|
|
 أربعين سنه بعيداً عن الحبيبه
|
فى سبتمبر 1964 غادرت الحبيبه امدرمان . تخللتها سنين الدراسه الاولى وسنين الحرمان ومطارده نظام نميرى و16 سنه من البعد وحكومه الجبهه والحب يزداد كل يوم . وشر البليه ما يضحك ونتصبر بمثل هذا الكلام .
................................................
ما تكسروا
بعد التحيه و السلام و البكاء و الحنين و احلي الكلام
و شية الجمر بي طعم الدعاش و الاهل فيهم الرضيع والنزل المعاش
و الشوق بحر لا ليه راس و لا قعر .
و الناس هناك عزاز لا بعرفوا غش و لا بطر
و مع الدغش يدق الباب كو ككو ، اقوم احمر لي سيد اللبن
اقول ليه دق براحه يا متخلف يا ما عندك فهم
يضحك و يقول انت الزول الكان بعيد غايب و ما عندوا هم
اقول ليه لبنك يطير . يضحك و يقول ما ضقتوا ساكت بالفطير
في الزيفه ديك وين تلقاهوا وين ساخن مقنن بالمنين
في المورده اطلب صحن فولا كبير
ما فيه غير شمار ، زيت و يمكن كمان جرجير
احرد اقول . ليه مكسروا ؟ ما قلته ليك ما تكسروا ؟
الناس تقول سمعناك قلته كسرو
و ده فولا سمح الكسير ما بخسرو
عاوزو حب و ما تهبشو
و احلف ياكلوا معاي و اقول
عشان تاني ما تدخلوا
في الناصيه تحت الشجره راجلا كلس
بطيخوا ينسي الزول فلس
بعد التالته يقول ماني قاطع ليك خضار
انته زولا ما بحس
بطيخي كلو احمر . ادفع للتلاته و اقع فيهم نخر
وسط البهايم اشوف لي جضعا سخي
اتالف و اقول ده ما تني ؟
يقولوا لا ده جضعا سخي
حتي بعد فتح الخشم اقول تني
يقولوا انته راسك قوي
اكان غلوا و دخلوا الفرن ما بستوي
و الله راسي ما قوي بس بدور أناكف ناساً بتفهمني
اربعين سنه رطانه بعيد من بله توم روحي و عثمان رفيق دربي
افتح عيني اشوف الكمساري يعاين زي كانو يسال ماك نازل هني
اغمض تاني و اقولو كو . يهزني و يقول هلو
اعاين من الشباك و اشوف قضيب السكه الحديد
لكن الارض مغطيها الجليد اتاري انا حلمان و لسه بعيد من امدرمان .
شوقي
|
|
 
|
|
|
|
|
|
|
 Re: أربعين سنه بعيداً عن الحبيبه (Re: shawgi badri)
|
علي بالطلاق يا أبو فقوق لي منها بس أسبوعين وكان دابو البحر بادي يشرد من خيرانها ولسة وليدات الموردة رامين جبابيدن في أب عنجه، لكن والله يا شوقي إن رجعت ما بتعرفها وماشيه تشكي ليك جنس شكوى، ماشيه تقول ليك يا وليدي بقيت سمينه ومترهله والكرش كبرت والكرعين بقن شبه ما بقدرن على المشي، جنس زحمه وجنس وساع الثورات دي براها بقت قريب المية حاره غير ناس أمبدات الفاتن المرخيات وكان لي الفتيحاب روحت قدام وفاتت الحفر البعيدة ديك ألت السفاية الزمان قاعد يملوا منها اللواري، ومش تقول لي حريف والله كان بقيت سكين ما تقدر تقطع السوق من كترة الخلوق، والعجيب الكارو البجروه بالحمار بقى أكتر من عجلات عطبرة ويزاحم العربات والناس في نص الظلت، وكان شفت الحاجة العجيبة ديك الجابوها ناس الحكومة شيتأكدي زي القرمبع ليه تلاته كرعين تتراجف في نص الشارع وتنفخ ليها جنس دخان بس تقول ترماي السمع حق مشرع شمبات الزمان داك كان تتذكره القاعدين يدوروه بالحطب، قاعد يسموها الرقشه وقالوا جابوها من الهند ولا تفهما عربية ولا موتر والله دي كمان بقت كتيرة لامن مسيخه، وعاد السوق ده ما تجيه مطره إلا يبقى زي حوض الزباله البالنها للجالوص قبل الخريف،،، وكان داير تقول لي داير أهلي وأصحابي القدام على باليمين تحوم يوم كامل في نص الزحمة دي عشان تلم ليك في فد وحيد منهم وكمان كان ما زاغ بعد تعبك ده كله عشان يسك المعيش البقت من جباره زي ما أهلنا ما كانوا بيقولوا دي بقت طاحونة تاكل حتى حجرها اللافي جواها...
