|
|
 حكايات من السودان الحبيب
|
الاخوه بالمنبر تحياتى
شكرا على الترحيب الحار لى من فترة واسفة لعدم المشاركة فى الفترة الفاتت لانى كنت فى اجازة طويلة فى السودان ، وطبعا زى ماعارفين الانترنت ما ساهل تلم فيه, آو بالاصح مافى زمن ليه من الجرى الشديد.
حبيت اشارك ببعض الحاجات المرت بالواحد هناك ومنها الناس ممكن تاخذ صورة عن وضع البلد.
1- كنت ماشه ازور “My Mother & father in-law “ (بحب استعمل دى بدل النسيبه ولا الحماة) فى رفاعة، معاى اخوى وزوجته. اول ما وصلنا جنب سوبا، وقفنا فى كشك المرور السريع ودفعنا 4000 جنيه رسوم مرور (لمغادرة الخرطوم). بعد حوالى سبعة ساعات جينا راجعين للخرطوم وفى نفس الكشك وقفونا عشان ندفع رسوم دخول للخرطوم. أخوى رفض يدفع وجرى الحوار ده بينه وبين عسكرى الامن:
- انا ما حا ادفع الا اعرف انتو بتشيلوا رسوم مغادرة ولا دخول، ما ما ممكن نحنا ندفع لمن نغادر ولمن ندخل...!
-- العسكرى: يآخ نحنا بنفذ اوامر وبس
- اخوى: ممكن اشوف المنشور الجات فيه الاوامر دي
-- العسكرى: جدا ( فتشوا المنشور حوالى 25 دقيقة ) اهو دا ياخينا
- أخوى: ياخى ماحرام عليكم فى المنشور ده مكتوب للمغادرين او الداخلين ( الخرطوم مدنى وبالعكس) الرسوم الفين ونص (2500) جنيه طيب الالف ونص التانيه دى بتمشى وين .....!!!
--العسكرى: ياخ انت باين عليك زول بتاع مشاكل ، خلاص اذا دفعت قبيل اربعة الف ادفع هسة الف وتكون كده دفعت حق الرجعه ...!!!!!!!!
2- مشيت الدكان اشترى حاجات ده الحوار الدار بينى وبين بتاع الدكان فى الثورة امدرمان:
- صباح الخير
- اهلا وعليكم السلام
- عندك جبنه؟
- أيّ.. عاوزة بيكم
- ادينى كيلو...
وهنا لاحظته اندهاشه على وجهه لكن مشه ووزن لى كيلو الجبنه
- ادينى صابون بودره كيس كبير، كروسة كبريت، وطبق بتاع بيض ادينى برضوا كيلو بتاع طحنيه...
- بتاع الدكان: أنت يا أخت جايه من وين؟
- ليه؟
- لانوا مافى زول بيشترى الحاجات دى كده ويكون من هنا!!!! انت اكيد جايه من بره..!!!!!
3- ماشيت اشتري اشرطة كاسيت، الدكان كله اشرطه عربيه( نانسى عجرم، راويه، اصاله....الخ). انا كنت بفتش لمحمد وردى، سالت بتاع الدكان :
- اسمع ماعندكم اشرطه لمحمد وردى؟
- موجوده... وطلع لى اخر شريط لوردى
- انا عاوزه اغانى قديمه زى ( دورى دورى، الود، وتوعدنا وتبحل بالصوره)
- شنو... انت يا بت العم جايه من وين، الاغانى دى انت من زمنه...!!!!!
ماعايزة اطول عليكم
أقبال كرار---كاليفورنيا
|
|
 
|
|
|
|
|
|
|
|
Re: حكايات من السودان الحبيب (Re: Egbal Karrar)
|
الاخت العزيزة
ياخي اول حاجة حمدالله علي سلامة العودة من الاجازة و سلامة الرجوع للبورد و الله شفقتينا و قلنا الزولة دي غيرت رأيها من البورد و اللا شنو ؟ و طبعا الاجازة في السودان تصحبها حكاوي و قصص لذيذة و مضحكة و مبكية وخاصة لاولئك الذين طال غيابهم عن الوطن .
