اليوم الحار ومابنداريوم الهندسة والمعمار

Quote: السلام عليكم,خالتو منى...(اسمحي لي بدعوتك خالتو بما أن كل منا يحمل تلك الأريحية السودانية بداخله) قد تتسألين من أنا ولماذا أراسلك في موضوع لم تخطي سطوره إذ انك فقط معجبة بذلك الموضوع كما هو الحال معي تماما..لا تعرفينني ولكنني أعرفك من قوة كتاباتك وجرأة قلمك الذي لا يهاب قول الحق كما أنني أتخذك وخالتو تماضر مثلان لي أقتدي بهما في حياتي القادمه....عفــــــوا إذ أنني أراسلك في موضوع ذكريات كلية الهندسة الذي خطه بنان الرائع عمو خليل كان بودي أن ارسل له هذه السطور مباشرة في البوست فأنا من عاشقات سودانيز اون لاين كلما حاولت التسجيل بالمنتدي كان الباندوث -الذي لي يوم الليله ما عارفاهو هو شنو مع إني قريت ليه مليون تعريف- يركلني خارجاً فتحت ملف العم خليل آملة في أن أجد عنوانه أو العم عبد الكريم فخاب ظني فرحت أبحث في ملفات كل من شارك بمداخلاته فوجدتك أنتي وأني لسعيدة بذلك أرجو أن تنقلي رسالتي هذه للعم خليل فهو ببوست الهندسة هذا قد غير مجرى حياتي و كان مصدر إلهام لي -حاسه انو طريقتي كأني وحده من الناس البيتكلمو مع أوبرا وينفري لما تحل ليهم مشكله-الموضوع كالتالي: أنا إحدى طالبات كلية الهندسة والعمارة الساخطات على تلك الكليه لحدي ما قريت بوست عمو خليل وغيرتا رأيي...شخصي الضعيف من حملة الشهادة العربية التي كان العم خليل واصدقاؤه يحاربون حملتها -ممكن أتكلم بالعاميه؟لمن كنتا طالبه في المدرسه كنتا مهووسه بمادة الأحياء كان نفسي أطلع طبيبه ولكن النسبه حالت بيني وبين ما كانت نفسي تتمناه الحمد لله نسبتي كانت عاليه بس النظام المتبع مع ناس الشهادة العربيه خذلني يوم ملئ إستمارة التقديم كان اصعب يوم في حياتي من ضمن الرغبات كنتا كاتبه هندسه مع إني عمري ما فكرتا فيها والدي شجعني على كتابتها مع ان رغبتي كانت أي كلية طب أو علوم أو حتى بيطره - بحكم أن والدي خريج جامعة الخرطوم وهو الآن من أحد بروفيسراتها وقد عمل بها لربع قرن وبضع سنوات من الزمان كانت البيطره مجال دراسته رفض لي حتى أن اقدمها كان بيقول لي إنها صعبه ممكن تدرسي طب وتكوني مرتاحه لكن ما ممكن تدرسي بيطره الفرق بين الطب والبيطره انو الانسان ممكن تعرفيهو بيشتكي من شنو عكس الحيوان تماما كما كان الجميع يقول نسبتك أعلى من إنك تقدمي لي حاجات زي دي بيقصدو البيطره وكلية الفنون الجميله البرضو كان نفسي أدخلا...كان والدي من عشاق كلية الهندسه وطوالي بيقول لو الزمن يرجع بي كان قريت هندسه وهو من المخضرمين في الماث وكان بيقول لي مدام انتي حاسه انك ح تمشي في الفنون أكيد ح تمشي في الهندسه وكل إخوتي طلاب هندسه علما بأنني آخر العنقود....طلعت نتيجة القبول وكان قبولي في كلية الهندسة قسم (الندميه) كما كنت أسميها لحدي قبل دقايق من ما أقرا البوست نية أبي غلبت نيتي وفرحته كانت كبيره جدا انو بتو الصغيره ح تطلع مهندسه كنتا مبسوطه عشانو بس في داخله كان عارف اني زعلانه قال لي ولا يهمك جيبي استمارة قبول خاص وقدمي طب وأنا أصلا معارضه للقبول الخاص ما كفايه الصرفو علي طوال سنوات دراستي الإثني عشر وحتى لو دخلتا خاص ونجحتا واتخرجتا واشتغلتا في نفسي أعلم اني ما ح أقدر أوفيه هو و والدتي حقهم أبدا...