجسم أم درمان عاصمة الرياضة في احتفال بهيج
> شرفة البروف شداد ولفيف من رموز الرياضة وقدامى اللاعبين والإعلاميين
> كان المعوقون حضوراً أنيقاً بزيهم الرياضي وبفريق سلة الكراسي
> رفع الستار عن المجسم الضخم الموضوع على صينية المحافظة ثم تم رفع العلم
> شخصياً أصابني الإحباط عند رفع الستار عن المجسم
> العنوان أم درمان عاصمة الرياضة
> المجسم كرة قدم
> والضيف شداد رئيس الاتحاد السوداني لكرة القدم
> حتى في محاولة النهوض بالرياضة كل الفكرة تنحصر في كرة القدم
> وياها الرياضة المانهضت
> طالما نقصر فهمنا على كرة القدم وحدها ونسميها رياضة
> نختزل كل مناشط الرياضة في كرة القدم
> لسه بدري علينا
> شخصياً كنت أتوقع مجسماً يرمز لكل مناشط الرياضة
> على الأقل كان أدانا أمل في صحوة رياضية شاملة
> كان المجسم بطلع أحلى لو كان شكلو كده مثلاً
> كرة القدم الضخمة التي وضعوها
> فوقها كرة سلة
> من فوق عليها كرة طائرة
> و فوقها كرة تنس
> تعلوها ريشة طائرة
> في شكل شعلة
> وياي سباحة يسنده مضرب تنس في شكل بورد سلة داخل مرمى كرة يد قائمة الأول في شكل بطل رفع أثقال وعلى عارضته الأوزان وقائمة الثاني على شكل عداء يستعد للانطلاق
> كان بكون مجسم مطمئن جداً يشمل جميع المناشط ويجمع أهل الرياضات المختلفة ويسهل لأم درمان عاصمة الرياضة أن تديرة وبالتخصصية
> أيها الناس
> ما فات شيء
> فلتستصحب أم درمان عاصمة الرياضة معها بقية المناشط الرياضية في رسالتها السامية
> أيها الناس
> كل سنة وكلنا بي وطنا بخير
> وربنا يعيدو علينا يلقانا تامين ولامين
> مقتنعين قاعدين ما طافشين
> جني وجن أعيد على الناس بالتلفون وأقول ليهم البلد معاكم كيف
> ربنا يعيدو علينا ويلقانا بي صمتنا ولمتنا
> وطن
> مواطن
> أسعار
> باعوض
> ضبان
> وجقووووور
> كلو زول ياكل نصيبو
> أيها الناس
> إن تنصروا الله ينصركم
> آها
> نجي لي شمارات والي الخرتوم
> كل سنة وأنت طيب يا والينا
> السنة الجاية إن شاء الله عربية النفايات تجي في مواعيدنا
> والله يحفظنا بي ضبابيننا وبواعيضنا
> ويخلي ليكم جقوركم ومخصصاتكم بالسارينا
سلك كهربا
ننساك كيف والكلب قال قصوا الشجر وخلوهوا في شارعو ومشوا .. كل سنة وانتوا طيبين
والى لقاء
سلك