الحديث عن الرسوم الغريبة و المامعروف رأسها من قعرها كتيرة و تبدأ معك من مطار الخرطوم وتلاحظين انك تدفع 1000 جنيه عندما تغادر بعربتك موقف المطار واذكر انني ذات مرة كنت بصحبة احد الاصدقاء جاء ليستفباني في المطار وحينما طالبه الموظف القابع داخل تلك الغرفة الضيقة بدفع 1000 جنيه قال له صديقي " زميل" فسمح لناذلك الموظف بالمرور فقلت لصديقي ضاحكا: " انت ياخوي اشتغلت في الامن من ورانا و اللا ايه ياولي" .
لكن انتي فعلا مفترية , يعني تمشي لدكان الحلة و كمان في الثورة و تقولي دايرة كيلو جبنة بأكمله , ياخ بالغتي , كان تقولي : ملعقة موية جبنة!!!
يالله يااقبال واصلي حكاياتك باقي انتي حكاية و نضامة .
تحياتي الي الاسرة الكريمة و الصغار علي و دينا.
| |
|
|
|
|
|
|
|
|
|
Re: حكايات من السودان الحبيب (Re: Khalid Eltayeb)
|
الاخت أقبال
في نكتة قديمة بقولوها ناس عطبرة ( كان في جزار شغال في عطبرة ، وبعدين الامور ما مشت معاهو مشي فتح محل في الخرطوم 3 )، ولأول مرة يكتشف انو اللحمة بشتروها بالكيلو ، واخذ زمن عشان يعتاد على الوضع ده ، وبعد ما أتعود ، جاهو واحد قالوا (ياخي لو سمحت أديني ربع كيلو) طوالي الراجل طلع من المحل وشمر مريلتو وجاء للزبون بي برة وسلم عليه سلام حار شديد وسالوا ( ياخي أنت جيت من عطبرة متين والله مشتاقين لناس عطبرة وكيف الناس .... الخ ) عرف أنو من عطبرة لانو أشترى ربع كيلو.
لكن حالتك مختلفة 180 درجة ، يعني زولك ده ما مشي كلفورنيا عشان يسالك من ناس كلفورنيا ولوس أنجلوس بعد ما طلبتي كيلو الجبنة والطحنية. والله بالغتي يا أقبال وما رعيتي شعور الناس أصلو ، وبعدين تقولوا ناس السودان أتغيرو.
| |
|
|
|
|
|
|
|
|
|
Re: حكايات من السودان الحبيب (Re: Egbal Karrar)
|
سلام يا خالد وصديق,
الله يسلمك ياخالد، طبعا انا بصراحة خفت من البورد ده اول ما جيت لانو كان فى شكل ورفد شديد.
الحكاوى كتيره وما بتكمل، طبعا ضحكت على ردك ورد اخونا صديق. وطبعا تانى مره لمن مشيت الدكان، فعلا طلباتى كانت مختلفه وبتاع الدكان قام قال لى:
" خلاص عرفتى قيمة القروش الحقيقية... انا والله كنت عارفك بعد يومين حتبقى من ناس الحته دى" ها ها ها ...
| |
|
|
|
|
|
|
|
|
|
Re: حكايات من السودان الحبيب (Re: Egbal Karrar)
|
الاخت Egbal
تحية طيبة
حكايات لطيفة وخفيفة الدم.. ولقد ذكرتنى بالنكتة التى حكاها الراحل عبد العزيز محمد داوود واوردها الراحل على المك فى كتابه عن ابو داوود.. أنقل لكم النكتة من الكتاب:
" كان احد اخواننا المصريين يعمل فى السودان زمن طويل جدآ، ولما رجع مصر كان بتكلم عن السودان والرخا والحاجات الفيه والخيرات، وبعد كده بسنين طويلة رجعوه السودان تانى.. كان الراجل المصرى ده بحب الجبنة جدآ، وزمن كان هنا فى الاول الكيلو كان بعشرين قرش، طوالى اول ما نزل فى المحل بتاعو طلع يشترى جبنة من اقرب دكان.. الكيلو كان حصل طبعآ طاشر جنيه.. قام قدم لسيد الدكان خمسة وعشرين قرش وقال ليه: ادينى جبنة، زولك صاحب الدكان قطع ليه حتة فى راس السكين قدر الطابعة المصرى، شالا اكلا على طول وقال للراجل ( اوزن لى بقى)!!
