|
|
 وصية العازة .. لي بتا السُرة في يوم عرسا
|
آبنية بَدُور أسويلي شوية نضماً، خليهو مِتل الحِجل في كُراعِك.
دحين بتفارقي خيمة الجاموس لاخيمة جنا " ود عرديب ". النصيحة أكان بتتقال فيشان نقاصة العقل، أكان خليتها فيشانك، عيلا بدور أذكرك واحدثك. والدهب بجليهو النار. علوق الشد تب ما بنفع آبنية !! حزمي أمرك واتوكلي ، لا تقصري.
أسمعي مني النحدثك .....
أهلنا الأولين قالوا الفَحَل مو عَوّاف، عيلا فَحل الزمن دة بلحيل عواف، عَودِي راجلك من البداية لا يشوفك إلا بأحسن، لا تنسي نضافة جسمك وتوبك ومطرحك، خمرتك وديلكتك لا تفارق جسمِك تب. دحين المرة أم جسماً حفان مِتل أبو الصِقير العجوز.
آبنية عطني شَعرِك وجِسمك بالودك والكركار، لا تنسي الكُركُم الما خَمج، وحُفرة دُخانَك سَويها شغلتك، دحين أنا رسلت " راجين الله بت مُرسال " فيشان تجيبلك طلحاً وشَاف من القدمبلية، فيشان تعلقي دُخانك.
آبنية أهلنا قالوا السفر بلا زاد هَلاك، البيت بلا مَرة خراب. من الدِغيش رتبي مطرحك، ولمن راجلك يوْعَى من النوم، أول شئ تعدلي سريرو، وتنضِفي غرفتو، وقبل يمرق للخدمة شايو وقهوتو يكونن جاهزات تب، وقبل ما يطلع آبنية لا تقوليلو مطلب، قوليلو كلاماً زين يرقع قليبو.
وكتين يرد من الخدمة آبنية لا تسعليهو، سلِمي عليهو، وسيبيهو الينضم أول، .. آبنية ضُمة ما يلقاك بهدوم الخدمة أو السعية، قبل ما يوصل استحمي والبَسِي نضيف، وسويلك خُمرة، وعَلِكيلك شُوية بخور، أهلنا قالوا الراجل بشم قبل ما يشوف.
آبنية .. المرة النضّامة بتقصر عُمُر راجلا، لا تنضُمي كتير، وفي العَصير لمن تجلسي مع راجلِك أعمليلو كباية قهوة أو شوية شاياً، ووكت تنضُمي أنضُمي في الحديث البريدو، ووكتين يكون عندك مطلب، لا تقوليهو إلا وكتين يكون فَرحان، واكان بِدُوري تسعدِي معاهو أختِي مطلب الفُراش تب !!
آبنية سعادتك في إيدك، أهلنا قالوا البيت مَرة، لا ترفعي صوتك في النضم، لا تَلويلو الكلام، لا تناكريهو، لا تغمزيهو، لا تطاعنيهو في الكلام. وأكان بِدُوري تملكي راجلك أطيعيهو، واكان شدة معاك في النضم، أرخيلو، دحين الحبل أكان شدوهو إتنين بنقطع. إحترمي أهلو فيشان يحترمك.
أهلنا قالوا النضم الشين عفانة الخشُم، والنضم الزين بَخُور البيت، المَرة المُدبِرة حكَّامة بيتا، المَرة البزارة خرَّابة بيتا، الحِكمة مطلوبة والجهالة مُذلة.
الضحكة في وِش الراجل أمان ومطلوبة، والتكشيرة في وِشو مذمُومة.
آبنية أهلنا قالوا العُود الما فيهو شق ما بقول طَق، والفِعل إن غلبك شوف دليلو، والراجل الزين عينو ما بتزوغ ضُمة، عيلا أكان في شئ ناقصو، واكان فَكَر في العِرس تاني، يكون حاربو الدليل تب !!
آبنية مَرفَعِين أكان ما جعان ما بِقِد البهم، والراجل نضمو ما يكتر، عيلا يكون في شئ موجعو منك، والراجل مِتل الجنا الصغير بدور المَلُولا. بدورك تبقي حكيمة فيشان ترتاحي، والراجل لا يشاور إلا المرة الحكيمة.
آبنية سَوِي الزين ونُومِي قَفا، أختِي الشين ينعدِل حالك.
دحين آبنية لو سمعتي حديثي تب عوجة بتجيك مافي، حبوبتك بت " العجب " خبرتني الحديث دة قَبُل أربعين سنة لمن عرّسني أبوك " الجاموس " ، وانا سايسة الجاموس متل الفارس السايس حُصانو الجامح ، لكن أهلنا قالوا "" جَقَلو ولا مَشِي عُرجا "" .
|
|
 
|
|
|
|
aboalkonfod
بلدى يا حبوب
فيس بوك
تويتر
انستقرام
يوتيوب
بنتيريست