رضيت بما قسمه الله لي و بقيت على الهندسه كانت هندسه اسوأ مكان عندي في السنتر من اليوم الأول خصوصا اني اتبرلمتا أول يوم بس دي بحكيها ليكم مره تانيه بس بسبب البرلمه دي اشتهرتا في هندسه لأني عرفتا والحمد لله أرد على المُبرلِم وكان ذلك بفضل لساني السليط والحنق الذي أحمله لهندسه ومن فيها رديت عليهو وقادتني خطاي لعلوم حيث أجد الراحه اتخيلوا في كل ذلك السنتر وكلياته اجد راحتي في كلية العلوم بينما كانت هندسه جايطه عايزه تعرف البت العامله زي زورو بتضرب بسوط لسانا وتختفي دي ...حكيت لي صاحباتي في كلية العلوم والطب ناس طب أولى البيعدوا أول سنه في السنتر فأصروا إني أرجع لي هندسه..رجعتا ولقيت الزول البرلمني في وشي وقدم لي إعتذاروا قدام كل الطلبه -وقتها حسيت إني قوييييييييييييه - فقلتا ليهو ما تعمل كدا تاني :-) .......ولكن ذلك الإعتذار لم يغير من الأمر شئ فكرهي لهندسه هو هو واحتمال زاد كمان ...لم يكن لي أصدقاء فيها ليس لأني زوله شهاده عربيه ومنغلقه على نفسي بس لأنو ما كنتا بحب يكون لي صله بي أي شئ فيها كنتا بواظب على محاضراتي في كلية الهندسه لكن بعد ما تنتهي يا علوم جاك زول كنتا بالإضافه إلى محاضراتي بدخل محاضرات كلية الطب وكلية العلوم مع صديقاتي بنات الشهادة العربيه بما فيهن من قبول عام وهن نادرات وقبول خاص وما أكثرهن في محاضراتم كنتا بفهم وبركز عكس لما أكون في وحده من لكاشر هندسه خصوصا مع محاضرات استاذ ود المكي العقدني بالكالكولس -طبعا لمن قريت في البوست انو استاذ ود المكي درسك وانتا دفعة 86 اصابتني الدهشه إذ اني دفهة 2005 أو كما يحلو للجميع تسميتنا بدفعة الأو فايف وسنة 86 لم أوجد في هذا الوجود فأنا من مواليد 87 بس الله يديهو العافيه ساي عمو ود المكي ..والخلعني أكتر انو طلع دفعة أبوي والله الزول ده كان ح يكون من الأسباب الحتطفشني من هندسه ..مر السمستر الأول بخيره وشره وشره كان أكتر من خيره وطلعت النتيجه والحمد لله وكانت باس أُول ثرو و معدل ما بطال يادوب ختيت الرحمن في قلبي وقلتا شكلي ح أقدر أواصل فإذا بالسمستر التاني وعمو ود المكي لخبط كياني بمادة الميكانيكا والمتجهات وهسا السمستر إنتهى وأنا مستنيه النتيجه بس الله يستر ودعواتكم ...في السمستر التاني علاقتي بدت تتصلح مع هندسة وناس هندسه بس دايما بحن لعلوم جد أنا ما متخيله إني ما ح أقرأ أحياء تاني في حياتي مع اني بحب أطالع كتب أحياء و علوم خارجيه لكن انها تكون كماده في منهج أكاديمي مافي دي حاجه أنا ما بقدر عليها ...دارت الأيام و جات انتخابات الجمعية الهندسيه و انتخابات الأحزاب وأغلبية الدفعه صوتت وبما إني محتفظه بصوتي لنفسي حاول كثير من الأصحاب انهم يأخدوا صوتي وكنتا بعتذر ليهم بي إني ما بعرف الحزب الكويس من الماكويس والصالح من الطالح ودا الحاصل فعلا ولمن أصروا إني أدي صوتي لأي زول أو حزب عشان هندسه وأتذكر كلمات زميلي وهو يقول إنتي ما عايزه تقدمي حاجه لي هندسه قلتا ليهو مالي ومالا أنا اصلا لا أشعر بالإنتماء إلى هندسه ...