يا ناس ..الدياسبورا يعني شنو ؟؟؟؟؟؟

والله من ما طلع الشافع داك في التلفزيون وقال كرسترول ينزل زووت ..وانا بتجيني كاروشة من المصطلحات ..انا لي اسي كلمة سيارة البقولوها ناسنا القاعدين معاهم ديل بتجيني حرشة حرشة كدا وما قادر ابلعا...وياها العربية ما بنعرف غيرا...مرة واحد بتناقش معاي ...كنا بنتكلم كويس قام قال لي البلقنة ..وقفتو طوالي يازول كدي دقيقة بلقنه دي شنو ..وجبتاها من وين قال ديل ناس البلقان اي عرفناهم الجابهم اسة في كلامنا دا شنو ..قال لي انا زاتي ما عارف سمعتها امبارح في تلفزوين الجزيرة ..قلت ليهو خلاص اختلاف الاراء لا يفسد للود قضية دي برضو من الجزيرة ... و زي ما بتقول حبوبتنا الله يرحمها... ونعم التعليم ...
زمان زميله معانا في الجامعة من الكنا بنسميهم بقعة النفط لانهم كانو مقيمين في دول الخليج وقروشهم كتيرة ..المهم البنية قالت يا اخوانا ( سدنه ) دي شنو ؟؟..اها انا قلت ليها والله في كلام كدا بس تحسيهو احساس لكن ما تحاولي تعرفي معناهو او ترجمتو..
اها جينا البورد نسمع ليك باندوث...قلت كدي اصبر امكن القي ليها ترجمة وكان غلبني احسها احساس..بس جاني ليك الاحساس الما بغباني ..كاروشة ..كاروشة..لمن حسيت ليك بي الباندوث حقي جاتو حمي ..اها عرفتو بعد كدا انو حاجة عندها علاقة بي كترة الخبت والرزع في البورد بي سبب وبدون سبب...حمدنا الله وشكرناه علي نعمة التعليم..بعد شوية اسمع ليك كعب اخيل ..قلت ياولد دا ما بكون افرنجي دا بكون عربي فصيح ..بتاع ناس حيزبون وحشرقات وحاجات البروفيسر عبدالله الطيب الله يرحمو ...
اها بعد شوية جاني ليك ( دياسبورا )..تاني بعد شوية واحد قال لي فتحي البحيري (جنجويد) دي احزفا من كلامك..وفتحي ملح انو الكلمة في محلها...

كدي اسه دياسبورا دي شنو ؟.. انا غايتو بعرف البورة.. ودي عربية اسة في السودان ما حاجة تانية لكن دياسبورا دي ما عرفتها كلو كلو..احساسي بقول لي انها حاجة سمحة وعندها علاقة بي الحصر حق الناس المشتتين والمشلهتين زينا كدا ..سجلنا من غير ما نفهم دياسبورا ..غايتو كان الحكاية حصر ياني المحصور معاكم لكن كان دياسبورا دي حزب ولا حاجة زي البلقنة ادونا خبر نفكر ..
و ما تخليكم كعب اخيل عشان الجنجويد ما يعمل دياسبورا وحافظو علي باندوثنا يا شباب

تنقو

الاخ زمراوي

الله يديك العافية..

انا ماقلت ليك حبوبتي حكيمة..والله نعم التعليم

لا كان الحكاية كدا يانا المتدسبرين معاكم تب العلينا عليكم والعليكم علينا

اها يافتحي تعال بي جاي ادينا طلا كدا عشان نعرف نحن جنجويد ولا لا ؟

وكمان كان الدكتور جات بي جاي غطست لينا راسنا في المعرفة و فهمتنا كعب اخيل تكون ما قصرت



تنقو

اساسي الاساسي

مرحب بيك..ويازول الله لا جاب شمومة..والله انا في الدنيا دي بشم اتنين..واحد منهم كان استاذنا في الابتدائي اداني عشرة جلدات بدون سبب..لي اسه حارقني..والتاني هاشم بدر الدين..عشان ما دقة الزول كويس