أمدرمان ما بقت أمدرمان ولا حتى حبوبة درمان ....
بس ربك يستر ساكت ....
تحياتي
....
الشايقي
...
| |
|
|
|
|
|
|
|
|
|
Re: أربعين سنه بعيداً عن الحبيبه (Re: shawgi badri)
|
شوقي بدري سلام
دخلت البوست وانا علي يقين بانها ام درمان
الحبيبه
والمكان
الام والجيران والحله والسوق وزنكي اللحمه والتيمان ودار الرياضه والبحر وناس الحطب وخور ابو عنجه والامسيات مع ملكها البوش من الجان وابو صليب والونسات العموديه نسبه للعمود
والاذاعه والمسرح القومي والطابيه وحتي عطا ست القونقليس بالشطه
والسؤال المحزن جدا ليه ام درمان تبقا ذكري وبسس
تحياتي الكتيره ليك وللحبيبه
وان درت نعدد المعالم بتكون فكره توثيقيه جميله واكيد عندك الكتير يتقال
شكرا للبوست والحنييين
| |
|
|
|
|
|
|
|
|
|
Re: أربعين سنه بعيداً عن الحبيبه (Re: توما)
|
شوقي بدري سلام واصل ..
والله فعلا حليل امدر حليل ناسا ...وكلنا نقاسمك الحنين لامدرمان ، ورغم ان هذه الامدرمان هجرها اهلنا بعد المهدية لاسباب لا اعلم عنها الكثير الا اني سكنت فيها وعملت في المسرح القومي او الحيشان التلاتة الى ان دخل الغول وفرقنا ولكنها ابدا ستظل مدينة في الوجدان وتسلم استاذنا شوقي ..
| |
|
|
|
|
|
|
|
|
|
Re: أربعين سنه بعيداً عن الحبيبه (Re: عشة بت فاطنة)
|
ابو مهند الشايقى توما فاطمه بت عشه
لكم الود والتحيه .. وشكرا على المداخله
قربته ما اسلم على الشايقى حساده بس لانه لو جاتنى ليله القدر حسه دى وقالت لى عايز شنو اقول ليها بس عاوز اقمد والقه نفسى فى امدرمان .
من الايام المشهوده فى امدرمان اللى الناس قد يكون نسوها يوم الصارقيل , فى بدايه شهر سبعه وفى اثناء الاجازه المدرسيه البحر بزنق على رصيف الرفيرا والنجيله بتتملى مويه ويطلع الصارقيل بكميات مهوله خوفاً من الغرق , فنجمعه ويمتلى كل رصيف الرفيرا وما حولها بصائدى السمك خاصه يوم الجمعه كفستفال يلتقى فيه الناس . وبعضهم يحضر سندوتشاته بعد شراء السنارات والخيوط من دكان الشايقى جنوب دكان بشير بتاع السمك . وهو شقيق لاعب الكوره المحينه . فالعم عثمان سكى وابنه كجل والشيخ مدير الصاج الكبير الوحيدين اللذين يبيعون السمك .
واول مره اشترى السمك من بشير كان برفقه عبد العزيز عبد الله حارس مرمى المريخ الذى قال لى فى صبانا بشير بدى سمك كثير ومافى زحمه فى دكانه . عبد العزيز كان يحب ابدمام فى سوق الزلعه فى المولد . يوم الصارقيل كان يؤرخ به سمعت ناس يقولون لبعض ياخى ما شفتك من يوم الصارقيل داك .
امدرمان ليست هى المدينه فقط او المكان انها ايدلوجيه كامله للتواجد والتفاعل والانصهار . ومعنى سامى للتكامل . حبنا وصداقتنا طاقيه عداواتنا ليست ابداً دائمه فالمناسبات تجمع الناس ولا نفجر فى عداوتنا مرآعاةً للآخرين اللذين يعنون الكثير للطرفين , ولا نخدع او نغدر بلآخرين .
