|
|
 و ما برحل
|
--------------------------------------------------------------------------------
مــــــا برحــل
و ما برحل
ولو سافرتا ولا بقيت
يا ناس بيتنا ماني نسيت
زي ما طاري اطرونا
وبين الصدفه والالفه
و بين اشواقي واللهفه
وحاتكم روحي ممكونه
وبين احلامي والعرفه
وبين الخوفه و الحرفه
بلقى الدنيا امونه
بلاقي الناس تشيل الناس
و بين اللهفه و الاحساس
تقيف خطواتي محزونه
بين الشاطي والمنفى
وبعد احساسي و المرفأ
زراع الخطو مجنونه
و ما برحل ولو سافرتا ولا بقيت
يا احبابي ناس البيت
بيكم روحي مسكونه
********
بجيني الخوف من الفرقه
وسنين الوحده والحرقه
البقت في داخلي مسجونه
و بتذكر كلامكم نم
وقت تحرن مدارج الهم
علي عصب الزمن دونه
بشوفك يمه في الانسام
و في صدر الدجى البسام
مراكب شوق يودونا
علي خاطر الزمن شبال
ولي فرح العديل والفال
مواكب ريد يشيلونا
محنه و خوف من الايام
و من وجع الولف احلام
يطلو يقوموا يغشونا
وقت احلم و اخت راسي
و ارمي علي الامل حسي
يجوا الاشواق يحجونا
بدورك والله يا يمه
و عشاء الضيفان رضى العمه
وقت تحلف يعشونا
********
و القاك يمه في نفسي
و في الضل الكتم نفسي
عوالم ينجلي سكونه
حنانك ياما غطاني
وحضنك ياما دفاني
وقت ايامنا ينسونا
حليل الشارع الصفق
وقت شافك طفح دفق
صحت انغامه موزونه
وشال من الزمن الوان
ومن فرح الطفوله حنان
و اداك حته من لونه
و بتذكر وداعك لي
وقت دمعاتي غطوا عيني
و غرقت روحي في شجونه
كمان فاكر بنات الحي
وقت زاروني رحبوا بي
وكيف انسى البعزونا
وحاتكم انتو لسه معاي
في انفاسي في معناي
وفي الصوت البضج جواي
بنادي تعالوا زورونا
و يا ناس بيتنا ماني نسيت
ولو سافرتا ولا بقيت
بيكم روحي مسكونه
عبدالله وداعه الامين
|
|
 
|
|
|
|
عبدالماجد فرح يوسف
فيس بوك
تويتر
انستقرام
يوتيوب
بنتيريست