بعدين ياخي ما تلخبتنا انا يادوب فهمت الكلمة ..لكن برضو العلم واسع امكن انت تكون لقيت الشرح دا في متون الكتب .. فهمت متون دي
الديس دا اتخايل لي الشعر..وكان كدا تبقي الحكاية
شعر برا
والله برضو وجهه نظر
الله يحفظ باندوثك يا اساسي


تنقو

توما الف تحية ليك وبي زيارتك بيتنا نور وكلو زينة
اها انا زاتي كنت سااال ..واتخايل لي لحدي اسة..مرة وانا صغير سالت بت خالتي قلت ليها السكري دا شنو ..الظاهر كانت صاحبتك بيت خالتي دي..قالت لي يعني الزول البياكل حاجات فيها سكر كتير بتزيد السكر بتاعو..لحدي هنا كويسين ..انا الساأل ما سكته قلت ليها اها وعلاجو كيف دا..قالت لي بس الزول يقوم يشرب ملح..طبعا انا كنت بحب الطحنية مووووت..بقيت بس الفطور طحنية ومعاها حبة ملح والعشاء طحنية وحبة ملح..ما عارف متين الله حلاني من الحاجة دي...ما نسيتا ليها لحدي اسة وخصوصا لمن يجي الود بتاع زووت داك
لكن بيني وبينك الكلام دا مش بحتاج لي سعال..يعني اسة قبل ما يجي فتحي داخل بي جاي ..جنجويد دي يعني شنو ؟
مرة عندنا ود جيرانا سال كدا .. وابوهو من النوع الاخلاقو ضيقة داك..
الراجل قال للود: جيب لي مويه ياولد..
الود قال ليهو: موية تشرب ؟؟
الراجل قال ليهو :لا.. موية اكل
لووول ..اها دي حاله دي
تقبلي تحيات العازة
ولك الود
تنقو

الاخ زمراوي تسلم ويديك العافية..يا اخوي ما بينا..انا اعتمدت شرحك الاول ومع الاضافه الان ...وبتاع اساسي داك ختيتو لي عوزة
الحاجة دي اتخايل لي زي الاكسدوز البقولها بوب مارلي ديك مش كدا؟

تسلم كتير

تنقو

المسافر
سافر محطات الوداع ضجت قدامك وراك بيضاء
عليك الله عاين شعرنا زاتو كيف ؟ مافي زول بقول يازول تعال راجع كلو سفر ودياسبورا لوووول
يا اخوي انا كان سكته البسكت ليكم بكري شنو ؟؟ شوف خاتيها فوق كيف
غايتو الله يصبرنا ويدينا عكسها
قول آمين
لك الود
تنقو

توما العزيزه...قلتي لي حبوبتك قالت يضربو ليها بوري بالباقي...لووول ..دي حجم عائلي والله ..تعرفي بمناسبة الاسئله دي ..طبعا اخوانا العراقيين عندهم جن اسمو الساعة كم؟ او بي لهجتهم ( بيش الساعة ) يعيني انت ماشي في الشارع لحدي ما تصل البيت تاخد ليك عشرة بيشبيشات كدا من الساعة..انا كنت بدسها في جيبي ... اها واحد زميلنا جاهو العراقي سالو : بيش الساعة ؟ زميلنا قال ليهو : الساعة واقفة العراقي قال ليهو : واقفة علي ايش قد ؟ يعني واقفه علي كم )؟ لوول .. وتعالي النسالك ..انتي اسم توما دا عندك تومه هنا ولا علي توماهوك.. ولو نجرتي خلي النجارة تكون ناعمة عشان عندنا تلج عاوزين نحفظو بيها ..

