|
|
 حسابية البرق لخالد عباس الطاهر
|
رغم أن العزيز راني خليل سبق وأن بقام لتنزيل هذه القصيدة في بوست سابق إلا أنني رايت انزالها مرة اخى نسبة لوضوح هذا التسجيل
حسابية البرق
خالد عباس الطاهر
غيمة الدم حاقنة.. حاقنة
ونحن شمرنالا ساقنا
و البرق فوق كتفو ساقنا
نمشي علي كيف الأحوال
ولما تروح بيناتنا الضحكة
كنت تفلس باب الدم
لي لحن جديد
وترسم شفع روضة
إتشقوا وطفروا حيطة البال
وشقوا غزاز الخاطر عنية
وكاسوا مدس
يتعاطوا الخدر الشعبي
تحت الضُل في طوروا الأول
يرجعوا مبسوطين
الدم والضحكة
مطلوقين في سجل الذاكرة
يفتشوا عن تاريخ ميلاد
لليوم الأسود
ولا واحد راسملوا طريق
وكل الخرط الفي ايدينم
نسل الجنس
عديمة الفايدة
وكل سهم بيناتا يوضح
خط السير
كان بتبرج سهم حقيقي
ويطعن قدم الخطوة الصاح
نرتاح علي أول ضربة ريشة ولون
ونروح في ضربة حظ
وتروح بيناتنا الضحكة
الكان بتوقع لحن
لما الحلة مع عصفور في شجرة
دقشاً بدري يبدو ينشفوا توب المرقة الواحد
وينسلوا منو خيوط اليوم
تبدا تنشف انت
وش البات مبلول بالزلة
جمال النيل يازول
يهدا يرتب جوة الحس
النيل الأزرق اللون الأزرق
يهدا يلون في الوجدان طابيه أحلام
ويسمع حافر الخيل الجامحة يردد
سمحة العافية سمحة سماحة النيل
والطمي الشايل نطفة خلق الكون الأخضر
ونازر الضل للطير
ولي كل اتنين بينقدوا بعض
لا شركان ولا برق خؤن
علشان ما يأشر حتة في سفر الأرض
سجينة الشكل الواحد والمحدود
حته تطلع جيل الطين لي فلك الغنية
وتجري تنزل قمر الليل بي سلم نفس اللحن
يجري يسيل في النيل
وجمال النيل يا زول
وجمال الخدر الشعبي
وجمال الحلة الكان نافورة دم
عظيم ايقاع الحب والدم و الموت
وعظيم الخطو السابق الصوت
في فعل المكني
أبو مروة
عظيم ايقاع الحب والدم و الموت
وعظيم الخطو السابق الصوت
وطه القدال ما لبس حرفوا الكرفتة
بس انّق فيه الفعل
حين ما جاهوا الطين
علي هيئة مسبي ووحالان في القد الأزرق
كانت الموية في قامة جند القرن التاسع للميلاد
وكان بيناتا الموج
بيت حاجة أم خريف دركان
شمّر نون النجدة
وجدع طوق الحرف
علي خاطر جيد جداً
وكان
عظيم ايقاع الحب والدم و الموت
وعظيم الخطو السابق الصوت
في فعل المكني أبو مروة
يا رب الريح و الموج
النواتا النجلوا من ايدنم ومن سيقانم صاري
وين ح يدسوا الحدث المزهر بالاصداف
والمثمر في راحة القيف من الحالة الكيف
عظيم ايقاع الحب والدم و الموت
وعظيم الخطو السابق الصوت
في فعل المكني أبو مروة
Center>
|
|
 
|
|
|
|
الليندي
فيس بوك
تويتر
انستقرام
يوتيوب
بنتيريست