الاخ ابراهيم موسى الخير الصحفى المعروف الذى يعيش فى كوبنهاجن قال لى قبل فتره عندما زار السودان انه لاحظ ان جيران شقيقه الظابط المتقاعد احمد موسى ان اهل الرياض لا يحيون بعضهم البعض . ولكن عندما كان فى ضيافه شقيقته فى الثوره كان الجيران يمرون عليها فى الصباح قبل الزهاب لعملهم ونساء الجيران يتواجدن معها باستمرار لان زوجها كان غير متواجد وكلما يطلب شئ يجده . وتقول شقيقته ده جابوا فلان ود صحبتى وقبيل انت نائم جاء فلان يسلم عليك راجل جارتى . ويجد خروف معلق ويسمع جابوا ناس صحبتى ..... الخ .
فى ايام التجنيد ومطارده الاولاد سألت عن خالتى فقالت شقيقتى مبسوطه اليومين دى ود بتها ساكن معاها فسألت عن السبب فكان الجواب مدسى من التجنيد وعندما قلت وليه مدسى عند حبوبته كان الجواب اجى يا شوقى ادسه فى المغتربين ما ببلغوا عليه جيرانوا . لكن فى امدرمان كان جاء زول غريب ساكت داخل الحله كل زول بعرفو وكان ناس حبوبتو ما دسو الجيران بدسو . ففى امدرمان القديمه الجيران لم يكن يتغيرون .
فى يونيو 1966 زهبت مع والدتى لزياره الخال الدرديرى نقد فى ود درو وكان منزلهم فى شارع 35 العمارات قد اكتمل . والمنزل يواجه خرطوم كلينك والمنزلين نفس الخرطه وملك للخال الدرديرى والد الدكتوره سيده الدرديرى زوجه الدكتور احمد عبد العزيز . ولم نجد فى ود درو سوى الخاله مكه ارباب شقيقه الدكتور على ارباب والوزير زياده ارباب وزوجه الدرديرى نقد . فطلبت مننا ان لا نرفع صوتنا والسبب انهم فى اى لحظه يحضرون لاخذ شئ من المنزل بعد رحولهم ينتهى الامر بمأتم وبكاء ونحيب من الجيران فبعد جيره اربعين عام كان من الصعب الافتراق . هذه هى روح امدرمان .
لكم الحب والتحيه ....
شوقى ....
| |
|
|
|
|
|
|
|
|
|
Re: أربعين سنه بعيداً عن الحبيبه (Re: shawgi badri)
|
تعرفوا ياجماعه بغربة ست سنوات رجعت امدرمان وكعادتنا زمان بنمشي البحر اقصد البحر بيجنا في البيت والله جد لا نو حوشنا اخر بيت في ابوروف وانت ماشي علي حي الدباغة يعني بيتنا بيفتح على البحر,المهم كان نفسي امشي البحر والعب واستحم مع اولاد قرف(تسمية تطلق على الشماسة)سالت احد اقربائي وبعد تحانيس رضى يمشي معاي(ماخايف عشان الرفقة وحاجات تانية حامياني)بس وصلنا البحر ركنا العربية مع طرف الموية واشعلنا سجارتنا,اذا باحد الشباب يجي ويسالنا اذا كنا نريد غسل العربة اجبناه بلا,قلت له ضاحكا نريد عسلية..ضحك واجابني يازول انت من جاي حليل زمن العسلية وناسا مازمان الحكومة كشتم وودتهم ورا الجبل,واردف قائلا هو الحمام والقعاد في البحر منعهو,,والله لم يكمل كلامه اذ بعربة بوكس ظهرية وبها ثلة من العسكر تقف امامنا ويطلب منا الضابط الرخصة وان نذهب معه الى القسم وعند وصولنا القسم قال لنا العسكري افدوا نفسكم,,,فدينا انفسنا بعلبة برنجي و5الف,,,,,,,,وراجع ليكم
| |
|
|
|
|
|
|
| |
shawgi badri
Al-Shaygi
توما
عشة بت فاطنة
محمد الامين احمد
فيس بوك
تويتر
انستقرام
يوتيوب
بنتيريست