دكتور نصر الدين .. تحياتي
تعرف الحكاية عندها تكمله ..اها الود بعد ما جاتو الاجابة دي حقت الموية البتتاكل..ما سكت قال ليهو: اختها وين ؟
رغم انو التربيزة قدامو ..جارنا دنقر وختي اديو في عنقرتو وقال ليهو ختها هنا ... لوول
سلامي ليك روبط روبط

دكتورة بيان قائدة قوات التحالف النسوي.. مرحب بيك في بيان رقم واحد..كدي النسالك ..اسم بيان دا عندو علاقه بي الانقلابات ؟
يعني اسة يادكتورة انا البس البوت حقي ومافي خوف علي الحدوه خالص؟ .. لا تمام..لكن صدقي لاحظت قلتي لي ربنا يحفظ كعب اخيلك..يعني معناها حاجة سمحة بتكون..اها دي حسيتها ليك حسة.. اها اكسدوز دي لاقني في اغنية زاتا اسمها اكسدوز.. كتابك حا اضيفو لي الانسايكلوبيديا حقي ..عليك الله انسياكلو دي ما حلوه ؟ انا زاتي عجبتني لوول

ابو جهينة الراقي ... يعني انا لحدي اسة ما فكتني الكاروشة من دياسبورا تقول لي سندكالي .. ما تخلي كلام المستعلواتية دا ..لكن اتخايل لي لاقتني سندكالي في واحدة من كتب كارل ماركس ولا غورباتشوف امكن وعندها علاقة بالبروستوريكا .. و ما تحاول تراجع كتاب دكتورة بيان بهذا الخصوص لانه يعتمد علي الكلمات المسروقة من العربيه الي الاجنبية .. .. سندكالي مطروحة للبحث والنقاش وفي حاله التعذر سوف نحولها المجتمعين في مشاكوس..
انتو تعالو الناسالكم ماشاكوس يعني شنو ؟
ناس السياسة ممنوعين من الشرح

لوووول

حبيبنا ديكو .. انت دخلت في معمعة العرسان دي ولا شنو .. ؟؟ ضمن منظومة العوده الي الاعراس في موسم الاجازات ؟والعهدة علي الزول زاتووو
اما الشرقية دي ما تسالني منها والله الايام دي عبارة عن حله كوارع من الرطوبة والسخانه بس تجيب معلقتك وتشرب من الهوا طوالي ... واحده اختنا في البالتلك قالت الايام دي في اوربا الدنيا سخانه درجة الحرارة 36 ..قلت ليها 36 دي نحن هنا بنلبس فيها بالطو..
و تم اضافت شرحكم اعلاه لكلمة دياسبورا الي قائمة الشروحات والاماني الي في كتاب التشتت والمعاني
اها ياسيدي انشاء الله الديس لينا والبورة ليكم .. وتورابورا دي حوالينا ولا علينا .

الحبيب ابا..تسلم ياسيدي كتير والله يجعل ايامنا ضحك ياخي بعد العايشنو من دياسبورا دا..لووول
ياخي عاجاباني والله الكلمة دي..اتخايل لي لو واحد قال لي كيف الحال..اقول ليهو والله الدياسبورا عندي عاليه الايام..يعني بالعربي الفصيح كدا شتات خالي محطات

حبيبنا نزار..الله يديك العافية..ويحفظ باندوثنا واياكم
والله انا مستني بي جاي الاجاويد عشان يشرحو لينا جنجويد دي لكن الظاهر الحكاية بتحتاج لي تحري و لجنه تنبثق من لجان اخري..كدي في النهاية كان غلبنا بنشكل ليها لجنه خاصة ونجمع ليها تبرعات

ملكة النحل شيري..دا جزء من عسلكم الممتعننا بيهو في البورد
هي جنس لولوه لكن وانشاء الله جايبه مريسة التام زين..الجمله دي ما عارفها كان جات صاح ولا لا ..لكن عندي خالتي بتقولها في الحاجة المابتجيب نفع رغم التعب فيها..
انتي تعالي النسالك جدة دي الغير فيها شنو ما ياها زي شرقيتنا دي ؟؟ ولا خارج حدود البث ؟