| |
|
|
|
|
|
|
|
|
|
Re: حكايات من السودان الحبيب (Re: Egbal Karrar)
|
يااقبال
منتظرينك تواصلي و الحكاوي كتيرة , ادينا واحدة قوية كدة من نوع الركشات البتوصلك لحدي خشم المزيرة جوة البيت و التخسيس الاجباري نتيجة ركوب الركشات و ماتنسي كمان تدينا فكرة عن سعد قشرة و السوق الشعبي بامدرمان ووووووووو الخ ..............
| |
|
|
|
|
|
|
|
|
|
Re: حكايات من السودان الحبيب (Re: Khalid Eltayeb)
|
سلام ياخالد ودى حكاية عن امجاد. أمجاد دى يا جماعة الما مشوا السودان ليهم فتره، عبارة عن عربيه صغيرة بتشيل حوالى 8 افراد بتستعمل للنقل العام والخاص. العربية صغيره جدا وخفيفه، اخيرا بقت واحده من اشهر عربات الحوادث مسببات الموت فى الخرطوم. بتستعمل فى كل المناطق، الفرق بينها وبين الركشه انها ممكن تقطع الكبارى.
بعد مطره شديد كده، فى واحد وصل ليه مشوار لامتداد ناصر، وهو راجع من المشور عربيته وحلت فى مدخل من شوارع الرياض. الشوارع كلها مقفله بالطين، وصاحبنا ده عطل الحركة تعطيل شديد. والناس طبعا بدؤا يضربوا ليه فى البورى ويكوركا فيه:
- يا بن العم ياخ ما تتحرك شويه ما تعطيلنا
- واحد تانى: يا زول ما تتحرك انت الدخلك الشارع ده شنو دى عربيه يدخلوا بيه فى مويه زى دى.
صاحب الامجاد نزل من العربيه وقبل على صف العربات الوراهوا وقال ليهم:
" اعمل ليها شنو يعنى اشيلها فى ضهرى ولا شنو يعنى" ها ها ها
| |
|
|
|
|
|
|
|
|
|
Re: حكايات من السودان الحبيب (Re: ود الشيخ)
|
اقبال حمد الله على سلامة عودتك من الوطن وعودتك للمنبر
خواطر ومواقف وإنطباعات ظريفة
بس إنتي رجعتي مفترية شوية ايه حكاية الكيلو دي؟؟؟
جارنا صاحب البقالة حكى لي نكتة عن واحد قريبه (من أهل العوض) جابه من البلد يشتغل معاه ويساعده في البقالة ويتعلم الشغل على أمل إنه يفتح ليه بقالة في حي تاني بعد التدريب طبعا
قام طلع ليه مشوار الصباح وجاه بعد الفطور وشاف صفيحة الجبنة ناقصة شديد وكذلك صفيحة الطحنية وقال في نفسه والله الزول دا مبروك وفي قدومه الخير
قال شايفك بعد كتير من الجبنة والطحنية... قال ليه ما بعت حاجة .. سأله بأستغراب والجبنة والطحنية مشت وين ؟؟؟ قال ليه ... والله فطرنا أنا والجماعة اصحابك ديل البيقعدوا قدام الدكان!!!!!!!!!
| |
|
|
|
|
|
|
| |
Khalid Eltayeb
Sidig Rahama Elnour
Adil Osman
Habib_bldo
willeim andrea
فيس بوك
تويتر
انستقرام
يوتيوب
بنتيريست