طبعا كلامي دا كان كبييييييييير صاح هم عارفين اني ما كنتا متخيله نفسي أدرس هندسه لكن ما للدرجه دي....انا يمكن واصلتا في هندسه عشان والدي كان سعيد وفخور بقبولي فيها جدا وهو عارف اني حتى هذه اللحظه بكرها وحتى قال لي قدمي بشهادتك أي كليه علوم أو حتى طب خاص لو الفرصه ما سنحت السنه دي وانا جد كنتا بفكر في الفكره دي لو نتيجتي طلع فيها ريبيت للسنه أو حتى ملحق لأني كنتا بفكر إني ما ح أقدر أواصل مع ملحق أو ريبيت لكن بعد قريت بوست عمو خليل و إنهم ربتو كم مره وهم هسا ما شاء الله مهندسين كبار الله يديهم العافيه حسيت إنو ممكن يكون من وراي نفع و انو العتره بتصلح المشيه لأني كنتا متأثره بإني ما حصل عدتا سنه ولا ملحقتا في ماده طوال سنواتي الدراسيه والحمد لله.....عمو خليل البوست دا فتح لي عيوني على واقع أنا بيدي أخليهو يكون أحسن وجد معاك استرجعتا ذكرياتي الحلوه القليله في كلية الهندسه وقلتا يا الله متين الإجازه تنتهي عشان أمشي وأعمل لي ذكريات زي الإنتا بتحكي عنها مع اني ح أنزل سنه تانية برضو قررتا أدخل على الدروينغ بقلب جاااااااااامد مع إنو السناير وإنت خوفتوني منو بما فيه الكفايه .....و برضو خوفوني من ندميه اللهي مدنيه طبعا انا كنتا هندسه دي ما ريحتها فكانت في نظري دايما (كلية الركلسه والهباله) قسم الركلسه الندميه النكديه الفقريه دا كلو كنتا شايلاهو لي هندسه لحدي ما البوست دا غير رأي في كل شئ وأنا بقيت مجنون هواك يا هندسه كما يقول شعراء الكليه.......أعذروني أثقلت عليكم ولكن أود أن أشكر من أنار لي طريقي ...عندي شوية ذكريات جديده 2005-2006 أود أن أشارككم بها لو ما عندكم مانع عن مباريات هندسه الجديده (قدرة فول ولا اسكول- يالشمباتي أصلك شين يالشمباتي شوف حمارك وين- آداب قراية القاب) ،كفتيريا هندسه، الميدان الغربي وشمسه المولعه، التور وحتى المعامل الأساتذه الجدد والمخضرمين ومن هنا ابث جزيل شكري للبروفيسر الرائع استاذ زكريا المشهور عندنا بجدو زيكو أطال الله في عمره و أمد أيامه وأستاذ عبد الملك العقليه الراااااااائعه أكثر الله من أمثاله هما كانا سببا في بقائي واستحمالي لكليه الهندسه وكنت احرز اعلى درجاتي في موادهما بس يا خساره بطلو يدرسونا و مالينا في الطيبين نصيب أعتذر لكم وبشده خالتو منى وعمو خليل وعمو عبد الكريم لأني أخذتا من وقتكم الثمين ما أخذت...و أشكركم لأنكم أعطيتموني إياه وواصلوا في إبداعاتكم وإلهامنا والله يديكم العافيه :-) تمــــــــــــــارا تاج السر أحمدكلية الهندسة والعمارة -قسم الهندسة المدنية :-)أقولها وبكل فخر و طيبة خاطر و أنا راضيه عن نفسي -بفضلكم- ودمتم




شـايفين تمارا المثابرة متابعاكـم كـيف?
حـاسـين كـلكم بقيمتكـم وقيمـة البـوست ده عنـدها عظـيمـة كيف?

تحياتي لكـم وللزعـيم خليل ..

مـني

Arabic Forum