ابو الزفت ..تحياتي
غايتو قبال ما يرد ليك ديكو ..كل الفوق ديل ممكن لكن ليلي طاهر دي شرحها براهو...بس ما تقول لي قولوا لانو فيهو وصفات خاصة بنتفع ناس صباح الدايرين يعرسو ديل..ودا ضد سياسة الانتي دياسبورا..معليش ما بعرف اكتبها بالتنجليزي..راجع صحيح دكتوره بيان للتوضيح

الرحمابي صاحب المواضيع الحنونه
قلت لي ارتكاريا ؟؟ اسة بسالك بقول ليك يعني شنو..لووول
تعرف السياسة دي حراق روح ساي والله ياخي بس افتح ليك قناة اخبارية وحاتك اصلو ما قالو الدنيا بخير وفي ناس تعرس وتنبسط..بس تاخ كتلو..كو 12 ماتو في انفجار..روو 20 تاهو في فيضان كووو ما عارف مفواضات فشلت .. روو امك واحد رئيس شلعوهو الخوالده
والله سببو لينا دياسبورا في افكارنا زاتو
لووول
متعنا بي بوستاتك الحنينة

مايا سلام معاهو كركدي باااااارد في حر المصطلحات دا
انا غايتو ما قريت في السودان الجامعة لكن كنت بمشي الفرع زمان ..ياخي اركان النقاش دي وكلام المصطلحات مبالغة عديل....واحد متذكرو لي اسة قال بتكلم عن الشوفينية....أسالك منها ولا اسكت ؟؟؟ لووووول
______________

بالمناسبة البوستات كترت في الموضوع دا و حاكون رابطة اسمهيا
رابطة مناقشي زواج الكورة في زمن الدياسبورا
المعانا يرفع ايدو

..دكتورة بيان وحاتك البوت ياني الما ملصتو كلو كلو لكن محفظتي دي مجدوعة عشان ما عندي زوجة..انا في الدنيا دي بخاف من حكمين ..حكم العسكر..وحكم الزوجة..الاول دا ضايقين نارو لكن التاني دا..عاملين منو دياسبورا لووول ..ياربي انا بقيت اتكلم في السياسة ولا شنو ؟؟؟

شان ماشي او شماشي انا الزول ابو عمه كبيره ووشن ناعم دا بلاوز لي والله ...وبعدين ما تخاف الزول داك ما قال ليك حاجة كعبه ..يعني زي القال ليك بالسوداني كدا ارحم نفسك لكن باسلوب مستعلواتي..اها اقول ليك زي ما قلت لي بت النفط ديك..باندوث دي حاجة كدا حسها بس..يعني كل ما تجي تكتب ليك موضوع خليك حاسي انو باثر في الباندوث سلبا او ايجابا....ما تقول لي انت مستني اجابة مني ..؟؟ انا غايتو زول سااال لكن اجابات دي تلقاها عند اهل العلم ما تغمس راسك معاهم امكن تطلع ليك بي مصطلح تقشر بيهو

توما ..كلامك صاااااااح ..احسن ليك بعدتي من شرح الكلمة عشان ما تتمسكي بيها وبعد سنة اجي اقول ليك انتي قلتي كدا..لووول..وماكو مشكلة خالص...

اها واحد اتصل بي بالتلفون قبيل قال لي لقيت تفسير لي الكلمة البتفتش ليها..قلت ليهو الحقني بيهو..قال لي دياسبورا دي واضحة جدا اعمل فاصلة بين ديا وبين سبورا
تطلع ليك ديا_ سبورة.. شخبط فيها كل البجي في بالك.... الموضوع جاب ليهو مكالمات..اخير حزب عرس الكورة كان كدا